IL-KUMMISSJONI EWROPEA
Brussell, 30.7.2024
COM(2024) 346 final
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar l-eżerċizzju tad-delega mogħtija lill-Kummissjoni skont ir-Regolament (UE) Nru 609/2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż
RAPPORT TAL-KUMMISSJONI LILL-PARLAMENT EWROPEW U LILL-KUNSILL
dwar l-eżerċizzju tad-delega mogħtija lill-Kummissjoni skont ir-Regolament (UE) Nru 609/2013 dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż
1.Introduzzjoni
Dan ir-rapport jissodisfa l-obbligu stabbilit għall-Kummissjoni bl-Artikolu 18(2) tar-Regolament (UE) Nru 609/2013 tal-Parlament Ewropew u tal-Kunsill tat-12 ta’ Ġunju 2013 dwar ikel maħsub għat-trabi u t-tfal żgħar, ikel għal skopijiet mediċi speċjali u bħala sostitut tad-dieta kollha għall-kontroll tal-piż (minn hawn ’il quddiem “Ir-Regolament dwar l-Ikel għal Gruppi Speċifiċi”) 1 . Ir-Regolament dwar l-Ikel għal Gruppi Speċifiċi jistabbilixxi rekwiżiti dwar il-kompożizzjoni u l-informazzjoni għal (a) formula tat-trabi u formula ta’ prosegwiment, (b) ikel ipproċessat ibbażat fuq iċ-ċereali u ikel tat-trabi, (c) ikel għal skopijiet mediċi speċjali u (d) ikel bħala sostitut tad-dieta kollha għall-kontroll tal-piż. Ir-Regolament jistabbilixxi wkoll lista tal-Unjoni ta’ sustanzi li jistgħu jiżdiedu ma’ waħda jew aktar minn dawn il-kategoriji ta’ ikel u jistabbilixxi regoli applikabbli għall-aġġornament ta’ dik il-lista.
L-Artikolu 18(2) tar-Regolament dwar l-Ikel għal Gruppi Speċifiċi jeħtieġ li l-Kummissjoni tippreżenta lill-Parlament Ewropew u lill-Kunsill rapport dwar l-eżerċizzju tad-delega mogħtija lill-Kummissjoni b’dak ir-Regolament. Skont l-Artikolu 18(2), is-setgħa li tadotta atti delegati ngħatat lill-Kummissjoni għal perjodu inizjali ta’ ħames snin li jibda mid-19 ta’ Lulju 2013. Il-Kummissjoni kellha tippreżenta rapport dwar l-eżerċizzju tad-delega tas-setgħa mogħtija mir-Regolament dwar l-Ikel għal Gruppi Speċifiċi mhux aktar tard minn disa’ xhur qabel tmiem il-perjodu ta’ ħames snin. Id-delega tas-setgħa għandha tiġi estiża awtomatikament għal perjodi ta’ ħames snin, sakemm il-Parlament Ewropew jew il-Kunsill ma joġġezzjonawx għal tali estensjoni mhux aktar tard minn tliet xhur qabel it-tmiem ta’ kull perjodu.
Il-Kummissjoni adottat l-ewwel rapport dwar l-eżerċizzju tad-delega tas-setgħat taħt ir-Regolament dwar l-Ikel għal Gruppi Speċifiċi fit-22 ta’ Awwissu 2017 2 .
2.Bażi Legali
L-Artikolu 18(2) tar-Regolament dwar l-Ikel għal Gruppi Speċifiċi jistabbilixxi l-kundizzjonijiet li jikkonċernaw is-setgħa li tadotta atti delegati mogħtija lill-Kummissjoni mill-Artikolu 11, l-Artikolu 15(6) u l-Artikolu 16(1) ta’ dak ir-Regolament.
