(1)

F’konformità mad-Direttiva 2011/61/UE tal-Parlament Ewropew u tal-Kunsill (2), il-Kummissjoni rrieżaminat l-applikazzjoni u l-kamp ta’ applikazzjoni ta’ dik id-Direttiva u kkonkludiet li l-objettivi tal-integrazzjoni tas-suq tal-Unjoni għal fondi ta’ investiment alternattivi (“AIFs”), tal-iżgurar ta’ livell għoli ta’ protezzjoni tal-investituri u tal-protezzjoni tal-istabbiltà finanzjarja, fil-biċċa l-kbira, ġew issodisfati. Madankollu, fir-rieżami tagħha, il-Kummissjoni kkonkludiet ukoll li hemm il-ħtieġa li jiġu armonizzati r-regoli għall-maniġers ta’ fondi ta’ investiment alternattivi (AIFMs) li jimmaniġġaw AIFs li joriġinaw self, kif ukoll il-ħtieġa li jiġu ċċarati l-istandards applikabbli għall-AIFMs li jiddelegaw il-funzjonijiet tagħhom lil partijiet terzi, biex jiġi żgurat trattament ugwali ta’ entitajiet li jipprovdu servizzi ta’ kustodja (“kustodji”), biex jittejjeb l-aċċess transfruntier għas-servizzi depożitarji, biex jiġi ottimizzat il-ġbir tad-data superviżorja u biex jiġi ffaċilitat l-użu ta’ għodod għall-ġestjoni tal-likwidità madwar l-Unjoni. Għalhekk, huma meħtieġa emendi biex jiġu indirizzati dawk il-ħtiġijiet sabiex jittejjeb il-funzjonament tad-Direttiva 2011/61/UE.

(2)

Reġim robust ta’ delega, it-trattament ugwali tal-kustodji, rapportar superviżorju koerenti, b’mod partikolari permezz tat-tneħħija ta’ duplikazzjonijiet u rekwiżiti żejda, u approċċ armonizzat għall-użu tal-għodod għall-ġestjoni tal-likwidità huma ugwalment meħtieġa għall-ġestjoni tal-impriżi għall-investiment kollettiv f’titoli trasferibbli (UCITS). Għalhekk, huwa xieraq ukoll li tiġi emendata d-Direttiva 2009/65/KE tal-Parlament Ewropew u tal-Kunsill (3), li tistabbilixxi regoli dwar l-awtorizzazzjoni u l-operat tal-UCITS u l-kumpaniji tal-immaniġġar tagħhom fl-oqsma tad-delega, is-salvagwardja tal-assi, ir-rapportar superviżorju u l-ġestjoni tar-riskju tal-likwidità.

(3)

Is-suq tal-Unjoni għal AIFs laħaq EUR 6,8 triljun f’valur nett tal-assi fi tmiem l-2022. L-investituri professjonali jammontaw għal madwar 86 % tal-valur nett tal-assi tal-AIFs immaniġġati jew ikkummerċjalizzati minn AIFMs awtorizzati u minn AIFMs taħt il-limitu, jiġifieri l-AIFMs imsemmija fl-Artikolu 3(2) tad-Direttiva 2011/61/UE, fl-Unjoni. Is-suq tal-Unjoni għal AIFs jipprovdi aktar minn EUR 250 biljun lin-negozji tal-Unjoni fi kreditu privat, u l-investituri tal-Unjoni huma responsabbli għal 30 % tal-kapital globali allokat lill-industrija kollha. Id-daqs tas-suq aggregat tal-Unjoni għall-AIFs kompla jespandi, b’żieda ta’ aktar minn 15 % bejn l-2020 u l-2022, u l-AIFs kienu jirrappreżentaw terz tal-industrija tal-fondi taż-Żona Ekonomika Ewropea fi tmiem l-2020. Madankollu, għad hemm lok biex l-industrija tikber billi tipprovdi lill-investituri istituzzjonali b’għażla akbar u ttejjeb il-kompetittività tal-unjoni tas-swieq kapitali.

(4)

Biex tiżdied l-effiċjenza tal-attivitajiet tal-AIFMs, il-lista ta’ servizzi anċillari stabbilita fl-Artikolu 6(4) tad-Direttiva 2011/61/UE jenħtieġ li tiġi estiża biex tinkludi l-kompiti mwettqa minn amministratur f’konformità mar-Regolament (UE) 2016/1011 tal-Parlament Ewropew u tal-Kunsill (4) (“amministrazzjoni ta’ parametri referenzjarji”) u attivitajiet ta’ servizzjar tal-kreditu f’konformità mad-Direttiva (UE) 2021/2167 tal-Parlament Ewropew u tal-Kunsill (5). Għal raġunijiet ta’ kompletezza, jenħtieġ li jiġi ċċarat li, meta jwettaq il-kompiti mwettqa minn tali amministratur jew meta jipprovdi attivitajiet ta’ servizzjar tal-kreditu, l-AIFM jenħtieġ li jkun soġġett għar-Regolament (UE) 2016/1011 u għad-Direttiva (UE) 2021/2167 rispettivament.

(5)

Sabiex tissaħħaħ iċ-ċertezza legali, jenħtieġ li jiġi ċċarat li l-ġestjoni tal-AIFs tista’ tinkludi wkoll l-attivitajiet ta’ oriġinazzjoni tas-self f’isem AIF u ta’ servizzjar ta’ entitajiet bi skop speċjali ta’ titolizzazzjoni.

(6)

Sabiex tissaħħaħ iċ-ċertezza legali għall-AIFMs u l-kumpaniji tal-immaniġġar tal-UCITS rigward is-servizzi li jistgħu jipprovdu lil partijiet terzi, jenħtieġ li jiġi ċċarat li l-AIFMs u l-kumpaniji tal-immaniġġar tal-UCITS ikunu permessi jwettqu għall-benefiċċju ta’ partijiet terzi l-istess funzjonijiet u attivitajiet li diġà jwettqu b’relazzjoni mal-AIFs u l-UCITS li jimmaniġġaw, dment li kwalunkwe kunflitt ta’ interess potenzjali maħluq mill-forniment ta’ dik il-funzjoni jew attività lil partijiet terzi jiġi mmaniġġat kif xieraq. Tali funzjonijiet u attivitajiet jinkludu, pereżempju, servizzi korporattivi bħar-riżorsi umani u t-teknoloġija tal-informazzjoni (IT), kif ukoll servizzi tal-IT għallimmaniġġar ta’ portafolli u l-immaniġġar tar-riskju. Dik il-possibbiltà tappoġġa wkoll il-kompetittività internazzjonali tal-AIFMs u tal-kumpaniji tal-immaniġġar tal-UCITS tal-UE billi tippermetti ekonomiji ta’ skala u tgħin fid-diversifikazzjoni tas-sorsi ta’ dħul.

(7)

Sabiex tiġi żgurata ċertezza legali, jenħtieġ li jiġi ċċarat li l-AIFMs li jipprovdu servizzi anċillari li jinvolvu strumenti finanzjarji huma soġġetti għar-regoli stabbiliti fid-Direttiva 2014/65/UE tal-Parlament Ewropew u tal-Kunsill (6). Fir-rigward ta’ assi li ma humiex strumenti finanzjarji, jenħtieġ li l-AIFMs jkunu meħtieġa jikkonformaw mar-rekwiżiti tad-Direttiva 2011/61/UE.

(8)

Sabiex tiġi żgurata l-applikazzjoni uniformi tar-rekwiżiti stabbiliti fid-Direttiva 2011/61/UE rigward ir-riżorsi umani meħtieġa tal-AIFMs, huwa meħtieġ li jiġi ċċarat li fiż-żmien tal-applikazzjoni għal awtorizzazzjoni, AIFM jenħtieġ li jipprovdi lill-awtoritajiet kompetenti b’informazzjoni dwar ir-riżorsi umani u tekniċi li huwa juża biex iwettaq il-funzjonijiet tiegħu, u fejn applikabbli, biex jissorvelja lid-delegati tiegħu. Mill-inqas żewġ persuni fiżiċi li, fuq bażi full-time, jew ikunu impjegati mill-AIFM jew ikunu membri eżekuttivi jew membri tal-korp ta’ tmexxija tal-AIFM, u li jkunu domiċiljati, fis-sens li jkollhom ir-residenza abitwali tagħhom, fl-Unjoni, jenħtieġ li jinħatru biex iwettqu n-negozju tal-AIFM. Irrispettivament minn dak il-minimu statutorju, jistgħu jkunu meħtieġa aktar riżorsi skont id-daqs u l-kumplessità tal-AIFM u l-AIFs li jimmaniġġja.

(9)

Xi Stati Membri għandhom rekwiżiti fil-liġi nazzjonali jew fl-istandards tal-industrija li jikkonċernaw il-grad ta’ indipendenza ta’ membru wieħed jew aktar tal-korp ta’ tmexxija ta’ AIFM jew tal-korp tal-immaniġġar ta’ kumpanija tal-immaniġġar tal-UCITS jew ta’ kumpanija ta’ investiment. Huwa xieraq li l-AIFMs li jimmaniġġaw AIFs ikkummerċjalizzati lil investituri fil-livell tal-konsumatur u kumpaniji tal-immaniġġar tal-UCITS u kumpaniji ta’ investiment jiġu mħeġġa jaħtru bħala membru tal-korp ta’ tmexxija jew korp tal-immaniġġar tagħhom mill-inqas direttur indipendenti jew mhux eżekuttiv wieħed, fejn possibbli skont il-liġi nazzjonali jew skont l-istandards tal-industrija tal-Istat Membru ta’ domiċilju tal-AIFM, tal-kumpanija tal-immaniġġar tal-UCITS jew tal-kumpanija ta’ investiment, sabiex jiġu protetti l-interessi tal-AIFs u l-UCITS u tal-investituri fl-AIFs li l-AIFM jimmaniġġa jew fil-UCITS. Meta jagħmlu dik il-ħatra, l-AIFM, il-kumpanija tal-immaniġġartal-UCITS jew il-kumpanija ta’ investiment jeħtieġ li jiżguraw li dak id-direttur ikun indipendenti fil-karattru u fil-ġudizzju u jkollu biżżejjed għarfien espert u esperjenza biex ikun jista’ jivvaluta jekk l-AIFM, il-kumpanija tal-immaniġġar tal-UCITS jew il-kumpanija ta’ investiment humiex qed jimmaniġġaw l-AIFs jew l-UCITS fl-aħjar interessi tal-investituri.

