Eagrán sealadach

BREITHIÚNAS NA CÚIRTE (an Cúigiú Dlísheomra)

20 Samhain 2025 (*)

(Tarchur chun réamhrialú – Daoine aonair a chosaint i ndáil le próiseáil sonraí pearsanta ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, agus maidir le saorghluaiseacht na sonraí sin – Treoir (AE) 2016/680 – Airteagal 4(1)(c) agus (e) – Íoslaghdú ar phróiseáil sonraí pearsanta – Teorannú coinneála maidir le sonraí pearsanta – Airteagal 10 – Sonraí bithmhéadracha agus géiniteacha a bhailiú agus a choinneáil – Dearbhriachtanas – Airteagal 6(a) – Oibleagáid idirdhealú soiléir a dhéanamh idir sonraí pearsanta de chatagóirí éagsúla na ndaoine – Reachtaíocht náisiúnta lena bhforáiltear do bhailiú sonraí bithmhéadracha agus géiniteacha i ndáil le gach duine a bhfuil drochamhras ann, nó a chuirtear ina leith, go ndearna sé nó sí cion coiriúil d’aon ghnó – Airteagal 5 – Teorainneacha ama iomchuí chun na sonraí sin a scriosadh nó chun athbhreithniú tréimhsiúil a dhéanamh ar an ngá atá leis na sonraí sin a choinneáil – Easpa uastréimhse coinneála – Measúnú ar an ngá atá le sonraí bithmhéadracha agus géiniteacha a choinneáil ag na póilíní ar bhonn rialacha inmheánacha – Airteagal 8(2) – Dlíthiúlacht phróiseáil na sonraí sin – An coincheap ‘dlí Ballstáit’ – Féidearthacht cásdlí náisiúnta a aicmiú mar ‘dhlí Ballstáit’)

I gCás C‑57/23,

IARRAIDH ar réamhrialú de bhun Airteagal 267 CFAE, ón Nejvyšší správní soud (Cúirt Uachtarach Riaracháin, Poblacht na Seice), trí bhreith an 26 Eanáir 2023, a fuarthas ag an gCúirt an 2 Feabhra 2023, sna himeachtaí

Policejní prezidium,

tugann AN CHÚIRT (an Cúigiú Dlísheomra),

agus í comhdhéanta mar seo a leanas: M. L. Arastey Sahún, Uachtarán Dlísheomra, J. Passer, E. Regan (Rapóirtéir), D. Gratsias agus B. Smulders, Breithiúna,

Abhcóide Ginearálta: J. Richard de la Tour,

Cláraitheoir: I. Illéssy, Riarthóir,

ag féachaint don nós imeachta i scríbhinn agus tar éis éisteacht an 28 Samhain 2024,

tar éis breithniú a dhéanamh ar na barúlacha arna dtíolacadh thar ceann na bpáirtithe seo a leanas:

– JH, ag M. Mandzák, L. Nezpěvák agus L. Trojan, advokáti,

– Rialtas na Seice, ag M. Smolek, O. Serdula, J. Vláčil, T. Suchá agus L. Březinová, i gcáil Gníomhairí,

– Éire, ag M. Browne, Príomh-Aturnae Stáit, A. Joyce agus D. O’Reilly, i gcáil Gníomhairí, le cúnamh ó A. Mulligan, Abhcóide,

– Rialtas na hÍsiltíre, ag J. Langer, i gcáil Gníomhaire,

– Rialtas na Polainne, ag B. Majczyna, i gcáil Gníomhaire,

– an Coimisiún Eorpach, ag A. Bouchagiar, H. Kranenborg, P. Němečková agus F. Wilman, i gcáil Gníomhairí,

tar éis éisteacht le Tuairim an Abhcóide Ghinearálta ag éisteacht an 27 Feabhra 2025,

an Breithiúnas seo a leanas:

Breithiúnas

1 Baineann an iarraidh ar réamhrialú seo le léiriú ar Airteagal 4(1)(c) agus (e), Airteagal 6, Airteagal 8(2) agus Airteagal 10 de Threoir (AE) 2016/680 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, agus maidir le saorghluaiseacht na sonraí sin, agus lena n‑aisghairtear Cinneadh Réime 2008/977/CGB ón gComhairle (IO 2016 L 119, p. 89).

2 Rinneadh an iarraidh seo in imeachtaí idir JH agus Policejní prezidium (Stiúrthóireacht na bPóilíní, Poblacht na Seice) (‘Stiúrthóireacht Póilíneachta na Seice’) maidir le, inter alia, sonraí bithmhéadracha agus géiniteacha a bhaineann le JH a bhailiú i gcomhthéacs imeachtaí coiriúla agus coinneáil na sonraí sin ag póilíní na Seice.

An dlí lena mbaineann

Dlí an Aontais Eorpaigh

3 Léitear mar seo a leanas le haithrisí 1, 2, 26, 33, 37 agus 96 de Threoir 2016/680:

‘(1) Ceart bunúsach is ea daoine aonair a chosaint i ndáil le próiseáil sonraí pearsanta. Foráiltear le hAirteagal 8(1) den Chairt um Chearta Bunúsacha an Aontais Eorpaigh (“an Chairt”) agus Airteagal 16(1) CFAE go bhfuil an ceart ag gach duine go ndéanfar a sonraí pearsanta a chosaint.

(2) Ba cheart do na prionsabail agus do na rialacha maidir le daoine nádúrtha a chosaint i ndáil le próiseáil a gcuid sonraí pearsanta cearta bunúsacha agus saoirsí bunúsacha na ndaoine nádúrtha sin a urramú, is cuma cén náisiúntacht atá acu nó cén áit a bhfuil cónaí orthu, go háirithe a gceart go ndéanfar sonraí pearsanta a chosaint [...]

[...]

(26) Ní mór aon phróiseáil a dhéantar ar shonraí pearsanta a bheith dleathach, cothrom agus trédhearcach i ndáil leis na daoine aonair lena mbaineann, agus níor cheart iad a phróiseáil ach amháin chun críocha sonracha a leagtar síos leis an dlí. Ní chuireann é sin ann féin cosc ar na húdaráis forfheidhmithe dlí gníomhaíochtaí a dhéanamh amhail imscrúduithe ceilte nó físfhaireachas. Féadfaidh údaráis forfheidhmithe dlí gníomhaíochtaí a dhéanamh chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, lena n‑áirítear cosaint in aghaidh bagairtí don tslándáil phoiblí, ar choinníoll go gcinntear iad de réir an dlí agus gur beart riachtanach comhréireach iad laistigh de shochaí dhaonlathach, agus aird chuí á tabhairt ar leasanna dlisteanacha an duine nádúrtha lena mbaineann. [...] Ba cheart daoine aonair a chur ar an eolas faoi rioscaí, rialacha, coimircí agus cearta a bhaineann le próiseáil sonraí pearsanta agus faoin mbealach lena gcearta a fheidhmiú i ndáil le próiseáil den sórt sin. Ba cheart, go háirithe, críocha sonracha ina ndéantar próiseáil ar sonraí pearsanta a bheith sainráite agus dlisteanach agus ba cheart iad a chinneadh tráth bailithe na sonraí pearsanta. Ba cheart na sonraí pearsanta a bheith leordhóthanach, ábhartha agus teoranta don mhéid is gá chun na gcríoch a ndéantar iad a phróiseáil ina leith. [...] Níor cheart sonraí pearsanta a phróiseáil ach mura bhféadfaí críoch na próiseála a bhaint amach go réasúnta ar bhealach eile. Chun a áirithiú nach gcoinnítear na sonraí níos faide ná mar is gá, ba cheart don rialaitheoir teorainneacha ama a shocrú don scriosadh nó chun athbhreithniú tréimhsiúil a dhéanamh. Ba cheart do na Ballstáit coimircí iomchuí a leagan síos maidir le sonraí pearsanta a choinnítear ar feadh tréimsí níos faide chun críocha cartlannú ar mhaithe le leas an phobail, úsáid eolaíoch, staitistiúil nó stairiúil.

[...]

(33) Nuair a dhéanann an treoir seo tagairt do bhunús dlí nó do bheart reachtach, ní gá go mbeadh gníomh reachtach arna ghlacadh ag parlaimint ag teastáil, gan dochar do cheanglais de bhun ord bunreachtúil an Bhallstáit lena mbaineann. Mar sin féin, ba cheart bunús dlí den sórt sin nó beart reachtach den sórt sin a bheith soiléir cruinn agus ba cheart a chur chun feidhme a bheith intuartha do na daoine sin a bheadh faoina réir, i gcomhréir le cásdlí na Cúirte Breithiúnais agus cásdlí na Cúirte Eorpaí um Chearta an Duine. Ba cheart a shonrú i ndlí na mBallstát lena rialaítear próiseáil sonraí pearsanta laistigh de raon feidhme na Treorach seo ar a laghad na cuspóirí, na sonraí pearsanta atá le próiseáil, críocha na próiseála agus na nósanna imeachta chun sláine agus rúndacht sonraí pearsanta a chaomhnú agus nósanna imeachta maidir lena scriosadh, agus ar an gcaoi sin ráthaíochtaí leordhóthanacha a thabhairt i gcoinne an riosca mí-úsáide agus treallachais.

[...]

(37) Tá cosaint ar leith dlite do shonraí pearsanta ar de chineál fíor-íogair iad maidir le cearta bunúsacha agus saoirsí bunúsacha, toisc go bhféadfaí rioscaí suntasacha a chruthú do na cearta bunúsacha agus saoirsí bunúsacha mar thoradh ar chomhthéacs a bpróiseála. Ba cheart sonraí pearsanta lena nochtar tionscnamh ciníoch nó eitneach a chur san áireamh, ar an tuiscint nach é an bhrí a bhainfear as úsáid an téarma “tionscnamh eitneach” sa Treoir seo go nglactar san Aontas le teoiricí lena ndéantar iarracht a chinneadh gur ann do chiníocha daonna ar leith. Níor cheart sonraí pearsanta den sórt sin a phróiseáil mura bhfuil coimircí iomchuí do chearta agus saoirsí an ábhair sonraí ag gabháil leo, ar coimircí iad a leagtar síos leis an dlí agus a cheadaítear i gcásanna a cheadaítear leis an dlí; i gcás nach bhfuil sé údaraithe cheana le dlí den sórt sin, ní gá leasanna ríthábhachtacha an ábhair sonraí nó duine eile a choimirciú; nó a bhaineann le sonraí ar follasach gur chuir an t‑ábhar sonraí ar fáil go poiblí iad. D’fhéadfaí a áireamh ar choimircí iomchuí do chearta agus do shaoirsí an ábhair sonraí an fhéidearthacht gan na sonraí sin a bhailiú ach amháin i ndáil le sonraí eile a bhaineann leis an duine nádúrtha lena mbaineann, an fhéidearthacht na sonraí a bhailítear a dhaingniú go leordhóthanach, rialacha níos déine maidir le rochtain fhoireann an údaráis inniúil ar na sonraí agus toirmeasc ar tharchur na sonraí sin. [...]

[...]

(96) Ba cheart tréimhse nach faide ná 2 bhliain a cheadú do na Ballstáit ó dháta theacht i bhfeidhm na Treorach seo chun í a thrasuí. Ba cheart próiseáil atá ar bun cheana féin ar an dáta sin a thabhairt i gcomhréir leis an Treoir seo laistigh den tréimhse 2 bhliain tar éis theacht i bhfeidhm na Treorach seo. Mar sin féin, i gcás ina gcomhlíonann próiseáil den sórt sin dlí an Aontais is infheidhme roimh dháta theacht i bhfeidhm na Treorach seo, níor cheart feidhm a bheith ag ceanglais na Treorach seo maidir le réamhchomhairliúchán leis an údarás maoirseachta maidir leis na hoibríochtaí próiseála atá ar bun cheana ar an dáta sin ós rud é go bhfuil na ceanglais sin, mar gheall ar a gcineál, le comhlíonadh sula ndéanfar an phróiseáil. [...]

[...]’

[Aistriúchán neamhoifigiúil]

4 Foráiltear don mhéid seo a leanas in Airteagal 1(1) den Treoir sin, dar teideal ‘Ábhar agus cuspóirí’:

‘Sa Treoir seo leagtar síos na rialacha maidir le daoine aonair a chosaint i ndáil le sonraí pearsanta a phróiseáil ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, lena n‑áirítear coimirciú a dhéanamh in aghaidh bagairtí don tslándáil phoiblí agus cosc a dhéanamh ar na bagairtí sin.’

