(1)

Le Rialachán (CE) Uimh. 1831/2003 foráiltear d’údarú breiseán lena n-úsáid i gcothú ainmhithe agus do na forais agus na nósanna imeachta chun an t-údarú sin a dheonú. Foráiltear le hAirteagal 10 den Rialachán sin d’athmheastóireacht a dhéanamh ar bhreiseáin arna n-údarú de bhun Threoir 70/524/CEE ón gComhairle (2).

(2)

Údaraíodh monaláráit soirbíotáin gan teorainn ama mar bhreiseán beathaithe le haghaidh gach speiceas ainmhí i gcomhréir le Treoir 70/524/CEE. Ina dhiaidh sin cuireadh an breiseán sin i gClár na mbreiseán beathaithe mar tháirge a bhí ann cheana, i gcomhréir le hAirteagal 10(1) de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, tíolacadh iarratas le haghaidh athmheastóireacht a dhéanamh ar mhonaláráit soirbíotáin mar bhreiseán beathaithe le haghaidh gach speiceas ainmhí.

(4)

D’iarr an t-iarratasóir go n-aicmeofaí an breiseán sin i gcatagóir na mbreiseán “breiseáin theicneolaíocha” agus sa ghrúpa feidhmiúil “eiblitheoirí”. Bhí na sonraí agus na doiciméid a éilítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(5)

Chinn an tÚdarás Eorpach um Shábháilteacht Bia (“an tÚdarás”) ina thuairimí an 27 Feabhra 2019 (3) agus an 25 Bealtaine 2020 (4), faoi na coinníollacha úsáide atá beartaithe, nach bhfuil tionchar díobhálach ag monaláráit soirbíotáin ar shláinte ainmhithe, ar shábháilteacht tomhaltóirí ná ar an gcomhshaol. Tháinig sé ar an gconclúid freisin go bhfuil an breiseán ina ghreannaitheoir craicinn agus súl. Dá bhrí sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte an duine a chosc, go háirithe maidir le húsáideoirí an bhreiseáin. Tháinig an tÚdarás ar an gconclúid chomh maith ós rud é go bhfuil monaláráit soirbíotáin údaraithe mar bhreiseán beathaithe a bhfuil feidhm eiblithe aige, go bhféadfaí a bheith ag súil leis go réasúnach go bhféachfaí an éifeacht theicneolaíoch is bunús lena úsáid mar bhreiseán beathaithe nuair a úsáidtear i mbeatha é. Ní mheasann an tÚdarás go bhfuil gá le ceanglais shonracha maidir le faireachán iarmhargaidh. Rinne sé an tuarascáil ar na modhanna a úsáidtear chun anailís a dhéanamh ar an mbreiseán beathaithe arna cur isteach ag an Saotharlann Tagartha a bunaíodh le Rialachán (CE) Uimh. 1831/2003 a fhíorú freisin.

(6)

Léirítear leis an measúnú ar mhonaláráit soirbíotáin go gcomhlíontar na coinníollacha maidir le húdarú, dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart úsáid monaláráit soirbíotáin a údarú.

(7)

Ós rud é nach gá, ar chúiseanna sábháilteachta, na modhnuithe ar na coinníollacha údaraithe maidir le monaláráit soirbíotáin a chur i bhfeidhm láithreach, is iomchuí idirthréimhse a cheadú do na páirtithe leasmhara chun gur féidir leo iad féin a ullmhú chun na ceanglais nua a eascraíonn as an údarú a chomhlíonadh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,