(10)

Il-kummerċjalizzazzjoni tal-AIFs mhux dejjem titwettaq direttament mill-AIFM iżda minn distributur wieħed jew diversi f’isem l-AIFM jew f’isimhom stess. B’mod partikolari, jista’ jkun hemm ukoll każijiet fejn konsulent finanzjarju indipendenti jikkummerċjalizza AIF mingħajr ma l-AIFM ikun konxju ta’ dan. Il-biċċa l-kbira tad-distributuri tal-fondi huma soġġetti għal rekwiżiti regolatorji skont id-Direttiva 2014/65/UE jew id-Direttiva (UE) 2016/97 tal-Parlament Ewropew u tal-Kunsill (7) li jiddefinixxu l-ambitu u l-firxa tar-responsabbiltajiet tagħhom lejn il-klijenti tagħhom stess. Għalhekk, jenħtieġ li d-Direttiva 2011/61/UE tirrikonoxxi d-diversità tal-arranġamenti ta’ distribuzzjoni u tiddistingwi bejn, fuq naħa, arranġamenti li bihom distributur jaġixxi f’isem l-AIFM, li jenħtieġ li jitqiesu bħala arranġamenti ta’ delega, u fuq in-naħa l-oħra, arranġamenti li bihom distributur jaġixxi f’ismu stess meta jikkumerċjalizza l-AIF skont id-Direttiva 2014/65/UE jew permezz ta’ prodotti ta’ investiment ibbażati fuq assigurazzjoni tal-ħajja f’konformità mad-Direttiva (UE) 2016/97, fejn f’dan il-każ id-dispożizzjonijiet tad-Direttiva 2011/61/UE jenħtieġ li ma japplikawx, irrispettivament minn kwalunkwe ftehim ta’ distribuzzjoni bejn l-AIFM u d-distributur.

(11)

Delega tista’ tippermetti l-ġestjoni effiċjenti tal-portafolli ta’ investiment u l-akkwist tal-għarfien espert meħtieġ f’suq ġeografiku jew klassi tal-assi partikolari. Madankollu, huwa importanti li s-superviżuri jkollhom informazzjoni aġġornata dwar l-elementi ewlenin tal-arranġamenti ta’ delega. Biex tiġi żviluppata ħarsa ġenerali affidabbli tal-attivitajiet ta’ delega fl-Unjoni, jenħtieġ li l-AIFMs jipprovdu regolarment lill-awtoritajiet kompetenti b’informazzjoni dwar l-arranġamenti ta’ delega li jinvolvu d-delega tal-funzjonijiet tal-immaniġġar ta’ portafolli kollettivi jew diskrezzjonarji jew tal-ġestjoni tar-riskji. Għalhekk, jenħtieġ li l-AIFMs, fir-rigward ta’ kull AIF li jimmaniġġaw, jirrapportaw informazzjoni dwar id-delegati, lista u d-deskrizzjoni tal-attivitajiet delegati, l-ammont u l-perċentwal tal-assi tal-AIFs immaniġġati li huma soġġetti għal arranġamenti ta’ delega li jikkonċernaw il-funzjoni tal-immaniġġar tal-portafoll, deskrizzjoni ta’ kif l-AIFM jissorvelja, jimmonitorja u jikkontrolla lid-delegat, informazzjoni dwar l-arranġamenti ta’ sottodelega u d-data tal-bidu u l-iskadenza tal-arranġamenti ta’ delega u sottodelega. Għal raġunijiet ta’ ċarezza, jenħtieġ li jiġi speċifikat li d-data miġbura dwar l-ammont u l-perċentwal tal-assi tal-AIFs immaniġġati li huma soġġetti għal arranġamenti ta’ delega li jikkonċernaw il-funzjonijiet tal-immaniġġar tal-portafoll hija għall-finijiet li tingħata ħarsa ġenerali akbar tal-operat tad-delega, u waħedha mhijiex indikatur evidenzjali għad-determinazzjoni tal-adegwatezza tal-ġestjoni tas-sustanza jew tar-riskju, jew l-effettività tal-arranġamenti ta’ sorveljanza jew kontroll fil-livell tal-maniġer. Jenħtieġ li tali informazzjoni tiġi kkomunikata lill-awtoritajiet kompetenti bħala parti mir-rapportar superviżorju rregolat bid-Direttiva 2011/61/UE.

(12)

Sabiex tissaħħaħ l-applikazzjoni uniformi tad-Direttiva 2011/61/UE, jenħtieġ li jiġi ċċarat li r-regoli tad-delega stabbiliti fiha japplikaw għall-funzjonijiet kollha elenkati fl-Anness I għal dik id-Direttiva u għal-lista ta’ servizzi anċillari stabbiliti fl-Artikolu 6(4) ta’ dik id-Direttiva.

(13)

Fondi ta’ investiment li jipprovdu self jistgħu jkunu sors ta’ finanzjament alternattiv għall-ekonomija reali. Tali fondi jistgħu jipprovdu finanzjament kritiku għall-intrapriżi żgħar u ta’ daqs medju tal-Unjoni li għalihom huwa aktar diffiċli li jiksbu aċċess għal sorsi ta’ self tradizzjonali. Madankollu, approċċi regolatorji nazzjonali diverġenti jistgħu jwasslu għal arbitraġġ regolatorju u livelli differenti ta’ protezzjoni tal-investituri, u b’hekk ifixklu l-istabbiliment ta’ suq intern effiċjenti għall-oriġinazzjoni tas-self mill-AIFs. Id-Direttiva 2011/61/UE jenħtieġ li tirrikonoxxi d-dritt tal-AIFs li joriġinaw self. Jenħtieġ li jiġu stabbiliti wkoll regoli komuni biex jiġi stabbilit suq intern effiċjenti għall-oriġinazzjoni tas-self mill-AIFs, biex jiġi żgurat livell uniformi ta’ protezzjoni tal-investituri fl-Unjoni, sabiex l-AIFs ikunu jistgħu jiżviluppaw l-attivitajiet tagħhom ta’ oriġinazzjoni tas-self fl-Istati Membri kollha u biex jiġi ffaċilitat l-aċċess għal finanzjament minn kumpaniji tal-Unjoni, li huwa objettiv ewlieni tal-unjoni tas-swieq kapitali, kif stabbilit fil-komunikazzjoni tal-Kummissjoni tal-24 ta’ Settembru 2020 bit-titolu “Unjoni tas-Swieq Kapitali għall-persuni u n-negozji – pjan ta’ azzjoni ġdid”. Madankollu, minħabba s-suq tal-kreditu privat li qed jikber b’rata mgħaġġla, huwa meħtieġ li jiġu indirizzati r-riskji mikroprudenzjali u makroprudenzjali potenzjali li l-oriġinazzjoni tas-self mill-AIFs tista’ toħloq u tferrex fis-sistema finanzjarja usa’. Ir-regoli applikabbli għall-AIFMs li jimmaniġġaw AIFs li joriġinaw self jenħtieġ li jiġu armonizzati sabiex itejbu l-ġestjoni tar-riskju fis-suq finanzjarju kollu u jżidu t-trasparenza għall-investituri. Għal raġunijiet ta’ ċarezza, jenħtieġ li d-dispożizzjonijiet stabbiliti f’din id-Direttiva li huma applikabbli għall-AIFMs li jimmaniġġaw AIFs li joriġinaw self jenħtieġ li ma jipprevjenux lill-Istati Membri milli jistabbilixxu oqfsa ta’ prodotti nazzjonali li jiddefinixxu ċerti kategoriji ta’ AIFs b’regoli aktar restrittivi.

(14)

L-oriġinazzjoni tas-self mhux dejjem titwettaq direttament mill-AIF. Jista’ jkun hemm każijiet fejn AIF jagħti self indirettament permezz ta’ parti terza jew mezz b’għan speċjali li jagħti s-self għall-AIF jew f’ismu, jew għall-AIFM jew f’ismu fir-rigward tal-AIF, qabel ma jikseb skopertura għas-self. Sabiex tiġi evitata ċ-ċirkomvenzjoni tad-Direttiva 2011/61/UE, meta dak l-AIF jew l-AIFM ikunu involuti fl-istrutturar tas-self, jew fid-definizzjoni jew fil-qbil minn qabel dwar il-karatteristiċi tiegħu, tali każijiet jenħtieġ li jitqiesu bħala attivitajiet li joriġinaw self u jenħtieġ li jkunu soġġetti għal dik id-Direttiva.

(15)

L-AIFs li jagħtu self lill-konsumaturi huma soġġetti għar-rekwiżiti ta’ strumenti oħra tad-dritt tal-Unjoni applikabbli għas-self lill-konsumaturi, inklużi d-Direttiva 2008/48/KE tal-Parlament Ewropew u tal-Kunsill (8) u d-Direttiva (UE) 2021/2167. Dawk l-istrumenti tad-dritt tal-Unjoni jipprevedu l-protezzjoni bażika tal-mutwatarji fil-livell tal-Unjoni. Madankollu, għal raġunijiet prevalenti ta’ interess pubbliku, jenħtieġ li l-Istati Membri jkunu jistgħu jipprojbixxu l-oriġinazzjoni tas-self mill-AIFs lill-konsumaturi fit-territorju tagħhom.

(16)

Sabiex jappoġġaw il-ġestjoni professjonali tal-AIFs u jtaffu r-riskji għall-istabbiltà finanzjarja, l-AIFMs li jimmaniġġaw l-AIFs li jinvolvu ruħhom fl-oriġinazzjoni tas-self, indipendentement mill-fatt jekk dawk l-AIFs jissodisfawx id-definizzjoni ta’ AIFs li joriġinaw self, jenħtieġ li jkollhom politiki, proċeduri u proċessi effettivi għall-għoti ta’ self. Jenħtieġ li jimplimentaw ukoll politiki, proċeduri u proċessi effettivi għall-valutazzjoni tar-riskju ta’ kreditu u għall-amministrazzjoni u l-monitoraġġ tal-portafoll ta’ kreditu tagħhom meta l-AIFs li jimmaniġġaw jinvolvu ruħhom fl-oriġinazzjoni tas-self, inkluż meta dawk l-AIFs jiksbu skopertura għal self permezz ta’ partijiet terzi. Dawk il-politiki, il-proċeduri u l-proċessi jenħtieġ li jkunu proporzjonati mal-firxa tal-oriġinazzjoni tas-self u jenħtieġ li jiġu rieżaminati regolarment.

(17)

Sabiex jiġi kkontrollat ir-riskju ta’ interkonnettività fost l-AIFs li joriġinaw self u parteċipanti oħra fis-suq finanzjarju, l-AIFMs ta’ dawk l-AIFs jenħtieġ li, meta mutwatarju jkun istituzzjoni finanzjarja, ikunu meħtieġa jiddiversifikaw ir-riskju tagħhom u jagħmlu l-iskopertura tagħhom soġġetta għal limiti speċifiċi.

(18)

Sabiex jiġu żgurati l-istabbiltà u l-integrità tas-sistema finanzjarja u biex jiġu introdotti salvagwardji proporzjonati, l-AIFs li joriġinaw self jenħtieġ li jkunu soġġetti għal limitu ta’ leverage li jvarja skont jekk ikunux ta’ tip miftuħ jew magħluq. Ir-riskju għall-istabbiltà finanzjarja huwa akbar għall-AIFs miftuħa, li jistgħu jkunu soġġetti għal livelli għoljin ta’ tifdijiet. F’konformità mal-objettiv li tiġi ppreservata l-istabbiltà finanzjarja, il-limitu tal-leverage ma għandux jiddependi fuq jekk AIF li joriġina self huwiex ikkummerċjalizzat lil investituri professjonali u investituri fil-livell tal-konsumatur jew lil investituri professjonali biss. Il-metodu ta’ impenn jipprovdi qafas komprensiv u robust għall-kalkolu tal-leverage f’konformità mal-istandards internazzjonali, u b’mod partikolari biex jitqies l-ingranaġġ sintetiku maħluq mid-derivattivi. Dawk il-limiti ta’ leverage jenħtieġ li ma jipprevjenux lill-awtoritajiet kompetenti tal-Istat Membru ta’ domiċilju tal-AIFM milli jimponu limiti ta’ leverage aktar stretti fejn jitqies meħtieġ sabiex jiġu żgurati l-istabbiltà u l-integrità tas-sistema finanzjarja.

