(1)

F’konformità mal-Artikolu 17 tad-Direttiva (UE) 2016/797 tal-Parlament Ewropew u tal-Kunsill (2), il-kostitwenti u s-subsistemi tal-interoperabilità li jkunu konformi mal-istandards armonizzati jew ma’ partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, għandhom ikunu preżunti konformi mar-rekwiżiti essenzjali koperti minn dawk l-istandards jew minn partijiet minnhom, stabbiliti f’dik id-Direttiva.

(2)

Bid-Deċiżjoni ta’ Implimentazzjoni tal-Kummissjoni C(2023) 1057 (3), il-Kummissjoni talbet lill-Kumitat Ewropew għall-Istandardizzazzjoni (CEN, European Committee for Standardisation) u lill-Kumitat Ewropew għall-Istandardizzazzjoni Elettroteknika (CENELEC, European Committee for Electrotechnical Standardisation) għall-abbozzar u għar-reviżjoni tal-istandards armonizzati b’appoġġ għad-Direttiva (UE) 2016/797.

(3)

Il-Kummissjoni flimkien mas-CEN u mas-CENELEC ivvalutat jekk l-istandards abbozzati jew riveduti mis-CEN u mis-CENELEC jikkonformawx mat-talba stabbilita fid-Deċiżjoni ta’ Implimentazzjoni C(2023) 1057.

(4)

L-istandards armonizzati abbozzati, riveduti u emendati mis-CEN u mis-CENELEC abbażi tad-Deċiżjoni ta’ Implimentazzjoni C(2023) 1057 jissodisfaw ir-rekwiżiti kollha li għandhom l-għan li jkopru, ħlief l-istandards EN 15313:2024 u EN 16207:2024. Għalhekk, jixraq li r-referenzi ta’ dawk l-istandards jiġu ppubblikati f’Il-Ġurnal Uffiċjali tal-Unjoni Ewropea.

(5)

L-istandard EN 50716:2023 jenħtieġ li jagħti, fil-limiti tal-kamp ta’ applikazzjoni tiegħu, preżunzjoni ta’ konformità ma’ ċerti rekwiżiti tar-Regolament tal-Kummissjoni (UE) 2016/919 (4) sa fejn japplika l-Artikolu 14 tar-Regolament ta’ Implimentazzjoni tal-Kummissjoni (UE) 2023/1695 (5). Għalhekk, jixraq li r-referenzi ta’ dak l-istandard jiġu ppubblikati f’Il-Ġurnal Uffiċjali tal-Unjoni Ewropea.

(6)

Fir-rigward tal-istandard EN 16207:2024, il-Kummissjoni kkonkludiet li fir-rigward tar-Regolament (UE) Nru 1302/2014, jenħtieġ li l-istandard jagħti biss preżunzjoni ta’ konformità għall-punti 4.2.4.8.2 (2) u (4) tal-Anness ta’ dak ir-Regolament skont l-Anness ZA tal-istandard, u għall-punt 4.2.4.8.2 (1) billi tiġi applikata l-klawżola 8.1 tal-istandard. Għalhekk, jixraq li r-referenza ta’ dan l-istandard tiġi ppubblikata b’restrizzjonijiet f’Il-Ġurnal Uffiċjali tal-Unjoni Ewropea.

(7)

Fir-rigward tal-istandard EN 15313:2024, il-Kummissjoni kkonkludiet li fir-rigward tal-punti 4.2.3.5.2.1 u 4.2.3.5.2.2 tal-Anness tar-Regolament (UE) Nru 1302/2014 u l-punti 4.2.3.6.2 sa 4.2.3.6.5 tal-Anness tar-Regolament (UE) Nru 321/2013, it-tolleranzi mogħtija mill-istandard jenħtieġ li ma jiġux akkumulati mal-valuri mogħtija fil-punti msemmija qabel, il-valuri f’dawk il-punti jenħtieġ li jitqiesu bħala valuri ta’ limitu. Għalhekk, jixraq li r-referenza ta’ dan l-istandard tiġi ppubblikata b’restrizzjonijiet f’Il-Ġurnal Uffiċjali tal-Unjoni Ewropea.

(8)

Għalhekk, jenħtieġ li d-Deċiżjoni ta’ Implimentazzjoni tal-Kummissjoni (UE) 2023/2584 (6) tiġi emendata kif xieraq.

(9)

Il-konformità ma’ standard armonizzat tikkonferixxi preżunzjoni ta’ konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fid-data tal-pubblikazzjoni tagħha. Madankollu, biex il-partijiet ikkonċernati kollha milquta jingħataw biżżejjed żmien biex iħejju għall-applikazzjoni tal-istandards riveduti, l-irtirar tar-referenzi tal-istandards armonizzati EN 14587-2:2009, EN 15313:2016, EN 15355:2019, EN 15624:2021, EN 16116-2:2021, EN 16286-1:2013, EN 45545-3:2013 u EN 45545-4:2013 jenħtieġ li jiġi differit bi 18-il xahar mid-data tad-dħul fis-seħħ ta’ din id-Deċiżjoni,