(1)

Foráiltear le hAirteagal 43(3) den Chonradh go nglacfaidh an Chomhairle, ar thogra ón gCoimisiún, bearta maidir le deiseanna iascaireachta a shocrú agus a chionroinnt.

(2)

Ceanglaítear, le Rialachán (AE) Uimh. 1380/2013 ó Pharlaimint na hEorpa agus ón gComhairle (1), go nglactar bearta caomhnaithe agus aird á tabhairt ar an gcomhairle eolaíoch, theicniúil agus eacnamaíoch a bhíonn ar fáil, lena n-áirítear, i gcás inarb ábhartha, tuarascálacha arna ndréachtú ag an gCoiste Eolaíoch, Teicniúil agus Eacnamaíoch um Iascach (STECF) agus ag comhlachtaí comhairleacha eile, mar aon le haon chomhairle a fhaightear ó chomhairlí comhairleacha.

(3)

Tá sé de dhualgas ar an gComhairle bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis sin, de réir mar is iomchuí. De bhun Airteagal 16(4) de Rialachán (AE) Uimh. 1380/2013, tá deiseanna iascaireachta le socrú i gcomhréir le cuspóirí an Chomhbheartais Iascaigh (CBI) a leagtar amach in Airteagal 2(2) den Rialachán sin. De bhun Airteagal 16(1) den Rialachán sin, tá deiseanna iascaireachta atá cionroinnte ar na Ballstáit le cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic éisc nó iascaigh a áirithiú.

(4)

Ba cheart an ghabháil iomlán incheadaithe (TAC) a bhunú, dá bhrí sin, i gcomhréir le Rialachán (AE) Uimh. 1380/2013, ar bhonn na comhairle eolaíche atá ar fáil, agus aird á tabhairt ar ghnéithe bitheolaíocha agus socheacnamaíocha agus cóir chothrom idir earnálacha iascaireachta á háirithiú ag an am céanna, agus i bhfianaise na dtuairimí a cuireadh in iúl le linn an chomhairliúcháin le geallsealbhóirí, go háirithe ag cruinnithe na gcomhairlí comhairleacha.

(5)

De bhun Airteagal 15 de Rialachán (AE) Uimh. 1380/2013, beidh feidhm ón 1 Eanáir 2019 ag an oibleagáid gabhálacha a thabhairt i dtír ina hiomláine; tá gach speiceas a bheidh faoi réir teorainneacha gabhála le tabhairt i dtír. Foráiltear, le hAirteagal 16(2) de Rialachán (AE) Uimh. 1380/2013, go ndéanfar, nuair a thugtar isteach an oibleagáid maidir le gabhálacha a thabhairt i dtír i ndáil le stoc éisc, deiseanna iascaireachta a shocrú agus aird á tabhairt ar an athrú ó dheiseanna iascaireachta a shocrú a bheidh ina léiriú ar ghabhálacha a thabharfar i dtír go deiseanna iascaireachta a shocrú a bheidh ina léiriú ar ghabhálacha. Ar bhonn na moltaí comhpháirteacha a chuir na Ballstáit isteach agus i gcomhréir le hAirteagal 15 de Rialachán (AE) Uimh. 1380/2013, ghlac an Coimisiún roinnt rialachán tarmligthe lena leagtar síos na sonraí, i bhfoirm pleananna ar leith maidir le hábhar muirí aischurtha, a bhaineann le cur chun feidhme na hoibleagáide gabhálacha a thabhairt i dtír.

(6)

Ba cheart a chur san áireamh sna deiseanna iascaireachta le haghaidh stoic speicis a thagann faoin oibleagáid gabhálacha a thabhairt i dtír, nach gceadaítear a thuilleadh i bprionsabal iasc a aischur. Dá bhrí sin, ba cheart na deiseanna iascaireachta a bheith bunaithe ar an bhfigiúr comhairle le haghaidh gabhálacha iomlána arna chur ar fáil ag an gComhairle Idirnáisiúnta um Thaiscéalaíocht na Mara (ICES) (seachas an figiúr comhairle le haghaidh gabhálacha inmhianaithe). Na cainníochtaí a bhféadfar, mar eisceacht ón oibleagáid gabhálacha a thabhairt i dtír, leanúint de bheith á n-aischur, ba cheart iad a asbhaint ón bhfigiúr comhairle sin le haghaidh gabhálacha iomlána.

(7)

Is ann do stoic áirithe dár eisigh ICES comhairle eolaíoch nach ngabhfar iad in aon chor. Má bhunaítear na TACanna le haghaidh na stoc sin ar an leibhéal a léirítear sa chomhairle eolaíoch, thiocfadh feiniméan an “tachtspeicis” chun cinn de thoradh na hoibleagáide gach gabháil a thabhairt i dtír, lena n-áirítear foghabhálacha ó na stoic sin, in iascaigh mheasctha. Chun an chothromaíocht cheart a bhaint amach idir an t-iascach a choimeád ar bun i bhfianaise na n-impleachtaí tromchúiseacha socheacnamaíocha a d'fhéadfadh a bheith i gceist, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar gach stoc in iascach measctha ag an uastáirgeacht inbhuanaithe (MSY) ag an am céanna, is iomchuí TACanna sonracha a bhunú le haghaidh fhoghabhálacha na stoc sin. Ba cheart leibhéal na TACanna sin a shocrú sa chaoi go laghdófar ráta básmhaireachta na stoc sin agus go mbeidh sin ina dhreasacht chun an roghnaíocht agus an tseachaint a fheabhsú.

(8)

Chun úsáid deiseanna iascaireachta in iascaigh mheasctha i gcomhréir le hAirteagal 16(2) de Rialachán (AE) Uimh. 1380/2013 a ráthú a mhéid is féidir, is iomchuí linn a bhunú le haghaidh malartuithe cuótaí le haghaidh na mBallstát sin nach bhfuil aon chuóta acu chun a bhfoghabhálacha dosheachanta a chumhdach.

