Eagrán sealadach

BREITHIÚNAS NA CÚIRTE (an Ceathrú Dlísheomra)

19 Márta 2026 (*)

(Tarchur chun réamhrialú – Iompar iarnróid – Treoir 2012/34/CE – Bonneagar iarnróid – Neamhspleáchas bainistíochta – Airteagal 4(2) – Neamhspleáchas bainisteoirí bonneagair – Táillí ar bhonneagar agus ar sheirbhísí – Airteagal 29(1) – Táillí a bhunú agus a bhailiú – Córas táillí le haghaidh úsáid bonneagair iarnróid na Gearmáine – Iompar paisinéirí iarnróid ghearrthurais – Méid na dtáillí a ríomh – Méid na meántáillí arna dtobhach le linn tréimhse thagartha a iolrú faoi ráta méadaithe bliantúil seasta dá bhforáiltear le dlí)

I gCás C‑770/24,

IARRAIDH ar réamhrialú faoi Airteagal 267 CFAE, ó Verwaltungsgericht Köln (Cúirt Riaracháin Köln, an Ghearmáin), trí bhreith an 6 Samhain 2024, a fuarthas ag an gCúirt an 7 Samhain 2024, sna himeachtaí

DB InfraGO AG,

DB RegioNetz Infrastruktur GmbH

v

Poblacht na Gearmáine,

páirtithe leasmhara:

DB Fernverkehr AG,

DB Cargo AG,

Land Berlin,

Bayerische Eisenbahngesellschaft mbH,

Zweckverband Nahverkehr Westfalen‑Lippe,

Land Brandenburg,

Land Baden‑Württemberg,

Land Sachsen‑Anhalt,

BBL Logistik GmbH,

boxXpress.de GmbH,

DeltaRail GmbH,

Eisenbahngesellschaft Potsdam mbH,

Havelländische Eisenbahn AG,

HSL Logistik GmbH,

Hupac Intermodal SA,

ITL Eisenbahngesellschaft mbH,

Lineas NV,

METRANS Rail (Deutschland) GmbH,

Rheincargo GmbH & Co. KG,

SBB Cargo Deutschland GmbH,

TX Logistik AG,

Verkehrsbetriebe Peine-Salzgitter GmbH,

FlixTrain GmbH,

Zweckverband go.Rheinland,

RDC Autozug Sylt GmbH,

BTE BahnTouristikExpress GmbH,

tugann AN CHÚIRT (an Ceathrú Dlísheomra),

agus í comhdhéanta mar seo a leanas: I. Jarukaitis, Uachtarán Dlísheomra, M. Condinanzi, N. Jääskinen, R. Frendo agus A. Kornezov (Rapóirtéir), Breithiúna,

Abhcóide Ginearálta: M. Campos Sánchez-Bordona,

Cláraitheoir: F. Cathagne, Riarthóir,

ag féachaint don nós imeachta i scríbhinn agus tar éis éisteacht an 4 Nollaig 2025,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

–        DB RegioNetz Infrastruktur GmbH agus DB InfraGO AG, ag R. Etzold, i gcáil Gníomhaire, le cúnamh ó H.R.J. Krüger, Rechtsanwalt,

–        Bundesrepublik Deutschland, ag U. Geers, C. Mögelin agus V. Schmidt, i gcáil Gníomhairí,

–        DB Fernverkehr AG agus DB Cargo AG, ag C. Leitzke,

–        Bayerische Eisenbahngesellschaft mbH, ag L. Kohlberg agus T. Stockmann, Rechtsanwälte,

–        BBL Logistik GmbH, boxXpress.de GmbH, DeltaRail GmbH, Eisenbahngesellschaft Potsdam mbH, Havelländische Eisenbahn AG, HSL Logistik GmbH, Hupac Intermodal SA, ITL Eisenbahngesellschaft mbH, Lineas NV, METRANS Rail (Deutschland) GmbH, RheinCargo GmbH & Co. KG, SBB Cargo Deutschland GmbH, TX Logistik AG, Verkehrsbetriebe Peine-Salzgitter GmbH, ag J. Bethge, M. Dästner agus D. Stachurski, Rechtsanwälte,

–        FlixTrain GmbH, ag C. Maurer agus D. Scholz, Rechtsanwälte,

–        Ríocht na hIorua, ag H. Schulstad, i gcáil Gníomhaire, le cúnamh ó L. Tvedt, advokat,

–        an Coimisiún Eorpach, ag M. Noll-Ehlers agus K. Walkerová, i gcáil Gníomhairí,

tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,

an Breithiúnas seo a leanas:

Breithiúnas

1        Baineann an iarraidh ar réamhrialú le léiriú Airteagal 4(2) agus Airteagal 29(1) de Threoir 2012/34/AE ó Pharlaimint na hEorpa agus ón gComhairle an 21 Samhain 2012 lena mbunaítear limistéar iarnróid Eorpach aonair (IO 2012 L 343, lch. 32, agus ceartúchán IO 2020 L 351, lch. 64), arna leasú le Treoir (AE) 2016/2370 ó Pharlaimint na hEorpa agus ón gComhairle an 14 Nollaig 2016 (IO 2016 L 352, lch. 1) (‘Treoir 2012/34’).

2        Rinneadh an iarraidh seo in imeachtaí idir DB InfraGO AG agus DB RegioNetz Infrastruktur GmbH agus Bundesrepublik Deutschland (Poblacht Chónaidhme na Gearmáine), arna ionadú ag an Bundesnetzagentur (Gníomhaireacht Líonraí na Cónaidhme, an Ghearmáin), maidir le méid na dtáillí is infheidhme maidir le húsáid an bhonneagair iarnróid arna bhainistiú ag na hiarratasóirí sna príomhimeachtaí a chinneadh le cinneadh ón ngníomhaireacht sin.

 An dlí lena mbaineann

 Dlí an Aontais Eorpaigh

3        Luaitear an méid seo a leanas in aithrisí 5, 43 agus 66 de Threoir 2012/34:

‘(5)      Chun iompar d’iarnród a dhéanamh éifeachtúil agus iomaíoch i gcomparáid le modhanna eile iompair, ba cheart do na Ballstáit a áirithiú go bhfuil stádas oibreoirí neamhspleácha ag gnóthais iarnróid a chuireann ar a gcumas dóibh iad féin a iompar ar bhealach tráchtála agus oiriúnú do riachtanais an mhargaidh.

[...]

(43)      Laistigh den chreat arna leagan amach ag na Ballstáit, ba cheart do chórais muirearaithe agus leithdháilte toillte bainisteoirí bonneagair iarnróid a spreagadh chun an úsáid is fearr is féidir a bhaint as a mbonneagar.

[...]

(66)      Is gá infheistíocht a dhéanamh i mbonneagar iarnróid agus ba cheart do chórais muirearaithe bonneagair dreasachtaí a sholáthar do bhainisteoirí bonneagair chun infheistíochtaí iomchuí a dhéanamh tarraingteach ó thaobh airgeadais de.’

[Aistriúchán neamhoifigiúil]

4        Foráiltear le hAirteagal 3(2f) den Treoir sin:

‘Chun críocha na Treorach seo, tá feidhm ag na sainmhínithe seo a leanas:

[...]

ciallaíonn “feidhmeanna fíor-riachtanacha bainistithe bonneagair” cinnteoireacht maidir le leithdháileadh bealaí traenach, lena n‑áirítear sainiú agus measúnú ar infhaighteacht agus leithdháileadh bealaí traenach aonair, agus cinnteoireacht maidir le muirearú bonneagair, lena n‑áirítear táillí a chinneadh agus a thobhach, i gcomhréir leis an gcreat muirearaithe agus leis an gcreat leithdháilte toillte arna bhunú ag na Ballstáit de bhun Airteagail 29 agus 39’.

[Aistriúchán neamhoifigiúil]

5        Foráiltear le hAirteagal 4(2) den Treoir sin, dar teideal ‘Neamhspleáchas gnóthas iarnróid agus bainisteoirí bonneagair’:

‘Agus an creat muirearaithe agus leithdháilte agus na rialacha sonracha arna mbunú ag na Ballstáit á n‑urramú, beidh an bainisteoir bonneagair freagrach as a bhainistiú, riarachán agus rialú inmheánach féin.’

