(1)

Ir-Regolament ta' Implimentazzjoni tal-Kummissjoni (UE) Nru 391/2013 (2) jistabbilixxi skema komuni ta' imposti għas-servizzi tan-navigazzjoni tal-ajru. L-iskema komuni ta' imposti hija element integrali għall-ksib tal-objettivi tal-iskema ta' prestazzjoni kif stipulati fl-Artikolu 11 tar-Regolament (KE) Nru 549/2004 tal-Parlament Ewropew u tal-Kunsill (3) u fir-Regolament ta' Implimentazzjoni tal-Kummissjoni (UE) Nru 390/2013 (4).

(2)

Id-Deċiżjoni tal-Kummissjoni 2011/121/UE (5) stabbilixxiet miri ta' prestazzjoni kif ukoll mira ta' kosteffiċjenza għall-forniment ta' servizzi tan-navigazzjoni tal-ajru mill-2012 sal-2014. Permezz tal-ittri tad-19 ta' Lulju 2012 u tas-17 ta' Diċembru 2012, il-Kummissjoni infurmat lill-Istati Membri li l-pjanijiet u l-miri ta' prestazzjoni riveduti tagħhom huma konsistenti mal-miri ta' prestazzjoni tal-Unjoni Ewropea kollha li ġew adottati, u li dawn qed jagħtu kontribuzzjoni xierqa lill-istess miri tal-Unjoni Ewropea. Il-miri tal-kosteffiċjenza huma espressi f'termini ta' rati għal kull unità determinati.

(3)

Skont l-Artikolu 17(1)(b) u (c) tar-Regolament ta' Implimentazzjoni (UE) Nru 391/2013, il-Kummissjoni għandha tevalwa fuq bażi annwali r-rati għal kull unità għaż-żoni tal-imposti, ippreżentati mill-Istati Membri lill-Kummissjoni, skont id-dispożizzjonijiet ta' dak ir-Regolament u r-Regolament ta' Implimentazzjoni (UE) Nru 390/2013.

(4)

Fl-2013, il-Kummissjoni wettqet il-valutazzjoni tagħha tar-rati tal-2014 għal kull unità għaż-żoni tal-imposti bl-appoġġ tal-Korp ta' Analiżi tal-Prestazzjoni (PRB) u tal-Uffiċċju Ċentrali tal-Imposti tar-Rotot tal-Eurocontrol, u bl-użu tad-dejta u l-informazzjoni addizzjonali li ġew ipprovduti mill-Istati Membri. Bħala konsegwenza, hija adottat id-Deċiżjoni tal-Kummissjoni 2013/631/UE (6). Permezz ta' dik id-Deċiżjoni, il-Kummissjoni nnotifikat lill-Istati Membri, skont l-Artikolu 17(1)(d) tar-Regolament ta' Implimentazzjoni (UE) Nru 391/2013, li kienet sabet li r-rati tal-2014 għal kull unità għaż-żoni tal-imposti ppreżentati lilha huma konformi mar-Regolamenti ta' Implimentazzjoni (UE) Nru 390/2013 u (UE) Nru 391/2013.

(5)

Wara l-adozzjoni tad-Deċiżjoni 2013/631/UE, fl-2014, il-Bulgarija, id-Danimarka, il-Litwanja, l-Ungerija, il-Polonja u s-Slovakkja infurmaw lill-Kummissjoni dwar il-bidliet f'ċerti parametri tal-kalkolu tar-rati għal kull unità rispettivi, li ma kinux magħrufa lilhom fil-mument tal-preżentazzjoni tad-dejta inizjali u tal-informazzjoni addizzjonali lill-Kummissjoni għall-valutazzjoni tal-konformità tagħha u li kien jeħtiġilha ċerti korrezzjonijiet għar-rati tal-2014 għal kull unità kkonċernati. Dawn is-sitt Stati Membri għalhekk ippreżentatw rati kkoreġuti għal kull unità lill-Kummissjoni.

(6)

Skont l-Artikolu 17(1)(c) u (d) tar-Regolament ta' Implimentazzjoni (UE) Nru 391/2013, il-Kummissjoni vvalutat dawk ir-rati tal-2014 għal kull unità kkoreġuti għaż-żoni tal-imposti fil-Bulgarija, id-Danimarka, il-Litwanja, l-Ungerija, il-Polonja u s-Slovakkja skont id-dispożizzjonijiet tar-Regolamenti ta' Implimentazzjoni (UE) Nru 390/2013 u (UE) Nru 391/2013 u kkonkludiet li huma konformi. Din is-sejba għandha għalhekk tiġi notifikata lill-Istati Membri kkonċernati.

(7)

Għall-finijiet taċ-ċarezza u t-trasparenza, id-Deċiżjoni 2013/631/UE għandha titħassar u tinbidel b'din id-Deċiżjoni.

(8)

In-notifika li rati għal kull unità għaż-żoni tal-imposti huma konformi mar-Regolamenti ta' Implimentazzjoni (UE) Nru 390/2013 u (UE) Nru 391/2013 hija mingħajr preġudizzju għall-Artikolu 16 tar-Regolament (KE) Nru 550/2004.

(9)

Il-miżuri previsti f'din id-Deċiżjoni huma skont l-opinjoni tal-Kumitat dwar Ajru Uniku,