(9)

Chun gabhálacha na stoc a bunófar TACanna foghabhála ina leith a laghdú, ba cheart na deiseanna iascaireachta le haghaidh na n-iascach as a ngabhtar na stoic sin a shocrú ar leibhéil a chuideoidh le bithmhais na stoc leochaileach a athshlánú go leibhéil inbhuanaithe. Ba cheart bearta teicniúla agus rialaithe a mbeidh dlúthbhaint acu le deiseanna iascaireachta a bhunú freisin chun aischur neamhdhleathach a chosc.

(10)

I gcomhréir le plean ilbhliantúil Uiscí an Iarthair a bunaíodh le Rialachán (AE) 2019/472 ó Pharlaimint na hEorpa agus ón gComhairle (2) (“plean ilbhliantúil Uiscí an Iarthair”), bhí an spriocbhásmhaireacht iascaireachta le baint amach a luaithe is féidir agus ar bhonn forchéimnitheach agus incriminteach faoi 2020 le haghaidh na stoc a liostaítear in Airteagal 1(1) den Rialachán sin, i gcomhréir le raonta FMSY a shainítear in Airteagal 2 den Rialachán sin, agus tá sí le coinneáil ar bun uaidh sin amach laistigh de raonta FMSY, i gcomhréir le hAirteagal 4 den Rialachán sin. Ba cheart, dá bhrí sin, an bhásmhaireacht iascaireachta fhoriomlán le haghaidh doingin mhara Eorpacha (Dicentrarchus labrax) i ranna 8a agus 8b ICES a shocrú i gcomhréir leis an uastáirgeacht inbhuanaithe, agus gabhálacha tráchtála agus áineasa agus ábhar muirí aischurtha á gcur san áireamh (3 108 dtona ar fad de réir chomhairle ICES). Tá na Ballstáit le bearta iomchuí a ghlacadh chun a áirithiú nach rachaidh an bhásmhaireacht iascaireachta óna gcabhlaigh iascaigh agus óna n-iascairí áineasa os cionn luachphointe FMSY, mar a cheanglaítear le hAirteagal 4(3) agus (4) de Rialachán (AE) 2019/472.

(11)

Ba cheart leanúint de na bearta le haghaidh iascaigh áineasa i gcás doingin mhara Eorpacha agus aird á tabhairt ar thionchar suntasach an iascaigh sin ar na stoic lena mbaineann. Laistigh de theorainneacha na comhairle eolaíche, ba cheart leanúint de na teorainneacha gabhála. Nuair a bhreithnítear an easpa roghnaíocht leordhóthanach agus nuair is dóichí go ngabhfar líon is airde eiseamal ná na teorainneacha bunaithe, ba cheart líonta seasmhacha a chosc. I bhfianaise na n-imthosca comhshaoil, sóisialta agus eacnamaíocha, agus go háirithe i bhfianaise spleáchas na n-iascairí tráchtála ar na stoic sin sna pobail cois cósta, bheadh, leis na bearta sin maidir le doingin mhara Eorpacha, cothromaíocht iomchuí ann idir leasanna na n-iascairí tráchtála agus na n-iascairí áineasa. Go háirithe, cheadódh na bearta sin d'iascairí áineasa a ngníomhaíochtaí iascaireachta a dhéanamh trína dtionchar ar na stoic sin a chur san áireamh.

(12)

Maidir le stoc na heascainne Eorpaí (Anguilla anguilla), mhol ICES gur cheart na básmhaireachtaí antrapaigeanacha uile, lena n-áirítear na básmhaireachtaí a eascraíonn as iascaigh áineasa agus thráchtála, a laghdú go nialas, nó a choimeád chomh gar do nialas agus is féidir. Thairis sin, ghlac an Coimisiún Ginearálta Iascaigh don Mheánmhuir (GFCM) Moladh GFCM/42/2018/1 lena mbunaítear bearta bainistithe le haghaidh na heascainne Eorpaí sa Mheánmhuir. Is iomchuí cothrom na Féinne a choinneáil ar bun ar fud an Aontais agus, dá bhrí sin, tréimhse choiscthe 3 mhí as a chéile le haghaidh gach iascaigh eascann Eorpach ag gach céim dá saolré a choinneáil ar bun freisin i gcás uiscí an Aontais i limistéar ICES agus i gcás uiscí goirte amhail inbhir, murlaigh chósta agus uiscí trasdultacha. Ós rud é gur cheart an tréimhse coiscthe iascaireachta a bheith comhchuí leis na cuspóirí caomhnaithe a leagtar amach i Rialachán (CE) Uimh. 1100/2007 (3) ón gComhairle agus le patrúin imirce ama na heascainne Eorpaí, i gcás uiscí an Aontais i limistéar ICES, is iomchuí í a shocrú sa tréimhse idir an 1 Lúnasa 2021 agus an 28 Feabhra 2022.

(13)

Le roinnt blianta anuas, rinneadh TACanna áirithe i gcás stoic ealásmabrainciach (sciataí, siorcanna, roic) a shocrú ag nialas, agus foráil nasctha ann lena mbunaítear oibleagáid gabhálacha de thaisme a scaoileadh láithreach. Ba é ba chúis leis an gcóir shonrach sin drochstádas caomhnaithe na stoc sin agus an toimhdiú nach méadófaí na rátaí básmhaireachta iascaireachta tríd an aischur, mar gheall ar na rátaí arda marthanais, agus go mbeadh an t-aischur tairbhiúil ó thaobh chaomhnú na speiceas sin. Ón 1 Eanáir 2019, áfach, ní mór gabhálacha na speiceas sin a thabhairt i dtír, murab é go gcumhdaítear iad le haon cheann de na maoluithe ón oibleagáid gabhálacha a thabhairt i dtír dá bhforáiltear in Airteagal 15 de Rialachán (AE) Uimh. 1380/2013. Le pointe (a) d'Airteagal 15(4) den Rialachán sin, ceadaítear na maoluithe sin i gcás speicis a bhfuil lánchosc ar iascaireacht ina leith agus a shainaithnítear mar sin i ngníomh dlí de chuid an Aontais arna ghlacadh i réimse CBI. Dá bhrí sin, is iomchuí toirmeasc a chur ar iascaireacht na speiceas sin sna limistéir lena mbaineann.