[Aistriúchán neamhoifigiúil]

6        Foráiltear le hAirteagal 7(1) agus (2)(a) de Threoir 2012/34, dar teideal ‘Neamhspleáchas na bhfeidhmeanna fíor-riachtanacha’:

‘1.      Áiritheoidh na Ballstáit go mbeidh neamhspleáchas eagraíochtúil agus cinnteoireachta ag an mbainisteoir bonneagair, laistigh de na teorainneacha a leagtar amach in Airteagal 4(2) agus in Airteagail 29 agus 39, i ndáil leis na feidhmeanna fíor-riachtanacha.

2.      Chun mír 1 a chur i bhfeidhm, áiritheoidh na Ballstáit an méid seo a leanas go háirithe:

(a)      ní fheidhmeoidh gnóthas iarnróid ná aon eintiteas dlítheanach eile tionchar cinntitheach ar an mbainisteoir bonneagair i ndáil leis na feidhmeanna fíor-riachtanacha, gan dochar do ról na mBallstát maidir leis an gcreat muirearaithe agus an creat leithdháilte toillte agus na rialacha sonracha muirearaithe a chinneadh i gcomhréir le hAirteagail 29 agus 39.’

[Aistriúchán neamhoifigiúil]

7        Foráiltear le hAirteagal 8(2) agus (4) den Treoir sin, dar teideal ‘Maoiniú an bhainisteora bonneagair’:

‘2.      I gcomhréir le hAirteagail 93, 107 agus 108 [CFAE], féadfaidh na Ballstáit maoiniú a dheonú freisin don bhainisteoir bonneagair atá comhoiriúnach lena fheidhmeanna dá dtagraítear in Airteagal 3(2), méid an bhonneagair agus na riachtanas airgeadais, go háirithe chun infheistíochtaí nua a chumhdach. Féadfaidh na Ballstáit a chinneadh infheistíochtaí den sórt sin a mhaoiniú ar bhealaí eile seachas maoiniú díreach Stáit. In aon chás, comhlíonfaidh na Ballstáit na ceanglais dá dtagraítear i mír 4 den Airteagal seo.

[...]

4.      Áiritheoidh na Ballstáit go ndéanfaidh cuntais bhrabúis agus chaillteanais an bhainisteora bonneagair, faoi ghnáthdhálaí gnó agus thar thréimhse réasúnta nach faide ná 5 bliana, comhardú ar a laghad ar ioncam ó tháillí bonneagair, barrachais ó ghníomhaíochtaí tráchtála eile, ioncam neamh-inaisíoctha ó fhoinsí príobháideacha agus ó mhaoiniú Stáit, lena n‑áirítear réamhíocaíochtaí ón Stát i gcás inarb iomchuí, ar thaobh amháin, agus ó chaiteachas bonneagair ar an taobh eile.’

[Aistriúchán neamhoifigiúil]

8        I gCaibidil IV den Treoir sin, dar teideal ‘Muirearú bonneagair iarnróid agus leithdháileadh acmhainneachta bonneagair iarnróid’, i Roinn 2, dar teideal ‘Muirearú bonneagair agus seirbhísí’ agus ina gcuimsítear Airteagail 29 go 37 di, foráiltear le hAirteagal 29(1) den Treoir sin, dar teideal ‘Táillí a bhunú agus a bhailiú’:

‘Bunóidh na Ballstáit creat muirearaithe agus an neamhspleáchas bainistíochta arna leagan síos in Airteagal 4 á urramú.

Faoi réir an choinníll sin, bunóidh na Ballstáit freisin rialacha sonracha muirearaithe nó déanfaidh siad an chumhacht sin a tharmligean don bhainisteoir bonneagair.

Cinnteoidh na Ballstáit go bhfuil an creat muirearaithe agus rialacha muirearaithe nó suíomh gréasáin ar a bhfoilsítear an creat muirearaithe agus na rialacha muirearaithe sa ráiteas gréasáin.

Cinnfidh agus baileoidh an bainisteoir bonneagair an táille ar úsáid bonneagair i gcomhréir leis an gcreat muirearaithe bunaithe agus leis na rialacha muirearaithe bunaithe.’

[Aistriúchán neamhoifigiúil]

9        Foráiltear le hAirteagal 30(1) den Treoir sin, dar teideal ‘Costas bonneagair agus cuntais’:

‘Agus ceanglais sábháilteachta á n‑urramú agus cáilíocht seirbhíse an bhonneagair á coimeád ar bun agus á feabhsú, spreagfar an bainisteoir bonneagair trí dhreasachtaí chun na costais a bhaineann le soláthar bonneagair agus leibhéal na dtáillí rochtana a laghdú.’

[Aistriúchán neamhoifigiúil]

10      Foráiltear le hAirteagal 31(3) de Threoir 2012/34, dar teideal ‘Prionsabail an mhuirearaithe’:

‘Gan dochar do mhír 4 nó 5 den Airteagal seo nó d’Airteagal 32, socrófar na táillí don phacáiste íosrochtana agus do rochtain ar bhonneagar lena nasctar saoráidí seirbhíse ag an gcostas a thabhaítear go díreach mar thoradh ar an tseirbhís traenach a oibriú.’

11      Foráiltear le hAirteagal 32(1) agus (3) den Treoir sin, dar teideal ‘Eisceachtaí maidir le prionsabail an mhuirearaithe’:

‘1.      D’fhonn aisghabháil iomlán na gcostas arna dtabhú ag an mbainisteoir bonneagair a fháil, féadfaidh Ballstát, más féidir leis an margadh an méid seo a sheasamh, méaduithe a ghearradh ar bhonn prionsabal éifeachtúlachta, trédhearcach agus neamh-idirdhealaitheach, agus iomaíochas optamach deighleoga an mhargaidh iarnróid á áirithiú. Urramóidh an córas muirearaithe na méaduithe ó thaobh táirgiúlachta de a bhainfidh gnóthais iarnróid amach.

Ní choiscfidh leibhéal na dtáillí, áfach, úsáid an bhonneagair ag deighleoga margaidh ar féidir leo ar a laghad an costas a thabhaítear go díreach mar thoradh ar an tseirbhís iarnróid a oibriú a íoc, móide ráta fillte ar féidir leis an margadh a sheasamh.

Roimh ghearradh méaduithe amhail a fhormheas, cinnteoidh na Ballstáit go ndéanfaidh na bainisteoirí bonneagair a n‑ábharthacht do dheighleoga margaidh sonracha a mheas, agus na péirí a liostaítear i bpointe 1 d’Iarscríbhinn VI á meas ar a laghad agus na cinn ábhartha a choimeád. Beidh sa liosta de dheighleoga margaidh arna sainiú ag bainisteoirí bonneagair ar a laghad an trí dheighleog seo a leanas: seirbhísí lastais, seirbhísí do phaisinéirí faoi chuimsiú conartha seirbhíse poiblí agus seirbhísí eile do phaisinéirí.

Féadfaidh bainisteoirí bonneagair idirdhealú a dhéanamh thairis sin idir deighleoga margaidh de réir an tráchtearra nó na bpaisinéirí a iompraítear.

[...]

3.      I gcás tionscadal infheistíochta sonrach sa todhchaí nó tionscadal infheistíochta sonrach a chuirtear i gcrích i ndiaidh 1988, féadfaidh an bainisteoir bonneagair táillí níos airde a shocrú nó a choimeád bunaithe ar chostas fadtéarmach tionscadail den sórt sin, ar choinníoll gur tionscadail iad lena bhfeabhsaítear éifeachtúlacht agus/nó brabúsacht agus nach bhféadfaí, murach sin, iad a chur chun feidhme nó nach bhféadfaí iad a bheith curtha chun feidhme. [...]’

[Aistriúchán neamhoifigiúil]

12      Foráiltear le hAirteagal 33(3) den Treoir sin, dar teideal ‘Lascainí’:

‘Féadfaidh bainisteoirí bonneagair córais lascainí a thabhairt isteach atá ar fáil d’úsáideoirí uile an bhonneagair, le haghaidh sreabhadh tráchta sonraithe, lena ndeonaítear lascainí atá teoranta ó thaobh ama de chun forbairt seirbhísí nua iarnróid a spreagadh, nó lascainí lena spreagtar úsáid línte atá tearcúsáidte go mór.’