L-Artikolu 11(2) tar-Regolament dwar l-Ikel għal Gruppi Speċifiċi jagħti s-setgħa lill-Kummissjoni biex tadotta atti delegati sabiex tistabbilixxi rekwiżiti speċifiċi dwar il-kompożizzjoni u l-informazzjoni għall-kategoriji differenti ta’ Ikel għal Gruppi Speċifiċi. Dawk ir-rekwiżiti bħalissa huma stabbiliti fir-Regolamenti li ġejjin:
-Ir-Regolament Delegat tal-Kummissjoni (UE) 2016/127 li jissupplimenta r-Regolament dwar l-Ikel għal Gruppi Speċifiċi fir-rigward tar-rekwiżiti speċifiċi dwar il-kompożizzjoni u l-informazzjoni tal-formula tat-trabi u tal-formula ta’ prosegwiment u fir-rigward ta’ rekwiżiti dwar l-informazzjoni dwar it-tmigħ tat-trabi u tat-tfal żgħar 3 ,
-Ir-Regolament Delegat tal-Kummissjoni (UE) 2016/128 li jissupplimenta r-Regolament dwar l-Ikel għal Gruppi Speċifiċi fir-rigward tar-rekwiżiti speċifiċi dwar il-kompożizzjoni u l-informazzjoni għall-ikel għal skopijiet mediċi speċjali 4 u
-Ir-Regolament Delegat tal-Kummissjoni (UE) 2017/1798 li jissupplimenta r-Regolament dwar l-Ikel għal Gruppi Speċifiċi fir-rigward tar-rekwiżiti speċifiċi dwar il-kompożizzjoni u l-informazzjoni għal sostitut tad-dieta kollha għall-kontroll tal-piż 5 .
L-Artikolu 15(6) tar-Regolament dwar l-Ikel għal Gruppi Speċifiċi jagħti s-setgħa lill-Kummissjoni biex iżżid jew tneħħi kategorija ta’ sustanzi fl-Anness tar-Regolament, li jistabbilixxi l-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel, sabiex jitqiesu l-progress tekniku, l-iżviluppi xjentifiċi jew il-protezzjoni tas-saħħa tal-konsumatur.
L-Artikolu 16(1) tar-Regolament dwar l-Ikel għal Gruppi Speċifiċi jagħti s-setgħa lill-Kummissjoni li tadotta atti delegati f’konformità mal-Artikolu 18 ta’ dak ir-Regolament, sabiex temenda l-Anness tar-Regolament li jistabbilixxi l-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel.
3.Eżerċizzju tad-delega
3.1. Matul il-perjodu li jibda mit-22 ta’ Awwissu 2017 sal-lum, il-Kummissjoni adottat id-disa’ atti delegati li ġejjin skont l-Artikolu 11(2) tar-Regolament dwar l-Ikel għal Gruppi Speċifiċi:
a)Ir-Regolament Delegat tal-Kummissjoni (UE) 2019/828 li jemenda r-Regolament Delegat (UE) 2016/127 rigward ir-rekwiżiti għall-vitamina D fil-formula tat-trabi u għall-aċidu eruċiku fil-formula tat-trabi u fil-formula ta' prosegwiment 6
Dan l-att legali ġie adottat fl-14 ta’ Marzu 2019 bl-għan li jiġi żgurat l-ogħla livell ta’ protezzjoni tat-trabi billi jitbaxxa l-kontenut massimu tal-Vitamina D permess fil-formula tat-trabi u l-livell massimu ta’ aċidu eruċiku għall-formula tat-trabi u għall-formula ta’ prosegwiment, abbażi tal-opinjonijiet xjentifiċi 7 , 8 tal-Awtorità Ewropea dwar is-Sigurtà fl-Ikel (EFSA).
b)Ir-Regolament Delegat tal-Kummissjoni (UE) 2018/561 li jemenda r-Regolament Delegat (UE) 2016/127 fir-rigward tar-rekwiżiti tal-proteini għall-formula ta’ prosegwiment 9
Dan ir-Regolament Delegat ġie adottat fit-12 ta’ April 2018, bl-għan li jippermetti lill-operaturi ta’ negozji tal-ikel jaġġustaw il-kompożizzjoni tal-formula ta’ prosegwiment billi jintroduċu aktar flessibbiltà, filwaqt li jiżguraw livell għoli ta’ protezzjoni tas-saħħa tat-trabi. Huwa introduċa aġġustamenti tekniċi għar-rekwiżiti tal-proteini diġà eżistenti għall-formula ta’ prosegwiment abbażi tal-opinjoni xjentifika 10 tal-EFSA.
