European flag

Iris Oifigiúil
an Aontais Eorpaigh

GA

Sraith L


2025/1501

28.7.2025

RIALACHÁN CUR CHUN FEIDHME (AE) 2025/1501 ÓN gCOIMISIÚN

an 25 Iúil 2025

lena leasaítear Rialachán Cur Chun Feidhme (AE) 2022/191 lena bhforchuirtear dleacht frithdhumpála chinntitheach ar allmhairí ceanglóirí áirithe iarainn nó cruach de thionscnamh Dhaon-Phoblacht na Síne

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1), agus go háirithe Airteagal 14(1) de,

De bharr an mhéid seo a leanas:

1.   NA BEARTA ATÁ I bhFEIDHM

(1)

An 17 Feabhra 2022, d’fhorchuir an Coimisiún dleacht frithdhumpála chinntitheach ar allmhairí ceanglóirí áirithe iarainn nó cruach de thionscnamh Dhaon-Phoblacht na Síne (‘an tSín’) leis an Rialachán bunaidh.

(2)

San imscrúdú a raibh sé mar thoradh air dleachtanna frithdhumpála cinntitheacha a fhorchur (‘an t-imscrúdú bunaidh’), cuireadh sampláil i bhfeidhm chun táirgeoirí onnmhairiúcháin sa tSín a imscrúdú i gcomhréir le hAirteagal 17 den bhun-Rialachán.

(3)

D’fhorchuir an Coimisiún rátaí dleachta frithdhumpála aonair idir 22,1 % agus 48,4 % ar allmhairí ceanglóirí áirithe iarainn nó cruach (‘ceanglóirí’ nó ‘an táirge lena mbaineann’) i gcás na dtáirgeoirí onnmhairiúcháin sampláilte ón tSín. Na táirgeoirí onnmhairiúcháin comhoibríocha de chuid na Síne nár áiríodh sa sampla, cuireadh faoi réir ráta dleachta 39,6 % iad, arb é meánráta dleachta ualaithe na dtáirgeoirí onnmhairiúcháin sampláilte de chuid na Síne é a bhfuarthas ina leith go raibh siad ag dumpáil. Liostaítear ainmneacha na dtáirgeoirí onnmhairiúcháin comhoibríocha de chuid na Síne nár áiríodh sa sampla san Iarscríbhinn a ghabhann leis an Rialachán bunaidh. Forchuireadh dleacht 86,5 % ar an leibhéal náisiúnta ar cheanglóirí ó chuideachtaí sa tSín nár chomhoibrigh leis an imscrúdú.

2.   IARRAIDH AGUS ANAILÍS

(4)

Chuir an chuideachta Moregood Hardware Technology (Nanjing) Co., Ltd. (‘an t-iarratasóir’) iarraidh faoi bhráid an Choimisiúin chun an dleacht frithdhumpála le haghaidh táirgeoirí onnmhairiúcháin comhoibríocha neamhshampláilte a fháil mar gheall ar a chaidreamh le Shanghai Moregood Hardware Co., Ltd., a áiríodh mar tháirgeoir onnmhairiúcháin comhoibríoch neamhshampláilte sa Rialachán bunaidh.

(5)

Sholáthair an t-iarratasóir faisnéis a léiríonn gurb é Shanghai Moregood Hardware Co., Ltd. a phríomh-scairshealbhóir.

(6)

Thairis sin, sholáthair an t-iarratasóir a cheadúnas gnó, lena ndeimhnítear gur bunaíodh é i mí an Mhárta 2025, i.e. tar éis na tréimhse imscrúdúcháin bunaidh agus, dá bhrí sin, dheimhnigh an Coimisiún nárbh fhéidir le Shanghai Moregood Hardware Co., Ltd. an t-iarratasóir a thuairisciú mar chuideachta comhlachaithe nuair a rinneadh an cleachtadh samplála san imscrúdú bunaidh. Ós rud é go raibh an dleacht is infheidhme maidir leis an eintiteas Shanghai Moregood Hardware Co., Ltd. bunaithe ar mheán na dtáirgeoirí onnmhairiúcháin sampláilte, ní athraíonn cuimsiú an iarratasóra torthaí an Choimisiúin ina leith sin. Dá bhrí sin, measann an Coimisiún gurb iomchuí go dtiocfaidh an dleacht frithdhumpála ar onnmhairí Shanghai Moregood Hardware Co., Ltd. chun bheith infheidhme maidir le honnmhairí an iarratasóra.

