(1)

Le Cinneadh 2002/192/CE ón gComhairle, agus i gcomhréir le hAirteagal 4 de Phrótacal Uimh. 19 maidir le acquis Schengen arna lánpháirtiú i gcreat an Aontais Eorpaigh, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh (“Prótacal Uimh. 19”) thug an Chomhairle údarás d’Éirinn a bheith rannpháirteach i bhforálacha áirithe de acquis Schengen.

(2)

I gcomhréir le hAirteagal 4(1) agus 4(3)de Chinneadh 2002/192/CE, tá na forálacha dá dtagraítear in Airteagal 1 den Chinneadh sin de le cur i bhfeidhm, idir Éire agus na Ballstáit agus Stáit eile a bhfuil na forálacha sin curtha i bhfeidhm ina leith cheana féin, ach na réamhchoinníollacha maidir le cur chun feidhme na bhforálacha sin a bheith comhlíonta sna Ballstáit sin agus sna Stáit eile uile sin trí chinneadh cur chun feidhme arna dhéanamh ag an gComhairle, ag gníomhú di le haontoilíocht na gcomhaltaí dá dtagraítear in Airteagal 1 de Phrótacal Uimh. 19 agus le hionadaí Rialtas na hÉireann. Féadfaidh an Chomhairle dátaí éagsúla a leagan síos chun na forálacha éagsúla a chur i bhfeidhm de réir réimse an ábhair.

(3)

An 8 Eanáir 2018, chuir Éire in iúl go bhfuil sé ar intinn aici tús a chur le cur chun feidhme na gcodanna seo a leanas de acquis Schengen: Córas Faisnéise Schengen (SIS) agus na rialacha gaolmhara maidir le cosaint sonraí.

(4)

Sa litir uaithi dar dáta an 7 Iúil 2020, chuir Éire in iúl go bhfuil sé ar intinn aici tús a chur le cur chun feidhme na gcodanna seo a leanas de acquis Schengen: comhar breithiúnach, comhar maidir le drugaí, comhar póilíneachta agus Airteagal 26 den Choinbhinsiún lena ndéantar Comhaontú Schengen a cur chun feidhme (2) (“Coinbhinsiún Schengen”). Sa litir sin, chuir Éire in iúl freisin, Airteagal 27 de Choinbhinsiún Schengen, lena n‐áirítear Treoir 2002/90/CE ón gComhairle (3) agus Cinneadh Réime 2002/946/CGB ón gComhairle (4), arb iad na forbairtí a rinneadh air ina dhiaidh sin, mar aon le Cinntí 2008/149/CGB (5) agus 2011/349/AE (6) ón gComhairle amhail ón 1 Eanáir 2022.

A mhéid a bhaineann leis an gCinneadh ón gCoiste Feidhmiúcháin an 22 Nollaig 1994  (7), tá sé ar intinn ag Éirinn tús a chur le cur chun feidhme an Chinnidh sin amhail ón 1 Iúil 2022.

(5)

Thug Éire le fios, dá bhrí sin, go raibh sí réidh anois na forálacha sin de acquis Schengen dá dtagraítear in Airteagal 1 de Chinneadh 2002/192/CE a chur i bhfeidhm go sealadach, a mhéid a bhaineann siad le feidhmiú SIS (“na forálacha a bhaineann le feidhmiú SIS”), le comhar breithiúnach, le comhar maidir le drugaí, le comhar póilíneachta agus le hAirteagal 26 de Choinbhinsiún Schengen, cé is moite d’Airteagal 27 de Choinbhinsiún Schengen, mar aon le Cinntí 2008/149/CGB agus 2011/349/AE, agus de Chinneadh ón gCoiste Feidhmiúcháin an 22 Nollaig 1994, ar cheart iad a chur chun feidhme ag tráth is faide anonn.

(6)

Maidir leis an meastóireacht ar Éirinn chun a fhíorú go bhfuil na coinníollacha is gá do chur i bhfeidhm na gcodanna ábhartha de acquis Schengen inar iarr Éire páirt a ghlacadh comhlíonta, tá feidhm ag Rialachán (AE) Uimh. 1053/2013 (8) ón gComhairle. Mar sin féin, ós rud é gur ar bhonn sealadach is ceart feidhm a bheith ag roinnt forálacha de acquis Schengen ina bhfuil Éire rannpháirteach, agus nár cheart na meastóireachtaí a dhéanamh go tráth is faide anonn, ní mór na nósanna imeachta maidir le bearta leantacha agus faireacháin dá bhforáiltear i Rialachán (AE) Uimh. 1053/2013 a chuíchóiriú i gcás ina léireoidh na meastóireachtaí sin nár chomhlíon Éire na coinníollacha maidir le cur i bhfeidhm chodanna ábhartha de acquis Schengen.

