European flag

Il-Ġurnal Uffiċjali
ta'l-Unjoni Ewropea

MT

Is-serje L


2024/3139

16.12.2024

DEĊIŻJONI TAL-KUNSILL (PESK) 2024/3139

tas-16 ta’ Diċembru 2024

li temenda d-Deċiżjoni (PESK) 2022/2319 dwar miżuri restrittivi fid-dawl tas-sitwazzjoni fil-Haiti

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, u b’mod partikolari l-Artikolu 29 tiegħu,

Wara li kkunsidra d-Deċiżjoni tal-Kunsill (PESK) 2022/2319 tal-25 ta’ Novembru 2022 dwar miżuri restrittivi fid-dawl tas-sitwazzjoni fil-Haiti (1), u b’mod partikolari l-Artikolu 4(2) tagħha,

Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,

Billi:

(1)

Fil-25 ta’ Novembru 2022, il-Kunsill adotta d-Deċiżjoni (PESK) 2022/2319.

(2)

Fit-28 ta’ Lulju 2023, il-Kunsill adotta d-Deċiżjoni (PESK) 2023/1574 (2), li emendat id-Deċiżjoni (PESK) 2022/2319, li tistabbilixxi qafas iddedikat għal miżuri restrittivi mmirati kontra persuni fiżiċi jew ġuridiċi, entitajiet jew korpi responsabbli għal azzjonijiet li jheddu l-paċi, l-istabbiltà u s-sigurtà tal-Haiti u għal azzjonijiet li jdgħajfu d-demokrazija jew l-istat tad-dritt fil-Haiti, kif ukoll kontra persuni fiżiċi jew ġuridiċi, entitajiet jew korpi assoċjati magħhom.

(3)

Fil-konklużjonijiet tiegħu tas-17 ta’ Ottubru 2024, il-Kunsill Ewropew iddikjara li baqa’ estremament imħasseb dwar is-sitwazzjoni fil-Haiti. Huwa appella għall-iskjerament sħiħ tal-Missjoni Multinazzjonali ta’ Appoġġ għas-Sigurtà biex tassisti lill-Pulizija Nazzjonali tal-Haiti fil-ġlieda kontra l-vjolenza minn gruppi organizzati u tirrestawra l-istat tad-dritt. Il-Kunsill Ewropew appella wkoll għal sanzjonijiet ġodda mmirati kontra individwi u entitajiet responsabbli għall-vjolenza, bl-għan li jgħin sabiex jerġa’ jkun hemm il-paċi, is-sigurtà, l-istabbiltà, id-demokrazija u l-istat tad-dritt fil-Haiti.

(4)

Fid-dawl tas-sitwazzjoni politika, ekonomika, ta’ sigurtà u umanitarja li sejra għall-agħar fil-Haiti, inkluż ir-riżultati taż-żieda fil-vjolenza minn gruppi organizzati, l-abbużi serji tad-drittijiet tal-bniedem mingħajr remissjoni mwettqa mill-gruppi organizzati, u l-impunità kontinwa għall-awturi, jenħtieġ li tliet persuni jiżdiedu mal-lista ta’ persuni fiżiċi soġġetti għal miżuri restrittivi li tinsab fl-Anness II tad-Deċiżjoni (PESK) 2022/2319.

(5)

Għalhekk, jenħtieġ li d-Deċiżjoni (PESK) 2022/2319 tiġi emendata skont dan,

ADOTTA DIN ID-DEĊIŻJONI:

Artikolu 1

L-Anness II tad-Deċiżjoni (PESK) 2022/2319 huwa emendat f’konformità mal-Anness ta’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fid-data tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Magħmul fi Brussell, is-16 ta’ Diċembru 2024.

Għall-Kunsill

Il-President

K. KALLAS


(1)   ĠU L 307, 28.11.2022, p. 135.

(2)  Id-Deċiżjoni tal-Kunsill (PESK) 2023/1574 tat-28 ta’ Lulju 2023 li temenda d-Deċiżjoni (PESK) 2022/2319 dwar miżuri restrittivi fid-dawl tas-sitwazzjoni fil-Haiti (ĠU L 192, 31.7.2023, p. 21).