(14)

De bhun Airteagal 16(4) de Rialachán (AE) Uimh. 1380/2013, i gcás stoic atá faoi réir pleananna ilbhliantúla sonracha, ba cheart na TACanna a bhunú i gcomhréir leis na rialacha a leagtar síos sna pleananna sin.

(15)

Bunaíodh plean ilbhliantúil na Mara Thuaidh le Rialachán (AE) 2018/973 ó Pharlaimint na hEorpa agus ón gComhairle (4) agus tháinig an plean i bhfeidhm in 2018. Tháinig plean ilbhliantúil Uiscí an Iarthair i bhfeidhm in 2019. Ba cheart deiseanna iascaireachta le haghaidh na stoc a liostaítear in Airteagal 1 de na pleananna sin a shocrú i gcomhréir le spriocanna (raonta FMSY) agus le coimircí dá bhforáiltear sna pleananna sin. Sainaithníodh na raonta FMSY sa chomhairle ábhartha ó ICES. I gcás nach mbeidh faisnéis eolaíoch leordhóthanach ar fáil, ba cheart deiseanna iascaireachta le haghaidh na stoc foghabhála a shocrú i gcomhréir leis an gcur chuige réamhchúraim, mar a leagtar amach sna pleananna ilbhliantúla sin.

(16)

I gcomhréir le hAirteagal 8 de phlean ilbhliantúil Uiscí an Iarthair, i gcás ina léireoidh an chomhairle eolaíoch go bhfuil bithmhais stoic sceite aon cheann de na stoic éisc dá dtagraítear in Airteagal 1(1) den phlean sin faoi bhun an phointe tagartha teorann (Blim), tá bearta ceartaitheacha breise le déanamh chun a áirithiú go ndéanfar leibhéil an stoic éisc a athbhunú go tapa os cionn an leibhéil atá in ann MSY a tháirgeadh. Féadfar a áireamh ar na bearta ceartaitheacha sin, go háirithe, iascaireacht dhírithe an stoic lena mbaineann a chur ar fionraí agus laghdú leordhóthanach deiseanna iascaireachta maidir leis na stoic sin nó na stoic eile san iascach.

(17)

Ba cheart TACanna le haghaidh tuinníní gorma san Atlantach Thoir agus sa Mheánmhuir a bhunú i gcomhréir leis na rialacha a leagtar síos i Rialachán (AE) 2016/1627 ó Pharlaimint na hEorpa agus ón gComhairle (5).

(18)

An 17 Nollaig 2018, d'fhoilsigh ICES comhairle eolaíoch maidir leis an tsolúbthacht idirlimistéir le haghaidh na mbolmán (Trachurus spp.) idir ranna ICES 8c agus 9a. Is é a mhol ICES nár cheart go rachadh an tsolúbthacht idirlimistéir idir an dá stoc sin thar an difríocht idir an ghabháil a chomhfhreagraíonn do bhásmhaireacht iascaireachta Fp.05 agus an TAC bunaithe. Ina theannta sin, níor cheart an TAC a aistriú chuig stoc ag a bhfuil bithmhais stoic sceite atá faoi bhun Blim. Faoi choinníollacha na comhairle eolaíche sin, ba cheart an tsolúbthacht idirlimistéir (coinníoll speisialta) le haghaidh na mbolmán idir folimistéar 9 ICES agus roinn 8c ICES le haghaidh 2021 a bhunú ag 10 %.

(19)

Maidir le stoic nach bhfuil sonraí leordhóthanacha nó iontaofa ar fáil ina leith chun meastacháin ar mhéid a sholáthar, ba cheart, le bearta bainistithe agus leibhéil TAC, cloí leis an gcur chuige réamhchúraim i leith bainistiú iascaigh mar a shainmhínítear é i bpointe (8) d'Airteagal 4(1) de Rialachán (AE) Uimh. 1380/2013, agus fachtóirí stocshonracha á gcur san áireamh san am céanna, lena n-áirítear, go háirithe, an fhaisnéis atá ar fáil faoi threochtaí stoc agus gnéithe maidir leis an iascach measctha.

(20)

Le Rialachán (CE) Uimh. 847/96 ón gComhairle (6), tugadh coinníollacha breise isteach chun TACanna a bhainistiú ó bhliain go bliain, lena n-áirítear, faoi Airteagail 3 agus 4 den Rialachán sin, forálacha solúbthachta le haghaidh TACanna réamhchúraim agus anailíseacha. Faoi Airteagal 2 den Rialachán sin, bíonn sé le cinneadh ag an gComhairle, agus TACanna á mbunú aici, cé na stoic nach mbeidh feidhm ag Airteagail 3 nó 4 den Rialachán sin maidir leo, go háirithe ar bhonn stádas bitheolaíoch na stoc. In 2014, tugadh sásra solúbthachta ó bhliain go bliain breise isteach le hAirteagal 15(9) de Rialachán (AE) Uimh. 1380/2013 maidir le gach stoc atá faoi réir oibleagáid gabhálacha a thabhairt i dtír. Dá bhrí sin, chun solúbthacht iomarcach a sheachaint a bhainfeadh an bonn de phrionsabal shaothrú céillí freagrach na n-acmhainní bitheolaíocha muirí, rud a chuirfeadh bac ar ghnóthú chuspóirí CBI agus a chuirfeadh meath ar stádas bitheolaíoch na stoc, ba cheart a cinneadh a dhéanamh nach mbeidh feidhm ag Airteagail 3 agus 4 de Rialachán (CE) Uimh. 847/96 maidir le TACanna anailíseacha ach amháin i gcás nach mbaintear leas as an tsolúbthacht ó bhliain go bliain dá bhforáiltear in Airteagal 15(9) de Rialachán (AE) Uimh. 1380/2013.

