|
17.4.2010 |
MT |
Il-Ġurnal Uffiċjali tal-Unjoni Ewropea |
L 97/17 |
DEĊIŻJONI TAL-KUMMISSJONI
tas-16 ta’ April 2010
dwar miżuri ta’ emerġenza applikabbli għal kunsinni ta’ prodotti tas-sajd tal-akkwakultura importati mill-Indoneżja u li huma intenzjonati għall-konsum mill-bniedem
(notifikata bid-dokument numru C(2010) 2358)
(Test b’relevanza għaż-ŻEE)
(2010/220/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 178/2002 tal-Parlament Ewropew u tal-Kunsill tat-28 ta’ Jannar 2002 li jistabbilixxi l-prinċipji ġenerali u l-ħtiġijiet tal-liġi dwar l-ikel, li jistabbilixxi l-Awtorità Ewropea dwar is-Sigurtà fl-Ikel u li jistabbilixxi l-proċeduri fi kwistjonijiet ta’ sigurtà tal-ikel (1), u b’mod partikolari l-Artikolu 53(1)(b)(ii) tiegħu,
Billi:
|
(1) |
Ir-riżultati ta’ spezzjoni tal-Kummissjoni fl-Indoneżja f’Novembru 2009 żvelaw nuqqasijiet fir-rigward tas-sistema tal-kontroll tar-residwi fl-annimali tal-akkwakultura u l-prodotti tas-sajd tal-akkwakultura u nuqqas ta’ faċilitajiet ta’ laboratorji xierqa għas-sejba ta’ residwi ta’ ċerti sustanzi farmakoloġikament attivi f’annimali tal-akkwakultura u prodotti tas-sajd tal-akkwakultura kif jirrikjedu d-Direttiva tal-Kunsill 96/23/KE tad-29 ta’ April 1996 dwar miżuri għall-monitoraġġ ta’ ċerti sustanzi u residwi tagħhom f’annimali ħajjin u prodotti tal-annimali u li tħassar id-Direttivi 85/358/KEE u 86/469/KEE u d-Deċiżjonijiet 89/187/KEE u 91/664/KEE (2) u d-Deċiżjoni tal-Kummissjoni 2002/657/KE tal-14 ta’ Awwissu 2002 li timplimenta d-Direttiva tal-Kunsill 96/23/KE dwar il-prestazzjoni tal-metodi analitiċi u l-interpretazzjoni tar-riżultati (3). |
|
(2) |
Minħabba f’hekk hemm riskju li l-prodotti tas-sajd tal-akkwakultura intiżi għall-konsum mill-bniedem importati mill-Indoneżja jkun fihom residwi ta’ ċerti sustanzi farmakoloġikament attivi li jintużaw biex jissieltu l-mard jew iqawwu l-produttività fl-annimali tal-akkwakultura li huma dannużi għalsaħħet il-bniedem. Dawn is-sustanzi huma, b’mod partikolari: il-chloramphenicol, in-nitrofurans, u t-tetracyclines. Għaldaqstant, għandhom jittieħdu miżuri biex dak ir-riskju jiġi mitigat. Il-miżuri għandhom ikunu proporzjonali bla ma jrażżnu l-kummerċ aktar milli hu meħtieġ biex jinkiseb livell għoli ta’ protezzjoni tal-konsumatur. |
|
(3) |
Jekk porzjon sinifikanti tal-prodotti tal-akkwakultura importati mill-Indoneżja jiġi suġġett għal testijiet obbligatorji għar-residwi rilevanti qabel ma dawn il-prodotti jitqiegħdu fis-suq, ir-riskju li l-kunsinni li fihom ir-residwi jitqiegħdu fis-suq jitnaqqas, ikun hemm informazzjoni iktar preċiża dwar il-kontaminazzjoni attwali bir-residwi fil-prodotti tas-sajd Indoneżjani u l-produtturi fl-Indoneżja jitgerrxu milli jużaw ħażin is-sustanzi inkwistjoni. |
|
(4) |
Jeħtieġ li jiġu stabbiliti rekwiżiti uniformi tal-ittestjar għall-importazzjoni tal-kunsinni tal-prodotti tas-sajd tal-akkwakultura fl-Indoneżja f’livell minimu definit peress li l-prodotti jistgħu jiġu importati minn għadd ta’ Stati Membri. |
|
(5) |
L-Istati Membri huma mitluba jirrapportaw lill-Kummissjoni s-sejba ta’ preżenza ta’ sustanzi farmakoloġikament attivi mhux awtorizzati għall-użu fl-annimali li jipproduċu l-ikel permezz tar-Regolament (KE) Nru 470/2009 tal-Parlament Ewropew u tal-Kunsill (4) jew residwi ta’ sustanzi farmakoloġikament attivi f’livelli li jisbqu l-limiti massimi ta’ residwi stabbiliti skont ir-Regolament (KE) Nru 470/2009 permezz tas-Sistema ta’ Twissija Rapida mwaqqfa permezz tar-Regolament (KE) Nru 178/2002 u jissottomettu regolarment rapporti tat-testijiet kollha biex jipprovdu lill-Kummissjoni bl-informazzjoni neċessarja ħalli tikkunsidra jekk hemmx il-ħtieġa li tinżamm jew tiġi modifikata din il-miżura interim fid-dawl tal-informazzjoni pprovduta. |
|
(6) |
Il-miżuri stipulati f’din id-Deċiżjoni huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali, |
ADOTTAT DIN ID-DEĊIŻJONI:
Artikolu 1
Din id-Deċiżjoni għandha tapplika għall-importazzjoni ta’ kunsinni ta’ prodotti tas-sajd tal-akkwakultura mill-Indoneżja maħsuba għall-konsum mill-bniedem.
