8.11.2021   

GA

Iris Oifigiúil an Aontais Eorpaigh

L 393/13


TREOIR CUR CHUN FEIDHME (AE) 2021/1927 ÓN gCOIMISIÚN

an 5 Samhain 2021

lena leasaítear Iarscríbhinní I agus II a ghabhann le Treoir 66/402/CEE ón gComhairle a mhéid a bhaineann le ceanglais i ndáil le síolta cruithneachta hibridí a tháirgtear trí bhíthin steirilíocht fhireann chíteaplasmach

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 66/402/CEE ón gComhairle an 14 Meitheamh 1966 maidir le síol gránach a mhargú (1), agus go háirithe Airteagal 21b de,

De bharr an mhéid seo a leanas:

(1)

Le Treoir 66/402/CEE bunaítear rialacha maidir le síolta gránach a tháirgeadh agus a mhargú san Aontas. I gcás síolta cruithneachta hibridí, is iad na teicnící chun síolta hibrideacha a tháirgeadh dá bhforáiltear leis an Treoir sin na teicnící a úsáidtear chun crosphórú díreach agus hibridiú ceimiceach a dhéanamh, agus na teicnící sin amháin.

(2)

Le blianta beaga anuas, áfach, glacadh le steirilíocht fhireann chíteaplasmach (“CMS”) ar fud an domhain mar theicníc phórúcháin chun hibridí de chineálacha síolta gránach a tháirgeadh. Tá rialacha ábhartha maidir le teicníc tháirgthe CMS i bhfeidhm cheana féin maidir le heorna, toisc gur cuireadh táirgeadh síolta hibrideacha le CMS i bhfeidhm roinnt blianta ó shin.

(3)

Tá an eorna agus an chruithneacht féinphailnitheach ó dhúchas agus is i saothrú cumaisc a tháirgtear iad. Agus na cosúlachtaí teicniúla idir táirgeadh síolta hibridí eorna agus cruithneachta mar aon le riachtanais úsáideoirí síolta hibrideacha á gcur san áireamh, is iomchuí coinníollacha le haghaidh síolta cruithneachta hibridí atá comhchosúil leis na coinníollacha a bhaineann le síolta hibridí eorna a leagan amach. Maidir le córas táirgthe cumaisc sonrach na cruithneachta hibridí amhail Triticum aestivum fospeiceas aestivum, Triticum turgidum fospeiceas. durum, Triticum aestivum fospeiceas spelta, a úsáidtear ar an láthair, i gcomhar leis na rioscaí a bhaineann leis an aimsir le linn na tréimhse bláthaithe, is léir ón taithí a fuarthas go n-éilíonn an córas táirgthe sin laghdú ar an gcaighdeán íonachta cineáil go 85 %, i gcás ina gcuirtear CMS i bhfeidhm, rud a fhágann gur féidir síolta a tháirgeadh go cobhsaí faoi dhálaí aimsire neamhfhabhracha. Dá bhrí sin, is iomchuí leibhéal níos ísle íonachta cineáil a cheadú le haghaidh síolta cruithneachta hibridí a tháirgtear le CMS ná an leibhéal is gá le haghaidh hibridí de shíolta eile.

(4)

Is léir ón taithí a fuarthas ar shíolta eile de chuid hibridí a táirgeadh trí bhíthin CMS go bhfuil sé tábhachtach tástáil a dhéanamh, ag tús scéime nua táirgthe, ar na ceanglais theicniúla atá i bhfeidhm. Dá bhrí sin, ba cheart na ceanglais maidir le cineálacha a bheith infheidhme ar bhonn sealadach go dtí an 31 Lúnasa 2029, chun go bhféadfaidh na póraitheoirí táirgeadh na cruithneachta hibridí i gcóras cumaisc a oiriúnú. Tá gá le cur chuige den sórt sin chun aon riosca a bhaineann leis an scéim táirgthe sin a íoslaghdú agus chun cineál nua cineálacha cruithneachta a chur ar fáil d’fheirmeoirí. Ba cheart gur leor an teorainn ama sin chun é a chur ar a gcumas do phóraitheoirí agus d’údaráis deimhniúcháin an t-eolas is gá a fháil chun na ceanglais theicniúla maidir le táirgeadh síolta cruithneachta hibridí a chur i bhfeidhm, agus chun athbhreithniú a dhéanamh ar na ceanglais sin.

