1.   L-applikazzjonijiet għal approvazzjoni ta’ emenda tal-Unjoni fl-Ispeċifikazzjoni tal-prodott għandhom jitqiesu bħala ammissibbli jekk ikunu ġew sottomessi f’konformità mal-Artikolu 53 tar-Regolament (UE) Nru 1151/2012 u kkomunikati lill-Kummissjoni f’konformità mal-Artikolu 12(1) tar-Regolament ta’ Implimentazzjoni tal-Kummissjoni (UE) Nru 668/2014 (*1) u jekk ikunu jikkonformaw mal-Artikolu 10 ta’ dak ir-Regolament ta’ Implimentazzjoni.

L-approvazzjoni mill-Kummissjoni ta’ applikazzjoni għall-approvazzjoni ta’ emenda tal-Unjoni fl-Ispeċifikazzjoni tal-Prodott għandha tkopri biss l-emendi tal-Unjoni stipulati fl-applikazzjoni.

2.   Jekk il-Kummissjoni tqis li applikazzjoni ma tkunx ammissibbli, hija għandha tinforma lill-awtoritajiet tal-Istat Membru jew tal-pajjiż terz ikkonċernat jew lill-applikant stabbilit fil-pajjiż terz, skont il-każ, bir-raġunijiet għall-inammissibbiltà.

1.   Għall-finijiet tal-Artikolu 53 tar-Regolament (UE) Nru 1151/2012, l-applikazzjonijiet għall-approvazzjoni ta’ emenda standard fl-Ispeċifikazzjoni tal-Prodott għandhom jiġu sottomessi lill-awtoritajiet tal-Istat Membru li fit-territorju tiegħu tkun tinsab iż-żona ġeografika tal-prodott ikkonċernat. Jekk l-applikazzjoni għall-approvazzjoni ta’ emenda standard fl-Ispeċifikazzjoni tal-Prodott ma tiġix mill-grupp applikant li jkun issottometta l-applikazzjoni għall-protezzjoni tal-isem jew tal-ismijiet li għalihom tirreferi l-Ispeċifikazzjoni tal-Prodott, l-Istat Membru għandu jagħti lil dak l-grupp applikant l-opportunità li jikkummenta dwar l-applikazzjoni, jekk dak l-grupp applikant ikun għadu jeżisti.

L-applikazzjoni għall-approvazzjoni tal-emenda standard għandha tipprovdi deskrizzjoni tal-emendi standard u turi li l-emendi proposti jikkwalifikaw bħala standard f’konformità mal-Artikolu 53(2) tar-Regolament (UE) Nru 1151/2012. Għandu jiġi pprovdut ukoll sommarju tar-raġunijiet li għalihom ikunu meħtieġa l-emendi.

2.   Fejn l-Istat Membru jqis li r-rekwiżiti tar-Regolament (UE) Nru 1151/2012 u tad-dispożizzjonijiet adottati skont dak ir-Regolament huma ssodisfati, huwa jista’ japprova l-emenda standard. Id-deċiżjoni tal-approvazzjoni għandha tinkludi l-Ispeċifikazzjoni tal-Prodott ikkonsolidat emendat u, fejn rilevanti, id-Dokument Uniku kkonsolidat emendat jew għandha tinkludi r-referenza elettronika għall-verżjoni ppubblikata tal-Ispeċifikazzjoni tal-Prodott ikkonsolidat u, fejn rilevanti, id-Dokument Uniku.

Id-deċiżjoni ta’ approvazzjoni għandha tiġi ppubblikata. L-emenda standard approvata għandha tkun applikabbli fl-Istat Membru kkonċernat mid-data li fiha tkun ġiet ippubblikata d-deċiżjoni ta’ approvazzjoni. L-Istat Membru għandu jikkomunika l-emendi standard approvati lill-Kummissjoni sa mhux aktar tard minn xahar wara d-data li fiha tkun ġiet ippubblikata d-deċiżjoni ta’ approvazzjoni nazzjonali. L-Istat Membru għandu jikkomunika lill-Kummissjoni, mingħajr dewmien mhux iġġustifikat, kwalunkwe sentenza nazzjonali finali u mhux appellabbli li tħassar id-deċiżjoni li tapprova emenda standard.

