17.2.2023   

GA

Iris Oifigiúil an Aontais Eorpaigh

L 50/56


RIALACHÁN CUR CHUN FEIDHME (AE) 2023/365 ÓN gCOIMISIÚN

an 16 Feabhra 2023

lena bhfoirceanntar an t-imscrúdú athbhreithniúcháin éaga a bhaineann le hallmhairí táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad de thionscnamh na hÚcráine

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1) (“an bun-Rialachán”), agus go háirithe Airteagal 9(1) agus Airteagal 11(2) de,

De bharr an mhéid seo a leanas:

1.   NÓS IMEACHTA

1.1.   Tionscnamh

(1)

Tar éis iarraidh ar athbhreithniú de bhun Airteagal 11(2) de bhun-Rialachán chinn an Coimisiún imscrúdú athbhreithniúcháin éaga a thionscnamh maidir leis na bearta frithdhumpála atá i bhfeidhm ar allmhairí táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad de thionscnamh Phoblacht Chónaidhmitheach na Brasaíle (“an Bhrasaíl”), Phoblacht Ioslamach na hIaráine (“an Iaráin”), Chónaidhm na Rúise (“an Rúis”) agus na hÚcráine (“na tíortha lena mbaineann”). D’fhoilsigh sé Fógra Tionscnaimh in Iris Oifigiúil an Aontais Eorpaigh an 5 Deireadh Fómhair 2022 (“an Fógra Tionscnaimh”) (2).

(2)

An 4 Iúil 2022 chuir EUROFER, Comhlachas Eorpach na Cruach, (“an t-iarratasóir”) an iarraidh ar an athbhreithniú isteach thar ceann thionscal an Aontais a dhéanann táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad, de réir bhrí Airteagal 5(4) den bhun-Rialachán.

(3)

Bhí fianaise leordhóthanach san iarraidh gur dócha go ndéanfaí dumpáil arís agus go leanfaí den dumpáil agus go ndéanfaí díobháil arís do thionscal an Aontais, de thoradh dhul in éag na mbeart.

1.2.   Páirtithe leasmhara

(4)

San Fhógra Tionscnaimh, iarradh ar na páirtithe leasmhara teagmháil a dhéanamh leis an gCoimisiún chun a bheith rannpháirteach san imscrúdú. Ina theannta sin, chuir an Coimisiún an t-iarratasóir, táirgeoirí agus comhlachais aitheanta de chuid an Aontais, agus údaráis na dtíortha lena mbaineann ar an eolas go sonrach maidir le tionscnamh an athbhreithnithe, agus d’iarr sé orthu a bheith rannpháirteach.

2.   AN TÁIRGE FAOI IMSCRÚDÚ

(5)

Is éard atá sa táirge atá faoi réir an athbhreithnithe seo táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile iad, bíodh iad i gcornaí nó ná bíodh (lena n-áirítear táirgí “gearrtha san fhad iomchuí” agus “stiallacha cúnga”) gan oibriú breise déanta orthu seachas a bheith teorollta, gan a bheith cumhdaithe, plátáilte ná brataithe (an “táirge faoi athbhreithniú”).

Ní chumhdaítear na táirgí seo a leanas leis an athbhreithniú seo:

(i)

táirgí cruach dosmálta agus cruach leictreach sileacain dírithe ar ghráinní,

(ii)

táirgí cruach uirlise agus cruach ardluais,

(iii)

táirgí, nach bhfuil i gcornaí, gan patrúin rilífe, ar mó ná 10 mm a dtiús agus ar 600 mm nó níos mó a leithead, agus

(iv)

táirgí, nach bhfuil i gcornaí, gan patrúin rilífe, atá 4,75 mm nó níos mó ach nach mó ná 10 mm ar tiús agus atá 2 050 mm nó níos mó ar leithead.

An táirge atá faoi athbhreithniú, is faoi na cóid CN 7208 10 00, 7208 25 00, 7208 26 00, 7208 27 00, 7208 36 00, 7208 37 00, 7208 38 00, 7208 39 00, 7208 40 00, 7208 52 10, 7208 52 99, 7208 53 10, 7208 53 90, 7208 54 00, 7211 13 00, 7211 14 00, 7211 19 00, ex 7225 19 10 (cód TARIC 7225191090), 7225 30 90, ex 7225 40 60 (cód TARIC 7225406090), 7225 40 90, ex 7226 19 10 (cóid TARIC 7226191091, 7226191095), 7226 91 91 agus 7226 91 99 a thagann sé faoi láthair. Is ar mhaithe le faisnéis amháin a thugtar na cóid AC agus TARIC, gan dochar d’athrú a d’fhéadfaí a dhéanamh ar an aicmiú taraife amach anseo.

3.   TARRAINGT SIAR AN GHEARÁIN

(6)

An 23 Samhain 2022 tharraing an t-iarratasóir siar a iarraidh ar imscrúdú athbhreithniúcháin éaga a mhéid a bhaineann leis an Úcráin.