(7)

Le Rialachán (AE) 2018/1862 ó Pharlaimint na hEorpa agus ón gComhairle (9), rialaítear bunú, oibriú agus úsáid SIS i réimse an chomhair póilíneachta agus an chomhair bhreithiúnaigh in ábhair choiriúla. Ach a mbeidh sé infheidhme, tiocfaidh an Rialachán sin in ionad Chinneadh 2007/533/CGB (10) ón gComhairle, a bhfuil feidhm faoi láthair aige maidir leis na cúrsaí sin.

(8)

Ní féidir na forálacha a bhaineann le feidhmiú SIS a chur i bhfeidhm go sealadach mura ndéantar na ceanglais maidir le cosaint sonraí a chomhlíonadh. I gcomhréir le Rialachán (AE) Uimh. 1053/2013, agus bunaithe ar chláir ilbhliantúla agus bhliantúla mheastóireachta an Choimisiúin a bunaíodh de bhun an Rialacháin sin, rinneadh an mheastóireacht ar chosaint sonraí idir an 19 agus an 23 Samhain 2018 agus ghlac an Coimisiún an tuarascáil mheastóireachta an 9 Lúnasa 2019.

(9)

Ba é conclúid na tuarascála meastóireachta go gcomhlíonann Éire na coinníollacha is gá maidir le cur i bhfeidhm fhorálacha acquis Schengen dá dtagraítear i bpointe (a)(ii) d’Airteagal 1 de Chinneadh 2002/192/CE, a mhéid a bhaineann siad le cosaint sonraí, agus, dá bhrí sin, féadfaidh Éire na forálacha sin a chur i bhfeidhm.

(10)

I gcomhréir le hAirteagal 1(1) de Chinneadh Cur Chun Feidhme (AE) 2015/450 ón gCoimisiún (11), fíoraíodh go bhfuil córas náisiúnta (N.SIS) na hÉireann, ó thaobh na teicneolaíochta de, réidh lena chomhtháthú le SIS.

(11)

Ós rud é go bhfuil na socruithe teicniúla agus dlíthiúla is gá déanta ag Éirinn chun sonraí SIS a phróiseáil agus faisnéis fhorlíontach a mhalartú, is féidir dáta a leagan síos ónar cheart na forálacha a bhaineann le feidhmiú SIS a chur i bhfeidhm ar bhonn sealadach in Éirinn. Ba cheart, le cur i bhfeidhm an Chinnidh seo, go gceadófaí sonraí SIS, mar aon le faisnéis fhorlíontach agus sonraí breise, a aistriú chuig Éirinn. Leis an úsáid nithiúil a bhaintear as na malartuithe sonraí sin, d’fhéadfaí cur i bhfeidhm ceart na bhforálacha a bhaineann le feidhmiú SIS in Éirinn a fhíorú, trí nósanna imeachta meastóireachta is infheidhme Schengen.

(12)

Ós rud é gur ceapadh acquis Schengen mar chnuasach comhtháite agus go bhfeidhmíonn sé amhlaidh, is é tuairim na Comhairle nach foláir, le haon rannpháirtíocht pháirteach de chuid na hÉireann i bhforálacha acquis Schengen, comhchuibheas na réimsí ábhair arb ionann iad agus cnuasach an acquis a urramú. Dá bhrí sin, chun na forálacha a bhaineann le feidhmiú SIS a chur i bhfeidhm ar bhonn sealadach, is gá go gcuirfeadh Éire i bhfeidhm, ar bhonn sealadach, na forálacha sin de acquis Schengen a bhaineann le comhar breithiúnach, le comhar maidir le drugaí, le comhar póilíneachta agus le hAirteagal 26 de Choinbhinsiún Schengen ón dáta céanna le cur i bhfeidhm sealadach na bhforálacha a bhaineann le feidhmiú SIS, eadhon amhail ó dháta chur i bhfeidhm an Chinnidh seo.

