European flag

Iris Oifigiúil
an Aontais Eorpaigh

GA

Sraith C


C/2024/6179

15.10.2024

Foilsiú teachtaireachta maidir le formheas ar leasú caighdeánach ar shonraíocht táirge le haghaidh ainm in earnáil an fhíona, dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún

(C/2024/6179)

Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

FORMHEAS AR LEASÚ CAIGHDEÁNACH A CHUR IN IÚL

‘Costières de Nîmes’

PDO-FR-A0161-AM02

Arna thíolacadh an: 25.7.2024

TUAIRISC AR AN LEASÚ FORMHEASTA AGUS NA CÚISEANNA LEIS

1.   Limistéar geografach agus limistéar díreach in aice láimhe

I Roinn IV ‘Limistéir agus áiteanna ina ndéantar na hoibríochtaí éagsúla’ de Chaibidil I den tsonraíocht táirge le haghaidh an ainmniúcháin ‘Costières de Nîmes’, leasaíodh pointe 1 ‘Limistéar geografach’ agus pointe 3 ‘Limistéar díreach in aice láimhe’, gan aon athrú eile, trí thagairt a chur leis do Chód Geografach Oifigiúil 2023.

Leis an leasú eagarthóireachta sin, ligtear don limistéar geografach a bheith aitheanta le tagairt do leagan 2023 den Chód Geografach Oifigiúil, a eisíonn an Institiúid Náisiúnta Staidrimh agus Staidéar Eacnamaíoch (INSEE) agus a thugann deimhneacht dhlíthiúil don sainiú ar an limistéar geografach.

Cuireadh an tagairt chéanna leis an doiciméad aonair, faoi na ceannteidil ‘Limistéar geografach’ agus ‘Coinníollacha breise – limistéar díreach in aice láimhe’.

2.   Cleachtais fhíoneolaíocha

I Roinn IX ‘Próiseáil, táirgeadh, aibiú, pacáistiú, stóráil’ de Chaibidil I den tsonraíocht táirge le haghaidh ainmniúchán ‘Costières de Nîmes’, leasaíodh pointe (d) ‘Cleachtais fhíoneolaíocha agus cóireálacha fisiceacha’ chun a shonrú, maidir le táirgeadh fíonta rosé, go gceadaítear gualach fíoneolaíoch a úsáid, i gcomhréir le rialacháin Eorpacha, le haghaidh úrfhíonta agus fíonta nua atá fós faoi choipeadh tar éis brú, gan níos mó ná 20 % de thoirt iomlán an fhíona rosé a tháirgeann an déantóir fíona le haghaidh aon bhuaint ar leith.

Luaitear údarú an chleachtais fhíoneolaíoch sin faoin gceannteideal ‘Cleachtais fhíoneolaíocha shonracha’ den doiciméad aonair.

3.   Lipéadú

I Roinn XII ‘Rialacha maidir le cur i láthair agus lipéadú’ de Chaibidil I den tsonraíocht táirge le haghaidh ainmniúchán ‘Costières de Nîmes’, leasaíodh pointe 2 ‘Forálacha speisialta’ chun na rialacha maidir le lipéadú a áireamh chun tagairt a dhéanamh don aonad geografach níos leithne ‘Vignobles de la Vallée du Rhône’, mar a leagtar amach sa chomhaontú a síníodh idir na comhlachtaí éagsúla cosanta agus bainistíochta lena mbaineann. Ní mór an fhaisnéis sin a bheith sa réimse radhairc céanna leis na mionsonraí sainordaitheacha uile, ní mór í a phriontáil i gcarachtair a bhfuil an dearadh grafach céanna agus an dath céanna orthu agus atá ar an ainmniúchán, agus ní fhéadfaidh siad a bheith níos mó ná dhá thrian de mhéid an ainmniúcháin.

Cuireadh an leasú sin leis an doiciméad aonair, faoin gceannteideal ‘Coinníollacha breise – Lipéadú’.

4.   Mionsonraí an chomhlachta cigireachta

Tugadh Roinn II ‘Mionsonraí an chomhlachta cigireachta’ de Chaibidil III den tsonraíocht táirge cothrom le dáta chun a shonrú nach mór seiceálacha ar chomhlíonadh na sonraíochta táirge a dhéanamh ar bhonn plean cigireachta formheasta agus ag comhlacht tríú páirtí a thairgeann ráthaíochtaí maidir le hinniúlacht, neamhchlaontacht agus neamhspleáchas arna dtarmligean ag INAO, an t-údarás cigireachta.