(7)

Ina tharraingt siar mheas an t-iarratasóir, i bhfianaise na bhforbairtí ó cuireadh an iarraidh isteach (R1/2022) agus, go háirithe, ó tionscnaíodh an t-athbhreithniú éaga ina dhiaidh sin, mheas sé go bhfuil na himthosca maidir leis an Úcráin athraithe a mhéid nach iomchuí a thuilleadh athbhreithniú éaga a shaothrú i gcoinne allmhairí táirgí comhréidhe teorollta ón Úcráin. Go háirithe, thagair an t-iarratasóir do scriosadh cuid mhór acmhainneachtaí táirgí comhréidhe teorollta san Úcráin chomh maith le scriosadh bhonneagar fuinnimh na hÚcráine. Thug an t-iarratasóir dá aire freisin gur choinbhleacht mharthanach a bheadh sa choinbhleacht mhíleata, nó ar a laghad go mbeadh iarmhairtí marthanacha aici maidir leis an Úcráin. Ní shíltear, go háirithe, go bhfillfidh acmhainneachtaí cruach san Úcráin ar a ngnáthoibríochtaí sa ghearrthéarma ná sa mheántéarma agus dá bharr sin ní dócha go mbeadh onnmhairí táirgí comhréidhe teorollta na hÚcráine in ann cur leis an díobháil a d’fhéadfadh a tharlú arís do thionscal an Aontais go luath.

4.   CONCLÚID AGUS NOCHTADH

(8)

I gcomhréir le hAirteagal 9(1) den bhun-Rialachán, féadfar an t-imscrúdú a fhoirceannadh, ach amháin mura mbeadh foirceannadh den sórt sin chun leas an Aontais.

(9)

Níor tháinig aon chúinse chun cinn le linn an imscrúdaithe a léirigh nach mbeadh foirceannadh den sórt sin chun leas an Aontais.

(10)

Dá bhrí sin, mheas an Coimisiún gur cheart imscrúdú an athbhreithnithe a fhoirceannadh a mhéid a bhaineann le hallmhairí ón Úcráin. Leanfaidh an Coimisiún le himscrúdú an athbhreithnithe a mhéid a bhaineann le hallmhairí ón mBrasaíl, ón Iaráin agus ón Rúis.

(11)

Ós rud é nach bhfuil síneadh curtha leis na bearta a mhéid a bhaineann leis an Úcráin, déanfar aon dleacht a bailíodh ó dháta tionscnaimh an imscrúdaithe athbhreithniúcháin éaga ar earraí a ndearnadh imréiteach custaim orthu maidir le hallmhairí an táirge faoi athbhreithniú de thionscnamh na hÚcráine, déanfar na dleachtanna sin a aisíoc ar choinníoll go n-iarrtar sin ar na húdaráis náisiúnta custaim agus go ndeonaíonn na húdaráis an méid sin i gcomhréir le reachtaíocht custaim an Aontais is infheidhme maidir le haisíocaíocht agus loghadh dleachtanna. Thug an Coimisiún dá aire, de bhun Rialachán (AE) 2022/870 ó Pharlaimint na hEorpa agus ón gComhairle (3) nár cheart dleachtanna frithdhumpála ar allmhairí de thionscnamh na hÚcráine ón 4 Meitheamh 2022 amach a bhailiú tráth ar bith. Dá bhrí sin, níl aon dleacht le haisíoc sa chás sin, mar roimh dháta thionscnamh an imscrúdaithe athbhreithniúcháin éaga, bhí bailiú na ndleachtanna frithdhumpála curtha ar fionraí cheana féin ag an Aontas Eorpach ar allmhairí na hÚcráine, lena n-áirítear ar tháirgí comhréidhe teorollta.

(12)

An 21 Nollaig 2022 nocht an Coimisiún do na páirtithe leasmhara uile go raibh rún aige an t-imscrúdú athbhreithniúcháin éaga a fhoirceannadh a mhéid a bhaineann leis an Úcráin agus thug sé deis dóibh a mbarúlacha a chur isteach.

(13)

Ní bhfuair an Coimisiún aon bharúil as a dtiocfaí ar an gconclúid nach mbeadh an foirceannadh sin chun leas an Aontais.

(14)

Tá na bearta dá bhforáiltear sa Rialachán seo i gcomhréir le tuairim an Choiste a bhunaítear le hAirteagal 15 (1) Rialachán (AE) 2016/1036.

TAR ÉIS AN RIALACHÁN SEO A GHLACADH:

Airteagal 1

An t-imscrúdú athbhreithniúcháin éaga a mhéid a bhaineann sé le bearta frithdhumpála is infheidhme i ndáil le hallmhairí táirgí comhréidhe teorollta áirithe, ar táirgí iarainn, cruach neamh-chóimhiotail nó cruach cóimhiotail eile de thionscnamh na hÚcráine iad, rinneadh an t-imscrúdú sin a fhoirceannadh.

Airteagal 2

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 16 Feabhra 2023.

Thar ceann an Choimisiúin

An tUachtarán

Ursula VON DER LEYEN


(1)   IO L 176, 30.6.2016, lch. 21.

(2)   IO C 384, 5.10.2022, lch. 3.

(3)  Rialachán (AE) 2022/870 ó Pharlaimint na hEorpa agus ón gComhairle an 30 Bealtaine 2022 maidir le bearta um léirscaoileadh trádála sealadach lena bhforlíontar na lamháltais trádála is infheidhme i dtaca le táirgí na hÚcráine faoin gComhaontú Comhlachais idir an tAontas agus an Comhphobal Eorpach do Fhuinneamh Adamhach agus a gcuid Ballstát, de pháirt, agus an Úcráin, den pháirt eile (IO L 152, 3.6.2022, lch. 103).