1.   Folúntas

Tá cinneadh déanta ag Uachtarán Pharlaimint na hEorpa tús a chur leis an nós imeachta chun post mar Ard-Stiúrthóir (AD, grád 15) a líonadh laistigh de AS 4 (An Ard-Stiúrthóireacht um Ghnóthaí Buiséadacha) i gcomhréir le hAirteagal 29(2) de Rialacháin Foirne Oifigigh an Aontais Eorpaigh (2) (dá ngairtear ‘na Rialacháin Foirne’ anseo feasta).

Seolfar an nós imeachta roghnúcháin seo, a bhfuil sé d’aidhm aige an rogha is leithne d’iarrthóirí a thabhairt don Údarás Ceapacháin, ag an am céanna leis na nósanna imeachta inmheánacha agus idirinstitiúideacha chun poist a líonadh.

Tá an tuarastal agus na coinníollacha fostaíochta leagtha amach sna Rialacháin Foirne. Déanfar an earcaíocht ar ghrád AD 15 (3). I dteannta an bhuntuarastail, atá faoi réir cáin a théann chun sochair an Aontais agus atá díolmhaithe ó cháin náisiúnta, tá liúntais áirithe a d’fhéadfaí a íoc leis an té a cheapfar, de réir mar a leagtar amach sna Rialacháin Foirne.

Cuirtear in iúl do na hiarrthóirí an oibleagáid a fhorchuirtear leis na Rialacháin Foirne ar aon bhall foirne nua tréimhse phromhaidh 9 mí a chomhlíonadh go rathúil agus go bhfuil an post seo faoi réir na rialacha maidir leis an mbeartas soghluaisteachta arna nglacadh ag Biúró Pharlaimint na hEorpa an 15 Eanáir 2018.

Éilítear solúbthacht leis an bpost seo agus go ndéanfar teagmháil go rialta le daoine laistigh den Pharlaimint agus lasmuigh di, go háirithe leis na Feisirí de Pharlaimint na hEorpa. Beidh ar an Ard-Stiúrthóir taisteal go minic idir ionaid oibre éagsúla na Parlaiminte agus go dtí ionaid eile lasmuigh díobh.

2.   Ionad Fostaíochta

An Bhruiséil. D’fhéadfaí an post seo a aistriú go dtí ceann d’ionaid eile oibre Pharlaimint na hEorpa.

3.   Comhionannas Deiseanna

Is fostóir comhionannais deiseanna í Parlaimint na hEorpa agus glacann sí le hiarratais gan idirdhealú a dhéanamh ar fhorais ar bith amhail inscne, cine, dath, bunadh eitneach nó sóisialta, tréithe géiniteacha, teanga, reiligiún nó creideamh, tuairimí polaitiúla nó aon tuairim eile, a bheith ar dhuine de mhionlach náisiúnta, maoin, breith, míchumas, aois, gnéaschlaonadh, stádas pósta nó stádas teaghlaigh.

4.   Cúraimí an phoist

Oifigeach sinsearach a bheidh san Ard-Stiúrthóir, agus beidh sé freagrach as na dualgais seo a leanas (4), de réir na dtreoirlínte agus na gcinntí arna leagan síos ag an údarás parlaiminteach agus ag an Ard-Rúnaí:

—	a áirithiú go mbeidh roinn mhór san Ardrúnaíocht, arb é atá ann roinnt Stiúrthóireachtaí atá freagrach as réimsí inniúlachta na hArd-Stiúrthóireachta, ag feidhmiú go rianúil;

—	forbairtí a mholadh, cuspóirí agus modhanna a shocrú, foirne a bhainistiú, modhanna eagrúcháin a roghnú, acmhainní airgeadais a thiomnú;

—	bainistiú agus/nó maoirsiú a dhéanamh ar thionscadail de chineál cothrománach;

—	comhairle a thabhairt don Ard-Rúnaí agus do na Feisirí de Pharlaimint na hEorpa ina réimsí inniúlachta – comhar a dhéanamh leis an gComhairleoir Dlí agus leis na hArd-Stiúrthóirí eile;

—	ionadaíocht a dhéanamh ar an institiúid, i gcás inarb iomchuí;

—	feidhmeanna oifigigh údarúcháin trí tharmligean a fheidhmiú;

—	seasamh isteach don Ard-Rúnaí, i gcás inarb iomchuí.

