(1)

L-Estonja, il-Latvja u l-Litwanja ġew sinkronizzati man-Networks Kontinentali Ewropej fid-9 ta’ Frar 2025. Dawn kienu l-aħħar tliet Stati Membri li n-networks tal-elettriku tagħhom kienu jiddependu fuq pajjiżi terzi (ir-Russja u l-Belarussja).

(2)

Il-proġett ta’ sinkronizzazzjoni tal-Baltiku ilu jiġi appoġġat kontinwament mill-Kummissjoni fl-ogħla livell bħala prijorità għal aktar minn 12-il sena. Dak il-proġett huwa wieħed mill-oqsma ewlenin ta’ ħidma u ta’ riżultati tal-Grupp ta’ Livell Għoli għall-Pjan ta’ Interkonnessjoni tas-Suq tal-Enerġija tal-Baltiku (“BEMIP”, Baltic Energy Market Interconnexion Plan) li ilu jissorvelja mill-qrib l-implimentazzjoni tiegħu fil-livell tekniku u tal-uffiċjali għolja mill-2015.

(3)

Il-proġett ta’ sinkronizzazzjoni tal-Baltiku huwa proġett ta’ interess komuni fil-lista tal-Unjoni tal-proġetti ta’ interess komuni (PCIs, projects of common interest) u tal-proġetti ta’ interess reċiproku (PMIs, projects of mutual interest) f’konformità mal-Artikolu 3 tar-Regolament (UE) 2022/869. L-investimenti relatati mal-karatteristika tal-proġett fir-raggruppament 3.3: “L-integrazzjoni u s-sinkronizzazzjoni tas-sistema tal-elettriku tal-Istati Baltiċi man-networks Ewropej”.

(4)

Minħabba l-importanza tal-proġett, il-Kummissjoni ħatret il-Koordinatur Ewropew għall-Proġett tas-Sinkronizzazzjoni tal-Baltiku bid-Deċiżjoni (UE) 2024/3223 (2).

(5)

Sabiex jiġi żgurat li l-Kummissjoni tkun tista’ tkompli tipprovdi l-appoġġ meħtieġ lill-Istati Membri u lill-promoturi tal-proġetti kkonċernati, huwa meħtieġ li l-mandat tal-Koordinatur Ewropew maħsub apposta għall-proġett ta’ sinkronizzazzjoni tal-Baltiku jiġġedded għal sena.

(6)

Il-persuna maħtura bid-Deċiżjoni (UE) 2024/3223, is-Sinjura Catharina Sikow-Magny, tat prestazzjoni sodisfaċenti matul il-mandat attwali tagħha.

(7)

F’konformità mal-Artikolu 6(1) tar-Regolament (UE) 2022/869, l-Istati Membri kkonċernati bis-sinkronizzazzjoni tal-Baltiku, jiġifieri l-Estonja, il-Latvja, il-Litwanja u l-Polonja, ġew ikkonsultati u esprimew il-qbil tagħhom dwar it-tiġdid tal-mandat tal-Koordinatur Ewropew attwali s-Sa Catharina Sikow-Magny.

(8)

Fil-kuntest tat-tmiem il-mandat li qed jeqreb tal-Koordinatur Ewropew attwali u l-bżonn li tiġi ggarantita kontinwità, jenħtieġ li din id-Deċiżjoni tidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.