C_202300460GA.000101.fmx.xml

P9_TA(2023)0101

Ciste Aeráide Sóisialta

Rún reachtach ó Pharlaimint na hEorpa an 18 Aibreán 2023 ar an togra le haghaidh Rialachán ó Pharlaimint na hEorpa agus ón gComhairle lena mbunaítear Ciste Aeráide Sóisialta (COM(2021)0568 – C9-0324/2021 – 2021/0206(COD))

(An gnáthnós imeachta reachtach: an chéad léamh)

(C/2023/460)

Tá Parlaimint na hEorpa,

—	ag féachaint don togra ón gCoimisiún chuig Parlaimint na hEorpa agus chuig an gComhairle (COM(2021)0568),

—	ag féachaint d’Airteagal 294(2), d’Airteagal 91(1), pointe (d), d’Airteagal 192(1) agus d’Airteagal 194(1), pointe (c) den Chonradh ar Fheidhmiú an Aontais Eorpaigh, ar dá mbun a thíolaic an Coimisiún an togra do Pharlaimint na hEorpa (C9-0324/2021),

—	ag féachaint don tuairim ón gCoiste um Ghnóthaí Dlíthiúla maidir leis an mbunús dlí atá beartaithe,

—	ag féachaint d’Airteagal 294(3) den Chonradh ar Fheidhmiú an Aontais Eorpaigh,

—	ag féachaint don tuairim réasúnaithe a thíolaic Parlaimint na Sualainne, faoi chuimsiú Phrótacal Uimh. 2 maidir le prionsabail na coimhdeachta agus na comhréireachta a chur i bhfeidhm, á mhaíomh nach gcomhlíonann an dréachtghníomh reachtach prionsabal na coimhdeachta,

—	ag féachaint do thuairim ón gCúirt Iniúchóirí an 15 Nollaig 2022 (1),

—	ag féachaint do thuairim ó Choiste Eacnamaíoch agus Sóisialta na hEorpa an 9 Nollaig 2021 (2),

—	ag féachaint do thuairim ó Choiste na Réigiún an 27 Aibreán 2022 (3),

—

ag féachaint don chomhaontú sealadach a d’fhormheas an coiste freagrach faoi Riail 74(4) dá Rialacha Nós Imeachta agus don gheallúint a thug ionadaí na Comhairle i litir dar dáta an 8 Feabhra 2023 go ndéanfadh sí seasamh Pharlaimint na hEorpa a fhormheas, i gcomhréir le hAirteagal 294(4) den Chonradh ar Fheidhmiú an Aontais Eorpaigh,

—	ag féachaint do Rialacha 59 agus 40 dá Rialacha Nós Imeachta,

—	ag féachaint do na tuairimí ón gCoiste um Buiséid, ón gCoiste um Ghnóthaí Eacnamaíochta agus Airgeadaíochta, ón gCoiste um Thionsclaíocht, um Thaighde agus um Fhuinneamh, ón gCoiste um Iompar agus um Thurasóireacht agus ón gCoiste um Fhorbairt Réigiúnach,

—	ag féachaint don tuarascáil ón gCoiste um Fhostaíocht agus um Ghnóthaí Sóisialta agus ón gCoiste um an gComhshaol, um Shláinte Phoiblí agus um Shábháilteacht Bia (A9-0157/2022),

ag glacadh a seasaimh ar an gcéad léamh mar a leagtar amach ina dhiaidh seo é (4);

ag cur sonrú sna ráitis ón gCoimisiún atá i gceangal leis an rún seo;

á iarraidh ar an gCoimisiún an t-ábhar a tharchur chuig Parlaimint na hEorpa arís má dhéanann sé téacs eile a chur in ionad a thogra, má dhéanann sé a thogra a leasú go substaintiúil nó má tá sé ar intinn aige a thogra a leasú go substaintiúil;

á threorú dá hUachtarán a seasamh a chur ar aghaidh chuig an gComhairle, chuig an gCoimisiún agus chuig na parlaimintí náisiúnta.

(1) IO C 17, 18.1.2023, lch. 9.

(2) IO C 152, 6.4.2022, lch. 158.