(21)

Ina theannta sin, ós rud é go bhfuil bithmhais na stoc COD/03AS, COD/5BE6A, WHG/56-14, WHG/07A agus PLE/7HJK faoi bhun Blim agus nach gceadaítear ach iascaigh foghabhála agus eolaíocha orthu in 2021, ghlac an Bheilg, an Danmhairg, Éire, an Fhrainc, an Ghearmáin, an Ísiltír agus an tSualainn mar chúram orthu féin gan Airteagal 15(9) de Rialachán (AE) Uimh. 1380/2013 a chur i bhfeidhm maidir leis na stoic sin le haghaidh aistrithe ó 2020 go 2021 ionas nach rachaidh gabhálacha in 2021 thar an TAC arna bhunú le haghaidh na stoc sin.

(22)

I gcás nach gcionroinnfear TAC a bhaineann le stoc ach ar aon Bhallstát amháin, is iomchuí a thabhairt de chumhacht don Bhallstát sin, i gcomhréir le hAirteagal 2(1) den Chonradh, leibhéal an TAC sin a chinneadh. Ba cheart forálacha a dhéanamh chun a áirithiú go ngníomhóidh an Ballstát lena mbaineann, agus leibhéal an TAC sin á chinneadh aige, ar bhealach a bheidh comhchuí go hiomlán le prionsabail agus le rialacha an Chomhbheartais Iascaigh (CBI).

(23)

Ní mór na huasteorainneacha iarrachta iascaireachta le haghaidh 2021 a bhunú i gcomhréir le hAirteagail 5, 6, 7 agus 9 de Rialachán (AE) 2016/1627 agus le hIarscríbhinn I a ghabhann leis.

(24)

Chun a ráthú go mbainfear lánúsáid as deiseanna iascaireachta, is iomchuí foráil a dhéanamh do shocrú solúbtha a chur chun feidhme idir limistéir áirithe TAC inarb é an stoc bitheolaíoch céanna atá i gceist.

(25)

I gcás speicis áirithe, amhail speicis áirithe siorcanna, d'fhéadfadh fiú gníomhaíocht theoranta iascaireachta a bheith ina siocair le riosca tromchúiseach caomhnaithe. Ba cheart mar sin srian iomlán a chur ar dheiseanna iascaireachta i gcás na speiceas sin trí bhíthin toirmeasc ginearálta ar iascaireacht dhéanamh ar na speicis sin.

(26)

Ag an 12ú Comhdháil de na Páirtithe sa Choinbhinsiún maidir le Caomhnú na Speiceas Imirceach Ainmhithe Fiáine, a tionóladh i Mainile ón 23 go dtí an 28 Deireadh Fómhair 2017, cuireadh roinnt speiceas leis na liostaí de speicis faoi chosaint in Aguisíní I agus II a ghabhann leis an gCoinbhinsiún sin. Dá bhrí sin, is iomchuí foráil a dhéanamh maidir le cosaint na speiceas sin i dtaca le soithí iascaireachta de chuid an Aontais sna huiscí uile agus i dtaca le soithí iascaireachta nach den Aontas iad ach a bhíonn ag iascaireacht in uiscí an Aontais.

(27)

Tá úsáid na ndeiseanna iascaireachta atá ar fáil ag soithí iascaireachta de chuid an Aontais a leagtar amach sa Rialachán seo faoi réir Rialachán (CE) Uimh. 1224/2009 ón gComhairle (7), agus go háirithe Airteagail 33 agus 34 den Rialachán sin, maidir le gabhálacha agus iarracht iascaireachta a thaifeadadh agus maidir le fógra a thabhairt faoi shonraí i ndáil le hídiú deiseanna iascaireachta. Ní mór, dá bhrí sin, na cóid atá le húsáid ag na Ballstáit a shonrú agus sonraí á gcur chuig an gCoimisiún acu maidir le stoic éisc a thabhairt i dtír atá faoi réir an Rialacháin seo.

(28)

Is iomchuí, tar éis comhairle a fháil ó ICES, córas sonrach a choimeád chun corra gainimh agus foghabhálacha gaolmhara a bhainistiú i ranna 2a agus 3a ICES agus i bhfolimistéar 4 ICES. Ós rud é go meastar nach mbeidh an chomhairle eolaíoch ó ICES ar fáil go dtí mí Feabhra 2021, is iomchuí an TAC agus na cuótaí le haghaidh an stoic sin a bhunú go sealadach ag nialas go dtí go n-eiseofar an chomhairle sin. I gcomhréir leis an nós imeachta dá bhforáiltear sna comhaontuithe nó sna prótacail ar an gcaidreamh iascaigh leis an Iorua agus le hOileáin Fharó, thionóil an tAontas comhairliúcháin maidir le cearta iascaireachta leis na comhpháirtithe sin.

(29)

Tá TAC an Aontais le haghaidh haileabó Graonlannach in uiscí idirnáisiúnta d'fholimistéir ICES 1 agus 2 gan dochar do sheasamh an Aontais maidir le cion iomchuí an Aontais san iascach sin.

(30)

Ag an gcruinniú bliantúil a bhí aige in 2020, ghlac Coimisiún Iascaigh an Atlantaigh Thoir Thuaidh (NEAFC) beart caomhnaithe maidir leis an dá stoc péirsí mara i Muir Irminger agus sna huiscí taobh léi, lenar cuireadh toirmeasc ar iascaireacht dhíreach a dhéanamh ar na stoic sin. Ina theannta sin, chuir sé toirmeasc ar ghníomhaíochtaí iascaireachta sa limistéar ina gcomhchruinníonn péirsí mara, chun foghabhálacha a íoslaghdú. Ba cheart an beart sin de chuid NEAFC, bunaithe ar an gcomhairle ó ICES nach ndéanfaí aon ghabhálacha, a chur chun feidhme i ndlí an Aontais. Níorbh fhéidir le NEAFC moladh a ghlacadh maidir le péirsí mara i bhfolimistéir ICES 1 agus 2. Ba cheart an TAC ábhartha a bhunú le haghaidh an stoic sin i gcomhréir le seasamh an Aontais a cuireadh iúl laistigh de NEAFC.

