(1)

Tugadh an Coinbhinsiún maidir le Breithiúnais Eachtracha in Ábhair Shibhialta nó Thráchtála a Aithint agus a Fhorfheidhmiú (“an Coinbhinsiún”) i gcrích faoi choimirce Chomhdháil na Háige um an Dlí Idirnáisiúnta Príobháideach an 2 Iúil 2019.

(2)

Leis an gCoinbhinsiún, féachtar le rochtain ar cheartas a chur chun cinn ar fud an domhain trí chomhar breithiúnach idirnáisiúnta feabhsaithe. Féachtar, go háirithe, leis an gCoinbhinsiún, leis na rioscaí agus na costais a bhaineann le dlíthíocht trasteorann agus réiteach díospóidí a laghdú agus, mar thoradh air sin, le trádáil, infheistíocht, agus soghluaisteacht idirnáisiúnta a éascú.

(3)

Ghlac an tAontas páirt ghníomhach sa chaibidlíocht roimh ghlacadh an Choinbhinsiúin agus roinneann sé a chuid spriocanna.

(4)

Faoi láthair, de cheal creat cuimsitheach idirnáisiúnta chun breithiúnais eachtracha in ábhair shibhialta agus thráchtála a aithint agus a fhorfheidhmiú, tá timpeallacht dhlíthiúil scaipthe os comhair shaoránaigh agus gnólachtaí an Aontais atá ag iarraidh go ndéanfaí breithiúnas a tugadh san Aontas a aithint agus a fhorfheidhmiú i dtír nach Ballstát den Aontas í. Tá méadú tagtha ar na rioscaí dlíthiúla do shaoránaigh agus gnólachtaí an Aontais mar thoradh ar an bhfás atá ann sa trádáil idirnáisiúnta agus sna sreabha infheistíochta.

(5)

Ba cheart aghaidh a thabhairt ar an staid seo trí chóras intuartha trasteorann le haghaidh aithint agus forfheidhmiú breithiúnas in ábhair shibhialta nó thráchtála a bhunú. Ní féidir na cuspóirí sin a bhaint amach ach amháin trí chloí le córas aitheanta agus forfheidhmithe fhrithpháirtigh breithiúnas i measc Stát, amhail an córas a glacadh sa Choinbhinsiún. Ag an tráth céanna, ní cheadófaí, leis an gCoinbhinsiún, d’aithint ná d’fhorfheidhmiú breithiúnas tríú tíortha san Aontas, ach amháin i gcásanna ina n-urramaítear prionsabail bhunúsacha dhlí an Aontais.

(6)

De bhun Airteagal 26 den Choinbhinsiún, féadfaidh eagraíochtaí réigiúnacha um chomhtháthú eacnamaíochta a bhfuil an inniúlacht acu maidir le roinnt de na hábhair nó leis na hábhair go léir atá faoi rialú ag an gCoinbhinsiún, amhail an tAontas, an Coinbhinsiún a shíniú, a ghlacadh, a fhormheas agus aontú leis.

(7)

De bhun Airteagal 3(2) den Chonradh ar Fheidhmiú an Aontais Eorpaigh (CFAE), tá an inniúlacht eisiach ag an Aontas comhaontú idirnáisiúnta a thabhairt i gcrích a mhéid ar dóigh dá thabhairt i gcrích difear a dhéanamh do chomhrialacha nó a raon feidhme a athrú. Déanann an Coinbhinsiún difear do reachtaíocht an Aontais, go háirithe Rialachán (AE) Uimh. 1215/2012 ó Pharlaimint na hEorpa agus ón gComhairle (2). Dá bhrí sin, tá inniúlacht eisiach ag an Aontas sna hábhair uile atá faoi rialú ag an gCoinbhinsiún.

(8)

De bhun Airteagal 24(3) agus Airteagal 28 den Choinbhinsiún, féadfar aontú leis an gCoinbhinsiún sula dtiocfaidh sé i bhfeidhm.

(9)

Ba cheart, dá bhrí sin, don Aontas aontú leis an gCoinbhinsiún.

(10)

Agus é ag aontú leis an gCoinbhinsiún, ba cheart don Aontas a dhearbhú, i gcomhréir le hAirteagal 27 den Choinbhinsiún, go bhfeidhmíonn sé inniúlacht maidir leis na hábhair uile atá faoi rialú ag an gCoinbhinsiúin. Dá thoradh sin, bheadh na Ballstáit faoi cheangal ag an gCoinbhinsiún de bhua aontachas an Aontais leis.

(11)

I gcásanna a bhaineann le léasanna neamhchónaithe (tionóntachtaí), tugtar le Rialachán (AE) Uimh. 1215/2012 dlínse eisiach do chúirteanna i mBallstát ina bhfuil an mhaoin dhochorraithe lonnaithe. Níl rialacha dlínse eisiacha den sórt sin maidir le tionóntachtaí neamhchónaithe ar áireamh sa Choinbhinsiún. Dá bhrí sin, agus é ag aontú leis an gCoinbhinsiún, ba cheart don Aontas a dhearbhú, i gcomhréir le hAirteagal 18 den Choinbhinsiún, nach gcuirfidh sé an Coinbhinsiún i bhfeidhm maidir le léasanna neamhchónaithe (tionóntachtaí) ar mhaoin dhochorraithe atá suite san Aontas.

(12)

Tá Éire faoi cheangal ag Rialachán (AE) Uimh. 1215/2012 agus, dá bhrí sin, tá sí rannpháirteach i nglacadh an Chinnidh seo.

(13)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus le CFAE, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm,