BREITHIÚNAS NA CÚIRTE (an Chéad Dlísheomra)
26 Márta 2026 ( *1 )
(Tarchur chun réamhrialú – Talmhaíocht – An Comhbheartas Talmhaíochta – An Ciste Eorpach um Ráthaíocht Talmhaíochta (CERT) – An scéim íocaíochta aonair limistéir – Rialachán (AE) Uimh. 1307/2013 – Airteagal 32, míreanna 2 agus 4 – Heicteár incháilithe – Airteagal 36(5) – Heicteáir ar fáil don fheirmeoir – Reachtaíocht náisiúnta lena gceanglaítear an comhaontú léasa don limistéar talmhaíochta a thabhairt ar aird – Neamhniú le héifeacht chúlghabhálach an chonartha sin mar gheall ar neamhrialtacht sa nós imeachta dámhachtana nach bhfuil inchurtha i leith an fheirmeora sin – Rialachán (AE) Uimh. 1306/2013 – Airteagal 63(1) – Inghlacthacht an iarratais)
I gCás C‑434/24,
IARRAIDH ar réamhrialú faoi Airteagal 267 CFAE, ó Curtea de Apel Cluj (Cúirt Achomhairc Cluj, an Rómáin), trí bhreith an 13 Bealtaine 2024, a fuarthas ag an gCúirt an 18 Meitheamh 2024, sna himeachtaí
JD
v
Ministerul Agriculturii şi Dezvoltării Rurale – Agenţia de Plăţi şi Intervenţie pentru Agricultură – Centrul Judeţean Bistriţa-Năsăud,
tugann AN CHÚIRT (an Chéad Dlísheomra),
agus í comhdhéanta mar seo a leanas: F. Biltgen, Uachtarán Dlísheomra, I. Ziemele, A. Kumin, S. Gervasoni (Rapóirtéir) agus M. Bošnjak, Breithiúna,
Abhcóide Ginearálta: T. Ćapeta,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtiolacadh thar ceann na bpáirtithe seo a leanas:
|
– |
Rialtas na Rómáine, ag E. Gane, R. Antonie, B. Ciulacu agus A. Wellman, i gcáil Gníomhairí, |
|
– |
an Coimisiún Eorpach, ag L. Radu Bouyon agus M. Salyková, i gcáil Gníomhairí, |
tar éis éisteacht le Tuairim an Abhcóide Ghinearálta ag éisteacht an 25 Meán Fómhair 2025,
an Breithiúnas seo a leanas:
Breithiúnas
|
1 |
Baineann an iarraidh ar réamhrialú le léiriú Airteagal 63(1) de Rialachán (AE) Uimh. 1306/2013 ó Pharlaimint na hEorpa agus ón gComhairle an 17 Nollaig 2013 maidir leis an gcomhbheartas talmhaíochta a mhaoiniú, a bhainistiú agus faireachán a dhéanamh air agus lena n‑aisghairtear Rialacháin (CEE) Uimh. 352/78, (CE) Uimh. 165/94, (CE) Uimh. 2799/98, (CE) Uimh. 814/2000, (CE) Uimh. 1290/2005 agus (CE) Uimh. 485/2008 ón gComhairle (IO 2013 L 347, lch. 549), arna leasú le Rialachán (AE) 2017/2393 ó Pharlaimint na hEorpa agus ón gComhairle an 13 Nollaig 2017 (IO 2017 L 350, lch. 15) (‘Rialachán Uimh. 1306/2013’), agus prionsabal na comhréireachta. |
|
2 |
Rinneadh an iarraidh seo in imeachtaí idir JD, feirmeoir, agus an Ministerul Agriculturii și Dezvoltării Rurale – Agenția de Plăți și Intervenție pentru Agricultură – Centrul Județean Bistrița-Năsăud (an Aireacht Talmhaíochta agus Forbartha Tuaithe – an ghníomhaireacht um íocaíochtaí agus idirghabháil sa talmhaíocht – ionad chontae Bistrița-Năsăud, an Rómáin) (‘APIA’), maidir le haistarraingt cabhrach ag APIA a íocadh leis an bhfeirmeoir sin, go háirithe faoin scéim íocaíochta aonair limistéir, i bhfianaise chealú, le héifeacht chúlghabhálach, an chomhaontaithe léasa don limistéar talmhaíochta faoinar íocadh an chabhair. |
An dlí lena mbaineann
Dlí an Aontais Eorpaigh
Rialachán Uimh. 1306/2013
|
3 |
Bhí Rialachán Uimh. 1306/2013, arna aisghairm le Rialachán (AE) 2021/2116 ó Pharlaimint na hEorpa agus ón gComhairle an 2 Nollaig 2021 maidir leis an gcomhbheartas talmhaíochta a mhaoiniú, a bhainistiú agus faireachán a dhéanamh air agus lena n‑aisghairtear Rialachán (AE) Uimh. 1306/2013 (IO 2021 L 435, lch. 187), infheidhme tráth na bhfíoras sna príomhimeachtaí. |
|
4 |
De réir Airteagal 58 den Rialachán sin: ‘1. Glacfaidh na Ballstáit, faoi chuimsiú an [chomhbheartais talmhaíochta (CBT)], na forálacha reachtacha, rialúcháin agus riaracháin ar fad is gá agus glacfaidh siad aon bhearta eile is gá chun cosaint éifeachtach a áirithiú do leasanna airgeadais an Aontais [Eorpaigh], go háirithe chun an méid seo a leanas a dhéanamh:
[...]