(19)

Sabiex jiġi limitat il-kunflitt ta’ interess, l-AIFMs u l-persunal tagħhom jenħtieġ li ma jirċievu self minn ebda AIF li joriġina self li huma jimmaniġġaw. Bl-istess mod, id-depożitarju tal-AIF u d-delegat tad-depożitarju, id-delegat tal-AIFM u l-persunal tiegħu, u l-entitajiet fi ħdan l-istess grupp bħal dak tal-AIFM, jenħtieġ li jkunu pprojbiti milli jirċievu self mill-AIF ikkonċernat.

(20)

Sabiex jiġi evitat il-periklu morali u tinżamm il-kwalità tal-kreditu ġenerali tas-self li joriġina mill-AIFs, self bħal dan jenħtieġ li jkun soġġett għal rekwiżiti tar-ritenzjoni tar-riskju meta jiġi ttrasferit lil partijiet terzi. Bl-istess objettiv, jenħtieġ li l-AIFMs ikunu pprojbiti milli jimmaniġġaw AIF li joriġina self bl-uniku skop li jbigħuh lil partijiet terzi (“strateġija minn oriġini għal distribuzzjoni”), irrispettivament mill-fatt jekk dak l-AIF jissodisfax id-definizzjoni ta’ AIF li joriġina self. Jenħtieġ li s-self jingħata għall-iskop uniku li l-kapital miġbur mill-AIF jiġi investit f’konformità mal-istrateġija ta’ investiment u r-restrizzjonijiet regolatorji tiegħu. Madankollu, jenħtieġ li l-AIFM ikun jista’ jimplimenta dik l-istrateġija ta’ investiment fl-aħjar interessi tal-investituri tal-AIF. Dan jfisser li d-derogi mir-regoli dwar ir-ritenzjoni tar-riskju huma meħtieġa u jenħtieġ li jkopru każijiet fejn ir-ritenzjoni ta’ parti mis-self ma tkunx kompatibbli mal-implimentazzjoni tal-istrateġija ta’ investiment tal-AIF jew mar-rekwiżiti regolatorji, inklużi r-rekwiżiti tal-prodott, imposti fuq l-AIF u l-AIFM tiegħu. Dawk il-każijiet jinkludu sitwazzjonijiet fejn ir-ritenzjoni ta’ parti mis-self tirriżulta f’li l-AIF jaqbeż il-limiti ta’ investiment jew ta’ diversifikazzjoni tiegħu jew jikser ir-rekwiżiti regolatorji, bħal miżuri restrittivi adottati skont l-Artikolu 215 tat-Trattat dwar il-Funzjonament tal-Unjoni Ewropea (TFUE), jew fejn l-AIF ikun dieħel f’likwidazzjoni, jew fejn is-sitwazzjoni tal-mutwatarju tkun inbidlet, pereżempju fil-każ ta’ merger jew ta’ inadempjenza tal-mutwatarju jekk l-istrateġija ta’ investiment tal-AIF ma tkunx li jimmaniġġa assi f’diffikultà, jew fejn l-allokazzjoni tal-assi tal-AIF tinbidel, bir-riżultat li l-AIF ma jibqax ifittex skopertura għal settur speċifiku jew għal klassi speċifika ta’ assi. Jenħtieġ li AIFM, fuq talba tal-awtoritajiet kompetenti tal-Istat Membru ta’ domiċilju tiegħu, jiġġustifika d-deċiżjoni tiegħu li jagħmel użu minn tali deroga mir-regoli dwar ir-ritenzjoni tar-riskju, u jenħtieġ li jkun meħtieġ jikkonforma fuq bażi kontinwa mal-prinċipju ġenerali ta’ projbizzjoni fuq strateġiji minn oriġini għal distribuzzjoni.

(21)

Self illikwidu fuq terminu twil, li jkun miżmum minn AIFs jista’ joħloq diskrepanzi fil-likwidità jekk l-istruttura miftuħa tal-AIF tippermetti lill-investituri jifdu l-unitajiet jew l-ishma tagħhom fuq bażi frekwenti. Huwa għalhekk meħtieġ li jittaffew ir-riskji relatati mat-trasformazzjoni tal-maturità billi tiġi imposta struttura magħluqa għal AIFs li joriġinaw self. Madankollu, jenħtieġ li jkun possibbli għall-AIFs li joriġinaw self li joperaw bħala miftuħa dment li jiġu ssodisfati ċerti rekwiżiti, inkluża sistema ta’ ġestjoni tal-likwidità li timminimizza d-diskrepanzi tal-likwidità, tiżgura t-trattament ġust tal-investituri u tkun taħt is-superviżjoni tal-awtoritajiet kompetenti tal-Istat Membru ta’ domiċilju tal-AIFM. Sabiex jiġu żgurati kriterji konsistenti għad-determinazzjoni mill-awtoritajiet kompetenti dwar jekk AIF li joriġina self jistax iżomm struttura miftuħa, l-Awtorità Superviżorja Ewropea (Awtorità Ewropea tat-Titoli u s-Swieq) (AETS) stabbilita bir-Regolament (UE) Nru 1095/2010 tal-Parlament Ewropew u tal-Kunsill (9) jenħtieġ li tiżviluppa abbozz ta’ standards tekniċi regolatorji biex tistabbilixxi dawk il-kriterji, filwaqt li tqis kif xieraq in-natura, il-profil tal-likwidità u l-iskoperturi tal-AIFs li joriġinaw self.

(22)

Jenħtieġ li jiġi ċċarat li fejn AIF li joriġina self, jew AIFM, fir-rigward tal-attivitajiet ta’ self tal-AIFs li jimmaniġġa, ikunu soġġetti għar-rekwiżiti stabbiliti fid-Direttiva 2011/61/UE u għar-rekwiżiti stabbiliti fir-Regolamenti (UE) Nru 345/2013 (10), (UE) Nru 346/2013 (11) u (UE) 2015/760 (12) tal-Parlament Ewropew u tal-Kunsill, ir-rekwiżiti speċifiċi dwar il-prodott stabbiliti fil-Kapitolu II tar-Regolament (UE) Nru 345/2013, il-Kapitolu II tar-Regolament (UE) Nru 346/2013 u r-Regolament (UE) 2015/760, jenħtieġ li jieħdu preċedenza fuq ir-regoli aktar ġenerali stabbiliti fid-Direttiva 2011/61/UE.

(23)

Minħabba n-natura potenzjalment illikwida u fit-tul tal-assi tal-AIFs li joriġinaw self, l-AIFMs jafu jesperjenzaw diffikultà biex jikkonformaw mal-bidliet fir-rekwiżiti regolatorji introdotti matul iċ-ċiklu tal-ħajja tal-AIFs li jimmaniġġaw mingħajr ma tiġi affettwata l-fiduċja u l-kunfidenza tal-investituri tagħhom. Huwa għalhekk meħtieġ li jiġu applikati dispożizzjonijiet tranżizzjonali għal ċerti rekwiżiti għall-AIFs kostitwiti qabel l-adozzjoni ta’ din id-Direttiva. Madankollu, jenħtieġ li tali AIFs u AIFMs ukoll ikunu jistgħu jagħżlu li jkunu soġġetti għal dawk ir-regoli dment li l-awtoritajiet kompetenti tal-Istat Membru ta’ domiċilju tal-AIFM jiġu nnotifikati kif xieraq. Barra minn hekk, ir-regoli applikabbli għall-oriġinazzjoni tas-self u għall-AIFs li joriġinaw self, bl-eċċezzjoni tal-limiti tal-leverage u tal-investiment u l-obbligu għal AIFs li joriġinaw self li joperaw bħala magħluqa, jenħtieġ li japplikaw biss fir-rigward ta’ self oriġinat wara d-dħul fis-seħħ ta’ din id-Direttiva.

(24)

Sabiex jiġi appoġġat il-monitoraġġ tas-suq mill-awtoritajiet superviżorji, jenħtieġ li l-ġbir u l-kondiviżjoni tal-informazzjoni permezz ta’ rapportar superviżorju jittejbu. Rekwiżiti ta’ rapportar duplikati li jeżistu skont il-liġi tal-Unjoni u dik nazzjonali, b’mod partikolari r-Regolamenti (UE) Nru 600/2014 (13)u (UE) 2019/834 (14) tal-Parlament Ewropew u tal-Kunsill u r-Regolamenti (UE) Nru 1011/2012 (15) u (UE) Nru 1073/2013 (16) tal-Bank Ċentrali Ewropew, jistgħu jiġu eliminati biex tittejjeb l-effiċjenza u jitnaqqsu l-piżijiet amministrattivi għall-AIFMs. L-Awtorità Superviżorja Ewropea (Awtorità Bankarja Ewropea) (EBA) stabbilita bir-Regolament (UE) Nru 1093/2010 tal-Parlament Ewropew u tal-Kunsill (17), l-Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol) stabbilita bir-Regolament (UE) Nru 1094/2010 tal-Parlament Ewropew u tal-Kunsill (18), u l-AETS (magħrufa kollettivament bħala l-“Awtoritajiet Superviżorji Ewropej” jew “ASE”) u l-Bank Ċentrali Ewropew (BĊE), bl-appoġġ tal-awtoritajiet kompetenti, fejn ikun meħtieġ, jenħtieġ li jivvalutaw il-ħtiġijiet tad-data tal-awtoritajiet superviżorji differenti sabiex il-bidliet fil-mudell tar-rapportar superviżorju għall-AIFMs ikunu effettivi.

(25)

Sabiex jitnaqqsu r-rapportar doppju u l-piżijiet ta’ rapportar relatati għall-AIFMs u biex jiġi żgurat użu mill-ġdid effiċjenti tad-data mill-awtoritajiet, id-data rapportata mill-AIFMs lill-awtoritajiet kompetenti jenħtieġ li tkun disponibbli għal awtoritajiet kompetenti rilevanti oħra, l-ASE u l-Bord Ewropew dwar ir-Riskju Sistemiku (BERS), kif stabbilit fir-Rakkomandazzjoni tal-Bord Ewropew dwar ir-Riskju Sistemiku tas-7 ta’ Diċembru 2017 (19), kull meta jkun meħtieġ għall-fini tat-twettiq ta’ dmirijiethom, kif ukoll għall-membri tas-Sistema Ewropea tal-Banek Ċentrali (SEBĊ) għal finijiet statistiċi biss.

