—

ag féachaint don iarraidh ar tharscaoileadh dhíolúine Alexis Georgoulis ón Ionchúisitheoir Ginearálta ag Cúirt Achomhairc na Bruiséile i ndáil le himeachtaí coiriúla dar dáta an 7 Iúil 2022 agus arna tarchur ag Seirbhís Phoiblí na Cónaidhme um Ghnóthaí Eachtracha, Trádáil Eachtrach agus Comhar um Fhorbairt i litir dar dáta an 30 Márta 2023 agus a fógraíodh sa suí iomlánach an 17 Aibreán 2023,

—

ag féachaint don fhíoras gur tharscaoil Alexis Georgoulis a cheart chun éisteacht a fháil faoi Airteagal 9(6) dá Rialacha Nós Imeachta,

—

ag féachaint d’Airteagail 8 agus 9 de Phrótacal Uimh. 7 ar Phribhléidí agus Díolúintí an Aontais Eorpaigh agus d’Airteagal 6(2) den Ionstraim maidir le toghadh comhaltaí de Pharlaimint na hEorpa trí vótáil chomhchoiteann dhíreach an 20 Meán Fómhair 1976,

—

ag féachaint do na breithiúnais a thug Cúirt Bhreithiúnais an Aontais Eorpaigh an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019  (1),

—

ag féachaint do Riail 5(2), do Riail 6(1) agus do Riail 9 dá Rialacha Nós Imeachta,

—

ag féachaint don tuarascáil ón gCoiste um Ghnóthaí Dlíthiúla (A9-0202/2023),

A.

de bhrí gur iarr an tIonchúisitheoir Ginearálta ag Cúirt Achomhairc na Bruiséile go ndéanfaí díolúine Alexis Georgoulis, Feisire de Pharlaimint na hEorpa arna thoghadh don Ghréig, a tharscaoileadh i ndáil le cionta coiriúla;

B.

de bhrí gur cionta coiriúla arb ionann iad agus éigniú na gníomhartha a líomhnaítear a rinne Alexis Georgoulis, agus iad aicmithe faoi láthair mar shárú ar iomláine ghnéis dá dtagraítear in Airteagal 417/11 de Chód Coiriúil na Beilge, agus mar ionsaí agus slacairt de réir bhrí Airteagal 398 de Chód Coiriúil na Beilge;

C.

de bhrí nach féidir le Parlaimint na hEorpa ról cúirte a ghlacadh, agus de bhrí nach féidir, i nós imeachta um dhíolúine a tharscaoileadh, Feisire a mheas mar chosantóir (2);

D.

de bhrí nach pribhléid phearsanta de chuid an Fheisire í díolúine pharlaiminteach, ach ráthaíocht ar neamhspleáchas na Parlaiminte ina hiomláine agus a Feisirí, agus de bhrí gurb é is cuspóir do dhíolúine pharlaiminteach an Pharlaimint agus a Feisirí a chosaint ar imeachtaí dlíthiúla i ndáil le gníomhaíochtaí a dhéantar i gcomhlíonadh dualgas parlaiminteach agus nach féidir a scaradh ó na dualgais sin;

E.

de bhrí nach ionann na cionta líomhnaithe agus tuairimí a tugadh nó vótaí a caitheadh i gcomhlíonadh a dhualgas mar Fheisire de Pharlaimint na hEorpa de réir bhrí Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh;

F.

de bhrí, de bhun Airteagal 9 de Phrótacal Uimh. 7 ar Phribhléidí agus Díolúintí an Aontais Eorpaigh, go dteachtann Feisirí de Pharlaimint na hEorpa, i gcríoch a Stáit féin, na díolúintí a thugtar do chomhaltaí pharlaimint a dtíre, agus i gcríoch aon Bhallstáit eile, díolúine ó aon bheart coinneála agus ó aon imeachtaí dlíthiúla; de bhrí nach féidir díolúine a agairt nuair a gheofar Feisire i mbun cion a dhéanamh ná cosc a chur ar cheart Pharlaimint na hEorpa díolúine duine dá Feisirí a tharscaoileadh.

G.

de bhrí gur faoi Pharlaimint na hEorpa amháin atá sé a chinneadh cibé acu a tharscaoilfidh sí nó nach dtarscaoilfidh sí díolúine i gcás ar leith; de bhrí gur féidir le Parlaimint na hEorpa seasamh an Fheisire a chur san áireamh go réasúnach chun a chinneadh cibé acu a dhéanfaidh sí nó nach ndéanfaidh sí a dhíolúine a tharscaoileadh (3); de bhrí gur luaigh Alexis Georgoulis nach bhfuil aon agóid aige i gcoinne tharscaoileadh a dhíolúine parlaimintí;

H.

de bhrí, sa chás sin, nár aimsigh an Pharlaimint aon fhianaise ar fumus persecutionis, is é sin le rá gnéithe fíorasacha a léiríonn gur tionscnaíodh an t-imscrúdú breithiúnach i dtrácht le hintinn damáiste a dhéanamh do ghníomhaíocht pholaitiúil an Fheisire ina cháil mar Fheisire de Pharlaimint na hEorpa;