IL-KUMMISSJONI EWROPEA
Brussell, 16.4.2026
COM(2026) 163 final
2026/0089(NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fit-18-il laqgħa tal-Kumitat ta’ Esperti tekniċi (CTE) tal-Organizzazzjoni Intergovernattiva għat-Trasport Internazzjonali bil-Ferrovija (OTIF) fir-rigward tar-reviżjoni tar-Regoli tal-Proċedura tas-CTE, tar-reviżjoni tal-Preskrizzjonijiet Tekniċi Uniformi (UTP) applikabbli għas-subsistema “vetturi ferrovjarji – vaguni tal-merkanzija (UTP WAG) u għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS), tal-adozzjoni ta’ Format uniformi taċ-ċertifikati, tar-reviżjoni tal-UTP applikabbli għas-subsistema Applikazzjonijiet telematiċi għas-servizzi tal-merkanzija (UTP TAF), u tal-Manwal għall-implimentazzjoni u l-applikazzjoni tar-Regoli Uniformi tal-APTU u tal-ATMF
MEMORANDUM TA’ SPJEGAZZJONI
1.Suġġett tal-proposta
L-Organizzazzjoni Intergovernattiva għat-Trasport Internazzjonali bil-Ferrovija (OTIF) hija organizzazzjoni intergovernattiva ddedikata għat-trasport internazzjonali bil-ferrovija. Tiżviluppa reġimi legali uniformi għat-trasport internazzjonali bil-ferrovija fi tliet oqsma ewlenin ta’ attività: l-interoperabbiltà u s-sikurezza, l-oġġetti perikolużi u l-liġi kuntrattwali ferrovjarja.
L-aspetti relatati mal-interoperabbiltà u s-sikurezza huma indirizzati, b’mod partikolari, mill-Kumitat ta’ Esperti Tekniċi (CTE) tal-OTIF.
It-18-il sessjoni tas-CTE tal-OTIF se ssir f’Bern fid-9 ta’ Ġunju 2026. Din il-proposta tikkonċerna d-deċiżjoni li tistabbilixxi l-pożizzjoni li għandha tittieħed f’isem l-Unjoni f’dik is-sessjoni, b’rabta mal-adozzjoni prevista tal-proposti li ġejjin:
–Modifika tar-Regoli tal-Proċedura tas-CTE;
–Reviżjoni tal-Preskrizzjoni Teknika Uniformi (UTP) applikabbli għas-subsistema “vetturi ferrovjarji — vaguni tal-merkanzija” (UTP WAG);
–Reviżjoni tal-UTP applikabbli għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS);
–Adozzjoni tal-Anness C tar-Regoli Uniformi li jirrigwardaw l-Ammissjoni Teknika ta’ Materjal tal-Ferroviji użat fit-Traffiku Internazzjonali (ATMF), dwar Format uniformi taċ-ċertifikati;
–Modifika tal-Appendiċi I tal-UTP applikabbli għas-subsistema “Applikazzjonijiet telematiċi għas-servizzi tal-merkanzija” (UTP TAF) (referenzi għad-dokumenti tekniċi);
–Modifiki tal-Manwal għall-implimentazzjoni u għall-applikazzjoni tar-Regoli Uniformi li jirrigwardaw il-Validazzjoni ta’ Standards Tekniċi u l-Adozzjoni ta’ Preskrizzjonijiet Tekniċi Uniformi applikabbli għall-Materjal tal-Ferroviji bl-intenzjoni li jintuża fit-Traffiku Internazzjonali (APTU) u tar-Regoli Uniformi tal-ATMF.
L-aġenda tal-laqgħa u d-dokumenti relatati mal-proposti għall-adozzjoni huma disponibbli fuq is-sit web tal-OTIF
https://otif.org/en/?page_id=1025
.
2.Kuntest tal-proposta
2.1.Il-Konvenzjoni li tirrigwarda t-Trasport Internazzjonali bil-Ferrovija (COTIF)
Il-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980, kif emendata bil-Protokoll ta’ Vilnius tat-3 ta’ Ġunju 1999 (“COTIF”), hija ftehim internazzjonali li fih kemm l-Unjoni kif ukoll 25 Stat Membru huma Partijiet Kontraenti.
Fis-16 ta’ Ġunju 2011, il-Kunsill adotta d-Deċiżjoni tal-Kunsill 2013/103/UE dwar l-iffirmar u l-konklużjoni tal-Ftehim bejn l-Unjoni Ewropea u l-OTIF dwar l-Adeżjoni tal-Unjoni Ewropea mal-Konvenzjoni li tirrigwarda t-Trasport Internazzjonali bil-Ferrovija (COTIF) tad-9 ta’ Mejju 1980, kif emendata bil-Protokoll ta’ Vilnius tat-3 ta’ Ġunju 1999 (“il-Ftehim ta’ Adeżjoni bejn l-UE u l-COTIF”).
Il-Ftehim ta’ Adeżjoni bejn l-UE u l-COTIF daħal fis-seħħ fl-1 ta’ Lulju 2011.
Skont l-Artikolu 2(1) tal-COTIF, l-OTIF għandha l-għan li tippromwovi, ittejjeb u tiffaċilita, f’kull aspett, it-traffiku ferrovjarju internazzjonali, b’mod partikolari billi tistabbilixxi sistemi ta’ liġi uniformi f’diversi oqsma tal-liġi b’rabta mat-traffiku ferrovjarju internazzjonali. Il-COTIF tirregola wkoll it-tmexxija tal-Organizzazzjoni, l-objettivi, l-attribuzzjonijiet u r-relazzjonijiet tagħha mal-Istati Kontraenti u l-attivitajiet tagħha b’mod ġenerali.
