1.   Leagtar síos sa Chomhaontú seo na rialacha maidir le rannpháirtíocht na hÍoslainne i gcomhpháirt GOVSATCOM de Chlár Spáis an Aontais agus i gClár an Aontais um Nascacht Shlán agus maidir le rochtain na hÍoslainne ar sheirbhísí ar sheirbhísí GOVSATCOM agus ar sheirbhísí rialtais Chlár an Aontais um Nascacht Shlán.

2.   Beidh an Íoslainn ina Rannpháirtí GOVSATCOM agus ina Rannpháirtí de Chlár an Aontais um Nascacht Shlán a mhéid a údaraíonn sí úsáideoirí GOVSATCOM agus úsáideoirí acmhainneachtaí rialtais chlár an Aontais um Nascacht Shlán, nó a mhéid a sholáthraíonn sí acmhainneachtaí cumarsáide satailíte, suíomhanna na gcodanna ar talamh nó cuid de shaoráidí na gcodanna ar talamh.

3.   Beidh na cearta a dheonaítear faoin gComhaontú seo gan dochar do chomhpháirt GOVSATCOM de Chlár Spáis an Aontais agus do Chlár an Aontais um Nascacht Shlán. Ní thabharfaidh an Comhaontú seo aon chumhacht chinnteoireachta don Íoslainn i ndáil le comhpháirt GOVSATCOM de Chlár Spáis an Aontais agus Clár an Aontais um Nascacht Shlán.

4.   Ní dhéanann an Comhaontú seo difear do chreat dlíthiúil ná do struchtúr institiúideach chomhpháirt GOVSATCOM de Chlár Spáis an Aontais ná Chlár an Aontais um Nascacht Shlán a bunaíodh le dlí an Aontais, do ghníomhartha ábhartha an Aontais a ionchorpraítear sa Chomhaontú maidir leis an Limistéar Eorpach Eacnamaíoch ná do na bearta a rinneadh chun gníomhartha an Aontais a chur chun feidhme. Ina theannta sin, ní dhéanann an Comhaontú seo difear do dhlíthe, rialacháin ná beartais an Aontais is infheidhme lena gcuirtear chun feidhme gealltanais maidir le neamhleathadh agus rialú onnmhairiúcháin le haghaidh earraí dé-úsáide.

5.   Is é an tAontas a bheidh ina úinéir ar na sócmhainní inláimhsithe agus doláimhsithe uile ar cuid iad den bhonneagar rialtais a forbraíodh faoi chomhpháirt GOVSATCOM de Chlár Spáis an Aontais agus faoi Chlár an Aontais um Nascacht Shlán, dá bhforáiltear in Airteagail 5(2) agus 19(2) den Rialachán maidir le Nascacht Shlán.

6.   Ní dhéanfaidh an Comhaontú seo difear do chearta ná d’oibleagáidí ceachtar Páirtí faoi aon chomhaontú idirnáisiúnta eile.

1.   Soláthrófar seirbhísí a chumhdaítear leis an gComhaontú seo do na rannpháirtithe dá dtagraítear in Airteagal 4 den Chomhaontú seo i gcomhréir na rialacha a leagtar amach i gCinneadh Cur Chun Feidhme (AE) 2023/1053 ón gCoimisiún (5) agus i gCinneadh Cur Chun Feidhme (AE) 2023/1055.

2.   Rochtain ar sheirbhísí GOVSATCOM agus ar sheirbhísí rialtais Chlár an Aontais um Nascacht Shlán, beidh an rochtain sin faoi réir chomhlíonadh na gcoinníollacha lena rialaítear a n-úsáid i gcomhréir leis an Airteagal seo.

3.   Féadfar na heintitis seo a leanas a údarú mar úsáideoirí sheirbhísí GOVSATCOM agus úsáideoirí sheirbhísí rialtais Chlár an Aontais um Nascacht Shlán:

4.   Úsáideoirí sheirbhísí GOVSATCOM agus sheirbhísí rialtais Chlár an Aontais um Nascacht Shlán dá dtagraítear i mír 3 den Airteagal seo, déanfaidh an Íoslainn iad a údarú go cuí chun na seirbhísí sin a úsáid agus comhlíonfaidh siad na ceanglais slándála ghinearálta dá dtagraítear in Airteagal 30(3) den Rialachán maidir le Nascacht Shlán agus Airteagal 34(2) den Rialachán maidir leis an Spás.

