(1)

Il-ġidri tan-nagħaġ u l-ġidri tal-mogħoż huwa marda virali infettiva li taffettwa lill-annimali kaprini u ovini u li jista’ jkollha impatt serju fuq il-popolazzjoni tal-annimali kkonċernati u fuq il-profittabbiltà tat-trobbija tal-annimali, billi tikkawża tfixkil fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi. F’każ ta’ tifqigħa tal-ġidri tan-nagħaġ u l-ġidri tal-mogħoż f’annimali kaprini u ovini, hemm riskju serju li dak il-mard jinxtered fi stabbilimenti oħra ta’ annimali kaprini jew ovini.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż il-ġidri tan-nagħaġ u l-ġidri tal-mogħoż, kif ukoll ċerti miżuri li jridu jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tinkludi żona ta’ protezzjoni, żona ta’ sorveljanza, u jekk ikun meħtieġ, żona ristretta ulterjuri madwar iż-żoni ta’ protezzjoni u ta’ sorveljanza jew maġenbhom.

(3)

Id-Deċiżjoni ta’ Implimentazzjoni tal-Kummissjoni (UE) 2025/1767 (4) ġiet adottata fil-qafas tar-Regolament (UE) 2016/429 u tistabbilixxi ċerti miżuri ta’ emerġenza relatati mal-infezzjoni tal-ġidri tan-nagħaġ u l-ġidri tal-mogħoż fir-Rumanija. B’mod aktar partikolari, l-Artikolu 1 tad-Deċiżjoni ta’ Implimentazzjoni (UE) 2025/1767 tipprevedi li ż-żona ristretta, li tinkludi żoni ta’ protezzjoni u ta’ sorveljanza, li trid tiġi stabbilita mill-awtorità kompetenti ta’ dak l-Istat Membru, f’konformità mal-Artikolu 21 tar-Regolament Delegat (UE) 2020/687, trid tinkludi mqar iż-żoni elenkati fl-Anness ta’ dik id-Deċiżjoni ta’ Implimentazzjoni, u l-miżuri li jeħtieġ li jiġu applikati fiż-żoni ta’ protezzjoni u ta’ sorveljanza, iridu jiġu applikati mqar sad-dati elenkati f’dak l-Anness.

(4)

Wara tifqigħat ulterjuri tal-ġidri tan-nagħaġ u tal-ġidri tal-mogħoż fil-kontej ta’ Teleorman u Olt fir-Rumanija, l-Anness tad-Deċiżjoni ta’ Implimentazzjoni (UE) 2025/1767 ġie emendat bid-Deċiżjoni ta’ Implimentazzjoni tal-Kummissjoni (UE) 2025/1954 (5).

(5)

Mill-24 ta’ Ottubru 2025, il-miżuri kollha stabbiliti fid-Deċiżjoni ta’ Implimentazzjoni (UE) 2025/1767 tneħħew mill-awtorità kompetenti tar-Rumanija, peress li l-aħħar tifqigħa tal-ġidri tan-nagħaġ u tal-ġidri tal-mogħoż f’dak l-Istat Membru qabel dik id-data ġiet innotifikata lill-Kummissjoni fil-5 ta’ Settembru 2025. L-aħħar waħda mill-miżuri stabbiliti fl-Anness tad-Deċiżjoni ta’ Implimentazzjoni (UE) 2025/1767 ma baqgħetx tapplika mill-24 ta’ Ottubru 2025, u ma kien hemm l-ebda tifqigħa ġdida sa dik id-data.

(6)

Fis-17 ta’ Novembru 2025, ir-Rumanija nnotifikat lill-Kummissjoni dwar żewġ tifqigħat ġodda tal-ġidri tan-nagħaġ u tal-ġidri tal-mogħoż fi stabbilimenti li fihom kienu jinżammu l-annimali ovini u kaprini, li jinsabu fil-kontej ta’ Dolj u Teleorman. B’rispons għal dawn it-tifqigħat ġodda, ir-Rumanija stabbiliet żona ristretta, li tinkludi żoni ta’ protezzjoni u ta’ sorveljanza, li fihom jiġu applikati l-miżuri ġenerali għall-kontroll tal-mard stabbiliti fir-Regolament Delegat (UE) 2020/687 sabiex jiġi evitat tixrid ulterjuri ta’ dik il-marda.

(7)

Sabiex jiġi evitat kull xkiel bla bżonn għall-kummerċ fl-Unjoni u sabiex jiġi evitat li pajjiżi terzi jimponu ostakli mhux iġġustifikati għall-kummerċ, jeħtieġ li jiġu identifikati malajr, fil-livell tal-Unjoni, il-post u d-durata ta’ din iż-żona ristretta għall-ġidri tan-nagħaġ u għall-ġidri tal-mogħoż. Għalhekk, jenħtieġ li l-lista taż-żoni li fihom trid tiġi stabbilita żona ristretta fir-Rumanija fir-rigward tal-ġidri tan-nagħaġ u tal-ġidri tal-mogħoż, kif ukoll id-durata prevista ta’ dawn iż-żoni, tiġi stabbilita fl-Anness ta’ din id-Deċiżjoni.

(8)

Id-daqs taż-żoni ta’ protezzjoni u ta’ sorveljanza u d-durata tal-miżuri li se jiġu applikati fihom huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, inkluż is-sitwazzjoni epidemjoloġika fir-rigward tal-ġidri tan-nagħaġ u tal-ġidri tal-mogħoż fiż-żoni affettwati minn dik il-marda u s-sitwazzjoni epidemjoloġika kumplessiva tal-ġidri tan-nagħaġ u tal-ġidri tal-mogħoż fl-Istat Membru kkonċernat minn dik il-marda kif ukoll il-livell ta’ riskju għat-tixrid ulterjuri ta’ dik il-marda, u huma konformi mar-regoli stabbiliti fir-Regolament Delegat (UE) 2020/687. Id-durata tal-miżuri tqis ukoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (WOAH, World Organisation for Animal Health) (6).

(9)

Fl-interess taċ-ċarezza tal-leġiżlazzjoni tal-Unjoni, jixraq li titħassar id-Deċiżjoni ta’ Implimentazzjoni (UE) 2025/1767, peress li l-miżuri ta’ emerġenza stabbiliti f’dik id-Deċiżjoni se jiġu sostitwiti b’dawk stabbiliti f’din id-Deċiżjoni.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.

(a)

tiġi stabbilita minnufih żona ristretta, li tinkludi żoni ta’ protezzjoni ta’ sorveljanza, f’konformità mal-Artikolu 21 tar-Regolament Delegat (UE) 2020/687 u bil-kundizzjonijiet stabbiliti f’dak l-Artikolu;

(b)

iż-żoni ta’ protezzjoni u ta’ sorveljanza msemmija fil-punt (a) ikunu jinkludu mqar iż-żoni elenkati fl-Anness ta’ din id-Deċiżjoni;

(c)

il-miżuri li jeħtieġ li jiġu applikati fiż-żoni ta’ protezzjoni u ta’ sorveljanza jiġu applikati mqar sad-dati elenkati fl-Anness ta’ din id-Deċiżjoni.