[...]’ |
|
5 |
Foráiltear an méid seo a leanas in Airteagal 60 den Rialachán sin: ‘Gan dochar d’fhorálacha sonracha, ní dheonófar aon bhuntáiste dá bhforáiltear faoin reachtaíocht talmhaíochta earnálach i bhfabhar duine nádúrtha nó dhlítheanaigh a shuífear ina leith gur go saorga a cruthaíodh na dálaí is gá chun na buntáistí sin a fháil, contrártha le cuspóirí na reachtaíochta sin.’ |
|
6 |
Luaitear an méid seo a leanas in Airteagal 63(1) den Rialachán sin: ‘I gcás ina bhfaightear amach nach gcomhlíonann tairbhí na critéir incháilitheachta, nó na gealltanais nó oibleagáidí eile a bhaineann leis na coinníollacha maidir leis an gcabhair nó leis an tacaíocht a dheonú dá bhforáiltear sa reachtaíocht talmhaíochta earnálach, ní íocfar an chabhair nó tarraingeofar siar an chabhair ina hiomláine nó i bpáirt agus, i gcás inarb ábhartha, ní leithdháilfear na teidlíochtaí íocaíochta dá dtagraítear in Airteagal 21 de Rialachán (AE) Uimh. 1307/2013 [ó Pharlaimint na hEorpa agus ón gComhairle an 17 Nollaig 2013 lena mbunaítear rialacha maidir le híocaíochtaí díreacha le feirmeoirí faoi scéimeanna tacaíochta faoi chuimsiú an chomhbheartais talmhaíochta agus lena n‑aisghairtear Rialachán (CE) Uimh. 637/2008 ón gComhairle agus Rialachán (CE) Uimh. 73/2009 ón gComhairle (IO 2013 L 347, lch. 608)] nó tarraingeofar siar iad. I gcás ina mbaineann an neamh-chomhlíonadh le rialacha náisiúnta nó rialacha an Aontais maidir le soláthar poiblí, déanfar an chuid den chabhair nach mbeidh le híoc nó a bheidh le tarraingt siar a chinneadh ar bhonn a thromchúisí atá an neamh-chomhlíonadh agus i gcomhréir le prionsabal na comhréireachta. Ní dhéanfar difear do dhlíthiúlacht agus do rialtacht an idirbhirt ach suas go dtí an leibhéal den chuid sin den chabhair nach mbeidh le híoc nó a bheidh le tarraingt siar.’ |
|
7 |
Foráiltear le hAirteagal 72(1) de Rialachán Uimh. 1306/2013: ‘Gach bliain, cuirfidh tairbhí den tacaíocht dá dtagraítear in Airteagal 67(2) iarratas isteach ar íocaíochtaí díreacha nó éileamh íocaíochta don limistéar ábhartha agus do na bearta forbartha tuaithe a bhaineann le hainmhithe agus luafar ann, nuair is infheidhme:
[...]
[...]’ |
Rialachán Uimh. 1307/2013
|
8 |
Bhí Rialachán Uimh. 1307/2013 arna aisghairm le Rialachán (AE) 2021/2115 ó Pharlaimint na hEorpa agus ón gComhairle an 2 Nollaig 2021 lena mbunaítear rialacha maidir le tacaíocht do phleananna straitéiseacha atá le tarraingt suas ag na Ballstáit faoin gcomhbheartas talmhaíochta (Pleananna Straitéiseacha CBT) agus le maoiniú ag an gCiste Eorpach um Ráthaíocht Talmhaíochta (CERT) agus ag an gCiste Eorpach Talmhaíochta um Fhorbairt Tuaithe (CETFT) agus lena n-aisghairtear Rialacháin (AE) Uimh. 1305/2013 agus (AE) Uimh. 1307/2013 (IO 2021 L 435, lch. 1), infheidhme tráth fhíorais na díospóide sna príomhimeachtaí. |
|
9 |
Foráladh don mhéid seo a leanas in Airteagal 32(2) agus (4) de Rialachán Uimh. 1307/2013: ‘2. Chun críocha an Teidil seo, ciallaíonn “heicteár incháilithe”: [...] 4. Ní mheasfar limistéir bheith ina heicteáir incháilithe ach amháin má chomhlíonann siad an sainmhíniú ar heicteáir incháilithe ar feadh na bliana féilire, ach amháin i gcás force majeure nó in imthosca eisceachtúla.’ |
|
10 |
Foráiltear an méid seo a leanas in Airteagal 36 den Rialachán sin: ‘1. Féadfaidh na Ballstáit a bhfuil an scéim íocaíochta aonair limistéir a leagtar síos i gCaibidil 2 de Theideal V de Rialachán (CE) Uimh. 73/2009 [ón gComhairle an 19 Eanáir 2009 lena mbunaítear comhrialacha do scéimeanna tacaíochta dírí d‘fheirmeoirí faoin gcomhbheartas talmhaíochta agus lena mbunaítear scéimeanna áirithe tacaíochta d’fheirmeoirí, lena leasaítear Rialachán (CE) Uimh. 1290/2005, Rialachán (CE) Uimh. 247/2006, Rialachán (CE) Uimh. 378/2007 agus lena n‑aisghairtear Rialachán (CE) Uimh. 1782/2003 (IO 2009 L 30, lch. 16) á cur i bhfeidhm acu in 2014, a chinneadh, faoi na coinníollacha a leagtar amach sa Rialachán seo, leanúint d'fheidhmiú na scéime sin go dtí an 31 Nollaig 2020 ar a dhéanaí. Cuirfidh siad a gcinneadh in iúl don Choimisiún [Eorpach] faoin 1 Lúnasa 2014 mar aon le dáta deiridh chur i bhfeidhm na scéime sin. Le linn na tréimhse ina mbeidh an scéim íocaíochta aonair limistéir á cur i bhfeidhm, ní bheidh feidhm ag Roinn 1, Roinn 2 ná ag Roinn 3 den Chaibidil seo maidir leis na Ballstáit sin, cé is moite den dara fomhír d’Airteagal 23(1), d’Airteagal 23(5) agus d’Airteagal 32(2) go (6). 2. Deonófar an íocaíocht aonair limistéir ar bhonn bliantúil do gach heicteár incháilithe a dhearbhaigh an feirmeoir i gcomhréir le pointe (a) den chéad fhomhír d'Airteagal 72(1) de Rialachán (AE) Uimh. 1306/2013. [...] 5. Ach amháin i gcásanna force majeure nó in imthosca eisceachtúla, beidh na heicteáir dá dtagraítear i mír 2 ar fáil don fheirmeoir ar dháta a shocróidh an Ballstát, ar dáta é nach déanaí ná an dáta a shocrófar sa Bhallstát sin chun leasú a dhéanamh ar an iarratas ar chabhair dá dtagraítear in Airteagal 72(1) de Rialachán (AE) Uimh. 1306/2013. [...]’ |
Rialachán Cur Chun Feidhme (AE) Uimh. 809/2014
|
11 |
Foráiltear le hAirteagal 14(1)(f) de Rialachán Cur Chun Feidhme (AE) Uimh. 809/2014 ón gCoimisiún an 17 Iúil 2014 lena leagtar síos rialacha maidir le cur i bhfeidhm Rialachán (AE) Uimh. 1306/2013 ó Pharlaimint na hEorpa agus ón gComhairle maidir leis an gcóras comhtháite riaracháin agus rialaithe, bearta forbartha tuaithe agus tras-chomhlíonadh (IO 2014 L 227, lch. 69), a aisghaireadh le Rialachán Cur Chun Feidhme (AE) 2022/1173 ón gCoimisiún an 31 Bealtaine 2022 lena leagtar síos rialacha maidir le cur i bhfeidhm Rialachán (AE) 2021/2116 ó Pharlaimint na hEorpa agus ón gComhairle maidir leis an gcóras comhtháite riaracháin agus rialaithe sa chomhbheartas talmhaíochta (IO 2022 L 183, lch. 23): ‘Ní mór go mbeadh an fhaisnéis go léir san iarratas aonair nó san éileamh íocaíochta atá riachtanach chun incháilitheacht don chabhair agus/nó don tacaíocht a shocrú, go háirithe: [...]
