Eagrán sealadach
BREITHIÚNAS NA CÚIRTE (an tOchtú Dlísheomra)
8 Bealtaine 2025 (*)
(Tarchur chun réamhrialú – Cánachas – Comhchóras cánach breisluacha (CBL) – Treoir 2006/112/CE – Airteagal 143(1)(b) – Díolúintí ar allmhairiú – Treoir 2006/79/CE – Allmhairí coinsíneachtaí beaga d’earraí de chineál neamhthráchtála ó thríú tíortha – Coinsíní atá ina chónaí i mBallstát seachas an Ballstát allmhairiúcháin)
I gCás C‑405/24,
IARRAIDH ar réamhrialú faoi Airteagal 267 CFAE ón Naczelny Sąd Administracyjny (an Chúirt Riaracháin Uachtarach, an Pholainn), trí bhreith an 26 Márta 2024, a fuarthas ag an gCúirt an 11 Meitheamh 2024, sna himeachtaí
L. s.c.
v
Dyrektor Krajowej Informacji Skarbowej,
páirtí leasmhar:
Rzecznik Małych i Średnich Przedsiębiorców,
tugann AN CHÚIRT (an tOchtú Dlísheomra),
agus í comhdhéanta mar seo a leanas: S. Rodin, Uachtarán an Dlísheomra, O. Spineanu-Matei agus N. Fenger (Rapóirtéir), Breithiúna,
Abhcóide Ginearálta: J. Kokott,
Cláraitheoir: A. Calot Escobar,
ag féachaint don nós imeachta ó bhéal,
tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:
– Dyrektor Krajowej Informacji Skarbowej, ag M. Kowalewska, K. Nowicka agus T. Tratkiewicz,
– Rialtas na Polainne, ag B. Majczyna, i gcáil Gníomhaire,
– an Coimisiún Eorpach, ag Ł. Habiak agus Herold, i gcáil Gníomhairí,
tar éis cinneadh a dhéanamh, tar éis di an tAbhcóide Ginearálta a éisteacht, breithiúnas a thabhairt ar an gcás gan Tuairim,
an Breithiúnas seo a leanas:
Breithiúnas
1 Baineann an iarraidh ar réamhrialú le léiriú ar Airteagal 143(1)(b) de Threoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (IO 2006 L 347, lch. 1), arna leasú le Treoir 2009/69/CE ón gComhairle an 25 Meitheamh 2009 (IO 2009 L 175, lch. 12) (‘Treoir 2006/112’) agus ar Airteagal 1 de Threoir 2006/79/CE ón gComhairle an 5 Deireadh Fómhair 2006 maidir leis an díolúine ó chánacha ar allmhairí coinsíneachtaí beaga d’earraí de chineál neamhthráchtála ó thríú tíortha (IO 2006 L 286, lch. 15).
2 Rinneadh an iarraidh seo in imeachtaí idir L. s.c. agus Dyrektor Krajowej Informacji Skarbowej (Stiúrthóir um Fhaisnéis Cánach Náisiúnta, an Pholainn) (‘an t‑údarás cánach’) maidir le dlíthiúlacht rialú cánach dar dáta an 22 Feabhra 2019.
An dlí lena mbaineann
Dlí an Aontais Eorpaigh
Treoir 78/1035/CEE
3 Foráladh le hAirteagal 1(1) de Threoir 78/1035/CEE ón gComhairle an 19 Nollaig 1978 maidir leis an díolúine ó chánacha ar allmhairí coinsíneachtaí beaga d’earraí de chineál neamhthráchtála ó thríú tíortha (IO 1978 L 366, lch. 34),
‘Beidh earraí atá i gcoinsíneachtaí beaga neamh-thráchtála arna seoladh ó thríú tír ag duine príobháideach chuig duine príobháideach eile i mBallstát díolmhaithe ó cháin láimhdeachais agus ó dhleacht mháil ar allmhairiú.’
[Aistriúchán neamhoifigiúil]
Rialachán (CEE) Uimh. 918/83
4 Foráladh leis an gcéad fhomhír d’Airteagal 29(1) de Rialachán (CEE) Uimh. 918/83 ón gComhairle an 28 Márta 1983 lena mbunaítear Córas Comhphobail do dhíolúine ó dhleacht chustaim (IO 1983 L 105, lch. 1):
‘Faoi réir Airteagail 30 agus 31, ligfear isteach earraí i gcoinsíneachtaí beaga neamh-thráchtála arna seoladh ó thríú tír ag duine príobháideach chuig duine príobháideach eile i gcríoch chustaim [Chomhphobal Eacnamaíochta na hEorpa].’