 Dlí na Gearmáine

13      Foráiltear le hAirteagal 36 den Eisenbahnregulierungsgesetz (an Dlí maidir le rialáil iarnród) an 29 Lúnasa 2016 (BGBl. 2016 I, lch. 2082), arna leasú le hAirteagal 2 den Gesetz zur Weiterentwicklung des Eisenbahnregulierungsrechts (an Dlí maidir le reachtaíocht iarnróid a fhorbairt) an 9 Meitheamh 2021 (BGBl. 2021 I, lch. 1737) (‘ERegG’), dar teideal ‘Struchtúr táillí’, don mhéid seo a leanas i mír 2:

‘Ní mór do bhainisteoir bonneagair iarnróid breithniú a dhéanamh ar a mhéid a fhéadfaidh feidhm a bheith ag méaduithe maidir le seirbhísí iompair sonracha nó le deighleoga margaidh sonracha. Chun é sin a dhéanamh, ní mór dó scrúdú a dhéanamh ar na péirí seirbhísí nó ar na deighleoga margaidh [...] agus na cinn sin atá ábhartha a roghnú, ach ar a laghad

1.      seirbhísí iompair lasta;

2.      seirbhísí iompair iarnróid gearrthurais do phaisinéirí agus seirbhísí eile iompair do phaisinéirí faoi chonradh seirbhíse poiblí, agus

3.      seirbhísí iompair fad-achair iarnróid do phaisinéirí.

Níor cheart go n‑eisiafaí leis na táillí a chuirtear i bhfeidhm úsáid iarnród le haghaidh seirbhísí iompair nó deighleoga margaidh ar féidir leo ar a laghad na costais a bhaineann go díreach le hoibriú iarnróid a ghiniúint agus toradh is féidir leis an margadh a sheasamh. Ní mór méaduithe a roghnú sa chaoi go gcumhdóidh seirbhísí lasta agus paisinéirí na costais uile arna dtabhú ag an mbainisteoir bonneagair iarnróid.’

[Aistriúchán neamhoifigiúil]

14      Foráiltear le hAirteagal 37 de ERegG, dar teideal ‘Struchtúr táillí ar shaoráidí iarnróid agus ar stáisiúin paisinéirí le haghaidh seirbhísí iompair paisinéirí faoi chonradh seirbhíse poiblí; tuarascáil maidir le costais a chumhdach’, i míreanna 1 agus 2 de:

(1)      Más rud é, ar feadh thréimhse bhailíochta an tráthchláir lena mbaineann, go bhfuil cistí ag na Länder ón Stát Cónaidhme le haghaidh iompar poiblí gearrthurais do phaisinéirí, go háirithe le haghaidh iompar paisinéirí ar iarnród (ciste réigiúnaithe), ní mór do ghnóthais bonneagair iarnróid an Stáit Cónaidhme a shocrú, le haghaidh seirbhísí iompair, [...] méid na dtáillí as úsáid saoráidí iarnróid in aghaidh an Land agus as úsáid stáisiún paisinéirí in aghaidh an limistéir údaráis eagrúcháin.

(2)      Déanfar méid na dtáillí dá dtagraítear i mír 1 a ríomh, le haghaidh gach Land nó, i gcás táillí stáisiúin paisinéirí, le haghaidh gach limistéir údaráis eagrúcháin, ar bhealach a chomhfhreagróidh do mheántáille an tráchta atá i gceist le haghaidh shaoráidí iarnróid an Land lena mbaineann le linn thréimhse bhailíochta thráthchlár 2020/2021 agus le haghaidh stáisiúin paisinéirí i limistéar comhfhreagrach an údaráis eagrúcháin le linn na bliana féilire 2021. A mhéid a tháinig athrú ar mhéid iomlán an mhaoinithe réigiúnaithe is iníoctha leis na Länder idir 2021 agus an bhliain nach mór an táille a íoc iarbhír, ní mór méid na dtáillí dá dtagraítear i mír 1 a choigeartú tríd an ráta bliantúil athraithe a leagtar síos in Airteagal 5(3) den [Gesetz zur Regionalisierung des öffentlichen Personennahverkehrs (Regionalisierungsgesetz – RegG) (An Dlí maidir le réigiúnú iompair phoiblí taistealaithe gearrthurais)] an 27 Nollaig 1993 (BGBl, 1993 I, lch. 2378, (2395)) a chur i bhfeidhm.’

15      Foráiltear le hAirteagal 45(1) de ERegG, dar teideal ‘Táillí agus prionsabail mhuirearaithe a fhormheas’:

‘Déanfaidh an t‑údarás rialála táillí bainisteora bonneagair iarnróid chun an pacáiste seirbhísí íosrochtana a sholáthar, lena n‑áirítear na prionsabail mhuirearaithe dá dtagraítear i bpointe 3 d’Iarscríbhinn 2, a fhormheas. Deonófar údarú a mhéid a chomhlíonann an cinneadh maidir le táillí ceanglais Airteagail 24 go 40 agus Airteagal 46 agus go gcomhlíonann na prionsabail mhuirearaithe ceanglais Iarscríbhinn 3, pointe 2. I gcás nach gcomhlíonann cinneadh na dtáillí ceanglais Airteagail 24 go 40 agus Airteagal 46, féadfaidh an t‑údarás rialála ríomh na dtáillí a choigeartú a mhéid is gá agus na táillí a eascróidh as sin a fhormheas.’

16      Foráiltear le hAirteagal 5 den Dlí maidir le réigiúnú iompair phoiblí paisinéirí gearrthurais, arna leasú le hAirteagal 1 den Neuntes Gesetz zur Änderung des Regionalisierungsgesetzes (An Naoú Dlí lena leasaítear an Dlí maidir le réigiúnú) an 20 Aibreán 2023 (BGBl. 2023 I, Uimh. 107) (‘RegG’), dar teideal ‘Maoiniú agus leithdháileadh’, don mhéid seo a leanas i míreanna 1 go 3 agus 10 de:

‘(1)      I gcás seirbhísí poiblí gearrthurais iompair do phaisinéirí, beidh na Länder i dteideal méid bliantúil a fháil ó ioncam cánach an Stáit Cónaidhme i gcomhréir leis na forálacha seo a leanas. Dá bhrí sin, déanfaidh an Stát Cónaidhme ranníocaíocht airgeadais i leith na gcúraimí sin atá ar na Länder. Faoi chuimsiú a neamhspleáchais bhuiséadaigh, déanfaidh na Länder ranníocaíochtaí bliantúla iomchuí dá gcuid féin chun seirbhísí poiblí iompair gearrthurais do phaisinéirí a mhaoiniú.

(2)      Don bhliain 2016, tá an méid socraithe ag EUR 8 billiún.

(3)      Ó 2017 suas go dtí 2022, agus an bhliain sin san áireamh, tiocfaidh méadú 1.8 % in aghaidh na bliana ar an méid a shonraítear i mír 2. Ó 2023 suas go 2031 agus an bhliain sin san áireamh, tiocfaidh méadú 3 % in aghaidh na bliana ar an méid a shonraítear i mír 2.

[...]

(10)      Is gá dinimic an mhéadaithe ar tháillí bonneagair, go háirithe na táillí stáisiúin agus na táillí riain arna dtobhach ag na gnóthais bhonneagair iarnróid atá faoi úinéireacht chónaidhme i réimse na seirbhísí iompair gearrthurais do phaisinéirí iarnróid, a theorannú i gcomhréir leis an dlí rialála iarnróid. De mhaolú ar Airteagal 37(2) de ERegG, tiocfaidh méadú 1.8 % ar tháillí ar úsáid saoráidí iarnróid agus stáisiún paisinéirí idir 2023 agus 2025.’

