6.2.2023   

GA

Iris Oifigiúil an Aontais Eorpaigh

L 34/6

RIALACHÁN CUR CHUN FEIDHME (AE) 2023/248 ÓN gCOIMISIÚN

an 1 Feabhra 2023

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle i bhfeidhm go haonfhoirmeach (2), is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoi na cóid AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Maidir le faisnéis taraife cheangailteach arna heisiúint i leith na n-earraí a bhaineann leis an Rialachán seo, ar faisnéis í nach bhfuil i gcomhréir leis an Rialachán seo, is iomchuí a fhoráil go bhféadfaidh an sealbhóir an fhaisnéis sin a agairt fós, go ceann tréimhse áirithe, i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, aicmeofar iad faoi chuimsiú na hAinmníochta Comhcheangailte faoi na cóid AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, féadfar í a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 1 Feabhra 2023.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim

(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).

IARSCRÍBHINN

Tuairisc ar na hearraí

Aicmiú (Cód AC)

Cúiseanna

(1)

(2)

(3)

1.

Cluasa buabhaill triomaithe, lena n-úsáid mar bheatha ainmhithe, a phacáiltear i málaí plaisteacha de 50 nó 100 píosa.

Táirgtear na cluasa mar sheachtháirge maraithe (is é sin, scairteach feola) i monarchana táirgthe bia. Déantar iad a phróiseáil a thuilleadh ansin gan cloí leis na bearta sláinteachais bia trí loimiceadh, trí ghlanadh agus trí thriomú faoin ngrian.

Iompraítear na táirgí mar bheatha ainmhithe agus díoltar iad mar ábhar coganta do mhadraí.

0511 99 85

Cinntear an t-aicmiú le rialacha ginearálta 1 agus 6 maidir le léirmhíniú na hAinmníochta Comhcheangailte, le nóta 1(a) a ghabhann le Caibidil 2 agus le foclaíocht na gcód AC 0511 , 0511 99 agus 0511 99 85 .

Ós rud é go dtarlaíonn táirgeadh agus iompar na gcluas triomaithe gan cloí le caighdeáin sláinteachais bia, níl na táirgí oiriúnach lena gcaitheamh ag an duine. Eisiatar an t-aicmiú faoi Chaibidil 2, dá bhrí sin, toisc nach gcumhdaítear leis an gCaibidil sin táirgí atá mí-oiriúnach ná neamhoiriúnach lena gcaitheamh ag an duine (nóta 1(a) a ghabhann le Caibidil 2).

Eisiatar an t-aicmiú faoi Chaibidil 23, dá bhrí sin, toisc nár chaill na cluasa saintréithe riachtanacha an amhábhair trí loimiceadh agus trí thriomú (nóta 1 a ghabhann le Caibidil 23).

Dá bhrí sin, tá an táirge le haicmiú faoin gcód AC 0511 99 85 mar tháirge ainmhí eile nach sonraítear ná nach n-áirítear in aon áit eile.

2.

Mairteoil thriomaithe a scríobadh den scornach, lena húsáid mar bheatha ainmhithe, a phacáiltear i málaí plaisteacha de 1 go 5 kg a lipéadaítear mar bheatha do mhadraí.

Táirgtear an fheoil mar sheachtháirge maraithe (is é sin, scairteach feola) i monarchana táirgthe bia. Déantar an fheoil a phróiseáil a thuilleadh ansin gan cloí leis na bearta sláinteachais bia trí thriomú faoin ghrian.

Iompraítear na táirgí mar bheatha ainmhithe agus díoltar iad mar bheatha do mhadraí.

0511 99 85

Cinntear an t-aicmiú le rialacha ginearálta 1 agus 6 maidir le léirmhíniú na hAinmníochta Comhcheangailte, le nóta 1 a ghabhann le Caibidil 2 agus le foclaíocht na gcód AC 0511 , 0511 99 agus 0511 99 85 .

Ós rud é go dtarlaíonn táirgeadh agus iompar na feola triomaithe gan cloí le caighdeáin sláinteachais bia, níl na táirgí oiriúnach lena gcaitheamh ag an duine. Eisiatar an t-aicmiú faoi Chaibidil 2, dá bhrí sin, toisc nach gcumhdaítear leis an gCaibidil sin táirgí atá mí-oiriúnach ná neamhoiriúnach lena gcaitheamh ag an duine (nóta 1(a) a ghabhann le Caibidil 2).

Eisiatar an t-aicmiú faoi Chaibidil 23, dá bhrí sin, toisc nár chaill an scairteach saintréithe riachtanacha an amhábhair trí thriomú (nóta 1 a ghabhann le Caibidil 23).

Dá bhrí sin, tá an táirge le haicmiú faoin gcód AC 0511 99 85 mar tháirge ainmhí eile nach sonraítear ná nach n-áirítear in aon áit eile.