Artikolu 2
1. L-Istati Membri għandhom, permezz ta’ pjanijiet xierqa dwar it-teħid tal-kampjuni, jiżguraw li l-kampjuni jittieħdu minn tal-anqas 20 % tal-kunsinni msemmija fl-Artikolu 1 ippreżentati għall-importazzjoni fil-Postazzjonijiet tal-Ispezzjoni fuq il-Fruntieri tat-territorju tagħhom.
2. Il-kampjuni mittieħda skont il-paragrafu 1 għandhom ikunu suġġetti għal testijiet analitiċi għas-sejba ta’ residwi ta’ sustanzi farmakoloġikament attivi mfissra fl-Artikolu 2(a) tar-Regolament (KE) Nru 470/2009, u b’mod partikolari l-chloramphenicol, il-metaboliti tan-nitrofurans u t-tetracyclines (tal-anqas it-tetracycline, l-oxytetracycline u l-chlortetracycline).
Artikolu 3
Il-kunsinni li minnhom ikunu ttieħdu l-kampjuni skont l-Artikolu 2(1) għandhom jinżammu taħt detenzjoni uffiċjali mill-awtorità kompetenti tal-Istat Membru kkonċernat, sakemm jitlestew it-testijiet analitiċi. Dawk il-kunsinni jistgħu jitqiegħdu fis-suq biss jekk ir-riżultati tat-testijiet analitiċi jikkonfermaw il-konformità tal-kunsinni mar-Regolament (KE) Nru 470/2009.
Artikolu 4
1. L-Istati Membri għandhom jinfurmaw minnufih lill-Kummissjoni bir-riżultati tat-testijiet analitiċi jew dawk it-testijiet jiżvelaw:
|
(a) |
il-preżenza ta’ kwalunkwe sustanzi farmakoloġikament attivi klassifikati skont l-Artikolu 14(2)(a), (b) jew (c) tar-Regolament (KE) Nru 470/2009 f’livelli li jisbqu l-limitu massimu ta’ residwu stabbilit skont dak ir-Regolament; jew |
|
(b) |
il-preżenza ta’ sustanzi farmakoloġikament attivi mhux klassifikati skont l-Artikolu 14(2)(a), (b) jew (c) tar-Regolament (KE) Nru 470/2009 ħlief fejn ġie ffissat punt ta’ referenza għal azzjoni għal dik is-sustanza skont dan ir-Regolament jew id-Deċiżjoni tal-Kummissjoni 2002/657/KE tat-12 ta’ Awwissu 2002 li timplimenta d-Direttiva tal-Kunsill 96/23/KE dwar il-prestazzjoni tal-metodi analitiċi u l-interpretazzjoni tar-riżultati (5) u l-livell ta’ residwi ma jkunx ugwali għal dak il-punt ta’ referenza għal azzjoni jew jeċċedih. |
Ir-riżultati ta’ dawk it-testijiet għandhom jintbagħtu lill-Kummissjoni permezz tas-sistema ta’ twissija rapida mwaqqfa permezz tar-Regolament (KE) Nru 178/2002.
2. Kull tliet xhur, l-Istati Membri għandhom iħejju rapport li jagħti rendikont tar-riżultati kollha tat-testijiet analitiċi kollha mwettqa fit-tliet xhur ta’ qabel fuq kunsinni ta’ prodotti tas-sajd tal-akkwakultura mill-Indoneżja maħsuba għall-konsum mill-bniedem.
Dawn ir-rapporti għandhom jitressqu lill-Kummissjoni matul ix-xahar ta’ wara kull perjodu, f’April, Lulju, Ottubru, u Jannar.
Artikolu 5
In-nefqa kollha li tkun saret biex tiġi applikata din id-Deċiżjoni għandha tiġi mħallsa mill-kunsinnatur, mid-destinatarju jew mill-aġent ta’ wieħed minnhom.
Artikolu 6
Din id-Deċiżjoni hija indirizzata lill-Istati Membri.
Magħmul fi Brussell, is-16 ta’ April 2010.
Għall-Kummissjoni
John DALLI
Membru tal-Kummissjoni
(2) ĠU L 125, 23.5.1996, p. 10.
(3) ĠU L 221, 17.8.2002, p. 8.