ANNESS

Fl-Anness II tad-Deċiżjoni (PESK) 2022/2319, taħt l-intestatura “A. Lista ta’ persuni fiżiċi msemmijin fl-Artikolu 2a(1) u fl-Artikolu 3a(1)”, tiżdied it-tabella li ġejja:

 

“Isem

Informazzjoni ta’ identifikazzjoni

Dikjarazzjoni tar-raġunijiet

Data tal-inklużjoni fil-lista

1.

Jonel CATEL

magħruf wkoll bħala

Johns CATHEL

Funzjoniji: Kap tal-grupp organizzat Terre Noire (affiljat mal-koalizzjoni tal-gruppi organizzati G9)

Nazzjonalità: Haitjana

Sess: raġel

Jonel Catel huwa l-mexxej tal-grupp organizzat Terre Noir, li huwa affiljat mal-koalizzjoni tal-gruppi organizzati tal-G9 fil-Haiti.

Taħt il-kmand tiegħu, il-grupp organizzat Terre Noir iwettaq atti ta’ vjolenza u attivitajiet kriminali fil-Haiti, inkluż serq, talbiet għal riskatt, ħtif ta’ persuni, estorsjoni, omiċidju volontarju u stupru.

Għalhekk, Jonel Catel huwa responsabbli għal azzjonijiet li jheddu l-paċi, l-istabbiltà u s-sigurtà fil-Haiti, inkluż it-twettiq ta’ attivitajiet kriminali u vjolenza li jinvolvu gruppi armati u networks kriminali li jippromwovu l-vjolenza, inkluż ħtif ta’ persuni, omiċidji u vjolenza sesswali u abbażi tal-ġeneru.

16.12.2024

2.

Gabriel JEAN-PIERRE

magħruf ukoll bħala Ti-Gabriel; Ti Gabriel; Gabo

Funzjoni: kap tal-koalizzjoni tal-gruppi organizzati GPep (affiljata mal-grupp organizzat Brooklyn)

Data tat-twelid: 31.3.1984

Nazzjonalità: Haitjana

Sess: raġel

Gabriel Jean-Pierre huwa l-kap tal-koalizzjoni tal-gruppi organizzati GPep fil-Haiti, li hija affiljata mal-grupp organizzat ta’ Brooklyn.

Taħt il-kmand tiegħu, il-GPep wettaq atti ta’ vjolenza u attivitajiet kriminali fil-Haiti, inkluż estorsjoni, qerda ta’ proprjetà, ħtif ta’ persuni, assassinju u stupru.

Għalhekk, Gabriel Jean-Pierre huwa responsabbli għal azzjonijiet li jheddu l-paċi, l-istabbiltà u s-sigurtà fil-Haiti, inkluż it-twettiq ta’ attivitajiet kriminali u vjolenza li jinvolvu gruppi armati u networks kriminali li jippromwovu l-vjolenza, inkluż ħtif ta’ persuni, omiċidji u vjolenza sesswali u abbażi tal-ġeneru.

16.12.2024

3.

Ferdens TILUS

magħrufa wkoll bħala General Meyer; Jeneral Meyer; Jeneral Meyè

Funzjoni: Kap tal-grupp organizzat Kokorat San Ras

Data tat-twelid: 15.9.1995

Nazzjonalità: Haitjana

Sess: raġel

Ferdens Tilus huwa l-mexxej tal-grupp organizzat Kokorat San Ras fil-Haiti (żona Atribonite/Majjistral).

Taħt il-kmand tiegħu, il-grupp organizzat Kokorat San Ras iwettaq atti ta’ vjolenza u attivitajiet kriminali fil-Haiti, inkluż omiċidju volontarju, serq, stupru, ħtif ta’ persuni u approprjazzjoni indebita ta’ proprjetà.

Għalhekk, Ferdens Tilus huwa responsabbli għal azzjonijiet li jheddu l-paċi, l-istabbiltà u s-sigurtà fil-Haiti, inkluż it-twettiq ta’ attivitajiet kriminali u vjolenza li jinvolvu gruppi armati u networks kriminali li jippromwovu l-vjolenza, inkluż ħtif ta’ persuni, omiċidji u vjolenza sesswali u abbażi tal-ġeneru.

16.12.2024.”


ELI: http://data.europa.eu/eli/dec/2024/3139/oj

ISSN 1977-074X (electronic edition)