[Aistriúchán neamhoifigiúil]

5 Foráiltear mar seo a leanas le hAirteagal 2(1) den Treoir sin, dar teideal ‘Raon Feidhme’:

‘Tá feidhm ag an Treoir seo maidir le sonraí pearsanta a phróiseáil ag údaráis inniúla chun na gcríoch a leagtar amach in Airteagal 1(1).’

[Aistriúchán neamhoifigiúil]

6 Foráiltear mar seo a leanas le hAirteagal 3 den Treoir sin, dar teideal ‘Sainmhínithe’:

‘Chun críocha na Treorach seo, beidh feidhm ag na sainmhínithe seo a leanas:

1. ciallaíonn “sonraí pearsanta” aon fhaisnéis a bhaineann le duine nádúrtha sainaitheanta nó in‑sainaitheanta (“ábhar sonraí”); is é is duine nádúrtha in‑sainaitheanta ann duine is féidir a shainaithint, go díreach nó go hindíreach, go háirithe trí thagairt a dhéanamh d’aitheantóir amhail ainm, uimhir aitheantais, sonraí suímh, aitheantóir ar líne nó ceann amháin nó níos mó de thosca a bhaineann go sonrach le céannacht fhisiceach, fhiseolaíoch, ghéiniteach, mheabhrach, eacnamaíoch, chultúrtha nó shóisialta an duine nádúrtha sin;

2. ciallaíonn “próiseáil” aon oibríocht nó aon sraith d’oibríochtaí a dhéantar ar shonraí pearsanta nó ar shraitheanna de shonraí pearsanta, trí mhodhanna uathoibrithe nó trí mhodhanna eile, amhail bailiú, taifeadadh, eagrú, struchtúrú, coinneáil, oiriúnú nó athrú, aisghabháil, ceadú, úsáid, nochtadh trí tharchur, trí scaipeadh nó trí chur ar fáil ar bhealach eile, ailíniú nó comhcheangal, srianadh, scriosadh nó díothú;

[...]

12. ciallaíonn “sonraí géiniteacha” sonraí pearsanta a bhaineann le tréithe géiniteacha duine nádúrtha nó le hoidhreacht , a thugann faisnéis uathúil faoi fhiseolaíocht nó sláinte an duine nádúrtha sin agus arb é an toradh, go háirithe, ar anailís arna déanamh ar shampla bitheolaíoch ón duine nádúrtha atá i gceist;

13. ciallaíonn “sonraí bithmhéadracha” sonraí pearsanta a eascraíonn as próiseáil theicniúil ar leith agus a bhaineann le saintréithe fisiciúla, fiseolaíocha nó iompraíochta duine nádúrtha, ar sonraí iad lena gceadaítear nó lena ndeimhnítear sainaithint uathúil an duine nádúrtha sin, amhail íomhánna den aghaidh nó sonraí dachtalascópacha;

[…]’

[Aistriúchán neamhoifigiúil]

7 Sonraítear mar a leanas in Airteagal 4(1) de Threoir 2016/680, dar teideal ‘Prionsabail a bhaineann le próiseáil sonraí pearsanta’:

‘Déanfaidh na Ballstáit foráil mar a leanas maidir le sonraí pearsanta:

(a) déanfar iad a phróiseáil ar bhealach atá dleathach agus cothrom;

(b) déanfar iad a bhailiú chun críoch sonraithe sainráite dlisteanach agus ní dhéanfar iad a phróiseáil ar bhealach atá ar neamhréir leis na críocha sin;

(c) beidh siad leordhóthanach, ábhartha agus ní bheidh siad iomarcach i ndáil leis na críocha dá ndéantar próiseáil orthu;

(d) beidh siad cruinn agus, i gcás inar gá, coimeádfar suas chun dáta iad; déanfar gach beart réasúnta chun a áirithiú go scriostar nó go gceartaítear sonraí pearsanta míchruinne gan mhoill, ag féachaint do na críocha ar chucu a dhéantar iad a phróiseáil;

(e) déanfar iad a choinneáil i bhfoirm nach gceadaítear léi na hábhair sonraí a shainaithint ach go ceann tréimhse nach faide ná mar is gá chun na críocha sin ar chucu a ndéantar na sonraí pearsanta a phróiseáil a bhaint amach;

[...]’

[Aistriúchán neamhoifigiúil]

8 Foráiltear mar seo a leanas in Airteagal 5 den Treoir sin, dar teideal ‘Teorainneacha ama le haghaidh coinneáil agus athbhreithniú’:

‘Forálfaidh na Ballstáit teorainneacha ama iomchuí chun sonraí pearsanta a scriosadh nó chun athbhreithniú tréimhsiúil a dhéanamh ar an ngá atá leis na sonraí pearsanta a choinneáil a leagan síos. Áiritheofar le bearta nós imeachta go gcomhlíonfar na teorainneacha ama sin.’

[Aistriúchán neamhoifigiúil]

9 Foráiltear le hAirteagal 6 den Treoir sin, dar teideal ‘Idirdhealú idir catagóirí éagsúla d’ábhair sonraí’, an méid seo a leanas:

‘Forálfaidh na Ballstáit go ndéanfaidh an rialaitheoir, i gcás inarb infheidhme agus a mhéid is féidir, idirdhealú soiléir idir sonraí pearsanta na gcatagóirí éagsúla ábhar sonraí, amhail:

(a) daoine a bhfuil forais thromchúiseacha ann ina leith le creidiúint go ndearna siad cion coiriúil nó go bhfuil siad ar tí cion coiriúil a dhéanamh;

(b) daoine a ciontaíodh i gcion coiriúil;

(c) íospartaigh ciona choiriúil nó daoine a bhfuil fíorais áirithe ina leith ag tabhairt le fios go bhféadfaidís a bheith ina n‑íospartaigh ciona choiriúil; agus

(d) páirtithe eile i gcion coiriúil, amhail daoine a d’fhéadfadh go n‑iarrfaí orthu fianaise a thabhairt in imscrúduithe i dtaca le cionta coiriúla nó imeachtaí coiriúla ina dhiaidh sin, daoine ar féidir leo faisnéis a sholáthar faoi chionta coiriúla, nó teagmhálacha nó comhpháirtithe duine de na daoine dá dtagraítear i míreanna (a) agus (b).’

[Aistriúchán neamhoifigiúil]

10 Foráiltear mar seo a leanas le hAirteagal 8 den Treoir sin, dar teideal ‘Dlíthiúlacht na próiseála’:

‘1. Déanfaidh na Ballstáit foráil nach mbeidh an phróiseáil dleathach ach amháin más gá, agus a mhéid is gá, an phróiseáil a dhéanamh chun cúram a chur i gcrích a dhéanann údarás inniúil chun na gcríoch a leagtar amach in Airteagal 1(1) agus go mbeidh sé bunaithe ar dhlí an Aontais nó ar dhlí an Bhallstáit.

2. Sonraítear, ar a laghad, i ndlí an Bhallstáit lena rialaítear próiseáil faoi raon feidhme na Treorach seo cuspóirí na próiseála, na sonraí pearsanta a bheidh le próiseáil agus críocha na próiseála.’

[Aistriúchán neamhoifigiúil]

11 De réir Airteagal 10 den Treoir sin, dar teideal ‘Próiseáil catagóirí speisialta sonraí pearsanta’:

‘Ní cheadófar próiseáil a dhéanamh ar shonraí pearsanta lena léirítear tionscnamh ciníoch nó eitneach, tuairimí polaitiúla, creideamh reiligiúnach nó fealsúnach, nó ballraíocht i gceardchumann, ná próiseáil sonraí géiniteacha, sonraí bithmhéadracha chun duine nádúrtha a shainaithint go huathúil, sonraí a bhaineann leis an tsláinte nó sonraí a bhaineann le saol gnéis agus le gnéaschlaonadh duine nádúrtha ach amháin i gcás ina bhfuil dearbhriachtanas leis, faoi réir coimircí iomchuí do chearta agus do shaoirsí an ábhair sonraí, agus ní cheadófar an phróiseáil sin ach amháin sna cásanna seo a leanas:

(a) i gcás ina n‑údaraítear sin le dlí an Aontais nó le dlí Ballstáit;

(b) chun leasanna ríthábhachtacha an ábhair sonraí nó duine eile a chosaint; nó

(c) i gcás ina mbaineann próiseáil den sórt sin le sonraí ar follasach gur chuir an t‑ábhar sonraí ar fáil go poiblí iad.’

[Aistriúchán neamhoifigiúil]

12 Faoi Airteagal 63(1) den Treoir sin, bhí ar na Ballstáit na dlíthe, na rialacháin agus na forálacha riaracháin is gá chun an Treoir sin a chomhlíonadh a ghlacadh agus a fhoilsiú faoin 6 Bealtaine 2018 ar a dhéanaí. Ina theannta sin, tá sé d’oibleagáid ar na Ballstáit na forálacha sin a chur i bhfeidhm ón dáta céanna sin.

13 I gcomhréir le hAirteagal 64 den Treoir sin, tháinig an Treoir sin i bhfeidhm an 5 Bealtaine 2016.

Dlí Phoblacht na Seice

14 Foráiltear mar seo a leanas le hAirteagal 11 den zákon č. 273/2008 Sb., o Policii České republiky (Dlí Uimh. 273/2008 maidir le Póilíní Phoblacht na Seice), sa leagan is infheidhme maidir leis an díospóid sna príomhimeachtaí (‘an Dlí maidir le Póilíní na Seice’), dar teideal ‘Comhréireacht gníomhartha’:

‘Ceanglaítear ar na póilíní agus fostaí eile na bpóilíní:

[...]

(c) gníomhú ar shlí nach dtéann aon chur isteach ar chearta agus saoirsí daoine is ábhar don ghníomh, nó daoine nach bhfuil baint acu leis, thar a bhfuil riachtanach chun an cuspóir atá á shaothrú leis an ngníomh a bhaint amach.’

15 Foráiltear mar seo a leanas le hAirteagal 65 den Dlí maidir le Póilíní na Seice:

‘(1) Agus a chuid cúraimí á gcomhlíonadh aige, féadfaidh an póilín, chun críocha aitheantais amach anseo,

(a) duine atá cúisithe as cion coiriúil d’aon ghnó a dhéanamh, nó duine a cuireadh in iúl dó nó di go raibh amhras ann go ndearna sé nó sí cion coiriúil den sórt sin,

(b) duine a bhfuil pianbhreith choimeádta á sheirbheáil aige nó aici mar gheall ar chion coiriúil d’aon ghnó a dhéanamh,

(d) duine iarrtha a fuarthas agus a bhfuil a inniúlacht dhlíthiúil teoranta,

méarloirg a thógáil, gnéithe fisiceacha a chuardach, tomhais a thógáil ar a chorp, taifeadtaí físe, fuaime agus comhchosúla a dhéanamh, agus samplaí bitheolaíocha a thógáil chun faisnéis a fháil faoina chaipiteal géiniteach.

(2) Mura féidir gníomh dá bhforáiltear i bhfomhír 1 a dhéanamh toisc go bhfuil an duine ag déanamh agóide ina choinne, beidh sé de cheart ag an bpóilín an agóid a shárú tar éis dó a iarraidh ar an duine géilleadh di, agus nár éirigh leis an iarraidh sin. Ní mór an bealach a sáraíonn an póilín an agóid sin a bheith comhréireach le déine an fhreasúra. Ní fhéadfaidh an póilín agóid duine a shárú i gcás bailiú fola nó gníomh comhchosúil eile a dhéanann difear do shláine choirp.

(3) Mura féidir gníomh dá bhforáiltear i bhfomhír 1 a dhéanamh ar an láthair, beidh sé de cheart ag an bpóilín toghairm a chur ar an duine d’fhonn an gníomh a dhéanamh. Scaoilfidh an póilín an duine a luaithe a bheidh an gníomh déanta.

(4) Cuirfidh an póilín tuarascáil i dtoll a chéile maidir leis na gníomhartha a rinneadh.

(5) Scriosfaidh na póilíní sonraí pearsanta a fuarthas de bhun mhír 1 i gcás nach bhfuil próiseáil fíor-riachtanach chun cionta coiriúla a chosc, a imscrúdú, a bhrath nó a ionchúiseamh nó chun slándáil Phoblacht na Seice, an beartas poiblí nó an tslándáil inmheánach a áirithiú.’