Ní dhéanann an nuashonrú sin difear don doiciméad aonair.

DOICIMÉAD AONAIR

1.   Ainm (nó ainmneacha)

Costières de Nîmes

2.   Cineál an táisc gheografaigh

ATFC – Ainmniúchán Tionscnaimh faoi Chosaint

3.   Catagóirí na dtáirgí fíniúna

1.

Fíon

3.1.   Cód Ainmníochta Comhcheangailte

—

22 - DEOCHANNA, BIOTÁILLÍ AGUS FÍNÉAGAR

2204 - fíon ó fhíonchaora úra, lena n-áirítear fíonta treisithe; úrfhíon fíonchaor seachas é sin atá faoi cheannteideal 2009

4.   Tuairisc ar an bhfíon (nó ar na fíonta)

1.   Fíonta dearga

TUAIRISC ACHOMAIR I SCRÍBHINN

Is fíonta socra iad fíonta ag a bhfuil an t-ainmniúchán ‘Costières de Nîmes’ atá dearg, rosé nó geal.

I gcás na bhfíonta dearga, tá an cion aigéid mhalaigh níos lú ná 0,4 g/l nó cothrom leis ag céim an phacáistithe.

—

Ag céim an phacáistithe, tá méid siúcra choipthigh (glúcós agus fruchtós) sna fíonta níos lú ná nó cothrom leis na luachanna seo a leanas:

Fíonta dearga ag a bhfuil neart alcóil nádúrtha de réir toirte nach mó ná 14 %: 3 g/l

Fíonta dearga ag a bhfuil neart alcóil nádúrtha de réir toirte níos mó ná 14 %: 4 g/l

—

Is é 11,5 % neart alcóil nádúrtha íosta na bhfíonta de réir toirte.

—

Tar éis an choipthe mhalalachtaigh, bíonn déine datha mhodhnaithe ag na fíonta dearga atá níos mó nó cothrom le 6.

—

Is i reachtaíocht an Aontais a leagtar síos méideanna na haigéadachta iomláine agus na haigéadachta luainí i gcás na bhfíonta dearga.

—

Táirgtear na fíonta dearga go príomha ó chineálacha Grenache noir N, Mourvèdre N agus Syrah N.

Is iad na fíonta dearga, a dhéantar go príomha as cineálacha Grenache N agus Syrah N, an táirge, thar aon ní eile, de shaineolas na ndéantóirí fíona. Tá dea-bholaithe de thorthaí dearga agus acmhainneacht aosaithe mheánach ó na fíonta óga, le dea-bholaithe a fhorbraíonn ina dhiaidh sin ina mbolaithe níos spíosraí agus níos plandúla. Baineann na fíonta galánta ach dea-struchtúrtha sin leis an bhfine mhór fíonta i nGleann na Róine.

Saintréithe anailíseacha ginearálta

—

Neart alcóil iomlán uasta (in % de réir toirte) -

—

Neart alcóil iarbhír íosta (in % de réir toirte) -

—

Aigéadacht iomlán íosta: —

—

Aigéadacht luaineach uasta (i milleachoibhéisí in aghaidh an lítir): —

—

Dé-ocsaíd sulfair iomlán uasta (i milleagraim in aghaidh an lítir): 140

2.   Fíonta rosé

TUAIRISC ACHOMAIR I SCRÍBHINN

—

Is é 11,5 % neart alcóil nádúrtha íosta na bhfíonta de réir toirte.

—

Ag céim an phacáistithe, tá méid siúcra choipthigh (glúcós agus fruchtós) sna fíonta níos lú ná nó cothrom leis na luachanna seo a leanas: 4 g/l

—

Tá déine datha mhodhnaithe níos lú nó cothrom le 2 ag na fíonta rosé.

—

Tá na caighdeáin maidir le haigéadacht luaineach agus dé-ocsaíd sulfair i gcomhréir le reachtaíocht an Aontais, mar atá na critéir anailíseacha eile.