(5)

Ionas go mbeidh an Coimisiún agus na Ballstáit in ann eolas leordhóthanach a fháil faoi chur i bhfeidhm CMS, agus chun go bhféadfar athbhreithniú a dhéanamh ar na rialacha sin, ba cheart don údarás deimhniúcháin atá freagrach tuarascáil a chur chuig an gCoimisiúin agus chuig na Ballstáit eile gach bliain, go dtí an 28 Feabhra 2030, faoi thorthaí na bliana roimhe sin maidir le cainníocht na síolta hibrideacha a táirgeadh agus faoi chéatadán na luchtóg síolta ar diúltaíodh dóibh de bharr paraiméadair cháilíochta neamh-leordhóthanacha.

(6)

Dá bhrí sin, ba cheart Iarscríbhinn I agus Iarscríbhinn II a ghabhann le Treoir 66/402/CEE a leasú dá réir sin.

(7)

Tá na bearta dá bhforáiltear sa Treoir seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

TAR ÉIS AN TREOIR SEO A GHLACADH:

Airteagal 1

Leasuithe ar Threoir 66/402/CEE

Leasaítear Iarscríbhinn I agus Iarscríbhinn II a ghabhann le Treoir 66/402/CEE i gcomhréir leis an Iarscríbhinn a ghabhann leis an Treoir seo.

Airteagal 2

Trasuí

1.   Na forálacha reachtaíochta, rialúcháin agus riaracháin is gá chun an Treoir seo a chomhlíonadh, déanfaidh na Ballstáit iad a ghlacadh agus a fhoilsiú faoin 31 Lúnasa 2022 ar a dhéanaí. Cuirfidh siad téacs na bhforálacha sin in iúl don Choimisiún láithreach.

Cuirfidh siad na forálacha sin i bhfeidhm ón 1 Meán Fómhair 2022 go dtí an 31 Lúnasa 2029.

Nuair a ghlacfaidh na Ballstáit na forálacha sin, beidh tagairt iontu don Treoir seo nó beidh tagairt den sórt sin ag gabháil leo tráth a bhfoilsithe oifigiúil. Is iad na Ballstáit a chinnfidh an bealach le tagairt den sórt sin a dhéanamh.

2.   Déanfaidh na Ballstáit téacs phríomhfhorálacha an dlí náisiúnta a ghlacfaidh siad sa réimse a chumhdaítear leis an Treoir seo a chur in iúl don Choimisiún.

Airteagal 3

Teacht i bhfeidhm

Tiocfaidh an Treoir seo i bhfeidhm an fichiú lá tar éis lá a foilsithe in Iris Oifigiúil an Aontais Eorpaigh.

Airteagal 4

Seolaithe

Is chuig na Ballstáit a dhírítear an Treoir seo.

Arna dhéanamh sa Bhruiséil, 5 Samhain 2021.

Thar ceann an Choimisiúin

An tUachtarán

Ursula VON DER LEYEN


(1)   IO 125, 11.7.1966, lch. 2309.


IARSCRÍBHINN

Leasaítear Iarscríbhinn I agus Iarscríbhinn II a ghabhann le Treoir 66/402/CEE mar a leanas:

(1)

leasaítear Iarscríbhinn I mar a leanas:

(a)

cuirtear an méid seo a leanas in ionad phointe 5, an chéad abairt:

“Barra chun síol deimhnithe de chuid hibridí de Avena nuda, Avena sativa, Avena strigosa, Oryza sativa agus xTriticosecale féinphailnitheach a tháirgeadh, agus barra chun síol deimhnithe de chuid hibridí de Hordeum vulgare, Triticum aestivum fospeiceas. aestivum, Triticum aestivum fospeiceas. spelta, Triticum turgidum fospeiceas. durum a tháirgeadh trí bhíthin teicníc nach steirilíocht fhireann chíteaplasmach í (‘CMS’);”

(b)

cuirtear isteach an pointe seo a leanas idir pointe 5a agus pointe 6:

“5b.

Barra chun síol bunúsach agus deimhnithe de chuid hibridí de Triticum aestivum subsp. aestivum, Triticum aestivum fospeiceas. spelta, Triticum turgidum fospeiceas. durum a tháirgeadh trí bhíthin CMS:

(a)

Comhlíonfaidh an barr na caighdeáin seo a leanas a mhéid a bhaineann le fanacht slán ó fhoinsí pailine gar dó a bhféadfadh pailniú coimhthíoch neamh-inmhianaithe a theacht astu:

Barr

Fad íosta

Maidir le comhpháirt bhaineann CMS chun síol bunúsach a tháirgeadh

300 m

Chun síol deimhnithe a tháirgeadh

25 m

(b)

Beidh sainaitheantas cineáil agus íonacht cineáil leordhóthanach ag an mbarr a mhéid a bhaineann le saintréithe na gcomhpháirteanna.