Il-COTIF tittratta l-leġiżlazzjoni ferrovjarja dwar għadd ta’ kwistjonijiet ferrovjarji legali u tekniċi differenti li jinqasmu f’żewġ partijiet: il-Konvenzjoni nnifisha, li tirregola t-tmexxija tal-OTIF, u tmien Appendiċijiet tal-Konvenzjoni li jistabbilixxu liġi ferrovjarja uniformi:
–Appendiċi A – Kuntratt tal-Ġarr Internazzjonali ta’ Passiġġieri bil-Ferrovija (CIV)
–Appendiċi B – Kuntratt tal-Ġarr Internazzjonali ta’ Prodotti bil-Ferrovija (CIM)
–Appendiċi C – Trasport Internazzjonali ta’ Oġġetti Perikolużi bil-Ferrovija (RID)
–Appendiċi D – Kuntratt tal-użu tal-vetturi fit-traffiku internazzjonali bil-ferrovija (CUV)
–Appendiċi E – Kuntratt tal-użu tal-infrastruttura fit-traffiku internazzjonali bil-ferrovija (CUI)
–Appendiċi F – Regoli Uniformi li jirrigwardaw il-Validazzjoni ta’ Standards Tekniċi u l-Adozzjoni ta’ Preskrizzjonijiet Tekniċi Uniformi applikabbli għall-Materjal tal-Ferroviji maħsub li jintuża fit-Traffiku Internazzjonali (APTU UR)
–Appendiċi G – Regoli Uniformi li jirrigwardaw l-Ammissjoni Teknika ta’ Materjal tal-Ferroviji użat fit-Traffiku Internazzjonali (ATMF UR)
–Appendiċi H – Regoli Uniformi li jirrigwardaw l-operat sikur tal-ferroviji fit-traffiku internazzjonali (EST UR)
Hemm 18-il preskrizzjoni teknika uniformi (UTP) għall-interoperabbiltà teknika żviluppata fl-ambitu tal-APTU UR u tal-ATMF UR. Il-UTPs fil-qafas tal-COTIF huma standards tekniċi applikabbli għall-ammissjoni teknika ta’ materjal tal-ferroviji użat fit-traffiku internazzjonali. Għandhom l-istess skop bħall-ispeċifikazzjonijiet tekniċi ta’ interoperabbiltà (TSIs) tal-UE għall-ammissjoni għat-traffiku internazzjonali, kif definit fil-Kapitolu II tad-Direttiva (UE) 2016/797.
Mill-50 Stat li huma Partijiet fil-COTIF, 43, inkluż il-25 Stat Membru tal-UE diġà msemmija, japplikaw l-APTU UR u l-ATMF UR.
Hemm erba’ Annessi żviluppati fl-ambitu tal-EST UR. Dawn l-Annessi jikkonċernaw il-metodi komuni tas-sikurezza applikabbli għat-traffiku ferrovjarju internazzjonali. Għandhom l-istess skop bħall-metodi komuni tas-sikurezza (CSMs) tal-UE għall-ammissjoni għat-traffiku internazzjonali, kif definit fil-Kapitolu II tad-Direttiva (UE) 2016/798. Id-dħul fis-seħħ tal-EST UR għadu qed jistenna l-approvazzjoni minn żewġ terzi tal-Istati li huma parti għall-OTIF.
2.2.Il-Kumitat ta’ Esperti Tekniċi (CTE) tal-OTIF
Is-CTE huwa stabbilit bl-Artikolu 13(1)(f) tal-COTIF. Huwa magħmul mill-Istati Membri tal-OTIF li japplikaw l-APTU u l-ATMF.
Is-CTE huwa kompetenti fil-kwistjonijiet tal-interoperabbiltà u s-sikurezza tat-traffiku ferrovjarju internazzjonali. Dan jiżviluppa l-APTU, l-ATMF, l-EST u l-Annessi rispettivi tagħhom, kif ukoll il-gwida korrispondenti, li japplikaw għall-ammissjoni tal-materjal u tal-infrastruttura tal-ferroviji maħsuba għall-użu fit-traffiku internazzjonali u għall-operat tagħhom. Dan jikkonċerna b’mod partikolari:
–L-adozzjoni ta’ preskrizzjonijiet tekniċi u standards tekniċi;
–il-proċeduri dwar il-valutazzjoni tal-konformità tal-materjal u tal-infrastruttura tal-ferroviji ma’ dawn il-preskrizzjonijiet u l-istandards;
–id-dispożizzjonijiet dwar il-manutenzjoni tal-materjal u tal-infrastruttura tal-ferroviji;
–ir-responsabbiltajiet għall-operat sikur u d-dispożizzjonijiet dwar l-evalwazzjoni u l-valutazzjoni tar-riskju;
–l-ispeċifikazzjonijiet għar-reġistri meħtieġa għall-applikazzjoni tad-dispożizzjonijiet ta’ hawn fuq.
Is-CTE bħalissa għandu grupp ta’ ħidma permanenti (WG TECH) li huwa responsabbli għat-tħejjija tas-CTE.
F’konformità mal-Artikolu 16(10) tal-COTIF, is-CTE għandu l-kompetenza li jadotta r-regoli ta’ proċedura tiegħu.
Skont l-Artikolu 20(1)(b) tal-COTIF, u f’konformità mal-Artikolu 6(1) tal-APTU, is-CTE għandu l-kompetenza li jadotta jew li jemenda l-UTPs rispettivi. F’konformità mal-Artikolu 20(1)(e) tal-COTIF u mal-Artikolu 21(1) tal-ATMF, is-CTE għandu l-kompetenza wkoll li jadotta jew li jemenda l-UTPs rispettivi tiegħu. Dawn l-emendi jsiru f’konformità mal-proċedura stabbilita fl-Artikoli 16, 20 u 33(6) tal-COTIF, u jidħlu fis-seħħ f’konformità mal-paragrafi 3 u 4 tal-Artikolu 35.
Fl-aħħar nett, f’konformità mal-Artikolu 20(1)(e) tal-COTIF, u skont l-Artikolu 21(4) tal-ATMF, is-CTE għandu l-kompetenza wkoll li jirrakkomanda metodi u prattiki relatati mal-ammissjoni teknika ta’ materjal tal-ferroviji użat fit-traffiku internazzjonali.
2.3.L-atti previsti li għandhom jiġu adottati mis-CTE
Fid-9 ta’ Ġunju 2026, matul it-18-il sessjoni tiegħu, is-CTE għandu jadotta dan li ġej:
–modifika tar-Regoli tal-Proċedura tiegħu tas-CTE;
–reviżjoni tal-UTP applikabbli għas-subsistema “vetturi ferrovjarji – vaguni tal-merkanzija” (UTP WAG);
–reviżjoni tal-UTP applikabbli għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS);
–l-Anness C tal-ATMF dwar Format uniformi taċ-ċertifikati;
–modifika tal-Appendiċi I tal-UTP applikabbli għas-subsistema “Applikazzjonijiet telematiċi għas-servizzi tal-merkanzija” (UTP TAF) (referenzi għad-dokumenti tekniċi);
–modifika tal-Manwal għall-implimentazzjoni u għall-applikazzjoni tar-Regoli Uniformi tal-APTU u tal-ATMF.