[Aistriúchán neamhoifigiúil]
Treoir 2006/79
5 Foráiltear in aithris 3 de Threoir 2006/79 mar seo a leanas:
‘Chuige sin, ba cheart, ar chúiseanna praiticiúla, gurb ionann na teorainneacha faoina gcuirfear díolúine den sórt sin i bhfeidhm, a mhéid is féidir agus na teorainneacha a leagtar síos do chóras Comhphobail do dhíolúine ó dhleacht chustaim i Rialachán [Uimh. 918/83].’
[Aistriúchán neamhoifigiúil]
6 Foráiltear le hAirteagal 1 den Treoir sin:
‘1. Beidh earraí atá i gcoinsíneachtaí beaga neamh-thráchtála arna seoladh ó thríú tíortha ag duine príobháideach chuig duine príobháideach eile i mBallstát díolmhaithe ó cháin láimhdeachais agus ó dhleacht mháil ar allmhairiú.
2. Chun críocha mhír 1, is éard a thuigfear ó ‘choinsíneachtaí beaga neamh-thráchtála’ ná coinsíneachtaí:
a) ar ócáidí;
b) nach bhfuil iontu ach earraí atá beartaithe d’úsáid phearsanta nó teaghlaigh na gcoinsínithe, nach dtugtar le fios le cineál nó le cainníocht na n‑earraí sin go bhfuil siad á n‑allmhairiú chun aon chríche tráchtála;
c) a bhfuil earraí iontu nach mó a luach iomlán ná 45 [euro];
d) a sheolfaidh an coinsíneoir chuig an gcoinsíní saor ó aon chineál íocaíochta.’
[Aistriúchán neamhoifigiúil]
Treoir 2006/112
7 Foráiltear le hAirteagal 32 de Threoir 2006/112:
‘I gcás gurb é an soláthraí, nó an custaiméir, nó tríú duine a sheolann nó a iompraíonn na hearraí, measfar gurb é áit an tsoláthair an áit a bhfuil na hearraí suite nuair a chuirtear tús leis an seoladh nó leis an iompar earraí chuig an gcustaiméir.
Má chuirtear tús le seoladh nó le hiompar na n‑earraí i dtríú críoch nó i dtríú tír, áfach, measfar gur laistigh de Bhallstát allmhairithe na n‑earraí a bheidh áit an tsoláthair ag an allmhaireoir atá ainmnithe nó sainaitheanta de réir Airteagal 201 mar dhuine inchánach atá faoi dhliteanas i leith CBL a íoc agus áit aon soláthair ina dhiaidh sin.’
[Aistriúchán neamhoifigiúil]
8 Is mar seo a leanas atá an fhoclaíocht in Airteagal 86(1) den Treoir sin:
‘Áireofar ar an méid inchánach na gnéithe seo a leanas, sa mhéid nár áiríodh iad roimhe seo:
[...]
b) caiteachas teagmhasach, mar chostais choimisiúin, phacála, iompair agus árachais, a toibhíodh chomh fada leis an gcéad cheann scríbe laistigh de chríoch an Bhallstáit allmhairithe maille leo siúd a thagann mar thoradh ar iompar ó cheann scríbe éigin eile laistigh den Chomhphobal, má táthar ar an eolas faoin áit eile sin nuair a tharlaíonn an teagmhas inmhuirearaithe.’
[Aistriúchán neamhoifigiúil]
9 Foráiltear le hAirteagal 143(1) den Treoir sin:
‘Déanfaidh na Ballstáit na hidirbhearta seo a leanas a dhíolmhú:
[...]
b) allmhairiú deiridh earraí a rialaítear le Treoracha [...] [2006/79] ;
[...]’
[Aistriúchán neamhoifigiúil]
10 De réir Airteagal 163 de Threoir 2006/112:
‘Má scoireann na hearraí de bheith cumhdaithe leis na socruithe nó na cásanna dá dtagraítear sa Roinn seo, ar dá bharr a dhéanfar allmhairiú chun críocha Airteagal 61, glacfaidh an Ballstát allmhairithe gach beart is gá chun an cánachas dúbailte a chosc.’
