(1)

L-Artikolu 13(1) tar-Regolament (KE) Nru 1967/2006 jipprojbixxi l-użu ta’ rkaptu rmunkat fl-inħawi ta’ tliet mili nawtiċi tal-kosta jew fl-isobath ta’ 50 metru fejn jintlaħaq dak il-fond f’distanza iqsar mill-kosta.

(2)

Fuq talba ta’ Stat Membru, il-Kummissjoni tista’ tippermetti deroga mill-Artikolu 13(1) tar-Regolament (KE) Nru 1967/2006, dment li jiġu ssodisfati għadd ta’ kundizzjonijiet stabbiliti fl-Artikolu 13(5) u (9).

(3)

Ingħatat deroga mill-ewwel subparagrafu tal-Artikolu 13(1) għas-sajd mit-tartaruni għall-makku u l-makku ferreri (Aphia minuta u Pseudaphia ferreri) u għall-arżnell (Spicara smaris) fl-ibħra territorjali Spanjoli tal-Gżejjer Baleariċi għall-ewwel darba sal-31 ta’ Diċembru 2016 permezz tar-Regolament ta’ Implimentazzjoni tal-Kummissjoni (UE) Nru 1233/2013 (2). Dik id-deroga kienet ibbażata fuq deroga addizzjonali mid-daqs minimu tal-malji adottata minn Spanja skont l-Artikolu 9(7) tar-Regolament (KE) Nru 1967/2006 minħabba li mingħajrha, is-sajd rilevanti ma kienx isir u kien ikollu jieqaf.

(4)

Ingħatat estensjoni tad-deroga sal-31 ta’ Diċembru 2019 permezz tar-Regolament ta’ Implimentazzjoni tal-Kummissjoni (UE) 2019/662 (3), filwaqt li tqies il-pjan ta’ ġestjoni għas-sajd li għalih tapplika d-deroga stabbilit minn Spanja skont l-Artikolu 19 tar-Regolament (KE) Nru 1967/2006.

(5)

Fit-3 ta’ Settembru 2019, l-awtoritajiet Spanjoli talbu lill-Kummissjoni biex testendi d-deroga mill-ewwel subparagrafu tal-Artikolu 13(1) lil hinn mill-31 ta’ Diċembru 2019. Spanja pprovdiet abbozz tal-pjan ta’ ġestjoni l-ġdid għall-perjodu 2019-2022 li se jiġi rregolat mir-regoli nazzjonali eżistenti (4). Spanja pprovdiet informazzjoni aġġornata biex tiġġustifika t-tiġdid tad-deroga.

(6)

Il-Kumitat Xjentifiku, Tekniku u Ekonomiku għas-Sajd (STECF) ivvaluta l-abbozz tal-pjan ta’ ġestjoni f’Novembru 2019 (5) u t-talba għall-estensjoni tad-deroga f’Marzu 2020 (6).

(7)

L-STECF ikkonkluda li l-pjan ta’ ġestjoni għat-tartaruni fil-Gżejjer Baleariċi fil-perjodu 2016-2019 kien implimentat kif suppost u li l-kundizzjonijiet li fuqhom ingħatat id-deroga rigward id-distanza minima mill-kosta u l-fond fl-2016 baqgħu jiġu ssodisfati. L-STECF jinnota li l-irkaptu tas-sajd jidher li huwa selettiv ħafna.

(8)

L-STECF issuġġerixxa ċerti aġġustamenti, b’mod partikolari billi tiġi stabbilita TAC ġdida skont il-qabdiet reċenti u billi jiġi ċċarat it-trikkib possibbli f’żewġ bajjiet fis-sajd bil-Jonquiller li għandu fil-mira l-makku u l-qigħan tal-ħaxix tal-baħar.

(9)

Fid-dawl tal-evalwazzjoni tal-STECF, il-Kummissjoni tinnota li f’ittra mibgħuta lill-Kummissjoni fl-4 ta’ Ġunju 2020 (7), l-awtoritajiet Spanjoli impenjaw ruħhom li jallinjaw il-Qabda Totali Permissibbli (TAC) staġonali mal-qabdiet medji osservati fis-snin reċenti u li jniedu studju xjentifiku biex jiċċaraw jekk is-sajd jinteraġixxix mal-qigħan tal-ħaxix tal-baħar fiż-żewġ bajjiet ikkonċernati. Spanja impenjat ruħha wkoll li tipprojbixxi s-sajd fiż-żewġ bajjiet ikkonċernati mill-inqas sakemm l-STECF ikun ivvaluta l-istudju xjentifiku u li tinforma lill-Kummissjoni dwar is-segwitu tal-impenji msemmijin hawn fuq.