2.3.1.Modifika tar-regoli tal-proċedura tas-CTE
Fit-tmien sessjoni tiegħu, li saret fl-4 ta’ Diċembru 2025, il-Kumitat ad hoc tal-OTIF għall-Affarijiet Legali u l-Kooperazzjoni Internazzjonali approva d-dispożizzjonijiet rakkomandati li għandhom l-għan li jarmonizzaw ir-regoli tal-proċedura fil-korpi kollha tal-OTIF fir-rigward tad-drittijiet tal-membri, tal-membri assoċjati u tal-osservaturi.
L-għan ta’ din il-proposta ta’ modifika tar-regoli tal-proċedura tas-CTE huwa li jiġu allinjati l-prattiki tal-korpi kollha tal-OTIF, abbażi tar-rakkomandazzjonijiet tal-Kumitat ad hoc għall-Affarijiet Legali u l-Kooperazzjoni Internazzjonali, sabiex tiġi żgurata l-konsistenza. Barra minn hekk, il-proposta tinkludi xi allinjamenti addizzjonali mal-prattiki ta’ korpi oħrajn.
2.3.2.Reviżjoni tal-Preskrizzjoni Teknika Uniformi (UTP) applikabbli għas-subsistema “vetturi ferrovjarji — vaguni tal-merkanzija” (UTP WAG)
Il-UTP WAG tistabbilixxi r-rekwiżiti funzjonali u tekniċi biex il-vaguni tal-merkanzija jiġu ammessi fit-traffiku internazzjoni fit-territorji tal-Istati Kontraenti kollha tal-COTIF, f’konformità mal-ATMF. Din tkopri r-rekwiżiti tekniċi tad-disinn u tal-produzzjoni u l-proċeduri ta’ verifika.
L-għan ta’ din il-proposta li tiġi riveduta l-UTP WAG huwa li din tinżamm allinjata mal-iżviluppi legali fl-Unjoni Ewropea, u b’mod partikolari ma’ dawk introdotti bir-Regolament ta’ Implimentazzjoni tal-Kummissjoni (UE) 2025/2064. F’dak il-kuntest, il-proposta tispeċifika r-rekwiżiti għall-vaguni tal-merkanzija li jikkonċernaw it-tagħmir għall-ilqugħ tax-xrar għas-sikurezza kontra n-nirien, it-trasport ta’ oġġetti perikolużi bil-ferrovija, u l-apparati għall-ankraġġ tas-semitrejlers mal-vaguni u l-marki relatati.
2.3.3.Reviżjoni tal-Preskrizzjoni Teknika Uniformi (UTP) applikabbli għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS)
Il-UTP LOC&PAS tistabbilixxi r-rekwiżiti funzjonali u tekniċi biex il-lokomottivi u l-vetturi ferrovjarji għat-trasport tal-passiġġieri jiġu ammessi fit-traffiku internazzjonali fit-territorji tal-Istati Kontraenti kollha tal-COTIF, f’konformità mal-ATMF. Din tkopri r-rekwiżiti tekniċi tad-disinn u tal-produzzjoni u l-proċeduri ta’ verifika.
L-għan ta’ din il-proposta li tiġi riveduta l-UTP LOC&PAS huwa li din tinżamm allinjata mal-iżviluppi legali fl-Unjoni Ewropea, u b’mod partikolari ma’ dawk introdotti bir-Regolament ta’ Implimentazzjoni tal-Kummissjoni (UE) 2025/675. F’dak il-kuntest, il-proposta tispeċifika r-rekwiżiti li għandhom jiġu ssodisfati għaċ-ċirkolazzjoni libera fit-traffiku internazzjonali ta’ vetturi li ma jġorrux passiġġieri li huma maħsuba biex jittrasportaw il-persunal.
2.3.4.Adozzjoni tal-Anness C tal-ATMF UR dwar Format uniformi taċ-ċertifikati
L-għan ta’ din il-proposta huwa li tiddefinixxi l-istruttura u l-kontenut taċ-ċertifikati tekniċi skont it-tifsira tal-Artikolu 11 tal-ATMF UR, u l-proċeduri għall-ħruġ, għall-aġġornament, għall-irtirar u għas-sospensjoni tagħhom, kif ukoll il-proċeduri li jikkonċernaw l-aċċess għalihom. Il-proposta għandha l-għan li tiżgura l-konsistenza u l-kompatibbiltà tal-informazzjoni bejn l-Istati Kontraenti tal-COTIF, u l-kompatibbiltà tagħha mar-reġistri tal-vetturi u tat-tipi tal-vetturi stabbiliti skont ir-regoli tal-OTIF jew tal-UE, jiġifieri dawk stabbiliti fid-Deċiżjoni ta’ Implimentazzjoni tal-Kummissjoni 2011/665/UE u fid-Deċiżjoni ta’ Implimentazzjoni tal-Kummissjoni (UE) 2018/1614, kif emendati l-aħħar.
Sabiex tiġi promossa l-armonizzazzjoni u tiġi ffaċilitata d-diġitalizzazzjoni ferrovjarja, huwa mistenni li l-informazzjoni li tinsab f’dawn iċ-ċertifikati tikkorrispondi mal-informazzjoni meħtieġa fir-reġistri tal-vetturi u fir-reġistri tat-tipi tal-vetturi skont ir-regoli tal-OTIF u tal-UE, inkluża l-informazzjoni meħtieġa biex jitwettqu l-kontrolli tal-kompatibbiltà tar-rotot.
2.3.5.Modifika tal-UTP dwar Applikazzjonijiet telematiċi għas-servizzi tal-merkanzija (UTP TAF)
Il-UTP TAF tistabbilixxi rekwiżiti dwar il-proċess ta’ komunikazzjoni bejn l-impriżi ferrovjarji u l-maniġers tal-infrastruttura, il-bażijiet tad-data maħsuba li jintużaw ħalli jiġu traċċati l-ferroviji u l-movimenti tal-vaguni u l-informazzjoni li għandha titwassal lill-klijenti tal-merkanzija.
L-għan ta’ din il-proposta huwa li r-referenzi jiġu allinjati mad-dokumenti tekniċi tal-Aġenzija tal-Unjoni Ewropea għall-Ferroviji (ERA) elenkati fl-Appendiċi I tal-UTP TAF.
B’mod partikolari, il-modifiki tad-dokumenti tekniċi msemmija fl-Appendiċi I tal-UTP TAF huma neċessarji biex jiġu kkoreġuti l-iżbalji, jitqies il-feedback, jinżamm il-pass mal-progress tekniku u tinżamm l-ekwivalenza mal-ispeċifikazzjonijiet iddefiniti fid-dokument tekniku tal-ERA, ERA-TD-105: TAF TSI — Annex D.2: Appendix F — TAF TSI Data and Message Model.