[Aistriúchán neamhoifigiúil] |
Dlí na Rómáine
|
12 |
Foráiltear le hAirteagal 1254(1) agus (2) den codul civil (an Cód Sibhialta): ‘1. Measfar nár tugadh i gcrích riamh comhaontú atá ar neamhní go hiomlán nó curtha ar neamhní. 2. Is é an toradh a bheidh ar chealú an chonartha, i gcomhréir leis na coinníollacha a leagtar síos le dlí, go ndéanfar gníomhartha comhleanúnacha arna dtabhairt i gcrích ar bhonn an chonartha sin a neamhniú.’ |
|
13 |
Is mar seo a leanas atá an fhoclaíocht in Airteagal 6(1) den Ordonanța de urgență a Guvernului nr. 66/2011 privind prevenirea, constatarea și sancționarea neregulilor apărute în obținerea și utilizarea fondurilor europene și/sau a fondurilor publice naționale aferente acestora (Ordú Éigeandála Rialtais Uimh. 66/2011 maidir le neamhrialtachtaí i bhfáil agus in úsáid cistí Eorpacha agus/nó cistí poiblí náisiúnta gaolmhara a chosc, a bhrath agus a phionósú) an 29 Meitheamh 2011 (Monitorul Oficial al României, Cuid I, Uimh. 461 an 30 Meitheamh 2011): ‘Beidh sé de cheangal ar na húdaráis atá freagrach as cistí Eorpacha a bhainistiú caiteachas arna dhéanamh agus arna dhearbhú ag tairbhithe nach gcomhlíonann na coinníollacha maidir le dlíthiúlacht, rialtacht nó comhréireacht a leagtar síos leis an reachtaíocht náisiúnta agus le reachtaíocht [an Aontais] atá i bhfeidhm a eisiamh, go hiomlán nó go páirteach, i gcás ina sainaithníonn siad caiteachas den sórt sin mar chuid den phróiseas chun éilimh ar íocaíocht a fhíorú.’ |
|
14 |
Foráiltear le hAirteagal 8 den Ordonanța de urgență a guvernului nr. 3/2015 pentru aprobarea schemelor de plăți care se aplică în agricultură în perioada 2015-2020 și pentru modificarea art. 2 din Legea nr. 36/1991 privind societățile agricole și alte forme de asociere în agricultură (Ordú Éigeandála Rialtais Uimh. 3/2015 lena bhformheastar na scéimeanna íocaíochta is infheidhme i réimse na talmhaíochta don tréimhse 2015 go 2020 agus lena leasaítear Airteagal 2 de Dhlí Uimh. 36/1991 maidir le cuideachtaí talmhaíochta agus cineálacha eile comhlachas i réimse na talmhaíochta) an 18 Márta 2015 (Monitorul Oficial al României, Cuid I, Uimh. 191, an 23 Márta 2015), sa leagan is infheidhme maidir leis an díospóid sna príomhimeachtaí: ‘1. Chun cáiliú do na híocaíochtaí díreacha dá bhforáiltear in Airteagal 1(2), ní mór d’fheirmeoirí: [...]
[...] 6. Cinnfear doiciméid lena gcruthaítear go bhfuil heicteáir de thalamh talmhaíochta ar fáil don fheirmeoir agus/nó go bhfuil beostoc i seilbh an fheirmeora le hordú ón [ministrul agriculturii și dezvoltării rurale (an tAire Talmhaíochta agus Forbartha Tuaithe)] agus cuirfear isteach iad agus iarratais ar íocaíocht aonair á gcur isteach, ag brath ar na scéimeanna/bearta/íocaíochtaí a iarrtar.’ |
|
15 |
Foráiltear in Airteagal 5(2) den Ordinul ministrului agriculturii si dezvoltării rurale nr. 619/2015 pentru aprobarea criteriilor de eligibilitate, condițiilor specifice și a modului de implementare a schemelor de plăți prevăzute la articolul 1 alineatele (2) și (3) din Ordonanța de urgență a Guvernului nr. 3/2015 pentru aprobarea schemelor de plăți care se aplică în agricultură în perioada 2015-2020 și pentru modificarea articolului 2 din Legea nr. 36/1991 privind societățile agricole și alte forme de asociere în agricultură, precum și a condițiilor specifice de implementare pentru măsurile compensatorii de dezvoltare rurală aplicabile pe terenurile agricole, prevăzute în Programul Național de Dezvoltare Rurală 2014-2020 (Ordú ón Aire Talmhaíochta agus Forbartha Tuaithe Uimh. 619/2015 lena bhformheastar na critéir incháilitheachta, na coinníollacha sonracha agus na modhanna cur chun feidhme do na scéimeanna íocaíochta a sholáthraítear in Airteagal 1(2) agus (3) d’Ordú Éigeandála an Rialtais Uimh. 3/2015, lena bhformheastar na scéimeanna íocaíochta is infheidhme san earnáil talmhaíochta don tréimhse 2015-2020 agus lena leasaítear Airteagal 2 de Dhlí Uimh. 36/1991 maidir le cuideachtaí talmhaíochta agus foirmeacha eile comhpháirtíochta san earnáil talmhaíochta, chomh maith leis na coinníollacha sonracha chun na bearta cúitimh forbartha tuaithe is infheidhme maidir le talamh talmhaíochta a chur i bhfeidhm, a dtagraítear dóibh sa Chlár Náisiúnta Forbartha Tuaithe 2014-2020), arna fhoilsiú i Monitorul Oficial al României, Cuid I, Uimh. 234 an 6 Aibreán 2015: ‘Is iad seo a leanas na doiciméid lena gcruthaítear go bhfuil an talamh incháilithe arna dhearbhú ar fáil don fheirmeoir, i gcomhréir le hAirteagal 8(1)(n) den Reacht:
|
An díospóid sna príomhimeachtaí agus na ceisteanna a tharchuirtear
|
16 |
An 19 Aibreán 2018, ghlac comhairle áitiúil bhardas Chiochiș (an Rómáin) cinneadh lena bhformheastar féarach bardasach a léasú le tairiscint oscailte. |
|
17 |
An 24 Bealtaine 2018, chuir JD comhaontú léasa i gcrích leis an mbardas sin chun limistéar féaraigh bhardasaigh a léasú. |
|
18 |
An 10 Bealtaine 2019, chuir JD iarratas isteach ar íocaíocht aonair, i leith 2019, don limistéar sin. Maoiníodh an íocaíocht sin, a fuair JD, ag an gCiste Ráthaíochta Talmhaíochta Eorpach (CERT) agus ag an gCiste Talmhaíochta Eorpach um Fhorbairt Tuaithe (CETFT), go háirithe an scéim íocaíochta aonair limistéir, chomh maith le cistí náisiúnta. |