(10)

Id-deroga li talbet Spanja tikkonforma mal-kundizzjonijiet stabbiliti fl-Artikolu 13(5) u (9) tar-Regolament (KE) Nru 1967/2006.

(11)

Jeżistu limitazzjonijiet ġeografiċi speċifiċi meta wieħed iqis id-daqs limitat tal-blata kontinentali u d-distribuzzjoni spazjali tal-ispeċi fil-mira, li hija limitata esklużivament għal ċerti żoni fiż-żoni kostali f’fond li jkun anqas minn 50 metru.

(12)

Is-sajd ma għandu l-ebda impatt sinifikanti fuq l-ambjent tal-baħar, minħabba li t-tartaruni jinġibdu fil-kolonna tal-ilma. Minħabba l-użu tal-ekosondi, is-sajd huwa selettiv ħafna bi ftit qabdiet inċidentali. Barra minn hekk, il-qabda mhux mixtieqa jiġu rilaxxati immedjatament ħajjin b’sopravvivenza għolja ħafna.

(13)

Id-deroga li talbet Spanja taffettwa għadd limitat ta’ 55 bastiment.

(14)

Is-sajd ma jistax isir bi rkaptu ieħor, minħabba li t-tartaruni huma l-uniku rkaptu rregolat li huwa permess li jaqbad dawn it-tliet speċijiet fil-mira li jgħixu fi ġliba fl-ilmijiet kostali baxxi.

(15)

It-talba tkopri l-bastimenti rreġistrati f’ċensiment marittimu ġestit mid-Direttorat Ġenerali għas-Sajd u l-Ambjent tal-Baħar tal-Gżejjer Baleariċi li għandhom esperjenza vasta ta’ aktar minn ħames snin fis-sajd u jaħdmu skont il-pjan ta’ ġestjoni li jirregola s-sajd mit-tartaruni għall-makku u l-makku ferreri (Aphia minuta u Pseudaphia ferreri) u għall-arżnell (Spicara smaris). Dawk il-bastimenti jinsabu f’lista li ntbagħtet lill-Kummissjoni skont ir-rekwiżiti tal-Artikolu 13(9) tar-Regolament (KE) Nru 1967/2006.

(16)

Il-pjan ta’ ġestjoni jiggarantixxi li fil-ġejjieni mhux se jiżdied l-isforz tas-sajd, billi l-awtorizzazzjonijiet tas-sajd se jinħarġu biss lil 55 bastiment speċifikati, kull wieħed limitat għal 12 m fid-daqs u 198,5 kW fil-potenza. Barra minn hekk, huma stabbiliti tunnellaġġ u potenza akkumulati massimi, u s-sajd jieqaf sal-istaġun tas-sajd li jmiss jekk tintlaħaq it-TAC staġonali.

(17)

L-attivitajiet tas-sajd ikkonċernati jissodisfaw ir-rekwiżiti tal-Artikolu 4(1) tar-Regolament (KE) Nru 1967/2006 li jippermetti s-sajd ’il fuq mill-ħabitats protetti jekk is-sajd isir mingħajr ma jintmess il-qiegħ tal-ħaxix tal-baħar b’ċerti kundizzjonijiet.

(18)

Barra minn hekk, is-sajd ikkonċernat ma kienx jista’ jsir mingħajr deroga mid-daqs applikabbli tal-malji.

(19)

Madankollu, minħabba li s-sajd ikkonċernati huwa selettiv ħafna, għandu effett negliġibbli fuq l-ambjent u mhuwiex affettwat mid-dispożizzjonijiet fl-Artikolu 4(5) tar-Regolament (KE) Nru 1967/2006, fil-passat Spanja awtorizzat id-deroga mid-daqs minimu tal-malji abbażi tal-Artikolu 9(7) tar-Regolament (KE) Nru 1967/2006.