(26)

Bi tħejjija għall-bidliet futuri għall-obbligi ta’ rapportar superviżorju, l-ambitu tad-data li tista’ tkun meħtieġa mill-AIFMs jenħtieġ li jitwessa’ billi jitneħħew limitazzjonijiet fuq dak l-ambitu li jiffokaw fuq negozji u skoperturi kbar jew kontropartijiet, u billi jżidu kategoriji oħra ta’ data li tkun se tingħata lill-awtoritajiet kompetenti. Jekk l-AETS tiddetermina li divulgazzjoni sħiħa tal-portafoll lis-superviżuri fuq bażi perjodika tkun iġġustifikata, id-dispożizzjonijiet tad-Direttiva 2011/61/UE jenħtieġ li jakkomodaw it-twessigħ meħtieġ tal-ambitu tar-rapportar.

(27)

Sabiex tiġi żgurata l-armonizzazzjoni konsistenti tal-obbligi ta’ rapportar superviżorju, jenħtieġ li tiġi ddelegata lill-Kummissjoni s-setgħa li tadotta standards tekniċi regolatorji permezz ta’ atti delegati skont l-Artikolu 290 TFUE f’konformità mal-Artikoli 10 sa 14 tar-Regolament (UE) Nru 1095/2010 biex jiġu stabbiliti l-kontenut, il-formoli u l-proċeduri biex jiġi standardizzat il-proċess ta’ rapportar superviżorju mill-AIFMs, u b’hekk jiġi sostitwit il-mudell tar-rapportar stabbilit fl-att delegat adottat skont l-Artikolu 24 tad-Direttiva 2011/61/UE, kif ukoll il-frekwenza tar-rapportar u meta għandu jsir. Fir-rigward tal-informazzjoni li għandha tiġi rapportata dwar l-arranġamenti ta’ delega, l-istandards tekniċi regolatorji jenħtieġ li jibqgħu limitati għall-istabbiliment tal-livell xieraq ta’ standardizzazzjoni tal-informazzjoni li għandha tiġi rapportata. L-istandards tekniċi regolatorji jenħtieġ li ma jżidu ebda element li ma jkunx previst fid-Direttiva 2011/61/UE.

(28)

Sabiex jiġi standardizzat il-proċess ta’ rapportar superviżorju, il-Kummissjoni jenħtieġ li tingħata s-setgħa li tadotta standards tekniċi ta’ implimentazzjoni żviluppati mill-AETS fir-rigward tal-format, l-istandards tad-data u l-metodi u l-arranġamenti għar-rapportar mill-AIFMs. Il-Kummissjoni jenħtieġ li tadotta dawk l-istandards tekniċi ta’ implimentazzjoni, permezz ta’ atti ta’ implimentazzjoni skont l-Artikolu 291 tat-TFUE u f’konformità mal-Artikolu 15 tar-Regolament (UE) Nru 1095/2010.

(29)

Sabiex jiġi żgurat rispons aktar effettiv għall-pressjonijiet tal-likwidità fi żminijiet ta’ stress fis-suq u sabiex l-investituri jiġu protetti aħjar, jenħtieġ li jiġu stabbiliti regoli fid-Direttiva 2011/61/UE biex tiġi implimentata r-Rakkomandazzjoni tal-BERS tas-7 ta’ Diċembru 2017.

(30)

Sabiex l-AIFMs ta’ AIFs miftuħa stabbiliti fi kwalunkwe Stat Membru jkunu jistgħu jittrattaw il-pressjonijiet tat-tifdija taħt kundizzjonijiet ta’ stress fis-suq, jenħtieġ lil-AIFMs ikunu meħtieġa jagħżlu u jinkludu fl-AIF regoli jew strumenti ta’ inkorporazzjoni ta’ mill-inqas żewġ għodod għall-ġestjoni tal-likwidità mil-lista armonizzata stabbilita fl-Anness V, il-punti 2 sa 8, tad-Direttiva 2011/61/UE. B’deroga, fejn AIFM jimmaniġġa AIF li jkun awtorizzat bħala fond tas-suq monetarju f’konformità mar-Regolament (UE) 2017/1131 tal-Parlament Ewropew u tal-Kunsill (20), jenħtieġ li l-AIFM ikun jista’ jiddeċiedi li jagħżel għodda waħda biss għall-ġestjoni tal-likwidità minn dik il-lista. Dawk l-għodod għall-ġestjoni tal-likwidità jenħtieġ li jkunu xierqa għall-istrateġija ta’ investiment, il-profil tal-likwidità u l-politika ta’ tifdija tal-AIF. L-AIFMs jenħtieġ li jattivaw tali għodod għall-ġestjoni tal-likwidità fejn meħtieġ biex jissalvagwardjaw l-interessi tal-investituri tal-AIF. Barra minn hekk, l-AIFMs ta’ AIFs miftuħa jenħtieġ li dejjem ikollhom il-possibbiltà li jissospendu temporanjament is-sottoskrizzjonijiet, ix-xirjiet mill-ġdid u t-tifdijiet jew li jattivaw side pockets, f’ċirkostanzi eċċezzjonali u fejn ġustifikat b’kont meħud tal-interessi tal-investituri tal-AIF. Meta AIFM jieħu deċiżjoni li jissospendi s-sottoskrizzjonijiet, ix-xirjiet mill-ġdid u t-tifdijiet, huwa għandu mingħajr dewmien żejjed jinnotifika lill-awtoritajiet kompetenti tal-Istat Membru ta’ domiċilju tiegħu. Meta AIFM jiddeċiedi li jattiva jew jiddiżattiva side pockets, jenħtieġ li jinnotifika lill-awtoritajiet kompetenti tal-Istat Membru ta’ domiċilju tiegħu fi żmien raġonevoli qabel l-attivazzjoni jew id-diżattivazzjoni ta’ dik l-għodda għall-ġestjoni tal-likwidità. Jenħtieġ li AIFM jinnotifika wkoll lill-awtoritajiet kompetenti tal-Istat Membru ta’ domiċilju tiegħu meta jattiva jew jiddiżattiva kwalunkwe għodda oħra għall-ġestjoni tal-likwidità b’mod li ma jkunx parti mill-perkors normali tan--negozju kif previst fir-regoli tal-AIF jew fl-istrumenti tal-inkorporazzjoni. Dak jippermetti lill-awtoritajiet superviżorji jittrattaw aħjar it-tixrid potenzjali tat-tensjonijiet tal-likwidità fis-suq usa’.

(31)

B’mod partikolari, u biex tissaħħaħ il-protezzjoni tal-investituri, jenħtieġ li jiġi speċifikat li l-użu tat-tifdija in natura mhuwiex adatt għall-investituri fil-livell tal-konsumatur u għalhekk jenħtieġ li jiġi attivat biss biex jiġu ssodisfati t-talbiet ta’ tifdija ta’ investituri professjonali. Fl-istess ħin, jenħtieġ li jiġu indirizzati r-riskji ta’ inugwaljanza fit-trattament bejn investituri li jifdu u titolari ta’ unitajiet jew azzjonisti oħra.

(32)

Sabiex ikunu jistgħu jieħdu deċiżjoni dwar l-investiment f’konformità mal-ħtiġijiet tagħhom ta’ predispożizzjoni għar-riskju u l-likwidità, l-investituri jenħtieġ li jiġu informati dwar il-kundizzjonijiet għall-użu tal-għodod għall-ġestjoni tal-likwidità.

(33)

Sabiex tiġi żgurata armonizzazzjoni konsistenti fil-qasam tal-ġestjoni tar-riskju tal-likwidità mill-AIFMs ta’ fondi miftuħa u biex tiġi ffaċilitata l-konverġenza tas-suq u dik superviżorja, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-TFUE f’konformità mal-Artikoli 10 sa 14 tar-Regolament (UE) Nru 1095/2010 biex jiġu speċifikati l-karatteristiċi tal-għodod għall-ġestjoni tal-likwidità stabbiliti fl-Anness V tad-Direttiva 2011/61/UE, filwaqt li titqies kif xieraq id-diversità tal-istrateġiji ta’ investiment u tal-assi sottostanti tal-AIFs. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-AETS u jenħtieġ li ma jirrestrinġux il-kapaċità tal-AIFMs li jużaw kwalunkwe għodda xierqa għall-ġestjoni tal-likwidità għall-klassijiet ta’ assi, il-ġuriżdizzjonijiet u l-kundizzjonijiet tas-suq kollha. Sabiex jiġi żgurat livell uniformi ta’ protezzjoni tal-investituri fl-Unjoni, l-AETS jenħtieġ li tiżviluppa linji gwida dwar l-għażla u l-kalibrazzjoni tal-għodod għall-ġestjoni tal-likwidità mill-AIFMs. Dawk il-linji gwida jenħtieġ li jirrikonoxxu li r-responsabbiltà primarja għall-ġestjoni tar-riskju tal-likwidità tibqa’ f’idejn l-AIFMs.

(34)

Id-depożitarji jilgħabu rwol importanti fis-salvagwardja tal-interessi tal-investituri u jenħtieġ li jkunu jistgħu jwettqu dmirijiethom irrispettivament mit-tip ta’ kustodju li jkollu fil-kustodja tiegħu l-assi tal-AIFs. Għalhekk, meta jipprovdu servizzi ta’ kustodja lill-AIFs, huwa meħtieġ li fil-katina tal-kustodja jiġu inklużi d-depożitorji ċentrali tat-titoli (CSDs) sabiex jiġi żgurat li, fil-każijiet kollha, ikun hemm fluss ta’ informazzjoni stabbli bejn il-kustodju tal-assi tal-AIFs u d-depożitarju. Sabiex jiġi evitat xogħol żejjed, id-depożitarji jenħtieġ li ma jwettqux diliġenza dovuta ex ante meta jkollhom l-intenzjoni li jiddelegaw il-kustodja lis-CSDs.

(35)

Sabiex jittejbu l-kooperazzjoni u l-effettività superviżorji, l-awtoritajiet kompetenti tal-Istat Membru ospitanti ta’ AIFM jenħtieġ li jkunu jistgħu jindirizzaw talba motivata lill-awtoritajiet kompetenti tal-Istat Membru ta’ domiċilju ta’ dak l-AIFM tittieħed azzjoni superviżorja kontrih.

(36)

Sabiex tittejjeb il-kooperazzjoni superviżorja, l-AETS jenħtieġ li tkun tista’ titlob li awtorità kompetenti tippreżenta każ quddiem l-AETS, meta dak il-każ ikollu implikazzjonijiet transfruntieri u jaf jaffettwa l-protezzjoni tal-investituri jew l-istabbiltà finanzjarja. L-analiżijiet ta’ AETS ta’ każijiet bħal dawn jagħtu lill-awtoritajiet kompetenti l-oħra fehim aħjar tal-kwistjonijiet diskussi, jikkontribwixxu għall-prevenzjoni fil-futur ta’ każijiet simili u jipproteġu l-integrità tas-suq għall-AIFs.

