(1)

Fit-22 ta’ Diċembru 2020, il-Kunsill, bid-Deċiżjoni (PESK) 2020/2188 (1), estenda l-operazzjoni militari tal-Unjoni Ewropea bil-ħsieb ta’ kontribut għad-deterrenza, il-prevenzjoni u t-trażżin tal-atti ta’ piraterija u ta’ serq bl-użu tal-armi ’l barra mix-xtut tas-Somalja (Atalanta), stabbilita bl-Azzjoni Konġunta tal-Kunsill 2008/851/PESK (2), sal-31 ta’ Diċembru 2022 u wessa’ l-mandat tagħha sabiex jiġu inklużi ż-żewġ kompiti eżekuttivi sekondarji ta’ kontribut għall-implimentazzjoni tal-embargo fuq l-armi tan-Nazzjonijiet Uniti fuq is-Somalja u l-ġlieda kontra t-traffikar ta’ drogi narkotiċi ’l barra mix-xtut tas-Somalja.

(2)

L-Azzjoni Konġunta 2008/851/PESK tipprevedi li jistgħu jiġu konklużi ftehimiet ma’ Stati terzi, abbażi ta’ awtorizzazzjonijiet mogħtija fuq bażi ta’ każ b’każ mill-Kunsill, biex jiġi ffaċilitat it-trasferiment minn Stat Membru ta’ persuni arrestati u detenuti skont il-liġi nazzjonali tiegħu talli pparteċipaw bi ksur tal-embargo tan-Nazzjonijiet Uniti fuq l-armi fuq is-Somalja jew fit-traffikar ta’ drogi narkotiċi ’l barra mix-xtut tas-Somalja, bil-ħsieb tal-prosekuzzjoni ta’ tali persuni. Tali ftehimiet għandhom jinkludu kundizzjonijiet għat-trasferiment ta’ tali persuni konsistenti mad-dritt internazzjonali rilevanti, b’mod partikolari d-dritt internazzjonali dwar id-drittijiet tal-bniedem, sabiex jiġi ggarantit b’mod partikolari li l-persuni kkonċernati ma jkunux soġġetti għall-piena tal-mewt, għat-tortura jew għal kwalunkwe trattament krudili, inuman jew degradanti.

(3)

Fl-20 ta’ Mejju 2021, il-Kunsill adotta Deċiżjoni li tawtorizza lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà jiftaħ negozjati mar-Repubblika tas-Seychelles bil-ħsieb tal-konklużjoni ta’ ftehim biex jiġi ffaċilitat it-trasferiment minn Stat Membru ta’ persuni arrestati u detenuti skont il-liġi nazzjonali tiegħu talli ħadu sehem bi ksur tal-embargo fuq l-armi tan-Nazzjonijiet Uniti fuq is-Somalja jew fi traffikar ta’ drogi narkotiċi ’l barra mix-xtut tas-Somalja.

(4)

Fit-12 ta’ Diċembru 2022, permezz tad-Deċiżjoni (PESK) 2022/2441 (3), il-Kunsill biddel l-isem ta’ Atalanta f’EUNAVFOR ATALANTA’, estenda l-mandat tagħha sal-31 ta’ Diċembru 2024 u ddeċieda li, filwaqt li teżerċita l-kompiti tagħha, din għandha tikkontribwixxi għas-sigurtà marittima fil-Punent tal-Oċean Indjan u fil-Baħar l-Aħmar.

(5)

Ġie nnegozjat ftehim bejn l-Unjoni u r-Repubblika tas-Seychelles abbażi tal-awtorizzazzjoni mogħtija mill-Kunsill fl-20 ta’ Mejju 2021.

(6)

Jenħtieġ li l-ftehim bejn l-Unjoni u r-Repubblika tas-Seychelles jiġi approvat f’isem l-Unjoni,