3.   Id-deċiżjonijiet li japprovaw emendi standard li jikkonċernaw prodotti li joriġinaw minn pajjiżi terzi għandhom jiġu kkomunikati lill-Kummissjoni minn grupp applikant li jkollu interess leġittimu, jew direttament jew permezz tal-awtoritajiet tal-pajjiż terz ikkonċernat, u dan mhux aktar tard minn xahar wara d-data li fiha tkun ġiet ippubblikata d-deċiżjoni rilevanti.

4.   Il-komunikazzjoni ta’ emenda standard approvata lill-Kummissjoni għandha titqies li tkun saret kif xieraq meta tikkonforma mal-Artikolu 10a tar-Regolament ta’ Implimentazzjoni (UE) Nru 668/2014.

5.   Fil-każ li l-emenda standard timplika emenda fid-Dokument Uniku, il-Kummissjoni għandha tippubblika d-deskrizzjoni tal-emenda standard u d-Dokument Uniku emendat f’Il-Ġurnal Uffiċjali tal-Unjoni Ewropea, serje C, fi żmien 3 xhur mid-data li fiha tkun irċeviet il-komunikazzjoni ta’ dik l-emenda standard.

Fil-każ li l-emenda standard ma timplikax emenda fid-Dokument Uniku, il-Kummissjoni għandha tippubblika, permezz tas-sistemi diġitali msemmija fil-punt (a) tal-ewwel subparagrafu tal-Artikolu 12(1) tar-Regolament ta’ Implimentazzjoni (UE) Nru 668/2014, id-deskrizzjoni tal-emenda standard fi żmien 3 xhur mid-data li fiha tkun irċeviet il-komunikazzjoni ta’ dik l-emenda standard.

L-awtorità nazzjonali msemmija fil-paragrafi 2 u 3 jew il-grupp applikant imsemmi fil-paragrafu 3 li jkunu kkomunikaw emenda standard lill-Kummissjoni għandhom jibqgħu responsabbli għall-kontenut tagħha.

6.   L-emendi standard għandhom ikunu applikabbli fit-territorju tal-Unjoni mid-data li fiha jkunu ġew ippubblikati skont l-ewwel subparagrafu tal-paragrafu 5 jew ikunu saru pubbliċi skont it-tieni subparagrafu tal-paragrafu 5.

7.   Fejn iż-żona ġeografika tkopri aktar minn Stat Membru wieħed, kull Stat Membru kkonċernat għandu japplika l-proċedura għal emendi standard separatament. L-emenda standard għandha tkun applikabbli fit-territorju tal-Istati Membri kkonċernati biss wara li ssir applikabbli l-aħħar deċiżjoni ta’ approvazzjoni nazzjonali. L-Istat Membru li jkun l-aħħar wieħed li japprova l-emenda standard għandu jibgħat lill-Kummissjoni l-komunikazzjoni rilevanti mhux aktar tard minn xahar wara d-data li fiha tkun ġiet ippubblikata d-deċiżjoni ta’ approvazzjoni tiegħu.

Jekk wieħed jew aktar mill-Istati Membri kkonċernati ma jadottawx id-deċiżjoni ta’ approvazzjoni nazzjonali msemmija fl-ewwel subparagrafu, kwalunkwe wieħed mill-Istati Membri kkonċernati jista’ jissottometti dik l-applikazzjoni skont il-proċedura ta’ emenda tal-Unjoni.

8.   Il-paragrafu 7 għandu japplika mutatis mutandis fejn parti miż-żona ġeografika kkonċernata tkun tinsab fit-territorju ta’ pajjiż terz.