c)Ir-Regolament Delegat tal-Kummissjoni (UE) 2021/572 li jemenda r-Regolament Delegat (UE) 2016/127 fir-rigward tad-data tal-applikazzjoni ta’ wħud mid-dispożizzjonijiet tiegħu 11
Ir-Regolament (UE) 2016/127 jistabbilixxi li l-formuli manifatturati mill-idroliżati tal-proteina jistgħu jitqiegħdu fis-suq biss wara evalwazzjoni każ b’każ tas-sikurezza u l-adegwatezza tagħhom mill-EFSA. Tali valutazzjoni ma kinitx meħtieġa taħt id-Direttiva tal-Kummissjoni 2006/141/KE preċedenti dwar il-formula tat-trabi u ta’ prosegwiment 12 . Ir-Regolament Delegat tal-Kummissjoni (UE) 2021/572 ġie adottat fl-20 ta’ Jannar 2021 bl-għan li jiġi evitat tfixkil potenzjali fis-suq, billi jiddifferixxi d-dħul fis-seħħ tar-rekwiżit il-ġdid ta’ valutazzjoni każ b’każ tal-formula tat-trabi idrolizzata u tal-formula ta’ prosegwiment stabbiliti fir-Regolament Delegat (UE) 2016/127. Fil-fatt, il-pandemija tal-COVID-19 u l-kriżi tas-saħħa pubblika assoċjata kkawżaw dewmien mhux mistenni fil-valutazzjonijiet xjentifiċi tal-formuli mill-EFSA. Il-posponiment ta’ sena tad-dħul fis-seħħ tar-rekwiżiti l-ġodda ma ppermettiex li l-prodotti, li kienu leġittimament fis-suq f’konformità mad-Direttiva tal-Kummissjoni 2006/141/KE, u li għalihom ma kien ġie rrappurtat l-ebda effett negattiv fuq is-saħħa, ma jsirux konformi bla bżonn mar-rekwiżiti l-ġodda.
d)Ir-Regolamenti Delegati tal-Kummissjoni (UE) 2022/519, (UE) 2023/589 u (UE).../... li jemendaw ir-Regolament Delegat (UE) 2016/127 fir-rigward tar-rekwiżiti tal-proteina għall-formula tat-trabi u ta’ prosegwiment immanifatturata mill-idroliżati tal-proteina 13 , 14 , 15
Ir-Regolament Delegat (UE) 2016/127 ifakkar li l-EFSA tqis li s-sikurezza u l-adegwatezza ta’ kull formula speċifika manifatturata mill-idroliżati tal-proteina għandhom jiġu stabbiliti permezz ta’ evalwazzjoni klinika u tippermetti t-tqegħid fis-suq ta’ dawk il-formuli evalwati b’mod pożittiv mill-EFSA. Tliet atti delegati ġew adottati mill-Kummissjoni fl-14 ta’ Jannar 2022, fl-10 ta’ Jannar 2023, u fit-2 ta’ Frar 2024 bl-għan li jippermettu t-tqegħid fis-suq ta’ formuli tat-trabi u ta’ prosegwiment manifatturati mill-idroliżati tal-proteina li ġew evalwati bħala b’valur nutrizzjonali sikur u xieraq mill-EFSA 16 , 17 , 18 għall-użu mit-trabi bejn l-2020 u l-2023.
e)Ir-Regolament Delegat tal-Kummissjoni (UE) 2022/2182 li jemenda r-Regolament Delegat (UE) 2017/1798 rigward ir-rekwiżiti għal-lipidi u għall-manjeżju għas-sostituti tad-dieta kollha għall-kontroll tal-piż 19
Dan l-att legali ġie adottat fit-30 ta’ Awwissu 2022 bl-għan li jiġu aġġornati ċerti rekwiżiti dwar il-kompożizzjoni għas-sostituti tad-dieta kollha għall-prodotti ta’ kontroll tal-piż, abbażi tal-opinjoni xjentifika tal-EFSA 20 u filwaqt li jitqies il-progress tekniku u xjentifiku rilevanti, inkluża d-data pprovduta mill-partijiet interessati.