2.3.6.Aġġornament tal-manwal għall-implimentazzjoni u l-applikazzjoni tal-APTU u tal-ATMF
Il-manwal jiddeskrivi r-rekwiżiti għall-implimentazzjoni u għall-applikazzjoni tal-APTU u tal-ATMF għat-trasport internazzjonali bil-ferrovija, u jiddeskrivi d-diversi rwoli u responsabbiltajiet b’rabta mal-implimentazzjoni u l-applikazzjoni. Huwa maħsub li jservi bħala referenza prattika għall-membri tal-OTIF u l-istati interessati li jaderixxu mal-COTIF, b’mod partikolari għall-awtoritajiet, l-entitajiet u l-atturi fis-setturi ferrovjarji rispettivi tagħhom.
Il-manwal ma huwiex legalment vinkolanti skont il-COTIF, iżda madankollu huwa rakkomandazzjoni għall-implimentazzjoni, li kapaċi tipproduċi effetti legali. Is-CTE għandu s-setgħa li jadotta l-manwal u l-modifiki tagħhom bħala rakkomandazzjonijiet f’konformità mal-Artikolu 21(4) tal-ATMF. Il-manwal (u għalhekk l-emenda prevista tiegħu) jinforma l-mod kif l-UE trid timplimenta l-obbligi tagħha skont il-COTIF.
L-aġġornament tal-manwal għall-implimentazzjoni u għall-applikazzjoni tal-APTU u tal-ATMF huwa meħtieġ biex titqies l-esperjenza miksuba tal-Istati Kontraenti tal-COTIF.
3.Pożizzjoni li għandha tittieħed f’isem l-Unjoni
3.1.Il-kompetenza u d-drittijiet tal-vot tal-Unjoni
Skont l-Artikolu 6 tal-Ftehim ta’ Adeżjoni bejn l-UE u l-COTIF:
“1. Għal deċiżjonijiet fi kwistjonijiet fejn l-Unjoni għandha kompetenza esklużiva, l-Unjoni għandha teżerċita d-drittijiet tal-vot tal-Istati Membri tagħha skont il-Konvenzjoni.
2. Għal deċiżjonijiet fi kwistjonijiet fejn l-Unjoni taqsam il-kompetenza mal-Istati Membri tagħha, għandhom jivvutaw l-Unjoni jew l-Istati Membri tagħha.
3. Soġġett għall-Artikolu 26, il-paragrafu 7, tal-Konvenzjoni, l-Unjoni għandu jkollha l-istess għadd ta’ voti daqs l-Istati Membri tagħha li huma wkoll Partijiet għall-Konvenzjoni. Meta l-Unjoni tivvota, l-Istati Membri tagħha ma għandhomx jivvutaw”.
Skont l-Artikolu 3(2) tat-TFUE, l-Unjoni għandha kompetenza esklużiva fir-rigward tal-impenji internazzjonali li għandhom jittieħdu fil-kuntest tal-COTIF, inklużi l-istrumenti legali adottati skontha, meta jkun hemm ir-riskju li tali impenji jaffettwaw ir-regoli eżistenti tal-Unjoni jew ibiddlu l-kamp ta’ applikazzjoni tagħhom.
L-objettiv tad-deċiżjonijiet proposti huwa li:
–jimmodifikaw ir-Regoli tal-Proċedura tas-CTE, sabiex jallinjawhom mar-regoli tal-proċedura ta’ korpi oħra tal-OTIF;
–jirrieżaminaw il-UTP WAG, sabiex jallinjawhom mar-Regolament ta’ Implimentazzjoni tal-Kummissjoni (UE) 2025/2064;
–jirrieżaminaw il-UTP LOC&PAS, sabiex jallinjawhom mar-Regolament ta’ Implimentazzjoni tal-Kummissjoni (UE) 2025/675;
–jadottaw Anness C ġdid tal-ATMF UR dwar Format uniformi taċ-ċertifikati, filwaqt li jiżguraw il-kompatibbiltà tiegħu mar-reġistri tal-vetturi u tat-tipi tal-vetturi stabbiliti skont ir-regoli tal-OTIF u tal-UE, jiġifieri dawk stabbiliti fid-Deċiżjoni ta’ Implimentazzjoni tal-Kummissjoni 2011/665/UE u fid-Deċiżjoni ta’ Implimentazzjoni tal-Kummissjoni (UE) 2018/1614;
–jimmodifikaw il-UTP dwar Applikazzjonijiet telematiċi għas-servizzi tal-merkanzija (UTP TAF), sabiex jallinjaw ir-referenzi għad-Dokumenti Tekniċi tal-ERA elenkati fl-Appendiċi I tal-UTP TAF mal-aktar aġġornamenti reċenti ppubblikati mill-ERA;
–jaġġornaw il-manwal għall-implimentazzjoni u għall-applikazzjoni tal-APTU u tal-ATMF, sabiex jallinjawh mal-esperjenza miksuba mill-Istati Kontraenti tal-COTIF, inklużi l-Istati Membri tal-UE.
Dawn id-deċiżjonijiet kollha jaqgħu fil-qasam tal-interoperabbiltà u tas-sikurezza tat-traffiku ferrovjarju internazzjonali. Dan il-qasam huwa fil-biċċa l-kbira kopert mir-regoli tal-Unjoni li għalhekk jirriskjaw li jiġu affettwati jew mibdula bl-adozzjoni ta’ dawn id-deċiżjonijiet.
Għalhekk, l-Unjoni, irrappreżentata mill-Kummissjoni, għandha teżerċita d-drittijiet tal-vot fir-rigward tal-adozzjoni ta’ dawn id-deċiżjonijiet.
3.2.Konklużjonijiet proposti
Fir-rigward tad-deċiżjonijiet dettaljati fil-paragrafi 2.3.1 sa 2.3.6 hawn fuq, l-Unjoni għandha tivvota kif propost hawn taħt.
3.2.1.Modifika tar-regoli tal-proċedura tal-Kumitat ta’ Esperti Tekniċi
L-Unjoni Ewropea għandha tivvota favur il-modifika tar-Regoli tal-Proċedura tas-CTE kif proposta mis-Segretarjat tal-OTIF fid-dokument TECH-26018-CTE18-4. Madankollu, għandha tiġi proposta l-modifika li ġejja.
