(1)

De bhun Airteagal 3 den Chonradh ar an Aontas Eorpach (CAE), is iad aidhmeanna an Aontais, inter alia, folláine mhuintir an Aontais a chur chun cinn agus oibriú ar mhaithe le forbairt inbhuanaithe na hEorpa a bheidh bunaithe, inter alia, ar fhás eacnamaíoch cothrom agus ar gheilleagar sóisialta margaidh ina bhfuil iomaíocht ghéar agus a bhfuil sé mar aidhm aige lánfhostaíocht agus dul chun cinn sóisialta a bhaint amach.

(2)

Déantar foráil in Airteagal 31 den Chairt um Chearta Bunúsacha an Aontais Eorpaigh (‘an Chairt’) don cheart atá ag gach oibrí chun dálaí oibre lena n-urramaítear a shláinte, a shábháilteacht agus a dhínit. Le hAirteagal 27 den Chairt cosnaítear ceart na n-oibrithe chun faisnéise agus chun dul i gcomhairle laistigh den ghnóthas. Le hAirteagal 8 den Chairt, déantar foráil go bhfuil ag gach duine an ceart go ndéanfar na sonraí pearsanta a bhaineann leis nó léi a chosaint. Le hAirteagal 12 den Chairt, déantar foráil go bhfuil ag gach duine an ceart chun saoirse comhthionóil agus comhlachais ar gach leibhéal. Le hAirteagal 16 den Chairt aithnítear an tsaoirse fiontraíochta. Le hAirteagal 21 den Chairt, cuirtear toirmeasc ar idirdhealú.

(3)

Foráiltear le Prionsabal Uimh. 5 de Cholún Eorpach na gCeart Sóisialta (‘an Colún’), a fógraíodh an 17 Samhain 2017 in Göteborg, gan beann ar an gcineál caidrimh fostaíochta atá ag oibrithe ná ar ré an chaidrimh sin, go bhfuil an ceart acu cóir chothrom agus chomhionann a fháil i dtaca le dálaí oibre, le rochtain ar chosaint shóisialta agus le hoiliúint; go n-áiritheofar i gcomhréir leis an reachtaíocht agus le comhaontuithe comhchoiteanna an tsolúbthacht is gá d’fhostóirí chun dul in oiriúint go tapa d’athruithe sa chomhthéacs eacnamaíoch; go gcothófar cineálacha nuálacha oibre lena n-áirithítear dálaí oibre ardcháilíochta, go spreagfar an fhiontraíocht agus an fhéinfhostaíocht; go n-éascófar an tsoghluaisteacht ghairmiúil; agus go bhfuil caidrimh fostaíochta as a dtagann dálaí oibre neamhbhuana le cosc, lena n-áirítear trí mhí-úsáid conarthaí neamhthipiciúla a thoirmeasc. Foráiltear le Prionsabal Uimh. 7 den Cholún go bhfuil sé de cheart ag oibrithe faisnéis a fháil i scríbhinn ag tús na fostaíochta faoina gcearta agus faoina n-oibleagáidí a eascraíonn as an gcaidreamh fostaíochta agus go bhfuil sé de cheart ag oibrithe, roimh aon dífhostú, go gcuirfí ar an eolas iad faoi na cúiseanna atá leis agus go dtabharfaí tréimhse réasúnta fógra dóibh agus an ceart chun rochtain a fháil ar réiteach díospóidí éifeachtach neamhchlaonta agus, i gcás dífhostú gan údar maith, go bhfuil an ceart chun sásaimh acu, lena n-áirítear cúiteamh leordhóthanach. Foráiltear le Prionsabal Uimh. 10 den Cholún go bhfuil an ceart ag oibrithe, inter alia, chun ardleibhéal cosanta a fháil dá sláinte agus dá sábháilteacht ag an obair agus go bhfuil sé de cheart acu a gcuid sonraí pearsanta a chosaint i gcomhthéacs na fostaíochta. Ba dhíol sásaimh do rannpháirtithe Chruinniú Mullaigh Sóisialta Porto an 7 Bealtaine 2021 an Plean Gníomhaíochta a ghabhann leis an gColún.

(4)

Leis an digiteáil, tá athrú ag teacht ar shaol na hoibre, tá feabhas á chur ar an táirgiúlacht agus ar an tsolúbthacht agus baineann rioscaí áirithe leis ó thaobh fostaíochta agus dálaí oibre de ag an am céanna. Leis na teicneolaíochtaí atá bunaithe ar algartaim, lena n-áirítear córais faireacháin uathoibrithe agus córais chinnteoireachta uathoibrithe, rinneadh teacht chun cinn agus fás na n-ardán saothair digiteach a chumasú. Is féidir le cineálacha nua idirghníomhaíochta digití agus teicneolaíochtaí nua i saol na hoibre, má dhéantar iad a rialáil agus a chur chun feidhme go cuí, deiseanna rochtana ar phoist chuibhiúla ardcháilíochta a chruthú do dhaoine nach raibh an rochtain sin acu go traidisiúnta. Mar sin féin, mura ndéantar iad a rialáil, féadfaidh faireachas cumasaithe ag an teicneolaíocht a bheith mar thoradh orthu freisin, féadfaidh siad míchothromaíochtaí cumhachta agus doiléire maidir le cinnteoireacht a mhéadú, agus rioscaí a chruthú do dhálaí oibre cuibhiúla, do shláinte agus sábháilteacht ag an obair, do chóir chomhionann agus don cheart chun príobháideachais.

(5)

Is daoine aonair a dhéanann obair ardáin trí bhonneagar digiteach na n-ardán saothair digiteach a chuireann seirbhís ar fáil dá gcustaiméirí. Déantar obair ardáin i raon leathan réimsí agus is saintréith dí ardleibhéal ilchineálachta a bheith sna cineálacha ardáin saothair dhigitigh, sna hearnálacha a chumhdaítear agus sna gníomhaíochtaí a dhéantar agus i bpróifílí na ndaoine aonair a dhéanann obair ardáin. Trí bhíthin na n-algartam, eagraíonn na hardáin saothair digiteacha a bheag nó a mhór, ag brath ar a samhail ghnó, ar fheidhmiú na hoibre, ar luach saothair na hoibre agus ar an gcaidreamh idir a gcustaiméirí agus na daoine a dhéanann an obair. Is féidir obair ardáin a dhéanamh ar líne trí uirlisí leictreonacha amháin (obair ardáin ar líne) nó ar dhóigh hibrideach ina gcomhcheanglaítear próiseas cumarsáide ar líne le gníomhaíocht ina dhiaidh sin sa domhan fisiciúil (obair ardáin ar an láthair). Is gníomhaithe gnó idirnáisiúnta iad go leor de na hardáin saothair digiteacha atá ann cheana a dhéanann a gcuid gníomhaíochtaí agus a úsáideann samhlacha gnó i roinnt Ballstát nó thar theorainneacha.

(6)

Is féidir le hobair ardáin deiseanna a chur ar fáil chun rochtain a fháil ar an margadh saothair ar bhealach níos éasca, ina ngnóthaítear ioncam breise trí ghníomhaíocht thánaisteach nó roinnt solúbthachta i ndáil le heagrú ama oibre. Ag an am céanna, tá post eile nó foinse eile ioncaim ag formhór na ndaoine a dhéanann obair ardáin agus is gnách go mbíonn siad ar phá íseal. Thairis sin, tá an obair ardáin ag athrú go tapa, rud a fhágann go mbíonn samhlacha nua gnó agus cineálacha nua fostaíochta ann nach gcumhdaítear leis an gcosaint uaireanta ó na córais chosanta atá ann cheana. Dá bhrí sin, tá sé tábhachtach coimircí leordhóthanacha a chur leis an bpróiseas sin do dhaoine a dhéanann obair ardáin, gan beann ar chineál an chaidrimh chonarthaigh. Go háirithe, is féidir dothuarthacht uaireanta oibre a bheith ag baint le hobair ardáin agus is féidir léi na teorainneacha a dhoiléiriú idir an caidreamh fostaíochta agus gníomhaíocht féinfhostaíochta agus idir freagrachtaí na bhfostóirí agus na n-oibrithe. Bíonn iarmhairtí ag mí-aicmiú an stádais fostaíochta do na daoine a ndéantar difear dóibh, toisc gur dócha go gcuirfidh sé srian le rochtain ar chearta saothair agus sóisialta atá ann cheana. Fágann sé freisin go mbíonn éagothroime iomaíochta ann maidir le gnólachtaí a dhéanann a gcuid oibrithe a aicmiú i gceart, agus tá impleachtaí aige sin do chórais caidrimh thionsclaíoch na mBallstát, dá mbonn cánach agus do chumhdach agus d’inbhuanaitheacht a gcóras cosanta sóisialta. Cé go bhfuil na dúshláin sin níos ginearálta ná obair ardáin, tá siad thar a bheith géar agus práinneach i ngeilleagar na n-ardán.

(7)

Léiríodh i gcásanna cúirte i roinnt Ballstát go bhfuil mí-aicmiú leanúnach ann maidir le stádas fostaíochta i gcineálacha áirithe d’obair ardáin, go háirithe in earnálacha ina bhfuil leibhéal áirithe treoraithe agus smachta ag ardáin saothair digiteacha. Cé gur minic a aicmíonn ardáin saothair dhigiteacha na daoine a oibríonn tríothu mar fhéinfhostaithe nó mar ‘chonraitheoirí neamhspleácha’, chinn roinnt mhaith cúirteanna go ndéanann na hardáin na daoine sin a threorú agus a rialú de facto, agus go minic go ndéanann siad iad a chomhtháthú ina bpríomhghníomhaíochtaí gnó. Dá bhrí sin, rinne na cúirteanna sin daoine atá in ainm a bheith ina ndaoine féinfhostaithe a athaicmiú mar oibrithe atá fostaithe ag na hardáin.

(8)

Diaidh ar ndiaidh cuirtear córais faireacháin uathoibrithe agus córais chinnteoireachta uathoibrithe a chumhachtaítear le halgartaim in ionad feidhmeanna a bhíonn ag bainisteoirí i ngnólachtaí, mar shampla cúraimí a shannadh, sannacháin aonair a phraghsáil, sceidil oibre a chinneadh, treoracha a thabhairt, meastóireacht ar an obair a dhéantar, dreasachtaí a chur ar fáil nó cóir dhíobhálach a chur i bhfeidhm. Úsáideann ardáin saothair dhigiteacha, go háirithe, córais algartamacha mar sin mar bhealach caighdeánach chun obair ardáin a eagrú agus a bhainistiú trína mbonneagar. Is minic nach mbíonn faisnéis ar fáil do dhaoine a dhéanann obair ardáin atá faoi réir bainistithe algartamach den sórt sin, maidir leis an gcaoi a n-oibríonn na halgartaim, cé na sonraí pearsanta atá á n-úsáid ná an tionchar a bhíonn ag iompar na ndaoine sin ar chinntí a dhéantar le córais uathoibrithe. Thairis sin, ní bhíonn rochtain ag ionadaithe na n-oibrithe, ag ionadaithe eile na ndaoine a dhéanann obair ardáin, ná ag cigireachtaí saothair ná ag údaráis inniúla eile ar fhaisnéis den sórt sin. Thairis sin, is minic nach mbíonn daoine a dhéanann obair ardáin ar an eolas faoi na cúiseanna a bhíonn le cinntí a dhéantar nó a dtacaítear leo le córais uathoibrithe agus nach mbíonn an deis acu míniú ar na cinntí sin a fháil, na cinntí sin a phlé le duine teagmhála daonna agóid a dhéanamh i gcoinne na cinntí sin ná ceartúchán a lorg nó, i gcás inarb ábhartha, sásamh a lorg.