f)Ir-Regolament Delegat tal-Kummissjoni li jemenda r-Regolament Delegat (UE) 2016/128 fir-rigward tar-rekwiżiti dwar il-pestiċidi fl-ikel għal skopijiet mediċi speċjali żviluppat biex jissodisfa r-rekwiżiti nutrizzjonali tat-trabi u tat-tfal żgħar 21 u r-Regolament Delegat tal-Kummissjoni (UE) 2016/127 fir-rigward tar-rekwiżiti dwar il-pestiċidi fil-formula tat-trabi u fil-formula ta’ prosegwiment 22
Dawn iż-żewġ atti delegati ġew adottati mill-Kummissjoni fis-16 ta’ April 2021 bl-għan li tallinja d-definizzjoni ta’ “residwi ta’ pestiċidi” stabbilita fir-Regolament Delegat (UE) 2016/128 u fir-Regolament Delegat (UE) 2016/127 mad-definizzjoni aktar preċiża prevista fir-Regolament (KE) Nru 396/2005 23 dwar il-livelli massimi ta’ residwi ta’ pestiċidi.
3.2. S’issa, il-Kummissjoni għadha ma invokatx il-bażi legali tal-Artikolu 15(6) tar-Regolament dwar l-Ikel għal Gruppi Speċifiċi, peress li l-kundizzjonijiet biex tiżdied jew titneħħa kategorija ta’ sustanzi fl-Anness tar-Regolament għadhom ma ġewx issodisfati.
3.3 Matul il-perjodu li beda fit-22 ta’ Awwissu 2017 sal-lum, il-Kummissjoni adottat it-tliet atti delegati ta’ hawn taħt skont l-Artikolu 16(1) tar-Regolament dwar l-Ikel għal Gruppi Speċifiċi:
a)Ir-Regolament Delegat tal-Kummissjoni (UE) 2021/571 li jemenda l-Anness tar-Regolament dwar l-Ikel għal Gruppi Speċifiċi fir-rigward tal-lista ta’ sustanzi li jistgħu jiġu miżjuda mal-formula tat-trabi u mal-formula tal-prosegwiment, mal-ikel tat-trabi u mal-ikel proċessat biċ-ċereali 24
Dan l-att delegat ġie adottat mill-Kummissjoni fl-20 ta’ Jannar 2021 bl-għan li taġġorna l-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel biex tawtorizza ż-żieda ta’ L-metilfolat tal-kalċju bħala sors ta’ folat mal-formula tat-trabi, mal-formula tal-prosegwiment, mal-ikel proċessat biċ-ċereali u mal-ikel tat-trabi abbażi tal-opinjoni xjentifika tal-EFSA 25 .
b)Ir-Regolament Delegat tal-Kummissjoni (UE) 2023/439 li jemenda l-Anness tar-Regolament dwar l-Ikel għal Gruppi Speċifiċi biex jippermetti l-użu tal-klorur tan-nikotinammidribosid bħala sors ta’ niaċina fl-ikel għal skopijiet mediċi speċjali u bħala sostitut tad-dieta kollha għall-kontroll tal-piż 26
Dan l-att legali ġie adottat mill-Kummissjoni fis-16 ta’ Diċembru 2022 bl-għan li taġġorna l-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel biex tawtorizza ż-żieda tal-klorur tan-nikotinammidribosid bħala sors ta’ niaċina mal-ikel għal skopijiet mediċi speċjali u bħala sostitut tad-dieta kollha għall-kontroll tal-piż abbażi tal-opinjoni xjentifika tal-EFSA 27 .
c)Ir-Regolament Delegat tal-Kummissjoni li jemenda l-Anness tar-Regolament dwar l-Ikel għal Gruppi Speċifiċi li jippermetti l-użu tal-kaseinat tal-ħadid tal-ħalib bħala sors ta’ ħadid fis-sostituti tad-dieta kollha għall-kontroll tal-piż u fl-ikel għal skopijiet mediċi speċjali, minbarra l-ikel għat-trabi u t-tfal żgħar 28
Dan l-att delegat ġie adottat fid-29 ta’ Jannar 2024 bl-għan li tiġi aġġornata l-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel biex tiġi awtorizzata ż-żieda tal-kaseinat tal-ħadid tal-ħalib bħala sors ta’ ħadid għas-sostituti tad-dieta kollha għall-kontroll tal-piż u ikel għal skopijiet mediċi speċjali, minbarra l-ikel għat-trabi u t-tfal żgħar, abbażi tal-opinjoni xjentifika tal-EFSA 29 .