(7)

I bhfianaise a bhfuil thuas, mheas an Coimisiún gurbh iomchuí an Iarscríbhinn a ghabhann leis an Rialachán bunaidh a leasú trí Moregood Hardware Technology (Nanjing) Co., Ltd. a chur leis mar tháirgeoir onnmhairiúcháin atá comhlachaithe le Shanghai Moregood Hardware Co., Ltd., a liostaítear faoi chód breise TARIC C837.

3.   NOCHTADH

(8)

Cuireadh an t-iarratasóir, tionscal an Aontais, agus páirtithe leasmhara eile ar an eolas faoi na fíorais agus na breithnithe fíor-riachtanacha ar ar a mbonn a measadh gurbh iomchuí an Iarscríbhinn a ghabhann leis an Rialachán bunaidh a leasú trí Moregood Hardware Technology (Nanjing) Co., Ltd. a chur léi mar tháirgeoir onnmhairiúcháin atá comhlachaithe le Shanghai Moregood Hardware Co., Ltd., a liostaítear faoi chód breise TARIC C837.

(9)

An cód breise TARIC C837, cód nár sannadh roimhe seo ach do Shanghai Moregood Hardware Co., Ltd., ba cheart feidhm a bheith aige freisin maidir le Moregood Hardware Technology (Nanjing) Co., Ltd.

(10)

Tugadh an deis do na páirtithe barúlacha a chur isteach. Ní bhfuarthas aon bharúil.

(11)

Tá na bearta dá bhforáiltear sa Rialachán seo i gcomhréir leis an tuairim ón gCoiste a bunaíodh le hAirteagal 15(1) de Rialachán (AE) 2016/1036,

TAR ÉIS AN RIALACHÁN SEO A GHLACADH:

Airteagal 1

Leasaítear an Iarscríbhinn a ghabhann le Rialachán Cur Chun Feidhme (AE) 2022/191 ón gCoimisiún (2) mar a leanas:

‘Daon-Phoblacht na Síne

SHANGHAI MOREGOOD HARDWARE CO., LTD.

C837’

cuirtear an méid seo a leanas ina ionad sin

‘Daon-Phoblacht na Síne

SHANGHAI MOREGOOD HARDWARE CO., LTD.

Moregood Hardware Technology (Nanjing) Co., Ltd.

C837’

Airteagal 2

An cód breise TARIC C837 a sannadh roimhe seo do SHANGHAI MOREGOOD HARDWARE CO., LTD., beidh feidhm aige maidir le SHANGHAI MOREGOOD HARDWARE CO., LTD. agus Moregood Hardware Technology (Nanjing) Co., Ltd.

Airteagal 3

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 25 Iúil 2025.

Thar ceann an Choimisiúin

An tUachtarán

Ursula VON DER LEYEN


(1)   IO L 176, 30.6.2016, lch. 21, ELI: http://data.europa.eu/eli/reg/2016/1036/oj.

(2)  Rialachán Cur Chun Feidhme (AE) 2022/191 ón gCoimisiún an 16 Feabhra 2022 lena bhforchuirtear dleacht frithdhumpála chinntitheach ar allmhairí ceanglóirí áirithe iarainn nó cruach de thionscnamh Dhaon-Phoblacht na Síne (IO L 36, 17.2.2022, lch. 1, ELI: http://data.europa.eu/eli/reg_impl/2022/191/oj).


ELI: http://data.europa.eu/eli/reg_impl/2025/1501/oj

ISSN 1977-0839 (electronic edition)