|
19 |
Le breithiúnas an dáta chéanna, cuireadh an nós imeachta maidir le féaraigh bhardasacha a leithdháileadh arna chur chun feidhme ag bardas Chiochiș agus a ghníomhartha ina dhiaidh sin, lena n‑áirítear an comhaontú léasa i bhfabhar JD, ar neamhní mar gheall ar neamhrialtacht an nós imeachta sin. Measadh nár foilsíodh an fógra caibidlíochta dírí laistigh den tréimhse 5 lá a fhorordaítear le cinneadh chomhairle áitiúil an bhardais, agus mar thoradh air sin nár bhronn an coiste meastóireachta na féaraigh ar JD go rialta. Luadh sa bhreithiúnas sin, go bunúsach, nach locht de chuid JD ba chúis le neamhniú an chomhaontaithe léasa, ach mainneachtain ag an mbardas sin ceann dá oibleagáidí a chomhlíonadh. |
|
20 |
Rinne JD achomharc i gcoinne an bhreithiúnais sin os comhair Curtea de Apel Cluj (Cúirt Achomhairc Cluj, an Rómáin). Dhíbh an chúirt sin an t‑achomharc sin ar an mbonn go raibh sé mall an 5 Márta 2020. |
|
21 |
An 24 Samhain 2022, mheas APIA, i miontuairiscí, nach raibh teideal ag JD a thuilleadh ar na limistéir a chumhdaítear leis an gcomhaontú léasa a cuireadh ar neamhní. D’éiligh sí aisíocaíocht ar chúnamh airgeadais 83 334.01 lei na Rómáine (RON) (thart ar EUR 16743) a deonaíodh tar éis iarratas an 10 Bealtaine 2019. |
|
22 |
Ós rud é gur dhiúltaigh APIA do ghearán JD i gcoinne na tuarascála sin, thug JD caingean os comhair Tribunalul Bistrița-Năsăud (an Chúirt Réigiúnach, Bistrița-Năsăud, an Rómáin). |
|
23 |
Le breithiúnas an 15 Meitheamh 2023, dhiúltaigh an chúirt sin do chaingean JD i gcoinne mhiontuairiscí APIA an 24 Samhain 2022. Bhí sí den tuairim, ar an gcéad dul síos, gur measadh nach raibh an comhaontú léasa curtha ar neamhní ann riamh i gcomhréir le hAirteagal 1254 den Chód Sibhialta, ar an dara dul síos, le hOrdú Éigeandála Rialtais Uimh. 66/2011, cuireadh de cheangal ar fheirmeoirí na coinníollacha ginearálta maidir le hincháilitheacht do chabhair ón Aontas a chomhlíonadh, lena n‑áirítear doiciméad bailí a bheith ann lena gcruthaítear go raibh an talamh ar fáil don duine a chuir an t‑iarratas ar chabhair isteach, agus, ar an tríú dul síos, go raibh ar JD na suimeanna a fuarthas go míchuí a aisíoc, á rá nach pionós riaracháin a bhí san aisíocaíocht sin, agus mar thoradh air sin nár thoisc ábhartha é an easpa lochta. |
|
24 |
Rinne JD agóid i gcoinne an bhreithiúnais sin os comhair Curtea de Apel Cluj (Cúirt Achomhairc Cluj), arb í an chúirt a rinne an tarchur í. |
|
25 |
Fiafraíonn an chúirt sin an áirítear leis an gcoincheap ‘neamhchomhlíonadh na gcritéar incháilitheachta’, dá bhforáiltear in Airteagal 63(1) de Rialachán Uimh. 1306/2013, cás ina ndéantar, ar chúiseanna atá neamhspleách ar chiontacht thairbhí na cabhrach, an comhaontú léasa a bhí bailí tráth an scrúdaithe ar na coinníollacha incháilitheachta don chabhair sin a neamhniú le héifeacht chúlghabhálach. Measann sí gur cheart freagra diúltach a thabhairt ar an gceist sin, ós rud é gur chomhlíon an tairbhí na critéir incháilitheachta ar an dáta a taisceadh an t‑iarratas, go dtí an dáta a cuireadh an comhaontú sin ar neamhní, gan aon neamhrialtacht eile, go háirithe maidir le húsáid na talún, a bheith líomhnaithe ina choinne. Dá bhrí sin, ba cheart neamhniú an chonartha sin a chur san áireamh chun a mheas an ann do cheart ar an talamh atá i gceist ó dháta an neamhnithe sin. |
|
26 |
Cuireann an chúirt sin in iúl freisin, i gcás ina gcinneann an Chúirt gurb ionann comhaontú léasa a bhí bailí tráth an scrúdaithe ar na coinníollacha incháilitheachta do chabhair ón Aontas a neamhniú le héifeacht chúlghabhálach, i gcomhréir leis an reachtaíocht náisiúnta, agus cás nach gcomhlíonann an tairbhí na coinníollacha sin, gan beann ar an dáta a rinneadh an neamhniú sin, go n‑ardaíonn sí an cheist maidir leis an bhféidearthacht prionsabal na comhréireachta a chur i bhfeidhm maidir le tarraingt siar na cabhrach. |
|
27 |
Sna himthosca sin, chinn Curtea de Apel Cluj (Cúirt Achomhairc Cluj) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:
|
Na ceisteanna le haghaidh réamhrialú
An Chéad Cheist
|
28 |
Ba cheart a mheabhrú, mar réamhphointe, sa nós imeachta a leagtar síos in Airteagal 267 CFAE lena bhforáiltear do chomhar idir na cúirteanna náisiúnta agus an Chúirt Bhreithiúnais, gur faoin gCúirt Bhreithiúnais atá sé freagra a thabhairt don chúirt a rinne an tarchur a bheidh úsáideach di agus lena gcuirfear ar a cumas cinneadh a dhéanamh sa díospóid atá roimpi. Chuige sin, d’fhéadfadh sé go mbeadh ar an gCúirt na ceisteanna a tharchuirtear chuici a athfhoirmliú. Tá sé de dhualgas ar an gCúirt Bhreithiúnais léiriú a dhéanamh ar fhorálacha uile dhlí an Aontais a éilíonn cúirteanna náisiúnta chun na caingne atá ar feitheamh os a gcomhair a chinneadh, fiú mura luaitear na forálacha sin go sainráite sna ceisteanna a tharchuir na cúirteanna sin chuig an gCúirt Bhreithiúnais (féach breithiúnais an 18 Márta 1993, Viessmann, C‑280/91, EU:C:1993:103, mír 17, agus an 19 Nollaig 2019, Nederlands Uitgeversverbond agus Groep Algemene Uitgevers, C‑263/18, EU:C:2019:1111, mír 31). |
|
29 |