(a)Fl-Artikolu 9(3), “8 ġimgħat” għandha tiġi sostitwita bi “12-il ġimgħa”. Din il-proposta hija maħsuba biex tiffaċilita l-proċeduri interni meħtieġa li jippermettu t-tħejjija u l-adozzjoni f’waqthom tal-pożizzjonijiet rispettivi tal-Unjoni.
3.2.2.Reviżjoni tal-Preskrizzjoni Teknika Uniformi (UTP) applikabbli għas-subsistema “vetturi ferrovjarji — vaguni tal-merkanzija” (UTP WAG)
L-Unjoni Ewropea għandha tivvota favur ir-reviżjoni tal-UTP WAG kif proposta mis-Segretarjat tal-OTIF fl-Anness 2 tad-dokument TECH-26003-CTE18-5.1, soġġett għall-emendi elenkati hawn taħt. F’każ li dawn l-emendi ma jiġux introdotti, l-Unjoni Ewropea għandha tivvota kontra r-reviżjoni proposta tal-UTP WAG.
(a)Iż-żewġ paragrafi introduttorji fil-punt 4.2.6.1.2.1, li issa huma spjegati f’aktar dettall fil-punt 4.2.6.1.2.1.1, għandhom jitħassru;
(b)Fil-punt 5.3.6, l-ewwel paragrafu għandu jiġi sostitwit b’dan li ġej:
“L-apparati għall-ankraġġ tas-semitrejlers għandhom jiġu ddisinjati u vvalutati għal kull waħda mill-kundizzjonijiet tal-użu li ġejjin:
–is-semitrejlers kompatibbli li għalihom huwa maħsub l-apparat;
–l-interfaċċa kompatibbli tal-unità li fuqha l-apparat jista’ jiġi mmuntat b’mod sikur”.
3.2.3.Reviżjoni tal-Preskrizzjoni Teknika Uniformi applikabbli għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS)
L-Unjoni Ewropea għandha tivvota favur ir-reviżjoni tal-UTP LOC&PAS kif proposta mis-Segretarjat tal-OTIF fl-Anness 2 tad-dokument TECH-26004-CTE18-5.2, soġġett għall-emenda elenkata hawn taħt. F’każ li din l-emenda ma tiġix introdotta, l-Unjoni Ewropea għandha tivvota kontra r-reviżjoni proposta tal-UTP LOC&PAS.
(a)fil-punt 7.1.1.6.1, il-punt (12) għandu jiġi sostitwit b’dan li ġej: “L-unità għandha tkun mgħammra b’apparati ta’ awtosalvataġġ għall-persuni kollha abbord, li jissodisfaw l-ispeċifikazzjonijiet ta’ EN 13794:2002 u jew EN 402:2003 jew EN 403:2004”.
3.2.4.Adozzjoni tal-Anness C tal-ATMF UR dwar Format uniformi taċ-ċertifikati
Id-deċiżjoni prevista biex jiġi adottat Anness C ġdid tal-ATMF dwar Format uniformi taċ-ċertifikati ma hijiex meqjusa bħala kompletament konformi mad-dritt u mal-objettivi strateġiċi tal-Unjoni. Bħala eżempju ġeneriku, l-użu tat-terminu “ċertifikat” iwassal għal konfużjoni, peress li jintuża għal skopijiet differenti fl-oqfsa tal-UE u tal-COTIF.
Meta titqies il-firxa tal-emendi tad-deċiżjoni prevista li jkunu meħtieġa biex jiġi żgurat l-allinjament mal-acquis rilevanti tal-UE, l-Unjoni Ewropea għandha tivvota kontra l-adozzjoni tal-Anness C tal-ATMF UR dwar Format uniformi taċ-ċertifikati, kif propost mis-Segretarjat tal-OTIF fid-dokument TECH-26005-CTE18-5.3, u għandha titlob ir-rieżami tiegħu mid-WG TECH tal-OTIF sabiex jiġi żgurat l-allinjament mal-acquis rilevanti tal-UE.
3.2.5.Modifika tal-UTP dwar Applikazzjonijiet telematiċi għas-servizzi tal-merkanzija (UTP TAF)
L-Unjoni Ewropea għandha tivvota favur il-modifiki tal-UTP TAF, kif proposti mis-Segretarjat tal-OTIF fid-dokument TECH-26006-CTE18-5.4.
3.2.6.Aġġornament tal-manwal għall-implimentazzjoni u l-applikazzjoni tal-APTU u tal-ATMF
L-Unjoni Ewropea għandha tivvota favur il-modifiki tal-manwal kif proposti mis-Segretarjat tal-OTIF fid-dokument TECH-26009-CTE18-6.3, soġġett għall-emendi elenkati hawn taħt. F’każ li dawn l-emendi ma jiġux introdotti, l-Unjoni Ewropea għandha tivvota kontra l-aġġornament propost tal-manwal.
(a)Għandhom jiġu rieżaminati l-kontroreferenzi bejn il-partijiet differenti tal-Manwal (eż. il-punti 106, 137 u 200 jirreferu għal numerazzjoni tat-taqsimiet li fil-fatt ma tintużax fil-Manwal);
(b)Fil-punti 112 u 202, l-aħħar sentenzi għandhom jiġu kkompletati kif ġej: “, jekk ikun permess mir-regoli applikabbli relatati mas-suq stabbiliti fil-livell domestiku jew tal-UE, kif xieraq.”;
(c)Fil-punt 201, fit-tielet sentenza, “Vetturi” għandha tiġi sostitwita b’“Vetturi fit-traffiku internazzjonali li jaqgħu fil-kamp ta’ applikazzjoni tal-ATMF UR”.
Barra minn hekk, għandu jiġi investigat ukoll jekk l-espressjoni “Stat Kontraenti” għandhiex tiġi sostitwita bi “Stat Membru” fid-dokument kollu, sabiex tiġi allinjata mat-terminoloġija riveduta proposta għar-Regoli tal-Proċedura tas-CTE.
4.Bażi legali
4.1.Bażi legali proċedurali
4.1.1.Prinċipji
L-Artikolu 218(9) tat-Trattat dwar il-Funzjonament tal-Unjoni Ewropea (TFUE) jipprevedi deċiżjonijiet li jistabbilixxu “l-pożizzjonijiet li għandhom jiġu adottati f’isem l-Unjoni f’sede stabbilita fi ftehim, meta dik is-sede tintalab tadotta atti li jkollhom effetti legali, sakemm dawn ma jkunux atti li jissupplimentaw jew jemendaw il-qafas istituzzjonali tal-ftehim.”