(9)

Nuair a oibríonn ardáin i roinnt Ballstát nó thar theorainneacha, is minic nach léir cén áit a ndéantar an obair ardáin agus cé a dhéanann an obair sin, go háirithe a mhéid a bhaineann le hobair ardáin ar líne. Ina theannta sin, ní bhíonn rochtain éasca ag na húdaráis ábhartha náisiúnta ar shonraí maidir le hardáin saothair dhigiteacha, lena n-áirítear an líon daoine a dhéanann obair ardáin, a stádas fostaíochta agus a ndálaí oibre. Fágann sé sin gur casta forfheidhmiú na rialacha is infheidhme.

(10)

Le corpas ionstraimí dlí déantar foráil maidir le híoschaighdeáin i dtaca le dálaí oibre agus cearta saothair ar fud an Aontais. Áirítear leis sin, go háirithe, Treoracha 2003/88/CE (4), 2008/104/CE (5) agus (AE) 2019/1152 ó Pharlaimint na hEorpa agus ón gComhairle (6) agus ionstraimí sonracha eile a bhaineann le gnéithe amhail sláinte agus sábháilteacht ag an obair, oibrithe toircheasacha, cothromaíocht oibre is saoil, obair ar théarma seasta, obair pháirtaimseartha, agus oibrithe a phostú. Ina theannta sin, thug Cúirt Bhreithiúnais an Aontais Eorpaigh (‘an Chúirt Bhreithiúnais’) rialú (7) go bhfuiltear le meas gur am oibre é an t-am ‘ar fuireachas’ a bhfuil srian suntasach ar dheiseanna an oibrí gníomhaíochtaí eile a dhéanamh lena linn. Le Treoir 2002/14/CE ó Pharlaimint na hEorpa agus ón gComhairle (8) bunaítear creat ginearálta lena leagtar amach na híoscheanglais maidir leis an gceart chun faisnéise, atá ag fostaithe, agus an ceart chun dul i gcomhairle leo, i ngnóthais nó i mbunaíochtaí laistigh den Aontas.

(11)

I Moladh ón gComhairle an 8 Samhain 2019 (9), moltar do na Ballstáit bearta a ghlacadh chun cumhdach foirmiúil agus éifeachtach, agus leordhóthanacht agus trédhearcacht na scéimeanna cosanta sóisialta a áirithiú do gach oibrí agus do gach duine féinfhostaithe.

(12)

Le Rialachán (AE) 2016/679 ó Pharlaimint na hEorpa agus ón gComhairle (10) áirithítear go gcosnaítear daoine nádúrtha i ndáil le sonraí pearsanta a phróiseáil agus go háirithe cuireann sé cearta agus oibleagáidí áirithe ar fáil mar aon le coimircí i dtaca le próiseáil ar shonraí pearsanta a bheith dleathach, cothrom agus trédhearcach, lena n-airítear maidir le cinnteoireacht aonair uathoibrithe.

(13)

Déanann Rialachán (AE) 2019/1150 ó Pharlaimint na hEorpa agus ón gComhairle (11) cothroime agus trédhearcacht a chur chun cinn ‘d’úsáideoirí gnó’ a bhaineann úsáid as seirbhísí idirghabhála a chuireann oibreoirí ardán ar líne ar fáil.

(14)

Cé go bhforáiltear le gníomhartha dlí de chuid an Aontais atá ann cheana maidir le coimircí ginearálta áirithe, tá gá le roinnt beart sonrach breise chun dul i ngleic leis na dúshláin san obair ardáin. Chun forbairt na hoibre ardáin a dhíriú go leordhóthanach ar bhealach inbhuanaithe, is gá don Aontas íoschearta d’oibrithe ardáin agus rialacha chun feabhas a chur ar chosaint sonraí pearsanta daoine a dhéanann obair ardáin a leagan síos chun aghaidh a thabhairt ar na dúshláin sin. Ba cheart bearta a thabhairt isteach lena n-éascófar stádas ceart fostaíochta na ndaoine a dhéanann obair ardáin san Aontas a chinneadh, agus ba cheart trédhearcacht maidir le hobair ardáin a fheabhsú, lena n-áirítear i gcásanna trasteorann. Ina theannta sin, ba cheart cearta a chur ar fáil do dhaoine a dhéanann obair ardáin arb é is aidhm dóibh trédhearcacht, cothroime, formhaoirseacht dhaonna, sábháilteacht agus cuntasacht a chur chun cinn. Ba cheart na cearta sin a sholáthar freisin ar oibrithe a chosaint agus ar dhálaí oibre i mbainistiú algartamach a fheabhsú, lena n-áirítear cómhargáil a fheidhmiú. Ba cheart é sin a dhéanamh d’fhonn deimhneacht dhlíthiúil a fheabhsú agus ag díriú ar chothrom na Féinne a bhaint amach idir ardáin saothair dhigiteacha agus soláthraithe seirbhísí as líne agus chun tacú le fás inbhuanaithe na n-ardán saothair digiteach san Aontas.

(15)

Rinne an Coimisiún comhairliúchán dhá chéim leis na comhpháirtithe sóisialta, i gcomhréir le hAirteagal 154 den Chonradh ar Fheidhmiú an Aontais Eorpaigh (CFAE), maidir le dálaí oibre a fheabhsú san obair ardáin. Ní raibh aon chomhaontú ann i measc na gcomhpháirtithe sóisialta i dtaobh dul i mbun caibidlíochta maidir leis na hábhair sin. Tá sé tábhachtach, áfach, gníomhú sa réimse sin ar leibhéal an Aontais tríd an gcreat dlíthiúil reatha a oiriúnú d’obair ardáin atá ag teacht chun cinn, lena n-áirítear maidir leis an úsáid a bhaintear as córais faireacháin uathoibrithe agus córais chinnteoireachta uathoibrithe. Ina theannta sin, bhí malartuithe fairsinge ag an gCoimisiún le geallsealbhóirí ábhartha, lena n-áirítear ardáin saothair dhigiteacha, comhlachais daoine a dhéanann obair ardáin, saineolaithe ón saol acadúil, ó na Ballstáit agus ó eagraíochtaí idirnáisiúnta, agus ionadaithe ón tsochaí shibhialta.

(16)

Is é is aidhm don Treoir seo dálaí oibre na n-oibrithe ardáin a fheabhsú agus sonraí pearsanta na ndaoine a dhéanann obair ardáin a chosaint. Tá an dá chuspóir á saothrú go comhuaineach agus, cé go n-atreisíonn siad a chéile agus go bhfuil nasc doscartha eatarthu, ní tánaisteach é ceann amháin le hais an chinn eile. Maidir le hAirteagal 153(1), pointe (b), CFAE, leagtar amach sa Treoir seo rialacha darb aidhm tacú le stádas ceart fostaíochta na ndaoine a dhéanann obair ardáin a chinneadh agus dálaí oibre agus trédhearcacht na hoibre ardáin a fheabhsú, lena n-áirítear i gcásanna trasteorann, chomh maith le cosaint oibrithe i gcomhthéacs bainistiú algartamach. Maidir le hAirteagal 16 CFAE, bunaítear leis an Treoir seo rialacha chun feabhas a chur ar chosaint daoine a dhéanann obair ardáin maidir lena sonraí pearsanta a phróiseáil trí thrédhearcacht, cothroime, formhaoirseacht dhaonna, sábháilteacht agus cuntasacht na nósanna imeachta bainistithe algartamaí ábhartha in obair ardáin a mhéadú.

(17)

Ba cheart feidhm a bheith ag an Treoir seo maidir le daoine a dhéanann obair ardáin san Aontas ag a bhfuil conradh fostaíochta nó caidreamh fostaíochta nó go meastar ar bhonn measúnú ar na fíorais go bhfuil conradh fostaíochta nó caidreamh fostaíochta acu mar a shainmhínítear sa dlí, i gcomhaontuithe comhchoiteanna nó sa chleachtas atá i bhfeidhm sna Ballstáit, agus cásdlí na Cúirte Breithiúnais á chur san áireamh. Na forálacha maidir le bainistiú algartamach a bhaineann le próiseáil sonraí pearsanta, ba cheart feidhm a bheith acu freisin maidir le daoine eile a dhéanann obair ardáin nach bhfuil conradh fostaíochta ná caidreamh fostaíochta acu.

(18)

Ba cheart, leis an Treoir seo, rialacha éigeantacha a bhunú a bheidh infheidhme maidir leis na hardáin saothair dhigiteacha uile, gan beann ar a n-áit bhunaíochta nó ar an dlí is infheidhme ar shlí eile, ar choinníoll gur san Aontas a dhéantar an obair ardáin a eagraítear tríd an ardán saothair digiteach sin.

(19)

Tá ardáin saothair dhigiteacha difriúil le hardáin eile ar líne sa mhéid is go n-úsáideann siad córais faireacháin uathoibrithe nó córais chinnteoireachta uathoibrithe chun obair a eagrú a dhéanann daoine aonair arna iarraidh sin, iarraidh aonuaire nó iarraidh rialta a dhéanann faighteoir na seirbhíse a chuireann an t-ardán ar fáil. Próiseálann córais faireacháin uathoibrithe agus córais chinnteoireachta uathoibrithe sonraí pearsanta na ndaoine a dhéanann obair ardáin agus a dhéanann cinntí a dhéanann difear, i measc nithe eile, do dhálaí oibre nó a thacaíonn leo. Fágann na gnéithe sin gur foirm ar leith é ardáin saothair dhigiteacha chun an soláthar seirbhíse ag gairmithe a eagrú i gcomparáid le cineálacha níos traidisiúnta soláthair seirbhíse a eagrú, cosúil le foirmeacha traidisiúnta glaoite turais nó seoladh seirbhísí iompair. Ina theannta sin, tá an chastacht mhéadaithe in eagrú struchtúrach na n-ardán saothair digiteach fite fuaite lena n-éabhlóid thapa, rud a chruthaíonn go minic córais a bhfuil geoiméadracht athraitheach acu in eagrú na hoibre. Mar shampla, d’fhéadfadh cásanna a bheith ann ina soláthraíonn ardáin saothair dhigiteacha seirbhís arb é a fhaighteoir an t-ardán saothair digiteach féin nó eintiteas gnó ar leith laistigh den ghrúpa céanna gnóthas, nó cásanna ina n-eagraíonn siad obair ar bhealach a dhéanann doiléir na patrúin thraidisiúnta a aithnítear go hiondúil sna córais um sholáthar seirbhísí. D’fhéadfadh sé sin a bheith amhlaidh freisin i gcás ardán micreaoibre nó slua-oibre, ar cineál ardáin saothair dhigitigh ar líne iad a thugann rochtain do ghnólachtaí agus do chliaint eile ar lucht saothair mór solúbtha chun cúraimí beaga a chur i gcrích ar féidir iad a dhéanamh go cianda trí úsáid a bhaint as nasc ríomhaireachta agus idirlín, cosúil le clibeáil. Déantar cúraimí a dheighilt agus a dháileadh ar líon mór daoine aonair (an slua) ar féidir leo iad a chomhlánú go haisioncronach.