 An díospóid sna príomhimeachtaí agus na ceisteanna a tharchuirtear le haghaidh réamhrialú

17      Is eintiteas dlíthiúil faoin dlí príobháideach é DB InfraGO, ceann de na páirtithe a rinne an t‑iarratas sna príomhimeachtaí, agus é corpraithe mar chuideachta phoiblí theoranta. Is fochuideachta faoi lánúinéireacht Deutsche Bahn AG í, grúpa iompair agus soghluaisteachta atá faoi úinéireacht Phoblacht Chónaidhme na Gearmáine. Is eintiteas dlíthiúil príobháideach é DB RegioNetz Infrastruktur, an t‑iarratasóir eile sna príomhimeachtaí, atá bunaithe i bhfoirm cuideachta dliteanais theoranta. Is fochuideachta faoi lánúinéireacht DB InfraGO í. Bainistíonn na hiarratasóirí sna príomhimeachtaí, i dteannta a chéile, mar bhainisteoirí bonneagair iarnróid, formhór an ghréasáin iarnróid ar chríoch na Gearmáine.

18      Chun a mbonneagar iarnróid a úsáid, gearrann na hiarratasóirí sna príomhimeachtaí táillí úsáideora ar ghnóthais iarnróid a bhfuil rochtain acu ar a líonraí, ar táillí iad nach mór do Ghníomhaireacht Líonraí na Cónaidhme a fhormheas roimh ré, i gcomhréir le hAirteagal 45(1) de ERegG.

19      Le cinneadh an 22 Márta 2024, thug Gníomhaireacht Líonraí na Cónaidhme údarú do na hiarratasóirí sna príomhimeachtaí na táillí dá dtagraítear in Iarscríbhinn 1 a ghabhann leis an gcinneadh sin a chur i bhfeidhm chun an pacáiste íosrochtana a sholáthar le haghaidh thréimhse bhailíochta thráthchlár 2024/2025 (‘an cinneadh atá faoi cheist sna príomhimeachtaí’).

20      Leis an gcinneadh atá i gceist sna príomhimeachtaí, d’fhormheas Gníomhaireacht Líonraí na Cónaidhme, ar an gcéad dul síos, moladh na n‑iarratasóirí sna príomhimeachtaí earnáil na seirbhísí iompair paisinéirí d’iarnród gearrthurais (‘earnáil SPNV’) agus seirbhísí iompair paisinéirí eile faoi chonradh seirbhíse poiblí a roinnt ina dhá dheighleog do gach Land, eadhon ceann amháin do thrácht luchtaithe agus ceann eile do thrácht folamh, chun méid na dtáillí is infheidhme maidir le gach deighleog a chinneadh.

21      Ina dhiaidh sin, bhí Gníomhaireacht Líonraí na Cónaidhme den tuairim nach bhféadfaí méid na dtáillí d’earnáil SPNV, mar a d’iarr na hiarratasóirí sna príomhimeachtaí go príomha, a fhormheas toisc, i gcomhréir le hAirteagal 37(2) de ERegG, gur ghá an méid sin a ríomh le haghaidh gach ceann den dá dheighleog le haghaidh gach Land ar bhealach a chomhfhreagródh do na meántáillí iompair lena mbaineann le haghaidh gach Land, do thréimhse bhailíochta an thráthchlár 2020/2021, arna méadú leis an ráta méadaithe bliantúil seasta 1.8 %, dá bhforáiltear in Airteagal 5(3) agus (10) de RegG. Dá bhrí sin, rinne Gníomhaireacht Líonraí na Cónaidhme athríomh ar mhéid na dtáillí le haghaidh gach ceann den dá dheighleog sin d’earnáil SPNV i gcomhréir le ceanglais na bhforálacha náisiúnta sin, rud a d’fhág gur údaraíodh táillí níos ísle ná na táillí a bhí á lorg go príomha ag na hiarratasóirí sna príomhimeachtaí.

22      Ar deireadh, chinn Gníomhaireacht Líonraí na Cónaidhme méid na dtáillí is infheidhme in earnáil na seirbhísí iompair fad-achair do phaisinéirí iarnróid (‘earnáil SPFV’) agus in earnáil na seirbhísí lasta iarnróid (‘earnáil SGV’) a mhéadú i gcomparáid leis an méid a d’iarr na hiarratasóirí sna príomhimeachtaí go príomha, chun an oibleagáid a leagtar síos i ndlí na Gearmáine a chomhlíonadh, nach mór do na táillí na costais uile arna dtabhú ag an mbainisteoir bonneagair iarnróid a chumhdach.

23      Thug na hiarratasóirí sna príomhimeachtaí caingean i gcoinne an chinnidh atá i gceist sna príomhimeachtaí os comhair Verwaltungsgericht Köln (an Chúirt Riaracháin, Köln, an Ghearmáin), arb í an chúirt a rinne an tarchur í.

24      Tugann an chúirt a rinne an tarchur dá haire go bhforáiltear leis an gcinneadh atá i gceist sna príomhimeachtaí do mhéadú 0.6 %, i gcomparáid leis an mbliain roimhe sin, ar tháillí d’earnáil SPNV agus 17.7 % d’earnáil SPFV agus 16.2 % d’earnáil SGV. De réir an iarratasóra, mínítear an éagsúlacht sin leis an bhfíoras go maoinítear earnáil SPNV le maoiniú réigiúnaithe poiblí agus go gcuirtear infhaighteacht an mhaoinithe sin san áireamh agus méid na dtáillí is infheidhme san earnáil sin á chinneadh, fad is iad úsáideoirí a mhaoiníonn earnáil SPFV agus earnáil SGV.

25      Maidir le hearnáil SPNV, ba cheart méid na dtáillí is infheidhme a ríomh, de bhun Airteagal 37(2) de ERegG agus Airteagal 5(3) agus (10) de RegG (‘reachtaíocht na Gearmáine maidir le táillí’), trí dhá luach, arna gcinneadh agus arna bhforchur leis an dlí ar bhainisteoirí bonneagair iarnróid, a iolrú, eadhon an meántáille is infheidhme le linn na tréimhse thagartha 2020/2021 sa Land lena mbaineann agus ráta méadaithe bliantúil seasta 1.8 %.

26      Ós rud é gur fhorchuir reachtas na Gearmáine, ag an am céanna, oibleagáid ar na hoibreoirí sin na costais iomlána a thabhaíonn siad a chumhdach leis na táillí sin, ní fhéadfaí na méaduithe iarbhír ar chostais in earnáil SPNV, 6 % do 2025 agus, dá bhrí sin, atá i bhfad níos airde ná an ráta méadaithe bliantúil seasta 1.8 % sin, a chúiteamh ach amháin trí mhéadú ar mhéid na dtáillí is infheidhme a dháiltear idir earnáil SPFV agus earnáil SGV, rud a d’fhágfadh go dtiocfadh ualach díréireach chun cinn do na hearnálacha sin. Go deimhin, ba cheart do na hoibreoirí sin a gcostais uile a chlúdach trí mheán méadú ar na táillí a ghearrann siad i dtaca le hoibriú traenacha.

27      Fiafraíonn an chúirt a rinne an tarchur an mbaineann reachtaíocht na Gearmáine maidir le táillí an bonn de neamhspleáchas bainistíochta an bhainisteora bonneagair iarnróid, dá bhforáiltear in Airteagal 29(1) agus in Airteagal 4(2) de Threoir 2012/34.

28      Measann sí go leanann sé ó chásdlí na Cúirte nach féidir leis na Ballstáit cur isteach ar neamhspleáchas bainistíochta an bhainisteora bonneagair iarnróid, lena gceanglaítear go gcoinneoidh an bainisteoir sin corrlach lánroghnach áirithe ar a laghad chun méid na dtáillí úsáideora a ríomh, go háirithe trí chinntí a dhéanamh maidir le rogha agus measúnú na bhfachtóirí nó na bparaiméadar ar ar a mbonn a dhéantar an ríomh sin.

