(1)

Tháinig an Comhaontú maidir le hIompar Idirnáisiúnta Earraí Contúirteacha de Bhóthar (ADR) i bhfeidhm an 29 Eanáir 1968. Tháinig an Comhaontú Eorpach maidir le hIompar Idirnáisiúnta Earraí Contúirteacha ar Uiscebhealaí Intíre (ADN) i bhfeidhm an 28 Feabhra 2008.

(2)

De bhun Airteagal 14 den Chomhaontú maidir le hIompar Idirnáisiúnta Earraí Contúirteacha de Bhóthar, tá aon Pháirtí Conarthach in ann leasú amháin nó níos mó ar Iarscríbhínní a ghabhann leis an gComhaontú a mholadh. Féadfaidh an Mheitheal um Iompar Earraí Contúirteacha (‘WP.15’) aon leasuithe den sórt sin a ghlacadh. De bhun Airteagal 20 de ADN, tá aon Pháirtí Conarthach in ann leasú amháin nó níos mó ar na Rialacháin atá i gceangal le ADN a mholadh. Is é an Coiste Riaracháin a bunaíodh faoi ADN (‘Coiste Riaracháin ADN’) an comhlacht atá inniúil chun cinneadh a dhéanamh maidir le glacadh aon leasuithe den sórt sin ar na Rialacháin a ghlacadh.

(3)

Le linn na tréimhse 2 bhliain idir 2004 agus 2026, ghlac WP.15 agus Coiste Riaracháin ADN leasuithe ar na hIarscríbhinní a ghabhann le ADR agus ar na Rialacháin atá i gceangal le ADN, faoi seach, ar tugadh fógra ina leith do Pháirtithe Conarthacha ADR an 1 Iúil 2026 agus do Pháirtithe Conarthacha ADN an 1 Iúil agus an 1 Meán Fómhair 2026.

(4)

De bhun Airteagal 14 de ADR, measfar go nglacfar le leasuithe atá beartaithe ar na hIarscríbhinní mura ndéanfaidh aon trian ar a laghad de na Páirtithe Conarthacha, nó cúig cinn acu má théann aon trian thar an bhfigiúr sin, agóid i gcoinne na leasuithe sin laistigh de thrí mhí ón dáta a scaip Ardrúnaí na Náisiún Aontaithe (‘an tArdrúnaí’) na leasuithe sin. De bhun Airteagal 20 de ADN, measfar gur glacadh le haon dréachtleasú ar na Rialacháin atá i gceangal le ADN mura rud é go ndéanann aon trian ar a laghad de na Páirtithe Conarthacha, nó cúig cinn acu má théann aon trian thar an bhfigiúr sin, agóid i gcoinne na leasuithe sin laistigh de thrí mhí ón dáta a scaip an tArdrúnaí iad.

(5)

Is iomchuí an seasamh atá le glacadh thar ceann an Aontais maidir leis na leasuithe sin ar ADR agus ar ADN a bhunú toisc go mbeidh siad ceangailteach faoin dlí idirnáisiúnta agus toisc go bhféadfaidh siad tionchar cinntitheach a bheith acu ar ábhar dhlí an Aontais, eadhon Treoir 2008/68/CE ó Pharlaimint na hEorpa agus ón gComhairle (1). Leis an Treoir sin, leagtar síos ceanglais le haghaidh iompar earraí contúirteacha de bhóthar, d’iarnród agus ar uiscebhealaí intíre, ceanglais a mbeidh feidhm leo laistigh de na Ballstáit nó eatarthu, trí thagairt a dhéanamh do ADR agus ADN. Ina theannta sin, luaitear sa Treoir sin go bhfuil iompar earraí contúirteacha idir na Ballstáit agus tríú tíortha le húdarú a mhéid a chomhlíonfar ceanglais ADR, na Rialachán maidir le hIompar Idirnáisiúnta Earraí Contúirteacha d’Iarnród (RID) agus ADN. Thairis sin, i gcomhréir le hAirteagal 8 de Threoir 2008/68/CE, tugtar de chumhacht don Choimisiún Iarscríbhinn I, Roinn I.1 agus Iarscríbhinn III, Roinn III.1 a ghabhann le Treoir 2008/68/CE a oiriúnú don dul chun cinn eolaíoch agus teicniúil, go háirithe chun na leasuithe ar ADR, RID nó ADN a chur san áireamh.

(6)

Ní Páirtí Conarthach in ADR ná in ADN é an tAontas. Mar sin féin, ní chuireann sin bac air a inniúlacht a fheidhmiú trí sheasamh a chur ar bun trína institiúidí, seasamh atá le glacadh thar a cheann sa chomhlacht a cuireadh ar bun le ceachtar de na Comhaontuithe, go háirithe trí na Ballstáit ar Páirtithe Conarthacha iad i gceachtar de na Comhaontuithe sin ag gníomhú dóibh go comhpháirteach chun leas an Aontais.

(7)

Is Páirtithe Conarthacha in ADR iad na Ballstáit uile agus cuireann siad i bhfeidhm é, agus is Páirtithe Conarthacha in ADN iad 13 Bhallstát agus cuireann siad i bhfeidhm é.

(8)

Na leasuithe, is é is aidhm dóibh a áirithiú gur go sábháilte éifeachtúil a iomprófar earraí contúirteacha, agus dul chun cinn eolaíoch agus teicniúil san earnáil, chomh maith le forbairt substaintí agus earraí nua a d’fhéadfadh a bheith contúirteach le linn a n-iompartha, á gcur san áireamh. Is cuid lárnach de bheartas coiteann iompair na hEorpa é iompar earraí contúirteacha de bhóthar agus ar uiscebhealaí intíre a fhorbairt, laistigh den Aontas agus idir an tAontas agus tíortha comharsanachta araon, agus áirithítear leis feidhmiú ceart na mbrainsí tionsclaíocha uile a tháirgeann nó a úsáideann earraí atá aicmithe mar earraí contúirteacha faoin gComhaontú maidir le hIompar Idirnáisiúnta Earraí Contúirteacha de Bhóthar nó faoin gComhaontú Eorpach maidir le hIompar Idirnáisiúnta Earraí Contúirteacha ar Uiscebhealaí Intíre.

(9)

Meastar gurb iomchuí na leasuithe le haghaidh iompar sábháilte earraí contúirteacha ar bhealach atá costéifeachtach a áirithiú, tá údar cuí leo agus tá siad tairbhiúil, agus dá bhrí sin ba cheart don Aontas tacú leo.

(10)

Maidir le seasamh an Aontais a mhéid a bhaineann leis na leasuithe ar na hIarscríbhinní a ghabhann le ADR agus leis na leasuithe ar na Rialacháin atá i gceangal le ADN, tá sé le cur in iúl ag na Ballstáit ar Páirtithe Conarthacha iad in ADR agus in ADN, faoi seach, ag gníomhú dóibh go comhpháirteach chun leas an Aontais,