(20)

Agus an obair a dhéanann daoine aonair á heagrú ba cheart ról suntasach ar a laghad a thabhairt maidir leis an éileamh ar sheirbhís a mheaitseáil le soláthar na hoibre a dhéanann an duine aonair a bhfuil caidreamh conarthach aige leis an ardán saothair digiteach nó le hidirghabhálaí, gan beann ar a ainmniú foirmiúil ag na páirtithe ná a chineál, agus atá ar fáil chun cúram sonrach a dhéanamh. D’fhéadfadh gníomhaíochtaí eile a chuimsiú in eagrú na hoibre sin, mar shampla íocaíochtaí a phróiseáil, a bheith san áireamh leis sin. Ardáin ar líne nach n-eagraíonn an obair a dhéanann daoine aonair ach nach soláthraíonn ach na modhanna trínar féidir le soláthraithe seirbhísí dul i dteagmháil leis an úsáideoir deiridh, gan aon rannpháirtíocht bhreise ón ardán, mar shampla trí thairiscintí nó iarrataí ar sheirbhísí a fhógairt nó trí sholáthraithe seirbhíse atá ar fáil i réimse áirithe a chomhiomlánú, níor cheart iad a mheas mar ardáin saothair dhigiteacha. An sainmhíniú ar ardáin saothair dhigiteacha, níor cheart soláthraithe seirbhíse a áireamh ann arb é is príomhchuspóir dóibh sócmhainní a shaothrú nó a roinnt, amhail cóiríocht a fháil ar cíos go gearrthéarmach, nó ardáin trínar féidir le daoine aonair nach gairmithe iad earraí a athdhíol, ná níor cheart iad siúd a eagraíonn gníomhaíochtaí oibrithe deonacha a áireamh ann ach oiread. Ba cheart don sainmhíniú a bheith teoranta do sholáthraithe seirbhíse a bhfuil eagrú na hoibre a dhéanann an duine aonair, mar shampla daoine nó earraí a iompar nó glanadh, ina cuid riachtanach agus go bhfuil gá leis an obair agus nach mionghné agus gné choimhdeach amháin é.

(21)

Tá éagsúlachtaí ann ar fud na mBallstát i dtaca le socruithe agus próisis maidir le hionadaíocht oibrithe, éagsúlachtaí a léiríonn a stair, a n-institiúidí agus a staideanna eacnamaíocha agus polaitiúla faoi seach. I measc na gcoinníollacha cumasúcháin le haghaidh idirphlé sóisialta dea-fheidhmiúil, tá ceardchumainn láidre neamhspleácha agus eagraíochtaí fostóirí ag a bhfuil rochtain ar fhaisnéis ábhartha is gá chun páirt a ghlacadh san idirphlé sóisialta agus urraim do chearta bunúsacha na saoirse comhlachais agus na cómhargála.

(22)

De réir Choinbhinsiún Uimh. 135 (1971) d’Ionadaithe Oibrithe na hEagraíochta Idirnáisiúnta Saothair, arna dhaingniú faoi láthair ag 24 Bhallstát, is féidir le hionadaithe oibrithe a bheith ina ndaoine a aithnítear amhlaidh faoin dlí náisiúnta nó faoin gcleachtas náisiúnta, bíodh siad ina n-ionadaithe ceardchumainn, eadhon, ionadaithe arna n-ainmniú nó arna dtoghadh ag ceardchumainn nó ag comhaltaí de na ceardchumainn sin; nó ionadaithe tofa, is é sin ionadaithe a rinne oibrithe an ghnóthais a thoghadh faoi shaoirse i gcomhréir le forálacha na ndlíthe náisiúnta nó na rialachán náisiúnta nó forálacha comhaontuithe comhchoiteanna agus nach n-áirítear ina bhfeidhmeanna gníomhaíochtaí a aithnítear mar shaincheart eisiach na gceardchumann sa tír lena mbaineann. Luaitear sa Choinbhinsiún sin, i gcás ionadaithe ceardchumainn agus ionadaithe tofa a bheith ann san aon ghnóthas amháin, nach bhfuil an ionadaíocht sin le húsáid chun an bonn a bhaint de sheasaimh na gceardchumann lena mbaineann ná de sheasaimh a n-ionadaithe, agus gur cheart comhar a spreagadh idir na hionadaithe tofa agus na ceardchumainn lena mbaineann nó ionadaithe na gceardchumann sin.

(23)

Tá Coinbhinsiún Uimh. 98 (1949) EIS maidir le Ceart Eagrúcháin agus Cómhargála daingnithe ag na Ballstáit, lena bhforáiltear gur mheastar gur gníomhartha cur isteach iad gníomhartha arna n-ainmniú chun bunú eagraíochtaí oibrithe a chur chun cinn faoi cheannas fostóirí nó eagraíochtaí fostóirí, nó chun tacú le heagraíochtaí oibrithe ar mhodhanna airgeadais nó ar mhodhanna eile, agus é mar chuspóir eagraíochtaí mar sin a chur faoi rialú fostóirí nó eagraíochtaí fostóirí, ar gníomhartha cur isteach iad nach mór do Bhallstáit shínitheacha EIS eagraíochtaí oibrithe a chosaint ina gcoinne. Tá sé tábhachtach go dtabharfaí aghaidh ar na gníomhartha sin chun a áirithiú, agus socruithe praiticiúla le haghaidh faisnéise agus comhairliúcháin de bhun na Treorach seo á sainiú nó á gcur chun feidhme, go n-oibríonn fostóirí agus ionadaithe na n-oibrithe de mheon an chomhair agus an aird chuí á tabhairt ar a gcearta agus a n-oibleagáidí cómhalartacha, agus leasanna an ghnóthais nó na bunaíochta agus leasanna na n-oibrithe araon á gcur san áireamh.

(24)

I gcásanna áirithe, maidir le daoine a dhéanann obair ardáin, níl caidreamh conarthach díreach acu leis an ardán saothair digiteach, ach tá siad i gcaidreamh le hidirghabhálaí trína ndéanann siad obair ardáin. Mar thoradh ar an mbealach sin chun obair ardáin a eagrú, is minic a bhíonn raon leathan caidreamh ilpháirtí ann a bhíonn éagsúil agus casta, lena n-áirítear slabhraí fochonraitheoireachta, mar aon le freagrachtaí doiléire idir an t-ardán saothair digiteach agus na hidirghabhálaithe. Na daoine a dhéanann obair ardáin trí idirghabhálaithe, bíonn na rioscaí céanna rompu ó thaobh mhí-aicmiú a stádais fostaíochta de agus ó thaobh córais faireacháin uathoibrithe nó córais chinnteoireachta uathoibrithe de agus daoine a dhéanann obair ardáin go díreach don ardán saothair digiteach. Dá bhrí sin, ba cheart do na Ballstáit bearta iomchuí a bhunú, chun a áirithiú, faoin Treoir seo, go bhfuil an leibhéal céanna cosanta ag daoine a dhéanann obair ardáin atá ag obair trí idirghabhálaithe agus atá ag daoine a dhéanann obair ardáin agus a bhfuil caidreamh conarthach díreach acu leis an ardán saothair digiteach. Ba cheart do na Ballstáit sásraí iomchuí a bhunú, lena n-áirítear, i gcás inarb iomchuí, trí chórais dliteanais chomhpháirteacha agus leithleacha.

(25)

Chun féinfhostaíocht mar dhea san obair ardáin a chomhrac agus chun cinneadh maidir le stádas ceart fostaíochta daoine a dhéanann obair ardáin a éascú, ba cheart nósanna imeachta iomchuí a bheith i bhfeidhm ag na Ballstáit chun cosc a chur ar mhí-aicmiú stádas fostaíochta daoine a dhéanann obair ardáin agus chun aghaidh a thabhairt air sin. Ba cheart é a bheith mar aidhm leis na nósanna imeachta sin a fháil amach an ann do chaidreamh fostaíochta mar a shainmhínítear é sa dlí náisiúnta, i gcomhaontuithe comhchoiteanna nó sa chleachtas agus cásdlí Chúirt Bhreithiúnais an Aontais Eorpaigh á chur san áireamh agus a áirithiú sa chaoi sin go mbainfidh oibrithe ardáin lántairbhe as na cearta fostaíocht céanna agus atá ag oibrithe eile i gcomhréir le dlí ábhartha an Aontais, an dlí náisiúnta agus comhaontuithe comhchoiteanna. Nuair a shuitear gurb ann do chaidreamh fostaíochta ar bhonn na bhfíorais, ba cheart an páirtí nó na páirtithe atá freagrach as oibleagáidí an fhostóra a fheidhmiú a bheith le sainaithint go soiléir agus ba cheart dóibh oibleagáidí comhfhreagracha na bhfostóirí faoi dhlí an Aontais, faoin dlí náisiúnta agus faoi chomhaontuithe comhchoiteanna is infheidhme in earnáil na gníomhaíochta a chomhlíonadh.

(26)

I gcás ina bhfaightear amach gur fostóir é páirtí agus go gcomhlíonann sé na coinníollacha maidir le bheith ina ghníomhaireacht oibre sealadaí i gcomhréir le Treoir 2008/104/CE, beidh feidhm ag na hoibleagáidí faoin Treoir sin.

(27)

Prionsabal thosaíocht na bhfíoras, a chiallaíonn gur cheart gur leis na fíorais a bhaineann leis an obair iarbhír a dhéantar a fhionntar an ann do chaidreamh fostaíochta, lena n-áirítear an luach saothair as an obair, agus ní bunaithe ar an tuairisc a dhéanann na páirtithe ar an gcaidreamh, i gcomhréir le Moladh Uimh. 198 EIS maidir le Caidreamh Fostaíochta (2006), tá an prionsabal sin ábhartha go háirithe i gcás obair ardáin, ina ndéanann páirtí amháin na coinníollacha conarthacha a chinneadh go haontaobhach go minic.

(28)

Is bréagdhearbhú oibre í mí-úsáid stádas daoine féinfhostaithe ar an leibhéal náisiúnta nó i gcásanna trasteorann, agus is minic a bhaineann sé sin le hobair neamhdhearbhaithe. Tarlaíonn féinfhostaíocht mar dhea nuair a dhearbhaítear go bhfuil duine féinfhostaithe cé go gcomhlíonann sé nó sí na coinníollacha is saintréithe de chaidreamh fostaíochta. Is minic a dhéantar dearbhú bréagach féinfhostaíochta chun oibleagáidí dlíthiúla nó fioscacha áirithe a sheachaint nó chun buntáiste iomaíoch a chruthú i gcomparáid le comhghnóthais atá géilliúil don dlí. I roinnt breithiúnais (12), rialaigh an Chúirt Bhreithiúnais nach bhfágann aicmiú ‘duine féinfhostaithe’ faoin dlí náisiúnta nach féidir an duine sin a aicmiú mar oibrí de réir bhrí dhlí an Aontais mura bhfuil ina neamhspleáchas ach neamhspleáchas teoiriciúil, lena ndéantar caidreamh fostaíochta a cheilt.