Sa chás seo, is léir ón iarraidh ar réamhrialú go bhféachann an chúirt a rinne an tarchur, lena céad cheist, lena chinneadh a mhéid a fhéadfaidh an t‑údarás náisiúnta inniúil a mheas nach gcomhlíonann cabhair a dheonaítear d’fheirmeoir na critéir incháilitheachta i gcás ina ndéantar comhaontú léasa, a thugtar ar aird mar thaca leis an iarratas ar chabhair, chun a chruthú, i gcomhréir leis an reachtaíocht náisiúnta, go bhfuil an limistéar talmhaíochta ar fáil don fheirmeoir sin, agus atá bailí tráth an scrúdaithe ar an iarratas sin, a chur ar neamhní ina dhiaidh sin, le héifeacht chúlghabhálach, mar gheall ar neamhrialtacht sa nós imeachta chun an comhaontú sin a dhámhachtain, nach bhfuil inchurtha i leith an fheirmeora sin. Go sonrach, is léir ón iarraidh sin go bhfiafraíonn an chúirt sin an bhféadfaidh an t‑údarás inniúil náisiúnta, i gcás den sórt sin, a mheas nach gcomhlíonann an feirmeoir sin na critéir incháilitheachta beag beann ar dháta neamhnithe an chonartha sin. |
|
30 |
A mhéid a thagraíonn an chéad cheist d’Airteagal 63(1) de Rialachán Uimh. 1306/2013, ba cheart a thabhairt faoi deara, faoin gcéad fhomhír den fhoráil sin, i gcás ina gcinntear nach gcomhlíonann tairbhí cabhrach critéir incháilitheachta na cabhrach sin, na ngealltanas nó na n‑oibleagáidí eile a bhaineann leis na coinníollacha chun an chabhair nó an tacaíocht a dheonú a leagtar síos sa reachtaíocht talmhaíochta earnálach, nach bhfuil an chabhair le híoc nó go bhfuil sí le tarraingt siar go hiomlán nó go páirteach. |
|
31 |
Baineann an chéad fhomhír d’Airteagal 63(1) leis na hiarmhairtí dlíthiúla a bhaineann le neamhchomhlíonadh na gcritéar incháilitheachta, na ngealltanas agus na n‑oibleagáidí eile (féach, chuige sin, breithiúnas an 11 Aibreán 2024, Baramlay, C‑6/23, EU:C:2024:294, mír 67). Mar sin féin, ní shainítear san fhoráil sin na critéir sin, a athraíonn de réir na scéime cabhrach nó tacaíochta lena mbaineann. |
|
32 |
Ós rud é gur léir ón iarraidh ar réamhrialú go mbaineann an t‑iarratas ar chabhair atá i gceist sna príomhimeachtaí, go háirithe, leis an scéim íocaíochta aonair limistéir, ní mór a mheas, chun a mheas an gcomhlíonann tairbhí na cabhrach faoin scéim sin na critéir incháilitheachta, ní hamháin forálacha Rialachán Uimh. 1307/2013 maidir le maoiniú, bainistiú agus faireachán CBT, ach forálacha Rialachán Uimh. 1307/2013 maidir le híocaíochtaí díreacha le feirmeoirí faoi scéimeanna tacaíochta faoi chuimsiú CBT freisin. |
|
33 |
Sna himthosca sin, ní mór a mheas, lena céad cheist, go bhfiafraíonn an chúirt a rinne an tarchur, go bunúsach, an gá Rialachán Uimh. 1306/2013 agus Rialachán Uimh. 1307/2013 a léiriú sa chaoi go gcuirtear cosc leo ar an údarás náisiúnta inniúil a mheas go bhfuil iarratas ar íocaíocht aonair limistéir neamh-inghlactha, ar an bhforas amháin go ndearnadh an comhaontú léasa a bhaineann leis an limistéar talmhaíochta a chumhdaítear leis an iarratas sin, a táirgeadh chun tacú leis, chun a chruthú, i gcomhréir leis an reachtaíocht náisiúnta, go bhfuil an limistéar talmhaíochta ar fáil don fheirmeoir, agus a bhí bailí tráth a scrúdaíodh an t‑iarratas sin, a neamhniú ina dhiaidh sin, le héifeacht chúlghabhálach, mar gheall ar neamhrialtacht sa nós imeachta chun an comhaontú sin a dhámhachtain, neamhrialtacht nach bhfuil inchurtha i leith an fheirmeora sin, gan beann ar dháta neamhnithe an chonartha sin. |
|
34 |
Faoi Airteagal 36(1) de Rialachán Uimh. 1307/2013, d’fhéadfadh na Ballstáit a chuir an scéim íocaíochta aonair limistéir dá dtagraítear i gCaibidil 2 de Theideal V de Rialachán Uimh. 73/2009 i bhfeidhm in 2014 cinneadh a dhéanamh, faoi na coinníollacha a leagtar síos sa chéad Rialachán sin, leanúint den scéim sin a chur i bhfeidhm go dtí an 31 Nollaig 2020 ar a dhéanaí. |
|
35 |
Is scéim cabhrach dhíchúpláilte í an scéim íocaíochta aonair limistéir, i.e. neamhspleách ar tháirgeadh talmhaíochta. Soláthraíonn sé tacaíocht ioncaim dhíreach, arb é is cuspóir di caighdeán cóir maireachtála a áirithiú d’fheirmeoirí a dhéanann gníomhaíocht talmhaíochta iarbhír agus, dá bhrí sin, a bhfuil limistéar talmhaíochta acu ar a ndéantar an ghníomhaíocht sin (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 52). |
|
36 |
I gcomhréir le hAirteagal 36(2) de Rialachán Uimh. 1307/2013, deonófar an íocaíocht aonair limistéir ar bhonn bliantúil do gach heicteár incháilithe a dhearbhaigh an feirmeoir i gcomhréir le pointe (a) den chéad fhomhír d’Airteagal 72(1) de Rialachán Uimh. 1306/2013. |
|
37 |
Ar an gcéad dul síos, tá teidlíocht ar an íocaíocht aonair limistéir faoi réir an choinníll go gcomhlíonann an limistéar a dhearbhaíonn an feirmeoir an sainmhíniú ar ‘heicteár incháilithe’ de réir bhrí Airteagal 32(2) de Rialachán Uimh. 1307/2013, lena gcumhdaítear aon limistéar talmhaíochta ina ndéantar gníomhaíocht talmhaíochta a ghabhann le gabháltas (breithiúnas an 4 Iúil 2024, Asoprovac, C‑708/22, EU:C:2024:573, mír 18). I gcomhréir le hAirteagal 32(4) den Rialachán sin, ní mheasfar gur heicteár incháilithe é an limistéar a dhearbhaítear ach amháin má chomhlíonann sé an sainmhíniú sin ar feadh na bliana féilire lena mbaineann, ach amháin i gcásanna force majeure nó in imthosca eisceachtúla. |
|
38 |