Il-kunċett ta’ “atti li jkollhom effetti legali” jinkludi l-atti li jkollhom effetti legali bis-saħħa tar-regoli tad-dritt internazzjonali li jirregolaw il-korp inkwistjoni. Jinkludi wkoll strumenti li ma jkollhomx effett vinkolanti skont id-dritt internazzjonali, iżda li “jistgħu jinfluwenzaw b’mod determinanti l-kontenut tal-leġiżlazzjoni adottata mil-leġiżlatur tal-Unjoni”.
4.1.2.Applikazzjoni għal dan il-każ
Is-CTE huwa korp stabbilit bi ftehim, jiġifieri l-COTIF, b’mod partikolari l-Artikolu 13(1)(f).
L-atti elenkati hawn fuq li s-CTE huwa mitlub jadotta matul it-18-il sessjoni tiegħu jikkostitwixxu atti li jkollhom effetti legali. Peress li l-Unjoni hija parti kontraenti sħiħa għall-COTIF, l-atti previsti se jkunu vinkolanti fuq l-Unjoni skont id-dritt internazzjonali, f’konformità mal-Artikolu 6(1) tal-APTU, mal-Artikolu 21(1) tal-ATMF u mal-Artikolu 35, il-paragrafi 3 u 4 tal-COTIF.
L-atti previsti la jissupplimentaw u lanqas ma jemendaw il-qafas istituzzjonali tal-Ftehim.
Għalhekk, il-bażi legali proċedurali għad-deċiżjoni proposta hija l-Artikolu 218(9) tat-TFUE.
4.2.Bażi legali sostantiva
4.2.1.Prinċipji
Il-bażi legali sostantiva biex tittieħed deċiżjoni skont l-Artikolu 218(9) tat-TFUE tiddependi primarjament mill-objettiv u mill-kontenut tal-att previst li dwaru tittieħed pożizzjoni f’isem l-Unjoni. Jekk l-att previst ikollu żewġ għanijiet jew żewġ komponenti, u jekk wieħed minn dawk l-għanijiet jew komponenti jkun jista’ jiġi identifikat bħala dak ewlieni, filwaqt li l-ieħor ikun sempliċiment inċidentali, id-deċiżjoni skont l-Artikolu 218(9) tat-TFUE trid tissejjes fuq bażi legali sostantiva unika, jiġifieri dik meħtieġa mill-għan jew mill-komponent ewlieni jew predominanti.
4.2.2.Applikazzjoni għal dan il-każ
L-objettiv ewlieni u l-kontenut tal-att previst huma relatati mat-trasport internazzjonali bil-ferrovija.
Għalhekk, il-bażi legali sostantiva għad-deċiżjoni proposta hija l-Artikolu 91 tat-TFUE.
4.3.Konklużjoni
Il-bażi legali tad-deċiżjoni proposta jenħtieġ li tkun l-Artikolu 91 tat-TFUE, flimkien mal-Artikolu 218(9) tat-TFUE.
2026/0089 (NLE)
Proposta għal
DEĊIŻJONI TAL-KUNSILL
dwar il-pożizzjoni li għandha tittieħed f’isem l-Unjoni Ewropea fit-18-il laqgħa tal-Kumitat ta’ Esperti tekniċi (CTE) tal-Organizzazzjoni Intergovernattiva għat-Trasport Internazzjonali bil-Ferrovija (OTIF) fir-rigward tar-reviżjoni tar-Regoli tal-Proċedura tas-CTE, tar-reviżjoni tal-Preskrizzjonijiet Tekniċi Uniformi (UTP) applikabbli għas-subsistema “vetturi ferrovjarji – vaguni tal-merkanzija (UTP WAG) u għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS), tal-adozzjoni ta’ Format uniformi taċ-ċertifikati, tar-reviżjoni tal-UTP applikabbli għas-subsistema Applikazzjonijiet telematiċi għas-servizzi tal-merkanzija (UTP TAF), u tal-Manwal għall-implimentazzjoni u l-applikazzjoni tar-Regoli Uniformi tal-APTU u tal-ATMF
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91 tat-TFUE flimkien mal-Artikolu 218(9) tiegħu,
Wara li kkunsidra l-proposta tal-Kummissjoni Ewropea,
Billi:
(1)L-Unjoni ssieħbet fil-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980, kif emendata bil-Protokoll ta’ Vilnius tat-3 ta’ Ġunju 1999 (il-“COTIF”), f’konformità mad-Deċiżjoni tal-Kunsill 2013/103/UE u mal-Ftehim bejn l-Unjoni Ewropea u l-Organizzazzjoni Intergovernattiva għat-Trasport Internazzjonali bil-Ferrovija (OTIF) dwar l-Adeżjoni tal-Unjoni Ewropea mal-Konvenzjoni COTIF.
(2)Skont l-Artikolu 13(1)(f) tal-COTIF, ġie stabbilit il-Kumitat ta’ Esperti Tekniċi (“CTE”) tal-OTIF.
(3)Skont l-Artikolu 16(10) tal-COTIF, is-CTE għandu l-kompetenza li jadotta u li jemenda r-regoli tal-proċedura tiegħu.
(4)Skont l-Artikolu 20(1)(b) tal-COTIF, u f’konformità mal-Artikolu 6(1) tar-Regoli Uniformi li jirrigwardaw il-Validazzjoni ta’ Standards Tekniċi u l-Adozzjoni ta’ Preskrizzjonijiet Tekniċi Uniformi applikabbli għall-Materjal tal-Ferroviji bl-intenzjoni li jintużaw mit-Traffiku Internazzjonali (APTU) — l-Appendiċi F tal-COTIF, is-CTE għandu l-kompetenza li jadotta jew li jemenda, inter alia, il-Preskrizzjonijiet Tekniċi Uniformi (UTP) applikabbli għas-subsistema “vetturi ferrovjarji — vaguni tal-merkanzija” (UTP WAG), għas-subsistema “vetturi ferrovjarji — lokomottivi u vetturi ferrovjarji għat-trasport tal-passiġġieri” (UTP LOC&PAS), u għas-subsistema Applikazzjonijiet telematiċi għas-servizzi tal-merkanzija (UTP TAF).
(5)Skont l-Artikolu 20(1)(e) tal-COTIF, u f’konformità mal-Artikolu 21(1) tar-Regoli Uniformi li jirrigwardaw l-Ammissjoni Teknika ta’ Materjal tal-Ferroviji użat fit-Traffiku Internazzjonali (ATMF UR) — Appendiċi G tal-COTIF, is-CTE għandu l-kompetenza li jadotta Annessi ta’ dak l-Appendiċi, inkluż dwar il-format uniformi taċ-ċertifikati.