16 Foráiltear mar seo a leanas le hAirteagal 79 den Dlí sin, dar teideal ‘Forálacha bunúsacha a bhaineann le próiseáil sonraí pearsanta i gcomhthéacs cúraimí áirithe póilíneachta’:

‘(1) Beidh feidhm ag míreanna 2 go mír 6 agus ag Airteagail 79a go 88 maidir le próiseáil sonraí pearsanta chun cionta coiriúla a chosc, a imscrúdú, a bhrath nó a ionchúiseamh, chun slándáil Phoblacht na Seice a áirithiú nó chun beartas poiblí agus slándáil inmheánach a áirithiú, lena n‑áirítear chun daoine agus nithe a rianú.

(2) Féadfaidh na póilíní sonraí pearsanta a phróiseáil más gá chun na cuspóirí dá dtagraítear i mír 1 a bhaint amach. Féadfaidh na póilíní sonraí pearsanta a phróiseáil freisin chun leasanna tábhachtacha ábhair sonraí a chosaint, ar leasanna iad a bhaineann leis na críocha dá dtagraítear i mír 1.

[...]’

17 Is mar seo a leanas atá an fhoclaíocht in Airteagal 82 den Dlí sin, dar teideal ‘Measúnú ar an ngá le tuilleadh próiseála ar shonraí pearsanta’:

‘(1) Fíoróidh na póilíní ar a laghad uair amháin gach 3 bliana go bhfuil na sonraí pearsanta arna bpróiseáil chun na gcríoch dá dtagraítear in Airteagal 79(1) fós riachtanach chun a gcúraimí sa réimse sin a chomhlíonadh.

(2) Chun críocha an fhíoraithe dá dtagraítear i mír 1, beidh sé de chumhacht ag na póilíní sliocht as an taifead coiriúil a éileamh.

(3) Déanfaidh na húdaráis forfheidhmithe dlí agus na húdaráis bhreithiúnacha, an Ministerstvo spravedlnosti (an Aireacht Dlí agus Cirt, Poblacht na Seice), an Ústavní soud (an Chúirt Bhunreachtúil, Poblacht na Seice) agus an Kancelá-prezidenta republiky (Oifig Uachtarán na Poblachta, Poblacht na Seice), laistigh de theorainneacha a n‑inniúlachta, na póilíní a choinneáil ar an eolas go leanúnach, chun críocha an fhíoraithe dá dtagraítear i mír 1, maidir lena gcinntí críochnaitheacha, maidir leis an tréimhse theorann le haghaidh imeachtaí coiriúla, maidir le forghníomhú pianbhreithe nó cinntí Uachtarán na Poblachta a bhaineann le himeachtaí coiriúla, pianbhreitheanna nó maithiúnais nó pardúin arna ndeonú.’

An díospóid sna príomhimeachtaí agus na ceisteanna a tharchuirtear i gcomhair réamhrialú

18 Le cinneadh an 11 Nollaig 2015, thionscain an tAonad chun éilliú agus coireacht airgeadais a aimsiú de chuid na Roinne Póilíní um Imscrúdú Coiriúil in Plzela (Poblacht na Seice), ar seirbhís de chuid Phóilíní na Seice í a bhfuil inniúlacht náisiúnta aici, imeachtaí coiriúla i gcoinne JH mar gheall ar shárú oibleagáide maidir le sócmhainní duine eile a bhainistiú.

19 An 13 Eanáir 2016, chuala póilíní na Seice JH den chéad uair sna himeachtaí coiriúla lena mbaineann agus d’ordaigh siad agus rinne siad na gníomhartha sainaitheantais seo a leanas, in ainneoin easaontas JH: méarloirg JH a thógáil, sampláil ó bhéal JH a thógáil, ar a bhonn a chruthaigh na póilíní próifíl ghéiniteach, pictúirí de JH a ghlacadh agus cur síos ar JH a tharraingt. Rinne na póilíní an fhaisnéis sin a thaifeadadh ansin sna bunachair sonraí ábhartha de chuid phóilíní Phoblacht na Seice.

20 Le breithiúnas an Městský soud v Praze (Cúirt Chathrach Phrág, Poblacht na Seice) an 15 Márta 2017, fuarthas JH ciontach ar deireadh i gcion maidir le sárú oibleagáide i mbainistiú maoine duine eile agus i gcoir mí-úsáide oifige ag státseirbhíseach. Gearradh téarma príosúnachta 3 bliana ar fionraí air, chomh maith le toirmeasc, ar feadh tréimhse 4 bliana, ar fheidhmeanna bainistíochta a fheidhmiú sa riarachán poiblí, lena n‑áirítear bainistiú maoine dochorraithe agus sochorraithe, mar aon leis an damáiste a rinneadh a shlánú a mhéid is féidir.

21 An 8 Márta 2016, thug JH caingean os comhair Městský soud v Praze (Cúirt Chathrach Phrág) ag iarraidh dearbhú gurbh ionann doiciméid aitheantais a chur i gcrích i gcomhréir le hAirteagal 65 den Dlí maidir le Póilíní na Seice, an fhaisnéis agus na samplaí a fuarthas ar an gcaoi sin a choinneáil, agus iontráil a chruthú i gcóras ríomhaireachta phóilíní Phoblacht na Seice agus cur isteach neamhdhleathach ar a cheart bunúsach maidir le saol príobháideach.

22 Ós rud é, i gcás eile a bhí ar feitheamh an tráth sin, go raibh iarratas déanta aici cheana féin ar an Ústavní soud (Cúirt Bhunreachtúil, Poblacht na Seice) ar mheasúnú ar bhunreachtúlacht Airteagal 65 den Dlí maidir le Póilíní na Seice, chuir Městský soud v Praze (Cúirt Chathair Phrág) an scrúdú ar an gcaingean a thionscain JH ar fionraí.

23 Le cinneadh an 22 Márta 2022, dhiúltaigh an Ústavní soud (an Chúirt Bhunreachtúil) d’iarratas Městský soud v Praze (Cúirt Chathrach Phrág) ar dhearbhú go raibh Airteagal 65 den Dlí maidir le Póilíní na Seice míbhunreachtúil. Tar éis an chinnidh sin, chuir Městský soud v Praze (Cúirt Chathrach Phrág) tús arís leis an scrúdú ar an gcaingean a thionscain JH.

24 Le breithiúnas an 23 Meitheamh 2022, sheas Městský soud v Praze (Cúirt Chathrach Phrág) le caingean JH, agus é den tuairim go raibh na gníomhartha a rinne póilíní na Seice an 13 Eanáir 2016 neamhdhleathach. Dá bhrí sin, d’ordaigh an chúirt sin do phóilíní na Seice na sonraí pearsanta go léir a d’eascair as na gníomhartha sin a scriosadh óna bunachair sonraí.

25 Sa bhreithiúnas sin, luaigh an chúirt sin gurbh ionann ábhar géiniteach a thógáil agus cur isteach suntasach ar an gceart bunúsach go n‑urramófaí saol príobháideach an duine lena mbaineann, a chosnaítear go háirithe le hAirteagal 8 den Choinbhinsiún Eorpach chun Cearta an Duine agus Saoirsí Bunúsacha a Chosaint, a síníodh sa Róimh an 4 Samhain 1950 (‘ECHR’), agus in Airteagal 10(3) den Listina základních práv a svobod (an Chairt um Chearta Bunúsacha agus Saoirsí Bunúsacha Phoblacht na Seice). Mar sin féin, ní thugtar treoir leordhóthanach in Airteagal 65 den Dlí maidir le Póilíní na Seice chun measúnú a dhéanamh ar chomhréireacht an chur isteach sin. Is é an t‑aon fhíorú a cheanglaítear le Airteagal 65 gur sheiceáil póilíní na Seice, roimh thobhach den sórt sin a dhéanamh, cineál ‘d’aon ghnó’ an chiona a rinneadh.

26 Thairis sin, thug an chúirt sin faoi deara go n‑ioncúisíodh JH as cion coiriúil nach raibh chomh tromchúiseach, gur cuireadh a phianbhreith choimeádta ar fionraí, rud a dhearbhaíonn nach bhfuil na gníomhartha a ndearnadh gearán ina leith chomh tromchúiseach, nár ciontaíodh é riamh in imeachtaí coiriúla, nár dhócha go ndéanfaí athchion ar a thaobh féin agus nach raibh sé cinnte go raibh na cionta a rinneadh de chineál na gcionta a ndéanfadh a ndéantóirí cion coiriúil amach anseo a d’fhéadfadh na sonraí pearsanta a choinnítear sna bunachair sonraí a shainaithint. Bhain sí de thátal as sin nár chomhlíon na gníomhartha aitheantais a rinne póilíní na Seice a bhí ina n‑ábhar don díospóid sna príomhimeachtaí ceanglas na comhréireachta.

27 Thaisc Stiúrthóireacht na bPóilíní achomharc ar phointe dlí i gcoinne an bhreithiúnais sin os comhair an Nejvyšší správní soud (Cúirt Riaracháin Uachtarach, Poblacht na Seice) arb í an chúirt a rinne an tarchur í.

28 Mar thaca lena achomharc, chuir Stiúrthóireacht na bPóilíní in iúl go raibh críoch phróiseáil na sonraí pearsanta luaite go soiléir in Airteagal 65 den Dlí maidir le Póilíní na Seice. Luaigh sé freisin go ndearna sé measúnú ar chineál comhréireach bhailiú agus choinneáil shonraí pearsanta JH, agus aird á tabhairt ar fhachtóir an atitimeachais, ar an ngéarú a d’fhéadfaí a dhéanamh ar na gníomhartha agus ar an bhfíoras go ndearna JH roinnt sáruithe san am a chuaigh thart.

29 Mar fhreagairt air sin, chuir JH in iúl, inter alia, go ndearna seirbhísí póilíneachta Phoblacht na Seice na gníomhartha sainaitheantais gan scrúdú a dhéanamh roimhe sin ar chomhréireacht an chur isteach. Cháin JH freisin an easpa poiblíochta ar threoracha phóilíní Phoblacht na Seice maidir le gníomhartha aitheantais a dhéanamh.

30 Cuireann an chúirt a rinne an tarchur in iúl, de réir a cásdlí is déanaí, nach leor comhlíonadh na gceanglas foirmiúil a leagtar síos in Airteagal 65(1) den Dlí maidir le Póilíní na Seice, go háirithe maidir le haicmiú mar chion coiriúil ‘d’aon ghnó’, chun a mheas go bhfuil bailiú agus coinneáil na sonraí pearsanta dá dtagraítear san Airteagal sin dleathach. Dá bhrí sin, tá sé d’oibleagáid ar na seirbhísí póilíneachta measúnú a dhéanamh ar chomhréireacht a samplála i ngach cás sonrach, agus aird á tabhairt, inter alia, ar stair choiriúil, ar phearsantacht agus ar iompar an ábhair sonraí, ar thromchúis an chiona choiriúil ar toghairmeadh an duine sin ina leith chun críche gníomhartha aitheantais a dhéanamh agus, i gcomhthéacs iarraidh ar scriosadh ex post, ar an tréimhse atá caite ó rinneadh an cion coiriúil lena mbaineann.

31 I gcomhréir leis an gcásdlí sin, tháinig na cúirteanna náisiúnta ar an gconclúid go raibh gníomhartha sainaitheanta, amhail bailiú sonraí bithmhéadracha agus géiniteacha, neamhdhleathach, go háirithe i gcás cionta nach mbaineann aon fhoréigean leo agus a rinne daoine nár ciontaíodh riamh.

32 Is sa chomhthéacs sin a cheistíonn an chúirt a rinne an tarchur comhoiriúnacht an chórais dlí a leagtar síos in Airteagal 65 den Dlí maidir le Póilíní na Seice le Treoir 2016/680.

33 Ar an gcéad dul síos, fiafraíonn an chúirt sin an gcuirtear cosc leis na ceanglais a leagtar síos leis an Treoir sin ar bhailiú neamh-idirdhealaitheach sonraí bithmhéadracha agus géiniteacha d’aon duine a bhfuil drochamhras ann go ndearna sé cion coiriúil d’aon ghnó.

