(1)

Iċ-ċertifikazzjoni korretta u armonizzata minn skemi volontarji hija essenzjali biex jiġi ddeterminat jekk il-bijokarburanti, il-bijolikwidi, il-karburanti mill-bijomassa, il-karburanti rinnovabbli gassużi u likwidi ta’ oriġini mhux bijoloġika u l-karburanti tal-karbonju riċiklat humiex konformi mar-rekwiżiti tad-Direttiva (UE) 2018/2001. Sabiex tiġi żgurata ċ-ċertezza legali dwar ir-regoli applikabbli għall-operaturi ekonomiċi u l-iskemi volontarji, ir-Regolament ta’ Implimentazzjoni tal-Kummissjoni (UE) 2022/996 (2) jistabbilixxi regoli armonizzati, applikabbli matul il-proċess taċ-ċertifikazzjoni.

(2)

Matul l-implimentazzjoni tar-rekwiżiti għall-Istati Membri rigward l-akkreditazzjoni tal-korpi ta’ ċertifikazzjoni, kif stabbilit fl-Artikolu 11(1) tar-Regolament ta’ Implimentazzjoni (UE) 2022/996, ġie konkluż li t-tħejjija xierqa tal-programmi ta’ akkreditazzjoni mill-Istati Membri tkun teħtieġ perjodu ħafna itwal, u għalhekk l-applikazzjoni ta’ dawk ir-rekwiżiti diġà ġiet differita għal sena bir-Regolament ta’ Implimentazzjoni tal-Kummissjoni (UE) 2024/805 (3).

(3)

Il-ħidma preparatorja sussegwenti mwettqa mill-Istati Membri biex japplikaw id-dispożizzjonijiet dwar l-akkreditazzjoni tal-korpi taċ-ċertifikazzjoni identifikat il-ħtieġa għal aktar żmien biex jitħejjew u jiġu adottati programmi ta’ akkreditazzjoni mill-korpi nazzjonali ta’ akkreditazzjoni tal-Istati Membri kif ukoll biex jiġu ċċarati l-istandards, li abbażi tagħhom jenħtieġ li jitħejjew tali programmi. Sabiex tiġi ffaċilitata t-tħejjija tal-programmi ta’ akkreditazzjoni mill-awtoritajiet kompetenti tal-Istati Membri, jenħtieġ li jiġi introdott ukoll proċess obbligatorju ta’ valutazzjoni tal-adegwatezza għall-akkreditazzjoni tal-istandards taċ-ċertifikazzjoni tal-iskemi volontarji u dawk nazzjonali. Dik il-valutazzjoni jenħtieġ li tkun parti mill-valutazzjoni ġenerali tal-iskemi qabel ir-rikonoxximent tagħhom mill-Kummissjoni u jenħtieġ li titwettaq f’konsultazzjoni mal-korpi nazzjonali ta’ akkreditazzjoni tal-Istati Membri taħt ir-rwol ta’ koordinazzjoni tal-kooperazzjoni Ewropea għall-Akkreditazzjoni.

(4)

Id-definizzjoni ta’ “korp ta’ ċertifikazzjoni” fl-Artikolu 2(14) tar-Regolament ta’ Implimentazzjoni (UE) 2022/996 jenħtieġ li tiġi emendata wkoll biex il-kontenut tagħha jiġi allinjat mad-dispożizzjonijiet il-ġodda dwar l-akkreditazzjoni.

(5)

Sabiex tiġi żgurata l-kontinwità tal-operat u jiġi evitat kwalunkwe riskju ta’ tfixkil fis-suq taċ-ċertifikazzjoni, huwa meħtieġ li jiġi previst perjodu ta’ tranżizzjoni, li se japplika għall-korpi ta’ ċertifikazzjoni li jkunu qed iwettqu attivitajiet ta’ ċertifikazzjoni f’isem skema volontarja jew nazzjonali li tkun ġiet rikonoxxuta mill-Kummissjoni sa tmiem il-perjodu ta’ tranżizzjoni. Jenħtieġ li tali korpi ta’ ċertifikazzjoni jitħallew ikomplu l-attivitajiet tagħhom mingħajr ma jkollhom jiġu akkreditati skont l-Artikolu 11(1) tar-Regolament ta’ Implimentazzjoni (UE) 2022/996 sal-31 ta’ Diċembru 2026.

(6)

Barra minn hekk, jeħtieġ ukoll li jiġi kkoreġut żball evidenti fl-Anness VII tar-Regolament ta’ Implimentazzjoni (UE) 2022/996. Il-valuri tal-fertilizzanti tan-nitroġenu ġew skambjati, bi żball, mal-valuri tal-fertilizzanti tal-urea. Għaldaqstant, jenħtieġ li dawk il-valuri jiġu kkoreġuti kif xieraq.

(7)

Għalhekk, jenħtieġ li r-Regolament ta’ Implimentazzjoni (UE) 2022/996 jiġi emendat u kkoreġut skont dan.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat dwar is-Sostenibbiltà tal-Bijokarburanti, il-Bijolikwidi u l-karburanti mill-Bijomassa,

(1)

fl-Artikolu 2, il-punt (14) huwa sostitwit b’dan li ġej:

(2)

l-Artikolu 11 huwa emendat kif ġej:

(3)

fl-Artikolu 28, it-tielet subparagrafu huwa sostitwit b’dan li ġej:

“L-Artikolu 11(1) għandu japplika mill-1 ta’ Jannar 2027.”.