(1)

Bir-Regolament ta’ Implimentazzjoni tal-Kummissjoni (UE) 2019/73 (2), il-Kummissjoni Ewropea imponiet dazji anti-dumping fuq l-importazzjonijiet ta’ roti elettriċi, li joriġinaw mir-Repubblika tal-Poplu taċ-Ċina (RPĊ, People’s Republic of China) (“il-miżuri oriġinali”). Id-dazji anti-dumping li bħalissa huma fis-seħħ ivarjaw minn 10,3 % għal 70,1 %. L-investigazzjoni li wasslet għall-impożizzjoni tal-miżuri oriġinali se tissejjaħ minn hawn ’il quddiem “l-investigazzjoni oriġinali”.

(2)

Wara s-sentenza tal-Qorti Ġenerali fil-Kawża T-242/19, fis-17 ta’ Marzu 2023 id-dazji anti-dumping ġew imposti mill-ġdid fir-rigward ta’ Giant Electric Vehicle (Kunshan) Co., Ltd, bir-Regolament ta’ Implimentazzjoni tal-Kummissjoni (UE) 2023/609 (3). Id-dazju impost mill-ġdid ġie stabbilit għal 9,9 %.

(3)

Bir-Regolament ta’ Implimentazzjoni tal-Kummissjoni (UE) 2019/72 (4), il-Kummissjoni imponiet, b’mod parallel, dazji kompensatorji definittivi fuq l-importazzjonijiet ta’ roti elettriċi li joriġinaw mir-Repubblika tal-Poplu taċ-Ċina. Id-dazji kompensatorji li bħalissa huma fis-seħħ ivarjaw minn 3,9 % għal 17,2 %.

(4)

Wara l-pubblikazzjoni ta’ notifika tal-iskadenza viċina (5), il-Kummissjoni Ewropea (“il-Kummissjoni”) irċeviet talba għal reviżjoni skont l-Artikolu 11(2) tar-Regolament bażiku.

(5)

It-talba għal reviżjoni (“it-talba”) tressqet fis-16 ta’ Ottubru 2023 mill-Assoċjazzjoni Ewropea tal-Manifatturi tar-Roti (“l-applikant”) f’isem l-industrija tal-Unjoni tar-roti elettriċi fis-sens tal-Artikolu 5(4) tar-Regolament bażiku. It-talba għal reviżjoni kienet imsejsa fuq il-bażi li l-iskadenza tal-miżuri x’aktarx tirriżulta f’kontinwazzjoni ta’ dumping u f’rikorrenza ta’ dannu għall-industrija tal-Unjoni.

(6)

Wara li ddeterminat, wara konsultazzjoni mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ reviżjoni ta’ skadenza, fis-17 ta’ Jannar 2024 il-Kummissjoni bdiet reviżjoni ta’ skadenza fir-rigward tal-importazzjonijiet fl-Unjoni ta’ roti elettriċi li joriġinaw mir-Repubblika tal-Poplu taċ-Ċina (“il-pajjiż ikkonċernat”) abbażi tal-Artikolu 11(2) tar-Regolament bażiku. Hija ppubblikat Notifika tal-Bidu f’Il-Ġurnal Uffiċjali tal-Unjoni Ewropea (6) (“in-Notifika tal-Bidu”).

(7)

L-investigazzjoni ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Jannar 2023 sal-31 ta’ Diċembru 2023 (“il-perjodu ta’ investigazzjoni tar-rieżami”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza ta’ dannu kopra l-perjodu mill-1 ta’ Jannar 2020 sa tmiem il-perjodu ta’ investigazzjoni tar-reviżjoni (“il-perjodu kkunsidrat”).

(8)

Fin-Notifika tal-Bidu, il-partijiet interessati ġew mistiedna jikkuntattjaw lill-Kummissjoni sabiex jieħdu sehem fl-investigazzjoni. Barra minn hekk, il-Kummissjoni speċifikament infurmat lill-produtturi magħrufin l-oħrajn tal-Unjoni, lill-produtturi magħrufin fir-RPĊ kif ukoll lill-awtoritajiet tar-RPĊ, lill-importaturi magħrufin, lill-utenti kif ukoll lill-assoċjazzjonijiet magħrufin li huma kkonċernati dwar il-bidu tal-iskadenza u stednithom jieħdu sehem.

(9)

Il-partijiet interessati kellhom l-opportunità li jikkummentaw dwar il-bidu tar-reviżjoni ta’ skadenza u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(10)

Fin-Notifika tal-Bidu, il-Kummissjoni ddikjarat li hija tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(11)

Fin-Notifika tal-Bidu, il-Kummissjoni iddikjarat li kienet għażlet proviżorjament kampjun tal-produtturi tal-Unjoni. Il-Kummissjoni għażlet il-kampjun abbażi tal-volum tal-produzzjoni. Dan il-kampjun kien jikkonsisti minn tliet produtturi tal-Unjoni. Il-produtturi tal-Unjoni inklużi fil-kampjun kienu jirrappreżentaw 23,4 % tal-produzzjoni totali tal-Unjoni fil-perjodu ta’ investigazzjoni tar-reviżjoni. F’konformità mal-Artikolu 17(2) tar-Regolament bażiku, il-Kummissjoni stiednet lill-partijiet interessati biex jikkummentaw dwar il-kampjun proviżorju. Ma wasal l-ebda kumment dwar il-kampjun proviżorju. Il-kampjun tqies bħala rappreżentattiv tal-industrija tal-Unjoni.

(12)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lil importaturi mhux relatati jipprovdu l-informazzjoni speċifikata fin-Notifika tal-Bidu.

(13)

L-ebda importatur mhux relatat ma wieġeb għall-formola tal-kampjunar. Konsegwentement, il-Kummissjoni ddeċidiet li l-kampjunar ma kienx meħtieġ.

(14)

Biex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lill-produtturi magħrufa kollha jipprovdu l-informazzjoni speċifikata fin-Notifika tal-Bidu. Barra minn hekk, il-Kummissjoni talbet lill-Missjoni tar-RPĊ għall-Unjoni Ewropea biex tidentifika u/jew tikkuntattja produtturi oħrajn, jekk ikun hemm, li jistgħu jkunu interessati biex jieħdu sehem fl-investigazzjoni.

(15)

Żewġ produtturi esportaturi mir-RPĊ biss ipprovdew tweġiba għall-kampjunar u għalhekk il-kampjunar ma tqiesx meħtieġ. Barra minn hekk, dawn iż-żewġ kumpaniji flimkien kienu jirrappreżentaw ħafna anqas minn 0,1 % tal-industrija Ċiniża tar-roti elettriċi f’termini ta’ (i) esportazzjonijiet lejn l-Unjoni (ii) esportazzjonijiet lejn id-destinazzjonijiet l-oħrajn kollha tal-esportazzjoni (iii) bejgħ domestiku u, (iv) kapaċità ta’ produzzjoni Ċiniża fil-perjodu ta’ investigazzjoni tar-reviżjoni. Għalhekk, il-Kummissjoni kkunsidrat li dawk iż-żewġ kumpaniji ma setgħux jitqiesu bħala rappreżentattivi għall-industrija Ċiniża tar-roti elettriċi għall-fini tal-investigazzjoni tar-reviżjoni ta’ skadenza.

(16)

Għaldaqstant, il-Kummissjoni kkonkludiet li l-kooperazzjoni mill-produtturi tar-roti elettriċi fir-RPĊ ma kinitx biżżejjed biex isiru sejbiet rappreżentattivi u infurmat liż-żewġ kumpaniji li l-Kummissjoni kien beħsiebha tapplika l-Artikolu 18 tar-Regolament bażiku u tibbaża s-sejbiet tagħha fuq il-kontinwazzjoni jew ir-rikorrenza tad-dumping u tad-dannu fir-rigward tal-importazzjonijiet mir-RPĊ fuq il-fatti disponibbli.

(17)

Konsegwentement, il-Kummissjoni infurmat lill-awtoritajiet tar-RPĊ permezz tan-note verbale tat-12 ta’ Frar 2024, li jaf tirrikorri għall-użu tal-fatti disponibbli skont l-Artikolu 18(1) tar-Regolament bażiku meta teżamina l-kontinwazzjoni jew ir-rikorrenza tad-dumping. L-awtoritajiet tar-RPĊ ma rreaġixxewx għan-note verbale.

(18)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern taċ-Ċina (“GTĊ”, Government of China).

(19)

Il-Kummissjoni infurmat liż-żewġ kumpaniji li kienu bagħtu tweġiba għall-kampjunar li huma ma setgħux jitqiesu bħala rappreżentattivi għall-industrija ġenerali Ċiniża tar-roti elettriċi u li l-informazzjoni tagħhom speċifika għall-kumpanija ma kinitx suxxettibbli biex tifforma bażi għal sejbiet rappreżentattivi rigward l-esportazzjonijiet kollha mir-RPĊ lejn l-Unjoni. Il-Kummissjoni stiednet liż-żewġ kumpaniji biex jikkuntattjaw lis-servizzi tal-Kummissjoni f’każ li xorta waħda kien beħsiebhom jimlew tweġiba għall-kwestjonarju. Fil-bidu tal-investigazzjoni, kopja tal-kwestjonarji kienet disponibbli fil-fajl għall-ispezzjoni mill-partijiet interessati u fuq is-sit web tad-DĠ Kummerċ.

(20)

Ma waslet l-ebda tweġiba għall-kwestjonarju mill-GTĊ jew minn xi produttur (esportatur) Ċiniż.

(21)

Il-Kummissjoni fittxet u vverifikat l-informazzjoni kollha meqjusa meħtieġa għad-determinazzjoni tal-probabbiltà ta’ kontinwazzjoni jew ta’ rikorrenza tad-dumping u tad-dannu u tal-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(22)

Fil-25 ta’ Ottubru 2024, il-Kummissjoni ddivulgat il-fatti u l-kunsiderazzjonijiet essenzjali li abbażi tagħhom kienet beħsiebha żżomm id-dazji anti-dumping fis-seħħ. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(23)

Diversi partijiet interessati ssottomettew kummenti, li ġew ikkunsidrati mill-Kummissjoni u indirizzati fit-Taqsimiet 2.3 u 7 hawn taħt. Il-partijiet li talbu dan ingħataw seduta ta’ smigħ.

(24)

Il-prodott taħt rieżami huwa l-istess bħal fl-investigazzjoni oriġinali, jiġifieri roti, b’assistenza ta’ pedali, b’mutur elettriku awżiljarju, li bħalissa jaqgħu taħt il-kodiċijiet NM 8711 60 10 u ex 8711 60 90 (il-kodiċi TARIC 8711 60 90 10) (“il-prodott taħt rieżami”).

(25)

Il-prodott ikkonċernat f’din l-investigazzjoni huwa l-prodott taħt rieżami li joriġina mir-Repubblika tal-Poplu taċ-Ċina.

(26)

Kif stabbilit fl-investigazzjoni oriġinali, din l-investigazzjoni tar-rieżami ta’ skadenza kkonfermat li l-prodotti li ġejjin għandhom l-istess karatteristiċi fiżiċi u tekniċi bażiċi kif ukoll l-istess użi bażiċi:

(27)

Għalhekk, dawn il-prodotti huma kkunsidrati bħala prodotti simili skont it-tifsira tal-Artikolu 1(4) tar-Regolament bażiku.

(28)

Wara d-divulgazzjoni definittiva, parti waħda sostniet li l-Kummissjoni jenħtieġ li tispeċifika li l-partijiet importati mill-importaturi eżentati u/jew mill-esportaturi barranin eżentati skont id-Deċiżjoni ta’ Implimentazzjoni tal-Kummissjoni 2024/1279 (7) jenħtieġ li ma jitqisux bħala l-prodott ikkonċernat. Skont din il-parti, għandu jiġi ċċarat li partijiet tal-prodott ikkonċernat li għandhom jintużaw għall-prodott ikkonċernat mhumiex soġġetti għal dazji anti-dumping jekk jiġu importati separatament.

(29)

Il-Kummissjoni qieset li tali kjarifika ma kinitx iġġustifikata peress li l-partijiet mhumiex koperti mill-miżuri li huma soġġetti għal dan ir-rieżami. Fuq din il-bażi, din l-asserzjoni ġiet miċħuda.

