L_202402601GA.000101.fmx.xml

PRÓTACAL BREISE A GHABHANN LEIS AN gCOMHAONTÚ IDIR COMHPHOBAL EACNAMAÍOCHTA NA hEORPA AGUS POBLACHT NA hÍOSLAINNE

TÁ AN tAONTAS EORPACH

agus

AN ÍOSLAINN

AG FÉACHAINT don Chomhaontú idir Comhphobal Eacnamaíochta na hEorpa agus Poblacht na hÍoslainne a síníodh an 22 Iúil 1972, agus do na socruithe atá ann cheana le haghaidh trádáil in iasc agus i dtáirgí iascaigh idir an Íoslainn agus an Comhphobal,

AG FÉACHAINT don Phrótacal Breise a ghabhann leis an gComhaontú idir Comhphobal Eacnamaíochta na hEorpa agus an Íoslainn maidir le forálacha speisialta is infheidhme le haghaidh na tréimhse 2014-2021 maidir le hallmhairí éisc agus táirgí iascaigh áirithe isteach san Aontas, agus go háirithe d’Airteagal 1 den Phrótacal sin,

TAR ÉIS A CHINNEADH AN PRÓTACAL SEO A THABHAIRT I gCRÍCH:

AIRTEAGAL 1

1. Leagtar síos sa Phrótacal seo agus san Iarscríbhinn a ghabhann leis na forálacha speisialta is infheidhme maidir le hallmhairí éisc agus táirgí iascaigh áirithe de thionscnamh na hÍoslainne isteach san Aontas Eorpach. Leagtar amach na taraif-chuótaí bliantúla saor ó dhleacht san Iarscríbhinn a ghabhann leis an bPrótacal seo. Beidh feidhm ag na taraif-chuótaí sin ón lá a bheidh éifeacht le cur i bhfeidhm sealadach an Phrótacail seo, de réir na nósanna imeachta a leagtar síos i mír 3 d’Airteagal 4, go dtí an 30 Aibreán 2028.

2. Ag deireadh na tréimhse sin, déanfaidh na Páirtithe Conarthacha measúnú ar an ngá a bheadh ann na forálacha speisialta dá dtagraítear i mír 1 a choinneáil ar bun, agus, más gá, déanfaidh siad athbhreithniú ar leibhéal na gcuótaí agus na leasanna ábhartha uile á gcur san áireamh an tráth céanna.

AIRTEAGAL 2

1. Cuirfear tús leis na taraif-chuótaí an lá a bheidh éifeacht le cur i bhfeidhm sealadach an Phrótacail seo, de réir na nósanna imeachta a leagtar síos i mír 3 d’Airteagal 4.

2. Leagtar amach méideanna na dtaraif-chuótaí san Iarscríbhinn a ghabhann leis an bPrótacal seo. Beidh an chéad taraif-chuóta ar fáil ó dháta chur i bhfeidhm sealadach an Phrótacail seo go dtí an 30 Aibreán 2024. Ón 1 Bealtaine 2024 ar aghaidh, leithdháilfear taraif-chuótaí ina dhiaidh sin go bliantúil ón 1 Bealtaine go dtí an 30 Aibreán go dtí deireadh na tréimhse dá dtagraítear in Airteagal 1 den Phrótacal seo.

3. Maidir le méideanna na dtaraif-chuótaí lena gcumhdaítear an tréimhse ón 1 Bealtaine 2021 go dtí go gcuirfear an Prótacal seo i bhfeidhm go sealadach, déanfar iad a leithdháileadh go comhréireach agus a chur ar fáil don chuid eile den tréimhse dá dtagraítear in Airteagal 1 den Phrótacal seo.

4. I gcás nach n-ídeofar na taraif-chuótaí dá dtagraítear in Airteagal 1 le linn na tréimhse dá dtagraítear in Airteagal 1, agus i gcás nach gcuirfear i bhfeidhm go sealadach prótacal ina dhiaidh sin lena mbunaítear taraif-chuótaí saor ó dhleacht le haghaidh na dtáirgí céanna, féadfar allmhairí ón Íoslainn a dhéanamh le haghaidh an mhéid cuótaí comhiomlánaithe atá fágtha de na taraif-chuótaí sin suas le 2 bhliain tar éis dheireadh na tréimhse dá dtagraítear in Airteagal 1, ach ní féidir sin a dhéanamh ar feadh tréimhse níos faide ná tréimhse cur i bhfeidhm sealadach prótacail ina dhiaidh sin lena mbunaítear taraif-chuótaí saor ó dhleacht i gcás na dtáirgí céanna.

Airteagal 3

Is iad na rialacha tionscnaimh is infheidhme maidir leis na taraif-chuótaí a liostaítear san Iarscríbhinn a ghabhann leis an bPrótacal seo na rialacha a leagtar amach i bPrótacal 3 a ghabhann leis an gComhaontú idir Comhphobal Eacnamaíochta na hEorpa agus an Íoslainn a síníodh an 22 Iúil 1972.