Rialachán (CE) Uimh. 1186/2009
11 Foráladh leis an gcéad fhomhír d’Airteagal 25(1) de Rialachán (CE) Uimh. 1186/2009 ón gComhairle an 16 Samhain 2009 lena mbunaítear Córas Comhphobail do dhíolúine ó dhleacht chustaim (IO 2009 L 324, lch. 23):
‘Faoi réir Airteagail 26 agus 27, ligfear isteach, saor ó dhleachtanna ar allmhairí, earraí i gcoinsíneachtaí arna seoladh ag duine príobháideach ó thríú tír chuig duine príobháideach eile a chónaíonn i gcríoch chustaim an Chomhphobail, ar choinníoll nach de chineál tráchtála iad na hallmhairí sin.’
[Aistriúchán neamhoifigiúil]
12 De réir Airteagal 133(1) den Rialachán sin:
‘Aisghairtear Rialachán (CEE) Uimh. 918/83, arna leasú leis na gníomhartha a liostaítear in Iarscríbhinn V.’
[Aistriúchán neamhoifigiúil]
Dlí na Polainne
13 Foráiltear le hAirteagal 2(1) den ustawa o podatku od towarów i usług (Dlí maidir le cáin ar earraí agus seirbhísí) an 11 Márta 2004 (Dz. U. de 2018, mír 2174), sa leagan is infheidhme maidir leis an díospóid sna príomhimeachtaí (‘an Dlí maidir le CBL’):
‘Chun críocha na bhforálacha seo a leanas, ciallóidh “críoch náisiúnta” críoch Phoblacht na Polainne, faoi réir Airteagal 2a.’
14 Foráiltear le hAirteagal 52(1) den Dlí maidir le CBL mar seo a leanas:
‘Beidh allmhairiú earraí i gcoinsíneacht, faoi réir mhír 2, arna seoladh ó chríoch tríú tír ag duine príobháideach chuig duine príobháideach atá ina chónaí i gcríoch náisiúnta, díolmhaithe má chomhlíontar na coinníollacha seo a leanas:
1. nach léiríonn cainníocht agus cineál na n‑earraí aon intinn chun críche tráchtála;
2. nach gceanglaítear ar an gcoinsíní aon táille a íoc leis an gcoinsíneoir i ndáil leis an gcoinsíneacht a fháil;
3. gur de chineál ócáideach iad na coinsíneachtaí.’
An díospóid sna príomhimeachtaí agus an cheist a tharchuirtear le haghaidh réamhrialú
15 Is cuideachta é L. a sholáthraíonn seirbhísí seolta agus imréitigh custaim earraí.
16 Chuir an chuideachta sin iarratas ar rialú cánach faoi bhráid an údaráis cánach chun a chinneadh an féidir allmhairiú earraí i gcoinsíneacht idir daoine príobháideacha a dhíolmhú ó cháin bhreisluacha (CBL) faoi Airteagal 52 den Dlí maidir le CBL i gcás ina bhfuil coinsíní na coinsíneachta sin i mBallstát seachas Poblacht na Polainne.
17 Le rialú cánach an 22 Feabhra 2019, bhí an t‑údarás cánach den tuairim nár tháinig an cás, mar a chuir L. síos air ina iarratas, faoin díolúine dá bhforáiltear in Airteagal 52 den Dlí maidir le CBL, ar an bhforas nach bhfuil feidhm ag an díolúine sin maidir le hallmhairiú earraí atá beartaithe do dhuine nádúrtha i mBallstát seachas Poblacht na Polainne isteach sa Pholainn.
18 Thug L. caingean i gcoinne an rialaithe cánach sin os comhair an Wojewódzki Sąd Administracyjny w Warszawie (an Chúirt Réigiúnach Riaracháin, Vársá, an Pholainn).
19 Le breithiúnas an 12 Nollaig 2019, dhíbh an chúirt sin an chaingean sin. Chinn sí gur léir ó Airteagal 143(1)(b) de Threoir 2006/112 agus ó Airteagal 52 den Dlí maidir le CBL nach bhfuil feidhm ag an díolúine ó CBL atá i gceist ach amháin i gcás atá an choinsíneacht le seoladh chuig duine príobháideach atá ina chónaí sa Bhallstát ina n‑allmhairítear na hearraí.
20 Rinne L. achomharc ar phointe dlí i gcoinne an bhreithiúnais sin os comhair an Naczelny Sąd Administracyjny (an Chúirt Uachtarach Riaracháin, an Pholainn), arb í an chúirt a rinne an tarchur í.
