(1)

Maidir leis na treoirlínte atá sa Socrú maidir leis na Creidmheasanna Onnmhairiúcháin arna dTacú go hOifigiúil (‘an Socrú’), socrú a forbraíodh faoi chuimsiú na hEagraíochta um Chomhar agus Forbairt Eacnamaíochta (‘ECFE’), lena n-áirítear iad siúd atá sa Tuiscint Earnála maidir leis na Creidmheasanna Onnmhairiúcháin le haghaidh Aerárthaí Sibhialta (‘an Tuiscint Earnála maidir le hAerárthaí’) a leagtar amach in Iarscríbhinn III a ghabhann leis an Socrú, rinneadh iad a thrasuí agus, dá bhrí sin, tá siad ceangailteach ó thaobh dlí san Aontas iad de bhua Rialachán (AE) Uimh. 1233/2011 ó Pharlaimint na hEorpa agus ón gComhairle (1).

(2)

Leagtar amach i Roinn 1 d’Fhoscríbhinn II a ghabhann leis an Tuiscint Earnála maidir le hAerárthaí na nósanna imeachta aicmithe rioscaí d’idirbhearta atá faoi réir na Tuisceana Earnála maidir le hAerárthaí sin. Tá Rannpháirtithe na Tuisceana Earnála maidir le hAerárthaí (‘na Rannpháirtithe’) le cinneadh a dhéanamh, trí nós imeachta i scríbhinn, maidir le leasuithe ar Roinn 1 d’Fhoscríbhinn II a ghabhann leis an Tuiscint Earnála maidir le hAerárthaí lena n-eisiafaí idirbhearta ar lú a luach conartha onnmhairiúcháin ná USD 5 mhilliún (idirbhearta de minimis) a bhaineann le haerárthaí talmhaíochta ó na nósanna imeachta aicmithe riosca féichiúnaí. Leis na leasuithe sin, laghdófaí an t-ualach riaracháin ar na Rannpháirtithe agus shimpleofaí rátáil an riosca féichiúnaí.

(3)

Is iomchuí an seasamh atá le glacadh thar ceann an Aontais sa nós imeachta i scríbhinn maidir le dréachtchinneadh na Rannpháirtithe a bhunú de bhrí go mbeidh an cinneadh ceangailteach ar an Aontas agus go mbeifear in ann leis tionchar cinntitheach a imirt ar inneachar dhlí an Aontais, de bhua Airteagal 1 de Rialachán (AE) Uimh. 1233/2011.

(4)

Dá bhrí sin, ba cheart gurb é seasamh an Aontais tacú le cinneadh na Rannpháirtithe i ndáil le haicmiú an riosca féichiúnaí in idirbhearta de minimis lena mbaineann aerárthaí talmhaíochta bunaithe ar an dréacht-téacs atá i gceangal leis an gCinneadh seo,