(1)

De réir Airteagal 212(1) de Rialachán (AE, Euratom) 2018/1046 (“an Rialachán Airgeadais”) coinneofar na soláthairtí a dhéantar chun na dliteanais airgeadais a eascraíonn as ionstraimí airgeadais, ráthaíochtaí buiséadacha nó cúnamh airgeadais a chumhdach i gciste don soláthar coiteann. Leithdháilfear acmhainní an chiste don soláthar coiteann i rannáin a chomhfhreagraíonn do gach ceann de na hionstraimí ranníocaíochta sin. De bhun Airteagal 213(1) den Rialachán Airgeadais, beidh soláthar na ráthaíochtaí buiséadacha agus an chúnaimh airgeadais chuig tríú tíortha sa chiste don soláthar coiteann bunaithe ar ghlanráta soláthair.

(2)

Ba cheart an glanráta soláthair a bhunú ar bhonn na rátaí tosaigh soláthair a chinntear ar leithligh do gach ráthaíocht bhuiséadach nó cúnamh airgeadais do thríú tíortha de bhun Airteagal 211(2). De bhun Airteagal 213(2) den Rialachán Airgeadais, níor cheart feidhm a bheith aige ach amháin maidir le méid na n-acmhainní sa chiste don soláthar coiteann dá bhforáiltear chun glaonna ráthaíochta a íoc thar thréimhse bliana. Beidh feidhm ag an nglanráta soláthair maidir leis na rannáin ar fad sa chiste don soláthar coiteann ar féidir leo dliteanas teagmhasach a chruthú do bhuiséad an Aontais.

(3)

An mhodheolaíocht chun an glanráta soláthair a ríomh, ba cheart é a bheith bunaithe ar mhodhanna atá leagtha síos chun rioscaí creidmheasa a thomhas agus a bhainistiú, ar modheolaíochta iad a úsáidtear go forleathan san earnáil airgeadais. Braitheann na modhanna sin go mór ar mheastachán ar dháileadh caillteanais na punainne creidmheasa ar leithligh agus i gcomhpháirt le chéile do gach ionstraim rannchuidithe. Leis an modheolaíocht dírítear go háirithe ar mheasúnú a dhéanamh ar dhá chomhpháirt den riosca creidmheasa – caillteanais a bhfuil coinne leo agus caillteanais gan choinne.

(4)

Ba cheart don ghlanráta soláthair na tairbhí a léiriú a bhaineann le ráthaíochtaí buiséadacha agus cúnamh airgeadais a chomhthiomsú do thríú tíortha a bhfuil próifílí riosca éagsúla agus patrúin sreafaí airgid éagsúla acu. Dá bhrí sin, ba cheart an mhodheolaíocht chun leibhéal an ghlanráta soláthair sa chiste don soláthar coiteann a bhunú ar choincheap éagsúlaithe, lena bhféadfaí barrfheabhsú a dhéanamh ar an leibhéal soláthair a cheanglaítear le bunghníomhartha na n-ionstraimí ranníocaíochta faoi seach.

(5)

Is ionchur tábhachtach é comhghaolú na gcaillteanas idir rannáin laistigh den chiste don soláthar coiteann chun an glanráta soláthair a chinneadh. Dá bhrí sin, ba cheart cur chuige láidir a bhunú chun measúnú a dhéanamh ar leibhéal an chomhghaoil idir rannáin.

(6)

Is é an glanráta soláthair a bheidh mar thagairt ag an gCoimisiún chun na ranníocaíochtaí ón mbuiséad don soláthar de bhun Airteagal 211(4)(a) den Rialachán Airgeadais a ríomh, chun aon athshlánú a dhéanamh ar an gciste don soláthar coiteann de bhun Airteagal 213(4)(b) den Rialachán Airgeadais nó chun aon bharrachas soláthairtí de bhun Airteagal 213(4)(a) den Rialachán Airgeadais a thabhairt ar ais sa bhuiséad i gcás gach ionstraime ranníocaíochta ar leithligh. Dá bhrí sin, ba cheart do bhainisteoir airgeadais acmhainní an chiste don soláthar coiteann (“an bainisteoir airgeadais”) an glanráta soláthair a ríomh i gcomhréir leis an nós imeachta buiséadach bliantúil.

(7)

I gcomhréir le hAirteagal 213(1) den Rialachán Airgeadais, déanfaidh an glanráta soláthair leibhéal cosanta a sholáthar in aghaidh dhliteanais airgeadais an Aontais atá coibhéiseach leis an leibhéal a sholáthrófaí leis na rátaí soláthair faoi seach dá ndéanfaí na hacmhainní a choinneáil agus a bhainistiú ar leithligh. Mura bhfuil an fhaisnéis is gá ar fáil ina hiomláine chun an glanráta soláthair a chinneadh ar bhealach stuama, ba cheart cead a bheith ag an mbainisteoir airgeadais an glanráta soláthair a shocrú ag 100 %, mar bheart coimirce chun comhlíonadh an Airteagail sin a áirithiú.

(8)

I gcomhréir le hAirteagal 282(3)(g) den Rialachán Airgeadais, ní bheidh feidhm ag Airteagal 213 den Rialachán sin maidir leis an nglanráta soláthair ach amhail ó dháta chur i bhfeidhm an chreata airgeadais ilbhliantúil i ndiaidh 2020. Dá bhrí sin, ba cheart feidhm a bheith ag an gCinneadh seo amhail ón dáta céanna,