(30)

Matul il-perjodu ta’ investigazzjoni tar-reviżjoni, l-importazzjonijiet ta’ roti elettriċi mir-RPĊ komplew, għalkemm f’livelli aktar baxxi milli fil-perjodu ta’ investigazzjoni tal-investigazzjoni oriġinali (jiġifieri mill-1 ta’ Ottubru 2016 sat-30 ta’ Settembru 2017). Skont id-data tal-Eurostat, l-importazzjonijiet tar-roti elettriċi mir-RPĊ ammontaw għal madwar 4,4 % tas-suq tal-Unjoni fil-perjodu ta’ investigazzjoni tar-reviżjoni meta mqabbla ma’ sehem mis-suq ta’ 35 % matul il-perjodu ta’ investigazzjoni oriġinali. F’termini assoluti, il-volum tal-importazzjonijiet mir-RPĊ naqas minn 699 658 unità fil-perjodu ta’ investigazzjoni oriġinali għal 220 914-il unità matul il-perjodu ta’ investigazzjoni tar-reviżjoni.

(31)

Kif imsemmi fit-taqsima 1.6.3, ma kien hemm l-ebda kooperazzjoni mill-esportaturi/produtturi mir-RPĊ fl-investigazzjoni. Għalhekk, il-Kummissjoni infurmat lill-awtoritajiet tar-RPĊ li minħabba n-nuqqas ta’ kooperazzjoni, il-Kummissjoni jaf tapplika l-Artikolu 18 tar-Regolament bażiku dwar is-sejbiet fir-rigward tal-kontinwazzjoni jew ir-rikorrenza tad-dumping u tad-dannu. Il-Kummissjoni ma rċeviet l-ebda kumment jew talba għal intervent tal-Uffiċjal tas-Seduta f’dan ir-rigward.

(32)

Konsegwentement, f’konformità mal-Artikolu 18 tar-Regolament bażiku, is-sejbiet fir-rigward tal-probabbiltà ta’ kontinwazzjoni jew ta’ rikorrenza tad-dumping kienu bbażati fuq il-fatti disponibbli, b’mod partikolari l-informazzjoni ppreżentata mat-talba għal reviżjoni u l-informazzjoni miksuba mill-partijiet li kkooperaw matul l-investigazzjoni tar-reviżjoni (jiġifieri, l-applikant u l-produtturi tal-Unjoni inklużi fil-kampjun).

(33)

Minħabba li l-evidenza suffiċjenti disponibbli fil-bidu tal-investigazzjoni kellha t-tendenza li turi, fir-rigward tar-RPĊ, l-eżistenza ta’ distorsjonijiet sinifikanti skont it-tifsira tal-Artikolu 2(6a), il-punt (b) tar-Regolament bażiku, il-Kummissjoni bdiet l-investigazzjoni abbażi tal-Artikolu 2(6a) tar-Regolament bażiku.

(34)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika tal-Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jippreżentaw l-informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika tal-Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku qabel l-iskadenza. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fir-RPĊ.

(35)

Fil-punt 5.3.2 tan-Notifika tal-Bidu, il-Kummissjoni speċifikat ukoll li, fid-dawl tal-evidenza disponibbli, kienet għażlet proviżorjament lit-Turkija bħala pajjiż rappreżentattiv xieraq skont l-Artikolu 2(6a)(a) tar-Regolament bażiku għall-fini tad-determinazzjoni tal-valur normali abbażi ta’ prezzijiet jew valuri referenzjarji mingħajr distorsjoni. Il-Kummissjoni ddikjarat ukoll li kienet se teżamina pajjiżi oħrajn possibbilment xierqa f’konformità mal-kriterji stabbiliti fl-Artikolu 2(6a)(a), l-ewwel inċiż tar-Regolament bażiku.

(36)

Fit-18 ta’ Lulju 2024, il-Kummissjoni infurmat lill-partijiet interessati permezz ta’ nota għall-fajl (“in-Nota għall-Fajl”) dwar is-sorsi rilevanti li kien beħsiebha tuża għad-determinazzjoni tal-valur normali, bit-Turkija bħala l-pajjiż rappreżentattiv. F’dik in-nota, il-Kummissjoni pprovdiet lista tal-fatturi kollha ta’ produzzjoni bħall-materja prima, il-manodopera u l-enerġija użati fil-produzzjoni tar-roti elettriċi. Barra minn hekk, il-Kummissjoni infurmat lill-partijiet interessati li kienet se tistabbilixxi kostijiet tal-bejgħ, ġenerali u amministrattivi (“SG&A”, selling, general and administrative) u profitti abbażi ta’ rapporti finanzjarji aggregati mill-Istatistika tal-Kontijiet tal-Kumpanija (8) għal 206 kumpaniji profittabbli attivi fil-Klassifikazzjoni Statistika tal-Attivitajiet Ekonomiċi, komunement imsejħa bħala NACE, il-kategorija 30.9 “Manifattura ta’ tagħmir tat-trasport m.k.b.” (mhux klassifikata band’oħra). Id-data għal dawk il-produtturi fil-pajjiż rappreżentattiv hija kkompilata mill-Bank Ċentrali tat-Turkija u mill-Istitut Tork tal-Istatistika. Il-partijiet ġew mistiedna jikkummentaw, u waslu kummenti mingħand l-applikant li tqiesu kif deskritt fil-premessa (67).

(37)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(38)

Madankollu, skont l-Artikolu 2(6a)(a) tar-Regolament bażiku, “fil-każ li jiġi determinat […], li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” se tissejjaħ minn hawn ’il quddiem “SG&A”).

(39)

Kif spjegat aktar hawn taħt, il-Kummissjoni kkonkludiet f’din l-investigazzjoni li, abbażi tal-evidenza disponibbli, u fid-dawl tan-nuqqas ta’ kooperazzjoni tal-GTĊ u tal-produtturi fiċ-Ċina, l-applikazzjoni tal-Artikolu 2(6a) tar-Regolament bażiku kienet xierqa.

(40)

L-azzar u l-aluminju huma materja prima ewlenija fl-industrija tar-roti. Essenzjalment, il-partijiet ewlenin kollha tar-roti huma kompletament jew parzjalment magħmula minn dawn il-materjali. L-oqfsa, il-frieket u l-manubriji tar-roti jkunu normalment magħmula jew mill-azzar jew mill-aluminju. Ir-roti u l-ktajjen tal-imgħażel, id-derailleurs, il-gerijiet u l-kejbils u l-carriers ikunu normalment magħmula mill-azzar. Il-mudguards u l-pedali jkunu magħmula mill-metall jew mill-plastik (jiġifieri prodotti tal-industrija kimika). It-talba semmiet id-distorsjonijiet sinifikanti li nstabu mill-Kummissjoni Ewropea fl-industriji Ċiniżi tal-azzar u tal-aluminju f’investigazzjonijiet reċenti bħall-importazzjonijiet miċ-Ċina ta’ elementi tal-irbit tal-azzar, tubi u pajpijiet iwweldjati tal-azzar, torrijiet tar-riħ tal-azzar, azzar inossidabbli llaminat bis-sħana (9); foil tal-aluminju għall-modifikazzjoni, estrużjonijiet tal-aluminju, prodotti tal-aluminju rrumblati ċatti, foil tal-aluminju, u roti tal-aluminju għall-użu fit-triq (10). Is-sejbiet ripetuti u konsistenti f’dawn il-każijiet huma, skont it-talba, evidenza ċara ta’ distorsjonijiet sistemiċi tal-kostijiet u tal-prezzijiet Ċiniżi tal-prodotti tal-azzar u tal-aluminju fis-sens tal-Artikolu 2(6a)(b) tar-Regolament bażiku.

(41)

Bħal f’investigazzjonijiet preċedenti dwar is-setturi tal-azzar u tal-aluminju fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw prezzijiet u kostijiet domestiċi fir-RPĊ, minħabba l-eżistenza ta’ distorsjonijiet sinifikanti. Il-Kummissjoni għamlet dan abbażi tal-evidenza disponibbli fuq il-fajl, inkluż l-evidenza li tinsab fit-talba, u fid-Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet għad-Difiża tal-Kummerċ (11) (ir-“Rapport”) kif ukoll fil-verżjoni aġġornata tiegħu (ir-“Rapport aġġornat”) (12), li tiddependi fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt reviżjoni. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti biex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(42)

It-talba allegat li l-ekonomija Ċiniża kollha kemm hi hija influwenzata u affettwata b’mod wiesa’ minn interventi governattivi sostanzjali, li fid-dawl tagħhom il-prezzijiet u l-kostijiet domestiċi tal-industrija Ċiniża tar-roti elettriċi ma jistgħux jintużaw f’din l-investigazzjoni. B’mod partikolari, it-talba semmiet li l-industrija Ċiniża tar-roti elettriċi kienet ikkaratterizzata minn livell għoli ta’ sjieda mill-Istat, influwenza tal-Istat u/jew sussidjar mill-Istat u diversi produtturi tar-roti elettriċi għandhom rabtiet mill-qrib mal-GTĊ, il-gvernijiet reġjonali jew lokali, direttament jew permezz ta’ assoċjazzjonijiet. Biex tappoġġja l-pożizzjoni tagħha, it-talba rreferiet għar-Rapport, għal-leġiżlazzjoni Ċiniża, għal rapporti ulterjuri, kif ukoll għal evidenza aneddotali addizzjonali ta’ distorsjonijiet implimentati matul il-perjodu ta’ investigazzjoni tar-reviżjoni.

(43)

Kif imsemmi fil-premessa (40) hawn fuq, it-talba semmiet investigazzjonijiet reċenti fejn il-Kummissjoni sabet li hemm intervent sostanzjali tal-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (13). B’mod aktar speċifiku, it-talba argumentat li l-ekonomija Ċiniża, inkluż is-settur tar-roti elettriċi u tar-roti, hija ddeterminata b’mod sinifikanti minn sistema elaborata ta’ ppjanar li tistabbilixxi l-prijoritajiet u tippreskrivi l-għanijiet li fuqhom jeħtiġilhom jiffukaw il-gvernijiet ċentrali u lokali. Dawn il-politiki jiddiskriminaw favur il-produtturi domestiċi jew inkella jinfluwenzaw il-forzi tas-suq ħieles. It-talba semmiet ukoll li s-sistema ta’ ppjanar fiċ-Ċina tirriżulta f’riżorsi li jiġu mbuttati lejn setturi deżinjati bħala strateġiċi jew inkella politikament importanti mill-gvern, aktar milli jiġu allokati f’konformità mal-forzi tas-suq. Barra minn hekk, it-talba semmiet li l-kost tal-biċċa l-kbira tal-fatturi tal-produzzjoni tar-roti elettriċi Ċiniżi, jekk mhux ta’ kollha, huwa distort, inkluż l-azzar u l-aluminju għall-parts tar-roti, l-elettriku, l-art, u l-kostijiet lavorattivi.

(44)

It-talba pprovdiet eżempji ta’ elementi li jindikaw l-eżistenza ta’ distorsjonijiet, kif elenkati mill-ewwel sas-sitt sing tal-Artikolu 2(6a)(b) tar-Regolament bażiku. It-talba stabbiliet ukoll li l-industrija tar-roti elettriċi u tal-parts tagħha (jiġifieri l-batterija, il-magna, l-unitajiet ta’ kontroll u l-komponenti tal-metall ħafif) jitqiesu bħala industriji ewlenin/strateġiċi, li l-iżvilupp tagħhom huwa mmirat b’mod attiv mill-GTĊ bħala objettiv ta’ politika. B’mod partikolari, it-talba sostniet li l-GTĊ kien qed jippromwovi bil-qawwi l-industrija Ċiniża tar-roti u tar-roti elettriċi, permezz ta’ strumenti nazzjonali, reġjonali u lokali bħall-14-il Pjan Ġenerali għal 5 Snin (14); in-Notifika dwar Made in China 2025 (15); il-Katalogu tal-Industriji Mħeġġa għall-Investiment Barrani fir-Reġjun Ċentrali u tal-Punent taċ-Ċina (16) (Verżjoni tal-2020) u l-Katalogu ta’ Gwida għall-Aġġustament tal-Istruttura Industrijali (17) (batteriji u materjal ħafif). It-talba semmiet ukoll diversi provinċji, fosthom Tianjin, Hebei, Jiangsu, Zhejiang, Shandong u Guangdong, li inkludew l-industrija tar-roti u/jew tal-vetturi elettriċi fil-pjanijiet reġjonali tagħhom.

