(1)

Rinne an Eastóin, an Laitvia agus an Liotuáin sioncrónú le Líonraí Mhór-Roinn na hEorpa an 9 Feabhra 2025. Ba iad sin na trí Bhallstát dheireanacha a raibh a líonraí leictreachais ag brath ar thríú tíortha (an Rúis agus an Bhealarúis).

(2)

Thacaigh an Coimisiún go leanúnach le tionscadal shioncrónú na stát Baltach ar an leibhéal is airde mar thosaíocht le breis agus 12 bhliain anuas. Tá an tionscadal sin ar cheann de phríomhréimsí oibre agus spriocanna insoláthartha an Ghrúpa Ardleibhéil um an bPlean Idirnaisc don Mhargadh Fuinnimh Baltach a bhfuil dlúthmhaoirseacht á déanamh aige ar a chur chun feidhme ar leibhéal na n-oifigeach teicniúil agus sinsearach ó bhí 2015 ann.

(3)

Is tionscadal leasa choitinn é tionscadal shioncronú na stát Baltach atá ar liosta an Aontais de thionscadail leasa choitinn agus tionscadail leasa fhrithpháirtigh i gcomhréir le hAirteagal 3 de Rialachán (AE) 2022/869. Tá na hinfheistíochtaí a bhaineann leis an tionscadal i mbraisle 3.3: ‘Córas leictreach na Stát Baltach a chomhtháthú agus a shioncronú le líonraí na hEorpa’.

(4)

I bhfianaise thábhacht an tionscadail, d’ainmnigh an Coimisiún an Comhordaitheoir Eorpach le haghaidh thionscadal Shioncronú na stát Baltach le Cinneadh (AE) 2024/3223 (2).

(5)

Chun a áirithiú gur féidir leis an gCoimisiún leanúint den tacaíocht is gá a chur ar fáil do na Ballstáit agus do na tionscnóirí tionscadail lena mbaineann, is gá sainordú an Chomhordaitheora Eorpaigh thiomnaithe um thionscadal Shioncrónú na stát Baltach a athnuachan ar feadh bliain amháin.

(6)

An duine arna ainmniú le Cinneadh (AE) 2024/3223, Catharina Sikow-Magny, tá feidhmíocht shásúil bainte amach aici le linn a sainordaithe reatha.

(7)

I gcomhréir le hAirteagal 6(1) de Rialachán (AE) 2022/869, chuathas i gcomhairle leis na Ballstáit a bhfuil baint acu le sioncronú na stát Baltach, mar atá, an Eastóin, an Laitvia, an Liotuáin agus an Pholainn, agus chuir siad in iúl go n-aontaíonn siad le hathnuachan shainordú an Chomhordaitheora Eorpaigh reatha Catharina Sikow-Magny.

(8)

I gcomhthéacs dheireadh shainordú an Chomhordaitheora Eorpaigh reatha atá ag teannadh linn agus an ghá leis an leanúnachas a áirithiú, ba cheart an Cinneadh seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.