(29)

Agus cinneadh á dhéanamh maidir le stádas ceart fostaíochta daoine a dhéanann obair ardáin níor cheart go gcuirfí cosc ar fheabhas a chur ar dhálaí fíor-fhéinfhostaithe a dhéanann obair ardáin. Chun na críche sin, is treoir úsáideach í teachtaireacht ón gCoimisiún an 30 Meán Fómhair 2022, ina bhfuil ‘Treoirlínte maidir le cur i bhfeidhm dhlí iomaíochta an Aontais maidir le comhaontuithe comhchoiteanna i dtaca le dálaí oibre daoine féinfhostaithe aonair’ agus ina léirítear, de réir an Choimisiúin, go bhfuil comhaontuithe comhchoiteanna idir daoine féinfhostaithe aonair agus ardáin saothair dhigiteacha a bhaineann le dálaí oibre lasmuigh de raon feidhme Airteagal 101 CFAE. Tá sé ríthábhachtach le tabhairt isteach na gcomhaontuithe comhchoiteanna sin, áfach, nach mbainfear an bonn de na cuspóirí a shaothraítear leis an Treoir seo, go háirithe aicmiú ceart na ndaoine a dhéanann obair ardáin maidir lena stádas fostaíochta.

(30)

Is féidir foirmeacha éagsúla de treorú agus rialú a bheith ann i gcásanna nithiúla, ós rud é go bhfuil samhail gheilleagar na n-ardán ag síorathrú. Cuir i gcás, d’fhéadfadh an t-ardán saothair digiteach treoir agus rialú a chur i bhfeidhm ní hamháin trí mhodhanna díreacha, ach trí bearta pionósacha nó cineálacha eile cóireála díobhálaí nó brú a chur i bhfeidhm freisin. I gcomhthéacs obair ardáin, is minic a bhíonn sé deacair do na daoine a dhéanann obair ardáin rochtain iomchuí a bheith acu ar na huirlisí agus ar an bhfaisnéis is gá chun cineál iarbhír a gcaidrimh chonarthaigh agus na cearta a eascraíonn as a dhearbhú os comhair údarás inniúil. Ina theannta sin, saintréith de bhainistiú na ndaoine a dhéanann obair ardáin trí chórais faireacháin uathoibrithe nó córais chinnteoireachta uathoibrithe is ea an easpa trédhearcachta ón ardán saothair digiteach. I bhfianaise na ngnéithe sin d’obair ardáin buanaítear feiniméan na mí-aicmithe mar fhéinfhostaíocht bhréagach, rud a chuireann bac ar stádas ceart fostaíochta daoine a dhéanann obair ardáin a chinneadh agus ar an rochtain ar dhálaí maireachtála agus oibre cuibhiúla ag oibrithe ardáin. Dá bhrí sin, ba cheart do na Ballstáit bearta a leagan síos lena bhforáiltear d’éascú éifeachtach nós imeachta do dhaoine a dhéanann obair ardáin agus a stádas ceart fostaíochta á gcinneadh acu. Sa chomhthéacs sin, is ionstraim éifeachtach é toimhde dhlíthiúil maidir le caidreamh fostaíochta i bhfabhar na ndaoine a dhéanann obair ardáin, rud a chuireann go mór le feabhas a chur ar dhálaí maireachtála agus oibre na n-oibrithe ardáin. Dá bhrí sin, ba cheart a thoimhdiú ó thaobh an dlí de gur caidreamh fostaíochta é caidreamh conarthach mar a shainmhínítear sa dlí, i gcomhaontuithe comhchoiteanna nó sa chleachtas atá i bhfeidhm sna Ballstáit agus cásdlí na Cúirte Breithiúnais á chur san áireamh, ina n-aimsítear fíorais a léiríonn treorú agus rialú.

(31)

Ceanglaítear le toimhde dhlíthiúil éifeachtach go bhfágann an dlí náisiúnta go bhfuil sé éasca agus éifeachtach do na daoine a dhéanann obair ardáin tairbhe a bhaint as an toimhde. Níor cheart na ceanglais faoin toimhde dhlíthiúil a bheith trom agus ba cheart dóibh deacrachtaí na ndaoine a dhéanann obair ardáin a éascú maidir le fianaise a sholáthar lena léirítear gurb ann do chaidreamh fostaíochta i gcás ina bhfuil éagothroime cumhachta vis-à-vis an t-ardán saothair digiteach. Is é cuspóir na toimhdean dlíthiúla aghaidh a thabhairt go héifeachtach ar an éagothroime cumhachta idir na daoine a dhéanann obair ardáin agus an t-ardán saothair digiteach agus í a chur ina ceart. Ba cheart do na Ballstáit módúlachtaí na toimhdean dlíthiúla a leagan síos, ar choinníoll go n-áirithítear leis na módúlachtaí sin toimhde dhlíthiúil éifeachtach infhrisnéise maidir le fostaíocht a bhunú arb ionann é agus éascú nós imeachta chun tairbhe daoine a dhéanann obair ardáin, agus nach bhfuil sé d’éifeacht acu ualach na gceanglas ar dhaoine a dhéanann obair ardáin nó ar a n-ionadaithe, a mhéadú in imeachtaí lena gcinntear stádas ceart fostaíochta daoine den sórt sin. Níor cheart athaicmiú daoine a dhéanann obair ardáin a theacht go huathoibríoch mar thoradh ar chur i bhfeidhm na toimhdean dlíthiúla. I gcás ina bhféachann an t-ardán saothair digiteach leis an toimhde dhlíthiúil a fhrisnéis, ba cheart gur faoin ardán saothair digiteach a bheadh sé a chruthú nach caidreamh fostaíochta é an caidreamh conarthach atá i gceist mar a shainmhínítear sa dlí, i gcomhaontuithe comhchoiteanna nó sa chleachtas atá i bhfeidhm sna Ballstáit, agus cásdlí na Cúirte Breithiúnais á chur san áireamh.

(32)

I gcomhréir le cuspóir na Treorach seo dálaí oibre d’oibrithe ardáin a fheabhsú, tríd an gcinneadh maidir lena stádas ceart fostaíochta a éascú agus ar an gcaoi sin a áirithiú go bhfuil na cearta ábhartha a eascraíonn as dlí an Aontais, an dlí náisiúnta agus comhaontuithe comhchoiteanna á dteachtadh acu, ba cheart feidhm a bheith ag an toimhde dhlíthiúil i ngach imeacht riaracháin nó breithiúnach ábhartha ina bhfuil stádas fostaíochta an duine a dhéanann obair ardáin i gceist. Cé nach bhforchuirtear aon oibleagáid leis an Treoir seo ar na Ballstáit an toimhde dhlíthiúil a chur i bhfeidhm ar imeachtaí cánach, coiriúla nó slándála sóisialta, tá sé ríthábhachtach go gcuirfear an toimhde dhlithiúil i bhfeidhm go héifeachtach i ngach Ballstát, de bhun na Treorach seo. Go háirithe, níor cheart rud ar bith a bheith sa Treoir seo a chuirfeadh cosc ar na Ballstáit, mar ábhar dlí náisiúnta, an toimhde dhlíthiúil sin a chur i bhfeidhm in imeachtaí cánach, coiriúla nó slándála sóisialta nó in imeachtaí riaracháin nó breithiúnacha eile nó cosc a chur orthu torthaí imeachtaí a aithint inar cuireadh an toimhde dhlíthiúil i bhfeidhm chun cearta a sholáthar d’oibrithe athaicmithe faoi réimsí eile dlí.

(33)

Ar mhaithe le deimhneacht dhlíthiúil, níor cheart aon éifeachtaí dlíthiúla cúlghabhálacha a bheith ag an toimhde dhlíthiúil agus, dá bhrí sin, níor cheart feidhm a bheith aici ach amháin don tréimhse dár tús an 2 Nollaig 2026, lena n-áirítear maidir le caidrimh chonarthacha a rinneadh roimh an dáta sin agus atá fós ar siúl ar an dáta sin. Níor cheart measúnú a dhéanamh, dá bhrí sin, ar éilimh a bhaineann le caidreamh fostaíochta a d’fhéadfadh a bheith ann roimh an dáta sin agus ar na cearta agus na hoibleagáidí a eascraíonn as sin go dtí an dáta sin ach amháin ar bhonn dhlí an Aontais agus an dlí náisiúnta is infheidhme roimh an dáta sin, lena n-áirítear Treoir (AE) 2019/1152.

(34)

An caidreamh idir an duine a dhéanann obair ardáin agus ardán saothair digiteach d’fhéadfaí nach gcomhlíonfadh sé na ceanglais maidir le caidreamh fostaíochta i gcomhréir leis an sainmhíniú a leagtar síos sa dlí, i gcomhaontuithe comhchoiteanna nó sa chleachtas atá i bhfeidhm sa Bhallstát ábhartha agus cásdlí na Cúirte Breithiúnais á chur san áireamh. Ba cheart do na Ballstáit a áirithiú gur féidir an toimhde dhlíthiúil a fhrisnéis, trína chruthú ar bhonn an tsainmhínithe sin, nach caidreamh fostaíochta é an caidreamh atá i gceist. Tá forléargas iomlán ag ardáin dhigiteacha saothair ar na gnéithe fíorasacha uile lena gcinntear cineál dlíthiúil an chaidrimh, go háirithe na halgartaim trína mbainistíonn siad a n-oibríochtaí. Dá bhrí sin, ba cheart an dualgas cruthúnais a bheith ar ardáin saothair digiteacha i gcás ina n-áitíonn siad nach caidreamh fostaíochta é an caidreamh conarthach atá i gceist. Má dhéantar an toimhde dhlíthiúil in imeachtaí breithiúnacha nó riaracháin a fhrisnéis go rathúil, níor cheart go gcuirfí bac ar an toimhde dhlíthiúil a chur i bhfeidhm in imeachtaí breithiúnacha nó in achomhairc ina dhiaidh sin, i gcomhréir leis an dlí nós imeachta náisiúnta.

(35)

Tá sé fíor-riachtanach an toimhde dhlíthiúil a chur chun feidhme go héifeachtach trí chreat de bhearta tacaíochta chun deimhneacht dhlíthiúil agus trédhearcacht a áirithiú do na páirtithe uile lena mbaineann. Ba cheart a áireamh ar na bearta sin faisnéis chuimsitheach a scaipeadh ar an bpobal, treoir a fhorbairt le moltaí nithiúla agus praiticiúla d’ardáin saothair dhigiteacha, do dhaoine a dhéanann obair ardáin, do na comhpháirtithe sóisialta agus d’údaráis náisiúnta inniúla agus rialuithe agus cigireachtaí éifeachtacha a sholáthar, i gcomhréir leis an dlí náisiúnta agus leis an gcleachtas náisiúnta, lena n-áirítear, de réir mar is iomchuí, trí spriocanna a bhunú le haghaidh rialuithe agus cigireachtaí den sórt sin.