(37)

Biex tappoġġa l-konverġenza superviżorja fil-qasam tad-delega, jenħtieġ li AETS tirċievi informazzjoni aktar kompluta dwar l-applikazzjoni ta’ din id-Direttiva, inkluż fil-qasam ta’ sorveljanza u kontroll xierqa tal-arranġamenti ta’ delega, fl-Istati Membri kollha. Għal dak il-għan, jenħtieġ li tibbaża fuq l-obbligi ta’ rapportar lill-awtoritajiet kompetenti u fuq l-eżerċizzju fil-qasam tad-delega tas-setgħat ta’ konverġenza superviżorja tagħha qabel ma jsiru r-rieżamijiet li jmiss tad-Direttivi 2009/65/KE u 2011/61/UE. AETS jenħtieġ li tipprovdi rapport li janalizza l-prattiki tas-suq rigward id-delega, u l-konformità mar-regoli dwar id-delega, kif ukoll ir-rekwiżiti ta’ sustanza bħal dawk relatati mar-riżorsi umani u tekniċi li l-AIFMs, il-kumpaniji tal-immaniġġar u d-delegati tagħhom jużaw għall-fini li jwettqu l-funzjonijiet tagħhom.

(38)

Ir-Regolament (UE) 2019/2088 tal-Parlament u tal-Kunsill (21) jistabbilixxi regoli armonizzati għall-parteċipanti fis-swieq finanzjarji u l-konsulenti finanzjarji dwar it-trasparenza fir-rigward tal-integrazzjoni tar-riskji għas-sostenibbiltà u l-kunsiderazzjoni ta’ impatti negattivi għas-sostenibbiltà fil-proċessi tagħhom u l-għoti ta’ informazzjoni relatata mas-sostenibbiltà fir-rigward tal-prodotti finanzjarji. Huwa importanti li jittieħed approċċ orizzontali għar-regoli ta’ trasparenza dwar is-sostenibbiltà għall-parteċipanti fis-swieq finanzjarji u l-konsulenti finanzjarji. L-AIFs u l-UCITS jistgħu jagħtu kontribut importanti għall-objettivi tal-unjoni tas-swieq kapitali. It-tkabbir tas-suq għall-AIFs u l-UCITS jeħtieġ ukoll li jkun konsistenti ma’ objettivi oħra tal-Unjoni u għalhekk jenħtieġ li jiġi dirett lejn il-promozzjoni tat-tkabbir sostenibbli. Jenħtieġ li l-AIFMs u l-kumpaniji tal-immaniġġar tal-UCITS ikunu jistgħu juru li jikkonformaw fuq bażi kontinwa mal-obbligi tagħhom skont ir-Regolament (UE) 2019/2088. Konsegwentement, jenħtieġ li l-AIFMs u l-kumpaniji tal-immaniġġar tal-UCITS jintegraw parametri ambjentali, soċjali u ta’ governanza (ESG) fir-regoli ta’ governanza u ta’ ġestjoni tar-riskju użati biex jappoġġaw id-deċiżjonijiet ta’ investiment tagħhom. Jenħtieġ li l-AIFMs u l-kumpaniji tal-immaniġġar tal-UCITS japplikaw ukoll regoli ta’ governanza u ta’ ġestjoni tar-riskju għad-deċiżjonijiet ta’ investiment tagħhom u għall-vaazzjoni tagħhom tar-riskji rilevanti, inklużi r-riskji ambjentali, soċjali u ta’ governanza. Dan huwa saħansitra aktar importanti meta l-AIFMs u l-kumpaniji tal-immaniġġar l-UCITS jagħmlu pretensjonijiet fir-rigward tal-politiki ta’ investiment sostenibbli tal-AIFs u l-UCITS li huma jimmaniġġaw. Dawk id-deċiżjonijiet ta’ investiment u l-valutazzjonijiet tar-riskju jenħtieġ li jsiru fl-aħjar interessi tal-investituri tal-AIFs u tal-UCITS. Jenħtieġ li l-AETS taġġorna l-linji gwida tagħha dwar il-linji politiċi ta’ remunerazzjoni sodi skont id-Direttivi 2011/61/UE u 2009/65/KE fir-rigward tal-allinjament tal-inċentivi mar-riskji ambjentali, soċjali u ta’ governanza fil-politiki ta’ remunerazzjoni.

(39)

Il-kummerċjalizzazzjoni tal-UCITS mhux dejjem titwettaq direttament mill-kumpanija tal-immaniġġar iżda minn distributur wieħed jew diversi f’isem il-kumpanija tal-immaniġġar jew f’isimhom stess. B’mod partikolari, jista’ jkun hemm ukoll każijiet fejn konsulent finanzjarju indipendenti jikkummerċjalizza UCITS mingħajr ma l-kumpanija tal-immaniġġar tkun tafb’dan. Il-biċċa l-kbira tad-distributuri tal-fondi huma soġġetti għal rekwiżiti regolatorji skont id-Direttiva 2014/65/UE jew (UE) 2016/97, li jiddefinixxu l-ambitu u l-firxa tar-responsabbiltajiet tagħhom lejn il-klijenti tagħhom stess. Għalhekk, jenħtieġ li d-Direttiva 2009/65/KE tirrikonoxxi d-diversità tal-arranġamenti ta’ distribuzzjoni u tiddistingwi bejn, fuq naħa, arranġamenti li bihom distributur jaġixxi f’isem il-kumpanija tal-immaniġġar, li jenħtieġ li jitqiesu bħala arranġamenti ta’ delega, u fuq in-naħa l-oħra, arranġamenti li bihom distributur jaġixxi f’ismu stess meta jikkumerċjalizza l-UCITS skont id-Direttiva 2014/65/UE jew permezz ta’ prodotti ta’ investiment ibbażati fuq assigurazzjoni tal-ħajja f’konformità mad-Direttiva (UE) 2016/97, fejn f’dan il-każ id-dispożizzjonijiet tad-Direttiva 2009/65/KE rigward iddelega jenħtieġ li ma japplikawx, irrispettivament minn kwalunkwe ftehim ta’ distribuzzjoni bejn il-kumpanija tal-immaniġġar u d-distributur.

(40)

Xi swieq ikkonċentrati ma għandhomx provvista kompetittiva ta’ servizzi tad-depożitarji. Sabiex jiġi indirizzat dak in-nuqqas, li jista’ jwassal għal spejjeż akbar għall-AIFMs u suq anqas effiċjenti għall-AIFs, jenħtieġ li l-Istati Membri jkunu jistgħu jippermettu lill-awtoritajiet kompetenti tagħhom jaħtru depożitarju stabbilit fi Stat Membru ieħor. Dik il-possibbiltà jenħtieġ li tintuża biss meta jiġu ssodisfati l-kundizzjonijiet stabbiliti f’din id-Direttiva u bl-approvazzjoni minn qabel tal-awtoritajiet kompetenti tal-AIF. Peress li d-deċiżjoni li tippermetti l-ħatra ta’ depożitarju stabbilit fi Stat Membru ieħor jenħtieġ li tkunx awtomatika, anke meta dawk il-kundizzjonijiet jiġu ssodisfati, jenħtieġ li l-awtoritajiet kompetenti jieħdu dik id-deċiżjoni biss wara li jwettqu valutazzjoni każ b’każ tan-nuqqas ta’ servizzi depożitarji rilevanti fl-Istat Membru ta’ domiċilju tal-AIF b’kont meħud tal-istrateġija ta’ investiment ta’ dak l-AIF.

(41)

Bħala parti mir-rieżami tad-Direttiva 2011/61/UE, jenħtieġ li l-Kummissjoni twettaq valutazzjoni tal-funzjonament tad-deroga li tippermetti l-ħatra ta’ depożitarju stabbilit fi Stat Membru ieħor u tal-benefiċċji u r-riskji potenzjali, inkluż l-impatt fuq il-protezzjoni tal-investituri, fuq l-istabbiltà finanzjarja, fuq l-effiċjenza superviżorja u fuq id-disponibbiltà tal-għażliet tas-suq, tal-emendar tal-kamp ta’ applikazzjoni ta’ dik id-deroga f’konformità mal-objettivi tal-unjoni tas-swieq kapitali;

(42)

Il-possibbiltà li jinħatar depożitarju stabbilit fi Stat Membru ieħor jenħtieġ li tkun akkumpanjata minn żieda fil-livell superviżorju. Għalhekk, id-depożitarju jenħtieġ li jkun meħtieġ jikkoopera mhux biss mal-awtoritajiet kompetenti tiegħu iżda wkoll mal-awtoritajiet kompetenti tal-AIF li għalih ikun inħatar id-depożitarju u l-awtoritajiet kompetenti tal-Istat Membru ta’ domiċilju tal-AIFM li jimmaniġġa l-AIF, jekk dawk l-awtoritajiet kompetenti jkunu jinsabu fi Stat Membru differenti minn dak tad-depożitarju.

(43)

Sabiex l-investituri jiġu protetti aħjar, il-fluss tal-informazzjoni mill-AIFMs għall-investituri tal-AIF jenħtieġ li jiżdied. Biex l-investituri tal-AIFs ikunu permessi jittraċċaw aħjar l-ispejjeż tal-AIF, l-AIFMs jenħtieġ li jidentifikaw tariffi, imposti u spejjeż li jiġġarrbu mill-AIFM u li sussegwentement jiġu allokati direttament jew indirettament lill-AIF jew lil kwalunkwe wieħed mill-investimenti tiegħu. Jenħtieġ li L-AIFMs jirrapportaw perjodikament dwar tali tariffi, imposti u spejjeż. Jenħtieġ li l-AIFMs ikunu meħtieġa wkoll jirrapportaw lill-investituri dwar il-kompożizzjoni tal-portafoll ta’ self oriġinat.

(44)

Sabiex tiżdied it-trasparenza tas-suq u tintuża b’mod effettiv id-data disponibbli tas-suq tal-AIF, l-AETS jenħtieġ li titħalla tiżvela d-data tas-suq għad-dispożizzjoni tagħha f’forma aggregata jew fil-qosor u l-istandard ta’ kunfidenzjalità jenħtieġ li għalhekk jiġi llaxkat biex jiġi permess tali użu tad-data.

(45)

Ir-rekwiżiti għal entitajiet ta’ pajjiżi terzi b’aċċess għas-suq intern jenħtieġ li jiġu allinjati mal-istandards stabbiliti fid-Direttiva (UE) 2015/849 tal-Parlament Ewropew u tal-Kunsill (22). Jenħtieġ li jiġu allinjati wkoll mal-istandards stabbiliti fl-azzjoni komuni meħuda mill-Istati Membri fir-rigward ta’ ġuriżdizzjonijiet li ma jikkooperawx għal finijiet ta’ taxxa, riflessi fil-konklużjonijiet tal-Kunsill dwar il-lista riveduta tal-UE ta’ ġuriżdizzjonijiet li ma jikkooperawx għal finijiet ta’ taxxa. B’mod partikolari, l-AIFs mhux tal-UE, l-AIFMs mhux tal-UE li huma attivi fi Stati Membri individwali u depożitarji stabbiliti f’pajjiż terz jenħtieġ li ma jkunux jinsabu f’pajjiż terz b’riskju għoli skont id-Direttiva (UE) 2015/849, u lanqas f’pajjiż terz li jitqies bħala mhux kooperattiv fi kwistjonijiet fiskali, soġġett f’ċerti każijiet għal perjodu ta’ grazzja fejn pajjiż aktar tard jiġi identifikat bħala pajjiż terz b’riskju għoli skont dik id-Direttiva jew jiżdied mal-lista tal-UE ta’ ġuriżdizzjonijiet li ma jikkooperawx għal finijiet ta’ taxxa. Jenħtieġ li r-rekwiżiti jiżguraw ukoll l-iskambju xieraq u effettiv ta’ informazzjoni fi kwistjonijiet tat-taxxa f’konformità mal-istandards internazzjonali bħal dawk stabbiliti fl-Artikolu 26 tal-Mudell ta’ Konvenzjoni dwar it-Taxxa tal-OECD fuq id-Dħul u l-Kapital.