4.Konklużjoni
Mit-22 ta’ Awwissu 2017, il-Kummissjoni regolarment eżerċitat is-setgħat delegati mogħtija lilha skont ir-Regolament dwar l-Ikel għal Gruppi Speċifiċi. Il-Kummissjoni adottat atti delegati biex taġġorna r-rekwiżiti speċifiċi dwar il-kompożizzjoni tal-formula tat-trabi u ta’ prosegwiment kif ukoll dwar is-sostituti tad-dieta kollha għall-kontroll tal-piż, abbażi tal-opinjonijiet tal-EFSA u filwaqt li tqis il-progress tekniku u xjentifiku rilevanti. Barra minn hekk, il-Kummissjoni aġġornat il-lista tal-Unjoni ta’ sustanzi li jistgħu jiżdiedu mal-kategoriji speċifiċi tal-ikel, abbażi tal-parir tal-EFSA filwaqt li tqis il-progress tekniku, l-iżviluppi xjentifiċi u l-protezzjoni tas-saħħa tal-konsumaturi. Il-Kummissjoni tistieden lill-Parlament Ewropew u lill-Kunsill biex jieħdu nota ta’ dan ir-rapport.
ĠU L 181, 29.6.2013, p. 35.
Rapport tal-Kummissjoni lill-Parlament Ewropew u lill-Kunsill dwar l-eżerċizzju tad-delega mogħtija lill-Kummissjoni skont ir-Regolament (UE) Nru 609/2013 tal-Parlament Ewropew u tal-Kunsill dwar ikel maħsub għat-trabi u t-tfal żgħar, ikel għal skopijiet mediċi speċjali, u bħala sostitut tad-dieta kollha għall-kontroll tal-piż. COM (2017) 0438 final
Ir-Regolament Delegat tal-Kummissjoni (UE) 2016/127 tal-25 ta’ Settembru 2015 li jissupplimenta r-Regolament (UE) Nru 609/2013 tal-Parlament Ewropew u tal-Kunsill fir-rigward ta’ rekwiżiti speċifiċi dwar il-kompożizzjoni u l-informazzjoni tal-formula tat-trabi u tal-formula ta’ prosegwiment u fir-rigward ta’ rekwiżiti dwar l-informazzjoni dwar it-tmigħ tat-trabi u tat-tfal żgħar, ĠU L 25, 2.2.2016, p. 1.
Ir-Regolament Delegat tal-Kummissjoni (UE) 2016/128 tal-25 ta’ Settembru 2015 li jissupplimenta r-Regolament (UE) Nru 609/2013 tal-Parlament Ewropew u tal-Kunsill fir-rigward tar-rekwiżiti speċifiċi dwar il-kompożizzjoni u l-informazzjoni għall-ikel għal skopijiet mediċi speċjali, ĠU L 25, 2.2.2016, p. 30.
Ir-Regolament Delegat tal-Kummissjoni (UE) 2017/1798 tat-2 ta’ Ġunju 2017 li jissupplimenta r-Regolament (UE) Nru 609/2013 tal-Parlament Ewropew u tal-Kunsill fir-rigward tar-rekwiżiti speċifiċi dwar il-kompożizzjoni u l-informazzjoni għall-ikel għal sostitut tad-dieta kollha għall-kontroll tal-piż, ĠU L 259, 7.10.2017, p. 2.
Ir-Regolament Delegat tal-Kummissjoni (UE) 2019/828 tal-14 ta’ Marzu 2019 li jemenda r-Regolament Delegat (UE) 2016/127 rigward ir-rekwiżiti għall-vitamina D fil-formula tat-trabi u għall-aċidu eruċiku fil-formula tat-trabi u fil-formula ta’ prosegwiment, ĠU L 137, 23.5.2019, p. 12.