(45)

Bħala konklużjoni, it-talba ħadet il-pożizzjoni li l-prezzijiet jew il-kostijiet, inkluż il-kostijiet tal-materja prima, tal-enerġija u tal-manodopera, mhumiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku. Fuq dik il-bażi, skont it-talba, mhuwiex xieraq li jintużaw prezzijiet u kostijiet domestiċi biex jiġi stabbilit valur normali f’dan il-każ.

(46)

Il-GTĊ la kkummenta u lanqas ipprovda evidenza li ssostni jew tirribatti l-evidenza eżistenti fil-fajl tal-każ, inkluż ir-Rapport (aġġornat) u l-evidenza addizzjonali pprovduta mill-applikant, dwar l-eżistenza ta’ distorsjonijiet sinifikanti u/jew l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(47)

L-investigazzjoni tal-Kummissjoni kkonfermat l-affermazzjoni li tinsab fit-talba li l-industrija tar-roti elettriċi tibqa’ titqies bħala industrija ewlenija mill-GTĊ. Dan huwa kkonfermat fil-bosta pjanijiet, direttivi u dokumenti oħrajn iffokati fuq il-promozzjoni tal-industrija tar-roti b’mod ġenerali u tal-industrija tar-roti elettriċi b’mod partikolari, li jinħarġu fil-livell nazzjonali, reġjonali, u muniċipali.

(48)

L-14-il Pjan Ġenerali għal 5 Snin semma speċifikament l-industrija Ċiniża tar-roti elettriċi bħala industrija mħeġġa. Barra minn hekk, l-industrija tar-roti elettriċi ġiet elenkata bħala industrija mħeġġa f’diversi katalogi adottati mill-GTĊ, bħal dawk imsemmija fil-premessa (44) hawn fuq.

(49)

Barra minn hekk, il-GTĊ u l-gvernijiet reġjonali ħarġu wkoll pjanijiet speċifiċi għas-settur u programmi ta’ appoġġ għall-industrija tar-roti. Pereżempju, l-Opinjoni Gwida tal-2022 dwar l-iżvilupp ta’ kwalità għolja tal-industrija ħafifa MIIT 2022/68 (18) tipprovdi informazzjoni speċifika rigward proġetti tar-R&Ż fuq teknoloġiji ewlenin li jsemmu t-trażmissjoni tar-roti u t-teknoloġija effiċjenti ħafna tas-sigurtà tal-batteriji tal-litju. Din tinkludi wkoll informazzjoni dwar it-titjib tal-inġinerija innovattiva tal-manifattura tal-prodotti li tikkonċerna roti bħal roti off-road fuq distanza twila u li jintwew bi prestazzjoni għolja kif ukoll roti elettriċi intelliġenti. Il-Kundizzjonijiet Standard għall-2024 tal-Industrija tar-Roti Elettriċi (19) u l-Miżuri ta’ Ġestjoni tad-Dikjarazzjoni Standard tal-Industrija tar-Roti Elettriċi (MIIT, Electric Bicycle Industry Standard Announcement Management Measures) (20) tħabbru mill-Ministeru għall-Industrija u t-Teknoloġija tal-Informazzjoni tar-Repubblika tal-Poplu taċ-Ċina, mill-Amministrazzjoni tal-Istat għar-Regolamentazzjoni tas-Suq, u mill-Bureau Nazzjonali tan-Nirien u s-Salvataġġ sabiex jiġi promoss l-iżvilupp tal-industrija tar-roti elettriċi, id-dikjarazzjoni semmiet li “intrapriżi ġodda tal-produzzjoni u proġetti ġodda u estiżi għandhom jikkonformaw mad-dispożizzjonijiet tal-politiki industrijali nazzjonali. L-intrapriżi għandhom isaħħu l-innovazzjoni teknoloġika, itejbu l-kwalità tal-prodott, iħeġġu t-trasformazzjoni ta’ livell għoli, intelliġenti u ekoloġika u t-titjib tal-linji ta’ produzzjoni eżistenti, u jnaqqsu l-proġetti ta’ kostruzzjoni li sempliċiment jespandu l-kapaċità tal-produzzjoni. Dawn għandhom iħeġġu lir-reġjuni b’kundizzjonijiet biex jiġi promoss l-iżvilupp ibbażat fuq il-parks u intensiv tal-industrija tar-roti elettriċi”. Barra minn hekk, id-dikjarazzjoni inkludiet informazzjoni rigward is-superviżjoni u l-ġestjoni tal-industrija tar-roti elettriċi, filwaqt li semmiet li “L-assoċjazzjonijiet tal-industrija għandhom jorganizzaw intrapriżi biex isaħħu l-awtodixxiplina tal-industrija, jiggwidaw lill-intrapriżi ħalli jinvolvu ruħhom f’attivitajiet tal-produzzjoni u tan-negozju f’konformità mal-liġi, u jassistu lid-dipartiment kompetenti tal-industrija fl-implimentazzjoni u s-superviżjoni ta’ segwitu ta’ dawn il-kundizzjonijiet standard”.

(50)

Aktar objettivi tal-politika industrijali rigward ir-roti elettriċi jistgħu jinstabu wkoll fid-dokumenti tal-ippjanar tal-provinċji, bħal Shandong (21), Hebei (22), Tianjin (23), Jinghai, u Jiansgu (24). Il-Provinċja ta’ Jiangsu hija l-ewwel provinċja għall-produzzjoni tar-roti elettriċi fir-RPĊ, u l-produzzjoni tagħha tar-roti elettriċi tammonta għal madwar 20 % tal-produzzjoni tar-roti elettriċi tal-pajjiż (25). Hija għandha park industrijali ta’ teknoloġija avvanzata bl-isem ta’ Żona ta’ Żvilupp Ekonomiku u Teknoloġiku ta’ Tianjin Ziya li huwa d-distrett industrijali ewlieni fil-produzzjoni tar-roti b’mod ġenerali u tar-roti elettriċi b’mod partikolari (26), li rċieva l-marka ta’ “Kapitali tar-Roti u tar-Roti Elettriċi taċ-Ċina” mogħtija mill-grupp ta’ esperti tal-Federazzjoni tal-Industrija Ħafifa taċ-Ċina u tal-Assoċjazzjoni tar-Roti taċ-Ċina (27).

(51)

Fir-rigward tal-fatt li l-GTĊ jinsab f’pożizzjoni biex jinterferixxi fil-prezzijiet u fil-kostijiet permezz tal-preżenza tal-Istat f’ditti fis-sens tal-Artikolu 2(6a)(b), it-tieni inċiż tar-Regolament bażiku, l-investigazzjoni wriet li l-Assoċjazzjoni tar-Roti taċ-Ċina (CBA, China Bicycle Association) hija kkontrollata mill-partit Komunista taċ-Ċina kif stabbilit fl-artikoli tal-Assoċjazzjoni (28). B’mod partikolari, l-Artikolu 21 tas-CBA stabbilixxa l-kompożizzjoni tal-Bord tad-Diretturi u l-kundizzjonijiet li jridu jissodisfaw inkluż li “jappoġġjaw it-tmexxija tal-Partit Komunista taċ-Ċina, jimplimentaw bir-reqqa l-linja, il-prinċipji u l-politiki tal-Partit, jirrispettaw il-liġijiet u r-regolamenti, jirrispettaw l-etika soċjali u professjonali, u jkollhom kwalità politika għolja u professjonaliżmu”. Barra minn hekk, l-Assoċjazzjoni tar-Roti ta’ Jiangsu (29), tinkludi fl-Artikolu 4 tagħha li “F’konformità mad-dispożizzjonijiet tal-Kostituzzjoni tal-Partit Komunista taċ-Ċina, din l-assoċjazzjoni għandha tistabbilixxi l-organizzazzjoni tal-Partit Komunista taċ-Ċina, twettaq attivitajiet tal-partit u tipprovdi l-kundizzjonijiet meħtieġa għall-attivitajiet tal-organizzazzjoni tal-partit”, u fl-Artikolu 5 tagħha “L-awtorità tar-reġistrazzjoni ta’ din l-assoċjazzjoni hija d-Dipartiment tal-Affarijiet Ċivili tal-Provinċja ta’ Jiangsu. Din l-assoċjazzjoni taċċetta l-gwida tan-negozju u s-superviżjoni u l-ġestjoni tad-Dipartiment tal-Affarijiet Ċivili tal-Provinċja ta’ Jiangsu u ta’ dipartimenti rilevanti oħrajn”.

(52)

Fir-rigward tal-produtturi ewlenin tar-roti elettriċi, l-investigazzjoni sabet ukoll li Fushida hija membru tas-CBA, u s-CEO tagħha huwa segretarju ta’ Fergħa tal-Partit (30). Shanghai Phoenix hija kumpanija li 24,36 % minnha hija proprjetà tal-Istat (31) u l-President ilu Segretarju tal-Kumitat tal-Partit minn Jannar 2023. Flight Pigeon hija Intrapriża tal-Istat miżmuma minn Tianjin Bohai Light Industry Investment Group, Grupp ta’ Intrapriżi tal-Istat taħt is-SASAC (32). Fir-rigward tal-kumpanija privata Zhonglu co. li topera l-marka Shanghai Forever, ta’ min jiġi nnotat li l-President tal-kumpanija huwa viċi segretarju tal-Kumitat tal-Partit (33).

(53)

Barra minn hekk, fis-settur tal-prodott taħt rieżami hemm stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tal-Artikolu 2(6a)(b), it-tielet inċiż tar-Regolament bażiku. L-investigazzjoni identifikat aktar dokumenti li juru li l-industrija tibbenefika minn gwida u intervent governattivi fis-settur tar-roti elettriċi. Barra minn hekk, l-industrija tar-roti fid-Distrett ta’ Jinghai ġiet inkluża fil-lista ta’ raggruppamenti karatteristiċi tal-industrija ta’ intrapriżi żgħar u ta’ daqs medju fl-2023 imħabbra mill-Ministeru għall-Industrija u t-Teknoloġija tal-Informazzjoni (ara l-premessa (49) hawn fuq) (34).

(54)

Ma ġiet ippreżentata l-ebda evidenza f’din l-investigazzjoni li turi li s-settur tar-roti elettriċi mhuwiex affettwat mill-intervent tal-gvern fis-sistema finanzjarja fis-sens tal-Artikolu 2(6a)(b), is-sitt inċiż tar-Regolament bażiku. Pereżempju, l-investigazzjoni kkonfermat li Shanghai Phoenix ibbenefikat minn sussidji governattivi fl-2022 u fl-2023 kif iddikjarat fir-Rapport Annwali tagħha tal-2023 (35). Zhonglu co., li topera l-marka Shanghai Forever ibbenefikat ukoll minn sussidji governattivi kif iddikjarat fir-Rapport Annwali tagħha tal-2023 (36).

(55)

Fl-aħħar nett, il-Kummissjoni tfakkar li sabiex jiġi prodott il-prodott taħt reviżjoni, huma meħtieġa għadd ta’ inputs (ara wkoll il-premessa (40) hawn fuq). Meta l-produtturi tar-roti elettriċi jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) jiġu esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Huma jistgħu jissellfu flus li jkunu soġġetti għad-distorsjonijiet fis-settur finanzjarju/l-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u tas-setturi.

(56)

B’konsegwenza ta’ dan, mhux biss il-prezzijiet tal-bejgħ domestiku tar-roti elettriċi ma jkunux xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet kollha tal-input (inkluż il-materja prima, l-enerġija, l-art, il-finanzjament, il-manodopera, eċċ.) jiġu affettwati wkoll minħabba li l-formazzjoni tal-prezz tagħhom tiġi affettwata minn intervent sostanzjali tal-gvern, kif deskritt fil-Partijiet I u II tar-Rapport (aġġornat). Tabilħaqq, l-interventi tal-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fir-RPĊ permezz tat-taħlita ta’ firxa ta’ fatturi tal-produzzjoni jiġi espost għal distorsjonijiet sinifikanti. L-istess japplika għall-input tal-input, eċċ.