Ar an dara dul síos, tá teidlíocht ar an íocaíocht aonair limistéir faoi réir an choinníll freisin, a leagtar síos in Airteagal 36(5) de Rialachán Uimh. 1307/2013, ach amháin i gcásanna force majeure nó in imthosca eisceachtúla, go bhfuil na heicteáir incháilithe a dhearbhaíonn an feirmeoir ar fáil dó ar dháta arna shocrú ag an mBallstát, nach déanaí ná an dáta arna shocrú sa Stát sin chun an t‑iarratas ar chabhair dá dtagraítear in Airteagal 72(1) de Rialachán Uimh. 1306/2013 a leasú. |
|
39 |
De réir an chásdlí, chun a chinneadh an bhfuil limistéar ‘ar fáil’ d’fheirmeoir, de réir bhrí Airteagal 36(5) de Rialachán Uimh. 1307/2013, ní cheanglaítear leis an Rialachán sin ar an bhfeirmeoir sin doiciméad dlíthiúil foirmiúil a thabhairt ar aird lena mbunaítear a ‘cheart úsáide’, ós rud é gur leor cruthúnas ar úsáid iarbhír an limistéir sin agus ar neamhspleáchas leordhóthanach an fheirmeora sin chun a ghníomhaíocht talmhaíochta a dhéanamh sa limistéar sin chun na críche sin (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 53). |
|
40 |
Ar an tríú dul síos, ba cheart a mheabhrú, faoi Airteagal 60 de Rialachán Uimh. 1306/2013, gan dochar d’aon fhorálacha speisialta, nach bhfuil aon bhuntáiste dá bhforáiltear leis an reachtaíocht talmhaíochta earnálach le deonú i bhfabhar daoine nádúrtha nó dlítheanacha a bhfuil sé suite ina leith gur chruthaigh siad go saorga na dálaí is gá chun na buntáistí sin a fháil, contrártha leis na cuspóirí a shaothraítear leis an reachtaíocht sin. |
|
41 |
Chinn an Chúirt cheana féin go n‑éilíonn cruthúnas ar chleachtas mí-úsáideach ag tairbhí féideartha na cabhrach, ar an gcéad dul síos, meascán d’imthosca oibiachtúla, in ainneoin chomhlíonadh foirmiúil na gcoinníollacha a leagtar síos leis na rialacha ábhartha, nár baineadh amach cuspóir na rialacha sin agus, ar an dara dul síos, gné shuibiachtúil arb é atá inti an rún buntáiste a fháil ó rialacha an Aontais trí na coinníollacha a leagtar síos chun é a fháil a chruthú go saorga (breithiúnas an 7 Aibreán 2022, Avio Lucos, C‑176/20, EU:C:2022:274, mír 70 agus an cásdlí dá dtagraítear). |
|
42 |
I gcás ina ndéantar an comhaontú léasa don limistéar talmhaíochta a dhearbhaigh an feirmeoir i gcomhthéacs iarratas aonair ar íocaíocht limistéir, a bhí bailí tráth an iarratais sin, a neamhniú ina dhiaidh sin, le héifeacht chúlghabhálach, mar gheall ar neamhrialtacht sa nós imeachta chun an comhaontú sin a dhámhachtain, neamhrialtacht nach bhfuil inchurtha i leith an fheirmeora sin, ní féidir leis an údarás náisiúnta inniúil a mheas, leis an bhfíoras sin amháin, nach gcomhlíontar na critéir a leagtar síos i míreanna 2 agus 4 d’Airteagal 32 agus in Airteagal 36(5) de Rialachán Uimh. 1307/2013, gan beann ar dháta neamhnithe an chonartha sin. |
|
43 |
I gcás ina gcuirtear an comhaontú léasa ar neamhní tar éis dheireadh na bliana féilire a bhfuil an íocaíocht aonair limistéir á héileamh ina leith, comhlíontar na critéir sin, i bprionsabal. Ní féidir a bhaint de thátal as an neamhniú sin ar chomhaontú léasaithe an limistéir talmhaíochta, d’ainneoin a chineáil aisghníomhaigh, nár chomhlíon na heicteáir a dearbhaíodh an sainmhíniú ar ‘heicteár incháilithe’ le linn na bliana féilire lena mbaineann, i gcomhréir le hAirteagal 32(2) agus (4) de Rialachán Uimh. 1307/2013, ná cinneadh nach raibh an limistéar talmhaíochta ar fáil, i ndáiríre, don fheirmeoir ar an dáta a shocraigh an Ballstát de bhun Airteagal 36(5) den Rialachán sin. Go háirithe, ní féidir leis an neamhniú sin, ann féin, amhras a chaitheamh ar chinneadh na cúirte a rinne an tarchur go raibh an feirmeoir ag baint úsáid as an limistéar talmhaíochta sin i ndáiríre agus go raibh neamhspleáchas leordhóthanach aige chun a ghníomhaíocht talmhaíochta a dhéanamh ar an dáta sin, i gcomhréir leis an gcásdlí dá dtagraítear i mír 39 den bhreithiúnas seo. |
|
44 |
Ina theannta sin, ós rud é, sa chás dá dtagraítear i mír 42 den bhreithiúnas seo, go bhfuil neamhniú an chomhaontaithe léasa mar thoradh ar neamhrialtacht sa nós imeachta chun an comhaontú sin a dhámhachtain, neamhrialtacht nach bhfuil inchurtha i leith an fheirmeora sin, níor cheart go bhfágfadh an neamhniú sin, ann féin, gan an ghné shuibiachtúil de réir bhrí an chásdlí dá dtagraítear i mír 41 den bhreithiúnas seo a bhunú, go gcinnfeadh an chúirt a rinne an tarchur gur chruthaigh sí go saorga na coinníollacha is gá chun an íocaíocht aonair limistéir a fháil, contrártha do chuspóir na reachtaíochta nó go ndearna sí iarracht buntáiste éagórach a bhaint as talamh daoine eile d’fhonn dul timpeall ar reachtaíocht an Aontais maidir leis an scéim íocaíochta aonair de réir bhrí chásdlí na Cúirte (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 65 agus an cásdlí dá dtagraítear). |
|
45 |