29      Ceanglaítear le reachtaíocht na Gearmáine maidir le táillí foirmle mhatamaiticiúil a chur i bhfeidhm chun méid na dtáillí is infheidhme in earnáil SPNV a ríomh, rud nach bhfágann aon chorrlach lánroghnach ag an mbainisteoir bonneagair iarnróid cinntí a dhéanamh maidir le méid na dtáillí sin. Dá bhrí sin, leis an reachtaíocht sin, baintear an deis den oibreoir sin méadú níos airde ar a chostais a chur san áireamh, chun méid na dtáillí sin a ríomh, nó, os a choinne sin, laghduithe ar chostais a chur ar aghaidh. Cuirtear d’oibleagáid air freisin na heasnaimh a eascraíonn as méid neamhleor na dtáillí sin a fhritháireamh trí mhéideanna na dtáillí is infheidhme in earnálacha SPFV agus SGV a mhéadú, cé go bhféadfadh sé sin a bheith contrártha do leas an bhainisteora sin.

30      Sna himthosca sin, chinn Verwaltungsgericht Köln (an Chúirt Riaracháin, Köln) bac a chur ar na himeachtaí agus an cheist seo a leanas a tharchur chuig an gCúirt Bhreithiúnais le haghaidh réamhrialú:

‘An bhfuil Airteagail 4(2) agus 29(1) de Threoir 2012/34/AE le léiriú sa chaoi go gcuirtear bac leo ar reachtaíocht náisiúnta lena gceanglaítear ar an mbainisteoir bonneagair, i réimse an iompair gearrthurais paisinéirí d’iarnród, na táillí atá faoi réir údarú a ríomh trí mheánmhuirir an tráchta lena mbaineann i mbliain tagartha arna cinneadh go dlíthiúil a iolrú faoi ráta méadaithe dinimiciúil bliantúil a fhorordaítear le dlí? ’

 Breithniú ar na ceisteanna a tharchuirtear le haghaidh réamhrialú

31      Lena ceist, fiafraíonn an chúirt a rinne an tarchur, go bunúsach, an bhfuil Airteagal 4(2) agus Airteagal 29(1) de Threoir 2012/34 le léiriú sa chaoi go gcuirtear cosc leo ar reachtaíocht náisiúnta lena gceanglaítear ar an mbainisteoir bonneagair iarnróid méid na dtáillí is infheidhme in earnáil SPNV a ríomh trí fhoirmle mhatamaiticiúil arb é atá inti méid na meántáille a ghearrtar le linn tréimhse thagartha ar leith a iolrú faoi ráta méadaithe bliantúil seasta dá bhforáiltear le dlí.

32      Ba cheart a thabhairt faoi deara, ar an gcéad dul síos, go gcumhdaítear le hAirteagal 4 den Treoir sin prionsabal neamhspleáchas, inter alia, an bhainisteora bonneagair iarnróid. De réir mhír 2 den Airteagal sin, ‘agus an creat muirearaithe agus leithdháilte agus na rialacha sonracha arna mbunú ag na Ballstáit á n‑urramú, beidh an bainisteoir bonneagair freagrach as a bhainistiú, riarachán agus rialú inmheánach féin.’

33      Sonraítear raon feidhme an phrionsabail sin maidir le neamhspleáchas an bhainisteora bonneagair iarnróid in Airteagal 7a(1) den Treoir sin, lena bhforáiltear go mbeidh neamhspleáchas eagraíochtúil agus cinnteoireachta aige, laistigh de na teorainneacha a shainítear in Airteagal 4(2) agus in Airteagail 29 agus 39 den Treoir sin, maidir le ‘feidhmeanna fíor-riachtanacha’. Go sonrach, faoi Airteagal 7a(2)(a), áiritheoidh na Ballstáit nach n‑imreoidh gnóthas iarnróid ná aon eintiteas dlítheanach eile tionchar cinntitheach ar an mbainisteoir sin i ndáil leis na ‘feidhmeanna fíor-riachtanacha’ sin, gan dochar do ról na mBallstát maidir leis an gcreat muirearaithe agus an creat leithdháilte toillte agus na rialacha sonracha maidir le muirearú a chinneadh i gcomhréir le hAirteagail 29 agus 39.

34      Cumhdaítear leis an gcoincheap ‘feidhmeanna fíor-riachtanacha bainistíochta bonneagair’, inter alia, mar is léir ó Airteagal 3(2f) de Threoir 2012/34, cinnteoireacht maidir le táillí a thobhach i leith úsáid bonneagair iarnróid, lena n‑áirítear méid na dtáillí a chinneadh agus táillí den sórt sin a thobhach, i gcomhréir leis an gcreat muirearaithe arna bhunú ag na Ballstáit de bhun, inter alia, Airteagal 29 den Treoir sin.

35      Ar an dara dul síos, leanann sé ón gcéad fhomhír agus ón gceathrú fomhír d’Airteagal 29(1) den Treoir sin, ar an gcéad dul síos, go gceanglaítear ar na Ballstáit an neamhspleáchas bainistíochta dá bhforáiltear in Airteagal 4 den Treoir sin a urramú agus creat muirearaithe á bhunú acu agus, ar an dara dul síos, go gcinnfidh an bainisteoir bonneagair iarnróid méid na táille is infheidhme maidir le húsáid an bhonneagair sin agus go mbaileoidh sé í i gcomhréir leis an gcreat muirearaithe agus leis na rialacha muirearaithe a bunaíodh.

36      Dá réir sin, bunaítear le hAirteagal 29(1) de Threoir 2012/34 roinnt na n‑inniúlachtaí idir na Ballstáit agus an bainisteoir bonneagair maidir le córais muirearaithe (breithiúnas an 22 Bealtaine 2025, ÖBB-Infrastruktur agus WESTbahn Management, C‑538/23, EU:C:2025:367, mír 35 agus an cásdlí dá dtagraítear).

37      Go deimhin, ar thaobh amháin, is faoi na Ballstáit atá sé creat muirearaithe a bhunú, agus na prionsabail mhuirearaithe a leagtar síos in Airteagal 31 de Threoir 2012/34 á gcur san áireamh agus, go sonrach, an prionsabal go mbeidh na táillí a thoibhítear ar an bpacáiste íosrochtana agus ar rochtain ar bhonneagar lena nasctar saoráidí seirbhíse comhionann leis an gcostas a thabhaítear go díreach mar thoradh ar an tseirbhís traenach a oibriú.

38      Mar eisceacht ar na prionsabail sin, féadfaidh na Ballstáit freisin, i gcomhréir leis an gcéad fhomhír d’Airteagal 32(1) den Treoir sin, d’fhonn na costais iomlána arna dtabhú ag an mbainisteoir bonneagair iarnróid a aisghabháil agus más féidir leis an margadh é sin a sheasamh, méaduithe a ghearradh ar bhonn prionsabail éifeachtúla, thrédhearcacha agus neamh-idirdhealaitheacha, agus iomaíochas optamach dheighleoga an mhargaidh iarnróid á áirithiú ag an am céanna. Mar sin féin, mar a luaigh an Chúirt, ní mhaolaíonn cinneadh na méaduithe sin ar an riail maidir le roinnt na gcumhachtaí a leagtar síos in Airteagal 29(1) de Threoir 2012/34 (féach, chuige sin, breithiúnas an 22 Bealtaine 2025, ÖBB-Infrastruktur agus WESTbahn Management, C‑538/23, EU:C:2025:367, mír 36).

39      Ar an taobh eile, is é an bainisteoir bonneagair, i bprionsabal, atá freagrach as an gcreat muirearaithe agus na rialacha muirearaithe arna mbunú ag an mBallstát lena mbaineann a chomhlíonadh, atá freagrach as méid na dtáillí a chinneadh agus as iad a bhailiú.

40      Dá bhrí sin, tá an córas muirearaithe a bunaíodh le Treoir 2012/34 bunaithe ar an bprionsabal gur faoi na Ballstáit atá sé creat muirearaithe a bhunú lena leagtar síos, inter alia, na rialacha ginearálta muirearaithe agus gur faoin mbainisteoir bonneagair iarnróid atá sé an creat sin a chur chun feidhme trí mhéid na dtáillí as úsáid an bhonneagair agus na saoráidí seirbhíse sin a chinneadh agus trí na táillí sin agus aon mhéaduithe ar na táillí sin a ghearradh (breithiúnas an 22 Bealtaine 2025, ÖBB-Infrastruktur agus WESTbahn Management, C‑538/23, EU:C:2025:367, mír 41).