21 Measann an chúirt sin go bhféadfaí a mheas, i bhfianaise bhreithiúnas an 2 Iúil 2009, Har Vaessen Douane Service (C 7/08, EU:C:2009:417), nach bhfuil aon tionchar ag an bhfíoras gur tháinig na hearraí allmhairithe isteach i gcríoch an Aontais trí Bhallstát seachas an Ballstát ina bhfuil a gcoinsíní lonnaithe ar dhíolúine na n‑earraí ó CBL. Dá réir sin, ba cheart coinsíneachtaí earraí ar luach diomaibhseach arna seoladh ó thríú tír chuig duine príobháideach san Aontas a dhíolmhú.
22 Is léir ó chásdlí na Polainne, áfach, nach bhfuil feidhm ag an díolúine ó CBL dá bhforáiltear in Airteagal 52 den Dlí maidir le CBL maidir le hallmhairiú earraí chuig duine príobháideach a bhfuil cónaí air i gcríoch Ballstáit seachas Poblacht na Polainne. De réir an chásdlí sin, ní mór a mheas go ndéantar idirdhealú le forálacha Threoir 2006/79 de réir áit chónaithe choinsíní deiridh na n‑earraí, ar choinníoll gur ‘Ballstát’ í an áit allmhairiúcháin dá dtagraítear. Dá bhrí sin, tá nasc idir forchur cánach ar allmhairiú earraí agus an díolúine ó CBL ar an allmhairiú sin le haghaidh coinsíneachtaí beaga neamh-thráchtála idir daoine príobháideacha agus áit chónaithe choinsíní deiridh na n‑earraí.
23 Sna himthosca sin, chinn an Högsta förvaltningsdomstolen (an Chúirt Riaracháin Uachtarach) bac a chur ar na himeachtaí agus an cheist seo a leanas a tharchur chuig an gCúirt Bhreithiúnais le haghaidh réamhrialú:
‘An gcuirtear cosc le hAirteagal 143(1)(b) de Threoir [2006/112] agus Airteagal 1 de Threoir [2006/79], i gcomhthéacs aithris (3) de Threoir 2006/79 agus Airteagal 25 de Rialachán [Uimh. 1186/2009] ar reachtaíocht amhail Airteagal 52(1) den [Dlí maidir le CBL], ar dá réir nach mbaineann díoluine CBL le hallmhairiú earraí atá i [gcoinsíneacht] arna sheoladh ó chríoch tríú tír ag duine [príobháideach] chuig duine [príobháideach] atá ina chónaí i gcríoch Bhallstát an Aontais Eorpaigh seachas críoch na tíre ina ndéantar an t‑allmhairiú?’
An cheist a tharchuirtear
24 Lena ceist, fiafraíonn an chúirt a rinne an tarchur, go bunúsach, an gcaithfear Airteagal 143(1)(b) de Threoir 2006/112 agus Airteagal 1 de Threoir 2006/79 a léiriú sa chaoi go gcuirtear cosc leo ar reachtaíocht Ballstáit lena n‑eisiatar coinsíneachtaí beaga neamh-thráchtála ó thríú tír, arna seoladh ag duine príobháideach chuig duine príobháideach a chónaíonn i mBallstát eile ón díolúine ó CBL dá bhforáiltear sna forálacha sin.
25 Is léir ó Airteagal 143(1)(b) de Threoir 2006/112 go ndíolmhóidh na Ballstáit allmhairiú deiridh earraí a rialaítear le Treoir 2006/79 go háirithe.
26 Foráiltear le hAirteagal 1(1) de Threoir 2006/79 go mbeidh coinsínithe beaga earraí neamh-thráchtála arna seoladh ó thríú tíortha ag duine príobháideach chuig duine príobháideach eile i mBallstát díolmhaithe ó cháin láimhdeachais agus ó dhleacht mháil ar allmhairiú.
27 Chun an cheist a tarchuireadh a fhreagairt, is gá a chinneadh an bhfuil feidhm ag an díolúine ó CBL dá bhforáiltear sna forálacha sin maidir le coinsíneachtaí arna seoladh chuig daoine príobháideacha a chónaíonn sa Bhallstát allmhairiúcháin amháin nó an bhfuil feidhm aici maidir le coinsíneachtaí arna seoladh chuig daoine príobháideacha i ngach Ballstát, lena n‑áirítear Ballstát seachas an Ballstát allmhairiúcháin.
28 De réir chásdlí socair na Cúirte, d’fhonn foráil de dhlí an Aontais a léiriú, chun críche foráil de dhlí an Aontais a léiriú, ní mór ní hamháin foclaíocht na forála sin a mheas, ach freisin a comhthéacs agus na cuspóirí a shaothraítear sna rialacha ar cuid díobh í (féach, chuige sin, breithiúnas an 14 Bealtaine 2024, Stachev, C‑15/24 PPU, EU:C:2024:399, mír 72 agus an cásdlí dá dtagraítear).
29 Sa chéad áit, maidir le foclaíocht na bhforálacha a bhfuil a léiriú á lorg ag an gcúirt a rinne an tarchur ina dtaobh, ba cheart a thabhairt faoi deara go dtagraítear go sainráite in Airteagal 143(1)(b) de Threoir 2006/112 do na díolúintí ó CBL dá bhforáiltear, inter alia, le Treoir 2006/79.
30 Sonraítear in Airteagal 1(1) den Treoir sin go bhfuil feidhm ag an díolúine dá bhforáiltear inti ar choinsíneachtaí beaga neamh-thráchtála arna seoladh chuig duine príobháideach i mBallstát.
31 Ba cheart a thabhairt faoi deara, i ndáil leis sin, go n‑úsáidtear na téarmaí ‘Ballstát’ sa leagan Polainnise den fhoráil sin gan soiléiriú breise a thabhairt. Ina theannta sin, sna leaganacha Spáinnise, Danmhairgise, Gearmáinise, Béarla, Fraincise, Iodáilise, Ollainnise, Rómáinise agus Sualainnise den fhoráil sin, go háirithe, cuirtear airteagal éiginnte roimh na téarmaí sin.
32 Ós rud é nach dtagraítear in Airteagal 1(1) de Threoir 2006/79 do Bhallstát sonrach agus nach luaitear an Ballstát allmhairiúcháin go háirithe, tugtar le fios le foclaíocht na forála sin go bhfuil feidhm ag an díolúine ó CBL dá bhforáiltear san fhoráil sin ar choinsíneachtaí arna seoladh chuig duine príobháideach in aon cheann de na Ballstáit.
33 Sa dara háit, maidir le comhthéacs Airteagal 143(1)(b) de Threoir 2006/112 agus Airteagal 1(1) de Threoir 2006/79, ba cheart a thabhairt faoi deara, ar an gcéad dul síos, go raibh an tagairt do choinsíneachtaí arna seoladh chuig duine príobháideach i mBallstát le fáil cheana féin in Airteagal 1(1) de Threoir 78/1035, a fhreagraíonn d’Airteagal 1(1) de Threoir 2006/79 agus in Airteagal 1(1) den Togra le haghaidh Treoir ón gComhairle maidir leis an díolúine ó chánacha ar allmhairí coinsíneachtaí beaga d’earraí de chineál neamhthráchtála ó thríú tíortha (IO 1975 C 18, lch. 6).
34 Is léir ó na travaux préparatoires de Threoir 78/1035, a aisghaireadh agus ar cuireadh Treoir 2006/79 ina hionad, i gcomhréir le hAirteagal 6 de Threoir 2006/79, nárbh é mian reachtas an Aontais cur i bhfeidhm na díolúine ó CBL do choinsíneachtaí beaga neamh-thráchtála a chur faoi réir coinníoll a bhaineann le ceann scríbe sonrach na coinsíneachta lena mbaineann laistigh den Aontas. Leanann sé ón meabhrán míniúcháin a ghabhann leis an togra sin gurbh é an cuspóir a bhí leis foráil a dhéanamh go mbeadh coinsíneachtaí ar luach íseal arna seoladh ag duine príobháideach i dtríú tír chuig duine príobháideach eile san Aontas díolmhaithe ó cháin ar allmhairiú, ar choinníoll go gcomhlíonann na hearraí lena mbaineann roinnt coinníollacha.
35 Ina dhiaidh sin, luaitear in aithris 3 de Threoir 2006/79, gur cheart, ar chúiseanna praiticiúla, na teorainneacha ar dá réir atá an díolúine ó CBL ar allmhairiú coinsíneachtaí beaga neamh-thráchtála ó thríú tíortha le cur i bhfeidhm, a bheith mar an gcéanna, a mhéid is féidir, leis na teorainneacha a leagtar síos le haghaidh díolúintí ó dhleachtanna ar allmhairí le Rialachán Uimh. 918/83.