Ba cheart a thabhairt faoi deara nach gciallaíonn sé, ann féin, go bhfuil an t‑iarratas ar chabhair a cuireadh faoi bhráid an údaráis náisiúnta inniúil neamh-inghlactha toisc gur tharla an neamhniú ar chomhaontú léasaithe an limistéir arna dhearbhú chun críocha na híocaíochta aonair limistéir mar gheall ar mhainneachtain bhardais na rialacha soláthair phoiblí a chomhlíonadh. Murab ionann agus scéimeanna cabhrach nó tacaíochta eile faoi CBT, ní chuireann aon fhoráil de dhlí an Aontais leithdháileadh na híocaíochta aonair limistéir faoi réir chur chun feidhme na rialacha sin. Cé go sonraítear sa dara fomhír d’Airteagal 63(1) de Rialachán Uimh. 1306/2013, mar a shonraítear sa chéad fhomhír de, na hiarmhairtí a bhaineann le neamhchomhlíonadh na gcritéar incháilitheachta, na ngealltanas agus na n‑oibleagáidí eile a bhaineann leis na coinníollacha chun an chabhair nó an tacaíocht a dheonú, i gcás ina mbaineann an neamhchomhlíonadh sin le reachtaíocht náisiúnta nó reachtaíocht an Aontais maidir le soláthar poiblí, níl sé de chuspóir ná d’éifeacht aige coinníoll a leagan síos lena ndéanfar, go ginearálta, cabhair faoin scéim íocaíochta aonair limistéir faoi réir chomhlíonadh na reachtaíochta sin. |
|
46 |
É sin ráite, i gcomhréir le pointe (c) den chéad fhomhír d’Airteagal 72(1) de Rialachán Uimh. 1306/2013 agus Airteagal 14(1) de Rialachán Cur Chun Feidhme Uimh. 809/2014, tá corrlach lánroghnach ag na Ballstáit maidir leis na doiciméid tacaíochta agus an fhianaise nach mór a cheangal ar iarratasóir ar chabhair maidir leis na réimsí a chumhdaítear lena iarratas (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 60). |
|
47 |
Thairis sin, i gcomhréir le hAirteagal 58(1)(c) de Rialachán Uimh. 1306/2013, tá corrlach lánroghnach ag na Ballstáit freisin agus na bearta náisiúnta á roghnú acu a mheasann siad a bheith riachtanach chun neamhrialtachtaí agus calaois a chosc agus a phionósú go héifeachtach (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 62). |
|
48 |
Tá feidhmiú a lánrogha ag na Ballstáit maidir leis an bhfianaise atá le soláthar chun tacú le hiarratas ar chabhair faoi réir teorainneacha áirithe, go háirithe a mhéid a bhaineann leis an bhféidearthacht ceangal a chur ar an iarratasóir doiciméad dlíthiúil bailí a thabhairt ar aird lena gcruthaítear go bhfuil sé de cheart aige na limistéir a chumhdaítear lena iarratas a úsáid. Sa chomhthéacs sin, ní mór don reachtaíocht náisiúnta lena gcuirtear an lánrogha sin chun feidhme na cuspóirí a shaothraítear le dlí an Aontais maidir le tacaíocht dhíreach airgeadais d’fheirmeoirí agus prionsabail ghinearálta dhlí an Aontais a chomhlíonadh, go háirithe prionsabal na comhréireachta, lena gceanglaítear go mbeidh na bearta a chuirtear chun feidhme trí fhorálacha iomchuí chun an cuspóir atá á shaothrú a bhaint amach agus nach rachaidh siad thar a bhfuil riachtanach chun é a bhaint amach (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 63). |
|
49 |
Dá bhrí sin, ní chuirtear cosc le Rialachán Uimh. 1307/2013 ar reachtaíocht náisiúnta lena gcuirtear fáil cabhrach faoin scéim íocaíochta aonair limistéir faoi réir na hoibleagáide atá ar an iarratasóir a chruthú go bhfuil ‘ceart úsáide’ aige ar an limistéar talmhaíochta a chumhdaítear leis an iarratas sin, ar choinníoll go gcomhlíontar na cuspóirí a shaothraítear le reachtaíocht ábhartha an Aontais agus le prionsabail ghinearálta dhlí an Aontais, go háirithe prionsabal na comhréireachta (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 68). |
|
50 |
Is léir ó bharúlacha i scríbhinn Rialtas na Rómáine, faoi réir fhíorú na cúirte a rinne an tarchur, go leagtar síos le reachtaíocht na Rómáine, faoi Airteagal 8(1)(n) d’Ordú Éigeandála Rialtais Uimh. 3/2015, sa leagan is infheidhme tráth na bhfíoras sna príomhimeachtaí, an oibleagáid atá ar fheirmeoir a dhéanann iarratas ar chabhair faoin scéim íocaíochta aonair limistéir cruthúnas a sholáthar go bhfuil an limistéar talmhaíochta ar fáil dó. Is léir ó na barúlacha sin, de réir Ordú Uimh. 619/2015, go n‑áirítear sna doiciméid lena gcruthaítear go bhfuil an talamh incháilithe arna dearbhú ar fáil don fheirmeoir, inter alia, cóip i gcomhréir le bunchóip an chomhaontaithe léasa don limistéar talmhaíochta, arna thabhairt i gcrích idir an feirmeoir agus bardas. |
|
51 |
Is critéar incháilitheachta é cruthúnas a thabhairt ar aird go bhfuil an limistéar talmhaíochta ar fáil don fheirmeoir, dá bhforáiltear le dlí na Rómáine, faoi réir fíorú ag an gcúirt a rinne an tarchur, de réir bhrí na chéad fhomhíre d’Airteagal 63(1) de Rialachán Uimh. 1306/2013, ós rud é go gcomhfhreagraíonn an táirgeadh sin do réamhriachtanas atá fíor-riachtanach chun iarratas ar chabhair a bhailíochtú (féach, chuige sin, breithiúnas an 11 Aibreán 2024, Baramlay, C‑6/23, EU:C:2024:294, mír 66). |
|
52 |
Cé gur faoin gcúirt a rinne an tarchur atá sé a fháil amach an gcomhlíonann an cleachtas riaracháin atá i gceist sna príomhimeachtaí na cuspóirí a shaothraítear le dlí an Aontais maidir le tacaíocht dhíreach airgeadais d’fheirmeoirí agus prionsabail ghinearálta dhlí an Aontais, go háirithe prionsabal na comhréireachta, i gcomhréir le cásdlí socair na Cúirte, tá dlínse ag an gCúirt an treoir uile is gá a thabhairt don chúirt a rinne an tarchur maidir le léiriú dhlí an Aontais chun a chur ar chumas na cúirte sin saincheist na comhoiriúnachta a chinneadh chun críocha an cháis atá os a comhair (féach, chuige sin, breithiúnas an 7 Aibreán 2022, Avio Lucos, C‑116/20, EU:C:2022:273, mír 64 agus an cásdlí dá dtagraítear). |
|
53 |