34 Ar an gcéad dul síos, leanann sé ó chásdlí na Cúirte Eorpaí um Chearta an Duine maidir leis an gceart bunúsach go n‑urramófaí an saol príobháideach, mar a ráthaítear in Airteagal 8 den ECHR go gceanglaítear ar na páirtithe conarthacha idirdhealú a dhéanamh idir cionta coiriúla a mbailítear samplaí d’aigéad dí-ocsairibeanúicléasach (ADN) ina leith de réir a thromchúisí atá siad don tsochaí. Ní fhéadfadh na páirtithe conarthacha caitheamh le déantóirí coireanna tromchúiseacha, ar thaobh amháin, amhail na cionta sin a rinneadh le foréigean, a mbeadh bailiú agus coinneáil samplaí ADN dlisteanach ina leith, ar an taobh eile, agus déantóirí cionta coiriúla nach bhfuil chomh tromchúiseach céanna, ar an taobh eile.

35 Ar an dara dul síos, maidir leis na ceanglais a eascraíonn as prionsabal na comhréireachta, amhail, an méid a leagtar síos faoi raon feidhme Threoir 2016/680, i bhfoirm prionsabal maidir le próiseáil sonraí pearsanta a íoslaghdú agus an oibleagáid idirdhealú a dhéanamh idir catagóirí éagsúla d’ábhair sonraí, a leagtar síos, faoi seach, in Airteagal 4(1)(c) den Treoir sin agus in Airteagal 6 de, ardaítear ceisteanna maidir le cé acu a dhéantar nó nach ndéantar idirdhealú in abstracto ar an leibhéal reachtach, ag brath, inter alia, ar thromchúis na gcionta atá beartaithe, nó an gá measúnú a dhéanamh i gcomhréir le comhréireacht na samplála i ngach cás sonrach.

36 Ar an dara dul síos, fiafraíonn an chúirt a rinne an tarchur an gcuireann na ceanglais a leagtar síos le Treoir 2016/680 bac ar shonraí bithmhéadracha agus géiniteacha a choinneáil gan foráil a dhéanamh go sainráite maidir le teorainn ama ina leith sin. Thairis sin, ní leagtar síos leis an reachtaíocht náisiúnta is infheidhme uasteorainn ar an tréimhse choinneála chun sonraí a shainaithint. De réir léamh na cúirte a rinne an tarchur ar chásdlí na Cúirte Eorpaí um Chearta an Duine, éilíonn an chúirt sin go mbunófar uasteorainn den sórt sin.

37 Ar an tríú dul síos, fiafraíonn an chúirt a rinne an tarchur an féidir cásdlí chúirteanna riaracháin na Seice a aicmiú mar ‘dhlí Ballstáit’ de réir bhrí Airteagal 8 de Threoir 2016/680, lena leagtar síos na coinníollacha maidir le dlíthiúlacht na próiseála ar shonraí pearsanta.

38 Ní shonraítear in Airteagal 65 den Dlí maidir le Póilíní na Seice na coinníollacha sonracha coinneála agus na cineálacha faisnéise is féidir a bhaint as an sampla a tógadh ná na coinníollacha chun sonraí bithmhéadracha agus géiniteacha a choinneáil agus a scriosadh, agus mar thoradh air sin ní féidir leis an Airteagal sin, ann féin, na ceanglais a leagtar síos in Airteagal 8(2) de Threoir 2016/680, arna léamh i gcomhar le hAirteagal 10 den Treoir sin, a chomhlíonadh.

39 Is fíor go ndéantar Airteagal 65 a fhorlíonadh le treoracha Uachtarán na bpóilíní a chuireann an mír sin chun feidhme, ach ós rud é nach téacsanna rialála iad na treoracha sin ná nár foilsíodh iad, ní féidir iad a aithint in imthosca ar bith mar ‘dhlí Ballstáit’ de réir bhrí Airteagal 8(2) de Threoir 2016/680.

40 Dá bhrí sin, tagann an cheist chun cinn an féidir a mheas go bhforáiltear le dlí Ballstáit do choimircí leordhóthanacha substainteacha agus nós imeachta chun sonraí íogaire a phróiseáil, de réir bhrí Airteagal 10 den Treoir sin, amhail sonraí bithmhéadracha agus géiniteacha, i gcás ina bhforáiltear do na coimircí sin leis an gcásdlí.

41 Sna himthosca sin, chinn an Nejvyšší správní soud (Cúirt Riaracháin Uachtarach) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais le haghaidh réamhrialú:

‘(1) Cé chomh idirdhealaitheach sin nach mór a bheith idir ábhair sonraí ar leith faoi Airteagal 4(1)(c) nó Airteagal 6 [de Threoir 2016/880] i gcomhar le hAirteagal 10 [den Treoir sin]? An bhfuil sé i gcomhréir leis an oibleagáid chun próiseáil sonraí pearsanta a íoslaghdú agus leis an oibleagáid idirdhealú a dhéanamh idir catagóirí éagsúla ábhar sonraí cead a thabhairt leis an dlí náisiúnta sonraí géiniteacha a bhailiú i ndáil le gach duine a bhfuil drochamhras ann, nó a chuirtear ina leith, go ndearna sé nó sí cion coiriúil d’aon ghnó?

(2) An bhfuil sé i gcomhréir le hAirteagal 4(1)(e) de Threoir 2016/680 má dhéantar measúnú, faoi threoir gníomhaíocht choiriúil a chosc, a imscrúdú agus a bhrath go ginearálta, ag údaráis phóilíneachta ar bhonn a rialacháin inmheánacha, ar an ngá le próifíl ADN a choinneáil go leanúnach, rud a chiallaíonn go minic go gcoinnítear sonraí pearsanta íogaire ar feadh tréimhse neamhshonraithe gan uasteorainn a chur ar fhad coinneála na sonraí pearsanta? Murab amhlaidh an cás, cad iad na critéir faoinar cheart measúnú a dhéanamh ar chomhréireacht thréimhse coinneála na sonraí pearsanta arna mbailiú agus arna gcoinneáil chun na críche sin?

(3) I gcás sonraí pearsanta fíor-íogaire a thagann faoi Airteagal 10 de Threoir 2016//680, cad é raon feidhme íosta na gcoinníollacha substainteacha nó nós imeachta lena leithéid de shonraí a fháil, a choinneáil agus a scriosadh atá le rialú le “foráil a bhfuil feidhm ghinearálta aici” de réir dlí Ballstáit? An féidir a mheas gur “dlí Ballstáit” é cásdlí breithiúnach de réir bhrí Airteagal 8(2) i gcomhar le hAirteagal 10 de Threoir 2016/880?’

Na ceisteanna arna dtarchur chun réamhrialú

An tríú ceist

42 Lena tríú ceist, ar cheart a scrúdú ar an gcéad dul síos, fiafraíonn an chúirt a rinne an tarchur, go bunúsach, an gá Airteagail 8 agus 10 de Threoir 2016/680 a léiriú sa chaoi, maidir le sonraí bithmhéadracha agus géiniteacha a bhailiú, a choinneáil agus a scriosadh, nach mór an coincheap ‘dlí Ballstáit’, de réir bhrí na bhforálacha sin, a thuiscint mar thagairt d’fhoráil a bhfuil feidhm ghinearálta aici ina leagtar amach na coinníollacha íosta chun sonraí den sórt sin a bhailiú, a choinneáil agus a scriosadh nó an bhféadfadh cásdlí na gcúirteanna náisiúnta lena sonraítear na coinníollacha sin teacht faoin gcoincheap sin freisin.

43 I ndáil leis sin, ba cheart a mheabhrú, i gcomhréir le hAirteagal 3(2) de Threoir 2016/680, arna léamh i bhfianaise Airteagal 3(12) agus (13), gurb ionann bailiú, coinneáil agus scriosadh sonraí bithmhéadracha agus géiniteacha agus próiseáil sonraí pearsanta de réir bhrí na Treorach sin.

44 Leagtar amach in Airteagal 4 de Threoir 2016/680 prionsabail éagsúla a bhfuil an phróiseáil sin faoina réir, lena léirítear, mar is léir ó aithrisí 1 agus 2 den Treoir sin, an chaoi a raibh sé beartaithe ag reachtas an Aontais, laistigh de na teorainneacha a leagtar síos in Airteagal 52 den Chairt, a léiriú go nithiúil, i ndáil leis na hoibríochtaí próiseála sin, an ceart bunúsach atá ag daoine nádúrtha chun a sonraí pearsanta a chosaint, a aithnítear in Airteagal 8 den Chairt, a bhfuil dlúthbhaint aige leis an gceart go n‑urramófaí an saol príobháideach, a chumhdaítear in Airteagal 7 den Chairt, trí chineál sonrach na ngníomhaíochtaí a bhaineann le cionta coiriúla a chosc, a bhrath, a imscrúdú agus a ionchúiseamh nó le pionós coiriúil a fhorghníomhú a chur san áireamh.

45 I measc na bprionsabal sin, foráiltear le hAirteagal 4(1)(a) de Threoir 2016/680 nach mór na sonraí pearsanta uile a phróiseáil go dleathach agus go cothrom.

46 Sonraítear le hAirteagal 8(1) de Threoir 2016/680, i ndáil leis sin, go ndéanfaidh na Ballstáit foráil nach mbeidh an phróiseáil dleathach ach amháin más gá, agus a mhéid is gá, an phróiseáil a dhéanamh chun cúram a chur i gcrích a dhéanann údarás inniúil chun na gcríoch a leagtar amach in Airteagal 1(1) agus go mbeidh sé bunaithe ar dhlí an Aontais nó ar dhlí an Bhallstáit.

47 Ina theannta sin, faoi Airteagal 8(2) den Treoir sin, ní féidir sonraí den sórt sin a phróiseáil ach amháin má shonraítear le foráil dhlí an Bhallstáit lena rialaítear an phróiseáil sin, ar a laghad, cuspóirí na próiseála sin, na sonraí pearsanta atá le próiseáil agus críocha na próiseála sin.

48 Maidir le catagóirí áirithe sonraí pearsanta, amhail sonraí bithmhéadracha nó géiniteacha, féachtar le hAirteagal 10 de Threoir 2016/680 lena áirithiú go gcosnófar iad ar bhealach níos éifeachtaí trí choinníollacha feabhsaithe a leagan síos maidir le dlíthiúlacht phróiseáil na sonraí sin (féach, chuige sin, breithiúnais an 30 Eanáir 2024, Direktor na Glavna direktsia ‘Natsionalna politsia’ pri MVR– Sofia, C‑118/22, EU:C:2024:97, mír 48, agus an 4 Deireadh Fómhair 2024, Bezirkshauptmannschaft Landeck (Iarracht rochtain a fháil ar shonraí pearsanta arna stóráil ar fhón póca), C‑548/21, EU:C:2024:830, mír 107). Tá na catagóirí sonraí sin, mar a luaitear in aithris 37 de Threoir 2016/680, thar a bheith íogair ó thaobh cearta agus saoirsí bunúsacha de, ós rud é go bhféadfadh rioscaí suntasacha do chearta agus saoirsí na n‑ábhar sonraí a bheith mar thoradh ar an gcomhthéacs ina ndéantar na sonraí sin a phróiseáil.

49 Dá bhrí sin, i gcomhréir le hAirteagal 10 de Threoir 2016/680, ní mór aon phróiseáil sonraí pearsanta a thagann faoi cheann de na catagóirí a liostaítear go hiomlán san Airteagal sin (‘sonraí pearsanta íogaire’) a údarú le dlí an Aontais nó le dlí Ballstáit.

50 Dá bhrí sin, féachtar le hAirteagail 8 agus 10 de Threoir 2016/680 raon feidhme prionsabail áirithe a leagtar amach in Airteagal 4 den Treoir sin a shoiléiriú, lena dtugtar léiriú nithiúil, sa réimse a chumhdaítear leis an Treoir sin, go háirithe an ceart bunúsach atá ag daoine nádúrtha go ndéanfar a sonraí pearsanta a chosaint, a aithnítear in Airteagal 8 den Chairt.

51 Dá réir sin, ní mór a thuiscint leis an gcoincheap ‘dlí Ballstáit’ a úsáidtear in Airteagail 8 agus 10 go bhfuiltear ag iarraidh an coinníoll a leagtar amach in Airteagal 8(2) den Chairt a bhaint amach, ar dá réir nach mór aon phróiseáil sonraí pearsanta nach ndéantar ar bhonn thoiliú an ábhair sonraí a dhéanamh ar bhonn bonn dlisteanach eile a leagtar síos le dlí, coinníoll nach léiríonn ach an ceanglas a leagtar síos in Airteagal 52 den Chairt nach mór foráil a dhéanamh le dlí d’aon teorannú ar fheidhmiú na gceart bunúsach a aithnítear sa Chairt. Dá bhrí sin, baineann an coincheap sin le bailíocht úsáid an dlí náisiúnta mar bhunús dlí chun sonraí pearsanta a phróiseáil.