AIRTEAGAL 4

1. Déanfaidh na Páirtithe an Prótacal seo a dhaingniú nó a fhormheas i gcomhréir lena nósanna imeachta féin. Taiscfear na hionstraimí daingniúcháin nó formheasa le hArdrúnaíocht Chomhairle an Aontais Eorpaigh.

2. Tiocfaidh an Comhaontú i bhfeidhm an chéad lá den dara mí tar éis thaisceadh na hionstraime daingniúcháin nó formheasa deiridh.

3. Go dtí go gcuirfear i gcrích na nósanna imeachta dá dtagraítear i míreanna 1 agus 2, cuirfear an Prótacal seo i bhfeidhm ar bhonn sealadach ón gcéad lá den tríú mí tar éis thaisceadh an fhógra deiridh chuige sin.

AIRTEAGAL 5

Déanfar an Comhaontú seo, arna tharraingt suas i scríbhinn bhunaidh amháin sa Bhéarla, sa Bhulgáiris, sa Chróitis, sa Danmhairgis, san Eastóinis, san Fhionlainnis, sa Fhraincis, sa Ghaeilge, sa Ghearmáinis, sa Ghréigis, san Iodáilis, sa Laitvis, sa Liotuáinis, sa Mháltais, san Ollainnis, sa Pholainnis, sa Phortaingéilis, sa Rómáinis, sa tSeicis, sa tSlóivéinis, sa tSlóvaicis, sa Spáinnis, sa tSualainnis, san Ungáiris agus san Íoslainnis, agus comhúdarás ag an téacs i ngach ceann de na teangacha sin., a thaisceadh le hArdrúnaíocht Chomhairle an Aontais Eorpaigh agus cuirfidh sí cóip dheimhnithe chuig gach ceann de na Páirtithe.

IARSCRÍBHINN

FORÁLACHA SPEISIALTA DÁ dTAGRAÍTEAR IN AIRTEAGAL 1 DEN PHRÓTACAL

De bhreis ar na taraif-chuótaí buana saor ó dhleacht atá ann cheana, osclóidh an tAontas Eorpach na taraif-chuótaí bliantúla saor ó dhleacht seo a leanas le haghaidh táirgí de thionscnamh na hÍoslainne:

Cód AC	Tuairisc ar tháirgí	Méid bliantúil an taraif-chuóta (1.5-30.4) ina ghlanmheáchan mura sonraítear a mhalairt (1)
0303 51 00	Scadáin reoite ‘Clupea harengus, Clupea pallasii’ (2)	400 tona
0306 15 00	Gliomaigh reoite na hIorua ‘Nephrops norvegicus’, fiú deataithe, bídís sa bhlaosc nó ná bídís, lena n-áirítear gliomaigh sa bhlaosc, iad cócaráilte trína ngalú nó trína mbeiriú in uisce	100 tona
0304 49 50	Filléid úra nó fhuaraithe péirsí mara ‘Sebastes spp.’	2 500 tona
1604 19 92 1604 20 90	Ullmhóidí de throisc agus éisc eile	2 000 tona
	Úr nó fuaraithe	5 500 tona
0302 23 00	Sóil (Solea spp.)
0302 24 00	Turbaird (Psetta maxima)
0302 29	Scoilteáin (Lepidorhombus spp.) agus leathóga eile, gan filléid éisc agus feoil eile éisc a áireamh
Ex03025990	Éisc de na finte Bregmacerotidae, Euchlichthyidae, Gadidae, Macrouridae, Melanonidae, Merlucciidae, Moridae agus Muraenolepididae
0302 82 00	Roic (Rajidae)
0302 89 50	Láimhínigh (Lophius spp.)
0302 89 90	Éisc úra nó fhuaraithe eile, nach bhfuil sonraithe aon áit eile
0303 32 00	Leathóga ballacha reoite (Pleuronectes platessa)
0303 39 85	Leathóga reoite
Ex03035990	Ronnaigh Indiacha reoite, ‘rastrelliger spp.’
Ex03036990	Éisc reoite de na finte Bregmacerotidae, Euchlichthyidae, Gadidae, Macrouridae, Melanonidae, Merlucciidae, Moridae agus Muraenolepididae
0303 82 00	Roic reoite (Rajidae)
0303 89 90	Éisc reoite,nach bhfuil sonraithe aon áit eile
0303 99 00	Eití, cinn, eireabaill, lamhnáin snámha agus scairteach eile éisc reoite inite
0304 43 00	Filléid úra nó fhuaraithe d’éisc leathógacha (Pleuronectidae, Bothidae, Cynoglossidae, Soleidae, Scophthalmidae agus Citharidae)
Ex03044490	Filléid úra nó fhuaraithe ó éisc de na finte Bregmacerotdae, Euchlichthyidae, Gadidae, Macrouridae, Melanonidae, Merlucciidae, Moridae agus Muraenolepididae
0304 46	Filléid úra nó fhuaraithe de dhéadéisc
0304 49 10	Filléid úra nó fhuaraithe d’éisc fionnuisce
0304 49 90	Filléid úra nó fhuaraithe ó éisc eile, nach bhfuil sonraithe aon áit eile
0304 95 10	Suiréime reoite
0305 39 10	Filléid de bhradán, iad saillte nó faoi sháile, ach gan a bheith deataithe	50 tona
0305 42 00	Scadáin dheataithe
0305 69 50	Na bradáin sin amháin atá saillte nó faoi sháile
0305 41 00	Bradáin dheataithe, lena n-áirítear filléid
0305 72 00	Cinn éisc, eireabaill éisc agus lamhnáin snámha éisc, iad deataithe, triomaithe, saillte nó faoi sháile	1 950 tona
0305 79 00	Eití éisc agus scairteach éisc eile inite, iad deataithe, triomaithe, saillte nó faoi sháile
0305 43 00	Bric dheataithe (Salmo trutta, Oncorhynchus mykiss, Oncorhynchus clarki, Oncorhynchus aguabonita, Oncorhynchus gilae, Oncorhynchus apache agus Oncorhynchus chrysogaster)
0305 49 80	Éisc eile atá deataithe
1604 11 00 1604 20 10	Bradán ullmhaithe nó leasaithe, ina iomláine nó i bpíosaí (seachas bradáin mhionaithe)
1605 61 00	Súmaire cladaigh ullmhaithe nó leasaithe
1605 62 00	Cuáin mhara ullmhaithe nó leasaithe
0302 22 00	Leathóga úra nó fuaraithe (‘Pleuronectes platessa’)	2 500 tona
0302 59 20	Faoitíní úra nó fuaraithe (‘Merlangius merlangus’)
0304 49 10	Filléid d’éisc fionnuisce, iad úr nó fuaraithe, nach bhfuil sonraithe aon áit eile
0304 52 00	Feoil úr nó fhuaraithe Salmainidí, bíodh sí mionaithe nó ná bíodh
0304 89 10	Filléid reoite d’éisc fionnuisce, nach bhfuil sonraithe aon áit eile
0305 69 80	Na héisc eile sin amháin atá saillte nó faoi sháile
0304 82 10 0304 82 90	Filléid reoite de bhric ‘Salmo trutta, Oncorhynchus mykiss, Oncorhynchus aguabonita, Oncorhynchus gilae’
0302 59 40	Langaí ‘Molva spp.’ úra nó fuaraithe
0305 53 90	Éisc thriomaithe de na finte Bregmacerotidae, Euclichthyidae, Gadidae, Macrouridae, Melanonidae, Merlucciidae, Moridae agus Muraenolepididae, seachas troisc
0303 14 20 0303 14 90	Bric ‘Oncorhynchus mykiss’ atá reoite, a bhfuil na cinn agus na geolbhaigh orthu, iad glanta
0304 82 10	Filléid reoite de bhric ‘Salmo trutta, Oncorhynchus mykiss, Oncorhynchus’, filléid reoite de bhric ‘Oncorhynchus mykiss’, ar meáchan > 400 gram an ceann
0302 14 00	Bradáin úra nó fhuaraithe an Atlantaigh ‘Salmo salar’ agus bradáin úra nó fhuaraithe na Danóibe
0303 13 00	Bradáin an Atlantaigh ‘Salmo salar’ agus bradáin na Danóibe ‘Hucho hucho’, iad reoite
0304 41 00	Filléid úra nó fhuaraithe de bhradáin an Aigéin Chiúin ‘Oncorhynchus nerka, Oncorhynchus gorbuscha, Oncorhynchus keta, Oncorhynchus tschawytscha, Oncorhynchus kisutch, Oncorhynchus masou and Oncorhynchus rhodurus), bradáin an Atlantaigh (Salmo salar) agus bradáin na Danóibe (Hucho hucho)’
0304 81 00	Filléid reoite de bhradáin an Aigéin Chiúin ‘Oncorhynchus nerka, Oncorhynchus tschawytscha, Oncorhynchus kisutch, Oncorhynchus masou and Oncorhynchus rhodurus), bradáin an Atlantaigh (Salmo salar) agus bradáin na Danóibe (Hucho hucho)’

(1) Cuirfear cainníochtaí leis i gcomhréir le hAirteagal 2 mír 3 den Phrótacal seo.

(2) Ní dheonófar tairbhe an taraife-chuóta d’earraí arna ndearbhú lena scaoileadh i saorchúrsaíocht le linn na tréimhse ón 15 Feabhra go dtí an 15 Meitheamh.