41      I ndáil leis sin, ba cheart a mheabhrú go bhfuil sé beartaithe leis an gcóras a bunaíodh le Treoir 2012/34 neamhspleáchas bainistíochta an bhainisteora bonneagair iarnróid a áirithiú. Chun neamhspleáchas den sórt sin a ráthú, ní mór corrlach lánroghnach a bheith ag an oibreoir sin, laistigh den chreat muirearaithe arna shainiú ag na Ballstáit, chun méid na dtáillí a chinneadh ionas go mbeidh sé in ann iad a úsáid mar uirlis bhainistíochta (breithiúnais an 28 Feabhra 2013, an Coimisiún v an Spáinn, C‑483/10, EU:C:2013:114, mír 49, agus an 22 Bealtaine 2025, ÖBB-Infrastruktur agus WESTbahn Management, C‑538/23, EU:C:2025:367, mír 48 agus an cásdlí dá dtagraítear).

42      Tá an neamhspleáchas sin atá ag an mbainisteoir bonneagair iarnróid aitheanta ag an gCúirt, go háirithe sa chaidreamh idir an bainisteoir sin agus an Ballstát lena mbaineann, agus tá sé le measúnú i bhfianaise na gcothromaíochtaí a bhí beartaithe ag reachtas an Aontais a bhunú, go háirithe agus a fheidhmeanna bunriachtanacha dá dtagraítear in Airteagal 7a(1) de Threoir 2012/34 á bhfeidhmiú aige (féach, chuige sin, breithiúnas an 9 Meán Fómhair 2021, LatRailNet agus Latvijas dzelzceļš, C‑144/20, EU:C:2021:717, míreanna 42 agus 43 agus an cásdlí dá dtagraítear).

43      Go sonrach, bhí deis ag an gCúirt a shonrú nach gcomhlíonann reachtaíocht náisiúnta lena dteorannaítear feidhmiú chumhachtaí an bhainisteora bonneagair iarnróid do mhéid na dtáillí sonracha a chinneadh i ngach cás aonair, trí fhoirmle arna bunú roimh ré le hordú aireachta a chur i bhfeidhm, an ceanglas maidir le neamhspleáchas bainistíochta an bhainisteora bonneagair iarnróid (féach, chuige sin, breithiúnas an 28 Feabhra 2013, an Coimisiún v an Spáinn, C‑483/10, EU:C:2013:114, mír 50).

44      Dá mbeadh a ról teoranta do mhéid na táille a ríomh i ngach cás sonrach, trí fhoirmle arna socrú roimh ré le hordú aireachta a chur i bhfeidhm agus, dá bhrí sin, gan corrlach lánroghnach áirithe a bheith acu agus méid na dtáillí á shocrú, ar an gcéad dul síos, ní bheadh bainisteoirí bonneagair iarnróid in ann an úsáid is fearr is féidir a bhaint as an mbonneagar sin, trí bhíthin, inter alia, córais mhuirearaithe, laistigh den chreat arna shainiú ag na Ballstáit, dá dtagraítear in aithris 43 de Threoir 2012/34 (féach, chuige sin, breithiúnas an 28 Feabhra 2013, an Coimisiún v an Spáinn, C‑483/10, EU:C:2013:114, mír 44).

45      Ina theannta sin, ní spreagtar na bainisteoirí sin le córais mhuirearaithe chun infheistíocht a dhéanamh sa bhonneagar iarnróid, dá dtagraítear in aithris 66 de Threoir 2012/34, ná chun na costais a bhaineann le soláthar an bhonneagair sin agus leibhéal na dtáillí rochtana a laghdú, i gcomhréir le hAirteagal 30(1) den Treoir sin (féach, chuige sin, breithiúnas an 28 Feabhra 2013, an Coimisiún v an Spáinn, C‑483/10, EU:C:2013:114, míreanna 45 agus 46).

46      Ar deireadh, ní féidir leis na hoibreoirí sin táillí níos airde a shocrú ná a choinneáil ar bun bunaithe ar chostas fadtéarmach tionscadal infheistíochta áirithe, mar a fhoráiltear in Airteagal 32(3) de Threoir 2012/34, ná córais lascaine a thabhairt isteach maidir leis na táillí a ghearrtar ar oibreoirí, mar a cheadaítear le hAirteagal 33(3) den Treoir sin (féach, chuige sin, breithiúnas an 28 Feabhra 2013, an Coimisiún v an Spáinn, C‑483/10, EU:C:2013:114, mír 46).

47      Is féidir na breithnithe sin a thrasuí i reachtaíocht náisiúnta amhail reachtaíocht na Gearmáine maidir le táillí, atá i gceist sna príomhimeachtaí. Mar a luaigh an chúirt a rinne an tarchur ag an éisteacht os comhair na Cúirte agus mar a dheimhnigh, inter alia, Gníomhaireacht Líonraí na Cónaidhme, ceanglaítear leis an reachtaíocht sin ar bhainisteoirí bonneagair iarnróid, go bunúsach, méid na dtáillí is infheidhme i ngach ceann den dá dheighleog d’earnáil SPNV a chinneadh, i ngach Land, trí fhoirmle mhatamaiticiúil nach bhfuil aon tionchar acu uirthi, arb é atá inti méid na meántáillí le haghaidh tréimhse thagartha arna cinneadh leis an reachtaíocht sin a iolrú, eadhon tréimhse bhailíochta thráthchlár 2020/2021, faoi ráta méadaithe bliantúil seasta, arna chinneadh freisin leis an reachtaíocht sin, eadhon ráta 1.8 %.

48      Sna himthosca sin, is cosúil go bhfuil ról an bhainisteora bonneagair iarnróid teoranta don fhoirmle mhatamaiticiúil sin a chur i bhfeidhm, gan aon chorrlach lánroghnach a bheith aige ina leith sin.

49      Ní chaitear amhras ar an gconclúid sin leis na hargóintí a bhfuil Gníomhaireacht Líonraí na Cónaidhme agus Bayerische Eisenbahngesellschaft mbH ag brath orthu os comhair na Cúirte, ar dá réir, ar an gcéad dul síos, go bhfuil corrlach lánroghnach áirithe fós ag an mbainisteoir bonneagair iarnróid, a mhéid a d’fhéadfadh sé, ar an gcéad dul síos, fodheighleoga breise margaidh a chruthú i ngach ceann den dá dheighleog d’earnáil SPNV gach Land, ar an dara dul síos, tionchar a imirt ar luach na meántáillí do thréimhse thagartha 2020/2021, a leagtar amach san fhoirmle mhatamaiticiúil a úsáidtear mar bhonn chun méid na dtáillí don tréimhse 2024/2025 a ríomh, agus, ar deireadh, méid na dtáillí is infheidhme in earnálacha SPFV agus SGV a chinneadh, agus rogha níos mó acu chuige sin.

50      I ndáil leis sin, ar an gcéad dul síos, maidir leis an bhféidearthacht atá ag an mbainisteoir bonneagair iarnróid fodheighleoga margaidh breise a chruthú i ngach ceann den dá dheighleog d’earnáil SPNV i ngach Land, ba léir ón éisteacht os comhair na Cúirte go mbeadh an fhoirmle mhatamaiticiúil sin infheidhme ansin i ngach ceann de na fodheighleoga breise a d’fhéadfadh a bheith ann. Dá bhrí sin, ní bheadh féidearthacht den sórt sin de chineál lena n‑áiritheofaí go mbeadh corrlach lánroghnach áirithe ag an oibreoir sin chun méid na dtáillí is infheidhme in earnáil SPNV a chinneadh.

51      Ar an dara dul síos, maidir leis an argóint go raibh an bainisteoir bonneagair iarnróid in ann tionchar a imirt ar mhéid na meántáillí do thréimhse thagartha 2020/2021, atá ar cheann den dá luach den fhoirmle mhatamaiticiúil sin, is leor a thabhairt faoi deara nach bhfágann an fíoras sin, fiú má ghlactar go bhfuil bunús leis, gur féidir a mheas ar bhealach ar bith go raibh aon chorrlach lánroghnach ag an mbainisteoir sin chun méid na dtáillí is infheidhme maidir le tráthchlár 2024/2025 a chinneadh, go háirithe ós rud é nach bhféadfadh an bainisteoir sin a bheith ar an eolas, agus méid na dtáillí is infheidhme le linn na tréimhse 2020/2021 á chinneadh, go gcuirfí na táillí sin san áireamh agus méid na dtáillí don tréimhse 2024/2025 á chinneadh.