52 Ar an gcéad dul síos, mar a chuir an tAbhcóide Ginearálta in iúl i mír 82 dá Thuairim, chinn an Chúirt, agus cásdlí socair na Cúirte Eorpaí um Chearta an Duine á chur san áireamh, nach mór an téarma ‘dlí’, a úsáidtear in Airteagal 8(2) den Chairt, sa nath ‘arna leagan síos le dlí’ a thuiscint ina bhrí shubstainteach seachas ina bhrí fhoirmiúil (breithiúnas an 16 Samhain 2023, Roos agus páirtithe eile v an Pharlaimint, C‑458/22 P, nár foilsíodh, EU:C:2023:871, mír 61). Ar an dara dul síos, de réir chásdlí na Cúirte Eorpaí um Chearta an Duine, ciallaíonn an bhrí sin den téarma ‘dlí’ san abairt ‘arna leagan síos le dlí’, dá dtagraítear in Airteagal 8(2) de CECD, go dtagraíonn an téarma sin don téacs atá i bhfeidhm mar a léiríonn na cúirteanna inniúla é (féach, chuige sin, ECtHR, breithiúnas an 23 Eanáir 2025, H.W. v an Fhrainc, CE:ECHR:2025:0123JUD001380521, § 65).

53 Thairis sin, mar is léir ó chásdlí na Cúirte, cé go dtugtar le tuiscint leis an gceanglas nach mór foráil a dhéanamh le dlí d’aon teorannú ar fheidhmiú ceart bunúsach nach mór don ghníomh lena gceadaítear cur isteach ar na cearta sin raon feidhme an teorannaithe sin a shainiú, ní chuirtear cosc leis an gceanglas sin, ar an gcéad dul síos, ar an teorannú atá i gceist a fhoirmliú i dtéarmaí atá oscailte go leor chun a bheith in ann oiriúnú do chásanna éagsúla agus d’athruithe i gcásanna éagsúla agus, ar an dara dul síos, ar an gcúirt inniúil, i gcás inarb iomchuí, raon feidhme sonrach na teorann a shonrú, trí léiriú, i bhfianaise fhoclaíocht iarbhír an ghnímh lena gceadaítear an cur isteach agus scéim ghinearálta an ghnímh sin, chomh maith leis na cuspóirí a shaothraítear leis an ngníomh sin (féach, de réir análaí, breithiúnas an 21 Meitheamh 2022, Ligue des droits humains, C‑817/19, EU:C:2022:491, mír 114).

54 Dá bhrí sin, ní mór an coincheap ‘dlí Ballstáit’, de réir bhrí Airteagail 8 agus 10 de Threoir 2016/680, arna léamh i bhfianaise Airteagal 8(2) den Chairt, a thuiscint mar thagairt d’fhoráil lena bhforáiltear go sainráite do phróiseáil sonraí pearsanta a thagann faoi raon feidhme na Treorach sin, mar a léirítear le cásdlí na gcúirteanna náisiúnta.

55 In aon chás, mar a tugadh faoi deara i mír 47 den bhreithiúnas seo, foráiltear le hAirteagal 8(2) de Threoir 2016/680 nach féidir sonraí pearsanta a thagann faoi raon feidhme na Treorach sin a phróiseáil ach amháin má shonraítear le foráil dhlí an Bhallstáit lena rialaítear an phróiseáil sin ar a laghad a cuspóirí, na sonraí pearsanta a bheith ina n‑ábhar don phróiseáil sin agus a críocha.

56 I ndáil leis sin, ar an gcéad dul síos, ba cheart a thabhairt faoi deara go dtugtar le tuiscint leis an tagairt do ‘dhlí’ Ballstáit lena ndéantar an phróiseáil atá i gceist ‘a rialú’ go bhforáiltear do na cuspóirí, do na sonraí pearsanta atá le próiseáil agus do na críocha, i bprionsabal ar a laghad, le foráil a bhfuil feidhm ghinearálta aici. Ar an dara dul síos, féachtar le hAirteagal 8(2), mar is léir go sainráite ó aithris 33 den Treoir sin, a áirithiú go bhfuil dlí an Bhallstáit atá freagrach as an bpróiseáil soiléir agus beacht agus go bhfuil a chur i bhfeidhm intuartha ag na daoine atá faoina réir, i gcomhréir le cásdlí na Cúirte Breithiúnais agus na Cúirte Eorpaí um Chearta an Duine.

57 De réir chásdlí na Cúirte Eorpaí um Chearta an Duine, ní mór saintréithe áirithe a bheith ag aon bheart arb é an bunús dlí chun sonraí pearsanta a phróiseáil, eadhon, go bunúsach, nach mór don bheart sin, ar an gcéad dul síos, caighdeáin níos airde a chomhlíonadh, a bheith inrochtana agus, ar deireadh, intuartha go leordhóthanach, is é sin le rá, a mhéid atá réasúnta in imthosca an cháis, chun a chur ar chumas na ndaoine aonair lena mbaineann a n‑iompar a rialáil, rud a thugann le tuiscint go sainítear leis an mbeart sin le soiléireacht leordhóthanach méid agus rialacha mionsonraithe maidir le feidhmiú na cumhachta a thugtar do na húdaráis inniúla (féach, chuige sin, inter alia, ECtHR, 26 Aibreán 1979, Sunday Times v an Ríocht Aontaithe, CE:ECHR:1979:0426JUD00065387, §§ 25 agus 52; ECtHR, 1 Iúil 2008, Liberty agus páirtithe eile v an Ríocht Aontaithe, CE:ECHR:2008:0701JUD005824300, § 62 agus 63; ECtHR, 4 Nollaig 2008, S. agus Marper v an Ríocht Aontaithe, CE:ECHR:2008:1204JUD003056204, §95).

58 Leanann sé ó chásdlí na Cúirte, chun an ceanglas faoi Airteagal 52 den Chairt a shásamh, ní mór do reachtaíocht a bhaineann le cur isteach ar na cearta bunúsacha a chumhdaítear in Airteagail 7 agus 8 den Chairt foráil a dhéanamh maidir le rialacha soiléir agus beachta lena rialaítear raon feidhme agus cur i bhfeidhm na mbeart agus coimircí a fhorchur chun a chinntiú go bhfuil cosaintí leordhóthanacha ag na daoine a ndearnadh a sonraí a aistriú, chun a gcuid sonraí pearsanta a chosaint go héifeachtach i gcoinne rioscaí mí-úsáide agus in aghaidh rochtana agus úsáide neamhdhleathaí (féach breithiúnais an 8 Aibreán 2014, Digital Rights Ireland agus páirtithe eile, C‑293/12 agus C‑594/12, EU:C:2014:238, mír 54, chomh maith leis an 6 Deireadh Fómhair 2015, Schrems, C‑362/14, EU:C:2015:650, mír 91).

59 Ós rud é go bhfuil sé beartaithe le hAirteagal 8(2) de Threoir 2016/680 comhlíonadh na gceanglas dá dtagraítear i míreanna 56 agus 57 den bhreithiúnas seo a áirithiú, leanann sé as sin nach mór do na cuspóirí atá á saothrú, na sonraí pearsanta lena mbaineann agus críocha na próiseála a chumhdaítear leis an Treoir sin a bheith soiléir agus beacht go leor ón bhforáil lena rialaítear an phróiseáil sin, ionas gur féidir a mheas go gcomhlíonann siad na ceanglais maidir le foráil a bheith déanta dóibh le dlí, de réir bhrí chásdlí na Cúirte Eorpaí um Chearta an Duine agus Airteagal 52 den Chairt.

60 I bhfianaise an mhéid sin roimhe seo, is é an freagra ar an tríú ceist nach mór Airteagail 8 agus 10 de Threoir 2016/680 a léiriú sa chaoi, maidir le sonraí bithmhéadracha agus géiniteacha a bhailiú, a choinneáil agus a scriosadh, nach mór an coincheap ‘dlí Ballstáit’ a thuiscint, de réir bhrí na nAirteagal sin, mar thagairt d’fhoráil a bhfuil feidhm ghinearálta aici lena leagtar amach na coinníollacha íosta maidir le sonraí den sórt sin a bhailiú, a choinneáil agus a scriosadh, mar a léirítear le cásdlí na gcúirteanna náisiúnta, ar choinníoll go bhfuil an cásdlí sin inrochtana agus intuartha go leor.

An chéad cheist

Inghlacthacht

61 Ina bharúlacha i scríbhinn, d’áitigh an Coimisiún Eorpach go raibh an chéad cheist do-ghlactha ar an bhforas, sa chás atá i gceist sna príomhimeachtaí, gur bhailigh póilíní na Seice sonraí géiniteacha agus bithmhéadracha JH an 13 Eanáir 2016, is é sin le rá, roimh theacht i bhfeidhm Threoir 2016/680 an 5 Bealtaine 2016, agus roimh dhul in éag na tréimhse thrasuímh, a socraíodh an 6 Bealtaine 2018 le hAirteagal 63(1) den Treoir sin.

62 I ndáil leis sin, ba cheart a lua nach féidir leis an gCúirt Bhreithiúnais diúltú rialú a thabhairt ar cheist arna tarchur ag cúirt náisiúnta le haghaidh réamhrialú ach amháin más léir nach bhfuil baint ar bith ag an léiriú arna iarraidh le dlí an Aontais le fíricí iarbhír nó le cuspóir na díospóide sna príomhimeachtaí, más fadhb de chineál hipitéiseach í nó mura bhfuil an fhaisnéis fhíorasach agus dhlíthiúil is gá ag an gCúirt Bhreithiúnais chun freagra úsáideach a thabhairt ar na ceisteanna a cuireadh uirthi (breithiúnas an 20 Márta 2025, Anib agus páirtithe eile, C‑728/22 go C‑730/22, EU:C:2025:200, mír 48).

63 Sa chás seo, foráiltear le hAirteagal 64 de Threoir 2016/680 go dtiocfaidh an Treoir sin i bhfeidhm an 4 Bealtaine 2016, agus luaitear in Airteagal 63 den Treoir sin go nglacfaidh agus go bhfoilseoidh na Ballstáit na forálacha reachtaíochta, rialúcháin agus riaracháin is gá chun an Treoir sin a chomhlíonadh faoin 6 Bealtaine 2018 ar a dhéanaí.

64 Mar sin féin, is léir ó na comhaid atá os comhair na Cúirte gur leanadh de na sonraí pearsanta a bailíodh a bhaineann le JH a tógadh óna shamplaí géiniteacha agus ó bhithmhéadracht, an 13 Eanáir 2016, a choinneáil i mbunachair sonraí phóilíní na Seice agus, dá bhrí sin, iad a phróiseáil tar éis an 6 Bealtaine 2018.

65 Faoi réir na gcásanna dá bhforáiltear in Airteagal 4(2) de Threoir 2016/680, is léir ó Airteagal 4(1)(b) den Treoir sin nach bhféadfar sonraí pearsanta a phróiseáil mura raibh údar lena mbailiú ar chríocha dlisteanacha.

66 Dá bhrí sin, mar a luaigh an tAbhcóide Ginearálta i mír 34 dá Thuairim, maidir le sonraí pearsanta a chumhdaítear le Treoir 2016/680 a bailíodh go dleathach roimh theacht i bhfeidhm na Treorach sin, ach a bhaileofaí de shárú ar na prionsabail a bunaíodh leis an Treoir sin dá mbaileofaí iad tar éis an dáta a rinneadh an Treoir sin a thrasuí nó, ina éagmais sin, tar éis an spriocdháta faoinar cheart an Treoir sin a thrasuí, eadhon an 6 Bealtaine 2018, ní féidir iad a choinneáil tar éis an dáta ar a ndearnadh an Treoir sin a thrasuí nó, ina éagmais sin, tar éis an spriocdháta faoinar cheart an Treoir sin a thrasuí.

67 Dá bhrí sin, sa chás seo, ní léir nach mbaineann an chéad cheist go hiomlán le fíorais iarbhír nó le cuspóir na príomhimeachtaí, nó go bhfuil an fhadhb a ardaíodh hipitéiseach, ar an bhforas, ar a bhfuil an Coimisiún ag brath, go mbaineann sí le sonraí bithmhéadracha agus géiniteacha a bailíodh roimh theacht i bhfeidhm Threoir 2016/680.

