(1)

Skont l-Artikolu 20(1) tar-Regolament (UE) Nru 1307/2013, il-Kroazja innotifikat lill-Kummissjoni sal-31 ta' Jannar 2015 bl-oqsma identifikati f'konformità mal-Artikolu 57a(10) tar-Regolament tal-Kunsill (KE) Nru 73/2009 ( 2 ), li kienu ngħataw lura għall-użu agrikolu, fis-sena kalendarja 2014. Dik in-notifika inkludiet ukoll l-għadd ta' intitolamenti għal pagament disponibbli għall-bdiewa fil-31 ta' Diċembru 2014 kif ukoll l-ammont li baqa' ma ntefaqx f'riżerva speċjali għat-tneħħija tal-mini f'dik id-data.

(2)

F'konformità mal-Artikolu 20(2) tar-Regolament (UE) Nru 1307/2013, il-Kummissjoni kkalkulat sussegwentement l-ammonti li għandhom jiżdiedu għas-snin kalendarji 2015 'il quddiem mal-ammonti tal-limiti massimi nazzjonali stabbiliti fl-Anness II ta' dak ir-Regolament, għall-finanzjament tal-appoġġ li għandu jingħata għal artijiet li jitneħħewlhom il-mini skont l-iskemi elenkati fl-Anness I ta' dak ir-Regolament. Din iż-żieda, li żdiedet bir-Regolament ta' Delega tal-Kummissjoni (UE) 2015/851 ( 3 ) mal-limitu massimu nazzjonali tal-Kroazja stabbilit fl-Anness II tar-Regolament (UE) Nru 1307/2013 huwa ta' 700 000 EUR fl-2015.

(3)

Skont l-Artikolu 20(3) tar-Regolament (UE) Nru 1307/2013, il-Kummissjoni għandha tistabbilixxi s-sehem li għandu jiġi applikat għal din iż-żieda, bl-iskop li tinkludi l-ammont li jirriżulta f'riżerva speċjali għat-tneħħija tal-mini għal skopijiet ta' allokazzjoni ta' intitolamenti għal pagament għal artijiet li jitneħħewlhom il-mini. Dak is-sehem għandu jiġi kkalkulat abbażi tal-proporzjon bejn il-livell massimu tal-iskema ta' pagament bażiku għall-2015 u l-limitu massimu nazzjonali għal dik is-sena stipulata fl-Anness II tar-Regolament (UE) Nru 1307/2013 u mingħajr ma titqies iż-żieda miżjuda bir-Regolament ta' Delega (UE) 2015/851.

(4)

Għal kull Stat Membru li jimplimenta l-iskema ta' pagament bażiku stipulata fil-Kapitolu 1 tat-Titolu III tar-Regolament (UE) Nru 1307/2013, il-limitu massimu nazzjonali annwali msemmi fl-Artikolu 22(1) ta' dak ir-Regolament għall-2015 għandu jiġi ffissat mill-Kummissjoni billi jitnaqqsu mil-limitu massimu nazzjonali annwali stabbilit fl-Anness II ta' dak ir-Regolament l-ammonti massimi ffissati skont l-Artikoli 42, 47, 49, 51 u 53 ta' dak ir-Regolament. Skont l-Artikolu 22(2) tar-Regolament (UE) Nru 1307/2013 kwalunkwe żidiet applikati mill-Istati Membri skont din id-dispożizzjoni għandhom jiġu kkunsidrati.

(5)

Għal kull Stat Membru li jimplimenta l-skema ta' pagament uniku skont l-erja prevista fil-Kapitolu 1 tat-Titolu III tar-Regolament (UE) Nru 1307/2013, il-limitu massimu nazzjonali annwali msemmi fl-Artikolu 36(4) ta' dak ir-Regolament għall-2015 għandu jiġi ffissat mill-Kummissjoni billi jitnaqqas mil-limitu massimu nazzjonali annwali stabbilit fl-Anness II ta' dak ir-Regolament il-limiti massimi ffissati skont l-Artikoli 42, 47, 49, 51 u 53 ta' dak ir-Regolament.