(3) IO C 301, 5.8.2022, lch. 70

(4) Cuirtear an seasamh seo in ionad na leasuithe arna nglacadh an 22 Meitheamh 2022 (IO C 32, 27.1.2023, lch. 250).

IARSCRÍBHINN A GHABHANN LEIS AN RÚN REACHTACH

Ráiteas ón gCoimisiún tráth a ghlactar Rialachán (AE) 2023/955 ó Pharlaimint na hEorpa agus ón gComhairle (1) lena mbunaítear Ciste Aeráide Sóisialta agus lena leasaítear Rialachán (AE) 2021/1060

Sainmhíniú ar bhochtaineacht fuinnimh

Mar chuid den chaibidlíocht faoi athmhúnlú na Treorach maidir le hÉifeachtúlacht Fuinnimh (athmhúnlú EED), tá sé i gceist ag an gCoimisiún leasú spriocdhírithe ar an Rialachán lena mbunaítear Ciste Aeráide Sóisialta a chur i láthair chun an sainmhíniú ar bhochtaineacht fuinnimh a thabhairt cothrom le dáta i gcomhréir leis an gcomhaontú ar thángthas air maidir leis an sainmhíniú ar bhochtaineacht fuinnimh in athmhúnlú EED.

Buiséad an Aontais a chosaint

Le pointí 30 go 33 den Chomhaontú Idirinstitiúideach an 16 Nollaig 2020 idir Parlaimint na hEorpa, an Chomhairle agus an Coimisiún maidir le smacht buiséadach, comhar in ábhair bhuiséadacha agus bainistíocht fhónta airgeadais, chomh maith le hacmhainní dílse nua, lena n-áirítear treochlár maidir le hacmhainní dílse nua a thabhairt isteach, ceanglaítear ar an gCoimisiún córas comhtháite idir-inoibritheach faisnéise agus faireacháin a chur ar fáil, lena n-áirítear uirlis aonair mianadóireachta sonraí agus scórála riosca chun measúnú agus anailís a dhéanamh ar na sonraí atá ag teastáil d’fhonn go gcuirfidh na Ballstáit i bhfeidhm ar bhealach ginearálaithe é. Thairis sin, d’aontaigh na trí institiúid go n-oibreoidís i gcomhar le chéile go dúthrachtach, le linn an nós imeachta reachtaigh a bhaineann leis na bunghníomhartha ábhartha, chun obair leantach maidir leis an ngné seo ar na conclúidí ón gComhairle Eorpach i mí Iúil 2020 a áirithiú.

Measann an Coimisiún nach leor an comhaontú ar tháinig na comhreachtóirí air maidir le húsáid uirlis aonair mianadóireachta sonraí agus bailiú agus anailís sonraí ar úinéirí tairbhiúla fhaighteoirí an chistithe, nach leor é chun feabhas a chur ar chosaint bhuiséad an Aontais in aghaidh calaoise agus neamhrialtachtaí agus chun seiceálacha éifeachtúla ar choinbhleachtaí leasa, neamhrialtachtaí, saincheisteanna cistithe dúbailte agus mí-úsáid choiriúil na gcistí, chun an méid sin a áirithiú. Dá bhrí sin, an cur chuige ar ar aontaigh na comhreachtóirí sa Rialachán lena mbunaítear Ciste Aeráide Sóisialta, ní léiríonn an cur chuige sin go hiomchuí uaillmhian agus spiorad inmhianaithe an Chomhaontaithe Idirinstitiúidigh.

Córas rialaithe inmheánaigh an Bhallstáit

Maidir leis an gcomhaontú ar tháinig na comhreachtóirí air faoi ‘Iarscríbhinn III – Príomhcheanglais le haghaidh chóras rialaithe an Bhallstáit’ den Rialachán lena mbunaítear Ciste Aeráide Sóisialta i dtaca leis an bhféidearthacht do na Ballstáit níos mó ná údarás amháin a ainmniú ar féidir é a chur de chúram orthu an dearbhú bainistíochta a ghabhann leis na hiarrataí íocaíochta a shíniú, measann an Coimisiún go bhféadfadh neamhéifeachtúlachtaí agus caolú freagrachtaí a bheith ann mar thoradh air, chomh maith le mearbhall a chruthú faoi róil na n-údarás.

(1) IO L 130, 16.5.2023, lch. 1.