L_2022147GA.01002801.xml

RIALACHÁN CUR CHUN FEIDHME (AE) 2022/829 ÓN gCOIMISIÚN

an 25 Bealtaine 2022

lena leasaítear Rialachán (CE) Uimh. 31/96 a mhéid a bhaineann leis na hinstitiúidí atá incháilithe do dhíolúine ó dhleacht mháil

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Threoir 2008/118/CE ón gComhairle an 16 Nollaig 2008 maidir leis na socruithe ginearálta le haghaidh dleacht mháil agus lena n-aisghairtear Treoir 92/12/CEE (1), agus go háirithe Airteagal 13(2) de,

De bharr an mhéid seo a leanas:

(1)	Leasaíodh Treoir 2008/118/CE le Treoir (AE) 2019/2235 ón gComhairle (2), lenar tugadh isteach díolúintí ó cháin bhreisluacha agus ó dhleacht mháil a íoc i leith iarrachtaí cosanta a dhéantar laistigh de chreat an Aontais.

(2)

Leagtar amach san Iarscríbhinn a ghabhann le Rialachán (CE) Uimh. 31/96 ón gCoimisiún (3) an deimhniú díolúine atá le húsáid chun a dheimhniú go bhfuil idirbheart áirithe incháilithe do dhíolúine ó dhleacht mháil a íoc faoi Airteagal 12 de Threoir 2008/118/CE. Chun é a chur ar a gcumas do na Ballstáit an díolúine ó dhleacht mháil a íoc a chur i bhfeidhm maidir le hiarrachtaí cosanta mar a leagtar amach in Airteagal 12(1), pointe (ba), de Threoir 2008/118/CE, ba cheart an deimhniú sin a leasú.

(3)	Dá bhrí sin, ba cheart Rialachán (CE) Uimh. 31/96 a leasú dá réir.

(4)	Ós rud é go bhfuil feidhm ón 1 Iúil 2022 ag Airteagal 12(1), pointe (ba), de Threoir 2008/118/CE, ba cheart cur i bhfeidhm an Rialacháin seo a chur siar go dtí an dáta sin.

(5)	Tá na bearta dá bhforáiltear sa Rialachán seo i gcomhréir leis an tuairim ón gCoiste um Dhleacht Mháil,

TAR ÉIS AN RIALACHÁN SEO A GHLACADH:

Airteagal 1

Cuirtear an téacs atá san Iarscríbhinn a ghabhann leis an Rialachán seo in ionad na hIarscríbhinne a ghabhann le Rialachán (CE) Uimh. 31/96.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ón 1 Iúil 2022.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 25 Bealtaine 2022.

Thar ceann an Choimisiúin

An tUachtarán

Ursula VON DER LEYEN

(1) IO L 9, 14.1.2009, lch. 12.

(2) Treoir (AE) 2019/2235 ón gComhairle an 16 Nollaig 2019 lena leasaítear Treoir 2006/112/CE maidir leis an gcomhchóras cánach breisluacha agus Treoir 2008/118/CE maidir leis na socruithe ginearálta maidir le dleacht mháil a mhéid a bhaineann le hiarrachtaí cosanta laistigh de chreat an Aontais (IO L 336, 30.12.2019, lch. 10).

(3) Rialachán (CE) Uimh. 31/96 ón gCoimisiún an 10 Eanáir 1996 maidir leis an deimhniú díolúine ó dhleacht mháil (IO L 8, 11.1.1996, lch. 11).

IARSCRÍBHINN

Nótaí míniúcháin

Fónann an doiciméad seo don choimeádaí stórais údaraithe mar dhoiciméad tacaíochta i ndáil leis an díolúine chánach i leith na gcoinsíneachtaí earraí a fhaigheann na hinstitiúidí/daoine aonair incháilithe dá dtagraítear in Airteagal 12(1) de Threoir 2008/118/CE. Dá réir sin, déanfar deimhniú amháin a tharraingt suas le haghaidh gach coimeádaí stórais. Thairis sin, ní mór don choimeádaí stórais an deimhniú sin a choimeád mar chuid dá thaifid i gcomhréir leis na forálacha dlíthiúla is infheidhme ina Bhallstát.

(a)

Is ionann sonraíocht ghinearálta an pháipéir atá le húsáid agus an tsonraíocht sin a leagtar síos in Iris Oifigiúil na gComhphobal Eorpach Uimh. C 164 an 1.7.1989.