(13)

Laistigh de thréimhse sé mhí ó dháta theacht i bhfeidhm an Chinnidh seo, ba cheart cuairteanna meastóireachta a thabhairt ar Éirinn chun a fhíorú an bhfeidhmíonn SIS go cuí agus an bhfuil Cinneadh 2007/533/CGB á chur i bhfeidhm i gceart. Laistigh de thréimhse 12 mhí ó dháta theacht i bhfeidhm an Chinnidh seo, ba cheart ceistneoirí meastóireachta a sheoladh go hÉirinn agus cuairteanna meastóireachta a thabhairt ar Éirinn de réir mar is iomchuí chun meastóireacht a dhéanamh ar chur i bhfeidhm fhorálacha acquis Schengen a bhaineann le comhar breithiúnach, le comhar maidir le drugaí, le comhar póilíneachta agus le hAirteagal 26 de Choinbhinsiún Schengen chun a léiriú gur comhlíonadh na ceanglais a bhaineann leis an reachtaíocht ábhartha agus leis na gníomhaíochtaí oibríochtúla uile.

(14)

I bhfianaise a thábhachtaí atá comhchuibheas i gcur i bhfeidhm acquis Schengen agus a thábhachtaí atá SIS mar bheart cúiteach i réimse na saoirse, na slándála agus an cheartais, agus ós rud é gur ar bhonn sealadach ba cheart feidhm a bheith ag roinnt de na forálacha de acquis Schengen inar bhfuil Éire rannpháirteach, agus nach ndéanfar na meastóireachtaí go tráth is faide anonn, ba cheart sásra a chur i bhfeidhm chun rochtain oibríochtúil na hÉireann ar SIS (“an sásra le rochtain oibríochtúil Éireann ar SIS a tharraingt siar”) i gcás ina mbainfear de thátal as na meastóireachtaí sin nár chomhlíon Éire na coinníollacha maidir le cur i bhfeidhm na bhforálacha a bhaineann le feidhmiú SIS. Ba cheart feidhm a bheith ag an sásra céanna i gcás ina mbainfear de thátal as na meastóireachtaí nach bhfuil na coinníollacha chun na forálacha de acquis Schengen a chur i bhfeidhm a bhaineann le comhar breithiúnach, le comhar maidir le drugaí, le comhar póilíneachta agus le hAirteagal 26 de Choinbhinsiún Schengen chun go bhfeidhmeoidh SIS mar is cuí comhlíonta ag Éirinn, ba cheart feidhm a bheith ag an méid sin freisin. Sa dá chás sin, ba cheart go scoirfeadh Éire de bheith i dteideal rochtain oibríochtúil a bheith aici ar SIS. Chuige sin, ba cheart don Chomhairle, trí bhíthin cinneadh cur chun feidhme, dáta a shocrú óna bhfuil na forálacha a bhaineann le feidhmiú SIS le scor d’fheidhm a bheith acu maidir le hÉirinn, agus ba cheart di na socruithe idirthréimhseacha a ghlacadh is gá chun faisnéis fhorlíontach a mhalartú maidir le foláirimh arna n‐eisiúint i SIS roimh an dáta sin. Ba cheart do eu-LISA na socruithe is gá a dhéanamh chun Éire a dhícheangal ó SIS.

(15)

Dá bhrí sin, leis an gcinneadh seo, ba cheart na forálacha a bhaineann le feidhmiú SIS agus na forálacha eile dá dtagraítear in Airteagal 1 de Chinneadh 2002/192/CE a chur i bhfeidhm go sealadach, cé is moite d’Airteagal 27 de Choinbhinsiún Schengen, mar aon le Cinntí 2008/149/CGB agus 2011/349/AE agus an Cinneadh ón gCoiste Feidhmiúcháin an 22 Nollaig 1994 ar cheart iad a chur i bhfeidhm ag tráth is faide anonn. Ar na meastóireachtaí a bhaineann leis na forálacha arna gcur i bhfeidhm go sealadach a chur i gcrích go rathúil, agus gan dochar don sásra chun rochtain oibríochtúil na hÉireann ar SIS a tharraingt siar ba cheart don Chomhairle, laistigh de 24 mhí ar a dhéanaí ó dháta cur i bhfeidhm an Chinnidh seo, an staid a scrúdú d’fhonn cinneadh cur chun feidhme a ghlacadh, i gcomhréir le hAirteagal 4(1) de Chinneadh 2002/192/CE arna léamh i gcomhar le hAirteagal 4 de Phrótacal Uimh. 19, lena socrófar an dáta lena gcur i bhfeidhm go críochnaitheach.