(46)

Għall-kumpaniji tal-immaniġġar tal-UCITS, id-Direttiva 2009/65/KE jenħtieġ li tiżgura li l-kundizzjonijiet ikunu komparabbli ma’ dawk tal-AIFMs meta ma jkun hemm l-ebda raġuni li jinżammu differenzi regolatorji għall-UCITS u l-AIFMs. Dak ikun il-każ għar-reġim ta’ delega, it-trattament regolatorju tal-kustodji, ir-rekwiżiti ta’ rapportar superviżorju, u d-disponibbiltà u l-użu ta’ għodod għall-ġestjoni tal-likwidità.

(47)

Sabiex tiġi żgurata l-applikazzjoni uniformi tar-rekwiżiti ta’ sustanza għall-kumpaniji tal-immaniġġar tal-UCITS, jenħtieġ li jiġi ċċarat li fiż-żmien tal-applikazzjoni għal awtorizzazzjoni, jenħtieġ li kumpanija tal-immaniġġar tipprovdi lill-awtoritajiet kompetenti b’informazzjoni dwar ir-riżorsi umani u tekniċi li tuża biex twettaq il-funzjonijiet tagħha, u fejn applikabbli, tissorvelja lid-delegati tagħha. Jenħtieġ li tal-anqas żewġ persuni fiżiċi li, fuq bażi full-time, jew ikunu impjegati mill-kumpanija immaniġġar jew ikunu membri eżekuttivi jew membri tal-korp ta’ tmexxija tal-kumpanija tal-immaniġġar, u li jkunu domiċiljati, fis-sens li jkollhom ir-residenza abitwali tagħhom, fl-Unjoni, jenħtieġ li jinħatru biex iwettqu n-negozju tal-kumpanija tal-immaniġġar. Irrispettivament minn dan il-minimu statutorju, jaf ikunu meħtieġa aktar riżorsi skont id-daqs u l-kumplessità tal-kumpanija tal-immaniġġar u l-UCITS li jimmaniġġa.

(48)

Sabiex jiġu allinjati l-oqfsa legali tad-Direttivi 2009/65/KE u 2011/61/UE fir-rigward tad-delega, jenħtieġ li jkun meħtieġ li l-kumpaniji tal-immaniġġar tal-UCITS jiġġustifikaw lill-awtoritajiet kompetenti d-delega tal-funzjonijiet tagħhom u jipprovdu raġunijiet oġġettivi għad-delega.

(49)

Delega tista’ tippermetti l-ġestjoni effiċjenti tal-portafolli ta’ investiment u l-akkwist tal-għarfien espert meħtieġ f’suq ġeografiku jew klassi tal-assi partikolari. Madankollu, huwa importanti li s-superviżuri jkollhom informazzjoni aġġornata dwar l-elementi ewlenin tal-arranġamenti ta’ delega. Biex tiġi żviluppata ħarsa ġenerali affidabbli tal-attivitajiet ta’ delega fl-Unjoni, jenħtieġ li l-kumpaniji tal-immaniġġarjipprovdu regolarment lill-awtoritajiet kompetenti b’informazzjoni dwar l-arranġamenti ta’ delega li jinvolvu d-delega tal-funzjonijiet tal-immaniġġar tal-portafoll kollettivi jew diskrezzjonarji jew tal-ġestjoni tar-riskju. Għalhekk, jenħtieġ li l-kumpaniji tal-immaniġġar, fir-rigward ta’ kull UCITS li jimmaniġġaw, jirrapportaw informazzjoni dwar id-delegati, lista u deskrizzjoni tal-attivitajiet ta’ delega, l-ammont u l-perċentwal tal-assi tal-UCITS immaniġġati li huma soġġetti għal arranġamenti ta’ delega li jikkonċernaw il-funzjoni tal-immaniġġar tal-portafoll, deskrizzjoni ta’ kif il-kumpanija tal-immaniġġar tissorvelja, timmonitorja u tikkontrolla d-delegat, informazzjoni dwar l-arranġamenti ta’ sottodelega u d-data tal-bidu u l-iskadenza tal-arranġamenti ta’ delega u sottodelega. Għal raġunijiet ta’ ċarezza, jenħtieġ li jiġi speċifikat li d-data miġbura dwar l-ammont u l-perċentwal tal-assi tal-UCITS immaniġġati li huma soġġetti għal arranġamenti ta’ delega rigward il-funzjonijiet tal-immaniġġar tal-portafoll tkun għall-finijiet li tingħata ħarsa ġenerali akbar tal-operat tad-delega, u waħedha mhijiex indikatur evidenzjali għad-determinazzjoni tal-adegwatezza għall-arranġamenti tal-ġestjoni tas-sustanza jew tar-riskju, jew l-effettività tal-arranġamenti ta’ sorveljanza jew kontroll fil-livell tal-maniġer. Jenħtieġ li tali informazzjoni tiġi kkomunikata lill-awtoritajiet kompetenti bħala parti mir-reġim ta’ rapportar superviżorju rregolat bid-Direttiva 2009/65/KE.

(50)

Sabiex tiġi żgurata applikazzjoni uniformi tad-Direttiva 2009/65/KE, jenħtieġ li jiġi ċċarat li r-regoli tad-delega stabbiliti fiha japplikaw għall-funzjonijiet kollha elenkati fl-Anness II għal dik id-Direttiva u għas-servizzi anċillari stipulati fl-Artikolu 6(3) ta’ dik id-Direttiva.

(51)

Sabiex jiġu allinjati aktar ir-regoli dwar id-delega applikabbli għall-AIFMs u l-UCITS u sabiex tinkiseb applikazzjoni aktar uniformi tad-Direttivi 2011/61/UE u 2009/65/KE, jenħtieġ li tiġi ddelegata lill-Kummissjoni s-setgħa li tadotta atti skont l-Artikolu 290 tat-TFUE fir-rigward tal-ispeċifikazzjoni tal-kundizzjonijiet għad-delega minn kumpanija tal-immaniġġar tal-UCITS lil parti terza, u l-kundizzjonijiet li taħthom kumpanija tal-immaniġġar tal-UCITS tista’ titqies bħala entità kaxxa tal-ittri u b’hekk ma tkunx tista’ tibqa’ titqies bħala l-maniġer tal-UCITS. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell tal-esperti, u li dawk il-konsultazzjonijiet jiġu mwetttqa f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (23). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi ta’ esperti tal-Kummissjoni li jittrattaw it-tħejjija ta’ atti delegati.

(52)

Jenħtieġ li din id-Direttiva timplimenta r-Rakkomandazzjoni tal-BERS tas-7 ta’ Diċembru 2017 biex jiġu armonizzati l-għodod għall-ġestjoni tal-likwidità u l-użu tagħhom mill-maniġers ta’ fondi miftuħa, li jinkludu l-UCITS, biex jiġi permess rispons aktar effettiv għall-pressjonijiet tal-likwidità fi żminijiet ta’ stress fis-suq u protezzjoni aħjar tal-investituri.

(53)

Sabiex il-UCITS stabbiliti fi kwalunkwe Stat Membru jkunu jistgħu jittrattaw il-pressjonijiet tat-tifdija taħt kundizzjonijiet ta’ stress fis-suq, jenħtieġ li jkunu meħtieġa jagħżlu u jinkludu fir-regoli jew l-istrumenti ta’ inkorporazzjoni tagħhom mill-inqas żewġ għodod għall-ġestjoni tal-likwidità mil-lista armonizzata stabbilita fl-Anness IIA, il-punti 2 sa 8, għad-Direttiva 2009/65/KE. B’deroga, UCITS li jkun awtorizzat bħala fond tas-suq monetarju f’konformità mar-Regolament (UE) 2017/1131 jenħtieġ li l jkun jista’ jiddeċiedi li jagħżel għodda waħda biss għall-ġestjoni tal-likwidità minn dik il-lista. Dawk l-għodod għall-ġestjoni tal-likwidità jenħtieġ li jkunu xierqa għall-istrateġija ta’ investiment, il-profil tal-likwidità u l-politika ta’ tifdija tal-UCITS. Il-UTICS jenħtieġ li jattivaw tali għodod għall-ġestjoni tal-likwidità fejn meħtieġ biex jissalvagwardjaw l-interessi tal-investituri tal-UCITS. Barra minn hekk, jenħtieġ li l-UCITS dejjem ikollhom il-possibbiltà li jissospendu temporanjament is-sottoskrizzjonijiet, ix-xirjiet mill-ġdid u t-tifdijiet jew li jattivaw side pockets, f’ċirkostanzi eċċezzjonali u fejn ġustifikat jitqiesu l-interessi tal-investituri tal-UCITS. Meta UCITS tieħu deċiżjoni li tissospendi sottoskrizzjonijiet, xirjiet mill-ġdid u tifdijiet, jenħtieġ li mingħajr dewmien żejjed tinnotifika lill-awtoritajiet kompetenti tal-Istat Membru ta’ domiċilju tagħha. Meta UCITS tiddeċiedi li tattiva jew tiddiżattiva side pockets, jenħtieġ li tinnotifika lill-awtoritajiet kompetenti tal-Istat Membru ta’ domiċilju tagħha f’qafas ta’ żmien raġonevoli qabel l-attivazzjoni jew id-diżattivazzjoni ta’ dik l-għodda għall-ġestjoni tal-likwidità. Jenħtieġ li UCITS tinnotifika wkoll lill-awtoritajiet kompetenti tal-Istat Membru ta’ domiċilju tagħha meta tattiva jew tiddiżattiva kwalunkwe għodda oħra għall-ġestjoni tal-likwidità b’mod li ma jkunx parti min-negozju kif previst fir-regoli tal-fond jew fl-istrumenti tal-inkorporazzjoni tal-UCITS. Dak jippermetti lill-awtoritajiet superviżorji jittrattaw aħjar it-tixrid potenzjali tat-tensjonijiet tal-likwidità fis-suq usa’.

(54)

B’mod partikolari, u biex tissaħħaħ il-protezzjoni tal-investituri, jenħtieġ li jiġi speċifikat li l-użu tat-tifdija in natura mhuwiex adatt għall-investituri fil-livell tal-konsumatur u għalhekk jenħtieġ li jiġi attivat biss biex jiġu ssodisfati t-talbiet ta’ tifdija ta’ investituri professjonali. Fl-istess ħin, jenħtieġ li jiġu indirizzati r-riskji ta’ inugwaljanza fit-trattament bejn investituri li jifdu u titolari ta’ unitajiet jew azzjonisti oħra.