1.   Comhaontaíonn na Páirtithe oibriú i gcomhar san Aontas Idirnáisiúnta Teileachumarsáide a mhéid a bhaineann le saincheisteanna speictrim a bhaineann le nascacht shlán don Eoraip.

2.   I gcomhthéacs an chomhair dá dtagraítear i mír 1, cosnóidh na Páirtithe na leithdháiltí minicíochta is gá le haghaidh na gcóras um nascacht shlán don Eoraip chun a áirithiú go mbeidh seirbhísí na gcóras sin ar fáil, rud a rachaidh chun tairbhe do na húsáideoirí.

3.   Thairis sin, aithníonn na Páirtithe a thábhachtaí atá sé speictream raidió a úsáidtear le nascacht shlán a chosaint ar shuaitheadh agus ar thrasnaíocht. Chuige sin, sainaithneoidh siad foinsí trasnaíochta agus lorgóidh siad réitigh a bheidh inghlactha go frithpháirteach chun trasnaíocht den sórt sin a chomhrac.

4.   Ní fhorléireofar aon ní sa Chomhaontú seo mar ní a mhaolaítear ar fhorálacha infheidhme an Aontais Idirnáisiúnta Teileachumarsáide, lena n-áirítear Rialacháin Raidió an Aontais Idirnáisiúnta Teileachumarsáide.

1.   Déanfaidh na Páirtithe na córais um nascacht shlán a chosaint ar bhagairtí amhail mí-úsáid, trasnaíocht, suaitheadh agus gníomhartha naimhdeacha. Dá bhrí sin, déanfaidh na Páirtithe gach beart is indéanta chun leanúnachas, sábháilteacht agus slándáil sheirbhísí GOVSATCOM agus sheirbhísí Chlár an Aontais um Nascacht Shlán agus an bhonneagair agus na sócmhainní criticiúla gaolmhara ina gcríocha a áirithiú.

2.   Tá sé beartaithe ag an gCoimisiún Eorpach bearta a fhorbairt chun sócmhainní, faisnéis agus teicneolaíochtaí íogaire chomhpháirt GOVSATCOM de Chlár Spáis an Aontais agus Chlár an Aontais um Nascacht Shlán a chosaint ar aon bhagairt, a rialú agus a bhainistiú.

3.   Déanfaidh an Íoslainn bearta a ghlacadh agus a fhorfheidhmiú go tráthúil, laistigh dá dlínse, lena soláthrófar leibhéal slándála agus sábháilteachta atá coibhéiseach leis na bearta is infheidhme san Aontas Eorpach.

1.   Féadfaidh gach Páirtí, tar éis dul i gcomhairle leis an gcomhchoiste dá dtagraítear in Airteagal 18, bearta coimirce iomchuí a dhéanamh, lena n-áirítear foráil amháin nó níos mó den Chomhaontú seo a chur ar fionraí, má chinneann sé nach gcomhlíonann an Páirtí eile a oibleagáidí faoin gComhaontú seo. Tar éis bearta coimirce a ghlacadh, rachaidh na Páirtithe i mbun comhairliúcháin fhrithpháirteacha laistigh den chomhchoiste gan mhoill chun cur i bhfeidhm fhorálacha uile an Chomhaontaithe seo a athbhunú a luaithe is féidir.

2.   Beidh raon feidhme agus fad na mbeart dá dtagraítear i mír 1 den Airteagal seo teoranta don mhéid is gá chun an scéal a leigheas agus chun cothromaíocht chóir idir cearta agus oibleagáidí a áirithiú faoin gComhaontú seo. Leanfaidh na Páirtithe dá n-iarrachtaí an díospóid a réiteach i gcomhréir le hAirteagal 19.

1.   Bunaíonn na Páirtithe leis seo comhchoiste ar a mbeidh ionadaithe oifigiúla ó gach Páirtí a bhfuil a riachtanas eolais suite.