—

Táirgtear na fíonta rosé go príomha ó chineálacha Grenache noir N, Mourvèdre N agus Syrah N.

Bíonn dath gléineach ar na fíonta rosé den chuid is mó, iad an-úr ach tathagach, le marthanacht mhaith aramatach san iarbhlas. Bíonn dea-bholaithe de thorthaí dearga beaga agus de thorthaí triomaithe orthu.

Saintréithe anailíseacha ginearálta

—

Neart alcóil iomlán uasta (in % de réir toirte) -

—

Neart alcóil iarbhír íosta (in % de réir toirte) -

—

Aigéadacht iomlán íosta: —

—

Aigéadacht luaineach uasta (i milleachoibhéisí in aghaidh an lítir): 14,28

—

Dé-ocsaíd sulfair iomlán uasta (i milleagraim in aghaidh an lítir): 180

3.   Fíonta geala

TUAIRISC ACHOMAIR I SCRÍBHINN

—

Is é 11,5 % neart alcóil nádúrtha íosta na bhfíonta de réir toirte.

—

Ag céim an phacáistithe, tá méid siúcra choipthigh (glúcós agus fruchtós) sna fíonta níos lú ná nó cothrom leis na luachanna seo a leanas: 4 g/l

—

Tá na caighdeáin maidir le haigéadacht luaineach agus dé-ocsaíd sulfair i gcomhréir le reachtaíocht an Aontais, mar atá na critéir anailíseacha eile.

—

Is as na cineálacha Grenache blanc B, Marsanne B agus Roussanne B a dhéantar na fíonta geala go príomha. Is fíonta dea-chothromaithe bríomhara iad sin, lena ngabhann dea-bholaithe bláthacha a chuireann bláthanna bána i gcuimhne, agus dea-bholaithe torthaíocha a chuireann torthaí citris agus torthaí bia bháin i gcuimhne.

Saintréithe anailíseacha ginearálta

—

Neart alcóil iomlán uasta (in % de réir toirte) -

—

Neart alcóil iarbhír íosta (in % de réir toirte) -

—

Aigéadacht iomlán íosta: —

—

Aigéadacht luaineach uasta (i milleachoibhéisí in aghaidh an lítir): 14,28

—

Dé-ocsaíd sulfair iomlán uasta (i milleagraim in aghaidh an lítir): 180

5.   Cleachtais fhíoneolaíocha

5.1.   Cleachtais fhíoneolaíocha shonracha

1.   Modh fáis

Is é dlús plandála íosta na bhfíniúnacha 4 000 planda in aghaidh an heicteáir. Ní bheidh an spásáil idir na sraitheanna níos mó ná 2,50 m, agus ní mór an spásáil idir plandaí sa tsraith chéanna a bheith 0,8 m ar a laghad.

Ní bheidh an t-achar atá ar fáil do gach planda níos mó ná 2,5 m2. Faightear an t-achar dromchla sin tríd an spásáil idir na sraitheanna a mhéadú faoin spásáil idir na plandaí.

—

Tarlaíonn an phrúnáil roimh an 1 Bealtaine.

—

Déantar na fíniúnacha a phrúnáil le prúnáil ghearr, le sé spor ar a mhéad in aghaidh an phlanda. Tá dhá bhachlóg ar a mhéad ar gach spor. Féadfar fíniúnacha a threoraítear trí úsáid a bhaint as córas thródam Royat a phrúnáil, áfach, agus 10 spor ar a mhéad in aghaidh an phlanda i gceist, agus bachlóg amháin ar gach spor.

—

Féadfar prúnáil Guyot aonair a úsáid le haghaidh na gcineálacha Syrah N agus Viognier B, agus 10 mbachlóg ar a mhéad in aghaidh an phlanda, nach bhfuil níos mó ná sé cinn díobh ar an gcána, agus spor ionaid amháin nó dhó ar a bhfuil dhá bhachlóg ar a mhéad an ceann.

Féadfar uisciú a údarú.

2.   Cleachtas fíoneolaíoch sonrach

Maidir le fíonta rosé a tháirgeadh, ceadaítear gualach fíoneolaíoch a úsáid le haghaidh úrfhíonta agus fíonta nua atá fós faoi choipeadh tar éis brú, gan dul thar 20 % de thoirt iomlán an fhíona rosé a tháirgeann an déantóir fíona le haghaidh aon bhuainte ar leith.

