European flag

Iris Oifigiúil
an Aontais Eorpaigh

GA

Sraith L


2026/2482

4.11.2026

CINNEADH CUR CHUN FEIDHME (AE) 2026/2482 ÓN gCOMHAIRLE

an 29 Deireadh Fómhair 2026

lena leasaítear Cinneadh Cur Chun Feidhme (AE) 2018/485 a mhéid a bhaineann le síneadh a chur le húdarú don Danmhairg beart speisialta a chur i bhfeidhm de mhaolú ar Airteagal 75 de Threoir 2006/112/CE maidir leis an gcomhchóras cánach breisluacha

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 2006/112/CE ón gComhairle an 28 Samhain 2006 maidir leis an gcomhchóras cánach breisluacha (1), agus go háirithe Airteagal 395(1), an chéad fhomhír, di,

Ag féachaint don togra ón gCoimisiún Eorpach,

De bharr an mhéid seo a leanas:

(1)

Trí bhíthin Chinneadh Cur Chun Feidhme (AE) 2018/485 ón gComhairle (2), údaraíodh an Danmhairg beart speisialta a chur i bhfeidhm lena maolaítear ar Airteagal 75 de Threoir 2006/112/CE chun scéim ráta chomhréidh a chur i bhfeidhm maidir le húsáid phríobháideach feithiclí earraí éadroma a bhfuil uasmheáchan údaraithe foriomlán trí thona acu agus nach bhfuil ach cláraithe le haghaidh gnó (‘an beart speisialta’). Tá an beart speisialta le dul in éag an 31 Nollaig 2026.

(2)

Trí bhíthin litir a cláraíodh leis an gCoimisiún an 31 Márta 2026, d’iarr an Danmhairg údarú chun leanúint den bheart speisialta a chur i bhfeidhm tar éis an 31 Nollaig 2026.

(3)

De bhun Airteagal 395(2), an dara fomhír, de Threoir 2006/112/CE, tharchuir an Coimisiún an iarraidh a rinne an Danmhairg chuig na Ballstáit eile le litreacha dar dáta an 24 Iúil 2026. Le litir dar dáta an 29 Iúil 2026, thug an Coimisiún fógra don Danmhairg go raibh an fhaisnéis uile is gá aige chun breithmheas a dhéanamh ar an iarraidh sin.

(4)

Dá leanfaí den bheart speisialta a chur i bhfeidhm, cheadófaí do dhaoine inchánach a chláraigh feithicil chun críoch gnó amháin an fheithicil sin a úsáid chun críoch príobháideach, agus méid inchánach an tsoláthair mheasta seirbhísí a ríomh de bhun Airteagal 75 de Threoir 2006/112/CE ar bhonn laethúil ráta comhréidh, seachas a gceart a chailleadh chun an cháin bhreisluacha (CBL) a thabhaítear ar chostas ceannaigh na feithicle sin a asbhaint.

(5)

Ba cheart, áfach, an modh áirimh simplithe sin faoin mbeart speisialta a theorannú do 20 lá úsáide chun críoch príobháideach do gach bliain féilire.

(6)

De réir na faisnéise a chuir an Danmhairg ar fáil ina hiarraidh, níor tháinig aon athrú ar an staid fhíorasach a thug údar leis an mbeart speisialta a chur i bhfeidhm. Chuir an Danmhairg tuarascáil faoi bhráid an Choimisiúin in éineacht lena hiarraidh, ina n-athbhreithnítear méid an ráta chomhréidh a bhíonn le híoc in aghaidh an lae chun úsáid phríobháideach a bhaint as feithicil nach bhfuil ach cláraithe le haghaidh gnó. Sa tuarascáil sin, dearbhaíonn an Danmhairg, ar bhonn sonraí atá cothrom le dáta le haghaidh 2024, gurb é atá sa CBL measta iomlán in aghaidh an lae le haghaidh na húsáide príobháidí thart ar DKK 40,3, agus go bhfuil an méid CBL a ghearrtar in aghaidh an lae gan athrú ag DKK 40 dá bhrí sin.