68 Ós rud é, thairis sin, go bhfuil an t‑ábhar fíorasach agus dlíthiúil go léir is gá ag an gCúirt Bhreithiúnais chun go mbeidh sí in ann freagra úsáideach a thabhairt ar an gcéad cheist, ní mór a mheas go bhfuil an cheist sin inghlactha.

Substaint an cháis

69 Lena céad cheist, fiafraíonn an chúirt a rinne an tarchur an gá Airteagal 4(1)(c) nó Airteagal 6 de Threoir 2016/680, arna léamh i gcomhar le hAirteagal 10 den Treoir sin, a léiriú sa chaoi go gcuirtear cosc leo ar reachtaíocht náisiúnta lena gceadaítear sonraí bithmhéadracha agus géiniteacha a bhailiú i ndáil le gach duine a bhfuil drochamhras ann, nó a chuirtear ina leith, go ndearna sé nó sí cion coiriúil d’aon ghnó.

70 I ndáil leis sin, ar an gcéad dul síos, maidir le hAirteagal 6 de Threoir 2016/680, ba cheart a mheabhrú go gceanglaítear leis an Airteagal sin ar na Ballstáit a fhoráil nach mór don rialaitheoir, ‘i gcás inarb iomchuí agus a mhéid is féidir’, idirdhealú soiléir a dhéanamh idir sonraí pearsanta catagóirí éagsúla ábhar sonraí, amhail iad siúd dá dtagraítear in Airteagal 6(a) go (d) sin, eadhon, faoi seach, daoine a bhfuil forais shubstaintiúla ann lena chreidiúint go ndearna siad cion coiriúil nó go bhfuil siad ar tí cion coiriúil a dhéanamh, daoine a fhaightear ciontach i gcion coiriúil, íospartaigh ciona choiriúil nó daoine a dtugann fíorais áirithe ina leith le tuiscint go bhféadfadh siad a bheith ina n‑íospartaigh i gcion coiriúil agus, ar deireadh, tríú páirtithe i gcion coiriúil, amhail daoine a bhféadfaí glaoch orthu fianaise a thabhairt in imscrúduithe i ndáil le cionta coiriúla nó imeachtaí coiriúla ina dhiaidh sin, daoine a fhéadfaidh faisnéis a sholáthar faoi chionta coiriúla nó teagmhálacha nó comhpháirtithe aon duine de na daoine dá dtagraítear in Airteagal 6(a) agus (b).

71 I gcomhréir leis an Airteagal sin, ní mór do na Ballstáit a áirithiú, dá bhrí sin, go ndéanann an rialaitheoir, ‘i gcás inarb iomchuí agus a mhéid is féidir’, idirdhealú soiléir idir sonraí na gcatagóirí éagsúla d’ábhair sonraí ar bhealach nach gcuirtear isteach ar a gceart bunúsach go ndéanfar a sonraí pearsanta a chosaint gan idirdhealú, beag beann ar an gcatagóir lena mbaineann siad, ós rud é nach mór na catagóirí sin a bhunú go bunúsach ar bhonn stádas coiriúil an duine lena mbaineann.

72 De réir mar a chuirtear in iúl leis an nath ‘i gcás inarb iomchuí agus a mhéid is féidir’ in Airteagal 6 de Threoir 2016/680, ní oibleagáid iomlán í an oibleagáid idirdhealú a dhéanamh idir catagóirí áirithe daoine a fhorchuirtear ar na Ballstáit leis an Airteagal sin, ach braitheann sí, go háirithe, ar cibé an féidir, i ngach cás aonair, idirdhealú soiléir a dhéanamh idir na catagóirí daoine sin (féach, chuige sin, breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), C‑205/21, EU:C:2023:49, mír 84) agus ar chríocha na próiseála.

73 Sa chás seo, áitíonn Rialtas na Seice nach mór an tagairt a rinne an chúirt a rinne an tarchur do chatagóir na ndaoine a bhfuil drochamhras ann a thuiscint mar thagairt do dhaoine, i réamhimeachtaí brostaithe, ar tugadh fógra dóibh faoi amhras, lena n‑éilítear, sa reachtaíocht náisiúnta atá i gceist sna príomhimeachtaí, fianaise leordhóthanach, amhail i gcás daoine cúisithe, chun a thaispeáint go ndearna na daoine lena mbaineann cion.

74 Dá mba rud é gurbh amhlaidh an cás, a bheidh faoin gcúirt a rinne an tarchur a fhíorú, d’fhéadfaí a mheas, chun críocha próiseála ar leith, go dtagann an dá chatagóir sin faoin gcatagóir dá bhforáiltear in Airteagal 6(a) de Threoir 2016/680, ar choinníoll nach gá idirdhealú a dhéanamh idir an dá chatagóir sin chun críocha na próiseála lena mbaineann.

75 Dá bhrí sin, ní mór Airteagal 6 de Threoir 2016/680 a léiriú sa chaoi nach gcuirtear cosc leis ar reachtaíocht náisiúnta lena gceadaítear bailiú, gan idirdhealú, ar shonraí bithmhéadracha agus géiniteacha i ndáil le daoine a thagann faoin gcatagóir daoine ‘atá cúisithe as cion coiriúil d’aon ghnó a dhéanamh’ agus daoine a thagann faoin gcatagóir daoine a bhfuil ‘drochamhras ann go ndearna siad cion den sórt sin’, de réir bhrí an dlí náisiúnta, i gcás nach gceanglaítear le críocha an bhailithe sin idirdhealú a dhéanamh idir an dá chatagóir daoine sin a bhféadfar a gcuid sonraí a bhailiú ar bhonn na reachtaíochta sin.

76 I ndáil leis sin, faoi Airteagal 4(1)(c) de Threoir 2016/680, arna léamh i gcomhar le hAirteagal 10 den Treoir sin, ceanglaítear le hAirteagal 10 nach mór do na Ballstáit foráil a dhéanamh go bhfuil sonraí pearsanta leordhóthanach, ábhartha agus nach bhfuil siad iomarcach i ndáil leis na críocha lena ndéantar iad a phróiseáil. Dá bhrí sin, ceanglaítear leis an gceanglas deireanach sin ar na Ballstáit prionsabal an íoslaghdaithe sonraí a chomhlíonadh i bhfianaise an chuspóra agus na críche atá á saothrú leis an bpróiseáil lena mbaineann.

77 Foráiltear le hAirteagal 10 den Treoir sin, maidir le sonraí pearsanta íogaire, lena n‑áirítear sonraí bithmhéadracha agus géiniteacha, nach mór don phróiseáil, sa bhreis ar an gcoinníoll go gcomhlíonfar ceann de na trí chás a liostaítear go huileghabhálach in Airteagal 10(a) go (c) di, dhá choinníoll eile a chomhlíonadh, eadhon, ar an gcéad dul síos, nach mór coimircí iomchuí a bheith ann do chearta agus saoirsí an ábhair sonraí agus, ar an dara dul síos, nach mór don phróiseáil atá beartaithe dearbhriachtanas a chomhlíonadh.

78 Go háirithe, maidir leis an gcoinníoll chun dearbhriachtanas a chomhlíonadh, ar an gcéad dul síos, tugtar le tuiscint leis an gcoinníoll sin nach mór measúnú a dhéanamh ar bhealach an‑dian i bhfianaise na gcríocha a shaothraítear leis an bpróiseáil atá i gceist agus, dá bhrí sin, nach féidir a mheas nach bhfuil gá le próiseáil den sórt sin ach amháin i líon teoranta cásanna (féach breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), C‑205/21, EU:C:2023:49, mír 118).

79 Dá bhrí sin, ní féidir cur síos a dhéanamh ar chríocha próiseála sonraí bithmhéadracha agus géiniteacha de chineál pearsanta i dtéarmaí atá róghinearálta, ach a éilíonn go ndéanfar iad a shainiú ar bhealach atá beacht agus nithiúil go leor chun ‘dearbhriachtanas’ na sonraí sin a mheasúnú (breithiúnas an 26 Eanáir 2023, Ministerstvo na vatreshnite raboti (Clárú sonraí bithmhéadracha agus géiniteacha ag na póilíní), C‑205/21, EU:C:2023:49, mír 124).

80 I ndáil leis sin, cé nach sainmhínítear le Treoir 2016/680 an coincheap ‘críocha na próiseála’, is féidir a thabhairt faoi deara go ndéantar idirdhealú sainráite in Airteagal 8(2) idir an coincheap sin agus ‘cuspóirí na próiseála’. Foráiltear le hAirteagal 4(1)(b) den Treoir sin nach mór, inter alia, na críocha chun sonraí pearsanta a phróiseáil a chinneadh agus a léiriú agus nach bhféadfar na sonraí sin a phróiseáil ar bhealach atá ar neamhréir leis na críocha sin, cé go bhforáiltear le hAirteagal 4(1)(c) den Treoir sin gur i bhfianaise na gcríocha sin atá sé measúnú a dhéanamh ar leordhóthanacht, ábharthacht agus neamhiomarcach na sonraí pearsanta atá á bpróiseáil.

81 Dá bhrí sin, is féidir a thuiscint ón méid sin go dtagraíonn an coincheap ‘cuspóirí na próiseála’, de réir bhrí Airteagal 8(2), do na críocha níos ginearálta dá dtagraítear in Airteagal 1(1) de Threoir 2016/680 nach mór a shaothrú chun teacht faoi raon feidhme na Treorach sin, cé nach mór a thuiscint go dtagraíonn ‘críocha na próiseála’, de réir bhrí, go háirithe, Airteagal 8(2) den Treoir sin, do na spriocanna sonracha agus nithiúla a shaothraítear le próiseáil sonraí pearsanta i bhfianaise an chúraim a chuirtear ar an rialaitheoir, amhail cúram sonrach a bhaineann le cionta coiriúla a chosc nó a bhrath, nó imscrúdú agus ionchúiseamh a thionscnamh sa réimse sin nó pionóis choiriúla a fhorghníomhú.

82 Ina dhiaidh sin, ós rud é, mar is léir ó aithris 26 de Threoir 2016/680, arna léamh i bhfianaise phrionsabal na comhréireachta, maidir le sonraí pearsanta neamhíogaire, go gcomhlíontar an coinníoll maidir le riachtanas, de réir bhrí na Treorach sin, i gcás nach féidir críoch na próiseála lena mbaineann a bhaint amach ar bhealach chomh héifeachtach céanna ar bhealaí eile is lú dochar do chearta bunúsacha na n‑ábhar sonraí, ní mór a thuiscint go bhfuil sé ag teastáil ón gcoinníoll maidir le dearbhriachtanas i ndáil le próiseáil sonraí pearsanta íogaire go n‑áirithítear an rialaitheoir chun nach féidir an chríoch a shaothraítear leis an bpróiseáil lena mbaineann a bhaint amach ar bhealach chomh héifeachtach céanna trí úsáid a bhaint as catagóirí sonraí seachas na cinn a liostaítear in Airteagal 10 de Threoir 2016/680 (féach, chuige sin, breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), Cás C‑205/21, EU:C:2023:49, mír 126).

83 Ina theannta sin, ag féachaint do na rioscaí suntasacha a bhaineann le próiseáil sonraí pearsanta íogaire do chearta agus do shaoirsí na n‑ábhar sonraí, go háirithe i gcomhthéacs chúraimí na n‑údarás inniúil chun na gcríoch a leagtar amach in Airteagal 1(1) de Threoir 2016/680, ceanglaítear leis an gcoinníoll maidir le ‘dearbhriachtanas’ go gcuirfear san áireamh tábhacht ar leith na críche atá á saothrú leis an bpróiseáil lena mbaineann, agus an tábhacht sin a mheas, inter alia, i bhfianaise chineál na críche sin, ós rud é go bhfónann an phróiseáil do chuspóir sonrach nithiúil i ndáil le cionta coiriúla nó bagairtí don tslándáil phoiblí ar leibhéal áirithe tromchúise a chosc, i ndáil le cionta den sórt sin a ionchúiseamh nó i gcoinne bagairtí den sórt sin, agus i bhfianaise na n‑imthosca sonracha ina ndéantar an phróiseáil (féach, chuige sin, breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), C‑205/21, EU:C:2023:49, mír 127).

84 In aon chás, maidir le bailiú sonraí bithmhéadracha agus géiniteacha ó dhaoine a cúisíodh i gcion coiriúil a dhéanamh d’aon ghnó nó a bhfuil drochamhras ann go ndearna siad cion den sórt sin chun críocha na daoine sin a shainaithint agus a chur i gcomparáid amach anseo, ní mór a chur san áireamh le dearbhriachtanas an bhailiúcháin sin na tosca ábhartha uile, amhail, go háirithe, cineál agus tromchúis an chiona a bhfuil imscrúdú á dhéanamh air ina leith, imthosca sonracha an chiona sin, an nasc a d’fhéadfadh a bheith ag an gcion sin le himeachtaí leanúnacha eile agus taifead coiriúil nó próifíl aonair an duine atá i gceist (féach, chuige sin, breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), C‑205/21, EU:C:2023:49, mír 132).

85 Ar deireadh, is éard atá i gceist leis an gcoinníoll maidir le ‘dearbhriachtanas’ athbhreithniú an‑dian ar chomhlíonadh phrionsabal an íoslaghdaithe ar phróiseáil na sonraí lena mbaineann, dá bhforáiltear in Airteagal 4(1)(c) den Treoir sin (féach breithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní), C‑205/21, EU:C:2023:49, mír 125).

86 Go háirithe, maidir le coinneáil nó úsáid sonraí a bhaintear as ADN duine chun críocha sainaitheanta nó comparáide, tugtar le tuiscint le prionsabal den sórt sin, chun measúnú a dhéanamh ar an ndearbhriachtanas atá le próiseáil den sórt sin, nach mór aird chuí a thabhairt ar an bhféidearthacht úsáid eisiach a bhaint as polamoirfeacht atá i limistéir neamhchódaithe ADN, eadhon réimsí a aithnítear mar réimsí nach dtugann aon fhaisnéis maidir le heitneacht nó galair ghéiniteacha na ndaoine sin.

87 Dá bhrí sin, cé go bhféadfaidh Ballstát Treoir 2016/680 a chomhlíonadh tríd an gcúram a tharmligean chuig na húdaráis inniúla, i ngach cás aonair, comhlíonadh an choinníll maidir le dearbhriachtanas a áirithiú i ndáil le haon phróiseáil sonraí pearsanta íogaire, nó trí chritéir mheasúnaithe a leagan síos sa reachtaíocht, nach mór do na húdaráis a chur i bhfeidhm ina dhiaidh sin ar bhealach neamhroghnach, is amhlaidh fós, sa dara cás sin, nach mór na critéir sin a bheith de chineál chun na ceanglais uile a eascraíonn as an gcoinníoll sin a chomhlíonadh, mar a leagtar amach i míreanna 77 go 83 den bhreithiúnas seo.

88 Dá bhrí sin, i mbreithiúnas an 26 Eanáir 2023, Ministerstvo na vatreshnite raboti (Clárú Sonraí Bithmhéadracha agus Géiniteacha ag na póilíní) (C‑205/21, EU:C:2023:49, mír 135), chinn an Chúirt, maidir le reachtaíocht náisiúnta lena bhforáiltear do bhailiú córasach sonraí bithmhéadracha agus géiniteacha aon duine a cúisíodh i gcion d’aon ghnó a ionchúisíodh ex officio d’fhonn iad a chlárú, gan oibleagáid a fhorchur ar an údarás inniúil a fhíorú agus a léiriú, ar an gcéad dul síos, go bhfuil an bailiú sin dearbhriachtanach chun na cuspóirí sonracha agus nithiúla atá á saothrú a bhaint amach agus, ar an dara dul síos, nach féidir na cuspóirí sin a bhaint amach le bearta nach ndéanann cur isteach chomh tromchúiseach céanna ar chearta agus ar shaoirsí an ábhair sonraí, go bhfuil an reachtaíocht sin contrártha leis an gcoinníoll maidir le dearbhriachtanas sin.

89 É sin ráite, cé go raibh feidhm éigeantach ag an mbailiúchán dá bhforáiltear leis an reachtaíocht atá i gceist sa chás as ar eascair an breithiúnas seo maidir le gach duine a cúisíodh i gcionta d’aon ghnó a ionchúisíodh ex officio, baineann an chéad cheist le reachtaíocht nach dtugann ach an rogha do na póilíní sonraí bithmhéadracha agus géiniteacha a bhailiú i leith daoine atá cúisithe nó a bhfuil drochamhras ann go ndearna siad cion d’aon ghnó.

90 Mar sin féin, cé go dtugann reachtaíocht rogha den sórt sin do na seirbhísí póilíneachta, ní chiallaíonn sé sin go gceadaítear le dlí an Bhallstáit lena mbaineann an bailiú sin a bheith córasach nó go bhféadfaí é a dhéanamh de shárú, go háirithe, ar an bprionsabal maidir le híoslaghdú na próiseála sonraí, a leagtar síos in Airteagal 4(1)(c) de Threoir 2016/680, nó ar an gcoinníoll, i ndáil leis na bpróiseáil lena mbaineann, maidir le dearbhriachtanas, a leagtar síos in Airteagal 10 den Treoir sin, ar choinníoll go sainítear an dlí sin, lena n‑áirítear cásdlí na gcúirteanna náisiúnta, na críocha a shaothraítear leis an bpróiseáil sin ar shonraí bithmhéadracha agus géiniteacha ar bhealach iomchuí agus beacht go leor, is é sin le rá, na críocha sonracha nithiúla a shaothraítear le próiseáil sonraí pearsanta i bhfianaise an chúraim a chuirtear ar an rialaitheoir, agus go bhfeidhmítear rogha den sórt sin i gcomhréir leis na ceanglais a leagtar amach i míreanna 77 go 83 den bhreithiúnas seo.

91 Dá bhrí sin, is léir ón bhfianaise a cuireadh faoi bhráid na Cúirte, sa chás seo, go leagtar síos leis an gcásdlí náisiúnta ceanglais áirithe atá ceaptha chun comhlíonadh an phrionsabail sin a áirithiú, amhail an oibleagáid atá ar na póilíní, roimh shampla ADN a thógáil, aird a thabhairt, inter alia, ar stair choiriúil dhéantóir an chiona a rinneadh, ar thromchúis an chiona sin de réir an chineáil ciona lena mbaineann agus ar imthosca sonracha an chiona sin lena mbaineann sampláil, agus ar phearsantacht dhéantóir an chiona.

92 Sa chás sin, is faoi na cúirteanna náisiúnta atá sé a fháil amach, i ngach cás, an bhfuil an bailiú arna dhéanamh ag na seirbhísí póilíneachta de shárú ar na prionsabail lena rialaítear próiseáil sonraí pearsanta, a leagtar amach in Airteagal 4 de Threoir 2016/680, agus na ceanglais speisialta is infheidhme maidir le próiseáil sonraí pearsanta íogaire, a leagtar amach in Airteagal 10 den Treoir sin, mar a léirítear i bhfianaise Airteagail 7 agus 8 den Chairt.

93 I ndáil leis sin, ba cheart a chur in iúl freisin nach leor an fíoras gur de chineál eacnamaíoch é an cion a líomhnaítear i gcoinne duine agus go mbailítear sonraí bithmhéadracha agus géiniteacha an duine sin sula gciontófar é ar deireadh chun a chur as an áireamh go bhféadfaí a mheas go gcomhlíonann bailiú den sórt sin dearbhriachtanas, ós rud é, agus na críocha a shaothraítear á gcur san áireamh, go bhféadfadh sé go mbeadh dearbhriachtanas leis an mbailiú sin, lena n‑áirítear i bhfianaise chineál na sonraí lena mbaineann, go háirithe chun go mbeifear in ann a chinneadh, mar gheall ar a bhallraíocht fhéideartha in eagraíocht choiriúil, an dócha go raibh an duine sin rannpháirteach i gcionta eile a bhféadfadh sonraí den chineál sin a bheith ábhartha ina leith, nó an bhfuil riosca éalaithe ann, chun céannacht an duine sin a aithint.

94 I bhfianaise an mhéid sin roimhe seo, is é an freagra ar an gcéad cheist nach mór Airteagal 6 agus Airteagal 4(1)(c) de Threoir 2016/680, arna léamh i gcomhar le hAirteagal 10 den Treoir sin, a léiriú sa chaoi nach gcuirtear cosc leo ar reachtaíocht náisiúnta lena gceadaítear, gan idirdhealú, sonraí bithmhéadracha agus géiniteacha a bhailiú i ndáil le gach duine a chúisítear i gcion coiriúil a dhéanamh d’aon ghnó nó a bhfuil drochamhras ann go ndearna sé cion den sórt sin, a mhéid, ar an gcéad dul síos, nach bhfuil idirdhealú idir an dá chatagóir daoine sin i gceist le críocha an bhailithe sin agus, ar an dara dul síos, go gceanglaítear ar rialaitheoirí, i gcomhréir leis an dlí náisiúnta, lena n‑áirítear cásdlí na gcúirteanna náisiúnta, na prionsabail agus na ceanglais speisialta uile, a leagtar amach in Airteagail 4 agus 10 den Treoir sin, a chomhlíonadh.

An dara ceist

95 Mar réamhphointe, ba cheart a thabhairt faoi deara, cé go dtagraíonn an chúirt a rinne an tarchur, i bhfoclaíocht an dara ceist, do reachtaíocht náisiúnta a bhfuil sé mar thoradh uirthi go gcoinnítear na sonraí pearsanta lena mbaineann, i bhformhór na gcásanna, ar feadh ‘tréimhse éiginnte’, gur léir ó na doiciméid os comhair na Cúirte go bhféachann an chúirt sin, faoi ‘thréimhse éiginnte’, le tagairt a dhéanamh don fhíoras nach sonraítear aon uastréimhse choinneála, agus ní don fhíoras go mbeadh coinneáil den sórt sin neamhtheoranta ó thaobh ama de.

96 Dá bhrí sin, ba cheart a thuiscint, lena dara ceist, go bhfiafraíonn an chúirt a rinne an tarchur an gá Airteagal 4(1)(e) de Threoir 2016/680 a léiriú sa chaoi go gcuirtear cosc leis ar reachtaíocht náisiúnta faoina ndéanann na póilíní an gá atá le sonraí bithmhéadracha agus géiniteacha a choinneáil a mheas ar bhonn rialacha inmheánacha, gan aon fhoráil sa reachtaíocht sin lena leagtar síos uastréimhse choinneála.

97 Ina theannta sin, faoi Airteagal 4(1)(e) den Treoir sin, ní mór do na Ballstáit foráil a dhéanamh go gcoinneofar na sonraí sin i bhfoirm nach gceadaítear léi na hábhair sonraí a shainaithint ach go ceann tréimhse nach faide ná mar is gá chun na críocha sin ar chucu a ndéantar na sonraí pearsanta a phróiseáil a bhaint amach.

98 Ar an gcéad dul síos, maidir leis an bhfíoras nach bhforáiltear leis an reachtaíocht náisiúnta lena mbaineann d’uastréimhse choinneála, ba cheart a mheabhrú, i gcomhréir le ceanglais Airteagal 4(1)(e) de Threoir 2016/680, go gceanglaítear le hAirteagal 5 den Treoir sin ar na Ballstáit teorainneacha ama iomchuí a leagan síos chun sonraí pearsanta a scriosadh nó chun athbhreithniú tréimhsiúil a dhéanamh ar an ngá atá leis na sonraí sin a choinneáil, chomh maith le rialacha nós imeachta chun comhlíonadh na dteorainneacha ama sin a áirithiú.

99 Os a choinne sin, fágann Airteagal 5 den Treoir sin faoi na Ballstáit na teorainneacha ama sin a chinneadh, ar choinníoll go bhfuil siad ‘iomchuí’, agus cinneadh a dhéanamh an mbaineann siad le scriosadh na sonraí sin nó le hathbhreithniú tréimhsiúil ar an ngá atá lena gcoinneáil.

100 Is fíor nach mór Airteagal 4(1)(e) agus Airteagal 5 de Threoir 2016/680 a léamh i gcomhar, inter alia, le hAirteagal 10 den Treoir sin, ionas go mbeidh dearbhriachtanas le sonraí bithmhéadracha nó géiniteacha a choinneáil agus go dtabharfar coimircí iomchuí do chearta agus do shaoirsí an ábhair sonraí.

101 Mar sin féin, i gcás ina leagann Ballstát síos teorainneacha ama iomchuí chun athbhreithniú tréimhsiúil a dhéanamh ar an ngá atá le sonraí pearsanta a choinneáil agus i gcás nach mór, tráth an fhíoraithe sin, measúnú a dhéanamh ar an ndearbhriachtanas atá leis an gcoinneáil sin a fhadú, ní mór a mheas go gcomhlíonann dlí an Bhallstáit lena mbaineann na ceanglais sin. Dá bhrí sin, fiú i gcás inar sonraí pearsanta íogaire iad na sonraí a choinnítear, níl sé d’oibleagáid ar Bhallstát den chineál sin teorainneacha ama iomlána a shainiú chun sonraí den sórt sin a choinneáil, ar cheart sonraí den sórt sin a scriosadh go huathoibríoch (féach, chuige sin, breithiúnas an 30 Eanáir 2024, Direktor na Glavna direktsia ‘Natsionalna politsia’ pri MVR– Sofia, C‑118/22, EU:C:2024:97, mír 52).

102 Os a choinne sin, ceanglaítear le hoiriúnacht na dteorainneacha ama sin athbhreithniú tréimhsiúil, ar an gcéad dul síos, i gcomhréir le hAirteagal 4(1)(c) agus (e) de Threoir 2016/680, arna léamh i bhfianaise Airteagal 52(1) den Chairt, go scriosfar na sonraí pearsanta a coinníodh roimhe seo, faoi na coinníollacha a leagtar síos in Airteagal 16(2) agus (3) den Treoir sin, más rud é, tráth athbhreithniú a rinneadh, nach bhfuil dearbhriachtanas leis na sonraí céanna a choinneáil a thuilleadh agus, dá bhrí sin, go bhfuil sé iomarcach i bhfianaise na gcríocha atá á saothrú (féach, chuige sin, breithiúnas an 30 Eanáir 2024, Direktor na Glavna direktsia ‘Natsionalna politsia’ pri MVR– Sofia, C‑118/22, EU:C:2024:97, míreanna 45, 48 agus 50, chomh maith leis an gcásdlí dá dtagraítear).

103 Ar an dara dul síos, ag féachaint do na ceanglais, dá bhforáiltear in Airteagal 4(1)(c) de Threoir 2016/680, go mbeidh aon sonraí pearsanta leordhóthanach, ábhartha agus neamhiomarcach i bhfianaise na gcríocha ar chucu a dhéantar iad a phróiseáil, don fhíoras nach mór an fhoráil sin agus Airteagal 8 den Treoir sin a léamh i bhfianaise na gceanglas a eascraíonn as Airteagal 52 den Chairt agus don oibleagáid, dá bhforáiltear in Airteagal 6 den Treoir sin, atá ag an rialaitheoir, idirdhealú soiléir a dhéanamh idir sonraí pearsanta na gcatagóirí éagsúla ábhar sonraí, ní féidir a mheas go bhfuil na teorainneacha ama sin le haghaidh fíorú iomchuí mura leanann sé ó athruithe ar stádas coiriúil an ábhair sonraí, a mheastar a bheith ábhartha i bhfianaise na críche atá á saothrú leis an gcoinneáil sin, go mbeidh oibleagáid ar an rialaitheoir athbhreithniú a dhéanamh ar an ngá atá leis na sonraí a bhaineann leis an duine sin a choinneáil laistigh de thréimhse réasúnta ama.

104 Sa dara háit, maidir leis an bhfíoras go ndéanann na póilíní measúnú ar an ngá atá le sonraí bithmhéadracha agus géiniteacha a choinneáil ar bun ar bhonn rialacha inmheánacha, níl imthosca den sórt sin, ann féin, contrártha d’Airteagal 8(2) de Threoir 2016/680, a mhéid a cheanglaítear leis na rialacha inmheánacha sin ar na seirbhísí sin a áirithiú go gcomhlíontar an coinníoll a bhaineann le dianriachtanas na sonraí sin a choinneáil agus go bhfuil lánrogha na seirbhísí sin teoranta go leordhóthanach leis an dlí náisiúnta, lena n‑áirítear cásdlí na gcúirteanna náisiúnta.

105 Cé go bhfuil sé mar thoradh ar chineál inmheánach na rialacha, nach bhfuil rochtain ag na daoine uile a d’fhéadfadh a sonraí pearsanta a phróiseáil orthu, nach féidir leis na húdaráis inniúlachta brath ar na rialacha sin chun a shuí go gcomhlíonann siad na ceanglais a fhorchuirtear orthu, ní hé an toradh atá air sin go bhfuil an phróiseáil ar shonraí pearsanta a dhéantar faoi na rialacha sin neamhdhleathach go huathoibríoch, ach tugann sé le tuiscint, i gcás inarb iomchuí, i gcás achomharc i gcoinne an chinnidh chun próiseáil den sórt sin a dhéanamh, go suíonn na seirbhísí póilíneachta os comhair na cúirte inniúla, gan beann ar na rialacha inmheánacha sin, go bhfuil an coinníoll maidir le ‘dearbhriachtanas’ comhlíonta go cuí.

106 Sa chás seo, ar an gcéad dul síos, de réir Rialtas na Seice, is léir, go háirithe, ó Airteagal 65(5) den Dlí maidir le Póilíní na Seice, atá le fíorú ag an gcúirt a rinne an tarchur, nach mór próifílí ADN na ndaoine a gcuirtear ina leith go ndearna siad cion coiriúil d’aon ghnó nó a bhfuil drochamhras ann go ndearna siad cion den sórt sin a scriosadh i gcás nach bhfuil gá lena gcoinneáil a thuilleadh i bhfianaise na gcuspóirí atá á saothrú, eadhon i gcás ina scoireann na daoine sin de bheith á n‑ionchúiseamh nó atá faoi amhras agus nach ndéantar na daoine sin a ionchúiseamh nó a bheith faoi amhras i gcomhthéacs imeachtaí coiriúla eile, nó i gcás nach ndearna siad coireanna nó cionta eile roimhe sin.

107 I ndáil leis sin, ba cheart a mheabhrú, áfach, nach féidir a mheas go gcomhlíonann coinneáil sonraí bithmhéadracha agus géiniteacha an ceanglas nach mór iad a údarú ach amháin ‘i gcás ina bhfuil dearbhriachtanas leis’, de réir bhrí Airteagal 10 de Threoir 2016/680, ach amháin má chuirtear san áireamh ann ní hamháin an nasc a d’fhéadfadh a bheith ag an ábhar sonraí le himeachtaí leanúnacha eile nó cúlra nó próifíl an ábhair sonraí, ach freisin cineál agus tromchúis an chiona ba chúis leis an gciontú coiriúil deiridh, nó imthosca eile amhail an comhthéacs ar leith ina ndearnadh an ciontú sin (féach, chuige sin, breithiúnas an 30 Eanáir 2024, Direktor na Glavna direktsia ‘Natsionalna politsia’ pri MVR– Sofia, C‑118/22, EU:C:2024:97, mír 67.

108 Ar an dara dul síos, cé nach bhforáiltear le dlí na Seice d’uastréimhse choinneála sonraí pearsanta arna mbailiú ar bhonn Airteagal 65(1) den Dlí maidir le Póilíní na Seice, ceanglaítear le hAirteagal 82(1) den Dlí sin, áfach, ar na póilíní a fhíorú ar a laghad uair amháin gach 3 bliana go bhfuil gá fós leis na sonraí sin a choinneáil chun a gcúraimí a chomhlíonadh.

109 Dá bhrí sin, is faoin gcúirt a rinne an tarchur a bheidh sé a chinneadh, ag féachaint do na críocha a shaothraítear le coinneáil na sonraí bithmhéadracha agus géiniteacha lena mbaineann, an féidir a mheas go bhfuil tréimhse fíoraithe 3 bliana den sórt sin iomchuí, ach a shonrú, áfach, nach mbeadh gá, murach sin, leis na sonraí sin a scriosadh dá suífí go bhfuil a gcoinneáil fós dearbhriachtanach i gcás ar bith.

110 I bhfianaise an mhéid sin roimhe seo, is é an freagra ar an dara ceist nach mór Airteagal 4(1)(e) de Threoir 2016/680 a léiriú sa chaoi nach gcuirtear cosc leis ar reachtaíocht náisiúnta faoina ndéanann na póilíní measúnú ar an ngá atá le coinneáil sonraí bithmhéadracha agus géiniteacha a choinneáil ar bhonn rialacha inmheánacha, gan foráil a dhéanamh leis an reachtaíocht sin maidir le huastréimhse choinneála, ar choinníoll go leagtar síos leis an reachtaíocht sin teorainneacha ama iomchuí chun athbhreithniú tréimhsiúil a dhéanamh ar an ngá atá leis na sonraí sin a choinneáil agus, nuair a dhéantar an t‑athbhreithniú sin, go ndéantar measúnú ar an ndearbhriachtanas atá lena gcoinneáil a fhadú.

Costais

111 Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte náisiúnta, baineann ceist na gcostas leis an gcúirt sin. Níl na costais a tabhaíodh trí bharúlacha a cuireadh faoi bhráid na Cúirte, seachas costais na bpáirtithe sin, inghnóthaithe.

Ar na forais sin, rialaíonn an Chúirt (an Cúigiú Dlísheomra) mar seo a leanas:

1. Maidir le hAirteagail 8 agus 10 de Threoir (AE) 2016/680 ó Pharlaimint na hEorpa agus ón gComhairle an 27 Aibreán 2016 maidir le daoine nádúrtha a chosaint i ndáil le sonraí pearsanta a phróiseáil ag údaráis inniúla chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú, agus maidir le saorghluaiseacht na sonraí sin agus lena n‑aisghairtear Cinneadh Réime 2008/977/CGB ón gComhairle,

ní mór léiriú a dhéanamh mar seo a leanas:

maidir le sonraí bithmhéadracha agus géiniteacha a bhailiú, a choinneáil agus a scriosadh, ní mór an coincheap ‘dlí Ballstáit’, de réir na nAirteagal sin, a thuiscint mar thagairt d’fhoráil a bhfuil feidhm ghinearálta aici lena leagtar amach na coinníollacha íosta maidir le sonraí den sórt sin a bhailiú, a choinneáil agus a scriosadh, mar a léirítear le cásdlí na gcúirteanna náisiúnta, a mhéid go bhfuil an cásdlí sin inrochtana agus intuartha go leor.

2. Maidir le hAirteagal 6 agus Airteagal 4(1)(c) de Threoir 2016/680, arna léamh i gcomhar le hAirteagal 10 den Treoir sin,

ní mór léiriú a dhéanamh mar seo a leanas:

ní chuirtear cosc leo ar reachtaíocht náisiúnta lena gceadaítear, gan idirdhealú, sonraí bithmhéadracha agus géiniteacha a bhailiú i ndáil le gach duine a chúisítear i gcion coiriúil a dhéanamh d’aon ghnó nó a bhfuil drochamhras ann go ndearna sé cion den sórt sin, a mhéid, ar an gcéad dul síos, nach bhfuil idirdhealú idir an dá chatagóir daoine sin i gceist le críocha an bhailithe sin agus, ar an dara dul síos, go gceanglaítear ar rialaitheoirí, i gcomhréir leis an dlí náisiúnta, lena n‑áirítear cásdlí na gcúirteanna náisiúnta, na prionsabail agus na ceanglais speisialta, a leagtar amach in Airteagail 4 agus 10 den Treoir sin, a chomhlíonadh.

3. Maidir le hAirteagal 4(1)(e) de Threoir 2016/680,

ní mór léiriú a dhéanamh mar seo a leanas:

ní chuirtear cosc leis ar reachtaíocht náisiúnta faoina ndéanann na póilíní measúnú ar an ngá atá le coinneáil sonraí bithmhéadracha agus géiniteacha a choinneáil ar bhonn rialacha inmheánacha, gan foráil a dhéanamh leis an reachtaíocht sin maidir le huastréimhse choinneála, ar choinníoll go leagtar síos leis an reachtaíocht sin teorainneacha ama iomchuí chun athbhreithniú tréimhsiúil a dhéanamh ar an ngá atá leis na sonraí sin a choinneáil agus, nuair a dhéantar an t‑athbhreithniú sin, go ndéantar measúnú ar an ndearbhriachtanas atá lena gcoinneáil a fhadú.

Sínithe

* Teanga an cháis: an tSeicis.