Opinjoni xjentifika dwar l-aċidu eruċiku fl-għalf u fl-ikel, Erucic acid in feed and food | EFSA (europa.eu)
Opinjoni xjentifika dwar l-Aġġornament tal-ogħla livell tollerabbli tal-konsum għall-vitamina D għat-trabi, Update of the tolerable upper intake level for vitamin D for infants - - 2018 - EFSA Journal - Wiley Online Library
Ir-Regolament Delegat tal-Kummissjoni (UE) 2018/561 li jemenda r-Regolament (UE) 2016/127 fir-rigward tar-rekwiżiti tal-proteini għall-formula ta’ prosegwiment ĠU L 94, 12.4.2018, p. 1.
Opinjoni Xjentifika dwar is-sigurtà u l-adattabilità għall-użu mit-trabi ta’ formuli tal-prosegwiment b’kontenut ta’ proteina ta’ mill-inqas 1,6 g/100 kcal, Scientific Opinion on the safety and suitability for use by infants of follow‐on formulae with a protein content of at least 1.6 g/100 kcal | EFSA (europa.eu)
Ir-Regolament Delegat tal-Kummissjoni (UE) 2021/572 tal-20 ta’ Jannar 2021 li jemenda r-Regolament Delegat (UE) 2016/127 fir-rigward tad-data tal-applikazzjoni ta’ wħud mid-dispożizzjonijiet tiegħu ĠU L 120, 8.4.2021, p. 4.
Id-Direttiva tal-Kummissjoni 2006/141/KE tat-22 ta’ Diċembru 2006 dwar formuli tat-trabi u formuli tal-prosegwiment u li temenda d-Direttiva 1999/21/KE, ĠU L 401, 30.12.2006, p. 1.
Ir-Regolament Delegat tal-Kummissjoni (UE) 2022/519 tal-14 ta’ Jannar 2022 li jemenda r-Regolament Delegat (UE) 2016/127 fir-rigward tar-rekwiżiti tal-proteina għall-formula tat-trabi u ta’ prosegwiment manifatturata mill-idroliżati tal-proteina, ĠU L 104, 1.4.2022, p. 58.
Ir-Regolament Delegat tal-Kummissjoni (UE) 2023/589 tal-10 ta’ Jannar 2023 li jemenda r-Regolament Delegat (UE) 2016/127 fir-rigward tar-rekwiżiti tal-proteina għall-formula tat-trabi u ta’ prosegwiment immanifatturata mill-idroliżati tal-proteina, ĠU L 79, 17.3.2023, p. 40.
Ir-Regolament Delegat tal-Kummissjoni (UE).../... li jemenda r-Regolament Delegat (UE) 2016/127 fir-rigward tar-rekwiżiti tal-proteina għall-formula tat-trabi u ta’ prosegwiment immanifatturata mill-idroliżati tal-proteina.
Is-sikurezza nutrizzjonali u l-adegwatezza ta’ idroliżat tal-proteina speċifiku derivat mill-konċentrat ta’ proteina tax-xorrox u użat f’formula tat-trabi u ta’ prosegwiment manifatturata minn proteina idrolizzata minn Danone Trading ELN B.V., https://www.efsa.europa.eu/mt/efsajournal/pub/6304
Is-sikurezza nutrizzjonali u l-adegwatezza ta’ idroliżat tal-proteina speċifiku derivat mill-konċentrat ta’ proteina tax-xorrox u użat f’formula tat-trabi u ta’ prosegwiment manifatturata minn proteina idrolizzata mill-HIPP-Werk Georg Hipp OHG, https://efsa.onlinelibrary.wiley.com/doi/full/10.2903/j.efsa.2022.7141
Is-sikurezza nutrizzjonali u l-adegwatezza ta’ idroliżat tal-proteina speċifiku derivat minn konċentrat ta’ proteina tax-xorrox u użat fil-formula tat-trabi u fil-formula ta’ prosegwiment manifatturati minn proteina idrolizzata minn FrieslandCampina Nederland B.V., https://efsa.onlinelibrary.wiley.com/doi/10.2903/j.efsa.2023.8063
Ir-Regolament Delegat tal-Kummissjoni (UE) 2022/2182 tat-30 ta’ Awwissu 2022 li jemenda r-Regolament Delegat (UE) 2017/1798 rigward ir-rekwiżiti għal-lipidi u għall-manjeżju għas-sostituti tad-dieta kollha għall-kontroll tal-piż, ĠU L 288, 9.11.2022, p. 18.