(36)

Le bearta den sórt sin, ba cheart tacú leis an bhfionnadh maidir leis an gceist an ann do chaidreamh fostaíochta mar a shainmhínítear sa dlí, i gcomhaontuithe comhchoiteanna nó sa chleachtas atá i bhfeidhm sa Bhallstát i dtrácht agus cásdlí na Cúirte Breithiúnais á chur san áireamh, lena n-áirítear, más iomchuí, aicmiú duine a dhéanann obair ardáin mar fhíor-fhéinfhostaithe a dheimhniú. Chun é a chur ar chumas na n-údarás sin a gcúraimí a chur i gcrích maidir le forálacha na Treorach seo a fhorfheidhmiú, agus aird ar leith á tabhairt ar inniúlacht na mBallstát cinneadh a dhéanamh maidir le soláthar foirne na n-údarás náisiúnta, ní mór foireann leordhóthanach a bheith acu. Chuige sin, ní mór acmhainní daonna leordhóthanacha a chur ar fáil d’údaráis náisiúnta inniúla a bhfuil na scileanna is gá agus an rochtain is gá acu ar oiliúint iomchuí agus saineolas teicniúil a bheith ar fáil i réimse an bhainistithe de réir algartam. Le Coinbhinsiún EIS Uimh. 81 maidir le Cigireacht Saothair (1947), foráiltear do thásca maidir le conas líon leordhóthanach cigirí saothair a chinneadh chun a ndualgais a chomhlíonadh go héifeachtach. Ba cheart do na húdaráis náisiúnta inniúla cinneadh ó údarás náisiúnta inniúil as a n-eascraíonn athrú ar stádas fostaíochta duine a dhéanann obair ardáin a chur san áireamh agus cinneadh á dhéanamh acu maidir le rialuithe agus cigireachtaí a bhfuil sé beartaithe acu a dhéanamh.

(37)

Ba cheart d’údaráis náisiúnta inniúla na mBallstát obair i gcomhar lena chéile, lena n-áirítear trí mhalartú faisnéise, dá bhforáiltear faoin dlí náisiúnta agus faoin gcleachtas náisiúnta, chun a áirithiú go ndéanfar stádas ceart fostaíochta daoine a dhéanann obair ardáin a chinneadh.

(38)

Cé go leagtar síos le Rialachán (AE) 2016/679 an creat ginearálta maidir le daoine nádúrtha a chosaint i ndáil le sonraí pearsanta a phróiseáil, is gá rialacha sonracha a leagan síos chun aghaidh a thabhairt ar na hábhair imní a bhaineann le próiseáil sonraí pearsanta trí bhíthin córais faireacháin uathoibrithe nó córais chinnteoireachta uathoibrithe i gcomhthéacs obair ardáin. Foráiltear cheana féin le hAirteagal 88 de Rialachán (AE) 2016/679 go bhféadfaidh na Ballstáit, de réir an dlí nó trí bhíthin comhaontuithe comhchoiteanna, foráil a dhéanamh do rialacha níos sonraí chun cosaint na gceart agus na saoirsí a áirithiú i leith próiseáil sonraí pearsanta fostaithe i gcomhthéacs na fostaíochta. Déantar foráil sa Treoir seo maidir le coimircí níos sonraí maidir le próiseáil sonraí pearsanta trí bhíthin córais uathoibrithe i gcomhthéacs obair ardáin, agus ar an gcaoi sin foráil a dhéanamh maidir le leibhéal níos airde cosanta sonraí pearsanta na ndaoine a dhéanann obair ardáin. Go háirithe, bunaítear leis an Treoir seo rialacha níos sonraí i ndáil le Rialachán (AE) 2016/679 a mhéid a bhaineann le húsáid agus trédhearcacht maidir le cinnteoireacht uathoibrithe. Bunaítear leis an Treoir seo freisin bearta breise i ndáil le Rialachán (AE) 2016/679 i gcomhthéacs obair ardáin chun cosaint sonraí pearsanta na ndaoine a dhéanann obair ardáin a choimirciú, go háirithe i gcás ina ndéantar cinntí nó ina dtacaítear leo trí phróiseáil uathoibrithe sonraí pearsanta. Ba cheart téarmaí a bhaineann le cosaint sonraí pearsanta sa Treoir seo a thuiscint i bhfianaise na sainmhínithe a leagtar amach i Rialachán (AE) 2016/679.

(39)

Ceanglaítear le hAirteagail 5, 6 agus 9 de Rialachán (AE) 2016/679 go ndéantar sonraí pearsanta a phróiseáil ar bhealach dleathach, cothrom agus trédhearcach. Tugtar le tuiscint leis sin srianta áirithe ar an gcaoi ina bhfuil ardáin saothair dhigiteacha in ann sonraí pearsanta a phróiseáil trí bhíthin córais faireacháin uathoibrithe agus córais chinnteoireachta uathoibrithe. Mar sin féin, i gcás áirithe na hoibre ardáin, ní féidir glacadh leis go bhfuil toiliú na ndaoine a dhéanann obair ardáin tugtha dá ndeoin i dtaobh próiseáil a sonraí pearsanta. Is minic nach mbíonn an rogha iarbhír ag daoine a dhéanann obair ardáin nó nach bhfuil siad in ann toiliú a dhiúltú nó a tharraingt siar gan dochar dá gcaidreamh conarthach, i bhfianaise éagothroime na cumhachta idir an duine a dhéanann obair ardáin agus an t-ardán saothair digiteach. Dá bhrí sin, níor cheart d’ardáin saothair dhigiteacha sonraí pearsanta daoine a dhéanann obair ardáin a phróiseáil ar an mbonn go bhfuil toiliú tugtha ag an duine sin i dtaobh phróiseáil a shonraí pearsanta.

(40)

Níor cheart d’ardáin saothair dhigiteacha, trí bhíthin córais faireacháin uathoibrithe nó aon chóras uathoibrithe a úsáidtear chun cinntí a dhéanamh nó chun tacú le cinntí a dhéanann difear do dhaoine a dhéanann obair ardáin, aon sonraí pearsanta a phróiseáil maidir le staid mhothúchánach nó shíceolaíoch na ndaoine a dhéanann obair ardáin, aon sonraí pearsanta a phróiseáil i ndáil lena gcomhráite príobháideacha, aon sonraí pearsanta a bhailiú fad nach bhfuil obair ardáin á tairiscint nó á déanamh ag na daoine a dhéanann obair ardáin, aon sonraí pearsanta a phróiseáil chun feidhmiú na gceart bunúsach a thuar, lena n-áirítear an tsaoirse comhlachais, an ceart chun cómhargála agus chun gníomhaíochta comhchoitinne nó an ceart chun faisnéise agus comhairliúcháin, mar a shainítear sa Chairt, nó sonraí pearsanta a phróiseáil chun bunadh ciníoch nó eitneach, stádas imirce, tuairimí polaitiúla, creideamh reiligiúnach nó fealsúnach, míchumas, staid sláinte, lena n-áirítear stádas galar ainsealach nó VEID, an stát mothúchánach nó síceolaíoch, ballraíocht i gceardchumann, saol gnéis nó gnéaschlaonadh duine, a chur in iúl.

(41)

Níor cheart d’ardáin saothair dhigiteacha próiseáil a dhéanamh ar shonraí bithmhéadracha daoine a dhéanann obair ardáin chun críche sainaithint a dhéanamh, eadhon céannacht duine a bhunú trína shonraí bithmhéadracha a chur i gcomparáid le sonraí bithmhéadracha roinnt daoine aonair atá stóráilte i mbunachar sonraí (sainaithint amháin as an iliomad). Ní dhéanann sé sin difear don bhféidearthacht atá ag na hardáin saothair dhigiteacha fíorú bithmhéadrach a dhéanamh, eadhon céannacht duine a fhíorú trí chomparáid a dhéanamh idir a shonraí bithmhéadracha agus sonraí a sholáthair an duine céanna roimhe sin (fíorú nó fíordheimhniú duine le duine), i gcás ina bhfuil próiseáil sonraí pearsanta mar sin dleathach faoi Rialachán (AE) 2016/679 nó faoi dhlí ábhartha eile de chuid an Aontais agus faoi dhlí náisiúnta ábhartha eile.

(42)

Is éard atá i gceist le sonraí bithmhéadrachtbhunaithe sonraí pearsanta a eascraíonn as próiseáil theicniúil ar leith agus a bhaineann le gnéithe, comharthaí nó saintréithe fisiciúla, fiseolaíocha nó iompraíochta duine nádúrtha, ar nós gothaí gnúise, gluaiseachtaí, minicíocht bíogtha, guth, eochairbhuillí nó siúl, ar sonraí iad a d’fhéadfadh sainaithint duine nádúrtha a cheadú nó a dheimhniú, nó a mhalairt.

(43)

Agus próiseáil sonraí pearsanta trí chórais faireacháin uathoibrithe nó córais chinnteoireachta uathoibrithe á déanamh ag ardáin saothair dhigiteacha tá gach seans ann go mbeidh ardriosca do chearta agus do shaoirsí daoine a dhéanann obair ardáin dá dheasca. Dá bhrí sin, ba cheart d’ardáin saothair dhigiteacha measúnú tionchair ar chosaint sonraí a dhéanamh i gcónaí i gcomhréir leis na ceanglais a leagtar síos in Airteagal 35 de Rialachán (AE) 2016/679. Agus na héifeachtaí a bhíonn ag cinntí a dhéanann córais chinnteoireachta uathoibrithe ar dhaoine a dhéanann obair ardáin, go háirithe oibrithe ardáin á gcur san áireamh, bunaítear leis an Treoir seo rialacha níos sonraí maidir le dul i gcomhairle le daoine a dhéanann obair ardáin agus lena n-ionadaithe i gcomhthéacs measúnuithe tionchair ar chosaint sonraí.

