(1)

Ir-Regolament (UE) 2015/2283 jipprevedi li l-ikel ġdid awtorizzat u inkluż fil-lista tal-Unjoni tal-ikel ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni tal-ikel ġdid.

(3)

Fl-20 ta’ Mejju 2020, il-kumpanija Wageningen Plant Research (“l-applikant”) ressqet applikazzjoni għall-awtorizzazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex tintroduċi fis-suq tal-Unjoni l-pjanti tal-Lemna minor u tal-Lemna gibba bħala ikel ġdid. L-applikant talab li l-ikel ġdid jintuża bħala ħaxix, b’mod simili għal ħxejjex oħra bil-weraq, imsajjar jew miżjud ma’ prodotti lesti biex jittieklu għall-popolazzjoni ġenerali.

(4)

Fis-27 ta’ Ottubru 2020, il-Kummissjoni talbet lill-Awtorità Ewropea dwar is-Sigurtà fl-Ikel (“l-Awtorità”) twettaq valutazzjoni tal-pjanti sħaħ tal-Lemna minor u tal-Lemna gibba bħala ikel ġdid.

(5)

Fit-28 ta’ Settembru 2022, l-Awtorità adottat l-opinjoni xjentifika tagħha “Safety of Lemna minor and Lemna gibba whole plant as a novel food pursuant to Regulation (UE) 2015/2283” (3) f’konformità mal-Artikolu 11 tar-Regolament (UE) 2015/2283.

(6)

Fl-opinjoni xjentifika tagħha, l-Awtorità kkonkludiet li l-ikel ġdid fih ammonti ogħla ta’ manganiż meta mqabbel mal-konċentrazzjoni normalment preżenti tal-manganiż fi ħxejjex oħra bil-weraq, li jistgħu jkunu ta’ tħassib għas-sikurezza. Għalhekk, is-sikurezza tal-ikel ġdid ma setgħetx tiġi stabbilita.

(7)

Wara l-adozzjoni tal-opinjoni xjentifika, l-applikant talab lill-Kummissjoni l-possibbiltà li tindirizza t-tħassib dwar is-sikurezza enfasizzat mill-Awtorità fil-konklużjoni tagħha billi jipprovdi informazzjoni addizzjonali li turi li bit-tnaqqis tal-konċentrazzjonijiet tal-manganiż tal-materjal li fih issir il-kultivazzjoni, il-kontenut tal-manganiż fil-Lemna gibba ma jaqbiżx il-kontenut tal-manganiż fil-ħxejjex bil-weraq.

(8)

Fit-30 ta’ April 2024, il-Kummissjoni talbet lill-Awtorità għal assistenza xjentifika u teknika fir-rigward tal-opinjoni xjentifika tal-EFSA dwar “Safety of Lemna minor and Lemna gibba whole plant material as novel food pursuant to Regulation (UE) 2015/2283”, sabiex tevalwa aktar jekk l-informazzjoni addizzjonali pprovduta mill-applikant tindirizzax it-tħassib relatat mal-konsum tal-manganiż.

(9)

Fl-10 ta’ Lulju 2024, l-Awtorità adottat ir-rapport bit-titlu “Scientific and technical assistance report on the evaluation of the safety of Lemna gibba and Lemna minor whole plant material as novel food” (4). Fir-rapport tagħha, l-Awtorità nnutat li l-kontenut tal-manganiż fil-Lemna gibba tnaqqas għal livell ta’ 6 mg/kg ta’ piż frisk (PF), li huwa komparabbli mal-ispinaċi li nstab li għandu l-ogħla kontenut ta’ manganiż fost il-ħxejjex bil-weraq, b’livelli sa 9 mg/kg f’PF. Għalhekk, l-Awtorità kkonkludiet li l-kontenut tal-manganiż fl-ikel ġdid tnaqqas għal livelli li ma jaqbżux dawk fi ħxejjex oħra bil-weraq. Ir-rapport jindika wkoll li peress li ż-żewġ speċijiet tal-Lemna juru kontenut simili ta’ manganiż, jitqies raġonevoli li wieħed jassumi li fil-kundizzjonijiet ta’ kultivazzjoni li għadhom kif ġew applikati, jista’ jinkiseb tnaqqis ekwivalenti fil-kontenut tal-manganiż fil-Lemna minor bl-istess mod miksub fil-Lemna gibba. Fid-dawl ta’ dan ta’ hawn fuq, l-EFSA qieset li l-livell massimu ta’ speċifikazzjoni għall-manganiż fl-ikel ġdid jenħtieġ li jiġi stabbilit għal 6 mg/kg ta’ piż frisk.

(10)

Abbażi ta’ dan, il-Kummissjoni tqis li l-opinjoni xjentifika u r-rapport tekniku jagħtu biżżejjed raġunijiet biex jiġi stabbilit li l-pjanti tal-Lemna gibba u tal-Lemna minor jissodisfaw il-kundizzjonijiet għat-tqegħid tagħhom fis-suq f’konformità mal-Artikolu 12(1) tar-Regolament (UE) 2015/2283.

(11)

Jixraq li l-inklużjoni tal-pjanti tal-Lemna minor u tal-Lemna gibba bħala ikel ġdid fil-lista tal-Unjoni ta’ ikel ġdid ikun fiha l-informazzjoni msemmija fl-Artikolu 9(3) tar-Regolament (UE) 2015/2283.

(12)

Il-pjanti tal-Lemna minor u tal-Lemna gibba jenħtieġ li jiġu inklużi fil-lista tal-Unjoni tal-ikel ġdid stabbilita fir-Regolament ta’ Implimentazzjoni (UE) 2017/2470. Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat kif xieraq.

(13)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,