(31)

De dheasca phaindéim COVID-19, tháinig próiseas cinnteoireachta trí chomhfhreagras in ionad chruinniú bliantúil an Choimisiúin Idirnáisiúnta um Chaomhnú Thuinníní an Atlantaigh (ICCAT) don bhliain 2020, ar próiseas é ar cuireadh tús leis i mí Dheireadh Fómhair 2020 agus ar cheart deireadh a bheith leis go luath i mí Eanáir 2021. Ba cheann de phríomhchuspóirí an phróisis cinnteoireachta sin go bhféadfaí bearta a bhí ann cheana agus a thiocfadh chun deiridh in 2020 a fhadú trí bhíthin mionoiriúnuithe teicniúla i gcás inar ghá.

(32)

Le Moladh 19-04 ó ICCAT maidir le plean bainistíochta don tuinnín gorm, ní bhunaítear TAC ach le haghaidh 2019 agus 2020. Dá bhrí sin, níl cinneadh glactha ag ICCAT go fóill maidir leis an leibhéal TAC le haghaidh 2021. I bhfianaise an phróisis cinnteoireachta in 2020, moladh go leanfaí an chomhairle eolaíoch, ina moltar an TAC a choimeád ag 36 000 tona. Cé gur cosúil go bhfuil comhthoil ann i dtaobh leibhéal an TAC, tá baol ann nach nglacfaidh ICCAT go foirmiúil é sula nglacfar an Rialachán seo. Ba cheart, dá bhrí sin, an TAC a bhunú ar an leibhéal sin, ach ba cheart é a athbhreithniú a luaithe is féidir má ghlacann ICCAT TAC difriúil.

(33)

Le linn phróiseas cinnteoireachta ICCAT 2020, mhol an tAontas plean cuimsitheach ina raibh TAC darbh aidhm deireadh a chur le ró-iascaireacht ar mhácónna biorshrónacha san Atlantach Thuaidh, mar aon le sraith beart tionlacain chun a bhásmhaireacht a laghdú a thuilleadh. Agus gan aon chomhthoil ann laistigh de ICCAT, agus i bhfianaise staid uafásach an stoic sin agus ós rud é gurb é an tAontas atá freagrach as dhá thrian de leibhéal na gabhála, ba cheart don Aontas teorainn gabhála aontaobhach a bhunú don speiceas sin. Bheadh an teorainn ghabhála sin ag comhfhreagairt do sciar an Aontais den teorainn arna éileamh ag an gcoiste eolaíoch ar leibhéal ICCAT.

(34)

Le Moladh 17-04 ó ICCAT maidir le riail rialaithe gabhála (HCR) do thuinnín colgach an Atlantaigh Thuaidh, ní bhunaítear TAC ach don tréimhse 2018–2020. Dá bhrí sin, níl cinneadh glactha ag ICCAT go fóill maidir leis an leibhéal TAC le haghaidh 2021. I bhfianaise an phróisis cinnteoireachta in 2020, moladh go leanfaí an chomhairle eolaíoch a mholann go ndéantar TAC nua a bhunú ar bhonn an HCR eatramhach atá ann faoi láthair, agus nach ndéantar méadú pro rata ar na gabhálacha agus ar theorainneacha eile a chur chun feidhme ach ar feadh aon bhliain amháin. Cé gur cosúil go bhfuil comhthoil ann i dtaobh leibhéal an TA, tá baol ann nach nglacfaidh ICCAT go foirmiúil é sula nglacfar an Rialachán seo. Ba cheart, dá bhrí sin, an TAC a bhunú ar an leibhéal sin, ach ba cheart é a athbhreithniú a luaithe is féidir má ghlacann ICCAT TAC difriúil.

(35)

I bhfianaise an phróisis cinnteoireachta in 2020, níor ghlac ICCAT na TACanna go foirmiúil fós le haghaidh tuinníní mórshúileacha, tuinníní buí, mairlíní gorma ná mairlíní geala. Cé gur cosúil go bhfuil comhthoil ann i dtaobh leibhéal na TACanna, tá baol ann nach nglacfaidh ICCAT go foirmiúil iad sula nglacfar an Rialachán seo. Ba cheart, dá bhrí sin, na TACanna a bhunú ar an leibhéal sin ach ba cheart iad a athbhreithniú a luaithe is féidir má ghlacann ICCAT TACanna difriúla.

(36)

Ag an gcruinniú bliantúil a bhí aige in 2020, ghlac na páirtithe sa Choimisiún um Chaomhnú Beo-Acmhainní Muirí Antartacha (CCAMLR) teorainneacha gabhála le haghaidh na spriocspeiceas agus na speiceas foghabhála araon le haghaidh na tréimhse ón 1 Nollaig 2020 go dtí an 30 Samhain 2021. Ba cheart glacadh na gcuótaí le linn 2020 a chur san áireamh agus deiseanna iascaireachta á bunú le haghaidh 2021.

(37)

Ag an gcruinniú bliantúil a bhí aige in 2020, choinnigh an Coimisiún um Thuinníní an Aigéin Indiaigh (IOTC) na bearta caomhnaithe agus bainistíochta a glacadh roimhe sin. Ba cheart leanúint de na bearta sin a chur chun feidhme i ndlí an Aontais.

(38)

Tionólfar cruinniú bliantúil na hEagraíochta Réigiúnaí um Bainistíocht Iascaigh san Aigéan Ciúin Theas (SPRFMO) ón 21 Eanáir go dtí an 1 Feabhra 2021. Ba cheart na bearta reatha i limistéar Choinbhinsiún SPRFMO a choinneáil go sealadach go dtí go dtionólfar an cruinniú bliantúil sin.

