An Bhruiséil,11.3.2024

COM(2024) 111 final

TUARASCÁIL ÓN gCOIMISIÚN CHUIG PARLAIMINT NA hEORPA AGUS CHUIG AN gCOMHAIRLE

maidir le feidhmiú na cumhachta a thugtar don Choimisiún gníomhartha tarmligthe a ghlacadh le Rialachán (AE) 2019/2152 ó Pharlaimint na hEorpa agus ón gComhairle maidir le staidreamh gnó Eorpach


1.RÉAMHRÁ

Le Rialachán (AE) 2019/2152 an 27 Samhain 2019 maidir le staidreamh gnó Eorpach, lena n‑aisghairtear 10 ngníomh dlí i réimse an staidrimh gnó  1 , tugtar de chumhacht don Choimisiún gníomhartha tarmligthe a ghlacadh.

De réir Airteagal 5(2) den Rialachán seo, is féidir an chumhacht sin a úsáid chun: (i) Iarscríbhinn V a ghabhann leis an Rialachán a leasú trí na cineálacha faisnéise staidrimh atá le soláthar ag na húdaráis chánach a shainiú; agus (ii) an Rialachán a fhorlíonadh trí na mionsonraí don fhaisnéis staidrimh atá le soláthar ag na húdaráis chánach i gcomhréir le hIarscríbhinn V a shonrú tuilleadh.

Thairis sin, de réir Airteagal 5(3), is féidir an chumhacht sin a úsáid chun: (i) Iarscríbhinn VI a ghabhann leis an Rialachán a leasú trí na cineálacha faisnéise staidrimh atá le soláthar ag na húdaráis chustaim a shainiú; agus (ii) an Rialachán a fhorlíonadh trí na mionsonraí don fhaisnéis staidrimh atá le soláthar ag na húdaráis chustaim i gcomhréir le hIarscríbhinn V a shonrú tuilleadh.

Ar deireadh, de réir Airteagal 6(4), is féidir an chumhacht sin a úsáid chun na topaicí mionsonraithe a shonraítear in Iarscríbhinn I a ghabhann leis an Rialachán a leasú agus, de réir Airteagal 12(2), chun an Rialachán a leasú tríd an ráta cumhdaigh le haghaidh onnmhairí earraí laistigh den Aontas a laghdú i bhfianaise forbairtí teicniúla agus eacnamaíocha, agus staidreamh a chomhlíonann na caighdeáin cháilíochta atá i bhfeidhm á choinneáil ag an am céanna.

2.BUNÚS DLÍ

Éilítear an tuarascáil seo faoi Airteagal 22(2) de Rialachán (AE) 2019/2152, lena dtugtar de chumhacht don Choimisiún gníomhartha tarmligthe a ghlacadh ar feadh tréimhse 5 bliana ón 6 Eanáir 2020. Déantar tarmligean na cumhachta a fhadú go hintuigthe go ceann tréimhsí comhfhaid, mura rud é go gcuireann Parlaimint na hEorpa nó an Chomhairle in aghaidh an fhadaithe sin tráth nach déanaí ná 3 mhí roimh dheireadh gach tréimhse. Ceanglaítear ar an gCoimisiún, tráth nach déanaí ná 9 mí roimh dheireadh na tréimhse 5 bliana, tuarascáil a tharraingt suas i leith tharmligean na cumhachta, i.e. faoin 5 Aibreán 2024.

3.FEIDHMIÚ CUMHACHTAÍ TARMLIGHTE AG AN gCOIMISIÚN FAOI RIALACHÁN (AE) 2019/2152

D’fheidhmigh an Coimisiún a chumhacht agus ghlac sé Rialachán Tarmligthe (AE) 2021/1704 ón gCoimisiún an 14 Iúil 2021 lena bhforlíontar Rialachán (AE) 2019/2152 ó Pharlaimint na hEorpa agus ón gComhairle trí mhionsonraí na faisnéise staitistiúla atá le soláthar ag údaráis chánach agus chustaim a shonrú tuilleadh agus trí Iarscríbhinní V agus VI a leasú 2 .