52      Ar an tríú dul síos, maidir le hargóint Ghníomhaireacht Líonraí na Cónaidhme agus an Bayerische Eisenbahngesellschaft, lena n‑éilítear go bhfuil corrlach lánroghnach ‘leathan’ ag an mbainisteoir bonneagair iarnróid maidir le méid na dtáillí is infheidhme in earnálacha SPFV agus SGV a chinneadh, lena ‘gcúitítear’ an easpa corrlach lánroghnach maidir le méid na dtáillí is infheidhme in earnáil SPNV a chinneadh, ba cheart a thabhairt faoi deara nach leor ‘cúiteamh’ den sórt sin, fiú dá bhféadfaí é a chur san áireamh, chun neamhspleáchas bainistíochta an bhainisteora sin a ráthú.

53      Is léir ón ordú tarchuir, sa chás seo, gurb ionann earnáil SPNV agus níos mó ná 50 % de mhéid iomlán na dtáillí a íocadh leis na hiarratasóirí sna príomhimeachtaí agus, fiú in earnálacha SPFV agus SGV, gur cosúil go bhfuil corrlach lánroghnach na mbainisteoirí bonneagair iarnróid sin teoranta ag an oibleagáid a fhorchuirtear leis an reachtaíocht náisiúnta faoina gcaithfidh méid iomlán na dtáillí sin na costais iomlána a thabhaíonn siad a chumhdach. Dá bhrí sin, i gcás nach gcumhdaítear leis na táillí is infheidhme in earnáil SPNV, mar atá sa chás seo, na costais iomlána arna dtabhú ag na hoibreoirí sin san earnáil sin, tá sé d’oibleagáid ar na hoibreoirí sin an t‑easnamh a thuairiscítear sna táillí is infheidhme in earnálacha SPFV agus SGV a chur ar aghaidh, mar a thugann an chúirt a rinne an tarchur faoi deara, rud a bhfuil sé d’éifeacht aige an corrlach lánroghnach atá ag na hoibreoirí sin a laghdú go mór agus méid na dtáillí is infheidhme sna hearnálacha sin á chinneadh.

54      Ina theannta sin, ag an éisteacht os comhair na Cúirte, dúirt DB Fernverkehr AG, DB Cargo AG agus BBL Logistik GmbH, boxXpress.de GmbH, DeltaRail GmbH, Eisenbahngesellschaft Potsdam mbH, Havelländische Eisenbahn AG, HSL Logistik GmbH, Hupac Intermodal SA, ITL Eisenbahngesellschaft mbH, Lineas NV, METRANS Rail (Deutschland) GmbH, RheinCargo GmbH & Co. KG, SBB Cargo Deutschland GmbH, TX Logistik AG agus Verkehrsbetriebe Peine-Salzgitter GmbH gur tháinig méadú chomh mór sin, ar an gcúis sin, ar mhéideanna na dtáillí is infheidhme in earnálacha SPFV agus SGV nach bhféadfaí a leibhéil a réiteach a thuilleadh leis an gcuspóir iompar d’iarnród a dhéanamh éifeachtúil agus iomaíoch i ndáil le modhanna eile iompair, mar a leagtar amach go háirithe in aithris 5 de Threoir 2012/34.

55      Ar an dara dul síos, murab ionann agus an méid a mhaíonn Gníomhaireacht Líonraí na Cónaidhme agus Bayerische Eisenbahngesellschaft, ní thugtar údar, leis an bhfíoras go maoinítear an ghníomhaíocht iompair in earnáil SPNV, go príomha nó go heisiach fiú, trí chistí poiblí, le corrlach lánroghnach a bhaint den bhainisteoir bonneagair iarnróid, san earnáil sin, chun méid na dtáillí bonneagair a chinneadh.

56      Is fíor go leanann sé ó Airteagal 8(2) agus (4) den Treoir sin go bhfuil roinnt féidearthachtaí ag na Ballstáit, lena n‑áirítear cistí poiblí a sholáthar, chun cothromaíocht airgeadais na mbainisteoirí bonneagair iarnróid a áirithiú i ndáil lena bhfeidhmeanna, scála a mbonneagair agus a riachtanais airgeadais chun an bonneagar sin a chothabháil, a athnuachan agus a fhorbairt, lena n‑áirítear infheistíochtaí nua. Ar an gcaoi sin, féadfaidh cistí poiblí rannchuidiú le maoiniú na mbainisteoirí sin, go háirithe mura leor na táillí agus an t‑ioncam eile chun a gcothromaíocht airgeadais a áirithiú.

57      Mar sin féin, ní fhoráiltear le haon fhoráil de Threoir 2012/34 go bhféadfar maolú a dhéanamh ar phrionsabal neamhspleáchas an bhainisteora bonneagair iarnróid, a chumhdaítear in Airteagal 4(2) agus in Airteagal 29(1) de Threoir 2012/34, ar an bhforas go mbaineann an earnáil lena mbaineann tairbhe as maoiniú ó chistí poiblí.

58      I bhfianaise na mbreithnithe go léir roimhe seo, is é an freagra ar an gceist a tharchuirtear ná nach mór Airteagal 4(2) agus Airteagal 29(1) de Threoir 2012/34 a léiriú sa chaoi go gcuirtear cosc leo ar reachtaíocht náisiúnta lena gceanglaítear ar an mbainisteoir bonneagair iarnróid méid na dtáillí is infheidhme in earnáil SPNV a ríomh trí fhoirmle mhatamaiticiúil arb é atá inti méid na meántáille a thoibhítear le linn tréimhse thagartha ar leith a iolrú faoi ráta méadaithe bliantúil seasta dá bhforáiltear le dlí.

 Teorainn a chur le héifeachtaí ama an bhreithiúnais seo

59      Iarrann Gníomhaireacht Líonraí na Cónaidhme, a dhéanann ionadaíocht ar Phoblacht Chónaidhme na Gearmáine, ina barúlacha i scríbhinn, agus na hiarratasóirí sna príomhimeachtaí, ag an éisteacht os comhair na Cúirte, ar an gCúirt éifeachtaí ama an bhreithiúnais seo a theorannú ó thaobh ama de do chonarthaí chun bealaí traenach a úsáid a thabharfar i gcrích amach anseo, agus do na conarthaí sin amháin.

60      I ndáil leis sin, cuireann siad in iúl go rialaítear le hAirteagal 37(2) de ERegG gach formheas táillí is infheidhme in earnáil SPNV ó 2016 i leith. Bhí na táillí a formheasadh ó shin, arb ionann a méid iomlán, ar fud na n‑earnálacha uile, agus beagnach EUR 7 mbilliún in aghaidh na bliana, mar bhonn leis na conarthaí a tugadh i gcrích idir na hiarratasóirí sna príomhimeachtaí agus na gnóthais iarnróid. Ar an gcéad dul síos, áfach, ní dhearnadh agóid i gcoinne na n‑údaruithe praghsála a deonaíodh faoi dhlí an Aontais san am a chuaigh thart agus tugadh na conarthaí sin i gcrích de mheon macánta. Ar an dara dul síos, dá ndéanfaí na húdaruithe praghsála nach bhfuil críochnaitheach go fóill a athríomh, is dócha go mbeadh suaitheadh sistéamach ann a dhéanfadh difear, lasmuigh d’earnáil SPNV, d’earnálacha SPFV agus SGV freisin agus, dá bhrí sin, do riosca iarmhairtí tromchúiseacha eacnamaíocha. Dá bhrí sin, comhlíontar na coinníollacha chun éifeachtaí ama an bhreithiúnais seo a theorannú.