(39)

Ag an gcruinniú a bhí aige in 2020, níor tháinig an Coimisiún Idir-Mheiriceánach um Thuinníní Teochreasacha (IATTC) ar chomhthoil i dtaobh síneadh a chur leis an mbeart is déanaí maidir le tuinníní trópaiceacha, a chuaigh in éag an 31 Nollaig 2020. Mar thoradh air sin, ní bheidh iascach an tuinnín ghoirm san Aigéan Ciúin Thoir á rialú amhail ón 1 Eanáir 2021. I bhfianaise phrionsabal réamhchúraim CFP, is iomchuí go leanann an tAontas d'fhorálacha a chur i bhfeidhm maidir le tuinníní treochreasacha mar a leagtar amach sa Rialachán (AE) 2020/123 ón gComhairle (8) go dtí go gcomhaontóidh IATTC beart maidir le tuinníní trópaiceacha.

(40)

Ag an gcruinniú bliantúil a bhí aige in 2020, dhaingnigh an Coimisiún um an Tuinnín Gorm Deisceartach a Chaomhnú an TAC don tuinnín gorm deisceartach le haghaidh 2021 a glacadh ag an gcruinniú bliantúil in 2016. Ba cheart na bearta sin a chur chun feidhme i ndlí an Aontais.

(41)

Ag an gcruinniú bliantúil a bhí aici in 2020, chinn Eagraíocht Iascaigh an Atlantaigh Thoir Theas (SEAFO) na TACanna le haghaidh 2020 le haghaidh na bpríomhspeiceas faoina cúram a chur i bhfeidhm in 2021 go dtí go mbeidh an chéad chruinniú bliantúil eile aici in 2021. Ba cheart na bearta sin a chur chun feidhme i ndlí an Aontais.

(42)

Ag an gcruinniú bliantúil a bhí aige in 2020, chuir an Coimisiún Iascaigh don Aigéan Ciúin Iartharach agus don Aigéan Ciúin Láir (WCPFC) síneadh leis na bearta caomhnúcháin agus bainistíochta le haghaidh tuinníní trópaiceacha. Shoiléirigh sé freisin na teorainneacha gabhála is infheidhme maidir le báid spiléireachta de chuid an Aontais atá ag iascaireacht tuinníní mórshúileacha. Ba cheart na bearta sin a chur chun feidhme i ndlí an Aontais.

(43)

Ag an 42ú cruinniú bliantúil a bhí aici, in 2020, ghlac Eagraíocht Iascaigh an Atlantaigh Thiar Thuaidh (NAFO) roinnt deiseanna iascaireachta le haghaidh 2021 i gcás stoic áirithe i bhfolimistéir 1 go 4 de limistéar Choinbhinsiún NAFO. Ba cheart na bearta sin a chur chun feidhme i ndlí an Aontais.

(44)

Ag an 7ú cruinniú de na páirtithe i gComhaontú Iascaigh an Aigéin Indiaigh Theas (SIOFA), in 2020, coinníodh na TACanna le haghaidh na stoc sin a glacadh in 2019 faoi raon feidhme an chomhaontaithe. Ba cheart na bearta sin a chur chun feidhme i ndlí an Aontais.

(45)

A mhéid a bhaineann leis na deiseanna iascaireachta le haghaidh na bportán sneachta timpeall ar limistéar Svalbard, deonaítear faoi Chonradh an 9 Feabhra 1920 a bhaineann le Spitsbergen (Svalbard) (“Conradh Pháras 1920”) rochtain chomhionann agus neamh-idirdhealaitheach ar acmhainní do gach Páirtí sa Chonradh sin, lena n-áirítear i ndáil le hiascaireacht. Leagadh amach tuairim an Aontais maidir leis an rochtain sin, a mhéid a bhaineann le hiascaireacht a dhéanamh ar phortáin sneachta ar an scairbh ilchríochach timpeall ar Svalbard, in dhá note verbale chuig an Iorua dar dáta an 25 Deireadh Fómhair 2016 agus an 24 Feabhra 2017. Chun a áirithiú go dtabharfar saothrú portán sneachta laistigh de limistéar Svalbard i gcomhchuibheas le cibé rialacha bainistithe neamh-idirdhealaitheacha a d'fhéadfadh an Iorua a leagan amach, a bhfuil ceannasacht agus dlínse aici sa limistéar laistigh de theorainneacha an Chonartha sin, is iomchuí an líon soithí dá n-údaraítear an t-iascach sin a dhéanamh a shocrú. Tá cionroinnt na ndeiseanna iascaireachta sin ar na Ballstát teoranta do 2021. Meabhraítear gur ar na Ballstáit bhrataí atá an phríomhfhreagracht, san Aontas, comhlíonadh an dlí is infheidhme a áirithiú.

(46)

I gcomhréir leis an Dearbhú chuig Poblacht Bholavarach Veiniséala maidir le deiseanna iascaireachta in uiscí an Aontais a dheonú do shoithí iascaireachta a mbeidh bratach Phoblacht Bholavarach Veiniséala ar foluain acu sa limistéar eacnamaíoch eisiach amach ó chósta Ghuáin na Fraince (9) arna eisiúint ag an Aontas, ní mór na deiseanna iascaireachta le haghaidh sclamhairí a bheidh ar fáil do Veiniséala in uiscí an Aontais a shocrú.

(47)

Ós rud é go mbeidh forálacha áirithe le cur i bhfeidhm ar bhonn leanúnach, agus chun éiginnteacht dhlíthiúil a sheachaint le linn na tréimhse idir deireadh 2021 agus dáta theacht i bhfeidhm an Rialacháin lena socraítear na deiseanna iascaireachta le haghaidh 2022, ba cheart na forálacha maidir le toirmisc agus séasúir choiscthe a leagtar amach sa Rialachán seo a bheith fós infheidhme ag tús 2022, go dtí go dtiocfaidh an Rialachán lena socraítear na deiseanna iascaireachta le haghaidh 2022 i bhfeidhm.

(48)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún a mhéid a bhaineann le Ballstáit aonair a údarú chun cionrannta iarrachta iascaireachta a bhainistiú i gcomhréir le córas cileavat-lae. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (10).