(16)

A mhéid a bhaineann le hAirteagal 27 de Choinbhinsiún Schengen agus Cinntí 2008/149/CGB agus 2011/349/AE, ba cheart d’Éirinn iad a chur i bhfeidhm go sealadach amhail ón 1 Eanáir 2022. A mhéid a bhaineann leis an gCinneadh ón gCoiste Feidhmiúcháin an 22 Nollaig, ba cheart d’Éirinn é a chur i bhfeidhm ar bhonn sealadach, tráth nach déanaí ná an 1 Iúil 2022. Ba cheart d’Éirinn fógra a thabhairt don Chomhairle maidir leis an dáta óna gcuirfidh sí tús le cur i bhfeidhm na bhforálacha sin dá réir.

(17)

Le Rialachán (AE) 2016/94 ó Pharlaimint na hEorpa agus ón gComhairle (12)„ aisghaireadh roinnt cinntí ón gCoiste Feidhmiúcháin a bhain le acquis Schengen agus dá dtagraítear i bpointe (c) d’Airteagal 1 de Chinneadh 2002/192/CE toisc go raibh siad imithe i léig. Níl, dá bhrí sin, na cinntí sin le cur i bhfeidhm ag Éirinn a thuilleadh. Is amhlaidh atá i gcás na gCinntí ón gCoiste Feidhmiúcháin SCH/Com-ex (93) 14 (comhar praiticiúil idir na húdaráis bhreithiúnacha chun gáinneáil ar dhrugaí a chomhrac), SCH/Com-ex (98) 52 (an lámhleabhar maidir leis an gcomhar póilíneachta trasteorann) agus SCH/Com-ex (99) 11 rev 2 (comhaontú maidir le comhar in imeachtaí um chionta mótarthráchta).

(18)

A mhéid a bhaineann leis an Íoslainn agus leis an Iorua, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt (13), ar forálacha iad a thagann faoi réim an réimse dá dtagraítear in Airteagal 1, pointe G, de Chinneadh 1999/437/CE ón gComhairle (14).

(19)

I gcomhréir le hAirteagal 2 den Chomhaontú arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua ar mhaithe le cearta agus oibleagáidí a bhunú idir Éire agus Ríocht Aontaithe na Breataine Móire agus Thuaisceart Éireann de pháirt amháin, agus Poblacht na hÍoslainne agus Ríocht na hIorua de pháirt eile, i réimsí de acquis Schengen a bhfuil feidhm acu maidir leis na Stáit sin (15), chuathas i gcomhairle leis an gCoiste Measctha, arna bhunú de bhun Airteagal 3 den Chomhaontú arna thabhairt i gcrích ag Comhairle an Aontais Eorpaigh agus Poblacht na hÍoslainne agus Ríocht na hIorua maidir le comhlachas an dá thír sin le acquis Schengen a chur chun feidhme, a chur i bhfeidhm agus a fhorbairt, agus sin i gcomhréir le hAirteagal 4 den Chomhaontú deiridh sin maidir leis an gCinneadh seo a ullmhú.

(20)

A mhéid a bhaineann leis an Eilvéis, is é atá sa Chinneadh seo forbairt ar fhorálacha acquis Schengen de réir bhrí an Chomhaontaithe arna thabhairt i gcrích idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen (16) a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointí G, H, agus I de Chinneadh 1999/437/CE, arna léamh i gcomhar le hAirteagal 3 de Chinneadh 2008/146/CE ón gComhairle (17).

(21)

I gcomhréir le hAirteagal 5 den Chomhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen a chur chun feidhme, a chur i bhfeidhm agus a fhorbairt, cuireadh an Coiste Measctha, a bunaíodh de bhun Airteagal 3 de, ar an eolas faoi ullmhú an Chinnidh seo.

(22)

A mhéid a bhaineann le Lichtinstéin, is é atá sa Chinneadh seo forbairt ar fhorálacha acquis Schengen de réir bhrí an Phrótacail idir an tAontas Eorpach, an Comhphobal Eorpach, Cónaidhm na hEilvéise agus Prionsacht Lichtinstéin i ndáil le haontachas Phrionsacht Lichtinstéin leis an gComhaontú idir an tAontas Eorpach, an Comhphobal Eorpach agus Cónaidhm na hEilvéise maidir le comhlachas Chónaidhm na hEilvéise le acquis Schengen (18) a chur chun feidhme, a chur i bhfeidhm agus a fhorbairt, ar forálacha iad a thagann faoi réim an réimse dá dtagraítear in Airteagal 1, pointí G, H agus I de Chinneadh 1999/437/CE arna léamh i gcomhar le hAirteagal 3 de Chinneadh 2011/350/AE ón gComhairle (19),