(44)

Sa bhreis ar na ceanglais a leagtar síos i Rialachán (AE) 2016/679, ba cheart ardáin saothair dhigiteacha a bheith faoi réir oibleagáidí trédhearcachta agus faisnéise i ndáil le córais faireacháin uathoibrithe agus córais uathoibrithe a úsáidtear chun cinntí a dhéanamh nó chun tacú leo, ar cinntí iad a dhéanann difear do dhaoine a dhéanann obair ardáin, lena n-áirítear dálaí oibre oibrithe ardáin, amhail a n-earcú, a rochtain ar shannacháin oibre, a dtuilleamh, a sábháilteacht agus a sláinte, a n-am oibre, a rochtain ar oiliúint, a n-ardú céime nó a choibhéis, agus a stádas conarthach, lena n-áirítear a gcuntas a shrianadh, a fhionraí nó a fhoirceannadh. Ba cheart a shonrú freisin cén cineál faisnéise atá le cur ar fáil do dhaoine a dhéanann obair ardáin maidir leis na córais uathoibrithe sin agus maidir leis an bhfoirm inar cheart í a chur ar fáil agus cathain ba cheart í a chur ar fáil. Ba cheart d’oibrithe ardáin aonair an fhaisnéis sin a fháil i bhfoirm ghonta, shimplí agus intuigthe, a mhéid a dhéanann na córais agus a ngnéithe difear díreach dóibh agus, i gcás inarb infheidhme, dá ndálaí oibre, ionas go gcuirfear ar an eolas go héifeachtach iad. Ba cheart an ceart a bheith acu freisin faisnéis chuimsitheach agus mhionsonraithe a iarraidh faoi na córais ábhartha uile. Ba cheart faisnéis chuimsitheach agus mhionsonraithe i ndáil lena leithéid de chórais uathoibrithe a chur ar fáil freisin d’ionadaithe na ndaoine a dhéanann obair ardáin agus chomh maith leis sin do na húdaráis náisiúnta inniúla arna iarraidh sin dóibh, chun cur ar a gcumas a bhfeidhmeanna a fheidhmiú.

(45)

Anuas ar an gceart chun iniomparthacht sonraí pearsanta a chuir an t-ábhar sonraí ar fáil do rialaitheoir i gcomhréir le hAirteagal 20 de Rialachán (AE) 2016/679, ba cheart an ceart a bheith ag daoine a dhéanann obair ardáin aon sonraí pearsanta a fháil, gan bhac agus i bhformáid struchtúrtha, a úsáidtear go coitianta agus atá inléite ag meaisín, a ghintear trína gcuid oibre i gcomhthéacs córais faireacháin uathoibrithe nó córais chinnteoireachta uathoibrithe ardáin saothair dhigitigh, lena n-áirítear rátálacha agus athbhreithnithe, chun iad a tharchur nó le go dtarchuirfí iad chuig tríú páirtí, lena n-áirítear ardán saothair digiteach eile. Ba cheart d’ardáin saothair dhigiteacha uirlisí a sholáthar do dhaoine a dhéanann obair ardáin chun iniomparthacht éifeachtach sonraí atá saor in aisce a éascú chun a gcearta faoin Treoir seo agus faoi Rialachán (AE) 2016/679 a fheidhmiú.

(46)

I gcásanna áirithe, ní chuireann ardáin saothair dhigiteacha deireadh go foirmiúil lena gcaidreamh le duine a dhéanann obair ardáin, ach cuireann siad srian ar chuntas an duine a dhéanann obair ardáin. Is éard a thuigfear ó shrian a chur ar an gcuntas aon teorann a fhorchuirtear ar cumas an duine sin obair ardáin a dhéanamh tríd an gcuntas, lena n-áirítear srian a chur leis an rochtain ar an gcuntas nó leis an rochtain ar shannacháin oibre.

(47)

Baineann ardáin dhigiteacha saothair úsáid fhorleathan as córais faireacháin uathoibrithe nó córais chinnteoireachta uathoibrithe chun daoine a dhéanann obair ardáin a bhainistiú. Is féidir le faireachán trí mheán leictreonach a bheith cunórach agus, le cinntí a dhéanann nó a dtacaíonn córais mar sin leo, fearacht na gcinntí sin a bhaineann le cúraimí a thairiscint nó a shannadh, an tuilleamh, a sábháilteacht agus a sláinte, a n-am oibre, a rochtain ar oiliúint, ardú céime dóibh nó a stádas laistigh den eagraíocht agus an stádas conarthach, go ndéantar difear díreach do na daoine a dhéanann obair ardáin, ar daoine iad a bhféadfadh sé nach mbeadh teagmháil dhíreach acu le bainisteoir nó maoirseoir daonna. Dá bhrí sin, ba cheart do na hardáin saothair dhigiteacha formhaoirseacht dhaonna a áirithiú agus meastóireacht a dhéanamh go rialta, in aon chás gach 2 bhliain, ar thionchar cinntí aonair a dhéantar nó a fhaigheann tacaíocht ó chórais faireacháin uathoibrithe nó córais chinnteoireachta uathoibrithe lena n-áirítear, i gcás inarb infheidhme, ar a ndálaí oibre agus ar chóir chomhionann ag an obair. Ba cheart baint a bheith ag ionadaithe na n-oibrithe leis an bpróiseas meastóireachta. Ba cheart d’ardáin saothair dhigiteacha acmhainní leordhóthanacha daonna a áirithiú chun críoch formhaoirseacht agus meastóireacht den sórt sin. Na daoine a leagann an t-ardán saothair digiteach de chúram orthu an fheidhm formhaoirseachta a dhéanamh, ba cheart an inniúlacht, an oiliúint agus an t-údarás is gá a bheith acu chun an fheidhm sin a fheidhmiú agus go háirithe an ceart cinntí uathoibrithe a shárú. Ba cheart iad a chosaint ar dhífhostú ar bhearta araíonachta nó ar chóir dhíobhálach eile as a bhfeidhmeanna a fheidhmiú. Ina theannta sin, tá sé tábhachtach go rachadh ardáin saothair dhigiteacha i ngleic leis na heasnaimh chórasacha maidir le húsáid córas faireacháin uathoibrithe agus córais chinnteoireachta uathoibrithe. Dá bhrí sin, nuair a shainaithnítear ó ghníomhaíochtaí na formhaoirseachta go bhfuil ardriosca idirdhealaithe ag an obair, nó sárú ar chearta na ndaoine a dhéanann obair ardáin, ba cheart d’ardáin saothair dhigiteacha bearta iomchuí a dhéanamh chun déileáil leo, lena n-áirítear gur féidir deireadh a chur leis na córais sin.

(48)

Le Rialachán (AE) 2016/679 ceanglaítear ar rialaitheoirí sonraí bearta oiriúnacha a chur chun feidhme chun cearta agus saoirsí agus leasanna dlisteanacha an ábhair sonraí a choimirciú i gcásanna ina bhfuil an duine sin faoi réir cinntí atá bunaithe ar phróiseáil uathoibrithe amháin. Ceanglaítear leis an bhforáil sin ar a laghad go mbeidh an ceart ag an ábhar sonraí idirghabháil ó dhuine a fháil thar ceann an rialaitheora chun a dhearcadh a chur in iúl agus agóid a dhéanamh i gcoinne an chinnidh. Sa bhreis ar na ceanglais a leagtar síos i Rialachán (AE) 2016/679, i gcomhthéacs an bhainistithe algartamaigh agus i bhfianaise an tionchair thromchúisigh ar dhaoine a dhéanann obair ardáin a bhíonn ag cinntí maidir lena gcaidreamh conarthach nó a gcuntas, a chur ar fionraí nó a fhoirceannadh, nó aon chinneadh lena ngabhann díobháil choibhéiseach, ba cheart duine daonna cinntí den sórt sin a dhéanamh i gcónaí.

(49)

Sa bhreis ar cheanglais Rialachán (AE) 2016/679 i gcomhthéacs an bhainistithe algartamaigh in obair ardáin, ba cheart an ceart a bheith ag daoine a dhéanann obair ardáin míniú a fháil, gan moill mhíchuí, ón ardán saothair digiteach ar chinneadh, ar easpa cinnidh nó ar shraith cinntí arna ndéanamh nó arna dtacú ag córais chinnteoireachta uathoibrithe. Chun na críche sin, ba cheart don ardán saothair digiteach an fhéidearthacht a thabhairt do dhaoine a dhéanann obair ardáin na fíorais, na himthosca agus na cúiseanna atá leis na cinntí a phlé agus a shoiléiriú le duine teagmhála daonna san ardán saothair digiteach. Ina theannta sin, is dócha go mbeidh éifeachtaí diúltacha suntasacha ag cinntí áirithe ar dhaoine a dhéanann obair ardáin, go háirithe ar an méid is féidir leo a thuilleamh. Maidir le cinntí chun cuntas duine a dhéanann obair ardáin a shrianadh, a chur ar fionraí nó a fhoirceannadh, diúltú d’íocaíocht as obair a dhéanann an duine sin, nó cinntí a dhéanann difear do ghnéithe bunriachtanacha an chaidrimh chonarthaigh, ba cheart don ardán saothair digiteach ráiteas i scríbhinn faoi na cúiseanna atá le cinntí den sórt sin a sholáthar don duine a dhéanann obair ardáin, a luaithe is féidir agus ar a dhéanaí ar an dáta a mbeidh éifeacht ag cinntí den sórt sin. I gcás nach bhfuil an míniú nó na cúiseanna arna soláthar sásúil nó i gcás ina measann daoine a dhéanann obair ardáin go sáraíonn cinneadh a gcearta, ba cheart an ceart a bheith acu freisin a iarraidh ar an ardán saothair digiteach athbhreithniú a dhéanamh ar an gcinneadh agus freagra cuí-réasúnaithe a fháil gan moill mhíchuí agus in aon chás laistigh de dhá sheachtain ó fuarthas an iarraidh. I gcás ina sáraíonn na cinntí sin cearta na ndaoine sin, amhail a gcearta saothair, a gceart chun neamh-idirdhealaithe nó an ceart chun a sonraí pearsanta a chosaint, ba cheart don ardán digiteach saothair na cinntí sin a cheartú gan moill mhíchuí nó, i gcás nach féidir é sin a dhéanamh, ba cheart dó cúiteamh leordhóthanach a sholáthar as an damáiste a rinneadh, agus na bearta is gá a dhéanamh chun cinntí comhchosúla a sheachaint amach anseo, lena n-áirítear, más iomchuí, modhnú ar úsáid an chórais cinnteoireachta uathoibrithe ábhartha nó gan é a úsáid a thuilleadh. Maidir le hathbhreithniú daonna ar chinntí, ba cheart forlámhas a bheith ag forálacha sonracha Rialachán (AE) 2019/1150 i leith úsáideoirí gnó.