(49)

Chun coinníollacha aonfhoirmeacha a áirithiú maidir le cur chun feidhme an Rialacháin seo, ba cheart cumhachtaí cur chun feidhme a thabhairt don Choimisiún a mhéid a bhaineann le laethanta breise ar muir a dheonú le haghaidh scor buan gníomhaíochtaí iascaireachta agus le haghaidh cumhdach feabhsaithe breathnóirí eolaíochta, agus a mhéid a bhaineann le formáidí scarbhileoige a bhunú chun faisnéis a bhailiú agus a tharchur a bhaineann le haistriú laethanta ar muir idir soithí iascaireachta a bhfuil bratach Bhallstáit ar foluain acu. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011.

(50)

Chun cur isteach ar ghníomhaíochtaí iascaireachta a sheachaint agus slí bheatha iascairí an Aontais a áirithiú, ba cheart feidhm a bheith ag an Rialachán seo ón 1 Eanáir 2021, cé is moite de na forálacha a bhaineann le teorainneacha ar iarrachtaí iascaireachta, ar cheart feidhm a bheith acu ón 1 Feabhra 2021, agus forálacha áirithe a bhaineann le réigiúin ar leith, ar cheart dáta sonrach cur i bhfeidhm a bheith ag gabháil leo. Ar chúiseanna práinne, ba cheart go dtiocfadh an Rialachán i bhfeidhm láithreach tar éis a fhoilsithe.

(51)

Glacfaidh na heagraíochtaí ábhartha réigiúnacha bainistithe iascaigh (ERBIanna) bearta idirnáisiúnta áirithe lena gcruthófar nó lena srianfar deiseanna iascaireachta le haghaidh an Aontais ag deireadh na bliana agus beidh feidhm ag na bearta sin sula dtiocfaidh an Rialachán seo i bhfeidhm. Ní mór, dá bhrí sin, go mbeadh feidhm chúlghabhálach ag na forálacha lena gcuirtear na bearta sin chun feidhme i ndlí an Aontais. Go háirithe, ós rud é go maireann an séasúr iascaireachta i limistéar Choinbhinsiún CAMLR ón 1 Nollaig go dtí an 30 Samhain agus, ar an gcaoi sin, go leagtar síos deiseanna nó toirmisc áirithe iascaireachta i limistéar Choinbhinsiún CAMLR le haghaidh na tréimhse dar tús an 1 Nollaig 2020, is iomchuí feidhm a bheith ag forálacha ábhartha an Rialacháin seo ón dáta sin. Ní dhéanann an cur i bhfeidhm cúlghabhálach sin dochar do phrionsabal an ionchais dhlisteanaigh ós rud é go bhfuil cosc ar chomhaltaí CCAMLR iascaireacht a dhéanamh i Limistéar Choinbhinsiún CAMLR gan údarú.

(52)

Stoic chomhroinnte a bheidh i líon mór stoc feasta de bharr tharraingt siar na Ríochta Aontaithe as an Aontas. Rachaidh an Coimisiún i mbun comhairliúcháin dhéthaobhacha leis an Ríocht Aontaithe, i mbun comhairliúcháin dhéthaobhacha leis an Iorua agus i mbun chomhairliúcháin thríthaobhacha leis an Ríocht Aontaithe agus leis an Iorua ar bhonn an dréachtseasaimh ón Aontas atá le formhuiniú ag an gComhairle. Ós rud é nár tugadh na comhairliúcháin sin i gcrích go fóill, ba cheart don Chomhairle, ar shlí ina dtugtar lánurraim do Choinbhinsiún na Náisiún maidir le Dlí na Farraige (UNCLOS), do chearta agus d'oibleagáidí na stát cósta agus dá gceannasacht agus dá ndlínse, ba cheart di TACanna sealadacha a bhunú a mhéid a bhaineann le hiascaireacht a dhéanamh in uiscí an Aontais agus in uiscí idirnáisiúnta, agus in uiscí a dtugann tríú tíortha rochtain do shoithí an Aontais orthu.

(53)

Ba cheart é a bheith d'aidhm ag na TACanna sealadacha a áirithiú go leanfar de ghníomhaíochtaí iascaireachta inbhuanaithe an Aontais go dtí go dtabharfar na comhairliúcháin sin i gcrích agus creat dlíthiúil an Aontais agus oibleagáidí idirnáisiúnta á gcomhlíonadh nó, mura féidir iad a thabhairt i gcrích go rathúil, go dtí go mbunóidh an Chomhairle TACanna aontaobhacha an Aontais in 2021. In imthosca ar bith, níor cheart go gcuirfeadh na deiseanna iascaireachta sealadacha sin bac ar dheiseanna iascaireachta cinntitheacha a shocrú i gcomhréir le comhaontuithe idirnáisiúnta, go háirithe an Comhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (11), atá i bhfeidhm go sealadach ón 1 Eanáir 2021 (12) agus leis an toradh ar chomhairliúcháin, le creat dlíthiúil an Aontais agus leis an gcomhairle eolaíoch. Mar chur chuige ginearálta, ba cheart dóibh freagairt do 25 % de sciar an Aontais de na deiseanna iascaireachta a socraíodh le haghaidh 2020. Ríomhadh sciar an Aontais de na deiseanna iascaireachta sin i gcomhréir le prionsabal na cobhsaíochta coibhneasta agus “Roghanna na Háige”. Tá an cur chuige sin gan dochar do chur chuige a fhéadfar a ghlacadh maidir leis na comhaontuithe idirnáisiúnta a bheidh ann amach anseo. I gcásanna dar líon an-teoranta, ba cheart céatadán eile a úsáid nuair is ag tús na bliana den chuid is mó a dhéantar iascaireacht ar na stoic sin nó má cheanglaítear leis an gcomhairle eolaíoch laghduithe móra a dhéanamh i ndeiseanna iascaireachta. Chuaigh an tAontas i gcomhairle leis na tríú tíortha ábhartha maidir leis an gcur chuige chun TACanna sealadacha a bhunú.

