(1)

Is galar víreasach tógálach é an bholgach caorach agus an bholgach gabhar a bhíonn ar ainmhithe de chineál caorach nó de chineál gabhair agus d’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach ar ghluaiseacht choinsíneachtaí na n-ainmhithe sin agus a dtáirgí laistigh den Aontas agus ar onnmhairí go tríú tíortha. I gcás ráig den bholgach caorach agus den bholgach gabhar in ainmhithe de chineál gabhair nó de chineál caorach, tá riosca tromchúiseach ann go leathfadh an galar sin go bunaíochtaí eile ainmhithe de chineál gabhair nó de chineál caorach.

(2)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, déantar foráil le hAirteagail 21 agus 22 de Rialachán Tarmligthe (AE) 2020/687 maidir le crios srianta a bhunú i gcás ráig de ghalar de chatagóir A, lena n-áirítear an bholgach caorach agus an bholgach gabhar, agus maidir le bearta áirithe a bheidh le cur i bhfeidhm ann. Ina theannta sin, foráiltear le hAirteagal 21(1) den Rialachán Tarmligthe sin go gcuimseofar leis an gcrios srianta crios cosanta, crios faireachais, agus, más gá, crios srianta breise timpeall na gcriosanna cosanta agus faireachais nó cóngarach dóibh.

(3)

Glacadh Cinneadh Cur Chun Feidhme (AE) 2025/1767 ón gCoimisiún (4) faoi chuimsiú Rialachán (AE) 2016/429 agus leagtar síos leis bearta éigeandála áirithe a bhaineann le hionfhabhtú leis an mbolgach caorach agus leis an mbolgach gabhar sa Rómáin. Go sonrach, foráiltear le hAirteagal 1 de Chinneadh Cur Chun Feidhme (AE) 2025/1767, maidir leis an gcrios srianta, lena gcuimsítear criosanna cosanta agus faireachais, atá le bunú ag údarás inniúil an Bhallstáit sin, i gcomhréir le hAirteagal 21 de Rialachán Tarmligthe (AE) 2020/687, go gcuimseoidh an crios sin ar a laghad na limistéir a liostaítear san Iarscríbhinn a ghabhann leis an gCinneadh Cur Chun Feidhme sin, agus maidir leis na bearta is gá a chur i bhfeidhm sna criosanna cosanta agus faireachais, go bhfuil na criosanna sin le cur i bhfeidhm ar a laghad go dtí na dátaí a liostaítear san Iarscríbhinn sin.

(4)

Tar éis ráigeanna breise den bholgach caorach agus den bholgach gabhar i gcontaetha Teleorman agus Olt sa Rómáin, leasaíodh an Iarscríbhinn a ghabhann le Cinneadh Cur Chun Feidhme (AE) 2025/1767 le Cinneadh Cur Chun Feidhme (AE) 2025/1954 ón gCoimisiún (5).

(5)

Ón 24 Deireadh Fómhair 2025 ar aghaidh, tá deireadh curtha ag údarás inniúil na Rómáine leis na bearta uile a leagtar síos i gCinneadh Cur Chun Feidhme (AE) 2025/1767, ós rud é gur tugadh fógra don Choimisiún an 5 Meán Fómhair 2025 faoin ráig dheireanach den bholgach caorach agus den bholgach gabhar sa Bhallstát sin roimh an dáta sin. Scoir an ceann deireanach de na bearta a leagtar amach san Iarscríbhinn a ghabhann le Cinneadh Cur Chun Feidhme (AE) 2025/1767 d’fheidhm a bheith aige ón 24 Deireadh Fómhair 2025 ar aghaidh, agus ní raibh aon ráig nua ann go dtí an dáta sin.

(6)

An 17 Samhain 2025 thug an Rómáin fógra don Choimisiún faoi dhá ráig nua den bholgach caorach agus den bholgach gabhar i mbunaíochtaí inar coimeádadh ainmhithe den chineál caorach agus den chineál gabhair, bunaíochtaí atá lonnaithe i gcontaetha Dolj agus Teleorman. Mar fhreagairt ar na ráigeanna nua sin, tá crios srianta bunaithe ag an Rómáin, lena gcuimsítear criosanna cosanta agus faireachais, ina gcuirtear i bhfeidhm na bearta ginearálta rialaithe galar a leagtar síos i Rialachán Tarmligthe (AE) 2020/687, chun leathadh breise an ghalair sin a chosc.

(7)

Chun aon chur isteach nach bhfuil gá leis ar thrádáil laistigh den Aontas a chosc agus chun nach bhforchuirfidh tríú tíortha bacainní gan údar ar thrádáil, is gá suíomh agus fad an chreasa shrianta sin i gcás na bolgaí caorach agus na bolgaí gabhar a shainaithint go tapa ar leibhéal an Aontais. Dá bhrí sin, an liosta de limistéir nach mór crios srianta a bhunú sa Rómáin iontu i leith na bolgaí caorach agus na bolgaí gabhar, mar aon leis an bhfad atá beartaithe do na criosanna sin, ba cheart iad sin a leagan amach san Iarscríbhinn a ghabhann leis an gCinneadh seo.

(8)

Tá méid na gcriosanna cosanta agus faireachais agus fad na mbeart atá le cur i bhfeidhm sna criosanna sin bunaithe ar na critéir a leagtar amach in Airteagal 64(1) de Rialachán (AE) 2016/429, lena n-áirítear an staid eipidéimeolaíoch a mhéid a bhaineann leis an mbolgach caorach agus leis an mbolgach gabhar sna limistéir atá buailte ag an ngalar sin, agus staid eipidéimeolaíoch fhoriomlán na bolgaí caorach agus na bolgaí gabhar sa Bhallstát lena mbaineann an galar sin, mar aon leis an leibhéal riosca maidir le leathadh breise an ghalair, agus tá siad i gcomhréir leis na rialacha a leagtar síos i Rialachán Tarmligthe (AE) 2020/687. Cuirtear caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe (WOAH) (6) san áireamh freisin agus fad na mbeart á chinneadh.

(9)

Ar mhaithe le soiléireacht reachtaíocht an Aontais, is iomchuí Cinneadh Cur Chun Feidhme (AE) 2025/1767 a aisghairm, ós rud é go gcuirfear na bearta a leagtar síos sa Chinneadh seo in ionad na mbeart éigeandála a leagtar síos sa Chinneadh sin.

(10)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha.

(a)

bunófar láithreach crios srianta lena gcuimsítear crios cosanta agus crios faireachais i gcomhréir le hAirteagal 21 de Rialachán Tarmligthe (AE) 2020/687 agus faoi na coinníollacha a leagtar amach san Airteagal sin;

(b)

cuimseofar leis na criosanna cosanta agus faireachais dá dtagraítear i bpointe (a) ar a laghad na limistéir a liostaítear san Iarscríbhinn a ghabhann leis an gCinneadh seo;

(c)

maidir leis na bearta is gá a chur i bhfeidhm sna criosanna cosanta agus faireachais, cuirfear i bhfeidhm iad ar a laghad go dtí na dátaí a liostaítear san Iarscríbhinn a ghabhann leis an gCinneadh seo.