(1)

L-Anness VIII tar-Regolament (UE) 2019/1241 jipprevedi miżuri tekniċi għall-Baħar Baltiku.

(2)

Id-Danimarka, il-Ġermanja, l-Estonja, il-Latvja, il-Litwanja, il-Polonja, il-Finlandja u l-Iżvezja (“l-Istati Membri kkonċernati”) għandhom interess ta’ ġestjoni dirett fis-sajd fil-Baħar Baltiku. Fis-26 ta’ Ottubru 2021, l-Istati Membri kkonċernati ressqu rakkomandazzjoni konġunta lill-Kummissjoni f’konformità mal-Artikolu 18(1) tar-Regolament (UE) Nru 1380/2013 tal-Parlament Ewropew u tal-Kunsill (2) u l-Artikolu 15(3) tar-Regolament (UE) 2019/1241, li tipproponi l-adozzjoni ta’ att delegat biex jiżdiedu apparati ta’ selettività ġodda fl-Anness VIII tar-Regolament (UE) 2019/1241. Wara konsultazzjoni miftuħa mal-partijiet ikkonċernati dwar ir-Regolament ta’ Implimentazzjoni (UE) 2024/3094 (3) (4), BaltFish irrevedew ir-rakkomandazzjoni konġunta tagħhom billi talbu li tiddaħħal klawżola ta’ reviżjoni u li tiġi estiża l-applikazzjoni mdewma ta’ dan ir-Regolament minn 90 sa 120 jum wara l-pubblikazzjoni tiegħu.

(3)

Ir-rakkomandazzjoni konġunta tipproponi miżuri tekniċi speċifiċi għall-protezzjoni tal-istokkijiet tal-bakkaljaw tal-Baltiku, li huma eżawriti ferm skont il-valutazzjoni annwali tal-Kunsill Internazzjonali għall-Esplorazzjoni tal-Baħar (“ICES”) (5) (6), inkluża deroga mid-daqsijiet tal-malji permessi bħalissa. Għalhekk jenħtieġ li d-daqsijiet tal-malji biss li huma proposti f’dan ir-Regolament japplikaw fis-subdiviżjonijiet tal-ICES 22-26 għas-sajd demersali meta s-sajd dirett għall-bakkaljaw ikun ipprojbit.

(4)

L-Istati Membri kkonċernati qablu li meta s-sajd dirett għall-bakkaljaw ikun ipprojbit, jeħtieġ li l-qabdiet inċidentali tal-bakkaljaw jitnaqqsu meta jsir sajd għall-pixxiċatt fiż-żona prinċipali ta’ distribuzzjoni tal-bakkaljaw tal-Baltiku (is-subdiviżjonijiet tal-ICES 22-26) b’mill-inqas 55 %, sabiex jiġi evitat aktar deterjorament ta’ dawn l-istokkijiet.

(5)

Għas-subdiviżjonijiet tal-ICES 22 sa 26, ir-rakkomandazzjoni konġunta tissuġġerixxi l-użu ta’ apparat ta’ selezzjoni “Roofless” li għandu jiżdied jew mal-irkapti ta’ referenza, manka T90 modifikata (b’daqs tal-malja ta’ mill-inqas 125 mm u rinforz taċ-ċmusi bil-ħbula tat-tqassir tal-manka), jew ma’ manka b’malji kwadri (li tikkonsisti f’żewġ pannelli u daqs minimu tal-malji ta’ mill-inqas 125 mm).

(6)

Il-Kumitat Xjentifiku, Tekniku u Ekonomiku għas-Sajd (“STECF”) ivvaluta l-apparat “Roofless” f’Novembru 2021 u kkonkluda (7) li l-effiċjenza tat-tnaqqis tal-bakkaljaw hija ogħla minn 75 % meta l-apparat “Roofless” jiġi kkombinat mal-manka T90 modifikata jew mal-manka b’malji kwadri. Meta kkombinata mal-irkapti ta’ referenza, l-effiċjenza tat-tnaqqis tal-qbid tkun ogħla minn 70 %. Skont l-STECF, l-apparat “Roofless” jirrilaxxa l-maġġoranza tal-bakkaljaw, irrispettivament mid-daqs tiegħu. Meta titqies l-evidenza dwar l-istatus tal-istokk, it-tnaqqis tal-mortalità ta’ individwi tal-bakkaljaw huwa essenzjali biex jiġi appoġġat l-irkupru tiegħu.

(7)

Għas-subdiviżjonijiet tal-ICES 24 sa 26, ir-rakkomandazzjoni konġunta tipproponi, minbarra l-kombinazzjonijiet tal-irkaptu u l-apparat imsemmija hawn fuq, il-possibbiltà li tintuża waħedha l-manka T90 modifikata. L-STECF ikkonkluda li, għall-prestazzjoni ottimali, jenħtieġ li l-manka T90 modifikata tintuża flimkien mal-apparat ta’ selezzjoni “Roofless”. Madankollu, anki waħedha, it-T90 modifikata tnaqqas il-qabdiet inċidentali tal-bakkaljaw b’medja ta’ 56 %.

(8)

Fir-rigward tal-manka b’malji kwadri, ir-rakkomandazzjoni konġunta ma tipproponix l-użu tagħha mingħajr l-apparat “Roofless” għaliex qatt ma tissodisfa l-mira meħtieġa għat-tnaqqis tal-qabdiet aċċessorji ta’ mill-inqas 55 %.

(9)

B’mod ġenerali, l-STECF ikkonkluda li l-irkapti u l-kombinazzjonijiet proposti fir-rakkomandazzjoni konġunta huma mill-inqas ekwivalenti, f’termini ta’ xejriet ta’ sfruttament, għall-irkapti ta’ referenza u li l-qabdiet taħt id-daqs minimu ta’ referenza għall-konservazzjoni se jitnaqqsu meta mqabbla mal-irkapti ta’ referenza kif meħtieġ mill-Artikolu 15(4) tar-Regolament (UE) 2019/1241. Għalhekk jenħtieġ li r-Regolament (UE) 2019/1241 jiġi emendat biex jinkludi dawk l-irkapti u l-kombinazzjonijiet.

(10)

L-STECF iddikjara wkoll li l-mira proposta ta’ tnaqqis kwantitattiv tal-qabdiet aċċessorji ta’ 55 % hija marbuta mal-istruttura tad-daqs tal-popolazzjonijiet tal-bakkaljaw u tista’ teħtieġ aktar aġġustamenti. Ir-rakkomandazzjoni konġunta pproponiet reviżjoni annwali tal-miżuri mit-tielet sena ta’ applikazzjoni ta’ dawk il-miżuri biex jiġi vvalutat jekk il-parametri tas-selettività humiex adattati għall-iskop tagħhom. Sabiex jiġi ffaċilitat il-ġbir tad-data f’dan ir-rigward, jenħtieġ li l-Istati Membri jiżguraw li l-qabdiet li jsiru permezz ta’ dan l-irkaptu jiġu rreġistrati separatament.

(11)

Dan ir-Regolament huwa kkomplementat mir-Regolament ta’ Implimentazzjoni (UE) 2024/3094 li jistabbilixxi l-ispeċifikazzjonijiet tekniċi dettaljati ta’ apparat ta’ selettività biex jitnaqqsu l-qabdiet inċidentali tal-bakkaljaw fil-Baħar Baltiku.

(12)

Sabiex ikun hemm biżżejjed żmien biex il-bastimenti jiġu mgħammra b’apparati ta’ selettività ġodda, jenħtieġ li dan ir-Regolament japplika minn 120 jum wara l-pubblikazzjoni tiegħu,