1.   Fejn tiġi approvata emenda standard li timplika emenda fid-Dokument Uniku, filwaqt li jkun hemm applikazzjoni għall-approvazzjoni ta’ emenda tal-Unjoni pendenti mal-Kummissjoni, l-Istat Membru kkonċernat għandu jaġġorna d-Dokument Uniku inkluż fl-applikazzjoni għall-approvazzjoni ta’ emenda tal-Unjoni bix-xieraq. Jekk l-emenda tal-Unjoni pendenti tkun ġiet ippubblikata f’Il-Ġurnal Uffiċjali tal-Unjoni Ewropea, għall-oppożizzjoni, il-verżjoni aġġornata tad-Dokument Uniku għandha tiġi ppubblikata f’Il-Ġurnal Uffiċjali tal-Unjoni Ewropea, serje L, bħala Anness tar-Regolament ta’ Implimentazzjoni li japprova l-emenda tal-Unjoni.

2.   Fejn il-verżjoni emendata tad-Dokument Uniku inkluż f’applikazzjoni għal emenda standard approvata fil-livell nazzjonali ma tikkunsidrax l-aħħar emendi tal-Unjoni li jkunu ġew approvati, dik l-emenda standard ma għandhiex tiġi ppubblikata f’Il-Ġurnal Uffiċjali tal-Unjoni Ewropea. L-Istat Membru li jkun approva dik l-emenda standard għandu jibgħat lill-Kummissjoni l-verżjoni kkonsolidata tad-Dokument Uniku kif emendat kemm mill-Unjoni kif ukoll mill-emendi standard għall-pubblikazzjoni f’Il-Ġurnal Uffiċjali tal-Unjoni Ewropea.

1.   L-emendi temporanji fl-Ispeċifikazzjoni tal-Prodott għandhom jiġu approvati u ppubblikati mill-Istat Membru li fit-territorju tiegħu tkun tinsab iż-żona ġeografika tal-prodott ikkonċernat. L-emendi temporanji għandhom jiġu kkomunikati lill-Kummissjoni flimkien mar-raġunijiet li jappoġġawhom sa mhux aktar tard minn xahar wara d-data li fiha tkun ġiet ippubblikata d-deċiżjoni ta’ approvazzjoni nazzjonali. L-emenda temporanja għandha tkun applikabbli fl-Istat Membru kkonċernat mid-data li fiha tkun ġiet ippubblikata d-deċiżjoni li tapprova l-emenda.

2.   Fejn iż-żona ġeografika tkun tkopri aktar minn Stat Membru wieħed, kull wieħed mill-Istati Membri kkonċernati għandu japplika l-proċedura għall-emendi temporanji msemmija fil-paragrafu 1 separatament.

3.   L-emendi temporanji li jikkonċernaw il-prodotti li joriġinaw minn pajjiżi terzi għandhom jiġu kkomunikati lill-Kummissjoni, flimkien mar-raġunijiet għalihom, minn grupp applikant li jkollu interess leġittimu, jew direttament jew permezz tal-awtoritajiet ta’ dak il-pajjiż terz, u dan mhux aktar tard minn xahar wara l-approvazzjoni tagħhom.

4.   Il-komunikazzjoni ta’ emenda temporanja approvata lill-Kummissjoni għandha titqies li tkun saret kif xieraq meta tikkonforma mal-Artikolu 10b tar-Regolament ta’ Implimentazzjoni (UE) Nru 668/2014.

5.   Il-Kummissjoni għandha tippubblika l-komunikazzjoni ta’ emendi temporanji permezz tas-sistemi diġitali msemmija fil-punt (a) tal-ewwel subparagrafu tal-Artikolu 12(1) tar-Regolament ta’ Implimentazzjoni (UE) Nru 668/2014 fi żmien 3 xhur mid-data li fiha tkun irċeviet il-komunikazzjoni ta’ dik l-emenda temporanja. L-emenda temporanja għandha tkun applikabbli fit-territorju tal-Unjoni mid-data li fiha tkun ġiet ippubblikata mill-Kummissjoni.

L-awtorità nazzjonali msemmija fil-paragrafi 1 u 3 jew il-grupp applikant imsemmi fil-paragrafu 3 li jkunu kkomunikaw emenda temporanja lill-Kummissjoni għandhom jibqgħu responsabbli għall-kontenut tagħha.