(57)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt reviżjoni, inkluż il-kostijiet tal-materja prima, tal-enerġija u tal-manodopera, mhumiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku, kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Fuq dik il-bażi, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li mhuwiex xieraq li jintużaw prezzijiet u kostijiet domestiċi biex jiġi stabbilit valur normali f’dan il-każ. Konsegwentement, il-Kummissjoni pproċediet biex taħdem il-valur normali esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif deskritt fit-taqsima li ġejja.

(58)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(59)

Kif spjegat fil-premessa (36), il-Kummissjoni ħarġet nota għall-fajl dwar is-sorsi għad-determinazzjoni tal-valur normali fit-18 ta’ Lulju 2024. Din in-nota ddeskriviet il-fatti u l-evidenza li jirfdu l-kriterji rilevanti, informat lill-partijiet interessati bl-intenzjoni tagħha li tqis lit-Turkija bħala pajjiż rappreżentattiv xieraq f’dan il-każ jekk l-eżistenza ta’ distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(60)

F’konformità mal-kriterji elenkati fl-Artikolu 2(6a) tar-Regolament bażiku, il-Kummissjoni identifikat lit-Turkija bħala pajjiż b’livell simili ta’ żvilupp ekonomiku bħar-RPĊ. It-Turkija hija klassifikata mill-Bank Dinji bħala pajjiż b’“introjtu medju superjuri” fuq bażi ta’ introjtu nazzjonali gross. Barra minn hekk, it-Turkija ġiet identifikata bħala pajjiż fejn il-prodott taħt reviżjoni qiegħed jiġi prodott u fejn id-data rilevanti kienet faċilment disponibbli.

(61)

Fl-aħħar nett, abbażi tal-elementi kollha ta’ hawn fuq, wara li ġie stabbilit li t-Turkija kienet pajjiż rappreżentattiv xieraq, u mingħajr ebda pajjiż rappreżentattiv xieraq alternattiv propost minn kwalunkwe waħda mill-partijiet interessati, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-Artikolu 2(6a)(a), l-ewwel inċiż, l-aħħar sentenza tar-Regolament bażiku.

(62)

Fin-nuqqas ta’ kooperazzjoni, kif propost fit-talba għal reviżjoni ta’ skadenza u peress li t-Turkija ssodisfat il-kriterji stabbiliti fl-Artikolu 2(6a)(a), l-ewwel inċiż tar-Regolament bażiku, il-Kummissjoni għażlet lit-Turkija bħala l-pajjiż rappreżentattiv xieraq.

(63)

Fin-nota dwar is-sorsi rilevanti li għandhom jintużaw għad-determinazzjoni tal-valur normali, il-Kummissjoni elenkat il-fatturi tal-produzzjoni bħall-materjali, l-enerġija u l-manodopera użati fil-produzzjoni tal-prodott taħt reviżjoni mill-produtturi tal-Unjoni u Torok abbażi tal-informazzjoni fit-talba għal reviżjoni ta’ skadenza aġġornata kif xieraq fejn kienet disponibbli informazzjoni aktar preċiża. Il-Kummissjoni ddikjarat ukoll li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija tuża l-Global Trade Atlas (“GTA”) (39) biex tistabbilixxi l-kost mingħajr distorsjoni ta’ xi wħud mill-fatturi ta’ produzzjoni, b’mod partikolari l-aktar materja prima importanti. Barra minn hekk, il-Kummissjoni ddikjarat li tuża informazzjoni mill-Istitut Tork tal-Istatistika (40) biex tistabbilixxi l-kostijiet mingħajr distorsjoni tal-manodopera u tal-enerġija.

(64)

Il-Kummissjoni ddikjarat ukoll li biex tistabbilixxi l-ammonti raġonevoli għall-kostijiet SG&A u għall-profitt, hija kienet se tuża d-data finanzjarja mill-Istatistika tal-Kontijiet tal-Kumpanija għal 206 kumpaniji attivi fil-kategorija 30.9 tan-NACE, kif stabbilit fil-premessa (36).

(65)

Il-Kummissjoni infurmat ukoll lill-partijiet interessati li għadd ta’ fatturi ta’ produzzjoni (iż-żebgħa, iż-żebgħa ta’ taħt u l-kitt elettriku tal-EPAC) kollha kienu jirrappreżentaw individwalment sehem żgħir mill-kostijiet totali tal-materja prima/tal-komponenti fil-perjodu ta’ investigazzjoni tar-reviżjoni (flimkien anqas minn 1 % tal-kostijiet totali tal-materja prima/tal-komponenti). Għalhekk, il-Kummissjoni ttrattat dawn il-fatturi l-oħrajn tal-produzzjoni bħala “materjali konsumabbli” u esprimiet dawn il-materjali konsumabbli bħala perċentwal tal-kost totali tal-materja prima.

(66)

Barra minn hekk, il-Kummissjoni inkludiet valur għall-kostijiet ġenerali tal-manifattura sabiex tkopri kostijiet mhux inklużi fil-fatturi ta’ produzzjoni msemmija hawn fuq. Il-Kummissjoni stabbiliet il-proporzjon tal-ispejjeż ġenerali tal-manifattura għall-kostijiet diretti tal-manifattura, abbażi ta’ informazzjoni speċifika mill-produtturi tal-Unjoni u mill-kumpaniji relatati tagħhom, ipprovduta mill-applikant. (41)

(67)

Fid-dawl tal-kummenti tal-applikant dwar in-Nota għall-Fajl, il-Kummissjoni għamlet żewġ bidliet fil-lista tal-fatturi ta’ produzzjoni kif ġej. L-ewwel nett, żball klerikali ġie kkoreġut fejn l-informazzjoni relatata mal-batteriji nbidlet b’mod involontarju mal-informazzjoni għall-mutur elettriku għar-roti. It-tieni nett, għal erba’ fatturi ta’ produzzjoni (is-settijiet tal-krank, il-pedali, il-buttun ta’ wara u l-buttun ta’ quddiem) il-kodiċijiet tal-merkanzija użati fin-nota ġew issostitwiti b’kodiċijiet tal-merkanzija aktar preċiżi relatati direttament mal-parts ikkonċernati. Dawn il-bidliet ġew riflessi fit-Tabella 1.

(68)

Meta titqies l-informazzjoni kollha bbażata fuq it-talba u l-informazzjoni sussegwenti ppreżentata mill-applikant u miġbura matul iż-żjarat ta’ verifika, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni tar-roti elettriċi

(69)

Il-proċessi tal-produzzjoni tar-roti elettriċi huma globalment simili, bl-ebda differenza sinifikanti bejn il-proċessi tal-produzzjoni jew il-materjali tal-input użati fir-RPĊ, fl-Unjoni u f’pajjiżi oħrajn.

(70)

Sabiex jiġi stabbilit il-prezz mingħajr distorsjoni tal-materja prima kif ikkonsenjata mal-bibien ta’ produttur ta’ pajjiż rappreżentattiv, il-Kummissjoni użat bħala bażi l-prezz medju ponderat tal-importazzjoni fil-pajjiż rappreżentattiv kif irrapportat fil-GTA, li miegħu żdiedu d-dazji tal-importazzjoni. Il-prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha, bl-esklużjoni tar-RPĊ u tal-pajjiżi li mhumiex membri tad-WTO, elenkati fl-Anness I tar-Regolament (UE) 2015/755 tal-Parlament Ewropew u tal-Kunsill. (43) Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li kkonkludiet fil-premessa (57) li mhuwiex xieraq li jintużaw il-prezzijiet u l-kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsubin għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Wara li ġew esklużi l-importazzjonijiet mir-RPĊ lejn il-pajjiż rappreżentattiv, il-volum tal-importazzjonijiet minn pajjiżi terzi oħrajn baqa’ rappreżentattiv.

(71)

Il-Kummissjoni ma sabet l-ebda importazzjoni oħra fi kwantitajiet materjali minn sorsi distorti oħrajn.

(72)

Għal xi fatturi ta’ produzzjoni, id-data statistika mill-GTA pprovdiet prezzijiet għal kull tunnellata/kilogramma, filwaqt li l-valuri tal-konsum fil-produzzjoni ta’ rota elettrika kienu f’unitajiet (jew f’kejl ieħor bħall-metri). Dan kien jikkonċerna l-fatturi ta’ produzzjoni li ġejjin: swiċċijiet, brejkijiet, settijiet tal-krank, derailleurs ta’ wara, sprokits ta’ wara, livers tal-gerijiet, buttuni ta’ quddiem, buttun ta’ wara, imgħażel, buttuni ta’ wara, decals, settijiet tar-ras, pedali, sruġ, klamps tas-sit, u tubi tas-sit. Għall-fatturi ta’ konverżjoni li għandhom jintużaw għal dawn il-fatturi ta’ produzzjoni, il-Kummissjoni qagħdet fuq l-ispjegazzjonijiet u l-evidenza ta’ sostenn ipprovduti mill-applikanti fit-talba. (44) Din l-evidenza kienet tikkonsisti f’informazzjoni minn siti web speċjalizzati (45) u fil-kalkoli tal-applikanti stess tal-piż għal kull oġġett. (46)

(73)

Għal għadd ta’ fatturi ta’ produzzjoni, il-kostijiet attwali mġarrba mill-produtturi tal-Unjoni inklużi fil-kampjun kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni tar-reviżjoni. Peress li l-valur użat għal dawn il-fatturi ta’ produzzjoni ma kellu l-ebda impatt sinifikattiv fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet fil-materjali konsumabbli kif spjegat fil-premessa (65).

(74)

Fid-dawl tan-nuqqas ta’ kooperazzjoni u fin-nuqqas ta’ elementi oħrajn fil-fajl, abbażi tad-data pprovduta mill-applikant, il-Kummissjoni stabbiliet il-proporzjon tal-materjali konsumabbli għall-kostijiet totali tal-materja prima/tal-komponenti għal 1 %. Dan il-perċentwal imbagħad ġie applikat għall-kost ikkalkulat mill-ġdid tal-materja prima/tal-komponenti meta ntużaw il-prezzijiet mingħajr distorsjoni stabbiliti.

(75)

Normalment, jenħtieġ li l-prezzijiet tat-trasport domestiku jiżdiedu wkoll ma’ dawn il-prezzijiet tal-importazzjoni. Madankollu, b’kunsiderazzjoni tan-nuqqas ta’ kooperazzjoni kif ukoll tan-natura ta’ din l-investigazzjoni tar-reviżjoni ta’ skadenza, li hija ffokata biex tiskopri jekk id-dumping kompliex matul il-perjodu ta’ investigazzjoni tar-reviżjoni jew jekk jistax jerġa’ jseħħ, aktar milli biex tiskopri d-daqs eżatt tiegħu, il-Kummissjoni ddeċidiet li l-aġġustamenti għat-trasport domestiku ma kienux meħtieġa. Dawn l-aġġustamenti jirriżultaw biss f’żieda tal-valur normali u għalhekk tal-marġni tad-dumping.

(76)

L-Istitut Tork tal-Istatistika jippubblika informazzjoni dettaljata dwar il-pagi f’setturi ekonomiċi differenti fit-Turkija. Il-Kummissjoni użat l-aħħar statistika disponibbli (2022) għall-kost lavorattiv medju fis-Settur 30 tan-NACE li tinkludi l-kostijiet tal-manodopera fil-manifattura tar-roti elettriċi (47). Il-kostijiet lavorattivi medji fis-siegħa miksubin b’dan il-mod ġew aġġustati aktar għall-inflazzjoni bl-użu tal-indiċi tal-kost lavorattiv (48) biex jirriflettu l-kostijiet għall-perjodu ta’ investigazzjoni tar-reviżjoni.

(77)

Biex tistabbilixxi l-prezz referenzjarju għall-elettriku, il-Kummissjoni użat il-prezzijiet kif irrapportati fit-tabelli tat-tariffi tal-elettriku bbażati fuq il-kontijiet tal-elettriku ppubblikati mill-Awtorità Regolatorja Torka tas-Suq tal-Enerġija (EMRA, Turkish Energy Market Regulatory Authority) fl-istqarrijiet għall-istampa regolari tagħha. (49) Il-Kummissjoni użat id-data relatata mal-prezzijiet tal-elettriku industrijali f’Kuruş/kWh għas-settur industrijali għall-2023, li kien ta’ 0,892 CNY/kWh.