(54)

De réir na comhairle eolaíche, tá bithmhais stoic sceite an doingin mara Eorpaigh sa Mhuir Cheilteach, i Muir nIocht, i Muir Éireann agus i ndeisceart na Mara Thuaidh (ranna 4b, 4c, 7a, agus 7d go 7h ICES) ag meath ó 2009 agus é faoi bhun MSY Btrigger agus ar éigean os cionn Blim faoi láthair. De bharr na mbeart a rinne an tAontas, tá laghdú tagtha ar an mbásmhaireacht iascaireachta agus é faoi bhun luachphointe FMSY faoi láthair. Tá an earcaíocht íseal, áfach, agus í ag athrú gan treocht ó 2008 i leith. Dá bhrí sin, ba cheart leanúint leis na teorainneacha gabhála ar bhonn sealadach agus ar feitheamh na gcomhairliúchán le tríú tíortha, agus a áirithiú ag an am céanna nach rachaidh an spriocbhásmhaireacht iascaireachta le haghaidh an stoic sin os cionn MSY. Ar choinníoll gur stoc comhroinnte le tríú tíortha é an doingean mara Eorpach sa limistéar sin, ba cheart bearta sealadacha a shocrú don chéad ráithe de 2021 le haghaidh an stoic sin, ar feitheamh thoradh na caibidlíochta agus na gcomhairliúchán idirnáisiúnta.

(55)

Sa chomhairle uaidh le haghaidh 2021, chuir ICES in iúl go bhfuil na stoic trosc agus faoitíní sa Mhuir Cheilteach faoi bhun Blim. Rinneadh bearta ceartaitheacha sonracha cheana le haghaidh na stoc sin de bhun Rialachán (AE) 2020/123. Ba é cuspóir na mbeart sin cuidiú le téarnamh na stoc lena mbaineann. Tá sé d'aidhm ag na bearta sin feabhas a chur ar an roghnaíocht trí úsáid trealaimh a bhfuil leibhéil níos ísle aige d'fhoghabhálacha trosc a dhéanamh éigeantach sna limistéir ina mbíonn líon suntasach gabhálacha trosc, rud a laghdódh básmhaireacht iascaireachta an stoic sin in iascaigh mheasctha. Is é atá sna bearta le haghaidh faoitíní modhnuithe teicniúla ar shaintréithe trealaimh chun foghabhálacha faoitíní a laghdú. I gcomhréir le hAirteagal 8 de phlean ilbhliantúil Uiscí an Iarthair, i gcás ina léireoidh an chomhairle eolaíoch go bhfuil bithmhais stoic sceite aon cheann de na stoic éisc dá dtagraítear in Airteagal 1(1) den phlean sin faoi bhun Blim, tá bearta ceartaitheacha breise le déanamh chun a áirithiú go ndéanfar leibhéil an stoic éisc a athbhunú go tapa os cionn an leibhéil atá in ann MSY a tháirgeadh. Go háirithe, féadfar a áireamh ar na bearta ceartaitheacha sin iascach dírithe an stoic lena mbaineann a chur ar fionraí agus deiseanna iascaireachta a laghdú go leordhóthanach do na stoic sin nó do na stoic eile in iascaigh ina dtarlaíonn foghabhálacha trosc nó faoitíní.

(56)

Tá nasc feidhmiúil idir na bearta chun foghabhálacha gadóideach a laghdú agus TACanna na speiceas a ghabhtar in iascaigh mheasctha mar aon le gadóidigh (e.g. cadóga, méigrim scoilteán, láimhínigh agus gliomach na hIorua), mar, gan na bearta sin a bheith i bhfeidhm, ba cheart leibhéil TAC na spriocspeiceas a laghdú chun a áirithiú go mbeidh stoic gadóideach in ann téarnamh. Tá sé beartaithe, dá bhrí sin, na bearta sin a ghlacadh le haghaidh 2021 freisin, agus measúnú breise ar na bearta sin agus obair arna déanamh ag Ballstáit Uiscí an Iarthuaiscirt á gcur san áireamh.

(57)

I gcomhréir le próiseas réigiúnaithe CBI, chuir Ballstáit Uiscí an Iarthuaiscirt moladh comhpháirteach isteach maidir le raon níos leithne beart sonrach chun foghabhálacha trosc agus faoitíní sa Mhuir Cheilteach agus i limistéir chóngaracha a laghdú, bunaithe ar na bearta ceartaitheacha a bhí i bhfeidhm in 2020. Áirítear sa mholadh comhpháirteach sin freisin bearta roghnaíochta a bhfuil sé d'aidhm acu foghabhálacha gadóideach a laghdú i Muir Éireann agus in iarthar na hAlban, bunaithe ar bhearta comhchosúla a bhí i bhfeidhm in 2020.

(58)

Measann STECF go bhfuil, ar an iomlán, na bearta atá beartaithe níos roghnaithí ná na bearta teicniúla in Rialachán (AE) 2019/1241 ó Pharlaimint na hEorpa agus ón gComhairle (13), nó, ar a laghad, go bhfuil siad chomh roghnaitheach céanna leo, agus tá an Coimisiún ag féachaint faoi láthair ar na bearta sin a áireamh i ngníomh tarmligthe bunaithe ar an moladh comhpháirteach arna thíolacadh ag na Ballstáit ag a bhfuil leas díreach bainistíochta in Uiscí an Iarthuaiscirt.

(59)

Ós rud é go bhfuil na bearta sin níos cuimsithí agus go mbeidh feidhm acu ar bhonn níos cobhsaí, níor cheart feidhm a bheith ag na bearta teicniúla atá nasctha go feidhmiúil leo ach amháin in éagmais ghnímh tharmligthe arna ghlacadh i gcomhréir le hAirteagal 15(2) de Rialachán (AE) 2019/1241 agus lena leasaítear Iarscríbhinn VI den Rialachán sin trí bhearta teicniúla comhfhreagracha a thabhairt isteach d'Uiscí an Iarthuaiscirt.

(60)

Ba cheart deiseanna iascaireachta a úsáid i gcomhlíonadh iomlán dhlí an Aontais,