2.   Déanfaidh an comhchoiste maoirseacht ar fheidhmiú an Chomhaontaithe seo agus is é an fóram ina ndéanfaidh na Páirtithe tuairimí agus faisnéis a mhalartú maidir le haon saincheist a ardóidh ceachtar Páirtí maidir le cur chun feidhme an Chomhaontaithe seo.

3.   Glacfaidh an comhchoiste a rialacha nós imeachta. Féadfaidh an comhchoiste a chinneadh fochoistí a bhunú chun cúnamh a thabhairt dó a chúraimí a chomhlíonadh. Bunóidh an comhchoiste téarmaí tagartha na bhfochoistí sin.

4.   Féadfar Airteagal 9 agus Airteagal 12 a leasú le cinneadh a ghlacfaidh an comhchoiste. Tiocfaidh an leasú sin i bhfeidhm 30 lá ón dáta an ghlacfar an cinneadh sin.

5.   Tiocfaidh an comhchoiste le chéile dhá uair sa bhliain ar a laghad agus, nuair is gá, arna iarraidh sin do cheachtar Páirtí.

6.   Is é an comhchoiste an fóram ina dtabharfar aghaidh ar iarrataí ar chúnamh teicniúil ón Íoslainn.

1.   Tiocfaidh an Comhaontú seo i bhfeidhm an chéad lá den dara mí tar éis an dáta ar a dtabharfaidh na Páirtithe fógra dá chéile faoi chur i gcrích a nósanna imeachta dlíthiúla inmheánacha féin is gá chun na críche sin.

2.   Féadfar an Comhaontú seo a leasú trí chomhaontú i scríbhinn ó na Páirtithe. Tiocfaidh aon leasú ar an gComhaontú seo i bhfeidhm an chéad lá den dara mí tar éis ar a dtabharfaidh na Páirtithe fógra dá chéile faoi chur i gcrích a nósanna imeachta dlíthiúla inmheánacha féin is gá chun na críche sin.

3.   Beidh an Comhaontú seo i bhfeidhm go dtí an 31 Nollaig 2027. Cuirfear síneadh leis go huathoibríoch go ceann tréimhsí comhleanúnacha 10 mbliana, seachas i gcás ina gcuireann ceachtar den dá Pháirtí in iúl don Pháirtí eile i scríbhinn nach bhfuil sé ar intinn aige síneadh a chur leis an gComhaontú seo tráth nach déanaí ná 3 mhí roimh dheireadh na tréimhse tosaigh nó aon tréimhse 10 mbliana ina dhiaidh sin.

4.   Féadfaidh ceachtar Páirtí fógra i scríbhinn a thabhairt don Pháirtí eile go bhfuil sé ar intinn aige an Comhaontú seo a fhoirceannadh. Gabhfaidh éifeacht leis an bhfoirceannadh 6 mhí tar éis an dáta a gheofar an fógra.

5.   Tar éis dheireadh théarma an Chomhaontaithe seo de bhun mhír 3, nó tar éis a fhoirceanta de bhun mhír 4, cuirfidh na Páirtithe i bhfeidhm é maidir leis na tionscadail, na gníomhartha agus na gníomhaíochtaí uile a mhaoinítear faoi chomhpháirt GOVSATCOM de Chlár Spáis an Aontais agus faoi Chlár an Aontais um Nascacht Shlán nó faoin gComhaontú seo, go dtí deireadh na socruithe conarthacha a bhaineann leis na tionscadail, na gníomhartha agus na gníomhaíochtaí sin.

6.   I gcás ina ndéanfar an Rialachán maidir leis an Spás, an Rialachán maidir le Nascacht Shlán nó ceann amháin nó níos mó de na cinntí cur chun feidhme dá dtagraítear sa Chomhaontú seo a leasú, a aisghairm nó a athbhreithniú ar bhealach eile, déanfar tagairtí sa Chomhaontú seo don Rialachán maidir leis an Spás, don Rialachán maidir le Nascacht Shlán nó do na cinntí cur chun feidhme ábhartha, de réir mar is infheidhme, a fhorléiriú mar thagairtí don ghníomh nó do na gníomhartha leasaithe, aisghairthe nó athbhreithnithe ar bhealach eile.