I dteannta na forála thuas, ní mór go gcomhlíonann na cleachtais fhíoneolaíocha a leantar na ceanglais a leagtar síos i reachtaíocht an Aontais agus sa Chód um Ghnóthaí Tuaithe agus um Iascaireacht Mhuirí.

5.2.   Uastáirgeacht

1.

Fíonta dearga agus rosé

66 heictilítear in aghaidh an heicteáir

2.

Fíonta geala

70 heictilítear in aghaidh an heicteáir

6.   Limistéar geografach críochaithe

Déantar na fíonchaora a bhuaint, fíonóireacht agus táirgeadh na bhfíonta sna bardais seo a leanas de chuid roinn Gard, bunaithe ar Chód Geografach Oifigiúil 2023: Aubord, Beaucaire, Beauvoisin, Bellegarde, Bernis, Bezouce, Bouillargues, Le Cailar, Caissargues, Garons, Générac, Jonquières-Saint-Vincent, Lédenon, Manduel, Meynes, Milhaud, Nîmes, Redessan, Rodilhan, Saint-Gilles, Sernhac, Uchaud, Vauvert, Vestric-et-Candiac.

7.   Cineál (nó cineálacha) fíonchaor

Bourboulenc B - Doucillon blanc

Carignan N

Cinsaut N – Cinsault

Clairette B

Grenache N

Grenache blanc B

Macabeu B - Macabeo

Marsanne B

Marselan N

Mourvèdre N – Monastrell

Roussanne B

Syrah N – Shiraz

Vermentino B – Rolle

Viognier B

8.   Tuairisc ar an nasc (nó ar na naisc)

8.1.   Mionsonraí an limistéir gheografaigh

Léiríonn an téarma ‘ costière’,as a dtógann limistéar geografach an ainmniúcháin tionscnaimh cláraithe ‘Costières de Nîmes’ a ainm, an t-ardchlár clochach, uaireanta rollach, suite idir an Vistrenque – logán Nîmes le taobh Abhainn Vistre – siar ó thuaidh, machairí Gardon agus na Róine soir, agus machaire Camargue ó dheas. Agus sraith de chnoic bheaga ann, síneann an t-ardchlár ón oirthuaisceart go dtí an iardheisceart thar timpeall 40 km agus tá sé thart ar 15 km ar leithead. Dá bhrí sin, tá an limistéar geografach teoranta do chríoch 24 bhardas i roinn Gard.

Aeráid Mheánmhuirí atá ann, le neart gréine (2 700 uair an chloig in aghaidh na bliana ar an meán) agus tréimhse fo-thriomaigh sa samhradh. Bíonn tionchar ag an Mistral ar an aeráid, gaoth fuar thirim, a bhíonn tréan ó thuaidh go minic agus a shéideann síos Gleann na Róine, ach baineann an limistéar tairbhe freisin as leoithní farraige fionnuara ó Camargue in aice láimhe, a scuabann thar an ardchlár trí chomhiompar, toisc go dtéitear an t-aer leis an ithir chlochach agus go n-ardaíonn sé. Méadaíonn éifeacht mhaolaithe na leoithní sin an éagsúlacht idir teochtaí i rith an lae agus i rith na hoíche.

Sa tréimhse Threasach dhéanach agus Cheathartha luath, bhí gréasán d’aibhneacha cumhachtacha in abhantrach na Róine a d’iompair méid suntasach ábhar, a tharlaíonn inniu mar shraitheanna púróg atá fite fuaite le cré dhearg ghainmheach. Is ionann an leibhéal is airde agus, dá bhrí sin, an leibhéal is sine agus formhór an ardchláir agus tugann sé a uathúlacht dó, d’ainneoin mhéid an ardchláir, a bhfuil teideal an ‘léibheann Villeafrancach’ is mó san Eoraip tuillte aige. Bíonn doimhneacht éagsúil san ithir, bíonn sí an-chlochach, agus dearg go céimeanna éagsúla, ag brath ar insíothlú na cré le huisce a ritheann chun srutha. Tá cúlchistí maithe uisce ann (cé nach bhfuil siad iomarcach) a théann go tapa.

