(1)

Le Rialachán Cur Chun Feidhme (AE) 2019/1259 (3) ón gCoimisiún, d’fhorchuir an Coimisiún Eorpach dleachtanna frithdhumpála cinntitheacha ar allmhairí feisteas feadáin nó píobáin snáithithe d’iarann teilgthe intuargainte agus d’iarann teilgthe graifíte sféaróidí, cé is moite de bhunpháirteanna feisteas comhbhrú ina n-úsáidtear snáithe méadrach ISO DIN 13 agus comhchumair chiorclacha shnáithithe d’iarann intuargainte gan claibín a bheith orthu, de thionscnamh Dhaon-Phoblacht na Síne (“an tSín”) agus na Téalainne (“an táirge lena mbaineann”).

(2)

Is iad drámh-mhiotal, cóc/leictreachas/gás, gaineamh (le haghaidh múnlú) agus sinc (le haghaidh galbhánú) na príomh-amhábhair ionchuir don táirge lena mbaineann. Leá an drámh-mhiotail is ea an chéad chéim den phróiseas monaraíochta. Ina dhiaidh sin, cuirtear an próiseas múnlaithe i gcrích maille le cruthanna éagsúla a theilgean a dhéantar a scaradh ansin ina gcodanna aonair. Ní mór na táirgí a chur trí phróiseas aineálta fada chun a áirithiú go bhfuil siad intuargainte go leor lena n-úsáid i bhfeidhmeanna ina dteastaíonn friotaíocht in aghaidh suaití agus tonnchreathanna, cuir i gcás agus i bhfeidhmeanna a sheasann aon athrú tapa ar an teocht freisin. Ina dhiaidh sin, is féidir na feistis a ghalbhánú. Cuirtear na céimeanna monaraíochta deiridh i gcrích ansin, lena n-áirítear an snáithiú agus an meaisíniú eile.

(3)

De réir Rialachán Cur Chun Feidhme (AE) 2019/1259, tá an táirgeoir onnmhairiúcháin Síneach Jinan Meide Casting Co., Ltd (“Jinan Meide”), cód breise TARIC (4) B336, faoi réir na mbeart frithdhumpála a fhorchuirtear le Rialachán Cur Chun Feidhme (AE) 2019/1259 ón gCoimisiún.

(4)

Le linn 2021 agus 2022, chuir tionscal an Aontais le haghaidh an táirge chomhchosúil faisnéis faoi bhráid an Choimisiúin maidir le héadáil Odlewnia Zawiercie S.A., táirgeoir an táirge chomhchosúil atá lonnaithe sa Pholainn, ag Meide Group Co., Ltd. (“Meide Group”), cuideachta atá bunaithe sa tSín.

(5)

De réir faisnéis phoiblí, d’fhormheas na húdaráis náisiúnta inniúla (5) an t-idirbheart agus cuireadh i gcrích é (6) ina dhiaidh sin.

(6)

Tá Meide Group gníomhach i dtáirgeadh agus i ndíol an táirge lena mbaineann, i measc táirgí eile. Ina theannta sin, tá Meide Group i mbun allmhairiú agus onnmhairiú a chuid táirgí féin agus táirgí tríú páirtithe freisin (7). Tá an táirge lena mbaineann arna onnmhairiú ag Meide Group ón tSín chuig an Aontas faoi réir na mbeart frithdhumpála arna bhforchur le Rialachán Cur Chun Feidhme (AE) 2019/1259.

(7)

Is cuideachtaí gaolmhara iad Meide Group agus Jinan Meide.

(8)

Dá bhrí sin, mheas an Coimisiún gur ghá na cóid TARIC ábhartha a athrú tar éis chur i gcrích an idirbhirt chun gurbh fhearr ab fhéidir faireachán a dhéanamh ar na hallmhairí, ar na cúiseanna seo thíos.

(9)

Faoi láthair tá an táirge lena mbaineann faoi chód na hAinmníochta Comhcheangailte (“AC”) ex 7307 19 10 (cóid TARIC 7307191010 agus 7307191020).

(10)

Chomh maith leis na cóid TARIC atá faoi réir beart, áirítear sa chód TARIC iarmharach 7307191090 roinnt táirgí, ina measc an dá tháirge a eisiatar go sainráite ó shainmhíniú táirge an táirge lena mbaineann (i.e. bunpháirteanna feisteas comhbhrú ina n-úsáidtear snáithe méadrach ISO DIN 13 agus comhchumair chiorclacha shnáithithe d’iarann teilgthe intuargainte gan claibín a bheith orthu) agus feistis feadáin nó píobáin theilgthe neamhshnáithithe freisin.