5.   Incháilitheacht

Tá an nós imeachta roghnúcháin seo oscailte d’iarrthóirí a chomhlíonann na coinníollacha seo a leanas ar an spriocdháta a leagtar amach le haghaidh iarratais a chur isteach:

a)   Coinníollacha ginearálta

I gcomhréir le hAirteagal 28 de na Rialacháin Foirne, ní mór duit:

—	a bheith i do náisiúnach de cheann de Bhallstáit an Aontais Eorpaigh (5),

—	do lánchearta mar shaoránach a bheith á dteachtadh agat;

—	do dhualgais a bheith comhlíonta agat i ndáil leis na hoibleagáidí seirbhíse míleata is infheidhme de réir dlí;

—	na teistiméireachtaí carachtair a bheith agat is iomchuí do na cúraimí atá i gceist a chomhlíonadh.

b)   Coinníollacha sonracha

i)   Cáilíochtaí a éilítear

—	nuair is é 4 bliana nó níos mó an ghnáth-thréimhse do chúrsa léinn san ollscoil, leibhéal oideachais is comhionann le cúrsa iomlán ollscoile agus céim bainte amach ag a dheireadh, ar céim í a aithnítear go hoifigiúil i gceann amháin de Bhallstáit an Aontais, nó

—

nuair is é 3 bliana ar a laghad an ghnáth-thréimhse do chúrsa léinn san ollscoil, leibhéal oideachais is comhionann le cúrsa iomlán ollscoile agus céim bainte amach ag a dheireadh, ar céim í a aithnítear go hoifigiúil i gceann amháin de Bhallstáit an Aontais, mar aon le taithí ghairmiúil iomchuí d’aon bhliain amháin ar a laghad (6). Maidir leis na céimeanna, cibé an i mBallstát den Aontas nó i dtír eile a bhronntar iad, ní mór iad a bheith aitheanta ag comhlacht oifigiúil Ballstáit den Aontas Eorpach, amhail Aireacht Oideachais Ballstáit. Na hiarrthóirí a bhfuil céimeanna acu a bhronn tír nach Ballstát den Aontas í (7), ní mór dóibh coibhéis Eorpach a gcuid céimeanna a cheangal lena n-iarratas. Tá tuilleadh eolais faoi cháilíochtaí neamh-AE a aithint ar fáil i líonraí ENIC-NARIC https://www.enic-naric.net/.

ii)   An taithí ghairmiúil is gá

Taithí ghairmiúil a fuarthas tar éis na cáilíochtaí dá dtagraítear thuas a bhaint amach:

—	15 bliana, agus cuid di ar a laghad déanta i réimsí inniúlachta na hArd-Stiúrthóireachta, agus lena gcuimsítear 9 mbliana ar a laghad i dtimpeallacht Eorpach agus/nó idirnáisiúnta, agus 9 mbliana ar a laghad ar leibhéal bainistíochta i roinn mhór.

iii)   Eolas ar theangacha

Ní mór eolas críochnúil a bheith ag na hiarrthóirí ar cheann amháin de theangacha oifigiúla an Aontais Eorpaigh (8), agus eolas an-mhaith a bheith acu ar cheann amháin eile ar a laghad de na teangacha sin.

Tabharfaidh an Coiste Comhairleach aird ar eolas ar theangacha oifigiúla eile an Aontais Eorpaigh.

6.   Trialacha

Chun cabhrú leis an Údarás Ceapacháin a rogha a dhéanamh, déanfaidh an Coiste Comhairleach um Oifigigh Shinsearacha a Cheapadh liosta na n-iarrthóirí a dhréachtú agus molfaidh sé do Bhiúró Pharlaimint na hEorpa cé hiad na daoine a nglaofar orthu chun agallaimh. Glacfaidh an Biúró an liosta, agus seolfaidh an Coiste na hagallaimh agus cuirfidh sé a thuarascáil chríochnaitheach faoi bhráid an Bhiúró le haghaidh cinnidh. Ag an gcéim sin, féadfaidh an Biúró éisteachtaí na n-iarrthóirí a stiúradh.

Beidh na hagallaimh bunaithe ar an gcur síos ar chúraimí an phoist, mar a shonraítear faoi phointe 4 den fhógra seo iad, agus ar na hinniúlachtaí seo a leanas:

—	bua na straitéise;

—	cumas ceannaireachta;

—	cumas pleanála chun cinn;

—	cumas freagairt d’athruithe;

—	críochnúlacht;

—	cumas cumarsáide.

7.   Iarratais a chur isteach

Is é an dáta deiridh chun iarratais a chur isteach ná

Dé Luain, an 28 Deireadh Fómhair 2024, ar 12.00 (meán lae), am na Bruiséile.

Iarrtar ar iarrthóirí litir inspreagtha a sheoladh i bhfoirm ríomhphoist amháin, agus an litir sin curtha i bhformáid pdf, (faoi bhráid Ardrúnaí Pharlaimint na hEorpa, fógra folúntais uimh. PE/313/2024/S) agus curriculum vitæ a sheoladh i bhformáid Europass (9), ina léirítear tagairt an fhógra (PE/313/2024/S) in ábhar na teachtaireachta chuig an seoladh a leanas:

PERS-EPSeniorManagement@ep.europa.eu

agus is é dáta agus am seolta an ríomhphoist a bheidh mar fhianú air.