8.2.   Faisnéis maidir le cáilíocht agus saintréithe an táirge

Sna 1920idí, chruthaigh táirgeoirí aontas chun limistéar táirgthe fhíonta ‘Costières’ a shainiú. Mar thoradh air sin, iarradh aitheantas mar fhíonta ag a bhfuil an t-ainmniúchán tionscnaimh ‘Fíon teormharcáilte d’ardcháilíocht’ i mí Iúil 1942, agus aitheantas mar ainmniúchán tionscnaimh cláraithe in 1986, faoin ainm ‘Costières du Gard’ ar dtús, agus ó bhí 1989 ann faoin ainm ‘Costières de Nîmes’, i ndiaidh an léibhinn is bonn leis an limistéar geografach.

Mar léiriú ar aistriú idir réigiún Languedoc agus Gleann na Róine, arb é an chuid is faide ó dheas de, cumhdaíonn limistéar an fhíonghoirt thart ar 4 500 ha agus táirgtear ansin 220 000 hl ar an meán, arb ionann é agus fíonta dearga (55 % den táirgeadh), fíonta rosé (40 % den táirgeadh) agus, ar leibhéal níos lú, fíonta geala. Tá na fíonta sin á dtáirgeadh ag 15 chomharchumann fíona agus thart ar chéad siléar faoi úinéireacht phríobháideach.

Díoltar an ceathrú cuid den mhéid a tháirgtear lasmuigh den Fhrainc, agus díoltar beagnach leath de sin lasmuigh den Aontas Eorpach, le Ceanada go príomha.

8.3.   Idirghníomhaíochtaí cúisíocha

Ag baint tairbhe as stair agus suíomh geografach uathúil, ag an aistriú idir dhá chliabhán sibhialtachta i bhfíonóireacht, Languedoc agus Provence, agus cathracha atá sáite sa stair agus sa chultúr, amhail Nîmes, Beaucaire nó Saint-Gilles, ag bun iomairí na hÚgóine, thart air, agus fréamhaithe go daingean sa ghné lena n-aontaítear é, an ‘t-ardán Villeafrancach’, cuireann an t-ardchlár ‘ costière ’ na heilimintí uile ar fáil a lig do dhéantóirí fíona aird a tharraingt ar úrnuacht modha táirgthe atá bunaithe ar shaineolas traidisiúnta agus a fhéachann le cáilíocht an fhíona a bharrfheabhsú.

Tá gnéithe á roinnt leis na tosca nádúrtha a léirítear leis an modh táirgthe seo atá le fáil san acmhainneacht barr a chaomhnaíonn saothróirí fíniúna, go háirithe trí na rialacha maidir le buaint agus iompar an bhairr a leagtar síos sa tsonraíocht táirge.

Tá na dáileachtaí atá críochaithe go sonrach chun na fíonchaora a bhaint suite ar an léibheann, a bhfuil gairbhéal Villeafrancach, ar a dtugtar ‘Gress’ go háitiúil, fite fuaite le maitrís ghainimh. Baineann na dáileachtaí sin leas as na dálaí draenála is fearr agus as an gcoinneáil uisce is fearr a bhuí le stratam créúil, ar a dtugtar ‘Gapans’ go háitiúil, a bheith ann go minic, rud a áirithíonn gur féidir leis na plandaí leanúint de bheith ag fás le linn thréimhsí teo tirime an tsamhraidh.

Stórálann sraith na bpúróg – roinnt méadar ar doimhneacht uaireanta – an teas sa lá agus scaoileann sí san oíche é. Cruthaíonn an t-ardú teochta in aghaidh an lae difríocht teochta, rud a threisíonn an éifeacht chomhiompair agus a tharraingíonn isteach leoithní farraige ón Camargue. Leis an éagsúlacht mhéadaithe teochta sin, ar gné d’aeráid an limistéir gheografaigh í, caomhnaítear úire agus castacht aramatach, agus cuidíonn aeráid the thirim an tsamhraidh leis na fíonchaora aibiú go hiomlán. Le meascán na dtosca nádúrtha sin, mar aon le minicíocht an Mistral, lena n-áirithítear tiúchan mhéid siúcra na bhfíonchaor agus lena gcuirtear teorainn le forbairt galar fungasach, cuirtear le leanúnachas an táirgthe fíona sa limistéar geografach.