(11)

An chéim dheireanach de mhonaraíocht an táirge lena mbaineann is ea an snáithiú. Dá bhrí sin, d’fhéadfaí feistis feadáin nó píobáin theilgthe atá neamhshnáithithe agus leathchríochnaithe a allmhairiú isteach san Aontas faoin gcód TARIC iarmharach, ar cód é nach bhfuil feidhm ag na bearta frithdhumpála maidir leis, agus d’fhéadfaí iad a chur faoin bpróiseas snáithithe laistigh den Aontas ansin.

(12)

Mheas an Coimisiún nach leordhóthanach na sonraí a d’fhéadfaí a aisghabháil ó struchtúr an chóid TARIC atá ann faoi láthair chun faireachán a dhéanamh ar shreafaí allmhairí feisteas feadáin nó píobáin theilgthe neamhshnáithithe ón tSín, toisc go bhfuil siad measctha faoi láthair le líon ard na dtáirgí a thagann faoin gcód TARIC iarmharach 7307191090.

(13)

Dá bhrí sin, ba cheart na cóid TARIC faoi chód AC ex 7307 19 10 a athstruchtúrú ina dtáirgí snáithithe (cóid TARIC 7307191003, 7307191005, 7307191010, 7307191013, 7307191020, 7307191030), nó ina dtáirgí neamhshnáithithe (cóid TARIC 7307191035, 7307191040, 7307191045). Thairis sin, i gcás táirgí snáithithe agus neamhshnáithithe araon, ba cheart a shonrú cé acu atá déanta d’iarann teilgthe intuargainte (cóid TARIC 7307191010 agus 7307191035 faoi seach), d’iarann teilgthe graifíte sféaróidí (cóid TARIC 7307191020 agus 7307191040 faoi seach) nó d’ábhair eile (cóid TARIC 7307191030 agus 7307191045 faoi seach). Ar deireadh, a mhéid a bhaineann leis na feistis feadáin nó píobáin shnáithithe d’iarann teilgthe intuargainte agus d’iarann teilgthe graifíte sféaróidí, ba cheart cóid TARIC nua sonracha a chruthú le haghaidh na dtáirgí a eisiatar go sainráite ó shainmhíniú táirge an táirge lena mbaineann, mar atá bunpháirteanna feisteas comhbhrú ina n-úsáidtear snáithe méadrach ISO DIN 13, d’iarann teilgthe intuargainte (cód TARIC 7307191003), comhchumair chiorclacha shnáithithe d’iarann intuargainte gan claibín a bheith orthu (cód TARIC 7307191005) agus bunpháirteanna feisteas comhbhrú ina n-úsáidtear snáithe méadrach ISO DIN 13, d’iarann teilgthe graifíte sféaróidí (cód TARIC 7307191013).

(14)

Níl aon athrú ar na cóid TARIC a bhfuil feidhm ag na bearta maidir leo — cóid TARIC 7307191010 agus 7307191020 — agus níor cheart ach an tuairisc a nuashonrú go “Eile” chun comhsheasmhacht leis an struchtúr TARIC nua a áirithiú.

(15)

Leis an struchtúr TARIC nua sin, beidh an Coimisiún in ann faireachán a dhéanamh ar bhealach leordhóthanach ar fhorbairt na n-allmhairí feisteas feadáin nó píobáin theilgthe ón tSín, go háirithe sreafaí na n-allmhairí feisteas feadáin nó píobáin theilgthe neamhshnáithithe ón tSín, ar táirgí iad nach bhfuil faoi réir na mbeart frithdhumpála, i gcomparáid le hallmhairí an táirge lena mbaineann atá faoi réir bearta frithdhumpála. Chun a áirithiú go mbeidh na sonraí ar fáil, beidh allmhairí feisteas feadáin nó píobáin theilgthe ón tSín faoi réir faireacháin.

(16)

Tá na bearta dá bhforáiltear sa Rialachán seo i gcomhréir le tuairim an Choiste a bunaíodh le hAirteagal 15(1) de Rialachán (AE) 2016/1036 agus le tuairim Choiste an Chóid Custaim a bunaíodh le hAirteagal 285 de Rialachán (AE) Uimh. 952/2013,