|
29.8.2008 |
MT |
Il-Ġurnal Uffiċjali ta’ l-Unjoni Ewropea |
L 231/11 |
REGOLAMENT TAL-KUMMISSJONI (KE) Nru 849/2008
tat-28 ta' Awwissu 2008
li jemenda r-Regolament (KE) Nru 3199/93 dwar ir-rikonoxximent reċiproku ta’ proċeduri għall-iżnaturar komplet [denaturazzjoni totali] tal-alkoħol għall-iskopijiet ta' eżenzjoni mit-taxxa tas-sisa
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Direttiva tal-Kunsill 92/83/KEE tad-19 ta' Ottubru 1992 dwar l-armonizzazzjoni tal-istrutturi tat-taxxi tas-sisa fuq l-alkoħol u x-xorb alkoħoliku (1), u b’mod partikolari l-Artikolu 27(4) tagħha,
Billi:
|
(1) |
Ir-Regolament tal-Kummissjoni (KE) Nru 3199/93 (2) jistipula li d-denaturanti li jintużaw f'kull Stat Membru biex l-alkoħol jiġi denaturat kompletament skond l-Artikolu 27(1)(a) tad-Direttiva 92/83/KEE jridu jiġu deskritti fl-Anness ta’ dak ir-Regolament. |
|
(2) |
Skond l-Artikolu 27(1)(a) tad-Direttiva 92/83/KEE, l-Istati Membri għandhom jeżentaw mit-taxxa tas-sisa l-alkoħol li jkun ġie denaturat kompletament skond il-ħtiġijiet ta' kwalunkwe Stat Membru, dejjem jekk dawn il-ħtiġijiet ikunu ġew debitament innotifikati u aċċettati skond il-kundizzjonijiet stipulati fil-paragrafi 3 u 4 ta' dak l-Artikolu. |
|
(3) |
Fil-11 ta’ Settembru 2007, il-Greċja nnotifikat xi tibdiliet fil-proċessi tagħha tal-iżnaturar, awtorizzati mir-Regolament (KE) Nru 3199/93. |
|
(4) |
Il-Kummissjoni bagħtet in-notifika msemmija lill-Istati Membri l-oħra fis-27 ta' Settembru 2007. |
|
(5) |
Billi la l-Kummissjoni u lanqas xi Stat Membru ieħor ma talbu li l-kwistjoni titressaq fil-Kunsill fil-perjodu taż-żmien stipulat, skond l-Artikolu 27(4) tad-Direttiva 92/83/KEE, jitqies li l-Kunsill awtorizza t-tibdiliet imsemmija fil-proċessi tad-denaturazzjoni innotifikati mill-Greċja, b'seħħ mis-27 ta’ Novembru 2007. |
|
(6) |
Għaldaqstant, ir-Regolament (KE) Nru 3199/93 għandu jiġi emendat bix-xieraq. |
|
(7) |
Il-miżuri pprovduti f'dan ir-Regolament huma skond il-fehma tal-Kumitat tat-Taxxi tas-Sisa, |
ADOTTAT DAN IR-REGOLAMENT:
Artikolu 1
Il-paragrafu li jikkonċerna lill-Greċja fl-Anness għar-Regolament (KE) Nru 3199/93 jinbidel b'li ġej:
“Il-Greċja
Alkoħol etiliku ta' kwalità baxxa (id-distillat miksub fil-bidu u fi tmiem il-proċess tad-distillazzjoni), b'saħħa alkoħolika ta' mill-inqas 93 % vol u li ma jaqbiżx 96 % vol, li miegħu jiżdiedu s-sustanzi li ġejjin għal kull ettolitru ta' alkoħol idratat ta' 93 % vol:
|
— |
Metanol: 2 litri |
|
— |
Spirtu tat-terpentina: litru |
|
— |
Pitrolju tal-lampi: 0,5 litru |
|
— |
Metilina blu: 0,40 gramma |
F'temperatura ta' 20 °C, il-prodott aħħari, fil-forma mhux mibdula tiegħu, għandu jilħaq 93 % vol.”
Artikolu 2
Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu fil-Ġurnal Uffiċjali ta' l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, 28 ta’ Awwissu 2008.
Għall-Kummissjoni
László KOVÁCS
Membru tal-Kummissjoni
(1) ĠU L 316, 31.10.1992, p. 21. Id-Direttiva kif emendata l-aħħar bl-Att tal-Adeżjoni tal-2005.
(2) ĠU L 288, 23.11.1993, p. 12. Ir-Regolament kif emendat l-aħħar bir-Regolament (KE) Nru 67/2008 (ĠU L 23, 26.1.2008, p. 13).