Dá bhrí sin, sa Rialachán Tarmligthe seo sonraítear tuilleadh an fhaisnéis ó thuairisceáin cánach breisluacha (CBL) agus an fhaisnéis maidir le soláthairtí laistigh den Aontas a bhailítear ó na ráitis achoimreacha CBL, atá le soláthar ag údaráis chánach d’údaráis staidrimh náisiúnta. Ag an am céanna, leasaítear leis Iarscríbhinn V a ghabhann le Rialachán (AE) 2019/2152 chun a áirithiú go mbeidh faisnéis maidir le ciandíolacháin earraí laistigh den Aontas san fhaisnéis a sholáthraíonn na húdaráis chánach d’údaráis staidrimh náisiúnta freisin.

Maidir le faisnéis a bhaineann leis na taifid ar allmhairí agus ar onnmhairí ó dhearbhuithe custaim, sa Rialachán Tarmligthe déantar an fhaisnéis atá le soláthar ag údaráis chustaim d’údaráis staidrimh náisiúnta a shonrú tuilleadh. Ag an am céanna, maidir leis an oibleagáid atá ar údaráis chustaim sonraí dearbhaithe custaim a sholáthar d’údaráis staidrimh náisiúnta, arb oibleagáid í a bhaineann le himréiteach láraithe, áirithítear go mbeidh feidhm aici sa Bhallstát ina bhfuil na hearraí lonnaithe. Áirithítear leis an Rialachán Tarmligthe freisin gur féidir le húdaráis staidrimh náisiúnta faisnéis a fháil óna n‑údaráis chustaim maidir le simplithe custaim a cuireadh i bhfeidhm agus maidir leis na hoibreoirí trádála lena mbaineann.

4.CONCLÚID

D’fheidhmigh an Coimisiún an chumhacht chun gníomhartha tarmligthe a ghlacadh, cumhacht a thugtar dó le Rialachán (AE) 2019/2152. Measann an Coimisiún gur cheart dó leanúint de na cumhachtaí tarmligthe a bheith aige de bhun Rialachán (AE) 2019/2152, ós rud é gur gá dó an fhaisnéis atá le soláthar ag údaráis chánach agus ag údaráis chustaim dá n‑údaráis staidrimh náisiúnta a thabhairt cothrom le dáta ar bhonn leanúnach, rud a léiríonn na forbairtí leanúnacha a bhaineann le hinfhaighteacht faisnéise a bhaineann le CBL agus dearbhuithe custaim. Cumasaíonn sé sin, ar thaobh amháin, staidreamh cruinn a tháirgeadh maidir le trádáil idirnáisiúnta earraí ar ardchaighdeán. Ar an taobh eile, má sholáthraíonn údaráis chánach agus údaráis chustaim an fhaisnéis sin dá n‑údaráis staidrimh náisiúnta, is féidir an t‑ualach tuairiscithe ar ghnólachtaí a choinneáil chomh híseal agus is féidir.

Sa todhchaí, d’fhéadfadh sé gur ghá na topaicí mionsonraithe a shonraítear in Iarscríbhinn I a ghabhann le Rialachán (AE) 2019/2152 a leasú, agus an ráta cumhdaigh le haghaidh onnmhairí earraí laistigh den Aontas a laghdú i bhfianaise forbairtí teicniúla agus eacnamaíocha, agus staidreamh a chomhlíonann na caighdeáin cháilíochta atá i bhfeidhm á choinneáil ar bun ag an am céanna. Tugtar de chumhacht don Choimisiún na leasuithe sin a dhéanamh i gcomhréir le hAirteagal 6(4) de Rialachán (AE) 2019/2152.

Iarrann an Coimisiún ar Pharlaimint na hEorpa agus ar an gComhairle an tuarascáil seo a thabhairt dá n‑aire.

(1)

 Rialachán (AE) 2019/2152 ó Pharlaimint na hEorpa agus ón gComhairle an 27 Samhain 2019 maidir le staidreamh gnó Eorpach, lena n-aisghairtear 10 ngníomh dlí i réimse an staidrimh gnó (IO L 327, 17.12.2019, lch. 1).

(2)

IO L 339, 24.9.2021, lch. 33.