Go háirithe, comhlíonfaidh an barr na caighdeáin seo a leanas:

(i)

An céatadán de réir líon na bplandaí, ar plandaí iad nach bhfuil dílis don chineál, ní sháróidh sé:

—

i gcás na mbarr a úsáidtear chun síol bunúsach a tháirgeadh, 0,1 % i gcás an chothabhálaí agus na líne athneartóra agus 0,3 % i gcás chomhpháirt bhaineann CMS;

—

i gcás na mbarr a úsáidtear chun síol deimhnithe a tháirgeadh, 0,3 % i gcás an athneartóra agus 0,6 % i gcás chomhpháirt bhaineann CMS agus 1 % i gcás inar hibrid shimplí í comhpháirt bhaineann CMS.

(ii)

Is é an méid seo a leanas, ar a laghad, a bheidh i leibhéal steirilíochta firinne na comhpháirte baininne:

—

99,7 % i gcás barra a úsáidtear chun síol bunúsach a tháirgeadh;

—

99 % i gcás barra a úsáidtear chun síol deimhnithe a tháirgeadh.

(iii)

Déanfar scrúdú ar an gcomhréireacht le ceanglais phointe (i) agus phointe (ii) trí thástáil iar-rialaithe oifigiúil.

(c)

Féadfar síol deimhnithe a tháirgeadh i saothrú measctha de chomhábhar fireann-steiriúil baineann le comhábhar fireann, rud a athbhunaíonn an torthúlacht.

Faoin 28 Feabhra gach bliain, cuirfidh an t-údarás deimhniúcháin atá freagrach tuarascáil chuig an gCoimisiún agus chuig na Ballstáit eile faoi thorthaí na bliana roimhe sin maidir le cainníocht na síolta hibrideacha a táirgeadh, comhlíonadh na gceanglas sonrach ag na cigireachtaí allamuigh, céatadán na luchtóg síolta ar diúltaíodh dóibh de bharr paraiméadair cháilíochta neamh-leordhóthanacha, agus aon fhaisnéis eile a bheidh mar údar ag an diúltú sin. Beidh an oibleagáid tuairiscithe sin infheidhme go dtí an 28 Feabhra 2030.”

(2)

leasaítear Iarscríbhinn II, pointe 1, mar a leanas:

(a)

cuirtear an méid seo a leanas in ionad Roinn C:

“C.

Hibridí de Avena nuda, Avena sativa, Avena strigosa, Hordeum vulgare, Oryza sativa, Triticum aestivum fospeiceas. aestivum, Triticum aestivum fospeiceas. spelta, Triticum turgidum fospeiceas. durum agus xTriticosecale féinphailnitheach

Is é 90 % a bheidh san íonacht cineáil íosta le haghaidh síol den chatagóir síol deimhnithe.

I gcás Hordeum vulgare, Triticum aestivum fospeiceas. aestivum, Triticum aestivum fospeiceas. spelta, Triticum turgidum fospeiceas. durum a tháirgtear trí bhíthin CMS, is é 85 % a bheidh san íonacht cineáil íosta. Ní sháróidh na heisíontais seachas an t-athneartóir 2 %.

Déanfar scrúdú ar an íonacht cineáil íosta le linn tástálacha iar-rialaithe oifigiúla ar chion iomchuí samplaí.

Faoin 28 Feabhra gach bliain, cuirfidh an t-údarás deimhniúcháin atá freagrach tuarascáil chuig an gCoimisiún agus chuig na Ballstáit eile faoi thorthaí na bliana roimhe sin maidir le cainníocht síolta hibrideacha de Triticum aestivum fospeiceas. aestivum, Triticum aestivum fospeiceas. spelta agus Triticum turgidum fospeiceas. durum a táirgeadh agus maidir le céatadán na luchtóg síolta ar diúltaíodh dóibh de bharr paraiméadair cháilíochta neamh-leordhóthanacha, torthaí na tástála iar-rialaithe agus aon fhaisnéis eile a bheidh mar údar ag an diúltú sin. Beidh an oibleagáid tuairiscithe sin infheidhme go dtí an 28 Feabhra 2030.”

(b)

cuirtear an méid seo a leanas isteach in ionad cheannteideal Roinn E:

“E.

Hibridí de Secale cereale agus hibridí CMS de Hordeum vulgare, Triticum aestivum fospeiceas. aestivum, Triticum aestivum fospeiceas. spelta, Triticum turgidum fospeiceas. Durum ”.