36 I ndáil leis sin, ba cheart a thabhairt faoi deara gur foráladh le hAirteagal 29(1) den Rialachán sin, a bhfuil a fhoclaíocht atáirgthe, go bunúsach, in Airteagal 25 de Rialachán Uimh. 1186/2009, do dhíolúine ó dhleachtanna allmhairiúcháin do choinsíneachtaí a bhfuil saintréithe acu atá cosúil leis na coinsíneachtaí sin dá dtagraítear in Airteagal 1(1) de Threoir 78/1035 agus ar choinníoll go raibh feidhm ag an díolúine sin maidir le coinsíneachtaí arna seoladh chuig duine príobháideach i gcríoch chustaim an Aontais, gan tagairt do Bhallstát áirithe.
37 Ar deireadh, i gcontrárthacht le hAirteagal 1(1) de Threoir 2006/79, luaitear an Ballstát allmhairiúcháin go sainráite i bhforálacha eile de Threoir 2006/112, amhail Airteagail 32, 86 agus 163.
38 Sa tríú háit, maidir le cuspóir na díolúine ó CBL dá bhforáiltear in Airteagal 143(1)(b) de Threoir 2006/112 agus in Airteagal 1 de Threoir 2006/79, is léir ón meabhrán míniúcháin a ghabhann leis an togra dá dtagraítear i mír 34 den bhreithiúnas seo go raibh sé de chuspóir ag Treoir 78/1035, a aisghaireadh agus ar cuireadh Treoir 2006/79 ina hionad, maolú a dhéanamh ar an gcóras is infheidhme maidir le coinsíneachtaí beaga neamh-thráchtála ó thríú tíortha idir daoine príobháideacha, ós rud é, go bunúsach, gur coinsíneachtaí mothúchánacha iad na coinsíneachtaí sin, nach raibh ach luach íseal acu agus a bhí faoi réir cáin, i bprionsabal, cheana féin i dtír an tseolta. Chuige sin, níl aon difríocht idir earraí i gcoinsíneachtaí neamh-thráchtála arna seoladh ag duine príobháideach ó thríú tíortha chuig duine príobháideach eile, de réir Bhallstát cónaithe choinsíní na coinsíneachta.
39 Dá bhrí sin, ní hamháin go leanann sé ó léiriú litriúil ach freisin ó léiriú comhthéacsúil agus teileolaíoch ar Airteagal 143(1)(b) de Threoir 2006/112 agus ar Airteagal 1 de Threoir 2006/79 go bhfuil feidhm ag an díolúine ó CBL dá bhforáiltear sna forálacha sin beag beann ar an bhfíoras go bhfuil cónaí ar choinsíní na coinsíneachta sa Bhallstát allmhairiúcháin nó i mBallstát eile.
40 I bhfianaise na mbreithnithe roimhe seo, is é an freagra ar an gceist a tarchuireadh ná go gcaithfear Airteagal 143(1)(b) de Threoir 2006/112 agus Airteagal 1 de Threoir 2006/79 a léiriú sa chaoi go gcuirtear cosc leo ar reachtaíocht Ballstáit lena n‑eisiatar coinsíneachtaí beaga neamh-thráchtála ó thríú tír, arna seoladh ag duine príobháideach chuig duine príobháideach a chónaíonn i mBallstát eile ón díolúine ó CBL dá bhforáiltear sna forálacha sin.
Costais
41 Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte náisiúnta, baineann ceist na gcostas leis an gcúirt sin. Níl na costais a tabhaíodh trí bharúlacha a cuireadh faoi bhráid na Cúirte Breithiúnais, seachas costais na bpáirtithe sin, inghnóthaithe.
Ar na forais sin, rialaíonn an Chúirt (an tOchtú Dlísheomra) mar seo a leanas:
Maidir le hAirteagal 143(1)(b) de Threoir 2006/112/CE ón gComhairle an 28 Samhain 2006 maidir leis an gcóras comhchoiteann cánach breisluacha, arna leasú le Treoir 2009/69/CE ón gComhairle an 25 Meitheamh 2009 agus Airteagal 1 de Threoir 2006/79/CE ón gComhairle an 5 Deireadh Fómhair 2006 maidir leis an díolúine ó chánacha ar allmhairí coinsíneachtaí beaga d’earraí de chineál neamhthráchtála ó thríú tíortha,
ní mór léiriú a dhéanamh mar seo a leanas:
cuirtear cosc leo ar reachtaíocht Ballstáit lena n‑eisiatar coinsíneachtaí beaga neamh-thráchtála ó thríú tír, arna seoladh ag duine príobháideach chuig duine príobháideach a chónaíonn i mBallstát eile ón díolúine ó CBL dá bhforáiltear sna forálacha sin.
Sínithe
* Teanga an cháis: an Pholainnis.