(50)

Le Treoir 89/391/CEE ón gComhairle (13) tugtar isteach bearta chun feabhsuithe ar shábháilteacht agus ar shláinte oibrithe ag an obair a spreagadh, lena n-áirítear an oibleagáid atá ar fhostóirí measúnú a dhéanamh ar na rioscaí sláinte agus sábháilteachta ag an obair, agus leagtar síos leis prionsabail ghinearálta maidir le cosc nach mór d’fhostóirí a chur chun feidhme. D’fhéadfadh tionchar suntasach a bheith ag córais faireacháin uathoibrithe agus córais chinnteoireachta uathoibrithe ar shábháilteacht agus ar shláinte fhisiciúil agus mheabhrach oibrithe ardáin. Géaraíonn an treo algartamach, an mheastóireacht agus an smacht ar an iarracht oibre trí fhaireachán a mhéadú, an luas a theastaíonn ó oibrithe a ardú, bearnaí sa sreabhadh oibre a íoslaghdú, agus gníomhaíocht oibre a leathnú amach ón áit oibre agus ó uaireanta oibre traidisiúnta. De dheasca úsáid na gcóras faireacháin uathoibrithe agus na gcóras cinnteoireachta uathoibrithe, is é sin úsáid na n-algartam neamh-thrédhearcach, an diansaothrú oibre agus an neamhdheimhneacht oibre, is beag deis a bheith ag an lucht saothair a bheith ag foghlaim ag an obair nó tionchar a bheith acu ar a gcúraimí agus is dócha go gcuirfidh an méid sin leis an strus agus leis an imní orthu. Dá bhrí sin, ba cheart d’ardáin saothair dhigiteacha na rioscaí sin a mheas, measúnú a dhéanamh an bhfuil coimircí na gcóras iomchuí chun aghaidh a thabhairt ar na rioscaí sin agus bearta coisctheacha agus cosanta iomchuí a dhéanamh. Ba cheart dóibh a sheachaint go mbeadh brú míchuí ar oibrithe nó go gcuirfí a sláinte i mbaol mar thoradh ar na córais sin a úsáid. Chun éifeachtacht na bhforálacha sin a neartú, ba cheart don ardán saothair digiteach a meastóireacht riosca agus a measúnú ar na bearta maolaitheacha a chur ar fáil d’oibrithe ardáin, dá n-ionadaithe agus do na húdaráis inniúla.

(51)

Bíonn daoine a dhéanann obair ardáin, go háirithe in obair ardáin ar an láthair, neamhchosanta ar bhaol foréigin agus ciaptha, gan ionad oibre fisiciúil a bheith acu ina bhfuil siad in ann gearáin a dhéanamh. D’fhéadfadh tionchar diúltach a bheith ag an gciapadh agus ag an ngnéaschiapadh ar shláinte agus ar shábháilteacht oibrithe ardáin. Ba cheart do na Ballstáit, mar sin, foráil a dhéanamh maidir le bearta coisctheacha, lena n-áirítear bealaí tuairiscithe éifeachtacha a bhunú. Moltar do na Ballstáit freisin tacú le bearta éifeachtacha chun foréigean agus ciapadh san obair ardáin a chomhrac agus, go háirithe, bealaí tuairiscithe iomchuí a áireamh do dhaoine a dhéanann obair ardáin agus ar daoine iad nach bhfuil caidreamh fostaíochta acu.

(52)

Is den ríthábhacht é faisnéis a chur ar fáil agus comhairliúchán a dhéanamh le hionadaithe na n-oibrithe, arna rialú ar leibhéal an Aontais de bhun Threoir 2002/14/CE, chun idirphlé sóisialta éifeachtach a chothú. Nuair a thugtar isteach nó nuair a dhéantar athruithe suntasacha ar an úsáid a bhaineann ardáin saothair dhigiteacha as córais faireacháin uathoibrithe agus córais chinnteoireachta uathoibrithe bíonn tionchar díreach aige sin ar eagrú na hoibre agus ar dhálaí oibre aonair na n-oibrithe ardáin, agus mar gheall air sin ní mór bearta breise a dhéanamh chun a áirithiú go gcuirfidh ardáin saothair dhigiteacha ionadaithe oibrithe ardáin ar an eolas agus go rachaidh siad i gcomhairle leo go héifeachtach, ar an leibhéal iomchuí, sula ndéantar na cinntí sin. I bhfianaise chastacht theicniúil na gcóras bainistithe algartamach, ba cheart faisnéis a thabhairt in am trátha chun a chur ar chumas ionadaithe oibrithe ardáin ullmhú le haghaidh comhairliúcháin, agus cúnamh á fháil acu ó shaineolaí arna roghnú ag na hoibrithe ardáin nó a n-ionadaithe ar bhealach comhbheartaithe i gcás inar gá. Ní dhéanann an Treoir seo difear do na bearta faisnéise agus comhairliúcháin dá bhforáiltear i dTreoir 2002/14/CE.

(53)

I gcás nach bhfuil ionadaithe ag oibrithe, ba cheart an t-ardán saothair digiteach a bheith in ann na hoibrithe féin a chur ar an eolas go díreach faoi tabhairt isteach nó athrú substaintiúil ar úsáid córas faireacháin uathoibrithe agus córas cinnteoireachta uathoibrithe.

(54)

Is daoine féinfhostaithe iad roinnt de na daoine a dhéanann obair ardáin. An tionchar a bhíonn ag córais faireacháin uathoibrithe agus córais chinnteoireachta uathoibrithe a úsáideann ardáin saothair dhigiteacha ar chosaint sonraí pearsanta agus deiseanna tuillimh daoine féinfhostaithe, tá an tionchar comhchosúil leis an tionchar ar oibrithe ardáin. Dá bhrí sin, na cearta a leagtar síos sa Treoir seo a bhaineann le cosaint daoine nádúrtha i ndáil le próiseáil sonraí pearsanta i gcomhthéacs bainistiú algartamach, eadhon iad siúd a bhaineann le trédhearcacht i ndáil le córais faireacháin uathoibrithe agus córais chinnteoireachta uathoibrithe, srianta ar shonraí pearsanta a phróiseáil nó a bhailiú, faireachán agus athbhreithniú daonna ar chinntí suntasacha, ba cheart feidhm a bheith acu freisin maidir le daoine a dhéanann obair ardáin nach bhfuil caidreamh fostaíochta acu. Na cearta a bhaineann le sláinte agus sábháilteacht ag an obair, faisnéis a thabhairt d’oibrithe ardáin nó dá n-ionadaithe agus dul i gcomhairle leo, ar cearta iad a bhaineann go sonrach le hoibrithe de bhun dhlí an Aontais, níor cheart feidhm a bheith acu maidir le daoine a dhéanann obair ardáin agus ar daoine iad nach bhfuil caidreamh fostaíochta acu. Cuireann Rialachán (AE) 2019/1150 coimircí ar fáil maidir le cothroime agus trédhearcacht do dhaoine féinfhostaithe a dhéanann obair ardáin, ar choinníoll go meastar gur úsáideoirí gnó iad de réir bhrí an Rialacháin sin. Maidir leis an athbhreithniú daonna ar chinntí suntasacha, ba cheart forlámhas a bheith ag forálacha sonracha Rialachán (AE) 2019/1150 i leith úsáideoirí gnó.

(55)

Tá feidhm ag oibleagáidí na n-ardán saothair digiteach, lena n-áirítear maidir le faisnéis agus comhairliúchán i leith córais faireacháin uathoibrithe agus córais chinnteoireachta uathoibrithe, gan beann ar cé acu is ardán saothair digiteach féin a bhainistíonn córais den sórt sin nó is soláthraí seirbhíse seachtrach a dhéanann próiseáil sonraí thar ceann an ardáin saothair dhigitigh.

(56)

Chun gur féidir leis na húdaráis inniúla náisiúnta a áirithiú go gcomhlíonann ardáin saothair dhigiteacha reachtaíocht agus rialacháin saothair, go háirithe má tá siad bunaithe i mBallstát seachas sa Bhallstát ina ndéanann an oibrí ardáin an obair nó i dtríú tír, ba cheart d’ardáin saothair dhigiteacha an obair a dhéanann oibrithe ardáin a dhearbhú d’údaráis inniúla an Bhallstáit ina ndéantar an obair. Is den ríthábhacht freisin é gur ann do chóras córasach trédhearcach chun faisnéis a sholáthar, lena n-áirítear ar an leibhéal trasteorann, chun iomaíocht mhíchothrom idir ardáin saothair dhigiteacha a chosc. Maidir leis an oibleagáid i ndáil le hobair ardáin a dhéanann oibrithe ardáin a dhearbhú de bhun na Treorach seo, níor cheart é a chur in ionad na n-oibleagáidí maidir le dearbhuithe nó fógraí a thabhairt arna mbunú le gníomhartha dlí de chuid an Aontais.

(57)

Rannchuidíonn an tÚdarás Eorpach Saothair, arna bhunú le Rialachán (AE) 2019/1149 ó Pharlaimint na hEorpa agus ón gComhairle (14), le soghluaisteacht chothrom an lucht saothair a áirithiú ar fud an Aontais, éascaíonn sé go háirithe an comhar agus an malartú faisnéise idir na Ballstáit d’fhonn dlí ábhartha an Aontais a chur i bhfeidhm agus a fhorfheidhmiú ar bhealach comhsheasmhach éifeachtúil éifeachtach, comhordaíonn sé cigireachtaí comhbheartaithe comhpháirteacha agus tacaíonn sé leo, déanann sé anailísí agus measúnú riosca ar shaincheisteanna a bhaineann le soghluaisteacht trasteorann an lucht saothair agus tacaíonn sé leis na Ballstáit dul i ngleic le hobair neamhdhearbhaithe. Dá bhrí sin, bíonn ról tábhachtach aige agus aghaidh á tabhairt ar na dúshláin a bhaineann leis na gníomhaíochtaí trasteorann a dhéanann roinnt mhaith ardáin saothair dhigiteacha chomh maith leis na dúshláin a bhaineann le hobair neamhdhearbhaithe in obair ardáin.

(58)

An fhaisnéis maidir leis an obair ardáin arna déanamh ag daoine a dhéanann obair trí ardáin saothair dhigiteacha, maidir le líon na ndaoine sin, maidir lena stádas conarthach nó fostaíochta agus na téarmaí agus coinníollacha ginearálta is infheidhme do na caidrimh chonarthacha sin, tá an fhaisnéis sin fíor-riachtanach chun tacú le húdaráis ábhartha eile chun stádas ceart fostaíochta na ndaoine a dhéanann obair ardáin a chinneadh agus chun a áirithiú go gcomhlíonfar na hoibleagáidí dlíthiúla chomh maith le hionadaithe na ndaoine a dhéanann obair ardáin i bhfeidhmiú a bhfeidhmeanna ionadaíocha. Ba cheart an ceart a bheith ag na húdaráis agus ag na hionadaithe sin freisin soiléiriú agus mionsonraí breise a iarraidh ar ardáin saothair dhigiteacha maidir leis an bhfaisnéis a chuirtear ar fáil.

(59)

Tá fianaise ann i roinnt Ballstát go mbíonn obair neamhdhearbhaithe á déanamh in ardáin seachadta. Is trí fhéiniúlachtaí ar cíos a dhéantar sin, is é sin daoine a bhfuil an ceart acu obair a dhéanamh, cláraíonn siad ar an ardán saothair digiteach agus ligeann siad a gcuntais amach ar cíos d’imircigh gan doiciméid nó do mhionaoisigh. Fágann sé sin gur lú an chosaint a bhíonn ag na daoine sin, lena n-áirítear daoine is náisiúnaigh tríú tír atá ag fanacht go neamhdhleathach, ar minic a tharlaíonn sé go dteorannaítear a rochtain ar an gceartas cionn is go mbíonn eagla orthu go ndéanfaí frithbheart orthu nó go ndéanfaí iad a dhíbirt. I dTreoir 2009/52/CE ó Pharlaimint na hEorpa agus ón gComhairle (15) déantar foráil maidir le caighdeáin íosta i ndáil le smachtbhannaí agus bearta i gcoinne fostóirí náisiúnach tríú tír atá ag fanacht go neamhdhleathach. Leis na hoibleagáidí trédhearcachta agus na rialacha maidir le hidirghabhálaithe a leagtar síos sa Treoir seo, in éineacht le Treoir 2009/52/CE, rannchuidítear go mór chun aghaidh a thabhairt ar shaincheist na hoibre neamhdhearbhaithe san obair ardáin. Ina theannta sin, tá sé ríthábhachtach go n-áiritheoidh ardáin saothair dhigiteacha go bhfíoraítear céannachtaí na ndaoine a dhéanann obair ardáin.