Ag baint leas as limistéar dáileachta atá críochaithe go cúramach agus as cineálacha fíonchaor traidisiúnta, athstruchtúraithe, d’éirigh le táirgeoirí úrnuacht a dtáirgthe a chaomhnú trína saineolas comhchoiteann a mhalartú, agus an tráth céanna ligean don indibhidiúlacht a chur in iúl.

Chun íomhá a bhfíonta a fheabhsú tríd an limistéar geografach a chosaint agus feasacht a mhúscailt maidir le cáilíocht a saineolais agus an limistéir fíonghoirt, chun an timpeallacht bheo a bhainistiú tríd an tírdhreach a úsáid mar uirlis chun an limistéar táirgthe a fhorbairt agus a fheabhsú, agus chun na hacmhainní nádúrtha a chaomhnú trí éagsúlacht flóra agus fána a choinneáil ar bun, bhunaigh na comhpháirtithe ábhartha uile Cairt Tírdhreacha agus Chomhshaoil a síníodh an 5 Iúil 2007 agus a aithníodh laistigh de Chairt Idirnáisiúnta Fontevraud i mí an Mhárta 2009.

9.   Coinníollacha fíor-riachtanacha breise (pacáistiú, lipéadú, ceanglais eile)

Limistéar díreach in aice láimhe

Creat dlíthiúil:

Reachtaíocht náisiúnta

Cineál an choinníll breise:

Maolú maidir le táirgeadh sa limistéar geografach críochaithe

Tuairisc ar an gcoinníoll:

Sa limistéar díreach in aice láimhe, arna shainiú ag maolú le haghaidh fhíonóireacht agus tháirgeadh na bhfíonta, cuimsítear críoch na mbardas seo a leanas, bunaithe ar Chód Geografach Oifigiúil 2023:

—

Roinn Bouches-du-Rhône: Arles, Saintes-Maries-de-la-Mer, Tarascon;

—

Roinn Gard: Aigues-Mortes, Aigues-Vives, Aimargues, Boissières, Cabrières, Calmette, Caveirac, Clarensac, Codognan, Collias, Comps, Dions, Estezargues, Fournès, Fourques, Gajan, Langlade, Marguerittes, Montfrin, Nages-et-Solorgues, Parignargues, Poulx, Remoulins, Rouvière, Sainte-Anastasie, Saint-Bonnet-du-Gard, Saint-Gervasy, Saint-Hilaire d’Ozilhan, Saint-Laurent-d’Aigouze, Vergèze, Vers-Pont-du-Gard.

Lipéadú

Creat dlíthiúil:

Reachtaíocht náisiúnta

Cineál an choinníll breise:

Forálacha breise a bhaineann le lipéadú

Tuairisc ar an gcoinníoll:

(a)

Féadfar ainm aonaid gheografaigh níos lú a bheith ar lipéid fíonta atá incháilithe don ainmniúchán tionscnaimh cláraithe, ar choinníoll gurb amhlaidh an méid seo a leanas:

—

is suíomh cláraithe é;

—

tá sé le feiceáil ar an dearbhú buainte.

(b)

Féadfar an t-aonad geografach níos leithne ‘Vignobles de la Vallée du Rhône’ a shonrú ar lipéid fíonta ag a bhfuil an t-ainmniúchán tionscnaimh cláraithe i gcomhréir leis na coinníollacha a shonraítear sa chomhaontú a síníodh idir na comhlachtaí éagsúla cosanta agus bainistíochta lena mbaineann. Ní mór an fhaisnéis sin a bheith sa réimse radhairc céanna leis na mionsonraí sainordaitheacha uile, ní mór í a phriontáil i gcarachtair a bhfuil an dearadh grafach céanna agus an dath céanna orthu agus atá ar an ainmniúchán, agus ní fhéadfaidh siad a bheith níos mó ná dhá thrian de mhéid an ainmniúcháin.

NASC CHUIG AN tsonraíocht TÁIRGE

https://info.agriculture.gouv.fr/gedei/site/bo-agri/document_administratif-6c0260e8-3690-4c85-911c-6e57fdf3b94b


(1)   IO L 9, 11.1.2019, lch. 2.


ELI: http://data.europa.eu/eli/C/2024/6179/oj

ISSN 1977-107X (electronic edition)