(78)

Biex tistabbilixxi l-prezz referenzjarju għall-gass, il-Kummissjoni użat il-prezz tal-gass għall-utenti industrijali fit-Turkija kif ippubblikat mill-Istitut Tork tal-Istatistika (50) fl-istqarrijiet għall-istampa regolari tiegħu għat-tieni semestru tal-2021 u għall-ewwel semestru tal-2022. Il-Kummissjoni użat id-data tal-prezzijiet tal-gass fil-faxxa ta’ konsum korrispondenti f’Kuruş/m3, aġġustata kif xieraq għall-inflazzjoni bl-użu tal-Indiċi tal-Prezzijiet tal-Produtturi ppubblikat mill-Istitut Tork tal-Istatistika (51), biex tadatta għall-perjodu ta’ investigazzjoni tar-rieżami (2023), li rriżulta fi prezz ta’ 4,112 CNY/m3. Il-prezz ġie aġġustat għall-VAT ta’ 18 %, peress li l-prezz ikkwotat kien jinkludi l-VAT.

(79)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(80)

Sabiex tistabbilixxi valur mingħajr distorsjoni tal-ispejjeż ġenerali tal-manifattura u minħabba n-nuqqas ta’ kooperazzjoni mill-produtturi Ċiniżi tar-roti elettriċi, il-Kummissjoni użat il-fatti disponibbli f’konformità mal-Artikolu 18 tar-Regolament bażiku. Għalhekk, abbażi tad-data pprovduta mill-applikant, il-Kummissjoni stabbiliet il-proporzjon tal-ispejjeż ġenerali tal-manifattura għall-kostijiet totali tal-manifattura u lavorattivi. Imbagħad, dan il-perċentwal ġie applikat għall-valur mingħajr distorsjoni tal-kost tal-manifattura biex jinkiseb il-valur mingħajr distorsjoni tal-ispejjeż ġenerali tal-manifattura.

(81)

Sabiex tistabbilixxi ammont mingħajr distorsjoni u raġonevoli għall-SG&A u għall-profitt, il-Kummissjoni qagħdet fuq l-aktar data finanzjarja reċenti disponibbli għal 206 kumpaniji Torok attivi fil-kategorija 30.9 tan-NACE, kif stabbilit fil-premessa (36). Il-Kummissjoni qieset l-ammont għall-kostijiet SG&A u għall-profitti stabbilit b’dan il-mod bħala raġonevoli skont it-tifsira tal-Artikolu 2(6a)(a), għal-livell tal-kummerċ ta’ kif joħroġ mill-fabbrika li fih inħadem il-valur normali.

(82)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(83)

L-ewwel nett, il-Kummissjoni stabbiliet il-kostijiet tal-manifattura mingħajr distorsjoni. Fin-nuqqas ta’ kooperazzjoni mill-produtturi esportaturi, il-Kummissjoni qagħdet fuq l-informazzjoni pprovduta mill-applikant fit-talba għal reviżjoni (52), ivverifikata fuq il-post għand wieħed mill-produtturi tal-Unjoni inklużi fil-kampjun, dwar l-użu ta’ kull fattur (il-materjali, l-enerġija u l-manodopera) għall-produzzjoni tar-roti elettriċi. Il-Kummissjoni mmultiplikat il-fatturi tal-użu bil-kostijiet mingħajr distorsjoni għal kull unità osservati fil-pajjiż rappreżentattiv it-Turkija.

(84)

Hekk kif ġie stabbilit il-kost mingħajr distorsjoni tal-manifattura, il-Kummissjoni żiedet l-ispejjeż ġenerali tal-manifattura, il-kostijiet SG&A u l-profitt kif innotat fil-premessi (79)–(80). L-ispejjeż ġenerali tal-manifattura ġew iddeterminati abbażi tad-data pprovduta mill-applikant. Il-kostijiet SG&A u l-profitt ġew iddeterminati abbażi tal-medja tal-valuri rrapportati għall-206 kumpaniji Torok attivi fil-kategorija 30.9 tan-NACE għall-2022. (53) Il-Kummissjoni żiedet l-entrati li ġejjin mal-kostijiet mingħajr distorsjoni tal-manifattura:

(85)

Fuq dik il-bażi, il-Kummissjoni ħadmet il-valur normali fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(86)

Fin-nuqqas ta’ kooperazzjoni mill-produtturi esportaturi mir-RPĊ, il-prezz tal-esportazzjoni ġie ddeterminat abbażi tad-data CIF (Eurostat) ikkoreġuta għal livell ta’ kif joħroġ mill-fabbrika. Għalhekk, il-prezz CIF tnaqqas bil-kost tan-nol (bil-baħar) u tal-assigurazzjoni, u bil-kost tat-trasport domestiku. Il-kostijiet tat-trasport domestiku Ċiniż u internazzjonali kienu bbażati fuq informazzjoni pprovduta mill-applikant fit-talba għal reviżjoni.

(87)

Il-Kummissjoni qabblet il-valur normali maħdum stabbilit f’konformità mal-Artikolu 2(6a)(a) tar-Regolament bażiku mal-prezz tal-esportazzjoni fuq bażi ta’ kif joħroġ mill-fabbrika kif stabbilit hawn fuq. Meta jitqies li kemm il-valur normali kif ukoll il-prezz tal-esportazzjoni ġew stabbiliti fil-livell tal-kummerċ ta’ kif joħroġ mill-fabbrika, ma kien meħtieġ l-ebda aġġustament.

(88)

Fuq din il-bażi, instab li l-marġni medju tad-dumping kien sinifikanti. Għalhekk ġie konkluż li d-dumping tkompla matul il-perjodu ta’ investigazzjoni tar-reviżjoni.

(89)

Wara li nstabet l-eżistenza tad-dumping matul il-perjodu ta’ investigazzjoni tar-reviżjoni, il-Kummissjoni investigat, f’konformità mal-Artikolu 11(2) tar-Regolament bażiku, il-probabbiltà ta’ kontinwazzjoni tad-dumping jekk il-miżuri jiskadu. Ġew analizzati l-elementi addizzjonali li ġejjin: il-kapaċità ta’ produzzjoni u l-kapaċità ta’ riżerva fir-RPĊ, ir-relazzjoni bejn il-prezzijiet tal-esportazzjoni lejn pajjiżi terzi u l-livell tal-prezzijiet fl-Unjoni, u l-attraenza tas-suq tal-Unjoni. Huwa mfakkar li minħabba n-nuqqas ta’ kooperazzjoni mill-produtturi esportaturi Ċiniżi kif ukoll mill-GTĊ, l-analiżi kienet ibbażata fuq il-fatti disponibbli f’konformità mal-Artikolu 18 tar-Regolament bażiku, b’mod partikolari t-talba għal reviżjoni, l-istatistika tal-GTA u informazzjoni disponibbli oħra.

(90)

Fin-nuqqas ta’ kooperazzjoni mill-GTĊ u mill-produtturi esportaturi Ċiniżi, il-Kummissjoni bbażat is-sejbiet tagħha rigward il-kapaċità ta’ produzzjoni u l-kapaċità ta’ riżerva fir-RPĊ fuq l-informazzjoni pprovduta mill-applikant fit-talba tiegħu għal reviżjoni.

(91)

L-investigazzjoni wriet li kien hemm kapaċità żejda ġenerali fis-settur tar-roti elettriċi fir-RPĊ matul il-perjodu kkunsidrat. Il-kapaċità ta’ produzzjoni (54) fir-RPĊ matul dan il-perjodu kienet stmata għal 130 miljun unità fis-sena. Barra minn hekk, il-produzzjoni Ċiniża ta’ roti standard tista’ faċilment tinbidel għall-produzzjoni ta’ roti elettriċi, b’kapaċità totali potenzjali ta’ aktar minn 400 miljun unità. (55) Skont l-informazzjoni dwar is-suq tal-applikant, il-produzzjoni u l-bejgħ attwali Ċiniżi tar-roti elettriċi ammontaw għal 57 miljun unità fis-sena, li indikaw kapaċità stmata ta’ riżerva ta’ 73 miljun unità fis-sena matul il-perjodu ta’ investigazzjoni tar-reviżjoni. (56) Din il-kapaċità ta’ riżerva, li kienet kważi 15-il darba akbar mill-konsum totali tal-Unjoni matul l-istess perjodu, tista’ tiġi ddevjata lejn l-Unjoni jekk il-miżuri attwali jiskadu.

(92)

Abbażi ta’ dan ta’ hawn fuq, il-Kummissjoni kkonkludiet li l-produtturi esportaturi Ċiniżi għandhom kapaċitajiet ta’ riżerva sinifikanti, li jistgħu jintużaw għall-esportazzjonijiet lejn l-Unjoni fi kwantitajiet kbar bi prezzijiet li huma l-oġġett ta’ dumping jekk il-miżuri jitħallew jiskadu.

(93)

Abbażi tal-informazzjoni pprovduta fit-talba għal reviżjoni ta’ skadenza, is-suq tal-Unjoni għar-roti elettriċi baqa’ attraenti għall-esportaturi Ċiniżi. Mill-investigazzjoni oriġinali, l-importazzjonijiet mir-RPĊ naqsu kemm f’termini assoluti kif ukoll f’termini relattivi. Madankollu, mill-2020, meta l-volumi tal-importazzjonijiet miċ-Ċina kienu fl-aktar livell baxx tagħhom, l-importazzjonijiet żdiedu b’mod sinifikanti u kważi rduppjaw minkejja l-miżuri fis-seħħ (ara t-tabella 3 hawn taħt). Is-sehem mis-suq li qabel kien miżmum mir-RPĊ ittieħed parzjalment minn pajjiżi terzi oħrajn bħat-Tajwan, li żied il-volumi tal-esportazzjoni tiegħu tal-prodott taħt reviżjoni lejn l-Unjoni mill-investigazzjoni preċedenti. Fl-istess ħin, ir-RPĊ kienet għadha t-tieni l-akbar esportatur ta’ roti elettriċi lejn l-Unjoni matul il-perjodu ta’ investigazzjoni tar-reviżjoni. Dan juri li l-Unjoni baqgħet suq attraenti għal esportaturi mir-RPĊ.

(94)

Is-suq tal-Unjoni għar-roti elettriċi huwa wieħed mill-akbar fid-dinja, b’konsum ta’ 4 979 000 unità matul il-perjodu ta’ investigazzjoni tar-reviżjoni. Barra minn hekk, kif spjegat fit-talba għal reviżjoni ta’ skadenza, id-domanda għar-roti elettriċi hija mistennija tikber fis-snin li ġejjin minħabba (fost affarijiet oħrajn) il-politiki ambjentali fl-Unjoni. L-evidenza pprovduta mill-applikant fit-talba għal reviżjoni ta’ skadenza (57) u appoġġjata mis-sejbiet f’din l-investigazzjoni (ara l-premessa (147)) uriet li l-produtturi Ċiniżi kienu qed joffru roti elettriċi bi prezzijiet baxxi ħafna (bejn EUR 210 u EUR 650) kemm lill-Unjoni kif ukoll lil pajjiżi terzi matul il-perjodu ta’ investigazzjoni tar-reviżjoni.

(95)

Anki bil-miżuri fis-seħħ, l-esportazzjonijiet Ċiniżi lejn l-Unjoni komplew, u saħansitra żdiedu fil-perjodu kkunsidrat biex inkiseb sehem mis-suq ta’ 4,4 % fil-perjodu ta’ investigazzjoni tar-reviżjoni, li wera li s-suq tal-Unjoni baqa’ attraenti għall-produtturi esportaturi Ċiniżi.

(96)

Għalhekk, abbażi tal-kapaċità żejda sinifikanti fir-RPĊ u tal-attraenza tas-suq tal-Unjoni, il-Kummissjoni kkonkludiet li, jekk il-miżuri kurrenti jiskadu, huwa probabbli li l-produtturi esportaturi Ċiniżi jidderieġu mill-ġdid l-esportazzjonijiet lejn l-Unjoni fi kwantitajiet kbar, bi prezzijiet li jkunu l-oġġett ta’ dumping.

