22.6.2021   

MT

Il-Ġurnal Uffiċjali tal-Unjoni Ewropea

L 222/18


DEĊIŻJONI TAL-KUNSILL (PESK) 2021/1009

tal-18 ta’ Ġunju 2021

li temenda d-Deċiżjoni 2013/233/PESK dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya)

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, u b’mod partikolari l-Artikoli 42(4) u 43(2) tiegħu,

Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,

Billi:

(1)

Fit-22 ta’ Mejju 2013 il-Kunsill adotta d-Deċiżjoni 2013/233/PESK (1), li tistabbilixxi l-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya).

(2)

Fid-19 ta’ Jannar 2020, il-Konferenza ta’ Berlin dwar il-Libja adottat lista ta’ konklużjonijiet u stipulat il-qafas għall-implimentazzjoni tagħhom permezz tal-‘Proċess ta’ Berlin’ biex jiġi appoġġat il-pjan bi tliet punti ppreżentat lill-Kunsill tas-Sigurtà tan-Nazzjonijiet Uniti (NU) mir-Rappreżentant Speċjali tas-Segretarju Ġenerali tan-NU Ghassan Salamé, bl-objettiv uniku li jgħin lin-NU fl-unifikazzjoni tal-komunità internazzjonali fl-appoġġ tagħhom għal soluzzjoni paċifika għall-kriżi Libjana.

(3)

Fit-12 ta’ Frar 2020, fir-Riżoluzzjoni tal-Kunsill tas-Sigurtà tan-NU (‘UNSCR’) 2510 (2020), il-Kunsill tas-Sigurtà NU laqa’ l-Konferenza ta’ Berlin dwar il-Libja u approva l-konklużjonijiet tagħha, filwaqt li nnota li dawk il-konklużjonijiet jirrappreżentaw element importanti ta’ soluzzjoni komprensiva għas-sitwazzjoni fil-Libja.

(4)

Fid-29 ta’ Ġunju 2020, fiċ-ċirkostanzi kkawżati mill-pandemija tal-COVID-19, il-Kunsill adotta d-Deċiżjoni (PESK) 2020/903 (2), li testendi l-mandat ta’ EUBAM Libya sat-30 ta’ Ġunju 2021.

(5)

Fil-kuntest tar-rieżami strateġiku ta’ EUBAM Libya, il-Kumitat Politiku u ta’ Sigurtà (KPS) qabel fit-2 ta’ Marzu 2021 li l-Missjoni għandha tiġi estiża b’sentejn sat-30 ta’ Ġunju 2023. Fit-30 ta’ Marzu 2021, il-KPS qabel ukoll li fil-mandat tal-Missjoni, fl-ambitu tal-oqsma ewlenin tal-involviment tagħha (il-ġestjoni tal-fruntieri, l-infurzar tal-liġi u l-ġustizzja kriminali), jiżdied it-tieni objettiv strateġiku li l-isforzi mmexxija min-NU għall-paċi fil-Libja bħala parti mill-Proċess ta’ Berlin jiġu appoġġati, u li kwalunkwe appoġġ futur potenzjali permezz tal-Missjoni jenħtieġ li jiġi deċiż fi stadju aktar tard, abbażi ta’ analiżi strateġika ddedikata ppreżentata mis- Servizz Ewropew għall-Azzjoni Esterna, jekk issir talba formali min-NU jew l-awtoritajiet Libjani.

(6)

Fis-16 ta’ April 2021, fil-UNSCR 2571(2021), il-Kunsill tas-Sigurtà tan-NU appella lill-partijiet kollha biex jimplimentaw bis-sħiħ il-ftehim ta’ waqfien mill-ġlied tat-23 ta’ Ottubru 2020 u ħeġġeġ lill-Istati Membri tan-NU biex jirrispettaw u jappoġġaw l-implimentazzjoni sħiħa ta’ dak il-ftehim, inkluż permezz tal-irtirar tal-forzi barranin u tal-merċenarji kollha mil-Libja mingħajr aktar dewmien. Barra minn hekk, huwa appella lill-Gvern tal-Libja biex itejjeb l-implimentazzjoni tal-embargo fuq l-armi, inkluż fil-punti ta’ dħul kollha, minnufih hekk kif jeżerċita sorveljanza, u lill-Istati Membri kollha tan-NU biex jikkooperaw f’tali sforzi.