Dikjarazzjoni dwar evidenza xjentifika addizzjonali fir-rigward tal-kompożizzjoni essenzjali tas-sostituti tad-dieta kollha għall-kontroll tal-piż, https://www.efsa.europa.eu/mt/efsajournal/pub/6494
Ir-Regolament Delegat tal-Kummissjoni (UE) 2021/1040 tas-16 ta’ April 2021 li jemenda r-Regolament Delegat (UE) 2016/128 fir-rigward tar-rekwiżiti dwar il-pestiċidi fl-ikel għal skopijiet mediċi speċjali żviluppat biex jissodisfa l-ħtiġijiet ta’ nutrizzjoni tat-trabi u t-tfal żgħar, ĠU L 225, 25.6.2021, p. 1.
Ir-Regolament Delegat tal-Kummissjoni (UE) 2021/1041 tas-16 ta’ April 2021 li jemenda r-Regolament Delegat (UE) 2016/127 fir-rigward tar-rekwiżiti dwar il-pestiċidi fil-formula tat-trabi u fil-formula ta’ prosegwiment, ĠU L 225, 25.6.2021, p. 4.
Ir-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta’ residwu ta’ pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE, ĠU L 70, 16.3.2005, p. 1.
Ir-Regolament Delegat tal-Kummissjoni (UE) 2021/571 tal-20 ta’ Jannar 2021 li jemenda l-Anness tar-Regolament (UE) Nru 609/2013 tal-Parlament Ewropew u tal-Kunsill fir-rigward tal-lista ta’ sustanzi li jistgħu jiġu miżjuda mal-formula tat-trabi u mal-formula tal-prosegwiment, mal-ikel tat-trabi u mal-ikel proċessat biċ-ċereali, ĠU L 120, 8.4.2021, p. 1.
Il-metilfolat tal-kalċju bħala sors ta’ folat miżjud għal skopijiet nutrittivi mal-formula tat-trabi u tal-prosegwiment, mal-ikel tat-trabi u mal-ikel ipproċessat biċ-ċereali, https://efsa.onlinelibrary.wiley.com/doi/full/10.2903/j.efsa.2020.5947
Ir-Regolament Delegat tal-Kummissjoni (UE) 2023/439 tas-16 ta’ Diċembru 2022 li jemenda l-Anness tar-Regolament (UE) Nru 609/2013 tal-Parlament Ewropew u tal-Kunsill biex jippermetti l-użu tal-klorur tan-nikotinammidribosid bħala sors ta’ niaċina fl-ikel għal skopijiet mediċi speċjali u bħala sostitut tad-dieta kollha għall-kontroll tal-piż, ĠU L 64, 1.3.2023, p. 1.
Estensjoni tal-użu tal-klorur tan-nikotinammidribosid bħala ikel ġdid skont ir-Regolament (UE) 2015/2283, https://efsa.onlinelibrary.wiley.com/doi/full/10.2903/j.efsa.2021.6843
Ir-Regolament Delegat tal-Kummissjoni (UE).../... li jemenda l-Anness tar-Regolament (UE) Nru 609/2013 tal-Parlament Ewropew u tal-Kunsill biex jippermetti l-użu tal-kaseinat tal-ħadid tal-ħalib bħala sors ta’ ħadid fis-sostituti tad-dieta kollha għall-kontroll tal-piż u ikel għal skopijiet mediċi speċjali
Is-sikurezza tal-proteinat tal-ħadid tal-ħalib bħala ikel ġdid skont ir-Regolament (UE) 2015/2283 u l-bijodisponibbiltà tal-ħadid minn dan is-sors fil-kuntest tad-Direttiva 2002/46/KE, https://www.efsa.europa.eu/mt/efsajournal/pub/7549