(7)

Áitíonn an Danmhairg gur oibrigh an beart speisialta go han-mhaith le blianta beaga anuas agus go léirítear leis na sonraí le haghaidh 2023, 2024 agus 2025 gur díoladh 37 600, 38 800 agus 38 000 dearbhán lae faoi seach. Dearbhaíonn an Danmhairg freisin go bhfuil sé d’aidhm ag an mbeart speisialta simpliú a dhéanamh ar oibleagáidí CBL daoine inchánacha a bhaineann úsáid phríobháideach ócáideach as feithicil a cláraíodh chun críoch gnó amháin, agus ar an gcaoi sin, simpliú a dhéanamh ar an nós imeachta um CBL a bhailiú. Mar sin féin, d’fhéadfadh duine inchánach rogha a dhéanamh feithicil earraí éadroma a chlárú mar fheithicil a úsáidtear chun críoch gnó agus príobháideach araon. Agus é sin á dhéanamh aige, chaillfeadh an duine inchánach an ceart chun an CBL a thabhaítear ar chostas ceannaigh na feithicle a asbhaint ach ní bheadh sé de cheangal air muirear laethúil a íoc as aon úsáid chun críoch príobháideach.

(8)

Le húdarú an bhirt speisialta, ní bhaintear an ceart de dhaoine inchánacha chun an CBL ar ionchuir a asbhaint go iomlán ar fheithicil atá cláraithe chun críoch gnó amháin agus a úsáidtear ó am go chéile chun críoch úsáide príobháidí agus tá sé comhsheasmhach leis na rialacha ginearálta maidir le hasbhaint mar a leagtar amach i dTreoir 2006/112/CE iad.

(9)

Is iomchuí, dá bhrí sin, síneadh a chur le cur i bhfeidhm an bhirt speisialta. Ba cheart teorainn ama a chur leis an síneadh sin ionas go bhféadfaidh an Coimisiún meastóireacht a dhéanamh ar éifeachtacht agus ar oiriúnacht an bhirt speisialta. Dá bhrí sin, ba cheart údarú an bhirt speisialta a dhul in éag an 31 Nollaig 2029.

(10)

I gcás ina n-iarrfaidh an Danmhairg síneadh breise a chur leis an mbeart speisialta tar éis an 31 Nollaig 2029, ba cheart di tuarascáil a chur faoi bhráid an Choimisiúin in éineacht lena hiarraidh ar shíneadh faoin 31 Márta 2029.

(11)

De réir na faisnéise a chuir an Danmhairg ar fáil, ní bheidh ach éifeacht shuarach ag cur i bhfeidhm an bhirt speisialta ar mhéid foriomlán an ioncaim cánach a bhailíonn an Danmhairg ag céim an tomhaltais deiridh agus ní dhéanfaidh sé dochar d’acmhainní dílse an Aontais a fhabhraíonn ó CBL.

(12)

Dá bhrí sin, ba cheart Cinneadh Cur Chun Feidhme (AE) 2018/485 a leasú dá réir sin,

TAR ÉIS AN CINNEADH SEO A GHLACADH:

Airteagal 1

In Airteagal 3 de Chinneadh Cur Chun Feidhme (AE) 2018/485 ón gComhairle, cuirtear an méid seo a leanas in ionad an dara mír agus an tríú mír:

‘Beidh feidhm aige ón 1 Eanáir 2018 go dtí an 31 Nollaig 2029.

Cuirfear aon iarraidh ar shíneadh a chur leis an mbeart dá bhforáiltear sa Chinneadh seo faoi bhráid an Choimisiúin faoin 31 Márta 2029 agus beidh tuarascáil ag gabháil léi ina mbeidh athbhreithniú ar an mbeart.’.

Airteagal 2

Gabhfaidh éifeacht leis an gCinneadh seo an dáta a thabharfar fógra ina leith.

Airteagal 3

Dírítear an Cinneadh seo chuig Ríocht na Danmhairge.

Arna dhéanamh i Lucsamburg, an 29 Deireadh Fómhair 2026.

Thar ceann na Comhairle

An tUachtarán

D. O’BRIEN


(1)   IO L 347, 11.12.2006, lch. 1, ELI: http://data.europa.eu/eli/dir/2006/112/oj.

(2)  Cinneadh Cur Chun Feidhme (AE) 2018/485 ón gComhairle an 19 Márta 2018 lena n-údaraítear don Danmhairg beart speisialta a chur i bhfeidhm lena maolaítear ar Airteagal 75 de Threoir 2006/112/CE maidir leis an gcomhchóras cánach breisluacha (IO L 81, 23.3.2018, lch. 13, ELI: http://data.europa.eu/eli/dec_impl/2018/485/oj).


ELI: http://data.europa.eu/eli/dec_impl/2026/2482/oj

ISSN 1977-0839 (electronic edition)