(7)

Jenħtieġ li d-Deċiżjoni 2013/233/PESK tiġi emendata skont dan.

(8)

EUBAM Libya ser titmexxa fil-kuntest ta’ sitwazzjoni li tista’ tiddeterjora u li tista’ timpedixxi l-kisba tal-objettivi tal-azzjoni esterna tal-Unjoni kif jinsab fl-Artikolu 21 tat-Trattat.

ADOTTA DIN ID-DEĊIŻJONI:

Artikolu 1

Id-Deċiżjoni 2013/233/PESK hija emendata kif ġej:

(1)

L-Artikolu 2 huwa sostitwit b’dan li ġej:

“Artikolu 2

Objettivi

1.   EUBAM Libya għandha tassisti lill-awtoritajiet Libjani fit-tisħiħ tal-istrutturi tas-sigurtà tal-istat fil-Libja, b’mod partikolari fl-oqsma tal-ġestjoni tal-fruntieri, l-infurzar tal-liġi u l-ġustizzja kriminali bil-għan li tikkontribwixxi għall-isforzi biex jitkissru n-networks tal-kriminalità organizzata involuti b’mod partikolari fil-faċilitazzjoni tal-migrazzjoni illegali, it-traffikar tal-bnedmin u t-terroriżmu fil-Libja u fir-reġjun tal-Mediterran Ċentrali.

2.   EUBAM Libya għandha tappoġġa l-isforzi mmexxija min-Nazzjonijiet Uniti għall-paċi fil-Libja fl-oqsma tal-ġestjoni tal-fruntieri, l-infurzar tal-liġi u l-ġustizzja kriminali.’.

(2)

l-Artikolu 3 huwa emendat kif ġej:

(a)

fil-paragrafu 1, il-kliem introduttorju huwa sostitwit b’dan li ġej:

‘Sabiex jintlaħaq l-objettiv stipulat fl-Artikolu 2(1), EUBAM Libya għandha:’

(b)

jiddaħħal il-paragrafu li ġej:

“1a.   Jekk issir talba formali min-Nazzjonijiet Uniti jew mill-awtoritajiet Libjani, il-Kunsill għandu jiddeċiedi, abbażi ta’ analiżi strateġika ddedikata ppreżentata mis-Servizz Ewropew għall-Azzjoni Esterna, dwar l-appoġġ li għandu jingħata minn EUBAM Libya biex jintlaħaq l-objettiv stipulat fl-Artikolu 2(2).”

(3)

fl-Artikolu 13(1), jiżdied is-subparagrafu li ġej:

‘L-ammont ta’ referenza finanzjarja maħsub biex ikopri n-nefqa ta’ EUBAM Libya mill-1 ta’ Lulju 2021 sat-30 ta’ Ġunju 2023 għandu jkun ta’ EUR 84 850 000 ’;

(4)

fl-Artikolu 16, it-tieni paragrafu huwa sostitwit b’dan li ġej:

‘Hija għandha tapplika sat-30 ta’ Ġunju 2023.’

Artikolu 2

Din id-Deċiżjoni għandha tidħol fis-seħħ fid-data tal-adozzjoni tagħha.

Għandha tapplika mill-1 ta’ Lulju 2021.

Magħmul fi Brussell , il-18 ta’ Ġunju 2021.

Għall-Kunsill

Il-President

J. LEÃO


(1)  Deċiżjoni tal-Kunsill 2013/233/PESK tat-22 ta’ Mejju 2013 dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya) (ĠU L 138, 24.5.2013, p. 15).

(2)  Deċiżjoni tal-Kunsill (PESK) 2020/903 tad-29 ta’ Ġunju 2020 li temenda d-Deċiżjoni 2013/233/PESK dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya) (ĠU L 207, 30.6.2020, p. 32).