(6)Skont l-Artikolu 20(1)(e) tal-COTIF, u f’konformità mal-Artikolu 21(4) tal-ATMF UR, is-CTE għandu l-kompetenza li jadotta jew li jemenda, inter alia, il-Manwal għall-implimentazzjoni u l-applikazzjoni tar-Regoli Uniformi tal-APTU u tal-ATMF.
(7)Is-CTE, matul it-18-il sessjoni tiegħu fid-9 ta’ Ġunju 2026, se jadotta deċiżjonijiet biex jirrevedi r-Regoli tal-Proċedura tiegħu, il-UTP WAG, il-UTP LOC&PAS, biex jadotta Anness C tal-ATMF dwar Format uniformi taċ-ċertifikati, biex jimmodifika l-Appendiċi I tal-UTP TAF, u biex jaġġorna l-Manwal għall-implimentazzjoni u l-applikazzjoni tar-Regoli Uniformi tal-APTU u tal-ATMF.
(8)Jixraq li jiġu stabbiliti l-pożizzjonijiet li għandhom jittieħdu f’isem l-Unjoni fis-CTE, billi d-deċiżjonijiet proposti se jkunu vinkolanti għall-Unjoni, skont l-Artikolu 6(1) tal-APTU, l-Artikolu 21(1) tal-ATMF u l-Artikolu 35, il-paragrafi 3 u 4 tal-COTIF.
(9)L-objettivi ta’ dawk id-deċiżjonijiet huma li jimmodifikaw ir-Regoli tal-Proċedura tas-CTE, sabiex jallinjawhom mar-regoli tal-proċedura ta’ korpi oħra tal-OTIF, li jallinjaw il-UTP WAG u l-UTP LOC&PAS mar-Regolamenti ta’ Implimentazzjoni tal-Kummissjoni (UE) 2025/2064 u (UE) 2025/675 rispettivament, li jadottaw Anness C ġdid tal-ATMF dwar Format uniformi taċ-ċertifikati, filwaqt li jiżguraw il-kompatibbiltà tiegħu mar-reġistri tal-vetturi u mar-reġistri tat-tipi tal-vetturi stabbiliti skont ir-regoli tal-OTIF u tal-UE, jiġifieri dawk stabbiliti fl-aħħar emendi tad-Deċiżjoni ta’ Implimentazzjoni 2011/665/UE u tad-Deċiżjoni ta’ Implimentazzjoni tal-Kummissjoni (UE) 2018/1614, li jallinjaw ir-referenzi għad-dokumenti tekniċi tal-ERA elenkati fl-Appendiċi I tal-UTP TAF, u li jaġġornaw il-Manwal għall-implimentazzjoni u l-applikazzjoni tal-APTU u l-ATMF, filwaqt li titqies l-esperjenza miksuba mill-Istati Kontraenti tal-COTIF, inklużi l-Istati Membri tal-UE.
(10)Il-modifiki previsti għar-Regoli tal-Proċedura tas-CTE huma bbażati fuq ir-rakkomandazzjonijiet tal-Kumitat ad hoc tal-OTIF dwar l-Affarijiet Legali u l-Kooperazzjoni Internazzjonali, u jiżguraw allinjament u konsistenza ulterjuri bejn il-prattiki ta’ dan il-korp u ta’ korpi oħra tal-OTIF. Madankollu, ir-regoli biex id-dokumenti ta’ ħidma jsiru disponibbli qabel il-laqgħat tas-CTE għadhom jistabbilixxu skadenzi qosra ħafna, li jista’ jkun li ma jkunux biżżejjed biex jippermettu l-proċeduri interni meħtieġa għall-adozzjoni ta’ deċiżjoni fil-livell tal-Unjoni. Għalhekk, filwaqt li l-emendi tar-Regoli ta’ Proċedura jenħtieġ li jiġu appoġġati, jenħtieġ li l-Unjoni Ewropea tipproponi wkoll li tiġi estiża l-iskadenza biex id-dokumenti ta’ ħidma jsiru disponibbli qabel il-laqgħat tas-CTE, sabiex tkun tista’ ssir it-tħejjija u l-adozzjoni f’waqthom tal-pożizzjonijiet tal-Unjoni.
(11)Id-deċiżjonijiet previsti biex jiġu riveduti l-UTP WAF u l-UTP LOC&PAS u biex jiġi modifikat l-Appendiċi I tal-UTP TAF ġeneralment huma konformi mad-dritt u mal-objettivi strateġiċi tal-Unjoni, u jikkontribwixxu għall-allinjament tal-leġiżlazzjoni tal-OTIF mad-dispożizzjonijiet ekwivalenti tad-dritt tal-Unjoni. Madankollu, uħud mill-bidliet proposti mis-Segretarjat tal-OTIF jenħtieġ li jiġu allinjati mad-dritt rilevanti tal-UE. Għalhekk huwa meħtieġ li jiġu proposti emendi tad-deċiżjonijiet previsti tal-OTIF, sabiex jiġi żgurat l-allinjament mal-acquis rilevanti tal-UE. Għalhekk, jenħtieġ li l-Unjoni tappoġġa d-deċiżjonijiet previsti soġġetti għall-kundizzjoni li dawn l-emendi jiġu introdotti.
(12)Id-deċiżjoni prevista biex jiġi adottat Anness C ġdid tal-ATMF dwar Format uniformi taċ-ċertifikati ma hijiex kompletament konformi mad-dritt u mal-objettivi strateġiċi tal-Unjoni. Bħala eżempju ġeneriku, l-użu tat-terminu “ċertifikat” iwassal għal konfużjoni, peress li jintuża għal skopijiet differenti fl-oqfsa tal-UE u tal-COTIF. Meta titqies il-firxa tal-emendi tad-deċiżjoni prevista li jkunu meħtieġa biex jiġi żgurat l-allinjament mal-acquis rilevanti tal-UE, l-Unjoni jenħtieġ li topponi l-adozzjoni tad-deċiżjoni prevista, u titlob xogħol ulterjuri mill-grupp ta’ ħidma permanenti tas-CTE (WG TECH) fuq il-kwistjoni, sabiex tiżgura l-allinjament mal-acquis rilevanti tal-UE.