(55)

Sabiex ikunu jistgħu jieħdu deċiżjoni dwar l-investiment f’konformità mal-ħtiġijiet tagħhom ta’ predispożizzjoni għar-riskju u l-likwidità, l-investituri tal-UCITS jenħtieġ li jiġu informati dwar il-kundizzjonijiet għall-użu tal-għodod għall-ġestjoni tal-likwidità.

(56)

Sabiex tiġi żgurata armonizzazzjoni konsistenti fil-qasam tal-ġestjoni tar-riskju tal-likwidità mill-UCITS u biex tiġi ffaċilitata l-konverġenza tas-suq u dik superviżorja, jenħtieġ li l-Kummissjoni tingħata s-setgħa li tadotta standards tekniċi regolatorji permezz ta’ atti delegati skont l-Artikolu 290 TFUE f’konformità mal-Artikoli 10 sa 14 tar-Regolament (UE) Nru 1095/2010 sabiex jiġu speċifikati l-karatteristiċi tal-għodod għall-ġestjoni tal-likwidità stabbiliti fl-Anness IIA għad-Direttiva 2009/65/KE, filwaqt li titqies kif xieraq id-diversità tal-istrateġiji ta’ investiment u tal-assi sottostanti tal-UCITS. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-AETS u jenħtieġ li ma jirrestrinġux il-kapaċità tal-UCITS li jużaw kwalunkwe għodda xierqa għall-ġestjoni tal-likwidità għall-klassijiet ta’ assi, il-ġuriżdizzjonijiet u l-kundizzjonijiet tas-suq kollha. Sabiex jiġi żgurat livell uniformi ta’ protezzjoni tal-investituri fl-Unjoni, l-AETS jenħtieġ li tiżviluppa linji gwida dwar l-għażla u l-kalibrazzjoni tal-għodod għall-ġestjoni tal-likwidità mill-kumpaniji tal-immaniġġar. Jenħtieġ li dawk il-linji gwida jirrikonoxxu li r-responsabbiltà primarja għall-ġestjoni tar-riskju tal-likwidità tibqa’ f’idejn l-UCITS.

(57)

Sabiex jiġi appoġġat il-monitoraġġ tas-suq mill-awtoritajiet superviżorji, jenħtieġ li l-ġbir u l-kondiviżjoni tal-informazzjoni permezz ta’ rapportar superviżorju jittejbu billi l-UCITS tiġi soġġetta għall-obbligi ta’ rapportar superviżorju. Rekwiżiti ta’ rapportar duplikati li jeżistu skont il-liġi tal-Unjoni u dik nazzjonali, b’mod partikolari r-Regolamenti (UE) Nru 600/2014 u (UE) 2019/834 u r-Regolamenti (UE) Nru 1011/2012 u (UE) Nru 1073/2013, jistgħu jiġu eliminati biex tittejjeb l-effiċjenza u jitnaqqsu l-piżijiet amministrattivi għall-kumpaniji tal-immaniġġar. Jenħtieġ li l-ASE u BĊE, bl-appoġġ tal-awtoritajiet kompetenti, fejn ikun meħtieġ, jivvalutaw il-ħtiġijiet tad-data tal-awtoritajiet superviżorji differenti, sabiex jiġi żgurat li l-informazzjoni li għandha tiġi rrapportata skont il-mudell tar-rapportar superviżorju għall-UCITS tkun suffiċjenti.

(58)

Sabiex jitnaqqsu r-rapportar doppju u l-piżijiet ta’ rapportar relatati għall-UCITS u biex jiġi żgurat użu mill-ġdid effiċjenti tad-data mill-awtoritajiet, id-data rapportata mill-UCITS lill-awtoritajiet kompetenti jenħtieġ li tkun disponibbli għal awtoritajiet kompetenti rilevanti oħra, l-AETS, l-ASE oħrajn u l-BERS, kull meta jkun meħtieġ għall-fini tat-twettiq ta’ dmirijiethom, kif ukoll għall-membri tas-SEBĊ għal finijiet statistiċi biss.

(59)

Sabiex tiġi żgurata l-armonizzazzjoni konsistenti tal-obbligi ta’ rapportar superviżorju, jenħtieġ li tiġi ddelegata lill-Kummissjoni s-setgħa li tadotta standards tekniċi regolatorji permezz ta’ atti delegati skont l-Artikolu 290 tat-TFUE f’konformità mal-Artikoli 10 sa 14 u l-Artikolu 15 tar-Regolament (UE) Nru 1095/2010 biex jiġu stabbiliti l-kontenut, il-formoli u l-proċeduri biex jiġi standardizzat il-proċess ta’ rapportar superviżorju mill-kumpaniji tal-immaniġġar, kif ukoll il-frekwenza tar-rapportar u meta għandu jsir. Fir-rigward tal-informazzjoni li għandha tiġi rapportata dwar l-arranġamenti ta’ delega, l-istandards tekniċi regolatorji jenħtieġ li jibqgħu limitati għall-istabbiliment tal-livell xieraq ta’ standardizzazzjoni tal-informazzjoni li għandha tiġi rapportata. Dawk l-istandards tekniċi regolatorji jenħtieġ li jiġu adottati abbażi ta’ abbozz żviluppat mill-AETS. L-istandards tekniċi regolatorji jenħtieġ li ma jżidu ebda element li ma jkunx previsti fid-Direttiva 2009/65/KE.

(60)

Sabiex jiġi standardizzat il-proċess ta’ rapportar superviżorju, il-Kummissjoni jenħtieġ li tingħata s-setgħa li tadotta standards tekniċi ta’ implimentazzjoni żviluppati mill-AETS fir-rigward tal-format, l-istandards tad-data u l-metodi u l-arranġamenti għar-rapportar mill-kumpaniji tal-immaniġġar. Il-Kummissjoni jenħtieġ li tadotta dawk l-istandards tekniċi ta’ implimentazzjoni, permezz ta’ atti ta’ implimentazzjoni skont l-Artikolu 291 tat-TFUE u f’konformità mal-Artikolu 15 tar-Regolament (UE) Nru 1095/2010.

(61)

Sabiex tiġi żgurata l-protezzjoni tal-investituri, u b’mod partikolari biex jiġi żgurat li fil-każijiet kollha jkun hemm fluss stabbli ta’ informazzjoni bejn il-kustodju tal-assi tal-UCITS u d-depożitarju, ir-reġim tad-depożitarju jenħtieġ li jiġi estiż biex jinkludi lis-CSDs fil-katina tal-kustodja meta jipprovdu servizzi ta’ kustodja lill-UCITS. Sabiex jiġi evitat xogħol żejjed, id-depożitarji jenħtieġ li ma jwettqux diliġenza dovuta ex ante meta jkollhom l-intenzjoni li jiddelegaw il-kustodja lis-CSDs.

(62)

Sabiex jittejbu l-kooperazzjoni u l-effettività superviżorji, l-awtoritajiet kompetenti tal-Istat Membru ospitanti tal-UCITS jenħtieġ li jkunu jistgħu jindirizzaw talba motivata lill-awtorità kompetenti tal-Istat Membru domiċiljari tal-UCITS biex tieħu azzjoni superviżorja kontra dik il-UCITS.

(63)

Sabiex tittejjeb il-kooperazzjoni superviżorja, l-AETS jenħtieġ li tkun tista’ titlob li awtorità kompetenti tippreżenta każ quddiem l-AETS, meta dak il-każ ikollu implikazzjonijiet transfruntieri u jaf jaffettwa l-protezzjoni tal-investituri jew l-istabbiltà finanzjarja. L-analiżijiet tal-AETS ta’ każijiet bħal dawn jagħtu lill-awtoritajiet kompetenti oħra fehim aħjar tal-kwistjonijiet diskussi, jikkontribwixxu biex fil-futur issir prevenzjoni ta’ każijiet simili u biex l-integrità tas-suq tal-UCITS tiġi protetta.

(64)

Minkejja r-regoli ta’ segretezza applikabbli fil-preżent, jenħtieġ li l-iskambji ta’ informazzjoni bejn l-awtoritajiet kompetenti u l-awtoritajiet tat-taxxa jittejjeb. Jenħtieġ li tali skambji jkunu konformi mal-liġi nazzjonali, u, meta l-informazzjoni toriġina fi Stat Membru ieħor, jenħtieġ li tiġi żvelata biss bil-qbil espliċitu tal-awtorità kompetenti li tkun żvelatha.

(65)

Id-Direttivi 2011/61/UE u 2009/65/KE jirrikjedu li l-AIFMs u l-kumpaniji tal-immaniġġar tal-UCITS jaġixxu b’ħila, attenzjoni u diliġenza xierqa fl-aħjar interessi tal-fondi ta’ investiment li jimmaniġġjaw u tal-investituri tagħhom. Għalhekk, jenħtieġ li l-Istati Membri jirrikjedu li AIFMs u l-kumpaniji tal-immaniġġar tal-UCITS jaġixxu b’mod onest u ġust fir-rigward tat-tariffi u l-ispejjeż imposti fuq l-investituri. Fl-2020, l-AETS żviluppat briefing superviżorju biex tippromwovi l-konverġenza dwar is-superviżjoni tal-kostijiet fl-AIFs u fil-UCITS u biex tiżviluppa sett ta’ kriterji biex tappoġġa lill-awtoritajiet kompetenti fil-valutazzjoni tal-kunċett ta’ kostijiet eċċessivi u fis-superviżjoni tal-obbligu tal-prevenzjoni ta’ kostijiet eċċessivi imposti fuq l-investituri. Dawk il-kriterji huma maħsuba biex jipprovdu gwida lill-awtoritajiet kompetenti, filwaqt li jippromwovu l-konverġenza superviżorja fil-kuntest tal-unjoni tas-swieq kapitali. Madankollu, minħabba nuqqas ta’ definizzjoni ċara ta’ kostijiet eċċessivi, fil-preżent, jeżistu prattiki tas-suq u superviżorji diverġenti dwar dak li l-industrija u s-superviżuri jikkunsidraw bħala kostijiet eċċessivi, u l-evidenza wriet disparità fil-kostijiet imposti fi Stati Membri differenti u fil-kostijiet imposti fuq l-investituri fil-livell tal-konsumatur meta mqabbla mal-investituri professjonali. L-emendi proposti għad-Direttivi 2011/61/UE u 2009/65/KE, fil-kuntest tal-istrateġija ta’ investiment fil-livell tal-konsumatur tal-Unjoni, għandhom l-għan li jindirizzaw dik il-kwistjoni, billi jirrikjedu li l-maniġers tal-fondi jistabbilixxu proċess ta’ pprezzar sod, li jenħtieġ li jinkludi l-identifikazzjoni, l-analiżi u r-rieżami tal-kostijiet imposti, direttament jew indirettament, fuq il-fondi ta’ investiment jew lit-titolari tal-unitajiet tagħhom, u billi jintroduċu rekwiżit biex jikkumpensaw lill-investituri meta jkunu ġew imposti kostijiet eċċessivi. Jenħtieġ li l-AETS tippreżenta rapport lill-Parlament Ewropew, lill-Kunsill u lill-Kummissjoni li jivvaluta l-livell tal-kostijiet imposti fuq l-investituri fil-livell tal-konsumatur, ir-raġunijiet għalihom u d-differenzi bejniethom u inklużi d-differenzi li jirriżultaw min-natura tal-AIFs u l-UCITS ikkonċernati, u li janalizza jekk il-kriterji stabbiliti fil-briefing superviżorju tagħha għandhomx jiġu kkomplementati fir-rigward tal-kunċett ta’ kostijiet eċċessivi. Sabiex jappoġġaw lill-awtoritajiet kompetenti fis-superviżjoni tal-kostijiet, u lill-AETS fl-analiżi tagħha ta’ kwistjonijiet relatati mal-kostijiet, jenħtieġ li l-awtoritajiet kompetenti jiġbru data dwar il-kostijiet li għandha tiġi kondiviża mal-AETS fuq bażi ta’ darba. Dak il-ġbir tad-data jżid l-għarfien espert tal-AETS fil-qasam tar-rapportar tal-kostijiet bil-ħsieb li tipprovdi lill-Parlament Ewropew, lill-Kunsill, lill-Kummissjoni u lill-awtoritajiet kompetenti b’pariri tekniċi dwar il-ġbir tad-data tal-kostijiet fil-kuntest tal-istrateġija ta’ investiment fil-livell tal-konsumatur tal-Unjoni. Abbażi ta’ dak ir-rapport, l-AETS jenħtieġ li twettaq attivitajiet skont l-Artikolu 29 tar-Regolament (UE) Nru 1095/2010 biex tgħin fl-iżvilupp ta’ fehim komuni tal-kunċett ta’ kostijiet eċċessivi.