(97)

Fid-dawl tas-sejbiet tagħha dwar il-kontinwazzjoni tad-dumping matul il-perjodu ta’ investigazzjoni tar-reviżjoni u dwar l-iżvilupp probabbli ta’ żieda fl-esportazzjonijiet jekk il-miżuri jiskadu, il-Kummissjoni kkonkludiet li hemm probabbiltà qawwija li l-iskadenza tal-miżuri anti-dumping fuq l-importazzjonijiet mir-RPĊ tirriżulta fil-kontinwazzjoni tad-dumping.

(98)

Il-prodott simili kien immanifatturat minn 67 produttur fl-Unjoni matul il-perjodu kkunsidrat. Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(99)

Il-produzzjoni totali tal-Unjoni fil-perjodu ta’ investigazzjoni tar-reviżjoni ġiet stabbilita għal madwar 4 560 000 unità. Dan in-numru ġie stabbilit abbażi tal-informazzjoni disponibbli dwar l-industrija tal-Unjoni, bħar-rapport dwar L-Industrija Ewropea tar-Roti u l-Profil tas-Suq, u studju ekonomiku mwettaq mill-Konfederazzjoni tal-Industrija Ewropea tar-Roti (“CONEBI”, Confederation of the European Bicycle Industry). Kif indikat fil-premessa (11), intgħażlu tliet produtturi tal-Unjoni fil-kampjun li jirrappreżentaw 23,4 % tal-produzzjoni totali tal-Unjoni tal-prodott simili.

(100)

Il-Kummissjoni stabbiliet il-konsum tal-Unjoni abbażi tal-istatistika tal-Eurostat dwar l-importazzjonijiet u l-volum tal-bejgħ tal-industrija tal-Unjoni fl-Unjoni, kif ippreżentat mill-CONEBI.

(101)

Il-konsum tal-Unjoni żviluppa kif ġej:

Tabella 2

Konsum tal-Unjoni (unitajiet)

(102)

Il-konsum totali tar-roti elettriċi fl-UE żdied minn madwar 4,3 miljun rota elettrika fl-2020 għal 5,3 miljun rota elettrika fl-2022. It-titjib fid-disinn u fil-prestazzjoni, flimkien ma’ sensibilizzazzjoni ambjentali akbar fost iċ-ċittadini tal-UE, wasslu għal żieda kostanti fil-konsum tar-roti elettriċi. Madankollu, fil-perjodu ta’ investigazzjoni tar-reviżjoni, il-konsum tar-roti elettriċi fl-UE naqas bi 346 000 unità meta mqabbel mal-2022 wara tnaqqis fid-domanda li seħħ xi żmien wara t-tneħħija tal-aħħar miżuri tal-COVID-19 fl-ewwel nofs tal-2022.

(103)

Il-Kummissjoni stabbiliet il-volum tal-importazzjonijiet abbażi tad-data tal-Eurostat.

(104)

Imbagħad is-sehem mis-suq tal-importazzjonijiet ġie stabbilit billi tqabblu l-volumi tal-importazzjonijiet mal-konsum tal-Unjoni kif jidher fit-Tabella 2.

(105)

L-importazzjonijiet lejn l-Unjoni mir-RPĊ żviluppaw kif ġej:

Tabella 3

Volum tal-importazzjoni (unitajiet) u sehem mis-suq

(106)

Anki bil-miżuri fis-seħħ, is-sehem mis-suq tal-importazzjonijiet Ċiniżi żdied minn 2,3 % fl-2020 għal 4,4 % fil-perjodu ta’ investigazzjoni tar-reviżjoni.

(107)

Il-Kummissjoni stabbiliet il-prezzijiet tal-importazzjonijiet abbażi tad-data tal-Eurostat.

(108)

Il-prezz medju tal-importazzjonijiet lejn l-Unjoni mir-RPĊ żviluppa kif ġej:

Tabella 4

Prezzijiet tal-importazzjoni (EUR/unità)

(109)

Il-prezzijiet medji tal-importazzjonijiet mir-RPĊ komplew ikunu estremament baxxi matul il-perjodu kkunsidrat. Fl-2020 u l-2021, il-prezzijiet irrapportati mill-Eurostat kienu saħansitra aktar baxxi mill-prezzijiet medji misjuba fl-investigazzjoni inizjali (jiġifieri bejn EUR 422 u EUR 477).

(110)

Abbażi tad-data tal-Eurostat, il-prezzijiet fl-2022 kienu temporanjament ogħla, iżda xorta aktar baxxi mill-prezzijiet tal-importazzjonijiet Ċiniżi fl-2016 (jiġifieri EUR 477).

(111)

Peress li ma kien hemm l-ebda kooperazzjoni mill-produtturi esportaturi fir-RPĊ, il-Kummissjoni ddeterminat it-twaqqigħ tal-prezz matul il-perjodu ta’ investigazzjoni tar-reviżjoni billi qabblet:

(112)

Ir-riżultat tat-tqabbil ġie espress bħala perċentwal tal-fatturat tal-produtturi tal-Unjoni inklużi fil-kampjun matul il-perjodu ta’ investigazzjoni tar-reviżjoni. It-twaqqigħ tal-prezz varja minn 68 % sa 80 %. Mingħajr id-dazji, it-twaqqigħ tal-prezz ammonta għal 82,8 %.

(113)

L-importazzjonijiet ta’ roti elettriċi minn pajjiżi terzi għajr ir-RPĊ kienu prinċipalment mit-Tajwan u l-Vjetnam.

(114)

Il-volum (aggregat) tal-importazzjonijiet lejn l-Unjoni kif ukoll is-sehem mis-suq u x-xejriet tal-prezzijiet għall-importazzjonijiet tar-roti elettriċi minn pajjiżi terzi oħrajn żviluppaw kif ġej:

Tabella 5

Importazzjonijiet minn pajjiżi terzi

(115)

L-ishma mis-suq tal-importazzjonijiet totali tal-prodott taħt rieżami minn pajjiżi terzi għajr ir-RPĊ żdiedu bejn l-2020 u l-2022 u laħqu l-20,3 % fl-2022. Madankollu, fil-perjodu ta’ investigazzjoni tar-rieżami dan naqas għal 16,3 %, livell aktar baxx milli fl-2020.

(116)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(117)

Kif imsemmi fil-premessa (11), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(118)

Sabiex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tal-informazzjoni pprovduta mill-CONEBI. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni inklużi fil-kampjun.

(119)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, l-impjiegi, il-produttività, id-daqs tal-marġni tad-dumping, u l-irkupru minn dumping fil-passat.

(120)

L-indikaturi mikroekonomiċi huma: il-prezzijiet medji tal-bejgħ, il-kost ta’ unità, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti, u l-kapaċità li jiġi ġġenerat il-kapital.

(121)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Produzzjoni, kapaċità tal-produzzjoni u użu tal-kapaċità

(122)

Il-kapaċità tal-produzzjoni u l-produzzjoni fl-Unjoni żdiedu b’mod kostanti fil-perjodu mill-2020 sal-2022 bħala konsegwenza ta’ żieda fid-domanda matul il-pandemija tal-COVID-19. Madankollu, fil-perjodu ta’ investigazzjoni tar-reviżjoni kien hemm tnaqqis fil-volumi u fil-kapaċitajiet tal-produzzjoni minħabba żieda fl-istokk akkumulat matul il-COVID-19, fejn il-produtturi tal-Unjoni antiċipaw li l-bejgħ se jkompli b’livell aċċellerat ħafna, li ma seħħx peress li d-domanda naqset b’mod sinifikanti wara l-COVID-19.

(123)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 7

Volum tal-bejgħ u sehem mis-suq (unitajiet)

(124)

Il-bejgħ żdied matul il-perjodu kkunsidrat, speċjalment minħabba żieda fid-domanda matul il-pandemija tal-COVID-19. Madankollu, hekk kif tneħħew il-miżuri tal-COVID-19, id-domanda għar-roti elettriċi naqset u dan irriżulta f’ċifri tal-bejgħ aktar baxxi fil-perjodu ta’ investigazzjoni tar-reviżjoni. Barra minn hekk, is-sitwazzjoni ekonomika fl-2022 u l-perjodu ta’ investigazzjoni tar-reviżjoni (il-kostijiet ogħla tal-enerġija, l-inflazzjoni, b’mod partikolari) kellhom effett mhux biss fuq l-industrija tal-Unjoni iżda wkoll fuq il-konsumaturi, b’mod partikolari dawk b’anqas kapaċità tal-akkwist. Għalhekk, il-bejgħ tal-industrija tal-Unjoni staġna fil-perjodu ta’ investigazzjoni tar-reviżjoni meta mqabbel mal-2022, filwaqt li s-sehem mis-suq tal-industrija tal-Unjoni żdied b’4,5 punti perċentwali.

(125)

L-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(126)

L-industrija tal-Unjoni żiedet il-livell ta’ impjiegi bi 28 % fil-perjodu kkunsidrat. Il-biċċa l-kbira ta’ din iż-żieda seħħet bejn l-2020 u l-2022 bħala konsegwenza ta’ żieda fid-domanda matul il-pandemija tal-COVID-19. Fl-2023 kien hemm tnaqqis fl-għadd ta’ impjegati minħabba t-tnaqqis fil-volumi tal-produzzjoni. Il-produttività baqgħet pjuttost stabbli fil-perjodu kkunsidrat.

(127)

Billi l-bejgħ baqa’ stabbli fil-perjodu ta’ investigazzjoni tar-reviżjoni meta mqabbel mal-2022, filwaqt li l-konsum naqas, l-industrija tal-Unjoni rnexxielha żżid is-sehem mis-suq tagħha b’4,5 % f’dak il-perjodu.

(128)

Il-livell tal-importazzjonijiet mir-RPĊ matul il-perjodu ta’ investigazzjoni tar-reviżjoni kien relattivament limitat, fejn kien jirrappreżenta 4,4 % tal-konsum tal-Unjoni. Għalhekk, l-impatt tad-daqs tad-dumping fuq l-industrija tal-Unjoni kien pjuttost limitat.

(129)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 9

Prezzijiet tal-bejgħ u kost tal-produzzjoni fl-Unjoni (EUR/unità)

(130)

Il-prezzijiet medji tal-bejgħ tal-produtturi tal-Unjoni inklużi fil-kampjun, kif ukoll il-kostijiet tal-produzzjoni, żdiedu fil-perjodu kkunsidrat, li fl-2020 u fl-2021 kienu jirriflettu prinċipalment bidla fit-taħlita tat-tip ta’ prodotti u l-avvanzi teknoloġiċi fil-muturi u l-batteriji tar-roti elettriċi, filwaqt li fl-2022 u fil-perjodu ta’ investigazzjoni tar-reviżjoni dik iż-żieda kienet tirrifletti wkoll żieda fil-kostijiet tal-produzzjoni minħabba s-sitwazzjoni ekonomika ġenerali kkaratterizzata mill-inflazzjoni u minn kostijiet ogħla tal-enerġija.

(131)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(132)

Għalkemm kien hemm tnaqqis fl-għadd ta’ impjegati fil-perjodu ta’ investigazzjoni tar-reviżjoni meta mqabbel mal-2022 wara tnaqqis fid-domanda, il-kostijiet lavorattivi medji għal kull impjegat żdiedu b’mod kostanti fil-perjodu kkunsidrat.

(133)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Inventarji

(134)

Iż-żidiet fl-inventarji kienu dovuti għaż-żieda fl-istokk akkumulat matul il-COVID-19 fejn kien hemm żieda sinifikanti fid-domanda, flimkien ma’ kwistjonijiet tal-katina tal-provvista peress li l-produtturi tal-Unjoni kienu qed jordnaw materja prima u komponenti bl-eċċess sabiex jissodisfaw ir-rekwiżiti tal-produzzjoni. Madankollu, hekk kif ġew solvuti l-kwistjonijiet tal-katina tal-provvista, il-produtturi tal-Unjoni rċevew aktar materja prima u komponenti milli kien meħtieġ. Dan kien segwit minn tnaqqis fid-domanda għar-roti elettriċi fil-perjodu ta’ investigazzjoni tar-reviżjoni, meta mqabbel mal-2022, li ħalla lill-produtturi tal-Unjoni b’għadd kbir ħafna ta’ inventarji fi tmiem il-perjodu ta’ investigazzjoni tar-reviżjoni.