(20)

L-Artikolu 9 tar-Regolament (KE) Nru 1967/2006 tħassar bir-Regolament (UE) 2019/1241 tal-Parlament Ewropew u tal-Kunsill (8). Madankollu, skont il-punt 4 tal-parti B tal-Anness IX tar-Regolament (UE) 2019/1241, id-derogi mid-daqsijiet minimi tal-malji adottati abbażi tal-Artikolu 9 tar-Regolament (KE) Nru 1967/2006, li kienu fis-seħħ fl-14 ta’ Awwissu 2019, jistgħu jkomplu japplikaw, dment li ma jwasslux għaż-żieda fil-qabdiet tal-ħut li għadu qed jikber. Din id-deroga estiża tikkonforma mal-kundizzjonijiet stabbiliti fl-Artikolu 15(5) u fil-punt 4 tal-Parti B tal-Anness IX tar-Regolament (UE) 2019/1241, peress li ma twassalx għal deterjorament tal-istandards ta’ selettività, b’mod partikolari f’termini ta’ żieda fil-qabdiet ta’ ħut li jkun għadu qed jikber, li kienu jeżistu fl-14 ta’ Awwissu 2019 u għandha l-għan li tikseb l-objettivi u l-miri stabbiliti fl-Artikoli 3 u 4 ta’ dak ir-Regolament.

(21)

L-attivitajiet tas-sajd ikkonċernati jissodisfaw ir-rekwiżiti tar-reġistrazzjoni stabbiliti fl-Artikolu 14 tar-Regolament tal-Kunsill (KE) Nru 1224/2009 (9).

(22)

Is-sajd ikkonċernat isir f’distanza qasira ħafna mill-kosta u għaldaqstant ma jfixkilx l-attivitajiet tas-sajd ta’ bastimenti oħra.

(23)

Is-sajd ikkonċernat huwa rregolat fil-pjan ta’ ġestjoni Spanjol biex jiġi żgurat li l-qabdiet tal-ispeċijiet imsemmija fl-Anness IX tar-Regolament (UE) 2019/1241 ikun minimu.

(24)

It-tartaruni ma għandhomx fil-mira ċ-ċefalopodi.

(25)

Il-pjan ta’ ġestjoni Spanjol fih miżuri għall-monitoraġġ tal-attivitajiet tas-sajd, kif previst fit-tielet subparagrafu tal-Artikolu 13(9) tar-Regolament (KE) Nru 1967/2006.

(26)

Għalhekk jenħtieġ li tingħata d-deroga mitluba.

(27)

Jenħtieġ li Spanja tirrapporta lill-Kummissjoni fi żmien xieraq u f’konformità mal-pjan ta’ monitoraġġ previst fil-pjan ta’ ġestjoni Spanjol.

(28)

B’limitu fit-tul tad-deroga jkunu jistgħu jittieħdu miżuri ta’ ġestjoni korrettivi fil-pront, f’każ li l-monitoraġġ tal-pjan ta’ ġestjoni jkun juri status ta’ konservazzjoni dgħajjef għall-istokk sfruttat, filwaqt li jkun hemm lok li titjieb il-bażi xjentifika għal pjan ta’ ġestjoni aħjar. Jenħtieġ li t-tmiem tad-deroga tiġi ffissata fi tmiem l-istaġun tas-sajd. Għalhekk, jenħtieġ li d-deroga tapplika sat-30 ta’ April 2023.

(29)

Billi d-deroga li ngħatat permezz tar-Regolament ta’ Implimentazzjoni (UE) 2019/662 skadiet fil-31 ta’ Diċembru 2019, sabiex tiġi żgurata l-kontinwità legali, dan ir-Regolament jenħtieġ li japplika mill-1 ta’ Jannar 2020. Għal raġunijiet ta’ ċertezza tad-dritt, dan ir-Regolament jenħtieġ li jidħol fis-seħħ b’urġenza.

(30)

Il-miżuri previsti f’dan ir-Regolament huma f’konformità mal-opinjoni tal-Kumitat għas-Sajd u l-Akkwakultura,

(a)

huma rreġistrati fiċ-ċensiment marittimu ġestit mid-Direttorat Ġenerali għas-Sajd u l-Ambjent tal-Baħar tal-Gżejjer Baleariċi;

(b)

għandhom aktar minn ħames snin esperjenza f’dan it-tip ta’ sajd u mhux se jiżdidilhom l-isforz tas-sajd fil-ġejjieni;

(c)

għandhom awtorizzazzjoni għas-sajd u joperaw skont il-pjan ta’ ġestjoni li adottat Spanja f’konformità mal-Artikolu 19(2) tar-Regolament (KE) Nru 1967/2006.