(60)

Tá córas cuimsitheach forálacha forfheidhmiúcháin forbartha don acquis sóisialta san Aontas, ar cheart gnéithe de a chur i bhfeidhm maidir leis an Treoir seo chun a áirithiú go mbeidh rochtain ag oibrithe ardáin ar phróiseas réitigh díospóidí tráthúil éifeachtach neamhchlaonta agus ceart chun sásaimh acu, cúiteamh leordhóthanach as an damáiste a rinneadh san áireamh. Go sonrach, ag féachaint do chineál bunúsach an chirt cosaint dlí éifeachtach a fháil, ba cheart leanúint den chosaint sin a thabhairt do dhaoine a dhéanann obair ardáin fiú agus deireadh tagtha leis an gcaidreamh fostaíochta nó le caidreamh conarthach eile as ar tháinig aon sárú a líomhnaíodh a bheith déanta ar chearta faoin Treoir seo.

(61)

Ba cheart d’ionadaithe daoine a dhéanann obair ardáin a bheith in ann, i gcomhréir leis an dlí náisiúnta agus an cleachtas náisiúnta, ionadaíocht a dhéanamh ar dhuine amháin nó ar roinnt daoine a dhéanann obair ardáin in aon nósanna imeachta breithiúnach nó riaracháin chun aon cheann de na cearta nó na hoibleagáidí a eascraíonn as an Treoir seo a fhorfheidhmiú. Bealach chun imeachtaí a éascú is ea éilimh a thionscnamh thar ceann roinnt oibrithe a dhéanann obair ardáin nó tacaíocht a thabhairt dóibh nach ndéanfaí murach sin de bharr bacainní nós imeachta agus airgeadais nó mar gheall ar eagla go ndéanfaí íospairt.

(62)

Saintréith den obair ardáin is ea nach mbíonn ionad oibre coitianta ann inar féidir le daoine a dhéanann obair ardáin aithne a chur ar a chéile agus cumarsáid a dhéanamh le chéile agus lena n-ionadaithe, d’fhonn a leasanna a chosaint i ndáil leis an ardán saothair dhigitigh freisin. Is gá dá bhrí sin, bealaí cumarsáide digiteacha a chruthú, i gcomhréir le heagrú oibre na n-ardán saothair digiteach, inar féidir le daoine a dhéanann obair ardáin cumarsáid a dhéanamh go príobháideach slán le chéile agus inar féidir lena n-ionadaithe teagmháil a dhéanamh leo. Ba cheart d’ardáin saothair dhigiteacha na bealaí cumarsáide sin a chruthú laistigh dá mbonneagar digiteach nó trí mhodhanna éifeachtacha ar an gcuma chéanna agus cosaint sonraí pearsanta á hurramú ag an am céanna agus staonadh ó rochtain a fháil ar na teachtaireachtaí sin nó faireachán a dhéanamh orthu.

(63)

In imeachtaí riaracháin nó breithiúnacha maidir leis na cearta agus na hoibleagáidí a leagtar síos sa Treoir seo, leis na heilimintí a bhaineann le heagrú na hoibre, fágtar gur féidir an stádas ceart fostaíochta a chinneadh, agus go háirithe cé acu a stiúrann nó a rialaíonn an t-ardán saothair digiteach eilimintí áirithe d’fheidhmiú na hoibre, chomh maith le heilimintí eile maidir le húsáid córas faireacháin uathoibrithe agus córas cinnteoireachta uathoibrithe, a d’fhéadfadh a bheith i seilbh an ardáin saothair dhigitigh agus gan rochtain éasca orthu a bheith ag na daoine a dhéanann obair ardáin ná ag údaráis inniúlachta. Ba cheart mar sin na cúirteanna náisiúnta nó na húdaráis inniúla a bheith in ann ordú a thabhairt don ardán saothair digiteach aon fhianaise ábhartha atá faoina rialú a nochtadh lena n-áirítear faisnéis rúnda, faoi réir bearta éifeachtacha chun faisnéis den sórt sin a chosaint.

(64)

Ós rud é go ndéantar foráil sa Treoir seo do rialacha níos sonraí agus rialacha breise maidir le Rialachán (AE) 2016/679 i gcomhthéacs obair ardáin chun cosaint sonraí pearsanta na ndaoine a dhéanann obair ardáin a áirithiú, ba cheart do na húdaráis mhaoirseachta dá bhforáiltear de bhun Airteagal 51 de Rialachán (AE) 2016/679 a bheith inniúil chun faireachán a dhéanamh ar chur i bhfeidhm na gcoimircí sin. Ba cheart feidhm a bheith ag creat nós imeachta Rialachán (AE) 2016/679, go háirithe Caibidlí VI, VII agus VIII de, maidir le rialacha níos sonraí agus rialacha breise na Treorach seo a fhorfheidhmiú, go háirithe i dtaca le sásraí maoirseachta, comhair agus comhsheasmhachta, leigheasanna, dliteanas agus pionóis, lena n-áirítear an inniúlacht fíneálacha riaracháin a fhorchur suas leis an méid dá dtagraítear in Airteagal 83(5) den Rialachán sin.

(65)

Baineann córais faireacháin uathoibrithe agus córais chinnteoireachta uathoibrithe a úsáidtear i gcomhthéacs obair ardáin le próiseáil sonraí pearsanta na ndaoine a dhéanann obair ardáin, agus déanann siad difear do dhálaí oibre agus do chearta na n-oibrithe ardáin, rud a tharraingíonn anuas saincheisteanna maidir leis an dlí i ndáil le cosaint sonraí, agus i ndáil le réimsí dlí eile, amhail dlí an tsaothair. Ba cheart d’údaráis mhaoirseachta um chosaint sonraí agus d’údaráis inniúla eile dá réir sin comhoibriú, lena n-áirítear ar an leibhéal trasteorann, chun an Treoir seo a fhorfheidhmiú, lena n-áirítear trí fhaisnéis ábhartha a mhalartú, gan difear a dhéanamh do neamhspleáchas na n-údarás maoirseachta um chosaint sonraí.

(66)

Chun éifeachtacht na cosanta dá bhforáiltear sa Treoir seo a áirithiú, tá sé fíor-riachtanach daoine a dhéanann obair ardáin, a fheidhmíonn a gcearta faoi seach dá bhforáiltear sa Treoir seo, a chosaint ar dhífhostú, nó ar fhoirceannadh a gconartha, agus ar aon ghníomh a bhfuil éifeacht choibhéiseach aige, lena n-áirítear an cuntas a chur ar fionraí.

(67)

Ós rud é nach féidir leis na Ballstáit cuspóir dúbailte na Treorach seo, eadhon dálaí oibre a fheabhsú san obair ardáin agus sonraí pearsanta a chosaint, a ghnóthú go leordhóthanach agus, de bharr gur gá comhcheanglais íosta a bhunú, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(68)

Leis an Treoir seo, leagtar síos ceanglais íosta, sa chaoi nach ndéantar aon athrú ar shaincheart na mBallstát forálacha atá níos fabhraí a thabhairt isteach agus a choinneáil do dhaoine a dhéanann obair ardáin. Ba cheart feidhm fós a bheith ag cearta a fuarthas faoin gcreat reachtúil atá ann cheana, lena n-áirítear maidir le sásraí chun a fháil amach an ann do chaidreamh fostaíochta, mura dtugtar forálacha níos fabhraí isteach leis an Treoir seo. Ní féidir cur chun feidhme na Treorach seo a úsáid chun maolú ar na cearta atá ann cheana féin agus a leagtar amach i ndlí an Aontais nó sa dlí náisiúnta atá ann cheana sa réimse seo, ná ní fhéadfaidh sé a bheith mar fhorais bhailí chun leibhéal ginearálta na cosanta sa réimse a chumhdaítear sa Treoir seo, ná na sainchumais a thugtar cheana féin d’ionadaithe na n-oibrithe, a laghdú.

(69)

Tá neamhspleáchas na gcomhpháirtithe sóisialta le hurramú. Ba cheart na Ballstáit a bheith in ann a cheadú do na comhpháirtithe sóisialta, faoi choinníollacha sonracha, comhaontuithe comhchoiteanna atá éagsúil le forálacha áirithe na Treorach seo a choinneáil, a chaibidliú, a thabhairt i gcrích agus a fhorfheidhmiú, agus cosaint fhoriomlán oibrithe ardáin á hurramú ag an am céanna.

(70)

I gcur chun feidhme na Treorach seo, ba cheart do na Ballstáit staonadh ó shrianta riaracháin, airgeadais agus dlíthiúla neamhriachtanacha a fhorchur ar bhealach lena gcuirfí bac ar bhunú agus ar fhorbairt fiontar beaga agus meánmhéide (FBManna). Dá bhrí sin, tugtar cuireadh do na Ballstáit measúnú a dhéanamh ar an tionchar atá ag a mbearta trasuite ar FBManna d’fhonn a áirithiú nach mbeidh éifeacht dhíréireach aige orthu, agus aird faoi leith á tabhairt ar mhicrifhiontair agus ar an ualach riaracháin.

(71)

Ba cheart na Ballstáit a bheith in ann cur chun feidhme na Treorach seo a chur ar iontaoibh na gcomhpháirtithe sóisialta, i gcás ina n-iarrann na comhpháirtithe sóisialta go comhpháirteach é sin a dhéanamh agus ar choinníoll go ndéanann na Ballstáit gach beart is gá chun a áirithiú go bhféadfaidh siad na torthaí arna lorg faoin Treoir seo a ráthú i gcónaí. Ba cheart dóibh freisin, i gcomhréir leis an dlí náisiúnta agus leis an gcleachtas náisiúnta, bearta leormhaithe a dhéanamh chun a áirithiú go mbeidh na comhpháirtithe sóisialta rannpháirteach go héifeachtach agus chun an t-idirphlé sóisialta a chur chun cinn agus a fheabhsú d’fhonn an Treoir seo a chur chun feidhme.

(72)

I gcomhréir le Dearbhú Comhpháirteach Polaitiúil an 28 Meán Fómhair 2011 ó na Ballstáit agus ón gCoimisiún maidir le doiciméid mhíniúcháin (16), ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur leis an bhfógra maidir lena mbearta trasuite, ar doiciméid iad lena mínítear an gaol idir codanna de threoir agus páirteanna comhfhreagracha na n-ionstraimí náisiúnta trasuite. I ndáil leis an Treoir seo measann an reachtóir go bhfuil údar cuí le doiciméid den sórt sin a tharchur.

(73)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (17) agus d’fhoilsigh an Maoirseoir barúlacha foirmiúla an 2 Feabhra 2022,