Ní mór a mheas nach bhfuil cleachtas an údaráis inniúil riaracháin, ar dá réir, in imthosca amhail imthosca an cháis sna príomhimeachtaí, a mheastar an t‑iarratas ar íocaíocht aonair limistéir a bheith do-ghlactha i gcás ina gcuirtear comhaontú léasa an limistéir talmhaíochta ar neamhní, gan beann ar dháta an chealaithe sin, iomchuí chun a áirithiú go mbainfear amach cuspóir na reachtaíochta, dá dtagraítear i mír 35 den bhreithiúnas seo, arb é atá ann caighdeán cóir maireachtála a áirithiú d’fheirmeoirí nuair a dhéanann siad gníomhaíocht talmhaíochta iarbhír agus, dá bhrí sin, go bhfuil limistéar talmhaíochta acu ar a ndéantar an ghníomhaíocht sin. |
|
54 |
I gcás ina gcuirtear an comhaontú léasa ar neamhní tar éis dheireadh na bliana féilire a n‑éilítear an íocaíocht aonair limistéir ina leith, ní mór a mheas, mar is léir ó mhír 43 den bhreithiúnas seo, go gcomhlíontar, i bprionsabal, na critéir incháilitheachta a leagtar síos le dlí an Aontais. Ina theannta sin, murab ionann agus an cás nach féidir leis an bhfeirmeoir doiciméad a thabhairt ar aird lena gcruthaítear go bhfuil ‘ceart úsáide’ aige ar an limistéar talmhaíochta, atá bailí tráth a iarratais ar íocaíocht aonair limistéir, ní féidir leis an gcás ina raibh sé beartaithe leis an gcomhaontú léasa a chruthú go gcuirtear ‘ceart úsáide’ ar neamhní tar éis dheireadh na bliana féilire lena mbaineann mar gheall ar neamhrialtacht sa nós imeachta chun an comhaontú sin a dhámhachtain, neamhrialtacht nach bhfuil inchurtha i leith an fheirmeora sin, i bhfianaise na cúise leis an neamhniú sin, a nochtadh gurb ann do chás ina bhféachann an feirmeoir sin le leas míchuí a bhaint as talamh daoine eile chun teacht timpeall ar an reachtaíocht de réir bhrí chásdlí na Cúirte (féach breithiúnas an 7 Aibreán 2022, Avio Lucos, C‑116/20, EU:C:2022:273, mír 65 agus an cásdlí dá dtagraítear). |
|
55 |
Chun a mheas, i gcás den sórt sin, nach gcomhlíonann an t‑iarratas ar íocaíocht aonair limistéir an critéar incháilitheachta a leagtar síos leis an dlí náisiúnta, d’fhéadfadh sé, contrártha do chuspóir na reachtaíochta, tacaíocht ioncaim dhíreach a bhaint den fheirmeoir sin, cé, de réir mhínithe na cúirte a rinne an tarchur, go ndearna sé gníomhaíocht talmhaíochta iarbhír agus, dá bhrí sin, go raibh limistéar talmhaíochta aige ina ndearnadh an ghníomhaíocht sin. |
|
56 |
I bhfianaise an mhéid sin roimhe seo, is é an freagra ar an gcéad cheist ná nach mór Rialachán Uimh. 1306/2013 agus Rialachán Uimh. 1307/2013 a léiriú sa chaoi go gcuirtear cosc leo ar an údarás náisiúnta inniúil a mheas go bhfuil iarratas ar íocaíocht aonair limistéir neamh-inghlactha, ar an bhforas amháin gur cuireadh an comhaontú léasa a bhaineann leis an limistéar talmhaíochta a chumhdaítear leis an iarratas sin ar fáil mar thaca leis an iarratas sin chun a chruthú, i gcomhréir leis an reachtaíocht náisiúnta, go bhfuil an limistéar talmhaíochta ar fáil don fheirmeoir, agus go raibh sé bailí tráth a scrúdaíodh an t‑iarratas sin, ar neamhní ina dhiaidh sin, le héifeacht chúlghabhálach, mar gheall ar neamhrialtacht sa nós imeachta chun an comhaontú sin a dhámhachtain, neamhrialtacht nach raibh inchurtha i leith an fheirmeora sin, gan beann ar dháta neamhnithe an chonartha sin. |
An dara ceist
|
57 |
Is léir ón ordú tarchuir nach gcuirtear an dara ceist ach amháin má thugtar freagra dearfach ar an gcéad cheist. I bhfianaise an fhreagra a tugadh ar an gceist sin, ní gá an dara ceist a fhreagairt. |
Costais
|
58 |
Os rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe. |
|
Ar na forais sin, rialaíonn an Chúirt (an Chéad Dlísheomra) mar seo a leanas: |
|
Maidir le Rialachán (AE) Uimh. 1306/2013 ó Pharlaimint na hEorpa agus ón gComhairle an 17 Nollaig 2013 maidir leis an gcomhbheartas talmhaíochta a mhaoiniú, a bhainistiú agus faireachán a dhéanamh air agus lena n‑aisghairtear Rialacháin (CEE) Uimh. 352/78, (CE) Uimh. 165/94, (CE) Uimh. 2799/98, (CE) Uimh. 814/2000, (CE) Uimh. 1290/2005 agus (CE) Uimh. 485/2008 ón gComhairle, arna leasú le Rialachán (AE) 2017/2393 ó Pharlaimint na hEorpa agus ón gComhairle an 13 Nollaig 2017, agus Rialachán (AE) Uimh. 1307/2013 ó Pharlaimint na hEorpa agus ón gComhairle an 17 Nollaig 2013 lena mbunaítear rialacha maidir le híocaíochtaí díreacha le feirmeoirí faoi scéimeanna tacaíochta faoi chuimsiú an chomhbheartais talmhaíochta agus lena n‑aisghairtear Rialachán (CE) Uimh. 637/2008 ón gComhairle agus Rialachán (CE) Uimh. 73/2009 ón gComhairle, |
|
ní mór léiriú a dhéanamh mar seo a leanas: |
|
cuirtear cosc leis ar an údarás inniúil náisiúnta a mheas go bhfuil iarratas ar íocaíocht aonair limistéir neamh-inghlactha, ar an bhforas amháin gur cuireadh an comhaontú léasa a bhaineann leis an limistéar talmhaíochta a chumhdaítear leis an iarratas sin, a táirgeadh chun tacú leis, chun a chruthú, i gcomhréir leis an reachtaíocht náisiúnta, go bhfuil an limistéar talmhaíochta ar fáil don fheirmeoir, agus a bhí bailí tráth a scrúdaíodh an t‑iarratas sin, ar neamhní ina dhiaidh sin, le héifeacht chúlghabhálach, mar gheall ar neamhrialtacht sa nós imeachta chun an comhaontú sin a dhámhachtain, neamhrialtacht nach bhfuil inchurtha i leith an fheirmeora sin, gan beann ar dháta neamhnithe an chonartha sin. |
|
Sínithe |
( *1 ) Teanga an cháis: an Rómáinis.