European flag

Iris Oifigiúil
an Aontais Eorpaigh

GA

Sraith L


2024/2721

25.10.2024

RIALACHÁN CUR CHUN FEIDHME (AE) 2024/2721 ÓN gCOIMISIÚN

an 24 Deireadh Fómhair 2024

lena gcuirtear allmhairí bróg riantáin cruach de thionscnamh Dhaon-Phoblacht na Síne faoi réir a gcláraithe

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2016/1036 ó Pharlaimint na hEorpa agus ón gComhairle an 8 Meitheamh 2016 maidir le cosaint i gcoinne allmhairí dumpáilte ó thíortha nach baill den Aontas Eorpach iad (1) (‘an bun-Rialachán’), agus go háirithe Airteagal 14(5) de,

Tar éis na Ballstáit a chur ar an eolas,

De bharr an mhéid seo a leanas:

(1)

An 23 Lúnasa 2024, d’fhógair an Coimisiún Eorpach (‘an Coimisiún’), trí fhógra a foilsíodh in Iris Oifigiúil an Aontais Eorpaigh (‘an fógra tionscnaimh’) (2), gur tionscnaíodh imeachtaí frithdhumpála maidir le hallmhairí bróg riantáin cruach isteach san Aontas de thionscnamh Dhaon-Phoblacht na Síne.

(2)

Tionscnaíodh na himeachtaí seo tar éis gearán a chuir Duferco Travi e Profilati S.p.A. isteach an 12 Iúil 2024 thar ceann táirgeoirí a bhfuil níos mó ná 25 % de tháirgeacht iomlán bróg riantáin cruach an Aontais acu.

1.   TÁIRGE ATÁ FAOI RÉIR CLÁRÚCHÁIN

(3)

Is é atá sa táirge atá faoi réir a chláraithe (‘an táirge lena mbaineann’) cineálacha áirithe bróg cruach, bíodh pillíní rubair ceangailte díobh nó ná bíodh, bídís cóimeáilte i slabhra rianta nó ná bíodh, nach mó ná 3 000 mm a bhfad, a úsáidtear ar mheaisíní atá faoi cheannteidil 8426 , 8429 nó 8430 faoi láthair, nó ar chriosanna iompair atá faoi cheannteideal 8428 faoi láthair.

(4)

Tá an táirge lena mbaineann aicmithe faoi láthair faoi chóid AC ex 8431 49 20 , ex 8431 39 00 , agus ex 8431 49 80 (cóid TARIC 8431 49 20 10, 8431 39 00 20 agus 8431 49 80 10). Is ar mhaithe le faisnéis amháin a thugtar na cóid AC agus TARIC agus gan dochar d’aon athrú a dhéanfaí ar an aicmiú taraife ina dhiaidh sin.

2.   CLÁRÚ

(5)

Faoi Airteagal 14(5) den bhun-Rialachán, féadfar allmhairí an táirge lena mbaineann a chur faoi réir a gcláraithe chun a áirithiú go bhféadfar na dleachtanna sin a ghearradh go cúlghabhálach, má chomhlíontar na coinníollacha is gá, ar na hallmhairí cláraithe i gcomhréir leis na forálacha dlí is infheidhme, i gcás ina mbeadh torthaí ar na himscrúduithe as a dtiocfadh forchur dleachtanna frithdhumpála.

(6)

Chinn an Coimisiún, ar a thionscnamh féin, allmhairí an táirge lena mbaineann a chur faoi réir a gcláraithe faoi Airteagal 14(5) den bhun-Rialachán. Na coinníollacha le haghaidh bhailiú cúlghabhálach na ndleachtanna, más ann dóibh, déanfar measúnú orthu sa Rialachán lena bhforchuirfear dleachtanna cinntitheacha.

(7)

Aon dliteanas a bheadh ann amach anseo, is as torthaí an imscrúdaithe a thiocfadh sé.

(8)

Sna na líomhaintí sa ghearán inar iarradh imscrúdú frithdhumpála a thionscnamh, meastar corrlaigh dhumpála ó 55 % go 87 % agus meánleibhéal díothaithe díobhála idir 55 % agus 103 % a bheith ann le haghaidh an táirge lena mbaineann sa tréimhse ó mhí Eanáir go mí na Nollag 2023.

(9)

De ghnáth, dhéanfaí méid an dliteanais a d’fhéadfadh a bheith ann amach anseo a shocrú ar an leibhéal is ísle den dá leibhéal sin de réir Airteagal 7(2) den bhun-Rialachán. Más rud é go dtagann an Coimisiún ar fhianaise le linn an imscrúdaithe gur ann do shaobhadh ar amhábhair de bhun Airteagal 7(2a) den bhun-Rialachán, dhéanfaí an méid dliteanais a d’fhéadfaí a bheith ann amach anseo a shocrú ar leibhéal an chorrlaigh dumpála mar a fhoráiltear in Airteagal 7(2b) den bhun-Rialachán má chinntear nár leor dleacht faoi bhun an chorrlaigh dumpála chun deireadh a chur leis an díobháil a bhain do thionscal an Aontais.

3.   PRÓISEÁIL SONRAÍ PEARSANTA

(10)

Aon sonraí pearsanta a bhailítear i gcomhthéacs an chlárúcháin seo, déanfar iad a láimhseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle (3), maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin,

TAR ÉIS AN RIALACHÁN SEO A GHLACADH:

Airteagal 1

1.   Ordaítear leis seo do na húdaráis chustaim, faoi Airteagal 14(5) de Rialachán (AE) 2016/1036, na céimeanna iomchuí a ghlacadh chun allmhairí isteach san Aontas a chlárú i gcás allmhairí cineálacha áirithe bróg cruach, bíodh pillíní rubair ceangailte díobh nó ná bíodh, bídís cóimeáilte i slabhra rianta nó ná bíodh, nach mó ná 3 000 mm a bhfad, a úsáidtear ar mheaisíní atá faoi cheannteidil 8426 , 8429 nó 8430 faoi láthair nó ar chriosanna iompair atá faoi cheannteideal 8428 faoi láthair, atá aicmithe faoi láthair faoi chóid AC ex 8431 49 20 , ex 8431 39 00 , agus ex 8431 49 80 (cóid TARIC 8431 49 20 10, 8431 39 00 20 agus 8431 49 80 10), agus ar de thionscnamh Dhaon-Phoblacht na Síne iad.

2.   Rachaidh an clárúchán in éag 9 mí tar éis dháta theacht i bhfeidhm an Rialacháin seo.

Airteagal 2

Tiocfaidh an Rialachán seo i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 24 Deireadh Fómhair 2024.

Thar ceann an Choimisiúin

An tUachtarán

Ursula VON DER LEYEN


(1)   IO L 176, 30.6.2016, lch. 21, ELI: http://data.europa.eu/eli/reg/2016/1036/oj.

(2)   IO C, C/2024/5264, 23.8.2024, ELI: http://data.europa.eu/eli/C/2024/5264/oj.

(3)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, http://data.europa.eu/eli/reg/2018/1725/oj).


ELI: http://data.europa.eu/eli/reg_impl/2024/2721/oj

ISSN 1977-0839 (electronic edition)