Is faoi na hiarrthóirí a bheidh sé a dheimhniú go mbeidh gach doiciméad scanta inléite.

Ní mór do na hiarrthóirí a gheobhaidh glao chun agallaimh, faoi dháta an agallaimh, na doiciméid tacaíochta a bhaineann lena staidéir, lena dtaithí ghairmiúil agus lena bhfreagrachtaí reatha a thabhairt ar aird, agus na doiciméid sin a bheith i bhfoirm cóipeanna amháin  (10) . Ní thabharfar na doiciméid sin ar ais do na hiarrthóirí.

Déanfar na sonraí pearsanta a chuirfidh na hiarrthóirí in iúl faoin nós imeachta roghnúcháin seo a phróiseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle (11), go sonrach a mhéid a bhaineann le rúndacht agus slándáil na sonraí sin.

---

(1)  Is ainm sealadach amháin atá in ainm na hArd-Stiúrthóireachta, beidh ainm críochnúil na hArd-Stiúrthóireachta agus ainmneacha críochnúla na Stiúrthóireachtaí faoi réir cinneadh ar leith ón údarás inniúil.

(2)  Féach Rialachán (CEE, Euratom, CEGC) Uimh. 259/68 ón gComhairle (IO L 56, 4.3.1968, lch. 1), arna leasú le Rialachán (CE, Euratom) Uimh. 723/2004 (IO L 124, 27.4.2004, lch. 1) agus arna leasú go deireanach le Rialachán (AE, Euratom) Uimh. 1023/2013 ó Pharlaimint na hEorpa agus ón gComhairle an 22 Deireadh Fómhair 2013 lena leasaítear Rialacháin Foirne Oifigigh an Aontais Eorpaigh agus Coinníollacha Fostaíochta Sheirbhísigh eile an Aontais Eorpaigh (IO L 287, 29.10.2013, lch. 15).

(3)  Earcófar an t-oifigeach sa chéim is iomchuí i gcomhréir le forálacha Airteagal 32 de na Rialacháin Foirne.

(4)  Féach an Iarscríbhinn le haghaidh na bpríomhdhualgas.

(5)  Is iad seo a leanas Ballstáit an Aontais Eorpaigh: an Bheilg, an Bhulgáir, an Chipir, an Chróit, an Danmhairg, an Eastóin, Éire, an Fhionlainn, an Fhrainc, an Ghearmáin, an Ghréig, an Iodáil, an Ísiltír, an Laitvia, an Liotuáin, Lucsamburg, Málta, an Ostair, an Pholainn, an Phortaingéil, an Rómáin, an tSeicia, an tSlóivéin, an tSlóvaic, an Spáinn, an tSualainn, an Ungáir.

(6)  Ní chuirfear an bhliain sin de thaithí san áireamh agus measúnú á dhéanamh ar an taithí ghairmiúil a éilítear sa chéad fhleasc eile den mhír seo.

(7)  Glactar le cáilíochtaí/céimeanna na Ríochta Aontaithe a fuarthas go dtí an 31 Nollaig 2020 gan aitheantas eile a bheith leo. I gcás céimeanna a fuarthas tar éis an dáta sin, tá aitheantas NARIC ag teastáil. I gcleachtas, ciallaíonn sé sin nach mór coibhéis arna heisiúint ag údarás inniúil de chuid Ballstáit den Aontas a bheith ag gabháil le céimeanna na Ríochta Aontaithe arna n-eisiúint ón 1 Eanáir 2021 ar aghaidh.

(8)  Is iad seo a leanas teangacha oifigiúla an Aontais Eorpaigh: an Béarla, an Bhulgáiris, an Chróitis, an Danmhairgis, an Eastóinis, an Fhionlainnis, an Fhraincis, an Ghaeilge, an Ghearmáinis, an Ghréigis, an Iodáilis, an Laitvis, an Liotuáinis, an Mháltais, an Ollainnis, an Pholainnis, an Phortaingéilis, an Rómáinis, an tSeicis, an tSlóivéinis, an tSlóvaicis, an Spáinnis, an tSualainnis agus an Ungáiris.

(9)   https://europa.eu/europass/.

(10)  Ní bhaineann sé seo le hiarrthóirí atá ag obair do Pharlaimint na hEorpa ar an dáta deiridh le haghaidh iarratais a chur isteach. Is faoi na hiarrthóirí atá sé a áirithiú go mbeidh an comhad iomlán a chomhfhreagraíonn dá n-iarratas ag seirbhísí na Parlaiminte (i gcás doiciméid ábhartha gan bheith ar fáil ar an tairseach HRM (Streamline)).

(11)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39).