(1)

Cuireadh dasaimeit le hIarscríbhinn I a ghabhann le Treoir 98/8/CE ó Pharlaimint na hEorpa agus ón gComhairle (2) mar shubstaint ghníomhach lena húsáid i dtáirgí bithicídeacha de chineál táirge 8 (leasaithigh adhmaid). Dá bhrí sin, de bhun Airteagal 86 de Rialachán (AE) Uimh. 528/2012, measadh an tsubstaint a bheith formheasta faoin Rialachán sin faoi réir na gceanglas a leagtar amach in Iarscríbhinn I a ghabhann le Treoir 98/8/CE. Bhí an t-áireamh sin le dul in éag an 31 Iúil 2022.

(2)

An 26 Eanáir 2021 cuireadh iarratas isteach i gcomhréir le hAirteagal 13(1) de Rialachán (AE) Uimh. 528/2012 chun athnuachan a dhéanamh ar an bhformheas maidir le dasaimeit lena húsáid i dtáirgí bithicídeacha de chineál táirge 8 (‘an t-iarratas’). Is é údarás inniúil na Beilge (‘an t-údarás inniúil meastóireachta’) a rinne meastóireacht ar an iarratas.

(3)

An 14 Meitheamh 2024 chuir an t-údarás inniúil meastóireachta moladh faoi bhráid na Gníomhaireachta Eorpaí Ceimiceán (‘an Ghníomhaireacht’) i ndáil le hathnuachan a dhéanamh ar an bhformheas maidir le dasaimeit.

(4)

I gcomhréir le hAirteagal 75(1), an dara fomhír, pointe (a), de Rialachán (AE) Uimh. 528/2012, ullmhaíonn an Coiste um Tháirgí Bithicídeacha an tuairim ón nGníomhaireacht maidir leis na hiarratais ar athnuachan a dhéanamh ar fhormheas substaintí gníomhacha. An 25 Feabhra 2025 ghlac an Coiste um Tháirgí Bithicídeacha an tuairim ón nGníomhaireacht (3), ag féachaint dó do chonclúidí an údaráis inniúil meastóireachta.

(5)

Sa tuairim uaithi, ba é conclúid na Gníomhaireachta go bhféadfaí coinne a bheith leis go ndéanfaidh táirgí bithicídeacha de chineál táirge 8 ina bhfuil dasaimeit na critéir a leagtar síos in Airteagal 19(1), pointe (b), de Rialachán (AE) Uimh. 528/2012 a chomhlíonadh go fóill, ar choinníoll go gcomhlíonfar coinníollacha áirithe a bhaineann lena n-úsáid. Dá bhrí sin, meastar na coinníollacha a leagtar amach in Airteagal 12(1), arna léamh i gcomhar le hAirteagal 4(1), de Rialachán (AE) Uimh. 528/2012 a bheith comhlíonta.

(6)

Dá bhrí sin, is iomchuí an formheas maidir le dasaimeit lena húsáid i dtáirgí bithicídeacha de chineál táirge 8 a athnuachan faoi réir comhlíonadh coinníollacha áirithe, lena n-áirítear coinníoll maidir le hearraí cóireáilte a chóireáiltear le dasaimeit nó ina n-ionchorpraítear dasaimeit a chur ar an margadh, i gcomhréir le hAirteagal 58(2) agus (3) de Rialachán (AE) Uimh. 528/2012.

(7)

Ba cheart idirthréimhse a shocrú le haghaidh ceanglais nua a bhaineann le hearraí cóireáilte a chur ar an margadh, ar earraí iad a chóireáiltear le dasaimeit nó ina n-ionchorpraítear dasaimeit, chun am leordhóthanach a thabhairt d’oibreoirí eacnamaíocha oiriúnú a dhéanamh.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Tháirgí Bithicídeacha,