(13)Id-deċiżjoni prevista biex jiġi aġġornat il-Manwal għall-implimentazzjoni u l-applikazzjoni tal-ATMF u tal-APTU ġeneralment hija konformi mad-dritt u mal-objettivi strateġiċi tal-Unjoni, u tikkontribwixxi għall-allinjament tal-leġiżlazzjoni tal-OTIF mad-dispożizzjonijiet ekwivalenti tad-dritt tal-Unjoni. Madankollu, jenħtieġ li jiġu introdotti xi modifiki f’dan il-manwal, b’mod partikolari biex jiġi ċċarat li l-aċċettazzjoni reċiproka tal-korpi ta’ valutazzjoni mill-Istati Kontraenti kollha għall-fini tal-ATMF UR tkun strettament limitata għall-vetturi maħsuba biex jintużaw fit-traffiku internazzjonali. Għalhekk huwa meħtieġ li jiġu proposti emendi tad-deċiżjoni prevista, sabiex jiġi żgurat l-allinjament mal-acquis rilevanti tal-UE u li jitqiesu r-regoli applikabbli marbuta mas-suq stabbiliti fil-livell domestiku jew tal-UE. Għalhekk, jenħtieġ li l-Unjoni tappoġġa d-deċiżjoni prevista, soġġetta għall-kundizzjoni li dawn l-emendi jiġu introdotti.
ADOTTA DIN ID-DEĊIŻJONI:
Artikolu 1
Il-pożizzjoni li għandha tittieħed f’isem l-Unjoni fit-18-il sessjoni tal-Kumitat ta’ Esperti Tekniċi (CTE) tal-Konvenzjoni li tirrigwarda t-Trasport Internazzjonali bil-Ferrovija tad-9 ta’ Mejju 1980 dwar il-modifika tar-Regoli tal-Proċedura tiegħu, dwar ir-reviżjoni tal-Preskrizzjonijiet Tekniċi Uniformi applikabbli għas-subsistema “vetturi ferrovjarji – vaguni tal-merkanzija” (UTP WAG), tal-Preskrizzjonijiet Tekniċi Uniformi applikabbli għas-subsistema “vetturi ferrovjarji – lokomottivi u vetturi ferrovjarji għat-trasport tal-passiġġieri” (UTP LOC&PAS), dwar l-adozzjoni ta’ Anness C tar-Regoli Uniformi li jirrigwardaw l-Ammissjoni Teknika ta’ Materjal tal-Ferroviji użat fit-Traffiku Internazzjonali (ATMF UR) dwar Format uniformi taċ-ċertifikati, dwar modifika tal-Appendiċi I tal-Preskrizzjonijiet Tekniċi Uniformi applikabbli għas-subsistema “Applikazzjonijiet telematiċi għas-servizzi tal-merkanzija” (UTP TAF), u dwar aġġornament tal-Manwal għall-implimentazzjoni u l-applikazzjoni tal-APTU u l-ATMF għandhom ikunu dawn li ġejjin:
(1)li tivvota favur il-modifiki proposti għar-Regoli tal-Proċedura tas-CTE, kif jinsabu fid-dokument TECH-26018-CTE18-4. Mingħajr preġudizzju għal din il-pożizzjoni, li tipproponi wkoll l-emenda li ġejja:
(a)Fl-Artikolu 9(3), “8 ġimgħat” għandha tiġi sostitwita bi “12-il ġimgħa”;
(2)li tivvota favur ir-reviżjoni proposta tal-UTP WAG, kif tinsab fl-Anness 2 tad-dokument TECH-26003-CTE18-5.1, soġġetta għall-emendi li ġejjin:
(a)fil-punt 4.2.6.1.2.1, jitħassru ż-żewġ paragrafi introduttorji;
(b)fil-punt 5.3.6, l-ewwel paragrafu jiġi sostitwit b’dan li ġej:
“L-apparati għall-ankraġġ tas-semitrejlers għandhom jiġu ddisinjati u vvalutati għal kull waħda mill-kundizzjonijiet tal-użu li ġejjin:
— is-semitrejlers kompatibbli li għalihom huwa maħsub l-apparat;
— l-interfaċċa kompatibbli tal-unità li fuqha l-apparat jista’ jiġi mmuntat b’mod sikur”.
(3)li tivvota favur ir-reviżjoni proposta tal-UTP LOC&PAS, kif tinsab fl-Anness 2 tad-dokument TECH-26004-CTE18-5.2, soġġetta għall-emenda li ġejja:
(a)fil-punt 7.1.1.6.1, il-punt (12) għandu jiġi sostitwit b’dan li ġej: “L-unità għandha tkun mgħammra b’apparati ta’ awtosalvataġġ għall-persuni kollha abbord, li jissodisfaw l-ispeċifikazzjonijiet ta’ EN 13794:2002 u jew EN 402:2003 jew EN 403:2004”.
(4)li tivvota kontra l-adozzjoni proposta ta’ Anness C tal-ATMF dwar Format uniformi taċ-ċertifikati, kif jinsab fid-dokument TECH-26005-CTE18-5.3, u li titlob xogħol ulterjuri tal-grupp ta’ ħidma permanenti tas-CTE (WG TECH) dwar il-kwistjoni, sabiex jiġi żgurat l-allinjament mal-acquis rilevanti tal-UE.
(5)li tivvota favur il-modifika proposta tal-Appendiċi I tal-UTP TAF, kif tinsab fid-dokument TECH-26006-CTE18-5.4.
(6)li tivvota favur l-aġġornament propost tal-manwal għall-implimentazzjoni u l-applikazzjoni tal-APTU u l-ATMF, kif jinsab fid-dokument TECH-26009-CTE18-6.3, soġġett għall-emendi li ġejjin:
(a)Fit-test kollu, jiġu rieżaminati l-kontroreferenzi bejn il-partijiet differenti tal-Manwal, u jiġu allinjati mal-aktar werrej reċenti;
(b)Fil-punti 112 u 202, l-aħħar sentenza tiġi kkomplementata b’dan li ġej: “, jekk ikun permess mir-regoli applikabbli relatati mas-suq stabbiliti fil-livell domestiku jew tal-UE, kif xieraq.”;
(c)Fil-punt 201, fit-tielet sentenza, “Vetturi” tiġi sostitwita b’“Vetturi fit-traffiku internazzjonali li jaqgħu fil-kamp ta’ applikazzjoni tal-ATMF UR”.
Ir-rappreżentanti tal-Unjoni fil-laqgħa tas-CTE jistgħu jaqblu fuq xi tibdil minuri fil-pożizzjonijiet imsemmija f’dan l-Artikolu mingħajr deċiżjoni ulterjuri tal-Kunsill.
Artikolu 2
Din id-Deċiżjoni hija indirizzata lill-Kummissjoni.
Artikolu 3
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell,
Għall-Kunsill
Il-President