(135)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabilità, fluss tal-flus, investimenti u redditu fuq l-investimenti

(136)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala persentaġġ tal-fatturat ta’ dak il-bejgħ. Il-produtturi tal-Unjoni inklużi fil-kampjun baqgħu profittabbli matul il-perjodu kkunsidrat. Madankollu, il-profittabbiltà naqset minħabba żieda fil-kostijiet fil-perjodu ta’ investigazzjoni tar-reviżjoni.

(137)

Il-profittabbiltà stabbli ġenerali fil-perjodu kkunsidrat ippermettiet lill-industrija tal-Unjoni tagħmel investimenti kbar.

(138)

Il-fluss tal-flus nett huwa l-abbiltà tal-produtturi tal-Unjoni li jiffinanzjaw l-attivitajiet tagħhom huma stess. Il-fluss tal-flus naqas b’mod sinifikanti matul il-perjodu kkunsidrat u qaleb għan-negattiv fl-2023. Ir-redditu fuq l-investimenti ddeterjora wkoll, li għamilha aktar diffiċli għall-industrija tal-Unjoni biex tiġġenera l-kapital u tikber. Dan irriżulta fi tnaqqis fl-investimenti ta’ 50 % fil-perjodu ta’ investigazzjoni tar-reviżjoni meta mqabbel mal-2022.

(139)

L-indikaturi makro bħall-produzzjoni, il-bejgħ u l-impjiegi tal-Unjoni żdiedu b’mod kostanti fil-perjodu mill-2020 sal-2022, bħala konsegwenza ta’ żieda fid-domanda matul il-pandemija tal-COVID-19. Madankollu, il-volumi tal-produzzjoni, il-kapaċitajiet, il-bejgħ u l-impjiegi naqsu fil-perjodu ta’ investigazzjoni tar-reviżjoni minħabba żieda fl-istokk akkumulat matul il-pandemija tal-COVID-19, segwita minn tnaqqis fid-domanda bħala riżultat tat-tneħħija tal-miżuri tal-COVID-19 u tal-bidla fis-sitwazzjoni ekonomika fl-Unjoni, ikkaratterizzata b’mod partikolari minn kostijiet għoljin tal-enerġija u mill-inflazzjoni.

(140)

Fir-rigward tal-indikaturi mikroekonomiċi, l-investigazzjoni stabbiliet li l-profittabbiltà tal-produtturi tal-Unjoni inklużi fil-kampjun fil-perjodu mill-2020 sal-2022 baqgħet ogħla minn 7 %. Madankollu, il-profittabbiltà tal-industrija tal-Unjoni naqset għal 5,4 % fil-perjodu ta’ investigazzjoni tar-reviżjoni. Il-fluss tal-flus naqas mill-2020 sal-2022 u qaleb għan-negattiv fl-2023. Ir-redditu fuq l-investimenti ddeterjora wkoll, li għamilha aktar diffiċli għall-industrija tal-Unjoni biex tiġġenera l-kapital u tikber.

(141)

Abbażi ta’ dan ta’ hawn fuq, il-Kummissjoni kkonkludiet li l-industrija tal-Unjoni kienet irkuprat minn dannu materjali fil-passat skont it-tifsira tal-Artikolu 3(5) tar-Regolament bażiku, ikkawżat minn importazzjonijiet li kienu l-oġġett ta’ dumping mir-RPĊ. Madankollu, matul il-perjodu kkunsidrat, għadd ta’ indikaturi tad-dannu ddeterjoraw, u l-industrija tal-Unjoni reġgħet lura għal sitwazzjoni ekonomikament fraġli. Għalhekk, il-Kummissjoni eżaminat ukoll il-probabbiltà ta’ rikorrenza ta’ dannu kkawżat oriġinarjament mill-importazzjonijiet li kienu l-oġġett ta’ dumping mir-RPĊ jekk il-miżuri kellhom jitħassru.

(142)

Il-Kummissjoni analizzat l-elementi li ġejjin biex tistabbilixxi l-probabbiltà ta’ rikorrenza ta’ dannu jekk il-miżuri kellhom jitħassru: il-kapaċità ta’ produzzjoni u l-kapaċità ta’ riżerva fir-RPĊ, ir-relazzjoni bejn il-prezzijiet tal-esportazzjoni lejn pajjiżi terzi u l-livell tal-prezzijiet fl-Unjoni u l-impatt tal-importazzjonijiet potenzjali u tal-livelli tal-prezzijiet ta’ tali importazzjonijiet minn dawn il-pajjiżi fuq is-sitwazzjoni tal-industrija tal-Unjoni.

(143)

Kif diġà ġie deskritt u spjegat fid-dettall fit-taqsima 3.10.1 hawn fuq, il-produtturi esportaturi fir-RPĊ għandhom kapaċitajiet ta’ riżerva sinifikanti li jistgħu jintużaw biex jipproduċu l-prodott taħt reviżjoni għall-esportazzjoni lejn l-Unjoni jekk il-miżuri jitħallew jiskadu. Il-kwantitajiet li jistgħu jiġu esportati mill-produtturi esportaturi Ċiniżi jammontaw għal 73 miljun unità, li jaqbżu bil-kbir id-daqs tas-suq tal-Unjoni.

(144)

Kif deskritt u spjegat fid-dettall fit-taqsima 3.10.2 hawn fuq, is-suq tal-Unjoni għar-roti elettriċi huwa wieħed mill-akbar fid-dinja u d-domanda għar-roti elettriċi hija mistennija tikber fis-snin li ġejjin minħabba, fost punti oħrajn, il-politiki ambjentali fl-Unjoni. Il-produtturi esportaturi Ċiniżi esportaw lejn is-swieq terzi ewlenin tagħhom bi prezzijiet ferm taħt il-prezzijiet medji tal-bejgħ tal-produtturi tal-Unjoni fis-suq tal-Unjoni matul il-perjodu ta’ investigazzjoni tar-reviżjoni. Għalhekk, l-esportazzjoni lejn l-Unjoni hija potenzjalment ħafna aktar attraenti għall-esportaturi Ċiniżi. Konsegwentement, jista’ jkun raġonevolment mistenni li, jekk il-miżuri jitħassru, il-produtturi esportaturi Ċiniżi jibdew jesportaw volumi kbar tal-prodott taħt reviżjoni lejn l-Unjoni.

(145)

Sabiex jiġi stabbilit kif l-importazzjonijiet mir-RPĊ jaffettwaw l-industrija tal-Unjoni jekk il-miżuri jintemmu, il-Kummissjoni wettqet analiżi komparattiva tal-prezzijiet mingħajr l-eżistenza ta’ miżuri anti-dumping.

(146)

Sabiex jiġi stmat il-prezz probabbli li bih ibigħu l-produtturi Ċiniżi meta jesportaw lejn is-suq tal-Unjoni, il-Kummissjoni għamlet tqabbil tal-prezzijiet bejn il-prezz medju (kif joħroġ mill-fabbrika) tal-produtturi tal-Unjoni inklużi fil-kampjun mal-prezz medju korrispondenti tal-prodott taħt reviżjoni mir-RPĊ meta jiġi esportat lejn pajjiżi terzi bħar-Renju Unit, it-Turkija, in-Norveġja jew is-Serbja, li għandhom kodiċijiet separati għar-roti elettriċi u li ma għandhom l-ebda miżura fis-seħħ.

(147)

Ir-riżultat tat-tqabbil wera li l-prezz medju tal-esportazzjonijiet Ċiniżi tal-prodott ikkonċernat lejn il-pajjiżi msemmija hawn fuq varja minn EUR 210 għal EUR 650, jiġifieri ferm aktar baxx mill-prezz tal-industrija tal-Unjoni fis-suq tal-Unjoni. Għalhekk, jekk il-miżuri jitħallew jiskadu, ikun probabbli li l-importazzjonijiet mir-RPĊ jidħlu fis-suq f’volumi kbar, bħal fil-perjodu ta’ investigazzjoni tal-investigazzjoni oriġinali u bi prezzijiet baxxi li jikkawżaw dannu.

(148)

Fid-dawl ta’ dan ta’ hawn fuq, il-konklużjoni hija li t-tħassir tal-miżuri x’aktarx jirriżulta f’żieda sinifikanti ta’ importazzjonijiet li jkunu l-oġġett ta’ dumping mir-RPĊ f’livelli ta’ prezzijiet dannużi. B’konsegwenza ta’ dan, il-vijabbiltà tal-industrija tal-Unjoni tkun f’riskju serju.

(149)

F’konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interess tal-Unjoni kollha kemm hi. Id-determinazzjoni tal-interess tal-Unjoni kienet ibbażata fuq apprezzament tal-interessi diversi kollha involuti, inkluż dawk tal-industrija tal-Unjoni, tal-importaturi u tal-utenti.

(150)

L-investigazzjoni wriet li jekk il-miżuri jiskadu dawn ikollhom effett negattiv fuq l-industrija tal-Unjoni. Il-miżuri reġgħu stabbilixxew kundizzjonijiet ekwi fis-suq tal-Unjoni. Dan ippermetta li kumpaniji ġodda jidħlu fis-suq, speċjalment fis-segmenti tal-livell tad-dħul u tal-livell medju. L-għadd ta’ produtturi magħrufa tal-Unjoni tar-roti elettriċi kważi rdoppja minn madwar 37 fl-2020 għal 67 fl-2023, minkejja l-isfidi li rriżultaw mis-sitwazzjoni ekonomika bejn l-2022 u l-2023. L-għadd ta’ roti elettriċi prodotti fl-Unjoni żdied b’aktar minn miljun bejn l-2020 (3,4 miljuni) u l-2023 (4,5 miljuni) u huwa previst li jkompli jiżdied. L-għadd ta’ impjegati diretti żdied minn madwar 3 500 fil-perjodu ta’ investigazzjoni oriġinali għal kważi 11 000 fil-perjodu ta’ investigazzjoni tar-reviżjoni.

(151)

It-terminazzjoni tal-miżuri anti-dumping tpoġġi lill-produtturi tal-Unjoni f’riskju għoli, speċjalment lil dawk li jservu s-segmenti tar-roti elettriċi fil-livell tad-dħul u fil-livell medju, li jinkludu ħafna produtturi iżgħar fl-industrija kollha tal-Unjoni.

(152)

Li jaggrava s-sitwazzjoni vulnerabbli huwa l-fatt li l-produzzjoni tar-roti elettriċi hija negozju ta’ kapital intens ħafna, minħabba li l-istokks sostanzjali tal-parts tar-roti huma meħtieġa f’kull ħin biex tinżamm il-produzzjoni. Barra minn hekk, matul dawn l-aħħar snin il-produtturi tal-Unjoni għamlu investimenti kbar fil-produzzjoni u fit-titjib tal-prodotti biex dawn ikunu sostenibbli u ma jagħmlux ħsara lill-ambjent. It-terminazzjoni tal-miżuri anti-dumping timblokka l-iżvilupp ta’ għarfien espert prattiku tal-inġinerija għall-applikazzjoni tal-aqwa teknoloġiji avvanzati, inkluż l-awtomatizzazzjoni u l-materjali ġodda.

(153)

Barra minn hekk, skont it-talba għal reviżjoni, l-industrija tar-roti elettriċi tal-Unjoni hija waħda mill-akbar industriji ekoloġiċi, b’aktar minn 1 000 intrapriża żgħira u ta’ daqs medju (“SMEs”, small and medium-sized enterprises) li pprovdew madwar 80 000 impjieg skont ir-rapport tal-2024 dwar L-Industrija Ewropea tar-Roti u l-Profil tas-Suq. Dan jinkludi impjiegi f’xogħlijiet fil-produzzjoni diretti u indiretti, fl-industriji upstream, fl-aċċessorji tar-roti, f’negozji tar-roti, eċċ.

(154)

Abbażi ta’ dan ta’ hawn fuq, l-estensjoni tal-miżuri hija fl-interess tal-industrija tal-Unjoni.

(155)

Il-Kummissjoni kkuntattjat lill-utenti u lill-importaturi mhux relatati kollha magħrufa.