61      I ndáil leis sin, ba cheart a mheabhrú go soiléirítear agus go sainítear sa léiriú a thugann an Chúirt, i bhfeidhmiú na dlínse a thugtar di le hAirteagal 267 CFAE, ar rialacha dhlí an Aontais brí agus raon feidhme na rialacha sin amhail nach mór nó gur cheart iad a thuiscint agus a chur i bhfeidhm ó dháta a dteacht i bhfeidhm. Is ar bhonn eisceachtúil amháin a chinnfidh an Chúirt, agus prionsabal ginearálta na deimhneachta dlíthiúla is gné dhílis de dhlíchóras an Aontais á chur i bhfeidhm aici, srian a chur ar an deis atá ag aon duine lena mbaineann brath ar fhoráil arna léiriú aici d’fhonn amhras a chaitheamh ar chaidrimh dhlíthiúla arna mbunú de mheon macánta. Chun teorainn den sórt sin a chinneadh, ní mór dhá chritéar fhíor-riachtanacha a chomhlíonadh, eadhon gur cheart dóibh siúd lena mbaineann gníomhú de mheon macánta agus gur cheart baol deacrachtaí tromchúiseacha a bheith ann, agus is critéir charnacha iad sin (breithiúnas an 22 Meitheamh 2021, Latvijas Republikas Saeima (Pointí pionóis), C‑439/19, EU:C:2021:504, míreanna 132 agus 136 agus an cásdlí dá dtagraítear).

62      Dá bhrí sin, níor ghlac an Chúirt an réiteach sin ach amháin in imthosca an‑sonrach, go háirithe i gcás ina raibh baol ann go mbeadh iarmhairtí tromchúiseacha eacnamaíocha ann mar gheall, go háirithe, ar líon mór na gcaidreamh dlíthiúil a bunaíodh de mheon macánta ar bhonn rialacha a measadh a bheith i bhfeidhm go bailí agus i gcás inar cosúil gur ghlac daoine aonair agus údaráis náisiúnta cleachtais nár chomhlíon dlí an Aontais mar gheall ar éiginnteacht oibiachtúil shuntasach maidir le brí fhorálacha dhlí an Aontais, a bhféadfadh sé gur rannchuidigh iompar Ballstát eile nó an Choimisiúin Eorpaigh leo fiú (breithiúnas an 26 Deireadh Fómhair 2021, PL Holdings, C‑109/20, EU:C:2021:875, mír 60).

63      Go sonrach, maidir leis an gcritéar a bhaineann le baol deacrachtaí tromchúiseacha a bheith ann, ba cheart a mheabhrú gur faoin mBallstát atá ag lorg teorannú ar éifeachtaí ama an réamhrialaithe atá sé figiúirí a sholáthar os comhair na Cúirte lena suitear an baol go mbeidh iarmhairtí den sórt sin ann (breithiúnas an 20 Nollaig 2017, Erzeugerorganisation Tiefkühlgemüse, C‑516/16, EU:C:2017:1011, mír 91 agus an cásdlí dá dtagraítear).

64      Sa chás seo, cé gur fíor go léiríonn na himthosca a bhfuil achoimre déanta orthu i mír 60 den bhreithiúnas seo go bhfuil baol iarmhairtí eacnamaíocha ann mar gheall, go háirithe, ar líon mór na gcaidreamh dlíthiúil a bhféadfadh na hiarmhairtí a eascraíonn as an mbreithiúnas seo difear a dhéanamh dóibh, go díreach nó go hindíreach, is cosúil, mar sin féin, nach mór an riosca sin a mhaolú go suntasach.

65      Is cásdlí socair é, i gcomhréir le prionsabal na deimhneachta dlíthiúla, nach gceanglaítear le dlí an Aontais go mbeidh sé d’oibleagáid ar údarás riaracháin, i bprionsabal, cinneadh riaracháin atá tagtha chun bheith críochnaitheach ar dhul in éag teorainneacha ama réasúnta chun imeachtaí a thionscnamh nó trí leigheasanna dlí a ídiú, agus go bhféadfar éifeachtacht iomlán dhlí an Aontais agus cosaint éifeachtach na gceart a fhaigheann daoine aonair uaidh a áirithiú, i gcás inarb iomchuí, le prionsabal dhliteanas an Stáit i leith damáiste a dhéantar do dhaoine aonair mar gheall ar sháruithe ar dhlí an Aontais ar féidir freagracht a chur ar an Stát ina leith (breithiúnas an 18 Samhain 2021, État belge (Oiliúint píolótaí), C‑413/20, EU:C:2021:938, míreanna 57 agus 60).

66      Sa chás seo, ní mhaíonn Gníomhaireacht Líonraí na Cónaidhme agus na hiarratasóirí sna príomhimeachtaí go mbeadh sé d’oibleagáid ar an ngníomhaireacht sin athbhreithniú a dhéanamh ar údarú na dtáillí arna bhformheas le cinntí atá tagtha chun bheith críochnaitheach, agus mar thoradh air sin níor suíodh go bhféadfadh an breithiúnas seo difear a dhéanamh do na conarthaí go léir a tugadh i gcrích idir na hiarratasóirí sin agus na gnóthais iarnróid ó 2016 i leith. Chuir Gníomhaireacht Líonraí na Cónaidhme agus na hiarratasóirí in iúl ag an éisteacht os comhair na Cúirte nach raibh ach na cinntí riaracháin lena bhformheastar na táillí ar thráthchláir 2023/2024 agus 2024/2025 faoi réir díospóide agus, maidir leis an díospóid a bhaineann le tráthchlár 2023/2024, nár ardaíodh an cheist maidir le comhoiriúnacht reachtaíocht na Gearmáine maidir le táillí le Treoir 2012/34.

67      Ina theannta sin, luaigh Gníomhaireacht Líonraí na Cónaidhme, ag an éisteacht os comhair na Cúirte, go mbeadh ath-leithdháileadh thart ar EUR 800 go 850 milliún ar thráthchlár 2024/2025 mar thoradh, go bunúsach, ar chur chun feidhme an bhreithiúnais seo, trí tháillí áirithe a laghdú agus táillí eile a mhéadú, rud a chiallaíonn go bhfuil na hiarmhairtí eacnamaíocha a bhfuiltear ag súil leo i bhfad níos teoranta, i ndáiríre, ná na hiarmhairtí eacnamaíocha a raibh an ghníomhaireacht sin ag brath orthu ar dtús agus a luaitear i mír 60 den bhreithiúnas seo.

68      In aon chás, ní leor a bheith ag brath, ag an éisteacht os comhair na Cúirte, ar na figiúirí a luaitear sa mhír roimhe seo chun a shuí go bhfuil baol iarmhairtí tromchúiseacha ann, de réir bhrí an chásdlí a luaitear i míreanna 62 agus 63 den bhreithiúnas seo.

69      Sna himthosca sin, ní mór a mheas nach gcomhlíontar an dara critéar dá dtagraítear i mír 61 den bhreithiúnas seo, agus mar thoradh air sin nach gá a fháil amach an gcomhlíontar an critéar maidir le meon macánta na ndaoine lena mbaineann.

70      Leanann sé ón méid sin roimhe seo nach iomchuí éifeachtaí ama an bhreithiúnais seo a theorannú.

 Costais

71      Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.

Ar na forais sin, rialaíonn an Chúirt (an Ceathrú Dlísheomra) mar seo a leanas:

Maidir le hAirteagal 4(2) agus Airteagal 29(1) de Threoir 2012/34/AE ó Pharlaimint na hEorpa agus ón gComhairle an 21 Samhain 2012 lena mbunaítear limistéar Eorpach aonair iarnróid, arna leasú le Treoir (AE) 2016/2370 ó Pharlaimint na hEorpa agus ón gComhairle an 14 Nollaig 2016,

ní mór léiriú a dhéanamh mar seo a leanas:

cuirtear cosc leo ar reachtaíocht náisiúnta lena gceanglaítear ar an mbainisteoir bonneagair iarnróid méid na dtáillí is infheidhme in earnáil na seirbhísí iompair paisinéirí d’iarnród gearrthurais a ríomh trí fhoirmle mhatamaiticiúil arb é atá inti méid na meántáillí a thoibhítear le linn tréimhse thagartha ar leith a iolrú faoi ráta méadaithe bliantúil seasta dá bhforáiltear le dlí.

Sínithe


*      Teanga an cháis: an Ghearmáinis.