Ar pháipéar bán a bheidh na cóipeanna uile agus ba cheart an páipéar a bheith 210 milliméadar faoi 297 milliméadar le lamháltas uasta 5 mhilliméadar níos giorra nó 8 milliméadar níos faide maidir lena bhfad.

Déanfar an deimhniú díolúine a tharraingt suas i ndúblach:

(i)	coinneoidh an coinsíneoir cóip amháin,

(ii)	beidh cóip amháin ag gabháil leis an doiciméad tionlacain riaracháin

(b)	Cuirfear líne trí aon spás nach n-úsáidfear i mbosca 5.B ionas nach féidir aon rud a chur leis.

(c)	Ní mór an doiciméad a líonadh isteach ar bhealach inléite agus ar bhealach a fhágfaidh go mbeidh na hiontrálacha doscriosta. Ní cheadaítear aon scriosadh ná forscríobh. Líonfar isteach é i dteanga a aithníonn an Ballstát óstach.

(d)	Má thagraíonn an tuairisc ar na hearraí (bosca 5.B den deimhniú) d’fhoirm ordaithe ceannaigh a tarraingíodh suas i dteanga seachas teanga a aithníonn an Ballstát óstach, ní mór don institiúid/don duine aonair incháilithe aistriúchán a chur i gceangal.

(e)	Os a choinne sin, má tharraingítear suas an deimhniú i dteanga seachas teanga a aithníonn Ballstát an choimeádaí stórais, ní mór don institiúid/don duine aonair incháilithe aistriúchánar an bhfaisnéis a bhaineann leis na hearraí i mbosca 5.B a chur i gceangal.

(f)	Ciallaíonn teanga aitheanta ceann de na teangacha atá in úsáid go hoifigiúil sa Bhallstát nó aon teanga oifigiúil eile de chuid an Aontais a dhearbhaíonn an Ballstát mar theanga is féidir a úsáid chun na críche sin.

3.	Leis an dearbhú i mbosca 3 den deimhniú, cuireann an institiúid/duine aonair incháilithe an fhaisnéis ar fáil a bhfuil gá léi le haghaidh na meastóireachta ar an iarraidh ar dhíolúine sa Bhallstát óstach.

4.	Leis an dearbhú i mbosca 4 den deimhniú, deimhníonn an institiúid na mionsonraí i mbosca 1 agus i mbosca 3(a) den doiciméad agus deimhníonn sí gur ball foirne den institiúid é an duine aonair incháilithe.

(a)

Ní mór an dáta agus an uimhir ordaithe, ar a laghad, a bheith sa tagairt don fhoirm ordaithe ceannaigh (bosca 5.B den deimhniú). Ba cheart na heilimintí ar fad atá i mbosca 5 den deimhniú a bheith ar an bhfoirm ordaithe. Más gá d’údarás inniúil an Bhallstáit óstaigh an deimhniú a stampáil, stampálfar an fhoirm ordaithe freisin.

(b)	Maidir leis an uimhir mháil mar a shainmhínítear in Airteagal 19(2), pointe (a), de Rialachán (AE) Uimh. 389/2012 ón gComhairle (1), tá rogha ann uimhir mháil an choimeádaí stórais a lua nó gan í a lua.

(c)	Ba cheart na hairgeadraí a lua trí bhíthin cód trí litir i gcomhréir le caighdeán idirnáisiúnta ISO 4217 arna bhunú ag an Eagraíocht Idirnáisiúnta um Chaighdeánú.

Maidir leis an dearbhú thuasluaite ón institiúid/duine aonair incháilithe, déanfar é a fhíordheimhniú ag bosca 6 le stampa údarás inniúil an Bhallstáit óstaigh. Is féidir don údarás a shocrú go mbraithfidh a fhormheas féin ar chomhaontú údaráis eile ina Bhallstát. Is faoin údarás inniúil cánach é an comhaontú sin a fháil.

7.	Chun an nós imeachta a shimpliú, is féidir don údarás inniúil scaoileadh leis an oibleagáid a bhíonn ar an institiúid incháilithe an stampa a iarraidh i gcás díolúine le haghaidh úsáid oifigiúil. Ba cheart don institiúid incháilithe an dispeansáid sin a lua i mbosca 7 den deimhniú.

(1) Rialachán (AE) Uimh. 389/2012 ón gComhairle an 2 Bealtaine 2012 maidir le comhar riaracháin i réimse na ndleachtanna máil agus lena n-aisghairtear Rialachán (CE) Uimh. 2073/2004 (IO L 121, 8.5.2012, lch. 1).