(156)

Wara l-bidu, l-unika parti li ppreżentat ruħha u pprovdiet kummenti kien Grupp ad hoc, f’isem tmien kumpaniji żgħar, li jimmontaw fl-Unjoni parts tar-roti elettriċi importati miċ-Ċina u minn pajjiżi terzi oħrajn. Il-kumment ewlieni tagħhom kien relatat mal-implimentazzjoni tal-miżuri kontra l-importazzjonijiet ta’ parts tar-roti (konvenzjonali) miċ-Ċina, li toħloq inċertezza dwar ir-regoli legali tal-importazzjoni ta’ komponenti tar-roti elettriċi u, għalhekk, tagħmilha diffiċli li jiġu importati parts tar-roti elettriċi li mhumiex soġġetti għall-miżuri. Il-grupp oppona l-estensjoni tal-miżuri, prinċipalment minħabba l-problemi kurrenti bl-importazzjonijiet tal-komponenti, flimkien mar-riskju ta’ estensjoni tal-miżuri għal dawn il-komponenti tar-roti elettriċi, u argumenta li l-użu tas-sorveljanza tas-suq biex tiġi skrutinizzata l-konformità tal-importazzjonijiet mir-RPĊ mar-regolamenti pertinenti kollha jkun aktar effiċjenti biex jiġu indirizzati l-importazzjonijiet ta’ roti elettriċi nnegozjati b’mod inġust miċ-Ċina li spiss ikunu illegali u mhux sikuri.

(157)

Madankollu, il-Kummissjoni qieset li mhuwiex realistiku li s-sorveljanza tas-suq u l-miżuri regolatorji biss jistgħu jipprevjenu d-dannu kkawżat mill-importazzjonijiet ta’ roti elettriċi li jkunu l-oġġett ta’ dumping mir-RPĊ. Barra minn hekk, il-kwistjonijiet ta’ infurzar doganali fir-rigward tal-importazzjonijiet ta’ komponenti tar-roti elettriċi ma jistgħux jiġġustifikaw it-terminazzjoni tal-miżuri, li kisbu l-effett maħsub. Fi kwalunkwe każ, l-infurzar tal-miżuri jaqa’ barra mill-ambitu tal-investigazzjoni.

(158)

Wara d-divulgazzjoni, il-Grupp ad hoc tenna l-istess affermazzjonijiet. Huwa argumenta li l-Kummissjoni għandha tiffoka fuq it-tisħiħ tas-sorveljanza tas-suq aktar milli testendi l-miżuri għad-difiża tal-kummerċ biex tindirizza l-kawżi ewlenin tad-distorsjonijiet tas-suq u tiżgura kundizzjonijiet ekwi għall-partijiet ikkonċernati kollha. Skont il-Grupp ad hoc, il-miżuri għad-difiża tal-kummerċ b’mod involontarju joħolqu qafas regolatorju li jrawwem l-importazzjonijiet ta’ roti substandardizzati u mhux sikuri filwaqt li jagħmel il-ħajja tal-manifatturi serji tar-roti elettriċi mir-RPĊ b’ambizzjonijiet fit-tul fis-suq tal-Unjoni diffiċli.

(159)

Il-Kummissjoni qieset li l-argumenti mqajma mill-Grupp ad hoc kienu diġà indirizzati fil-premessa. Peress li ma tressaq l-ebda kumment ġdid dwar is-sustanza, il-konklużjoni fil-premessa (157) ġiet ikkonfermata.

(160)

Il-grupp ad hoc argumenta wkoll li r-revoka tal-miżuri għad-difiża tal-kummerċ ma twassalx għal żieda sinifikanti fl-importazzjonijiet dannużi peress li, skonthom, sehem mis-suq modest ta’ 4,4 % tal-importazzjonijiet Ċiniżi matul il-PIR dgħajjef l-affermazzjoni li l-importazzjonijiet Ċiniżi huma ta’ theddida sinifikanti.

(161)

Il-Kummissjoni qieset li ż-żieda fis-sehem mis-suq għal 4.4 % fil-PIR seħħet f’sitwazzjoni b’miżuri ta’ difiża kummerċjali fis-seħħ. Minħabba l-miżuri għad-difiża tal-kummerċ, l-importazzjonijiet Ċiniżi kisbu biss sehem mis-suq ta’ 2,1 punti perċentwali matul il-perjodu kkunsidrat. Meta titqies l-attraenza tas-suq tal-Unjoni, il-kapaċità tal-produzzjoni u l-kapaċità ta’ riżerva fir-RPĊ u r-relazzjoni bejn il-prezzijiet tal-esportazzjoni lejn pajjiżi terzi u l-livell tal-prezzijiet fl-Unjoni, il-Kummissjoni kkonkludiet li jekk il-miżuri jridu jiġu revokati, ikun hemm żieda sinifikanti fl-importazzjonijiet oġġett ta’ dumping mir-RPĊ f’livelli ta’ prezzijiet dannużi. Fuq din il-bażi, din l-asserzjoni ġiet miċħuda.

(162)

Barra minn hekk, il-grupp ad hoc sostna li l-Kummissjoni bbażat ruħha fuq informazzjoni u allegazzjonijiet mhux ivverifikati li jikkompromettu l-imparzjalità tal-investigazzjoni, speċjalment dawk li ġejjin mill-applikant.

(163)

Kif imsemmi fil-premessi (31) u (32), il-Kummissjoni applikat l-Artikolu 18 tar-Regolament bażiku dwar is-sejbiet fir-rigward tal-kontinwazzjoni jew ir-rikorrenza ta’ dumping u dannu peress li ma kien hemm l-ebda kooperazzjoni mill-esportaturi/produtturi mir-RPĊ fl-investigazzjoni. Konsegwentement, is-sejbiet fir-rigward tal-probabbiltà ta’ kontinwazzjoni jew ta’ rikorrenza tad-dumping kienu bbażati fuq il-fatti disponibbli, b’mod partikolari l-informazzjoni ppreżentata mat-talba għal reviżjoni u l-informazzjoni miksuba mill-partijiet li kkooperaw matul l-investigazzjoni tar-reviżjoni (jiġifieri, l-applikant u l-produtturi tal-Unjoni inklużi fil-kampjun). L-informazzjoni kollha sottomessa mill-produtturi tal-Unjoni fil-kampjun ġiet ivverifikata bir-reqqa. Fuq din il-bażi, din l-asserzjoni ġiet miċħuda.

(164)

L-ebda utent jew importatur mhux relatat ma ppreżenta ruħu u kkoopera f’din l-investigazzjoni billi ppreżenta tweġiba għall-kwestjonarju għajr is-sottomissjoni msemmija hawn fuq. Abbażi tal-informazzjoni disponibbli għall-Kummissjoni, hija sabet li ma kien hemm l-ebda evidenza li tikkontradixxi l-konklużjoni fl-investigazzjoni oriġinali li l-effetti negattivi fuq importaturi mhux relatati ma setgħux jitqiesu sproporzjonati u dawn ittaffew bid-disponibbiltà ta’ sorsi alternattivi tal-provvista. L-effetti pożittivi tal-miżuri kompensatorji fuq is-suq tal-Unjoni, b’mod partikolari fuq l-industrija tal-Unjoni, kienu akbar mill-effett negattiv potenzjali fuq il-gruppi ta’ interess l-oħrajn. Tabilħaqq, l-investigazzjoni kkonfermat li, minbarra ċ-Ċina, qed ikun hemm dejjem aktar sorsi oħrajn ta’ provvista minn pajjiżi terzi. Għalhekk, il-Kummissjoni kkonkludiet li l-kontinwazzjoni tal-miżuri ma tkunx ta’ detriment sproporzjonat għall-utenti u l-importaturi.

(165)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti fuq l-importazzjonijiet tal-prodott taħt reviżjoni li joriġina mir-RPĊ.

(166)

Abbażi tal-konklużjonijiet li waslet għalihom il-Kummissjoni dwar il-kontinwazzjoni tad-dumping, ir-rikorrenza tad-dannu u l-interess tal-Unjoni, jenħtieġ li jinżammu l-miżuri anti-dumping fuq l-importazzjonijiet ta’ roti elettriċi li joriġinaw mir-RPĊ.

(167)

Sabiex jiġu mminimizzati r-riskji ta’ ċirkomvenzjoni minħabba d-differenza fir-rati tad-dazju, huma meħtieġa miżuri speċjali biex tiġi żgurata l-applikazzjoni tad-dazji anti-dumping individwali. L-applikazzjoni tad-dazji anti-dumping individwali hija applikabbli biss mal-preżentazzjoni ta’ fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-regolament. Sakemm tiġi ppreżentata tali fattura, jenħtieġ li l-importazzjonijiet ikunu soġġetti għad-dazju anti-dumping applikabbli għall-“kumpaniji l-oħrajn kollha”.

(168)

Filwaqt li l-preżentazzjoni ta’ din il-fattura hija meħtieġa għall-awtoritajiet doganali tal-Istati Membri biex japplikaw ir-rati individwali tad-dazju anti-dumping u l-eżenzjonijiet għall-importazzjonijiet, din mhijiex l-uniku element li għandu jitqies mill-awtoritajiet doganali. Tabilħaqq, anki jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jeħtiġilhom iwettqu l-verifiki tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-trasport bil-baħar, eċċ.) għall-fini li tiġi vverifikata l-akkuratezza tad-dettalji li jkun hemm fid-dikjarazzjoni u biex jiżguraw li l-applikazzjoni sussegwenti tar-rata tad-dazju aktar baxxa tkun iġġustifikata, f’konformità mal-liġi doganali.

(169)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’ċirkostanzi bħal dawn u dment li jiġu ssodisfati l-kundizzjonijiet, tista’ tinbeda investigazzjoni antiċirkomvenzjoni. Din l-investigazzjoni tista’, inter alia, teżamina l-ħtieġa tat-tneħħija ta’ rata/i tad-dazju individwali u l-impożizzjoni konsegwenti ta’ dazju fil-pajjiż kollu.

(170)

Ir-rati tad-dazju anti-dumping tal-kumpaniji individwali speċifikati f’dan ir-Regolament japplikaw b’mod esklużiv għall-importazzjonijiet tal-prodott taħt reviżjoni li joriġina mir-RPĊ u li jkun prodott mill-entitajiet legali msemmija. Jenħtieġ li l-importazzjonijiet tal-prodott taħt reviżjoni li jkun prodott minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inkluż l-entitajiet relatati ma’ dawk speċifikament imsemmija, ikunu soġġetti għar-rata tad-dazju applikabbli għall-“kumpaniji l-oħrajn kollha”. Jenħtieġ li dawn ma jkunu soġġetti għall-ebda waħda mir-rati tad-dazju anti-dumping individwali.

(171)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk din sussegwentement tbiddel l-isem tal-entità tagħha. It-talba trid tkun indirizzata lill-Kummissjoni (58). It-talba jrid ikun fiha l-informazzjoni rilevanti kollha li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, se jiġi ppubblikat regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(172)

Il-partijiet interessati kollha ġew infurmati bil-fatti u l-kunsiderazzjonijiet essenzjali li abbażi tagħhom kien maħsub li jiġi rrakkomandat li jinżammu l-miżuri eżistenti. Dawn ingħataw ukoll perjodu biex jagħmlu r-rappreżentazzjonijiet wara din id-divulgazzjoni.

(173)

Jenħtieġ li esportaturi jew produtturi li ma esportawx il-prodott ikkonċernat lejn l-Unjoni matul il-perjodu użat biex jiġi stabbilit il-livell tad-dazju li huwa applikabbli bħalissa għall-esportazzjonijiet tagħhom ikunu jistgħu jitolbu lill-Kummissjoni sabiex ikunu soġġetti għar-rata tad-dazju anti-dumping għall-kumpaniji li kkooperaw li mhumiex inklużi fil-kampjun. Jenħtieġ li l-Kummissjoni tilqa’ talba bħal din dment li jiġu ssodisfati tliet kundizzjonijiet. Il-produttur esportatur il-ġdid ikollu juri li: (i) ma esportax il-prodott ikkonċernat lejn l-Unjoni matul il-perjodu li ntuża sabiex jiġi stabbilit il-livell tad-dazju applikabbli għall-esportazzjonijiet tiegħu; (ii) mhuwiex relatat ma’ kumpanija li għamlet dan u, għalhekk, huwa soġġett għad-dazji anti-dumping; u (iii) esporta l-prodott ikkonċernat wara dan jew daħal f’obbligu kuntrattwali irrevokabbli sabiex jagħmel dan fi kwantitajiet sostanzjali.

(174)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (59), meta ammont ikollu jiġi rrimborżat wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament prinċipali tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(175)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.