(6)

Għal kull Stat Membru li jagħti l-pagament ridistributtiv previst fil-Kapitolu 2 tat-Titolu III tar-Regolament (UE) Nru 1307/2013, il-limitu massimu nazzjonali annwali msemmi fl-Artikolu 42(2) ta' dak ir-Regolament għas-sena 2015 għandu jiġi stabbilit mill-Kummissjoni fuq il-bażi tal-perċentwal notifikat minn dawk l-Istati Membri skont l-Artikolu 42(1) ta' dak ir-Regolament.

(7)

Fir-rigward tal-pagament għal prattiki agrikoli li huma ta' benefiċċju għall-klima u l-ambjent previst fil-Kapitolu 3 tat-Titolu III tar-Regolament (UE) Nru 1307/2013 fl-2015, il-limiti massimi nazzjonali annwali msemmija fl- Artikolu 47(3) ta' dak ir-Regolament għall-2015 għandhom jiġu kkalkulati skont l-Artikolu 47(1) ta' dak ir-Regolament u jammontaw għal 30 % tal-limitu massimu nazzjonali tal-Istat Membru rilevanti kif stabbilit fl-Anness II ta' dak ir-Regolament.

(8)

Għal Stati Membri li jagħtu l-pagament għal żoni b'restrizzjonijiet naturali previst fil-Kapitolu 4 tat-Titolu III tar-Regolament (UE) Nru 1307/2013, il-limiti massimi nazzjonali annwali msemmija fl-Artikolu 49(2) ta' dak ir-Regolament għall-2015 għandhom jiġu stabbiliti mill-Kummissjoni fuq il-bażi tal-perċentwal notifikat mill-Istati Membri rilevanti skont l-Artikolu 49(1) ta' dak ir-Regolament.

(9)

Fir-rigward tal-pagament għall-bdiewa żgħażagħ, previst fil-Kapitolu 5 tat-Titolu III tar-Regolament (UE) Nru 1307/2013, il-limiti massimi nazzjonali annwali msemmija fl-Artikolu 51(4) ta' dak ir-Regolament għall-2015 għandhom jiġu stabbiliti mill-Kummissjoni fuq il-bażi tal-perċentwal notifikat mill-Istati Membri skont l-Artikolu 51(1) ta' dak ir-Regolament u abbażi ta' massimu ta' 2 % stabbilit f'din l-istess dispożizzjoni.

(10)

Meta l-ammont total tal-pagament għall-bdiewa żgħażagħ applikat fl-2015 fi Stat Membru jaqbeż il-limitu massimu stabbilit skont l-Artikolu 51(4) tar-Regolament (UE) Nru 1307/2013 għal dak l-Istat Membru, id-differenza għandha tiġi ffinanzjata mill-Istat Membru f'konformità mal-Artikolu 51(2) ta' dak ir-Regolament filwaqt li jiġi rrispettat l-ammont massimu stabbilit fl-Artikolu 51(1) ta' dak ir-Regolament. Għal raġunijiet ta' ċarezza, huwa xieraq li jiġi stabbilit dan l-ammont massimu għal kull Stat Membru.

(11)

Għal kull Stat Membru li jagħti l-appoġġ akkoppjat volontarju previst fil-Kapitolu 1 tat-Titolu IV tar-Regolament (UE) Nru 1307/2013 fl-2015, il-Kummissjoni għandha tistabbilixxi l-limitu massimu nazzjonali annwali msemmi fl-Artikolu 53(7) ta' dak ir-Regolament għall-2015 fuq il-bażi tal-perċentwal notifikat mill-Istat Membru rilevanti skont l-Artikolu 54(1) ta' dak ir-Regolament.

(12)

Fir-rigward tas-sena 2015, l-implimentazzjoni ta' skemi diretti ta' appoġġ previsti fir-Regolament (UE) Nru 1307/2013 bdew fl-1 ta' Jannar 2015. Għal raġunijiet ta' konsistenza bejn l-applikabbiltà ta' dak ir-Regolament għas-sena tat-talba 2015 u l-applikabbiltà ta' limiti massimi baġitarji korrispondenti, dan ir-Regolament għandu japplika mill-istess data.

(13)

Il-miżuri stipulati f'dan ir-Regolament huma konformi mal-opinjoni tal-Kumitat għall-Pagamenti Diretti,