(66)

L-isem ta’ AIF u ta’ UCITS huwa element distintiv li jinfluwenza l-għażliet tal-investituri u jagħti l-ewwel impressjoni tal-istrateġija u l-objettivi tal-investiment tal-fond. Għalkemm l-isem ta’ AIF u ta’ UCITS diġà jifforma parti mill-informazzjoni prekuntrattwali pprovduta lill-investituri, huwa utli li tiġi ssottolinjata l-importanza tal-isem billi jiġi enfasizzat b’mod speċifiku li dan jikkostitwixxi informazzjoni prekuntrattwali essenzjali fit-tagħrif u l-prospett ewlenin għall-investituri li jenħtieġ li jiġu pprovduti lill-investituri fil-livell tal-konsumatur qabel ma jinvestu f’dak l-AIF lill-investituri qabel ma jinvestu f’dik il-UCITS. F’konformità mad-Direttiva (UE) 2021/2261 tal-Parlament Ewropew u tal-Kunsill (24), mill-1 ta’ Jannar 2023, il-UCITS ikkummerċjalizzati lil investituri fil-livell tal-konsumatur huma soġġetti għar-rekwiżiti tar-Regolament (UE) Nru 1286/2014 tal-Parlament Ewropew u tal-Kunsill (25). Minn dik id-data, l-obbligu ta’ kumpanija tal-immaniġġar tal-UCITS jew kumpanija ta’ investiment li tħejji dokument bit-tagħrif ewlieni għall-investitur ġie sostitwit bl-obbligu li jitħejja dokument bit-tagħrif ewlieni f’konformità mar-Regolament (UE) Nru 1286/2014. Barra minn hekk, l-AIFMs li jimmaniġġaw l-AIFs li huma kkummerċjalizzati lil investituri fil-livell tal-konsumatur huma soġġetti wkoll għar-rekwiżiti ta’ dak ir-Regolament. Għaldaqstant, meta l-AIFs u l-UCITS jiġu kkummerċjalizzati lill-investituri fil-livell tal-konsumatur, l-AIFMs u l-UCITS huma meħtieġa jinkludu fid-dokument bit-tagħrif ewlieni l-isem tal-fond u jiżguraw li tali informazzjoni tkun preċiża, ġusta u ċara u ma twassalx messaġġ qarrieqi jew li joħloq konfużjoni li jħajjar lill-investituri b’mod falz. Għalhekk, huwa essenzjali li jiġi enfasizzat li l-isem ta’ AIF jew ta’ UCITS jitqies importanti bħal kwalunkwe dokument prekuntrattwali ieħor u jkun soġġett għal standards ugwali ta’ ekwità u trasparenza. Sabiex jiġi żgurat livell għoli u uniformi ta’ protezzjoni tal-investituri fl-Unjoni, jenħtieġ li l-AETS tiżviluppa linji gwida biex tispeċifika sitwazzjonijiet fejn l-isem ta’ AIF jew UCITS jista’ jkun inġust, mhux ċar jew qarrieqi għall-investitur. Il-leġiżlazzjoni settorjali li tistabbilixxi standards għall-ismijiet tal-fondi jew il-kummerċjalizzazzjoni tal-fondi tieħu preċedenza fuq dawk il-linji gwida.

(67)

Fit-twettiq tal-funzjonijiet tagħha skont id-Direttivi 2009/65/KE u 2011/61/UE, l-AETS jenħtieġ li ssegwi approċċ ibbażat fuq ir-riskju,

(68)

Fid-9 ta’ Awwissu 2022, il-BĊE ta opinjoni (26),

(1)

l-Artikolu 4(1) huwa emendat kif ġej:

(2)

l-Artikolu 6 huwa emendat kif ġej:

(3)

l-Artikolu 7 huwa emendat kif ġej:

(4)

fl-Artikolu 8(1), il-punt (c) huwa sostitwit b’dan li ġej:

(5)

fl-Artikolu 12, jiżdied il-paragrafu li ġej:

(6)

fl-Artikolu 14, jiddaħħal il-paragrafu li ġej:

(7)

l-Artikolu 15 huwa emendat kif ġej:

(8)

fl-Artikolu 16, jiddaħħlu l-paragrafi li ġejjin:

(*11)  Ir-Regolament (UE) 2017/1131 tal-Parlament Ewropew u tal-Kunsill tal-14 ta’ Ġunju 2017 dwar il-fondi tas-suq monetarju (ĠU L 169, 30.6.2017, p. 8)."

(*12)  Ir-Regolament (UE) Nru 1092/2010 tal-Parlament Ewropew u tal-Kunsill tal-24 ta’ Novembru 2010 dwar is-sorveljanza makroprudenzjali tal-Unjoni tas-sistema finanzjarja u li jistabbilixxi Bord Ewropew dwar ir-Riskju Sistemiku (ĠU L 331, 15.12.2010, p. 1).”;"

(9)

l-Artikolu 20 huwa emendat kif ġej:

(10)

L-Artikolu 21 huwa emendat kif ġej:

(11)

l-Artikolu 23 huwa emendat kif ġej:

(12)

l-Artikolu 24 huwa emendat kif ġej:

(13)

fl-Artikolu 25, il-paragrafu 2 huwa sostitwit b’dan li ġej:

(*15)  Ir-Regolament (UE) Nru 1094/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), u li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, p. 48).”;"

(14)

fl-Artikolu 35(2), il-punti (b) u (c) huma sostitwiti b’dan li ġej:

(15)

fl-Artikolu 36, il-paragrafu 1 huwa emendat kif ġej:

(16)

fl-Artikolu 37, il-paragrafu 7 huwa emendat kif ġej:

(17)

fl-Artikolu 40(2), l-ewwel subparagrafu, il-punti (b) u (c) huma sostitwiti b’dan li ġej:

(18)

fl-Artikolu 42(1), l-ewwel subparagrafu, il-punt (c) huwa sostitwit b’dan li ġej:

(19)

fl-Artikolu 43, jiżdied il-paragrafu li ġej:

(20)

fl-Artikolu 46(2), il-punt (j) huwa sostitwit b’dan li ġej:

(21)

l-Artikolu 47 huwa emendat kif ġej:

(22)

L-Artikolu 50 huwa emendat kif ġej:

(23)

L-Artikolu 60 huwa sostitwit b’dan li ġej:

(24)

L-Artikolu 61 huwa emendat kif ġej:

(25)

jiddaħħal l-artikolu li ġej:

(26)

l-Anness I huwa emendat f’konformità mal-Anness I ta’ din id-Direttiva;

(27)

it-test stabbilit fl-Anness II ta’ din id-Direttiva jiżdied bħala l-Anness V.

(1)

fl-Artikolu 2(1), jiżdied il-punt li ġej:

(*16)  Ir-Regolament (UE) Nru 909/2014 tal-Parlament Ewropew u tal-Kunsill tat-23 ta’ Lulju 2014 dwar titjib fis-saldu tat-titoli fl-Unjoni Ewropea u dwar depożitorji ċentrali tat-titoli u li jemenda d-Direttivi 98/26/KE u 2014/65/UE u r-Regolament (UE) Nru 236/2012 (ĠU L 257, 28.8.2014, p. 1).”;"

(2)

l-Artikolu 6 huwa emendat kif ġej:

(3)

L-Artikolu 7 huwa emendat kif ġej:

(4)

l-Artikolu 13 huwa emendat kif ġej:

(5)

l-Artikolu 14 huwa emendat kif ġej:

(6)

jiddaħħal l-artikolu li ġej:

(*19)  Ir-Regolament (UE) 2017/1131 tal-Parlament Ewropew u tal-Kunsill tal-14 ta’ Ġunju 2017 dwar il-fondi tas-suq monetarju (ĠU L 169, 30.6.2017, p. 8).”;"

(7)

jiddaħħlu l-artikoli li ġejjin:

(*20)  Ir-Regolament (UE) Nru 1094/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tal-Assigurazzjoni u l-Pensjonijiet tax-Xogħol), u li jemenda d-Deċiżjoni Nru 716/2009/KE u li jħassar id-Deċiżjoni tal-Kummissjoni 2009/79/KE (ĠU L 331, 15.12.2010, p. 48).”;"

(8)

l-Artikolu 22a huwa emendat kif ġej:

(9)

fl-Artikolu 29(1), it-tieni subparagrafu, il-punt (b) huwa ssostitwit b’dan li ġej:

(10)

fl-Artikolu 57, jiżdied il-paragrafu li ġej:

(11)

fl-Artikolu 69, jiżdied il-paragrafu li ġej:

(12)

fl-Artikolu 79, il-paragrafu 1 huwa sostitwit b’dan li ġej:

(13)

fl-Artikolu 84, il-paragrafi 2 u 3 huma sostitwiti b’dawn li ġejjin:

(14)

fl-Artikolu 98, jiżdiedu l-paragrafi li ġejjin:

(15)

l-Artikolu 101 huwa emendat kif ġej:

(16)

l-Artikolu 102 huwa emendat kif ġej:

(17)

jiddaħħal l-artikolu li ġej:

(18)

l-Artikolu 112a huwa emendat kif ġej:

(19)

L-Anness I huwa emendat f’konformità mal-Anness III ta’ din id-Direttiva;

(20)

it-test stabbilit fl-Anness IV għal din id-Direttiva jiddaħħal bħala l-Anness IIA.