European flag

Iris Oifigiúil
an Aontais Eorpaigh

GA

Sraith L


2026/1934

11.8.2026

CINNEADH (AE) 2026/1934 ÓN gCOMHAIRLE

an 13 Iúil 2026

maidir le síniú agus cur i bhfeidhm sealadach an Phrótacail maidir le cur chun feidhme an Chomhaontaithe Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal (2026-2030)

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43, i gcomhar le hAirteagal 218(5) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)

Tugadh an Comhaontú Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal (1) (‘an Comhaontú’) agus an Prótacal maidir le Cur Chun Feidhme an Chomhaontaithe Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal (2020-2026) (2) i gcrích trí bhíthin Chinneadh (AE) 2020/2000 ón gComhairle (3). Chuaigh an Prótacal ó 2020 in éag an 23 Feabhra 2026.

(2)

An 23 Meitheamh 2025, thug an Chomhairle údarás don Choimisiún tús a chur leis an gcaibidlíocht le Poblacht na Séiséal (‘na Séiséil’) maidir le prótacal nua i ndáil le cur chun feidhme an Chomhaontaithe. Tugadh an chaibidlíocht i gcrích go rathúil agus cuireadh inisealacha leis an bPrótacal maidir le cur chun feidhme an Chomhaontaithe Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal (2026-2030) (‘an Prótacal’) mar thoradh uirthi.

(3)

Is é is cuspóir don Phrótacal é a chur ar a gcumas do shoithí de chuid an Aontais iascaireacht a dhéanamh i limistéar iascaireachta na Séiséal agus é a chur ar a gcumas don Aontas agus do na Séiséil oibriú níos dlúithe le chéile chun beartas iascaigh inbhuanaithe a fhorbairt, saothrú freagrach acmhainní iascaigh i limistéar iascaireachta na Séiséal agus san Aigéan Indiach a chur chun cinn, agus rannchuidiú le dálaí oibre cuibhiúla a chruthú i dtionscal na hiascaireachta.

(4)

Dá bhrí sin, ba cheart an Prótacal a shíniú.

(5)

I bhfianaise na tábhachta eacnamaíche a bhaineann le gníomhaíocht iascaireachta an Aontais i limistéar iascaireachta na Séiséal agus an ghá atá ann an tréimhse ina gcuirtear isteach ar ghníomhaíocht den sórt sin a laghdú a mhéid is féidir, ba cheart an Prótacal a chur i bhfeidhm ar bhonn sealadach, go dtí go dtiocfaidh sé i bhfeidhm.

(6)

Ós rud é go gcumhdaíonn an Prótacal níos mó ná 1 bhliain airgeadais amháin, is féidir na gealltanais bhuiséadacha ghaolmhara a mhiondealú ina dtráthchodanna bliantúla ar feadh fhad an Phrótacail, i gcomhréir le hAirteagal 112(2) de Rialachán (AE, Euratom) 2024/2509 ó Pharlaimint na hEorpa agus ón gComhairle (4).

(7)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (5) agus thug sé tuairim uaidh an 3 Iúil 2026 (6),

TAR ÉIS AN CINNEADH SEO A GHLACADH:

Airteagal 1

Leis seo, déantar síniú an Phrótacail maidir le cur chun feidhme an Chomhaontaithe Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal (2026-2030) a údarú, faoi réir thabhairt i gcrích an Phrótacail sin (7).

Airteagal 2

Cuirfear an Prótacal i bhfeidhm ar bhonn sealadach, i gcomhréir le hAirteagal 19 den Phrótacal, ón 27 Iúil 2026, go dtí go dtiocfaidh sé i bhfeidhm.

Airteagal 3

Tiocfaidh an Cinneadh seo i bhfeidhm ar dháta a ghlactha.

Arna dhéanamh sa Bhruiséil, an 13 Iúil 2026.

Thar ceann na Comhairle

An tUachtarán

M. HEYDON


(1)  Comhaontú Comhpháirtíochta Iascaigh Inbhuanaithe idir an tAontas Eorpach agus Poblacht na Séiséal, (IO L 60, 28.2.2020, lch. 5, ELI: http://data.europa.eu/eli/agree_internation/2020/272/oj).

(2)  Prótacal maidir le cur chun feidhme an Chomhaontaithe Comhpháirtíochta maidir le hIascaigh Inbhuanaithe idir an tAontas Eorpach agus Poblacht na Séiséal (2020-2026) (IO L 60, 28.2.2020, lch. 15, ELI: http://data.europa.eu/eli/agree_internation/2020/272/oj).

(3)  Cinneadh (AE) 2020/2000 ón gComhairle an 27 Samhain 2020 thar cheann an Aontais Eorpaigh, maidir le tabhairt i gcrích an Chomhaontaithe Comhpháirtíochta maidir le hIascaigh Inbhuanaithe agus a phrótacal cur chun feidhme (2020-2026) (IO L 413, 8.12.2020, lch. 1, ELI: http://data.europa.eu/eli/dec/2020/2000/oj).

(4)  Rialachán (AE, Euratom) 2024/2509 ó Pharlaimint na hEorpa agus ón gComhairle an 23 Meán Fómhair 2024 maidir leis na rialacha airgeadais is infheidhme maidir le buiséad ginearálta an Aontais (IO L, 2024/2509, 26.9.2024, ELI: http://data.europa.eu/eli/reg/2024/2509/oj).

(5)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).

(6)  Nár foilsíodh fós san Iris Oifigiúil.

(7)  Foilsítear téacs an Phrótacail in IO L, 2026/1935, 11.8.2026, ELI: http://data.europa.eu/eli/agree_prot/2026/1935/oj.


ELI: http://data.europa.eu/eli/dec/2026/1934/oj

ISSN 1977-0839 (electronic edition)